੪. ਪਥਵਿਚਲਨਪਞ੍ਹੋ

੪. ‘‘ਭਨ੍ਤੇ ਨਾਗਸੇਨ, ਭਾਸਿਤਮ੍ਪੇਤਂ ਭਗਵਤਾ – ‘ਅਟ੍ਠਿਮੇ, ਭਿਕ੍ਖਵੇ [ਅਟ੍ਠਿਮੇ ਆਨਨ੍ਦ (ਅ. ਨਿ. ੮.੭੦)], ਹੇਤੂ ਅਟ੍ਠ ਪਚ੍ਚਯਾ ਮਹਤੋ ਭੂਮਿਚਾਲਸ੍ਸ ਪਾਤੁਭਾਵਾਯਾ’ਤਿ. ਅਸੇਸਵਚਨਂ ਇਦਂ, ਨਿਸ੍ਸੇਸਵਚਨਂ ਇਦਂ, ਨਿਪ੍ਪਰਿਯਾਯਵਚਨਂ ਇਦਂ, ਨਤ੍ਥਞ੍ਞੋ ਨਵਮੋ ਹੇਤੁ ਮਹਤੋ ਭੂਮਿਚਾਲਸ੍ਸ ਪਾਤੁਭਾਵਾਯ. ਯਦਿ, ਭਨ੍ਤੇ ਨਾਗਸੇਨ, ਅਞ੍ਞੋ ਨਵਮੋ ਹੇਤੁ ਭਵੇਯ੍ਯ ਮਹਤੋ ਭੂਮਿਚਾਲਸ੍ਸ ਪਾਤੁਭਾਵਾਯ, ਤਮ੍ਪਿ ਹੇਤੁਂ ਭਗਵਾ ਕਥੇਯ੍ਯ. ਯਸ੍ਮਾ ਚ ਖੋ, ਭਨ੍ਤੇ ਨਾਗਸੇਨ, ਨਤ੍ਥਞ੍ਞੋ ਨਵਮੋ ਹੇਤੁ ਮਹਤੋ ਭੂਮਿਚਾਲਸ੍ਸ ਪਾਤੁਭਾਵਾਯ, ਤਸ੍ਮਾ ਅਨਾਚਿਕ੍ਖਿਤੋ ਭਗਵਤਾ, ਅਯਞ੍ਚ ਨਵਮੋ ਹੇਤੁ ਦਿਸ੍ਸਤਿ ਮਹਤੋ ਭੂਮਿਚਾਲਸ੍ਸ ਪਾਤੁਭਾਵਾਯ, ਯਂ ਵੇਸ੍ਸਨ੍ਤਰੇਨ ਰਞ੍ਞਾ ਮਹਾਦਾਨੇ ਦੀਯਮਾਨੇ ਸਤ੍ਤਕ੍ਖਤ੍ਤੁਂ ਮਹਾਪਥਵੀ ਕਮ੍ਪਿਤਾਤਿ. ਯਦਿ, ਭਨ੍ਤੇ ਨਾਗਸੇਨ, ਅਟ੍ਠੇਵ ਹੇਤੂ ਅਟ੍ਠ ਪਚ੍ਚਯਾ ਮਹਤੋ ਭੂਮਿਚਾਲਸ੍ਸ ਪਾਤੁਭਾਵਾਯ, ਤੇਨ ਹਿ ਵੇਸ੍ਸਨ੍ਤਰੇਨ ਰਞ੍ਞਾ ਮਹਾਦਾਨੇ ਦੀਯਮਾਨੇ ਸਤ੍ਤਕ੍ਖਤ੍ਤੁਂ ਮਹਾਪਥਵੀ ਕਮ੍ਪਿਤਾਤਿ ਯਂ ਵਚਨਂ, ਤਂ ਮਿਚ੍ਛਾ. ਯਦਿ ਵੇਸ੍ਸਨ੍ਤਰੇਨ ਰਞ੍ਞਾ ਮਹਾਦਾਨੇ ਦੀਯਮਾਨੇ ਸਤ੍ਤਕ੍ਖਤ੍ਤੁਂ ਮਹਾਪਥਵੀ ਕਮ੍ਪਿਤਾ, ਤੇਨ ਹਿ ਅਟ੍ਠੇਵ ਹੇਤੂ ਅਟ੍ਠ ਪਚ੍ਚਯਾ ਮਹਤੋ ਭੂਮਿਚਾਲਸ੍ਸ ਪਾਤੁਭਾਵਾਯਾਤਿ ਤਮ੍ਪਿ ਵਚਨਂ ਮਿਚ੍ਛਾ. ਅਯਮ੍ਪਿ ਉਭਤੋ ਕੋਟਿਕੋ ਪਞ੍ਹੋ ਸੁਖੁਮੋ ਦੁਨ੍ਨਿਵੇਠਿਯੋ ਅਨ੍ਧਕਰਣੋ ਚੇਵ ਗਮ੍ਭੀਰੋ ਚ, ਸੋ ਤਵਾਨੁਪ੍ਪਤ੍ਤੋ, ਨੇਸੋ ਅਞ੍ਞੇਨ ਇਤ੍ਤਰਪਞ੍ਞੇਨ ਸਕ੍ਕਾ ਵਿਸਜ੍ਜੇਤੁਂ ਅਞ੍ਞਤ੍ਰ ਤਵਾਦਿਸੇਨ ਬੁਦ੍ਧਿਮਤਾ’’ਤਿ.

