੬. ਸਤਿਵਗ੍ਗੋ

੧. ਕਾਯਪਿਯਾਯਨਪਞ੍ਹੋ

੧. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਪਿਯੋ ਪਬ੍ਬਜਿਤਾਨਂ ਕਾਯੋ’’ਤਿ? ‘‘ਨ ਖੋ, ਮਹਾਰਾਜ, ਪਿਯੋ ਪਬ੍ਬਜਿਤਾਨਂ ਕਾਯੋ’’ਤਿ. ‘‘ਅਥ ਕਿਸ੍ਸ ਨੁ ਖੋ, ਭਨ੍ਤੇ, ਕੇਲਾਯਥ ਮਮਾਯਥਾ’’ਤਿ? ‘‘ਕਿਂ ਪਨ ਤੇ, ਮਹਾਰਾਜ, ਕਦਾਚਿ ਕਰਹਚਿ ਸਙ੍ਗਾਮਗਤਸ੍ਸ ਕਣ੍ਡਪ੍ਪਹਾਰੋ ਹੋਤੀ’’ਤਿ? ‘‘ਆਮ, ਭਨ੍ਤੇ, ਹੋਤੀ’’ਤਿ. ‘‘ਕਿਂਨੁ ਖੋ, ਮਹਾਰਾਜ, ਸੋ ਵਣੋ ਆਲੇਪੇਨ ਚ ਆਲਿਮ੍ਪੀਯਤਿ ਤੇਲੇਨ ਚ ਮਕ੍ਖੀਯਤਿ ਸੁਖੁਮੇਨ ਚ ਚੋਲ਼ਪਟ੍ਟੇਨ ਪਲਿਵੇਠੀਯਤੀ’’ਤਿ? ‘‘ਆਮ, ਭਨ੍ਤੇ, ਆਲੇਪੇਨ ਚ ਆਲਿਮ੍ਪੀਯਤਿ ਤੇਲੇਨ ਚ ਮਕ੍ਖੀਯਤਿ ਸੁਖੁਮੇਨ ਚ ਚੋਲ਼ਪਟ੍ਟੇਨ ਪਲਿਵੇਠੀਯਤੀ’’ਤਿ. ‘‘ਕਿਂਨੁ ਖੋ, ਮਹਾਰਾਜ, ਪਿਯੋ ਤੇ ਵਣੋ, ਤੇਨ ਆਲੇਪੇਨ ਚ ਆਲਿਮ੍ਪੀਯਤਿ ਤੇਲੇਨ ਚ ਮਕ੍ਖੀਯਤਿ ਸੁਖੁਮੇਨ ਚ ਚੋਲ਼ਪਟ੍ਟੇਨ ਪਲਿਵੇਠੀਯਤੀ’’ਤਿ? ‘‘ਨ ਮੇ, ਭਨ੍ਤੇ, ਪਿਯੋ ਵਣੋ, ਅਪਿ ਚ ਮਂਸਸ੍ਸ ਰੁਹਨਤ੍ਥਾਯ ਆਲੇਪੇਨ ਚ ਆਲਿਮ੍ਪੀਯਤਿ ਤੇਲੇਨ ਚ ਮਕ੍ਖੀਯਤਿ ਸੁਖੁਮੇਨ ਚ ਚੋਲ਼ਪਟ੍ਟੇਨ ਪਲਿਵੇਠੀਯਤੀ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਅਪ੍ਪਿਯੋ ਪਬ੍ਬਜਿਤਾਨਂ ਕਾਯੋ, ਅਥ ਚ ਪਬ੍ਬਜਿਤਾ ਅਨਜ੍ਝੋਸਿਤਾ ਕਾਯਂ ਪਰਿਹਰਨ੍ਤਿ ਬ੍ਰਹ੍ਮਚਰਿਯਾਨੁਗ੍ਗਹਾਯ. ਅਪਿ ਚ ਖੋ, ਮਹਾਰਾਜ, ਵਣੂਪਮੋ ਕਾਯੋ ਵੁਤ੍ਤੋ ਭਗਵਤਾ, ਤੇਨ ਪਬ੍ਬਜਿਤਾ ਵਣਮਿਵ ਕਾਯਂ ਪਰਿਹਰਨ੍ਤਿ ਅਨਜ੍ਝੋਸਿਤਾ. ਭਾਸਿਤਮ੍ਪੇਤਂ ਮਹਾਰਾਜ ਭਗਵਤਾ –

