੧. ਕਤਾਧਿਕਾਰਸਫਲਪਞ੍ਹੋ

੧. ਅਥ ਖੋ ਮਿਲਿਨ੍ਦੋ ਰਾਜਾ ਕਤਾਵਕਾਸੋ ਨਿਪਚ੍ਚ ਗਰੁਨੋ ਪਾਦੇ ਸਿਰਸਿ ਅਞ੍ਜਲਿਂ ਕਤ੍ਵਾ ਏਤਦਵੋਚ ‘‘ਭਨ੍ਤੇ ਨਾਗਸੇਨ, ਇਮੇ ਤਿਤ੍ਥਿਯਾ ਏਵਂ ਭਣਨ੍ਤਿ [ਵਞ੍ਚੋ ਭਵਤਿ ਅਫਲੋ (ਸੀ. ਪੀ. ਕ.)] ‘ਯਦਿ ਬੁਦ੍ਧੋ ਪੂਜਂ ਸਾਦਿਯਤਿ, ਨ ਪਰਿਨਿਬ੍ਬੁਤੋ ਬੁਦ੍ਧੋ ਸਂਯੁਤ੍ਤੋ ਲੋਕੇਨ ਅਨ੍ਤੋਭਵਿਕੋ ਲੋਕਸ੍ਮਿਂ ਲੋਕਸਾਧਾਰਣੋ, ਤਸ੍ਮਾ ਤਸ੍ਸ ਕਤੋ ਅਧਿਕਾਰੋ ਅਵਞ੍ਝੋ ਭਵਤਿ ਸਫਲੋ. ਯਦਿ ਪਰਿਨਿਬ੍ਬੁਤੋ ਵਿਸਂਯੁਤ੍ਤੋ ਲੋਕੇਨ ਨਿਸ੍ਸਟੋ ਸਬ੍ਬਭਵੇਹਿ, ਤਸ੍ਸ ਪੂਜਾ ਨੁਪ੍ਪਜ੍ਜਤਿ, ਪਰਿਨਿਬ੍ਬੁਤੋ ਨ ਕਿਞ੍ਚਿ ਸਾਦਿਯਤਿ, ਅਸਾਦਿਯਨ੍ਤਸ੍ਸ ਕਤੋ ਅਧਿਕਾਰੋ ਵਞ੍ਝੋ ਭਵਤਿ ਅਫਲੋ’ਤਿ ਉਭਤੋ ਕੋਟਿਕੋ ਏਸੋ ਪਞ੍ਹੋ, ਨੇਸੋ ਵਿਸਯੋ ਅਪ੍ਪਤ੍ਤਮਾਨਸਾਨਂ, ਮਹਨ੍ਤਾਨਂ ਯੇਵੇਸੋ ਵਿਸਯੋ, ਭਿਨ੍ਦੇਤਂ ਦਿਟ੍ਠਿਜਾਲਂ ਏਕਂਸੇ ਠਪਯ, ਤਵੇਸੋ ਪਞ੍ਹੋ ਅਨੁਪ੍ਪਤ੍ਤੋ, ਅਨਾਗਤਾਨਂ ਜਿਨਪੁਤ੍ਤਾਨਂ ਚਕ੍ਖੁਂ ਦੇਹਿ ਪਰਵਾਦਨਿਗ੍ਗਹਾਯਾ’’ਤਿ.

ਥੇਰੋ ਆਹ ‘‘ਪਰਿਨਿਬ੍ਬੁਤੋ, ਮਹਾਰਾਜ, ਭਗਵਾ, ਨ ਚ ਭਗਵਾ ਪੂਜਂ ਸਾਦਿਯਤਿ, ਬੋਧਿਮੂਲੇ ਯੇਵ ਤਥਾਗਤਸ੍ਸ ਸਾਦਿਯਨਾ ਪਹੀਨਾ, ਕਿਂ ਪਨ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤਸ੍ਸ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਸਾਰਿਪੁਤ੍ਤੇਨ ਧਮ੍ਮਸੇਨਾਪਤਿਨਾ –

‘‘‘ਪੂਜਿਯਨ੍ਤਾ [ਪੂਜਿਤਾ (ਸ੍ਯਾ.)] ਅਸਮਸਮਾ, ਸਦੇਵਮਾਨੁਸੇਹਿ ਤੇ;

ਨ ਸਾਦਿਯਨ੍ਤਿ ਸਕ੍ਕਾਰਂ, ਬੁਦ੍ਧਾਨਂ ਏਸ ਧਮ੍ਮਤਾ’’’ਤਿ.

ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਪੁਤ੍ਤੋ ਵਾ ਪਿਤੁਨੋ ਵਣ੍ਣਂ ਭਾਸਤਿ, ਪਿਤਾ ਵਾ ਪੁਤ੍ਤਸ੍ਸ ਵਣ੍ਣਂ ਭਾਸਤਿ, ਨ ਚੇਤਂ ਕਾਰਣਂ ਪਰਵਾਦਾਨਂ ਨਿਗ੍ਗਹਾਯ, ਪਸਾਦਪ੍ਪਕਾਸਨਂ ਨਾਮੇਤਂ, ਇਙ੍ਘ ਮੇ ਤ੍ਵਂ ਤਤ੍ਥ ਕਾਰਣਂ ਸਮ੍ਮਾ ਬ੍ਰੂਹਿ ਸਕਵਾਦਸ੍ਸ ਪਤਿਟ੍ਠਾਪਨਾਯ ਦਿਟ੍ਠਿਜਾਲਵਿਨਿਵੇਠਨਾਯਾ’’ਤਿ.

ਥੇਰੋ ਆਹ ‘‘ਪਰਿਨਿਬ੍ਬੁਤੋ, ਮਹਾਰਾਜ, ਭਗਵਾ, ਨ ਚ ਭਗਵਾ ਪੂਜਂ ਸਾਦਿਯਤਿ, ਅਸਾਦਿਯਨ੍ਤਸ੍ਸੇਵ ਤਥਾਗਤਸ੍ਸ ਦੇਵਮਨੁਸ੍ਸਾ ਧਾਤੁਰਤਨਂ ਵਤ੍ਥੁਂ ਕਰਿਤ੍ਵਾ ਤਥਾਗਤਸ੍ਸ ਞਾਣਰਤਨਾਰਮ੍ਮਣੇਨ ਸਮ੍ਮਾਪਟਿਪਤ੍ਤਿਂ ਸੇਵਨ੍ਤਾ ਤਿਸ੍ਸੋ ਸਮ੍ਪਤ੍ਤਿਯੋ ਪਟਿਲਭਨ੍ਤਿ.