‘‘ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ – ‘ਅਟ੍ਠਿਮੇ, ਭਿਕ੍ਖਵੇ, ਹੇਤੂ ਅਟ੍ਠ ਪਚ੍ਚਯਾ ਮਹਤੋ ਭੂਮਿਚਾਲਸ੍ਸ ਪਾਤੁਭਾਵਾਯਾ’ਤਿ. ਯਂ ਵੇਸ੍ਸਨ੍ਤਰੇਨ ਰਞ੍ਞਾ ਮਹਾਦਾਨੇ ਦੀਯਮਾਨੇ ਸਤ੍ਤਕ੍ਖਤ੍ਤੁਂ ਮਹਾਪਥਵੀ ਕਮ੍ਪਿਤਾ, ਤਞ੍ਚ ਪਨ ਅਕਾਲਿਕਂ ਕਦਾਚੁਪ੍ਪਤ੍ਤਿਕਂ ਅਟ੍ਠਹਿ ਹੇਤੂਹਿ ਵਿਪ੍ਪਮੁਤ੍ਤਂ, ਤਸ੍ਮਾ ਅਗਣਿਤਂ ਅਟ੍ਠਹਿ ਹੇਤੂਹਿ.

‘‘ਯਥਾ, ਮਹਾਰਾਜ, ਲੋਕੇ ਤਯੋ ਯੇਵ ਮੇਘਾ ਗਣੀਯਨ੍ਤਿ ਵਸ੍ਸਿਕੋ ਹੇਮਨ੍ਤਿਕੋ ਪਾਵੁਸਕੋਤਿ. ਯਦਿ ਤੇ ਮੁਞ੍ਚਿਤ੍ਵਾ ਅਞ੍ਞੋ ਮੇਘੋ ਪਵਸ੍ਸਤਿ, ਨ ਸੋ ਮੇਘੋ ਗਣੀਯਤਿ ਸਮ੍ਮਤੇਹਿ ਮੇਘੇਹਿ, ਅਕਾਲਮੇਘੋਤ੍ਵੇਵ ਸਙ੍ਖਂ ਗਚ੍ਛਤਿ. ਏਵਮੇਵ ਖੋ, ਮਹਾਰਾਜ, ਵੇਸ੍ਸਨ੍ਤਰੇਨ ਰਞ੍ਞਾ ਮਹਾਦਾਨੇ ਦੀਯਮਾਨੇ ਯਂ ਸਤ੍ਤਕ੍ਖਤ੍ਤੁਂ ਮਹਾਪਥਵੀ ਕਮ੍ਪਿਤਾ, ਅਕਾਲਿਕਂ ਏਤਂ ਕਦਾਚੁਪ੍ਪਤ੍ਤਿਕਂ ਅਟ੍ਠਹਿ ਹੇਤੂਹਿ ਵਿਪ੍ਪਮੁਤ੍ਤਂ, ਨ ਤਂ ਗਣੀਯਤਿ ਅਟ੍ਠਹਿ ਹੇਤੂਹਿ.

‘‘ਯਥਾ ਵਾ ਪਨ, ਮਹਾਰਾਜ, ਹਿਮਵਨ੍ਤਾ ਪਬ੍ਬਤਾ ਪਞ੍ਚ ਨਦਿਸਤਾਨਿ ਸਨ੍ਦਨ੍ਤਿ, ਤੇਸਂ, ਮਹਾਰਾਜ, ਪਞ੍ਚਨ੍ਨਂ ਨਦਿਸਤਾਨਂ ਦਸੇਵ ਨਦਿਯੋ ਨਦਿਗਣਨਾਯ ਗਣੀਯਨ੍ਤਿ. ਸੇਯ੍ਯਥੀਦਂ, ਗਙ੍ਗਾ ਯਮੁਨਾ ਅਚਿਰਵਤੀ ਸਰਭੂ ਮਹੀ ਸਿਨ੍ਧੁ ਸਰਸ੍ਸਤੀ ਵੇਤ੍ਰਵਤੀ ਵੀਤਂਸਾ ਚਨ੍ਦਭਾਗਾਤਿ, ਅਵਸੇਸਾ ਨਦਿਯੋ ਨਦਿਗਣਨਾਯ ਅਗਣਿਤਾ. ਕਿਂ ਕਾਰਣਾ? ਨ ਤਾ ਨਦਿਯੋ ਧੁਵਸਲਿਲਾ. ਏਵਮੇਵ ਖੋ, ਮਹਾਰਾਜ, ਵੇਸ੍ਸਨ੍ਤਰੇਨ ਰਞ੍ਞਾ ਮਹਾਦਾਨੇ ਦੀਯਮਾਨੇ ਯਂ ਸਤ੍ਤਕ੍ਖਤ੍ਤੁਂ ਮਹਾਪਥਵੀ ਕਮ੍ਪਿਤਾ, ਅਕਾਲਿਕਂ ਏਤਂ ਕਦਾਚੁਪ੍ਪਤ੍ਤਿਕਂ ਅਟ੍ਠਹਿ ਹੇਤੂਹਿ ਵਿਪ੍ਪਮੁਤ੍ਤਂ, ਨ ਤਂ ਗਣੀਯਤਿ ਅਟ੍ਠਹਿ ਹੇਤੂਹਿ.

