੪. ਭਗਵਤੋ ਬ੍ਰਹ੍ਮਚਾਰਿਪਞ੍ਹੋ

੪. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਬੁਦ੍ਧੋ ਬ੍ਰਹ੍ਮਚਾਰੀ’’ਤਿ? ‘‘ਆਮ, ਮਹਾਰਾਜ, ਭਗਵਾ ਬ੍ਰਹ੍ਮਚਾਰੀ’’ਤਿ. ‘‘ਤੇਨ ਹਿ, ਭਨ੍ਤੇ ਨਾਗਸੇਨ, ਬੁਦ੍ਧੋ ਬ੍ਰਹ੍ਮੁਨੋ ਸਿਸ੍ਸੋ’’ਤਿ? ‘‘ਅਤ੍ਥਿ ਪਨ ਤੇ, ਮਹਾਰਾਜ, ਹਤ੍ਥਿਪਾਮੋਕ੍ਖੋ’’ਤਿ? ‘‘ਅਤ੍ਥਿ, ਭਨ੍ਤੇ’’ਤਿ. ‘‘ਕਿਂਨੁ ਖੋ, ਮਹਾਰਾਜ, ਸੋ ਹਤ੍ਥੀ ਕਦਾਚਿ ਕਰਹਚਿ ਕੋਞ੍ਚਨਾਦਂ ਨਦਤੀਤਿ? ‘‘ਆਮ, ਭਨ੍ਤੇ, ਨਦਤੀ’’ਤਿ ‘‘ਤੇਨ ਹਿ, ਮਹਾਰਾਜ, ਸੋ ਹਤ੍ਥੀ ਕੋਞ੍ਚਸਕੁਣਸ੍ਸ ਸਿਸ੍ਸੋ’’ਤਿ? ‘‘ਨ ਹਿ, ਭਨ੍ਤੇ’’ਤਿ. ‘‘ਕਿਂ ਪਨ, ਮਹਾਰਾਜ, ਬ੍ਰਹ੍ਮਾ ਸਬੁਦ੍ਧਿਕੋ ਅਬੁਦ੍ਧਿਕੋ’’ਤਿ? ‘‘ਸਬੁਦ੍ਧਿਕੋ, ਭਨ੍ਤੇ’’ਤਿ. ‘‘ਤੇਨ ਹਿ, ਮਹਾਰਾਜ, ਬ੍ਰਹ੍ਮਾ ਭਗਵਤੋ ਸਿਸ੍ਸੋ’’ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਭਗਵਤੋ ਬ੍ਰਹ੍ਮਚਾਰਿਪਞ੍ਹੋ ਚਤੁਤ੍ਥੋ.