‘‘ਯਥਾ, ਮਹਾਰਾਜ, ਮਹਤਿਮਹਾਅਗ੍ਗਿਕ੍ਖਨ੍ਧੋ ਪਜ੍ਜਲਿਤ੍ਵਾ ਨਿਬ੍ਬਾਯੇਯ੍ਯ, ਅਪਿ ਨੁ ਖੋ ਸੋ, ਮਹਾਰਾਜ, ਮਹਾਅਗ੍ਗਿਕ੍ਖਨ੍ਧੋ ਸਾਦਿਯਤਿ ਤਿਣਕਟ੍ਠੁਪਾਦਾਨ’’ਨ੍ਤਿ? ‘‘ਜਲਮਾਨੋਪਿ ਸੋ, ਭਨ੍ਤੇ, ਮਹਾਅਗ੍ਗਿਕ੍ਖਨ੍ਧੋ ਤਿਣਕਟ੍ਠੁਪਾਦਾਨਂ ਨ ਸਾਦਿਯਤਿ, ਕਿਂ ਪਨ ਨਿਬ੍ਬੁਤੋ ਉਪਸਨ੍ਤੋ ਅਚੇਤਨੋ ਸਾਦਿਯਤਿ? ‘‘ਤਸ੍ਮਿਂ ਪਨ, ਮਹਾਰਾਜ, ਅਗ੍ਗਿਕ੍ਖਨ੍ਧੇ ਉਪਰਤੇ ਉਪਸਨ੍ਤੇ ਲੋਕੇ ਅਗ੍ਗਿ ਸੁਞ੍ਞੋ ਹੋਤੀ’’ਤਿ. ‘‘ਨ ਹਿ, ਭਨ੍ਤੇ, ਕਟ੍ਠਂ ਅਗ੍ਗਿਸ੍ਸ ਵਤ੍ਥੁ ਹੋਤਿ ਉਪਾਦਾਨਂ, ਯੇ ਕੇਚਿ ਮਨੁਸ੍ਸਾ ਅਗ੍ਗਿਕਾਮਾ, ਤੇ ਅਤ੍ਤਨੋ ਥਾਮਬਲਵੀਰਿਯੇਨ ਪਚ੍ਚਤ੍ਤਪੁਰਿਸਕਾਰੇਨ ਕਟ੍ਠਂ ਮਨ੍ਥਯਿਤ੍ਵਾ [ਮਦ੍ਦਿਤ੍ਵਾ (ਕ.)] ਅਗ੍ਗਿਂ ਨਿਬ੍ਬਤ੍ਤੇਤ੍ਵਾ ਤੇਨ ਅਗ੍ਗਿਨਾ ਅਗ੍ਗਿਕਰਣੀਯਾਨਿ ਕਮ੍ਮਾਨਿ ਕਰੋਨ੍ਤੀ’’ਤਿ. ‘‘ਤੇਨ ਹਿ, ਮਹਾਰਾਜ, ਤਿਤ੍ਥਿਯਾਨਂ ਵਚਨਂ ਮਿਚ੍ਛਾ ਭਵਤਿ ‘ਅਸਾਦਿਯਨ੍ਤਸ੍ਸ ਕਤੋ ਅਧਿਕਾਰੋ ਵਞ੍ਝੋ ਭਵਤਿ ਅਫਲੋ’ਤਿ.

‘‘ਯਥਾ, ਮਹਾਰਾਜ, ਮਹਤਿਮਹਾਅਗ੍ਗਿਕ੍ਖਨ੍ਧੋ ਪਜ੍ਜਲਿ, ਏਵਮੇਵ ਭਗਵਾ ਦਸਸਹਸ੍ਸਿਯਾ [ਦਸਸਹਸ੍ਸਿਮ੍ਹਿ (ਸੀ. ਪੀ. ਕ.)] ਲੋਕਧਾਤੁਯਾ ਬੁਦ੍ਧਸਿਰਿਯਾ ਪਜ੍ਜਲਿ. ਯਥਾ, ਮਹਾਰਾਜ, ਮਹਤਿਮਹਾਅਗ੍ਗਿਕ੍ਖਨ੍ਧੋ ਪਜ੍ਜਲਿਤ੍ਵਾ ਨਿਬ੍ਬੁਤੋ, ਏਵਮੇਵ ਭਗਵਾ ਦਸਸਹਸ੍ਸਿਯਾ ਲੋਕਧਾਤੁਯਾ ਬੁਦ੍ਧਸਿਰਿਯਾ ਪਜ੍ਜਲਿਤ੍ਵਾ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤੋ. ਯਥਾ, ਮਹਾਰਾਜ, ਨਿਬ੍ਬੁਤੋ ਅਗ੍ਗਿਕ੍ਖਨ੍ਧੋ ਤਿਣਕਟ੍ਠੁਪਾਦਾਨਂ ਨ ਸਾਦਿਯਤਿ, ਏਵਮੇਵ ਖੋ ਲੋਕਹਿਤਸ੍ਸ ਸਾਦਿਯਨਾ ਪਹੀਨਾ ਉਪਸਨ੍ਤਾ. ਯਥਾ, ਮਹਾਰਾਜ, ਮਨੁਸ੍ਸਾ ਨਿਬ੍ਬੁਤੇ ਅਗ੍ਗਿਕ੍ਖਨ੍ਧੇ ਅਨੁਪਾਦਾਨੇ ਅਤ੍ਤਨੋ ਥਾਮਬਲਵੀਰਿਯੇਨ ਪਚ੍ਚਤ੍ਤਪੁਰਿਸਕਾਰੇਨ ਕਟ੍ਠਂ ਮਨ੍ਥਯਿਤ੍ਵਾ ਅਗ੍ਗਿਂ ਨਿਬ੍ਬਤ੍ਤੇਤ੍ਵਾ ਤੇਨ ਅਗ੍ਗਿਨਾ ਅਗ੍ਗਿਕਰਣੀਯਾਨਿ ਕਮ੍ਮਾਨਿ ਕਰੋਨ੍ਤਿ, ਏਵਮੇਵ ਖੋ ਦੇਵਮਨੁਸ੍ਸਾ ਤਥਾਗਤਸ੍ਸ ਪਰਿਨਿਬ੍ਬੁਤਸ੍ਸ ਅਸਾਦਿਯਨ੍ਤਸ੍ਸੇਵ ਧਾਤੁਰਤਨਂ ਵਤ੍ਥੁਂ ਕਰਿਤ੍ਵਾ ਤਥਾਗਤਸ੍ਸ ਞਾਣਰਤਨਾਰਮ੍ਮਣੇਨ ਸਮ੍ਮਾਪਟਿਪਤ੍ਤਿਂ ਸੇਵਨ੍ਤਾ ਤਿਸ੍ਸੋ ਸਮ੍ਪਤ੍ਤਿਯੋ ਪਟਿਲਭਨ੍ਤਿ, ਇਮਿਨਾਪਿ, ਮਹਾਰਾਜ, ਕਾਰਣੇਨ ਤਥਾਗਤਸ੍ਸ ਪਰਿਨਿਬ੍ਬੁਤਸ੍ਸ ਅਸਾਦਿਯਨ੍ਤਸ੍ਸੇਵ ਕਤੋ ਅਧਿਕਾਰੋ ਅਵਞ੍ਝੋ ਭਵਤਿ ਸਫਲੋ.