‘‘ਯਥਾ ਵਾ ਪਨ, ਮਹਾਰਾਜ, ਰਞ੍ਞੋ ਸਤਮ੍ਪਿ ਦ੍ਵਿਸਤਮ੍ਪਿ ਤਿਸਤਮ੍ਪਿ ਅਮਚ੍ਚਾ ਹੋਨ੍ਤਿ, ਤੇਸਂ ਛ ਯੇਵ ਜਨਾ ਅਮਚ੍ਚਗਣਨਾਯ ਗਣੀਯਨ੍ਤਿ. ਸੇਯ੍ਯਥੀਦਂ, ਸੇਨਾਪਤਿ ਪੁਰੋਹਿਤੋ ਅਕ੍ਖਦਸ੍ਸੋ ਭਣ੍ਡਾਗਾਰਿਕੋ ਛਤ੍ਤਗ੍ਗਾਹਕੋ ਖਗ੍ਗਗ੍ਗਾਹਕੋ. ਏਤੇ ਯੇਵ ਅਮਚ੍ਚਗਣਨਾਯ ਗਣੀਯਨ੍ਤਿ. ਕਿਂ ਕਾਰਣਾ? ਯੁਤ੍ਤਤ੍ਤਾ ਰਾਜਗੁਣੇਹਿ, ਅਵਸੇਸਾ ਅਗਣਿਤਾ, ਸਬ੍ਬੇ ਅਮਚ੍ਚਾਤ੍ਵੇਵ ਸਙ੍ਖਂ ਗਚ੍ਛਨ੍ਤਿ. ਏਵਮੇਵ ਖੋ, ਮਹਾਰਾਜ, ਵੇਸ੍ਸਨ੍ਤਰੇਨ ਰਞ੍ਞਾ ਮਹਾਦਾਨੇ ਦੀਯਮਾਨੇ ਯਂ ਸਤ੍ਤਕ੍ਖਤ੍ਤੁਂ ਮਹਾਪਥਵੀ ਕਮ੍ਪਿਤਾ, ਅਕਾਲਿਕਂ ਏਤਂ ਕਦਾਚੁਪ੍ਪਤ੍ਤਿਕਂ ਅਟ੍ਠਹਿ ਹੇਤੂਹਿ ਵਿਪ੍ਪਮੁਤ੍ਤਂ, ਨ ਤਂ ਗਣੀਯਤਿ ਅਟ੍ਠਹਿ ਹੇਤੂਹਿ.

‘‘ਸੁਯ੍ਯਤਿ ਨੁ ਖੋ, ਮਹਾਰਾਜ, ਏਤਰਹਿ ਜਿਨਸਾਸਨੇ ਕਤਾਧਿਕਾਰਾਨਂ ਦਿਟ੍ਠਧਮ੍ਮਸੁਖਵੇਦਨੀਯਕਮ੍ਮਂ, ਕਿਤ੍ਤਿ ਚ ਯੇਸਂ ਅਬ੍ਭੁਗ੍ਗਤਾ ਦੇਵਮਨੁਸ੍ਸੇਸੂ’’ਤਿ? ‘‘ਆਮ, ਭਨ੍ਤੇ, ਸੁਯ੍ਯਤਿ ਏਤਰਹਿ ਜਿਨਸਾਸਨੇ ਕਤਾਧਿਕਾਰਾਨਂ ਦਿਟ੍ਠਧਮ੍ਮਸੁਖਵੇਦਨੀਯਕਮ੍ਮਂ, ਕਿਤ੍ਤਿ ਚ ਯੇਸਂ ਅਬ੍ਭੁਗ੍ਗਤਾ ਦੇਵਮਨੁਸ੍ਸੇਸੁ ਸਤ੍ਤ ਜਨਾਤਿ’’. ‘‘ਕੇ ਚ ਤੇ, ਮਹਾਰਾਜਾ’’ਤਿ? ‘‘ਸੁਮਨੋ ਚ, ਭਨ੍ਤੇ, ਮਾਲਾਕਾਰੋ, ਏਕਸਾਟਕੋ ਚ ਬ੍ਰਾਹ੍ਮਣੋ, ਪੁਣ੍ਣੋ ਚ ਭਤਕੋ, ਮਲ੍ਲਿਕਾ ਚ ਦੇਵੀ, ਗੋਪਾਲਮਾਤਾ ਚ ਦੇਵੀ, ਸੁਪ੍ਪਿਯਾ ਚ ਉਪਾਸਿਕਾ, ਪੁਣ੍ਣਾ ਚ ਦਾਸੀਤਿ ਇਮੇ ਸਤ੍ਤ ਦਿਟ੍ਠਧਮ੍ਮਸੁਖਵੇਦਨੀਯਾ ਸਤ੍ਤਾ, ਕਿਤ੍ਤਿ ਚ ਇਮੇਸਂ ਅਬ੍ਭੁਗ੍ਗਤਾ ਦੇਵਮਨੁਸ੍ਸੇਸੂ’’ਤਿ.

