੧੫. ਵਿਞ੍ਞਾਣਨਾਨਤ੍ਥਪਞ੍ਹੋ

੧੫. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ‘ਵਿਞ੍ਞਾਣ’ਨ੍ਤਿ ਵਾ ‘ਪਞ੍ਞਾ’ਤਿ ਵਾ ‘ਭੂਤਸ੍ਮਿਂ ਜੀਵੋ’ਤਿ ਵਾ ਇਮੇ ਧਮ੍ਮਾ ਨਾਨਤ੍ਥਾ ਚੇਵ ਨਾਨਾਬ੍ਯਞ੍ਜਨਾ ਚ, ਉਦਾਹੁ ਏਕਤ੍ਥਾ ਬ੍ਯਞ੍ਜਨਮੇਵ ਨਾਨ’’ਨ੍ਤਿ? ‘‘ਵਿਜਾਨਨਲਕ੍ਖਣਂ, ਮਹਾਰਾਜ, ਵਿਞ੍ਞਾਣਂ, ਪਜਾਨਨਲਕ੍ਖਣਾ ਪਞ੍ਞਾ, ਭੂਤਸ੍ਮਿਂ ਜੀਵੋ ਨੁਪਲਬ੍ਭਤੀ’’ਤਿ. ‘‘ਯਦਿ ਜੀਵੋ ਨੁਪਲਬ੍ਭਤਿ, ਅਥ ਕੋ ਚਰਹਿ ਚਕ੍ਖੁਨਾ ਰੂਪਂ ਪਸ੍ਸਤਿ, ਸੋਤੇਨ ਸਦ੍ਦਂ ਸੁਣਾਤਿ, ਘਾਨੇਨ ਗਨ੍ਧਂ ਘਾਯਤਿ, ਜਿਵ੍ਹਾਯ ਰਸਂ ਸਾਯਤਿ, ਕਾਯੇਨ ਫੋਟ੍ਠਬ੍ਬਂ ਫੁਸਤਿ, ਮਨਸਾ ਧਮ੍ਮਂ ਵਿਜਾਨਾਤੀ’’ਤਿ? ਥੇਰੋ ਆਹ ‘‘ਯਦਿ ਜੀਵੋ ਚਕ੍ਖੁਨਾ ਰੂਪਂ ਪਸ੍ਸਤਿ…ਪੇ… ਮਨਸਾ ਧਮ੍ਮਂ ਵਿਜਾਨਾਤਿ, ਸੋ ਜੀਵੋ ਚਕ੍ਖੁਦ੍ਵਾਰੇਸੁ ਉਪ੍ਪਾਟਿਤੇਸੁ ਮਹਨ੍ਤੇਨ ਆਕਾਸੇਨ ਬਹਿਮੁਖੋ ਸੁਟ੍ਠੁਤਰਂ ਰੂਪਂ ਪਸ੍ਸੇਯ੍ਯ, ਸੋਤੇਸੁ ਉਪ੍ਪਾਟਿਤੇਸੁ, ਘਾਨੇ ਉਪ੍ਪਾਟਿਤੇ, ਜਿਵ੍ਹਾਯ ਉਪ੍ਪਾਟਿਤਾਯ, ਕਾਯੇ ਉਪ੍ਪਾਟਿਤੇ ਮਹਨ੍ਤੇਨ ਆਕਾਸੇਨ ਸੁਟ੍ਠੁਤਰਂ ਸਦ੍ਦਂ ਸੁਣੇਯ੍ਯ, ਗਨ੍ਧਂ ਘਾਯੇਯ੍ਯ, ਰਸਂ ਸਾਯੇਯ੍ਯ, ਫੋਟ੍ਠਬ੍ਬਂ ਫੁਸੇਯ੍ਯਾ’’ਤਿ? ‘‘ਨ ਹਿ, ਭਨ੍ਤੇ’’ਤਿ. ‘‘ਤੇਨ ਹਿ, ਮਹਾਰਾਜ, ਭੂਤਸ੍ਮਿਂ ਜੀਵੋ ਨੁਪਲਬ੍ਭਤੀ’’ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਵਿਞ੍ਞਾਣਨਾਨਤ੍ਥਪਞ੍ਹੋ ਪਨ੍ਨਰਸਮੋ.