‘‘ਅਪਰਮ੍ਪਿ, ਮਹਾਰਾਜ, ਉਤ੍ਤਰਿਂ ਕਾਰਣਂ ਸੁਣੋਹਿ ਯੇਨ ਕਾਰਣੇਨ ਤਥਾਗਤਸ੍ਸ ਪਰਿਨਿਬ੍ਬੁਤਸ੍ਸ ਅਸਾਦਿਯਨ੍ਤਸ੍ਸੇਵ ਕਤੋ ਅਧਿਕਾਰੋ ਅਵਞ੍ਝੋ ਭਵਤਿ ਸਫਲੋ. ਯਥਾ, ਮਹਾਰਾਜ, ਮਹਤਿਮਹਾਵਾਤੋ ਵਾਯਿਤ੍ਵਾ ਉਪਰਮੇਯ੍ਯ, ਅਪਿ ਨੁ ਖੋ ਸੋ, ਮਹਾਰਾਜ, ਉਪਰਤੋ ਵਾਤੋ ਸਾਦਿਯਤਿ ਪੁਨ ਨਿਬ੍ਬਤ੍ਤਾਪਨ’’ਨ੍ਤਿ? ‘‘ਨ ਹਿ, ਭਨ੍ਤੇ, ਉਪਰਤਸ੍ਸ ਵਾਤਸ੍ਸ ਆਭੋਗੋ ਵਾ ਮਨਸਿਕਾਰੋ ਵਾ ਪੁਨ ਨਿਬ੍ਬਤ੍ਤਾਪਨਾਯ’’. ‘‘ਕਿਂ ਕਾਰਣਂ’’? ‘‘ਅਚੇਤਨਾ ਸਾ ਵਾਯੋਧਾਤੂ’’ਤਿ. ‘‘ਅਪਿ ਨੁ ਤਸ੍ਸ, ਮਹਾਰਾਜ, ਉਪਰਤਸ੍ਸ ਵਾਤਸ੍ਸ ਵਾਤੋਤਿ ਸਮਞ੍ਞਾ ਅਪਗਚ੍ਛਤੀ’’ਤਿ? ‘‘ਨ ਹਿ, ਭਨ੍ਤੇ, ਤਾਲਵਣ੍ਟਵਿਧੂਪਨਾਨਿ ਵਾਤਸ੍ਸ ਉਪ੍ਪਤ੍ਤਿਯਾ ਪਚ੍ਚਯਾ, ਯੇ ਕੇਚਿ ਮਨੁਸ੍ਸਾ ਉਣ੍ਹਾਭਿਤਤ੍ਤਾ ਪਰਿਲ਼ਾਹਪਰਿਪੀਲ਼ਿਤਾ, ਤੇ ਤਾਲਵਣ੍ਟੇਨ ਵਾ ਵਿਧੂਪਨੇਨ ਵਾ ਅਤ੍ਤਨੋ ਥਾਮਬਲਵੀਰਿਯੇਨ ਪਚ੍ਚਤ੍ਤਪੁਰਿਸਕਾਰੇਨ ਤਂ ਨਿਬ੍ਬਤ੍ਤੇਤ੍ਵਾ ਤੇਨ ਵਾਤੇਨ ਉਣ੍ਹਂ ਨਿਬ੍ਬਾਪੇਨ੍ਤਿ ਪਰਿਲ਼ਾਹਂ ਵੂਪਸਮੇਨ੍ਤੀ’’ਤਿ. ‘‘ਤੇਨ ਹਿ, ਮਹਾਰਾਜ, ਤਿਤ੍ਥਿਯਾਨਂ ਵਚਨਂ ਮਿਚ੍ਛਾ ਭਵਤਿ ‘ਅਸਾਦਿਯਨ੍ਤਸ੍ਸ ਕਤੋ ਅਧਿਕਾਰੋ ਵਞ੍ਝੋ ਭਵਤਿ ਅਫਲੋ’ਤਿ.