‘‘ਅਪਰੇਪਿ ਸੁਯ੍ਯਨ੍ਤਿ ਨੁ ਖੋ ਅਤੀਤੇ ਮਾਨੁਸਕੇਨੇਵ ਸਰੀਰਦੇਹੇਨ ਤਿਦਸਭਵਨਂ ਗਤਾ’’ਤਿ? ‘‘ਆਮ, ਭਨ੍ਤੇ, ਸੁਯ੍ਯਨ੍ਤੀ’’ਤਿ. ‘‘ਕੇ ਚ ਤੇ, ਮਹਾਰਾਜਾ’’ਤਿ? ‘‘ਗੁਤ੍ਤਿਲੋ ਚ ਗਨ੍ਧਬ੍ਬੋ, ਸਾਧੀਨੋ ਚ ਰਾਜਾ, ਨਿਮਿ ਚ ਰਾਜਾ, ਮਨ੍ਧਾਤਾ ਚ ਰਾਜਾਤਿ ਇਮੇ ਚਤੁਰੋ ਜਨਾ ਸੁਯ੍ਯਨ੍ਤਿ, ਤੇਨੇਵ ਮਾਨੁਸਕੇਨ ਸਰੀਰਦੇਹੇਨ ਤਿਦਸਭਵਨਂ ਗਤਾ’’ਤਿ. ‘‘ਸੁਚਿਰਮ੍ਪਿ ਕਤਂ ਸੁਯ੍ਯਤਿ ਸੁਕਤਦੁਕ੍ਕਟਨ੍ਤਿ? ਸੁਤਪੁਬ੍ਬਂ ਪਨ ਤਯਾ, ਮਹਾਰਾਜ, ਅਤੀਤੇ ਵਾ ਅਦ੍ਧਾਨੇ ਵਤ੍ਤਮਾਨੇ ਵਾ ਅਦ੍ਧਾਨੇ ਇਤ੍ਥਨ੍ਨਾਮਸ੍ਸ ਦਾਨੇ ਦੀਯਮਾਨੇ ਸਕਿਂ ਵਾ ਦ੍ਵਿਕ੍ਖਤ੍ਤੁਂ ਵਾ ਤਿਕ੍ਖਤ੍ਤੁਂ ਵਾ ਮਹਾਪਥਵੀ ਕਮ੍ਪਿਤਾ’’ਤਿ? ‘‘ਨ ਹਿ ਭਨ੍ਤੇ’’ਤਿ. ‘‘ਅਤ੍ਥਿ ਮੇ, ਮਹਾਰਾਜ, ਆਗਮੋ ਅਧਿਗਮੋ ਪਰਿਯਤ੍ਤਿ ਸਵਨਂ ਸਿਕ੍ਖਾਬਲਂ ਸੁਸ੍ਸੂਸਾ ਪਰਿਪੁਚ੍ਛਾ ਆਚਰਿਯੁਪਾਸਨਂ, ਮਯਾਪਿ ਨ ਸੁਤਪੁਬ੍ਬਂ ‘ਇਤ੍ਥਨ੍ਨਾਮਸ੍ਸ ਦਾਨੇ ਦੀਯਮਾਨੇ ਸਕਿਂ ਵਾ ਦ੍ਵਿਕ੍ਖਤ੍ਤੁਂ ਵਾ ਤਿਕ੍ਖਤ੍ਤੁਂ ਵਾ ਮਹਾਪਥਵੀ ਕਮ੍ਪਿਤਾ’ਤਿ ਠਪੇਤ੍ਵਾ ਵੇਸ੍ਸਨ੍ਤਰਸ੍ਸ ਰਾਜਵਸਭਸ੍ਸ ਦਾਨਵਰਂ. ਭਗਵਤੋ ਚ, ਮਹਾਰਾਜ, ਕਸ੍ਸਪਸ੍ਸ, ਭਗਵਤੋ ਚ ਸਕ੍ਯਮੁਨਿਨੋਤਿ ਦ੍ਵਿਨ੍ਨਂ ਬੁਦ੍ਧਾਨਂ ਅਨ੍ਤਰੇ ਗਣਨਪਥਂ ਵੀਤਿਵਤ੍ਤਾ ਵਸ੍ਸਕੋਟਿਯੋ ਅਤਿਕ੍ਕਨ੍ਤਾ, ਤਤ੍ਥਪਿ ਮੇ ਸਵਨਂ ਨਤ੍ਥਿ ‘ਇਤ੍ਥਨ੍ਨਾਮਸ੍ਸ ਦਾਨੇ ਦੀਯਮਾਨੇ ਸਕਿਂ ਵਾ ਦ੍ਵਿਕ੍ਖਤ੍ਤੁਂ ਵਾ ਤਿਕ੍ਖਤ੍ਤੁਂ ਵਾ ਮਹਾਪਥਵੀ ਕਮ੍ਪਿਤਾ’ਤਿ. ਨ, ਮਹਾਰਾਜ, ਤਾਵਤਕੇਨ ਵੀਰਿਯੇਨ ਤਾਵਤਕੇਨ ਪਰਕ੍ਕਮੇਨ ਮਹਾਪਥਵੀ ਕਮ੍ਪਤਿ, ਗੁਣਭਾਰਭਰਿਤਾ, ਮਹਾਰਾਜ, ਸਬ੍ਬਸੋਚੇਯ੍ਯਕਿਰਿਯਗੁਣਭਾਰਭਰਿਤਾ ਧਾਰੇਤੁਂ ਨ ਵਿਸਹਨ੍ਤੀ ਮਹਾਪਥਵੀ ਚਲਤਿ ਕਮ੍ਪਤਿ ਪਵੇਧਤਿ.

‘‘ਯਥਾ, ਮਹਾਰਾਜ, ਸਕਟਸ੍ਸ ਅਤਿਭਾਰਭਰਿਤਸ੍ਸ ਨਾਭਿਯੋ ਚ ਨੇਮਿਯੋ ਚ ਫਲਨ੍ਤਿ ਅਕ੍ਖੋ ਭਿਜ੍ਜਤਿ, ਏਵਮੇਵ ਖੋ, ਮਹਾਰਾਜ, ਸਬ੍ਬਸੋਚੇਯ੍ਯਕਿਰਿਯਗੁਣਭਾਰਭਰਿਤਾ ਮਹਾਪਥਵੀ ਧਾਰੇਤੁਂ ਨ ਵਿਸਹਨ੍ਤੀ ਚਲਤਿ ਕਮ੍ਪਤਿ ਪਵੇਧਤਿ.