‘‘‘ਅਲ੍ਲਚਮ੍ਮਪਟਿਚ੍ਛਨ੍ਨੋ, ਨਵਦ੍ਵਾਰੋ ਮਹਾਵਣੋ;

ਸਮਨ੍ਤਤੋ ਪਗ੍ਘਰਤਿ, ਅਸੁਚਿਪੂਤਿਗਨ੍ਧਿਯੋ’’’ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਕਾਯਪਿਯਾਯਨਪਞ੍ਹੋ ਪਠਮੋ.

੨. ਸਬ੍ਬਞ੍ਞੂਭਾਵਪਞ੍ਹੋ

੨. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਬੁਦ੍ਧੋ ਸਬ੍ਬਞ੍ਞੂ ਸਬ੍ਬਦਸ੍ਸਾਵੀ’’ਤਿ? ‘‘ਆਮ, ਮਹਾਰਾਜ, ਭਗਵਾ ਸਬ੍ਬਞ੍ਞੂ ਸਬ੍ਬਦਸ੍ਸਾਵੀ’’ਤਿ. ‘‘ਅਥ ਕਿਸ੍ਸ ਨੁ ਖੋ, ਭਨ੍ਤੇ ਨਾਗਸੇਨ, ਸਾਵਕਾਨਂ ਅਨੁਪੁਬ੍ਬੇਨ ਸਿਕ੍ਖਾਪਦਂ ਪਞ੍ਞਪੇਸੀ’’ਤਿ? ‘‘ਅਤ੍ਥਿ ਪਨ ਤੇ ਮਹਾਰਾਜ, ਕੋਚਿ ਵੇਜ੍ਜੋ, ਯੋ ਇਮਿਸ੍ਸਂ ਪਥਵਿਯਂ ਸਬ੍ਬਭੇਸਜ੍ਜਾਨਿ ਜਾਨਾਤੀ’’ਤਿ? ‘‘ਆਮ, ਭਨ੍ਤੇ, ਅਤ੍ਥੀ’’ਤਿ. ‘‘ਕਿਂਨੁ ਖੋ, ਮਹਾਰਾਜ, ਸੋ ਵੇਜ੍ਜੋ ਗਿਲਾਨਕਂ ਸਮ੍ਪਤ੍ਤੇ ਕਾਲੇ ਭੇਸਜ੍ਜਂ ਪਾਯੇਤਿ, ਉਦਾਹੁ ਅਸਮ੍ਪਤ੍ਤੇ ਕਾਲੇ’’ਤਿ? ‘‘ਸਮ੍ਪਤ੍ਤੇ ਕਾਲੇ, ਭਨ੍ਤੇ, ਗਿਲਾਨਕਂ ਭੇਸਜ੍ਜਂ ਪਾਯੇਤਿ, ਨੋ ਅਸਮ੍ਪਤ੍ਤੇ ਕਾਲੇ’’ਤਿ? ‘‘ਏਵਮੇਵ ਖੋ, ਮਹਾਰਾਜ, ਭਗਵਾ ਸਬ੍ਬਞ੍ਞੂ ਸਬ੍ਬਦਸ੍ਸਾਵੀ ਨ ਅਸਮ੍ਪਤ੍ਤੇ ਕਾਲੇ ਸਾਵਕਾਨਂ ਸਿਕ੍ਖਾਪਦਂ ਪਞ੍ਞਾਪੇਤਿ, ਸਮ੍ਪਤ੍ਤੇ ਕਾਲੇ ਸਾਵਕਾਨਂ ਸਿਕ੍ਖਾਪਦਂ ਪਞ੍ਞਾਪੇਤਿ ਯਾਵਜੀਵਂ ਅਨਤਿਕ੍ਕਮਨੀਯ’’ਨ੍ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਸਬ੍ਬਞ੍ਞੂਭਾਵਪਞ੍ਹੋ ਦੁਤਿਯੋ.