‘‘ਯਥਾ, ਮਹਾਰਾਜ, ਮਹਤਿਮਹਾਵਾਤੋ ਵਾਯਿ, ਏਵਮੇਵ ਭਗਵਾ ਦਸਸਹਸ੍ਸਿਯਾ ਲੋਕਧਾਤੁਯਾ ਸੀਤਲਮਧੁਰਸਨ੍ਤਸੁਖੁਮਮੇਤ੍ਤਾਵਾਤੇਨ ਉਪਵਾਯਿ. ਯਥਾ, ਮਹਾਰਾਜ, ਮਹਤਿਮਹਾਵਾਤੋ ਵਾਯਿਤ੍ਵਾ ਉਪਰਤੋ, ਏਵਮੇਵ ਭਗਵਾ ਸੀਤਲਮਧੁਰਸਨ੍ਤਸੁਖੁਮਮੇਤ੍ਤਾਵਾਤੇਨ ਉਪਵਾਯਿਤ੍ਵਾ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤੋ. ਯਥਾ, ਮਹਾਰਾਜ, ਉਪਰਤੋ ਵਾਤੋ ਪੁਨ ਨਿਬ੍ਬਤ੍ਤਾਪਨਂ ਨ ਸਾਦਿਯਤਿ, ਏਵਮੇਵ ਲੋਕਹਿਤਸ੍ਸ ਸਾਦਿਯਨਾ ਪਹੀਨਾ ਉਪਸਨ੍ਤਾ. ਯਥਾ, ਮਹਾਰਾਜ, ਤੇ ਮਨੁਸ੍ਸਾ ਉਣ੍ਹਾਭਿਤਤ੍ਤਾ ਪਰਿਲ਼ਾਹਪਰਿਪੀਲ਼ਿਤਾ, ਏਵਮੇਵ ਦੇਵਮਨੁਸ੍ਸਾ ਤਿਵਿਧਗ੍ਗਿਸਨ੍ਤਾਪਪਰਿਲ਼ਾਹਪਰਿਪੀਲ਼ਿਤਾ. ਯਥਾ ਤਾਲਵਣ੍ਟਵਿਧੂਪਨਾਨਿ ਵਾਤਸ੍ਸ ਨਿਬ੍ਬਤ੍ਤਿਯਾ ਪਚ੍ਚਯਾ ਹੋਨ੍ਤਿ, ਏਵਮੇਵ ਤਥਾਗਤਸ੍ਸ ਧਾਤੁ ਚ ਞਾਣਰਤਨਞ੍ਚ ਪਚ੍ਚਯੋ ਹੋਤਿ ਤਿਸ੍ਸਨ੍ਨਂ ਸਮ੍ਪਤ੍ਤੀਨਂ ਪਟਿਲਾਭਾਯ. ਯਥਾ ਮਨੁਸ੍ਸਾ ਉਣ੍ਹਾਭਿਤਤ੍ਤਾ ਪਰਿਲ਼ਾਹਪਰਿਪੀਲ਼ਿਤਾ ਤਾਲਵਣ੍ਟੇਨ ਵਾ ਵਿਧੂਪਨੇਨ ਵਾ ਵਾਤਂ ਨਿਬ੍ਬਤ੍ਤੇਤ੍ਵਾ ਉਣ੍ਹਂ ਨਿਬ੍ਬਾਪੇਨ੍ਤਿ ਪਰਿਲ਼ਾਹਂ ਵੂਪਸਮੇਨ੍ਤਿ, ਏਵਮੇਵ ਦੇਵਮਨੁਸ੍ਸਾ ਤਥਾਗਤਸ੍ਸ ਪਰਿਨਿਬ੍ਬੁਤਸ੍ਸ ਅਸਾਦਿਯਨ੍ਤਸ੍ਸੇਵ ਧਾਤੁਞ੍ਚ ਞਾਣਰਤਨਞ੍ਚ ਪੂਜੇਤ੍ਵਾ ਕੁਸਲਂ ਨਿਬ੍ਬਤ੍ਤੇਤ੍ਵਾ ਤੇਨ ਕੁਸਲੇਨ ਤਿਵਿਧਗ੍ਗਿਸਨ੍ਤਾਪਪਰਿਲ਼ਾਹਂ ਨਿਬ੍ਬਾਪੇਨ੍ਤਿ ਵੂਪਸਮੇਨ੍ਤਿ. ਇਮਿਨਾਪਿ, ਮਹਾਰਾਜ, ਕਾਰਣੇਨ ਤਥਾਗਤਸ੍ਸ ਪਰਿਨਿਬ੍ਬੁਤਸ੍ਸ ਅਸਾਦਿਯਨ੍ਤਸ੍ਸੇਵ ਕਤੋ ਅਧਿਕਾਰੋ ਅਵਞ੍ਝੋ ਭਵਤਿ ਸਫਲੋਤਿ.

‘‘ਅਪਰਮ੍ਪਿ, ਮਹਾਰਾਜ, ਉਤ੍ਤਰਿਂ ਕਾਰਣਂ ਸੁਣੋਹਿ ਪਰਵਾਦਾਨਂ ਨਿਗ੍ਗਹਾਯ. ਯਥਾ, ਮਹਾਰਾਜ, ਪੁਰਿਸੋ ਭੇਰਿਂ ਆਕੋਟੇਤ੍ਵਾ ਸਦ੍ਦਂ ਨਿਬ੍ਬਤ੍ਤੇਯ੍ਯ, ਯੋ ਸੋ ਭੇਰਿਸਦ੍ਦੋ ਪੁਰਿਸੇਨ ਨਿਬ੍ਬਤ੍ਤਿਤੋ, ਸੋ ਸਦ੍ਦੋ ਅਨ੍ਤਰਧਾਯੇਯ੍ਯ, ਅਪਿ ਨੁ ਖੋ ਸੋ, ਮਹਾਰਾਜ, ਸਦ੍ਦੋ ਸਾਦਿਯਤਿ ਪੁਨ ਨਿਬ੍ਬਤ੍ਤਾਪਨ’’ਨ੍ਤਿ? ‘‘ਨ ਹਿ, ਭਨ੍ਤੇ, ਅਨ੍ਤਰਹਿਤੋ ਸੋ ਸਦ੍ਦੋ, ਨਤ੍ਥਿ ਤਸ੍ਸ ਪੁਨ ਉਪ੍ਪਾਦਾਯ ਆਭੋਗੋ ਵਾ ਮਨਸਿਕਾਰੋ ਵਾ, ਸਕਿਂ ਨਿਬ੍ਬਤ੍ਤੇ ਭੇਰਿਸਦ੍ਦੇ ਅਨ੍ਤਰਹਿਤੇ ਸੋ ਭੇਰਿਸਦ੍ਦੋ ਸਮੁਚ੍ਛਿਨ੍ਨੋ ਹੋਤਿ. ਭੇਰੀ ਪਨ, ਭਨ੍ਤੇ, ਪਚ੍ਚਯੋ ਹੋਤਿ ਸਦ੍ਦਸ੍ਸ ਨਿਬ੍ਬਤ੍ਤਿਯਾ, ਅਥ ਪੁਰਿਸੋ ਪਚ੍ਚਯੇ ਸਤਿ ਅਤ੍ਤਜੇਨ ਵਾਯਾਮੇਨ ਭੇਰਿਂ ਅਕੋਟੇਤ੍ਵਾ ਸਦ੍ਦਂ ਨਿਬ੍ਬਤ੍ਤੇਤੀ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਭਗਵਾ ਸੀਲਸਮਾਧਿਪਞ੍ਞਾਵਿਮੁਤ੍ਤਿਵਿਮੁਤ੍ਤਿਞਾਣਦਸ੍ਸਨਪਰਿਭਾਵਿਤਂ ਧਾਤੁਰਤਨਞ੍ਚ ਧਮ੍ਮਞ੍ਚ ਵਿਨਯਞ੍ਚ ਅਨੁਸਿਟ੍ਠਞ੍ਚ [ਅਨੁਸਤ੍ਥਿਞ੍ਚ (ਸੀ. ਪੀ.)] ਸਤ੍ਥਾਰਂ ਠਪਯਿਤ੍ਵਾ ਸਯਂ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤੋ, ਨ ਚ ਪਰਿਨਿਬ੍ਬੁਤੇ ਭਗਵਤਿ ਸਮ੍ਪਤ੍ਤਿਲਾਭੋ ਉਪਚ੍ਛਿਨ੍ਨੋ ਹੋਤਿ, ਭਵਦੁਕ੍ਖਪਟਿਪੀਲ਼ਿਤਾ ਸਤ੍ਤਾ ਧਾਤੁਰਤਨਞ੍ਚ ਧਮ੍ਮਞ੍ਚ ਵਿਨਯਞ੍ਚ ਅਨੁਸਿਟ੍ਠਞ੍ਚ ਪਚ੍ਚਯਂ ਕਰਿਤ੍ਵਾ ਸਮ੍ਪਤ੍ਤਿਕਾਮਾ ਸਮ੍ਪਤ੍ਤਿਯੋ ਪਟਿਲਭਨ੍ਤਿ, ਇਮਿਨਾਪਿ, ਮਹਾਰਾਜ, ਕਾਰਣੇਨ ਤਥਾਗਤਸ੍ਸ ਪਰਿਨਿਬ੍ਬੁਤਸ੍ਸ ਅਸਾਦਿਯਨ੍ਤਸ੍ਸੇਵ ਕਤੋ ਅਧਿਕਾਰੋ ਅਵਞ੍ਝੋ ਭਵਤਿ ਸਫਲੋਤਿ.