‘‘ਯਥਾ ਵਾ ਪਨ, ਮਹਾਰਾਜ, ਗਗਨਂ ਅਨਿਲਜਲਵੇਗਸਞ੍ਛਾਦਿਤਂ ਉਸ੍ਸਨ੍ਨਜਲਭਾਰਭਰਿਤਂ ਅਤਿਵਾਤੇਨ ਫੁਟਿਤਤ੍ਤਾ ਨਦਤਿ ਰਵਤਿ ਗਲ਼ਗਲ਼ਾਯਤਿ, ਏਵਮੇਵ ਖੋ, ਮਹਾਰਾਜ, ਮਹਾਪਥਵੀ ਰਞ੍ਞੋ ਵੇਸ੍ਸਨ੍ਤਰਸ੍ਸ ਦਾਨਬਲਵਿਪੁਲਉਸ੍ਸਨ੍ਨਭਾਰਭਰਿਤਾ ਧਾਰੇਤੁਂ ਨ ਵਿਸਹਨ੍ਤੀ ਚਲਤਿ ਕਮ੍ਪਤਿ ਪਵੇਧਤਿ. ਨ ਹਿ, ਮਹਾਰਾਜ, ਰਞ੍ਞੋ ਵੇਸ੍ਸਨ੍ਤਰਸ੍ਸ ਚਿਤ੍ਤਂ ਰਾਗਵਸੇਨ ਪਵਤ੍ਤਤਿ, ਨ ਦੋਸਵਸੇਨ ਪਵਤ੍ਤਤਿ, ਨ ਮੋਹਵਸੇਨ ਪਵਤ੍ਤਤਿ, ਨ ਮਾਨਵਸੇਨ ਪਵਤ੍ਤਤਿ, ਨ ਦਿਟ੍ਠਿਵਸੇਨ ਪਵਤ੍ਤਤਿ, ਨ ਕਿਲੇਸਵਸੇਨ ਪਵਤ੍ਤਤਿ, ਨ ਵਿਤਕ੍ਕਵਸੇਨ ਪਵਤ੍ਤਤਿ, ਨ ਅਰਤਿਵਸੇਨ ਪਵਤ੍ਤਤਿ, ਅਥ ਖੋ ਦਾਨਵਸੇਨ ਬਹੁਲਂ ਪਵਤ੍ਤਤਿ ‘ਕਿਨ੍ਤਿ ਅਨਾਗਤਾ ਯਾਚਕਾ ਮਮ ਸਨ੍ਤਿਕੇ ਆਗਚ੍ਛੇਯ੍ਯੁਂ, ਆਗਤਾ ਚ ਯਾਚਕਾ ਯਥਾਕਾਮਂ ਲਭਿਤ੍ਵਾ ਅਤ੍ਤਮਨਾ ਭਵੇਯ੍ਯੁ’ਨ੍ਤਿ ਸਤਤਂ ਸਮਿਤਂ ਦਾਨਂ ਪਤਿ ਮਾਨਸਂ ਠਪਿਤਂ ਹੋਤਿ. ਰਞ੍ਞੋ, ਮਹਾਰਾਜ, ਵੇਸ੍ਸਨ੍ਤਰਸ੍ਸ ਸਤਤਂ ਸਮਿਤਂ ਦਸਸੁ ਠਾਨੇਸੁ ਮਾਨਸਂ ਠਪਿਤਂ ਹੋਤਿ ਦਮੇ ਸਮੇ ਖਨ੍ਤਿਯਂ ਸਂਵਰੇ ਯਮੇ ਨਿਯਮੇ ਅਕ੍ਕੋਧੇ ਅਵਿਹਿਂਸਾਯਂ ਸਚ੍ਚੇ ਸੋਚੇਯ੍ਯੇ. ਰਞ੍ਞੋ, ਮਹਾਰਾਜ, ਵੇਸ੍ਸਨ੍ਤਰਸ੍ਸ ਕਾਮੇਸਨਾ ਪਹੀਨਾ, ਭਵੇਸਨਾ ਪਟਿਪ੍ਪਸ੍ਸਦ੍ਧਾ, ਬ੍ਰਹ੍ਮਚਰਿਯੇਸਨਾਯ ਯੇਵ ਉਸ੍ਸੁਕ੍ਕਂ ਆਪਨ੍ਨੋ, ਰਞ੍ਞੋ, ਮਹਾਰਾਜ, ਵੇਸ੍ਸਨ੍ਤਰਸ੍ਸ ਅਤ੍ਤਰਕ੍ਖਾ [ਪਰਰਕ੍ਖਾਯ (ਸੀ. ਪੀ.)] ਪਹੀਨਾ, ਸਬ੍ਬਸਤ੍ਤਰਕ੍ਖਾਯ ਉਸ੍ਸੁਕ੍ਕਂ ਆਪਨ੍ਨੋ ‘ਕਿਨ੍ਤਿ ਇਮੇ ਸਤ੍ਤਾ ਸਮਗ੍ਗਾ ਅਸ੍ਸੁ ਅਰੋਗਾ ਸਧਨਾ ਦੀਘਾਯੁਕਾ’ਤਿ ਬਹੁਲਂ ਯੇਵ ਮਾਨਸਂ ਪਵਤ੍ਤਤਿ. ਦਦਮਾਨੋ ਚ, ਮਹਾਰਾਜ, ਵੇਸ੍ਸਨ੍ਤਰੋ ਰਾਜਾ ਤਂ ਦਾਨਂ ਨ ਭਵਸਮ੍ਪਤ੍ਤਿਹੇਤੁ ਦੇਤਿ, ਨ ਧਨਹੇਤੁ ਦੇਤਿ, ਨ ਪਟਿਦਾਨਹੇਤੁ ਦੇਤਿ, ਨ ਉਪਲਾਪਨਹੇਤੁ ਦੇਤਿ, ਨ ਆਯੁਹੇਤੁ ਦੇਤਿ, ਨ ਵਣ੍ਣਹੇਤੁ ਦੇਤਿ, ਨ ਸੁਖਹੇਤੁ ਦੇਤਿ, ਨ ਬਲਹੇਤੁ ਦੇਤਿ, ਨ ਯਸਹੇਤੁ ਦੇਤਿ, ਨ ਪੁਤ੍ਤਹੇਤੁ ਦੇਤਿ, ਨ ਧੀਤੁਹੇਤੁ ਦੇਤਿ, ਅਥ ਖੋ ਸਬ੍ਬਞ੍ਞੁਤਞਾਣਹੇਤੁ ਸਬ੍ਬਞ੍ਞੁਤਞਾਣਰਤਨਸ੍ਸ ਕਾਰਣਾ ਏਵਰੂਪੇ ਅਤੁਲਵਿਪੁਲਾਨੁਤ੍ਤਰੇ ਦਾਨਵਰੇ ਅਦਾਸਿ, ਸਬ੍ਬਞ੍ਞੁਤਂ ਪਤ੍ਤੋ ਚ ਇਮਂ ਗਾਥਂ ਅਭਾਸਿ –

‘‘‘ਜਾਲਿਂ ਕਣ੍ਹਾਜਿਨਂ ਧੀਤਂ, ਮਦ੍ਦਿਦੇਵਿਂ ਪਤਿਬ੍ਬਤਂ;

ਚਜਮਾਨੋ ਨ ਚਿਨ੍ਤੇਸਿਂ, ਬੋਧਿਯਾ ਯੇਵ ਕਾਰਣਾ’ਤਿ.

‘‘ਵੇਸ੍ਸਨ੍ਤਰੋ, ਮਹਾਰਾਜ, ਰਾਜਾ ਅਕ੍ਕੋਧੇਨ ਕੋਧਂ ਜਿਨਾਤਿ, ਅਸਾਧੁਂ ਸਾਧੁਨਾ ਜਿਨਾਤਿ, ਕਦਰਿਯਂ ਦਾਨੇਨ ਜਿਨਾਤਿ, ਅਲਿਕਵਾਦਿਨਂ ਸਚ੍ਚੇਨ ਜਿਨਾਤਿ, ਸਬ੍ਬਂ ਅਕੁਸਲਂ ਕੁਸਲੇਨ ਜਿਨਾਤਿ. ਤਸ੍ਸ ਏਵਂ ਦਦਮਾਨਸ੍ਸ ਧਮ੍ਮਾਨੁਗਤਸ੍ਸ ਧਮ੍ਮਸੀਸਕਸ੍ਸ [ਧਮ੍ਮਾਸੀਸਕਸ੍ਸ (ਕ.)] ਦਾਨਨਿਸ੍ਸਨ੍ਦਬਲਵ [ਦਾਨਨਿਸ੍ਸਨ੍ਦਬਲ (ਸੀ. ਪੀ.)] ਵੀਰਿਯਵਿਪੁਲਵਿਪ੍ਫਾਰੇਨ ਹੇਟ੍ਠਾ ਮਹਾਵਾਤਾ ਸਞ੍ਚਲਨ੍ਤਿ ਸਣਿਕਂ ਸਣਿਕਂ ਸਕਿਂ ਸਕਿਂ ਆਕੁਲਾਕੁਲਾ ਵਾਯਨ੍ਤਿ ਓਨਮਨ੍ਤਿ ਉਨ੍ਨਮਨ੍ਤਿ ਵਿਨਮਨ੍ਤਿ, ਛਿਨ੍ਨਪਤ੍ਤਪਾਦਪਾ [ਸੀਨ੍ਨਪ੍ਪਤ੍ਤਪਾਦਪਾ (ਸੀ.)] ਪਪਤਨ੍ਤਿ, ਗੁਮ੍ਬਂ ਗੁਮ੍ਬਂ ਵਲਾਹਕਾ ਗਗਨੇ ਸਨ੍ਧਾਵਨ੍ਤਿ, ਰਜੋਸਞ੍ਚਿਤਾ ਵਾਤਾ ਦਾਰੁਣਾ ਹੋਨ੍ਤਿ, ਗਗਨਂ ਉਪ੍ਪੀਲ਼ਿਤਾ ਵਾਤਾ ਵਾਯਨ੍ਤਿ, ਸਹਸਾ ਧਮਧਮਾਯਨ੍ਤਿ, ਮਹਾਭੀਮੋ ਸਦ੍ਦੋ ਨਿਚ੍ਛਰਤਿ, ਤੇਸੁ ਵਾਤੇਸੁ ਕੁਪਿਤੇਸੁ ਉਦਕਂ ਸਣਿਕਂ ਸਣਿਕਂ ਚਲਤਿ, ਉਦਕੇ ਚਲਿਤੇ ਖੁਬ੍ਭਨ੍ਤਿ ਮਚ੍ਛਕਚ੍ਛਪਾ, ਯਮਕਯਮਕਾ ਊਮਿਯੋ ਜਾਯਨ੍ਤਿ, ਜਲਚਰਾ ਸਤ੍ਤਾ ਤਸਨ੍ਤਿ, ਜਲਵੀਚਿ ਯੁਗਨਦ੍ਧੋ ਵਤ੍ਤਤਿ, ਵੀਚਿਨਾਦੋ ਪਵਤ੍ਤਤਿ, ਘੋਰਾ ਬੁਬ੍ਬੁਲ਼ਾ [ਪੁਬ੍ਬੁਲ਼ਾ (ਕ.)] ਉਟ੍ਠਹਨ੍ਤਿ, ਫੇਣਮਾਲਾ ਭਵਨ੍ਤਿ, ਉਤ੍ਤਰਤਿ ਮਹਾਸਮੁਦ੍ਦੋ, ਦਿਸਾਵਿਦਿਸਂ ਧਾਵਤਿ ਉਦਕਂ, ਉਦ੍ਧਂਸੋਤਪਟਿਸੋਤਮੁਖਾ ਸਨ੍ਦਨ੍ਤਿ ਸਲਿਲਧਾਰਾ, ਤਸਨ੍ਤਿ ਅਸੁਰਾ ਗਰੁਲ਼ਾ ਨਾਗਾ ਯਕ੍ਖਾ, ਉਬ੍ਬਿਜ੍ਜਨ੍ਤਿ ‘ਕਿਂ ਨੁ ਖੋ, ਕਥਂ ਨੁ ਖੋ, ਸਾਗਰੋ ਵਿਪਰਿਵਤ੍ਤਤੀ’ਤਿ, ਗਮਨਪਥਮੇਸਨ੍ਤਿ ਭੀਤਚਿਤ੍ਤਾ, ਖੁਭਿਤੇ ਲੁਲ਼ਿਤੇ ਜਲਧਾਰੇ ਪਕਮ੍ਪਤਿ ਮਹਾਪਥਵੀ ਸਨਗਾ ਸਸਾਗਰਾ, ਪਰਿਵਤ੍ਤਤਿ ਸਿਨੇਰੁਗਿਰਿ ਕੂਟਸੇਲਸਿਖਰੋ ਵਿਨਮਮਾਨੋ ਹੋਤਿ, ਵਿਮਨਾ ਹੋਨ੍ਤਿ ਅਹਿਨਕੁਲਬਿਲ਼ਾਰਕੋਟ੍ਠੁਕਸੂਕਰਮਿਗਪਕ੍ਖਿਨੋ, ਰੁਦਨ੍ਤਿ ਯਕ੍ਖਾ ਅਪ੍ਪੇਸਕ੍ਖਾ, ਹਸਨ੍ਤਿ ਯਕ੍ਖਾ ਮਹੇਸਕ੍ਖਾ ਕਮ੍ਪਮਾਨਾਯ ਮਹਾਪਥਵਿਯਾ.