‘‘ਦਿਟ੍ਠਞ੍ਚੇਤਂ, ਮਹਾਰਾਜ, ਭਗਵਤਾ ਅਨਾਗਤਮਦ੍ਧਾਨਂ. ਕਥਿਤਞ੍ਚ ਭਣਿਤਞ੍ਚ ਆਚਿਕ੍ਖਿਤਞ੍ਚ ‘ਸਿਯਾ ਖੋ ਪਨਾਨਨ੍ਦ, ਤੁਮ੍ਹਾਕਂ ਏਵਮਸ੍ਸ ਅਤੀਤਸਤ੍ਥੁਕਂ ਪਾਵਚਨਂ ਨਤ੍ਥਿ ਨੋ ਸਤ੍ਥਾਤਿ, ਨ ਖੋ ਪਨੇਤਂ, ਆਨਨ੍ਦ, ਏਵਂ ਦਟ੍ਠਬ੍ਬਂ, ਯੋ ਵੋ, ਆਨਨ੍ਦ, ਮਯਾ ਧਮ੍ਮੋ ਚ ਵਿਨਯੋ ਚ ਦੇਸਿਤੋ ਪਞ੍ਞਤ੍ਤੋ, ਸੋ ਵੋ ਮਮਚ੍ਚਯੇਨ ਸਤ੍ਥਾ’ਤਿ. ਪਰਿਨਿਬ੍ਬੁਤਸ੍ਸ ਤਥਾਗਤਸ੍ਸ ਅਸਾਦਿਯਨ੍ਤਸ੍ਸ ਕਤੋ ਅਧਿਕਾਰੋ ਵਞ੍ਝੋ ਭਵਤਿ ਅਫਲੋਤਿ, ਤਂ ਤੇਸਂ ਤਿਤ੍ਥਿਯਾਨਂ ਵਚਨਂ ਮਿਚ੍ਛਾ ਅਭੂਤਂ ਵਿਤਥਂ ਅਲਿਕਂ ਵਿਰੁਦ੍ਧਂ ਵਿਪਰੀਤਂ ਦੁਕ੍ਖਦਾਯਕਂ ਦੁਕ੍ਖਵਿਪਾਕਂ ਅਪਾਯਗਮਨੀਯਨ੍ਤਿ.

‘‘ਅਪਰਮ੍ਪਿ, ਮਹਾਰਾਜ, ਉਤ੍ਤਰਿਂ ਕਾਰਣਂ ਸੁਣੋਹਿ ਯੇਨ ਕਾਰਣੇਨ ਤਥਾਗਤਸ੍ਸ ਪਰਿਨਿਬ੍ਬੁਤਸ੍ਸ ਅਸਾਦਿਯਨ੍ਤਸ੍ਸੇਵ ਕਤੋ ਅਧਿਕਾਰੋ ਅਵਞ੍ਝੋ ਭਵਤਿ ਸਫਲੋ. ਸਾਦਿਯਤਿ ਨੁ ਖੋ, ਮਹਾਰਾਜ, ਅਯਂ ਮਹਾਪਥਵੀ ‘ਸਬ੍ਬਬੀਜਾਨਿ ਮਯਿ ਸਂਵਿਰੁਹਨ੍ਤੂ’’’ਤਿ? ‘‘ਨ ਹਿ, ਭਨ੍ਤੇ’’ਤਿ. ‘‘ਕਿਸ੍ਸ ਪਨ ਤਾਨਿ, ਮਹਾਰਾਜ, ਬੀਜਾਨਿ ਅਸਾਦਿਯਨ੍ਤਿਯਾ ਮਹਾਪਥਵਿਯਾ ਸਂਵਿਰੁਹਿਤ੍ਵਾ ਦਲ਼੍ਹਮੂਲਜਟਾਪਤਿਟ੍ਠਿਤਾ ਖਨ੍ਧਸਾਰਸਾਖਾਪਰਿਵਿਤ੍ਥਿਣ੍ਣਾ ਪੁਪ੍ਫਫਲਧਰਾ ਹੋਨ੍ਤੀ’’ਤਿ? ‘‘ਅਸਾਦਿਯਨ੍ਤੀਪਿ, ਭਨ੍ਤੇ, ਮਹਾਪਥਵੀ ਤੇਸਂ ਬੀਜਾਨਂ ਵਤ੍ਥੁਂ ਹੋਤਿ ਪਚ੍ਚਯਂ ਦੇਤਿ ਵਿਰੁਹਨਾਯ, ਤਾਨਿ ਬੀਜਾਨਿ ਤਂ ਵਤ੍ਥੁਂ ਨਿਸ੍ਸਾਯ ਤੇਨ ਪਚ੍ਚਯੇਨ ਸਂਵਿਰੁਹਿਤ੍ਵਾ ਦਲ਼੍ਹਮੂਲਜਟਾਪਤਿਟ੍ਠਿਤਾ ਖਨ੍ਧਸਾਰਸਾਖਾਪਰਿਵਿਤ੍ਥਿਣ੍ਣਾ ਪੁਪ੍ਫਫਲਧਰਾ ਹੋਨ੍ਤੀ’’ਤਿ. ‘‘ਤੇਨ ਹਿ, ਮਹਾਰਾਜ, ਤਿਤ੍ਥਿਯਾ ਸਕੇ ਵਾਦੇ ਨਟ੍ਠਾ ਹੋਨ੍ਤਿ ਹਤਾ ਵਿਰੁਦ੍ਧਾ, ਸਚੇ ਤੇ ਭਣਨ੍ਤਿ ‘ਅਸਾਦਿਯਨ੍ਤਸ੍ਸ ਕਤੋ ਅਧਿਕਾਰੋ ਵਞ੍ਝੋ ਭਵਤਿ ਅਫਲੋ’ ਤਿ.

‘‘ਯਥਾ, ਮਹਾਰਾਜ, ਮਹਾਪਥਵੀ, ਏਵਂ ਤਥਾਗਤੋ ਅਰਹਂ ਸਮ੍ਮਾਸਮ੍ਬੁਦ੍ਧੋ. ਯਥਾ, ਮਹਾਰਾਜ, ਮਹਾਪਥਵੀ ਨ ਕਿਞ੍ਚਿ ਸਾਦਿਯਤਿ, ਏਵਂ ਤਥਾਗਤੋ ਨ ਕਿਞ੍ਚਿ ਸਾਦਿਯਤਿ. ਯਥਾ, ਮਹਾਰਾਜ, ਤਾਨਿ ਬੀਜਾਨਿ ਪਥਵਿਂ ਨਿਸ੍ਸਾਯ ਸਂਵਿਰੁਹਿਤ੍ਵਾ ਦਲ਼੍ਹਮੂਲਜਟਾਪਤਿਟ੍ਠਿਤਾ ਖਨ੍ਧਸਾਰਸਾਖਾਪਰਿਵਿਤ੍ਥਿਣ੍ਣਾ ਪੁਪ੍ਫਫਲਧਰਾ ਹੋਨ੍ਤਿ, ਏਵਂ ਦੇਵਮਨੁਸ੍ਸਾ ਤਥਾਗਤਸ੍ਸ ਪਰਿਨਿਬ੍ਬੁਤਸ੍ਸ ਅਸਾਦਿਯਨ੍ਤਸ੍ਸੇਵ ਧਾਤੁਞ੍ਚ ਞਾਣਰਤਨਞ੍ਚ ਨਿਸ੍ਸਾਯ ਦਲ਼੍ਹਕੁਸਲਮੂਲਪਤਿਟ੍ਠਿਤਾ ਸਮਾਧਿਕ੍ਖਨ੍ਧਧਮ੍ਮਸਾਰਸੀਲਸਾਖਾਪਰਿਵਿਤ੍ਥਿਣ੍ਣਾ ਵਿਮੁਤ੍ਤਿਪੁਪ੍ਫਸਾਮਞ੍ਞਫਲਧਰਾ ਹੋਨ੍ਤਿ, ਇਮਿਨਾਪਿ, ਮਹਾਰਾਜ, ਕਾਰਣੇਨ ਤਥਾਗਤਸ੍ਸ ਪਰਿਨਿਬ੍ਬੁਤਸ੍ਸ ਅਸਾਦਿਯਨ੍ਤਸ੍ਸੇਵ ਕਤੋ ਅਧਿਕਾਰੋ ਅਵਞ੍ਝੋ ਭਵਤਿ ਸਫਲੋਤਿ.

‘‘ਅਪਰਮ੍ਪਿ, ਮਹਾਰਾਜ, ਉਤ੍ਤਰਿਂ ਕਾਰਣਂ ਸੁਣੋਹਿ ਯੇਨ ਕਾਰਣੇਨ ਤਥਾਗਤਸ੍ਸ ਪਰਿਨਿਬ੍ਬੁਤਸ੍ਸ ਅਸਾਦਿਯਨ੍ਤਸ੍ਸੇਵ ਕਤੋ ਅਧਿਕਾਰੋ ਅਵਞ੍ਝੋ ਭਵਤਿ ਸਫਲੋ. ਸਾਦਿਯਨ੍ਤਿ ਨੁ ਖੋ, ਮਹਾਰਾਜ, ਇਮੇ ਓਟ੍ਠਾ ਗੋਣਾ ਗਦ੍ਰਭਾ ਅਜਾ ਪਸੂ ਮਨੁਸ੍ਸਾ ਅਨ੍ਤੋਕੁਚ੍ਛਿਸ੍ਮਿਂ ਕਿਮਿਕੁਲਾਨਂ ਸਮ੍ਭਵ’’ਨ੍ਤਿ? ‘‘ਨ ਹਿ, ਭਨ੍ਤੇ’’ਤਿ. ‘‘ਕਿਸ੍ਸ ਪਨ ਤੇ, ਮਹਾਰਾਜ, ਕਿਮਯੋ ਤੇਸਂ ਅਸਾਦਿਯਨ੍ਤਾਨਂ ਅਨ੍ਤੋਕੁਚ੍ਛਿਸ੍ਮਿਂ ਸਮ੍ਭਵਿਤ੍ਵਾ ਬਹੁਪੁਤ੍ਤਨਤ੍ਤਾ ਵੇਪੁਲ੍ਲਤਂ ਪਾਪੁਣਨ੍ਤੀ’’ਤਿ? ‘‘ਪਾਪਸ੍ਸ, ਭਨ੍ਤੇ, ਕਮ੍ਮਸ੍ਸ ਬਲਵਤਾਯ ਅਸਾਦਿਯਨ੍ਤਾਨਂ ਯੇਵ ਤੇਸਂ ਸਤ੍ਤਾਨਂ ਅਨ੍ਤੋਕੁਚ੍ਛਿਸ੍ਮਿਂ ਕਿਮਯੋ ਸਮ੍ਭਵਿਤ੍ਵਾ ਬਹੁਪੁਤ੍ਤਨਤ੍ਤਾ ਵੇਪੁਲ੍ਲਤਂ ਪਾਪੁਣਨ੍ਤੀ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਤਥਾਗਤਸ੍ਸ ਪਰਿਨਿਬ੍ਬੁਤਸ੍ਸ ਅਸਾਦਿਯਨ੍ਤਸ੍ਸੇਵ ਧਾਤੁਸ੍ਸ ਚ ਞਾਣਾਰਮ੍ਮਣਸ੍ਸ ਚ ਬਲਵਤਾਯ ਤਥਾਗਤੇ ਕਤੋ ਅਧਿਕਾਰੋ ਅਵਞ੍ਝੋ ਭਵਤਿ ਸਫਲੋਤਿ.