‘‘ਯਥਾ, ਮਹਾਰਾਜ, ਮਹਤਿ ਮਹਾਪਰਿਯੋਗੇ ਉਦ੍ਧਨਗਤੇ ਉਦਕਸਮ੍ਪੁਣ੍ਣੇ ਆਕਿਣ੍ਣਤਣ੍ਡੁਲੇ ਹੇਟ੍ਠਤੋ ਅਗ੍ਗਿ ਜਲਮਾਨੋ ਪਠਮਂ ਤਾਵ ਪਰਿਯੋਗਂ ਸਨ੍ਤਾਪੇਤਿ, ਪਰਿਯੋਗੋ ਸਨ੍ਤਤ੍ਤੋ ਉਦਕਂ ਸਨ੍ਤਾਪੇਤਿ, ਉਦਕਂ ਸਨ੍ਤਤ੍ਤਂ ਤਣ੍ਡੁਲਂ ਸਨ੍ਤਾਪੇਤਿ, ਤਣ੍ਡੁਲਂ ਸਨ੍ਤਤ੍ਤਂ ਉਮ੍ਮੁਜ੍ਜਤਿ ਨਿਮੁਜ੍ਜਤਿ, ਬੁਬ੍ਬੁਲ਼ਕਜਾਤਂ ਹੋਤਿ, ਫੇਣਮਾਲਾ ਉਤ੍ਤਰਤਿ; ਏਵਮੇਵ ਖੋ, ਮਹਾਰਾਜ, ਵੇਸ੍ਸਨ੍ਤਰੋ ਰਾਜਾ ਯਂ ਲੋਕੇ ਦੁਚ੍ਚਜਂ, ਤਂ ਚਜਿ, ਤਸ੍ਸ ਤਂ ਦੁਚ੍ਚਜਂ ਚਜਨ੍ਤਸ੍ਸ ਦਾਨਸ੍ਸ ਸਭਾਵਨਿਸ੍ਸਨ੍ਦੇਨ ਹੇਟ੍ਠਾ ਮਹਾਵਾਤਾ ਧਾਰੇਤੁਂ ਨ ਵਿਸਹਨ੍ਤਾ ਪਰਿਕੁਪ੍ਪਿਂਸੁ [ਪਰਿਕਮ੍ਪਿਂਸੁ (ਕ.)], ਮਹਾਵਾਤੇਸੁ ਪਰਿਕੁਪਿਤੇਸੁ [ਪਰਿਖੁਬ੍ਭਿਤੇਸੁ (ਸ੍ਯਾ.)] ਉਦਕਂ ਕਮ੍ਪਿ, ਉਦਕੇ ਕਮ੍ਪਿਤੇ ਮਹਾਪਥਵੀ ਕਮ੍ਪਿ, ਇਤਿ ਤਦਾ ਮਹਾਵਾਤਾ ਚ ਉਦਕਞ੍ਚ ਮਹਾਪਥਵੀ ਚਾਤਿ ਇਮੇ ਤਯੋ ਏਕਮਨਾ ਵਿਯ ਅਹੇਸੁਂ ਮਹਾਦਾਨਨਿਸ੍ਸਨ੍ਦੇਨ ਵਿਪੁਲਬਲਵੀਰਿਯੇਨ ਨਤ੍ਥੇਦਿਸੋ, ਮਹਾਰਾਜ, ਅਞ੍ਞਸ੍ਸ ਦਾਨਾਨੁਭਾਵੋ, ਯਥਾ ਵੇਸ੍ਸਨ੍ਤਰਸ੍ਸ ਰਞ੍ਞੋ ਮਹਾਦਾਨਾਨੁਭਾਵੋ. ਯਥਾ, ਮਹਾਰਾਜ, ਮਹਿਯਾ ਬਹੁਵਿਧਾ ਮਣਯੋ ਵਿਜ੍ਜਨ੍ਤਿ. ਸੇਯ੍ਯਥੀਦਂ, ਇਨ੍ਦਨੀਲੋ ਮਹਾਨੀਲੋ ਜੋਤਿਰਸੋ ਵੇਲ਼ੁਰਿਯੋ ਉਮ੍ਮਾਪੁਪ੍ਫੋ ਸਿਰੀਸਪੁਪ੍ਫੋ ਮਨੋਹਰੋ ਸੂਰਿਯਕਨ੍ਤੋ ਚਨ੍ਦਕਨ੍ਤੋ ਵਜਿਰੋ ਖਜ੍ਜੋਪਨਕੋ ਫੁਸ੍ਸਰਾਗੋ ਲੋਹਿਤਙ੍ਗੋ ਮਸਾਰਗਲ੍ਲੋਤਿ, ਏਤੇ ਸਬ੍ਬੇ ਅਤਿਕ੍ਕਮ੍ਮ ਚਕ੍ਕਵਤ੍ਤਿਮਣਿ ਅਗ੍ਗਮਕ੍ਖਾਯਤਿ, ਚਕ੍ਕਵਤ੍ਤਿਮਣਿ, ਮਹਾਰਾਜ, ਸਮਨ੍ਤਾ ਯੋਜਨਂ ਓਭਾਸੇਤਿ. ਏਵਮੇਵ ਖੋ, ਮਹਾਰਾਜ, ਯਂ ਕਿਞ੍ਚਿ ਮਹਿਯਾ ਦਾਨਂ ਵਿਜ੍ਜਤਿ ਅਪਿ ਅਸਦਿਸਦਾਨਂ ਪਰਮਂ, ਤਂ ਸਬ੍ਬਂ ਅਤਿਕ੍ਕਮ੍ਮ ਵੇਸ੍ਸਨ੍ਤਰਸ੍ਸ ਰਞ੍ਞੋ ਮਹਾਦਾਨਂ ਅਗ੍ਗਮਕ੍ਖਾਯਤਿ, ਵੇਸ੍ਸਨ੍ਤਰਸ੍ਸ, ਮਹਾਰਾਜ, ਰਞ੍ਞੋ ਮਹਾਦਾਨੇ ਦੀਯਮਾਨੇ ਸਤ੍ਤਕ੍ਖਤ੍ਤੁਂ ਮਹਾਪਥਵੀ ਕਮ੍ਪਿਤਾ’’ਤਿ.