‘‘ਅਪਰਮ੍ਪਿ, ਮਹਾਰਾਜ, ਉਤ੍ਤਰਿਂ ਕਾਰਣਂ ਸੁਣੋਹਿ ਯੇਨ ਕਾਰਣੇਨ ਤਥਾਗਤਸ੍ਸ ਪਰਿਨਿਬ੍ਬੁਤਸ੍ਸ ਅਸਾਦਿਯਨ੍ਤਸ੍ਸੇਵ ਕਤੋ ਅਧਿਕਾਰੋ ਅਵਞ੍ਝੋ ਭਵਤਿ ਸਫਲੋ. ਸਾਦਿਯਨ੍ਤਿ ਨੁ ਖੋ, ਮਹਾਰਾਜ, ਇਮੇ ਮਨੁਸ੍ਸਾ ਇਮੇ ਅਟ੍ਠਨਵੁਤਿ ਰੋਗਾ ਕਾਯੇ ਨਿਬ੍ਬਤ੍ਤਨ੍ਤੂ’’ਤਿ? ‘‘ਨ ਹਿ, ਭਨ੍ਤੇ’’ਤਿ. ‘‘ਕਿਸ੍ਸ ਪਨ ਤੇ, ਮਹਾਰਾਜ, ਰੋਗਾ ਅਸਾਦਿਯਨ੍ਤਾਨਂ ਕਾਯੇ ਨਿਪਤਨ੍ਤੀ’’ਤਿ? ‘‘ਪੁਬ੍ਬੇ ਕਤੇਨ, ਭਨ੍ਤੇ, ਦੁਚ੍ਚਰਿਤੇਨਾ’’ਤਿ. ‘‘ਯਦਿ, ਮਹਾਰਾਜ, ਪੁਬ੍ਬੇ ਕਤਂ ਅਕੁਸਲਂ ਇਧ ਵੇਦਨੀਯਂ ਹੋਤਿ, ਤੇਨ ਹਿ, ਮਹਾਰਾਜ, ਪੁਬ੍ਬੇ ਕਤਮ੍ਪਿ ਇਧ ਕਤਮ੍ਪਿ ਕੁਸਲਾਕੁਸਲਂ ਕਮ੍ਮਂ ਅਵਞ੍ਝਂ ਭਵਤਿ ਸਫਲਨ੍ਤਿ. ਇਮਿਨਾਪਿ, ਮਹਾਰਾਜ, ਕਾਰਣੇਨ ਤਥਾਗਤਸ੍ਸ ਪਰਿਨਿਬ੍ਬੁਤਸ੍ਸ ਅਸਾਦਿਯਨ੍ਤਸ੍ਸੇਵ ਕਤੋ ਅਧਿਕਾਰੋ ਅਵਞ੍ਝੋ ਭਵਤਿ ਸਫਲੋਤਿ.

‘‘ਸੁਤਪੁਬ੍ਬਂ ਪਨ ਤਯਾ, ਮਹਾਰਾਜ, ਨਨ੍ਦਕੋ ਨਾਮ ਯਕ੍ਖੋ ਥੇਰਂ ਸਾਰਿਪੁਤ੍ਤਂ ਆਸਾਦਯਿਤ੍ਵਾ ਪਥਵਿਂ ਪਵਿਟ੍ਠੋ’’ਤਿ? ‘‘ਆਮ, ਭਨ੍ਤੇ, ਸੁਯ੍ਯਤਿ, ਲੋਕੇ ਪਾਕਟੋ ਏਸੋ’’ਤਿ. ‘‘ਅਪਿ ਨੁ ਖੋ, ਮਹਾਰਾਜ, ਥੇਰੋ ਸਾਰਿਪੁਤ੍ਤੋ ਸਾਦਿਯਿ ਨਨ੍ਦਕਸ੍ਸ ਯਕ੍ਖਸ੍ਸ ਮਹਾਪਥਵਿਗਿਲਨ’’ਨ੍ਤਿ [ਪਵਤ੍ਤਮਾਨੇਪਿ (ਸ੍ਯਾ.)]. ‘‘ਉਬ੍ਬਤ੍ਤਿਯਨ੍ਤੇਪਿ, ਭਨ੍ਤੇ, ਸਦੇਵਕੇ ਲੋਕੇ ਪਤਮਾਨੇਪਿ ਛਮਾਯਂ ਚਨ੍ਦਿਮਸੂਰਿਯੇ ਵਿਕਿਰਨ੍ਤੇਪਿ ਸਿਨੇਰੁਪਬ੍ਬਤਰਾਜੇ ਥੇਰੋ ਸਾਰਿਪੁਤ੍ਤੋ ਨ ਪਰਸ੍ਸ ਦੁਕ੍ਖਂ ਸਾਦਿਯੇਯ੍ਯ. ਤਂ ਕਿਸ੍ਸ ਹੇਤੁ? ਯੇਨ ਹੇਤੁਨਾ ਥੇਰੋ ਸਾਰਿਪੁਤ੍ਤੋ ਕੁਜ੍ਝੇਯ੍ਯ ਵਾ ਦੁਸ੍ਸੇਯ੍ਯ ਵਾ, ਸੋ ਹੇਤੁ ਥੇਰਸ੍ਸ ਸਾਰਿਪੁਤ੍ਤਸ੍ਸ ਸਮੂਹਤੋ ਸਮੁਚ੍ਛਿਨ੍ਨੋ, ਹੇਤੁਨੋ ਸਮੁਗ੍ਘਾਤਿਤਤ੍ਤਾ, ਭਨ੍ਤੇ, ਥੇਰੋ ਸਾਰਿਪੁਤ੍ਤੋ ਜੀਵਿਤਹਾਰਕੇਪਿ ਕੋਪਂ ਨ ਕਰੇਯ੍ਯਾ’’ਤਿ. ‘‘ਯਦਿ, ਮਹਾਰਾਜ, ਥੇਰੋ ਸਾਰਿਪੁਤ੍ਤੋ ਨਨ੍ਦਕਸ੍ਸ ਯਕ੍ਖਸ੍ਸ ਪਥਵਿਗਿਲਨਂ ਨ ਸਾਦਿਯਿ, ਕਿਸ੍ਸ ਪਨ ਨਨ੍ਦਕੋ ਯਕ੍ਖੋ ਪਥਵਿਂ ਪਵਿਟ੍ਠੋ’’ਤਿ? ‘‘ਅਕੁਸਲਸ੍ਸ, ਭਨ੍ਤੇ, ਕਮ੍ਮਸ੍ਸ ਬਲਵਤਾਯਾ’’ਤਿ. ‘‘ਯਦਿ, ਮਹਾਰਾਜ, ਅਕੁਸਲਸ੍ਸ ਕਮ੍ਮਸ੍ਸ ਬਲਵਤਾਯ ਨਨ੍ਦਕੋ ਯਕ੍ਖੋ ਪਥਵਿਂ ਪਵਿਟ੍ਠੋ, ਅਸਾਦਿਯਨ੍ਤਸ੍ਸਾਪਿ ਕਤੋ ਅਪਰਾਧੋ ਅਵਞ੍ਝੋ ਭਵਤਿ ਸਫਲੋ. ਤੇਨ ਹਿ, ਮਹਾਰਾਜ, ਅਕੁਸਲਸ੍ਸਪਿ ਕਮ੍ਮਸ੍ਸ ਬਲਵਤਾਯ ਅਸਾਦਿਯਨ੍ਤਸ੍ਸ ਕਤੋ ਅਧਿਕਾਰੋ ਅਵਞ੍ਝੋ ਭਵਤਿ ਸਫਲੋਤਿ. ਇਮਿਨਾਪਿ, ਮਹਾਰਾਜ, ਕਾਰਣੇਨ ਤਥਾਗਤਸ੍ਸ ਪਰਿਨਿਬ੍ਬੁਤਸ੍ਸ ਅਸਾਦਿਯਨ੍ਤਸ੍ਸੇਵ ਕਤੋ ਅਧਿਕਾਰੋ ਅਵਞ੍ਝੋ ਭਵਤਿ ਸਫਲੋਤਿ.

‘‘ਕਤਿ ਨੁ ਖੋ ਤੇ, ਮਹਾਰਾਜ, ਮਨੁਸ੍ਸਾ, ਯੇ ਏਤਰਹਿ ਮਹਾਪਥਵਿਂ ਪਵਿਟ੍ਠਾ, ਅਤ੍ਥਿ ਤੇ ਤਤ੍ਥ ਸਵਣ’’ਨ੍ਤਿ? ‘‘ਆਮ, ਭਨ੍ਤੇ, ਸੁਯ੍ਯਤੀ’’ਤਿ. ‘‘ਇਙ੍ਘ ਤ੍ਵਂ, ਮਹਾਰਾਜ, ਸਾਵੇਹੀ’’ਤਿ? ‘‘ਚਿਞ੍ਚਮਾਣਵਿਕਾ, ਭਨ੍ਤੇ, ਸੁਪ੍ਪਬੁਦ੍ਧੋ ਚ ਸਕ੍ਕੋ, ਦੇਵਦਤ੍ਤੋ ਚ ਥੇਰੋ, ਨਨ੍ਦਕੋ ਚ ਯਕ੍ਖੋ, ਨਨ੍ਦੋ ਚ ਮਾਣਵਕੋਤਿ. ਸੁਤਮੇਤਂ, ਭਨ੍ਤੇ, ਇਮੇ ਪਞ੍ਚ ਜਨਾ ਮਹਾਪਥਵਿਂ ਪਵਿਟ੍ਠਾ’’ਤਿ. ‘‘ਕਿਸ੍ਮਿਂ ਤੇ, ਮਹਾਰਾਜ, ਅਪਰਦ੍ਧਾ’’ਤਿ? ‘‘ਭਗਵਤਿ ਚ, ਭਨ੍ਤੇ, ਸਾਵਕੇਸੁ ਚਾ’’ਤਿ. ‘‘ਅਪਿ ਨੁ ਖੋ, ਮਹਾਰਾਜ, ਭਗਵਾ ਵਾ ਸਾਵਕਾ ਵਾ ਸਾਦਿਯਿਂਸੁ ਇਮੇਸਂ ਮਹਾਪਥਵਿਪਵਿਸਨ’’ਨ੍ਤਿ? ‘‘ਨ ਹਿ ਭਨ੍ਤੇ’’ਤਿ. ‘‘ਤੇਨ ਹਿ, ਮਹਾਰਾਜ, ਤਥਾਗਤਸ੍ਸ ਪਰਿਨਿਬ੍ਬੁਤਸ੍ਸ ਅਸਾਦਿਯਨ੍ਤਸ੍ਸੇਵ ਕਤੋ ਅਧਿਕਾਰੋ ਅਵਞ੍ਝੋ ਭਵਤਿ ਸਫਲੋ’’ਤਿ. ‘‘ਸੁਵਿਞ੍ਞਾਪਿਤੋ, ਭਨ੍ਤੇ ਨਾਗਸੇਨ, ਪਞ੍ਹੋ ਗਮ੍ਭੀਰੋ ਉਤ੍ਤਾਨੀਕਤੋ, ਗੁਯ੍ਹਂ ਵਿਦਂਸਿਤਂ, ਗਣ੍ਠਿ ਭਿਨ੍ਨੋ, ਗਹਨਂ ਅਗਹਨਂ ਕਤਂ, ਨਟ੍ਠਾ ਪਰਵਾਦਾ, ਭਗ੍ਗਾ ਕੁਦਿਟ੍ਠੀ, ਨਿਪ੍ਪਭਾ ਜਾਤਾ ਕੁਤਿਤ੍ਥਿਯਾ, ਤ੍ਵਂ ਗਣੀਵਰਪਵਰਮਾਸਜ੍ਜਾ’’ਤਿ.

ਕਤਾਧਿਕਾਰਸਫਲਪਞ੍ਹੋ ਪਠਮੋ.