‘‘ਅਚ੍ਛਰਿਯਂ, ਭਨ੍ਤੇ ਨਾਗਸੇਨ, ਬੁਦ੍ਧਾਨਂ, ਅਬ੍ਭੁਤਂ, ਭਨ੍ਤੇ ਨਾਗਸੇਨ, ਬੁਦ੍ਧਾਨਂ, ਯਂ ਤਥਾਗਤੋ ਬੋਧਿਸਤ੍ਤੋ ਸਮਾਨੋ ਅਸਮੋ ਲੋਕੇਨ ਏਵਂਖਨ੍ਤਿ ਏਵਂਚਿਤ੍ਤੋ ਏਵਂਅਧਿਮੁਤ੍ਤਿ ਏਵਂਅਧਿਪ੍ਪਾਯੋ, ਬੋਧਿਸਤ੍ਤਾਨਂ, ਭਨ੍ਤੇ ਨਾਗਸੇਨ, ਪਰਕ੍ਕਮੋ ਦਕ੍ਖਾਪਿਤੋ, ਪਾਰਮੀ ਚ ਜਿਨਾਨਂ ਭਿਯ੍ਯੋ ਓਭਾਸਿਤਾ, ਚਰਿਯਂ ਚਰਤੋਪਿ ਤਾਵ ਤਥਾਗਤਸ੍ਸ ਸਦੇਵਕੇ ਲੋਕੇ ਸੇਟ੍ਠਭਾਵੋ ਅਨੁਦਸ੍ਸਿਤੋ. ਸਾਧੁ, ਭਨ੍ਤੇ ਨਾਗਸੇਨ, ਥੋਮਿਤਂ ਜਿਨਸਾਸਨਂ, ਜੋਤਿਤਾ ਜਿਨਪਾਰਮੀ, ਛਿਨ੍ਨੋ ਤਿਤ੍ਥਿਯਾਨਂ ਵਾਦਗਣ੍ਠਿ, ਭਿਨ੍ਨੋ ਪਰਾਪਵਾਦਕੁਮ੍ਭੋ [ਗੁਮ੍ਬੋ ਤਯਾ ਵਿਦ੍ਧਂਸਿਤੋ (ਸ੍ਯਾ.)], ਪਞ੍ਹੋ ਗਮ੍ਭੀਰੋ ਉਤ੍ਤਾਨੀਕਤੋ, ਗਹਨਂ ਅਗਹਨਂ ਕਤਂ, ਸਮ੍ਮਾ ਲਦ੍ਧਂ ਜਿਨਪੁਤ੍ਤਾਨਂ ਨਿਬ੍ਬਾਹਨਂ [ਨਿਬ੍ਬਾਯਨਂ (ਕ.)], ਏਵਮੇਤਂ ਗਣਿਵਰਪਵਰ ਤਥਾ ਸਮ੍ਪਟਿਚ੍ਛਾਮਾ’’ਤਿ.

ਪਥਵਿਚਲਨਪਞ੍ਹੋ ਚਤੁਤ੍ਥੋ.