੩. ਮਹਾਪੁਰਿਸਲਕ੍ਖਣਪਞ੍ਹੋ

੩. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਬੁਦ੍ਧੋ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਸਮਨ੍ਨਾਗਤੋ ਅਸੀਤਿਯਾ ਚ ਅਨੁਬ੍ਯਞ੍ਜਨੇਹਿ ਪਰਿਰਞ੍ਜਿਤੋ ਸੁਵਣ੍ਣਵਣ੍ਣੋ ਕਞ੍ਚਨਸਨ੍ਨਿਭਤ੍ਤਚੋ ਬ੍ਯਾਮਪ੍ਪਭੋ’’ਤਿ? ‘‘ਆਮ, ਮਹਾਰਾਜ, ਭਗਵਾ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਸਮਨ੍ਨਾਗਤੋ ਅਸੀਤਿਯਾ ਚ ਅਨੁਬ੍ਯਞ੍ਜਨੇਹਿ ਪਰਿਰਞ੍ਜਿਤੋ ਸੁਵਣ੍ਣਵਣ੍ਣੋ ਕਞ੍ਚਨਸਨ੍ਨਿਭਤ੍ਤਚੋ ਬ੍ਯਾਮਪ੍ਪਭੋ’’ਤਿ.

‘‘ਕਿਂ ਪਨਸ੍ਸ, ਭਨ੍ਤੇ, ਮਾਤਾਪਿਤਰੋਪਿ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਸਮਨ੍ਨਾਗਤਾ ਅਸੀਤਿਯਾ ਚ ਅਨੁਬ੍ਯਞ੍ਜਨੇਹਿ ਪਰਿਰਞ੍ਜਿਤਾ ਸੁਵਣ੍ਣਵਣ੍ਣਾ ਕਞ੍ਚਨਸਨ੍ਨਿਭਤ੍ਤਚਾ ਬ੍ਯਾਮਪ੍ਪਭਾ’’ਤਿ? ‘‘ਨੋ ਚਸ੍ਸ, ਮਹਾਰਾਜ, ਮਾਤਾਪਿਤਰੋ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਸਮਨ੍ਨਾਗਤਾ ਅਸੀਤਿਯਾ ਚ ਅਨੁਬ੍ਯਞ੍ਜਨੇਹਿ ਪਰਿਰਞ੍ਜਿਤਾ ਸੁਵਣ੍ਣਵਣ੍ਣਾ ਕਞ੍ਚਨਸਨ੍ਨਿਭਤ੍ਤਚਾ ਬ੍ਯਾਮਪ੍ਪਭਾ’’ਤਿ.

‘‘ਏਵਂ ਸਨ੍ਤੇ ਖੋ, ਭਨ੍ਤੇ ਨਾਗਸੇਨ, ਨ ਉਪ੍ਪਜ੍ਜਤਿ ਬੁਦ੍ਧੋ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਸਮਨ੍ਨਾਗਤੋ ਅਸੀਤਿਯਾ ਚ ਅਨੁਬ੍ਯਞ੍ਜਨੇਹਿ ਪਰਿਰਞ੍ਜਿਤੋ ਸੁਵਣ੍ਣਵਣ੍ਣੋ ਕਞ੍ਚਨਸਨ੍ਨਿਭਤ੍ਤਚੋ ਬ੍ਯਾਮਪ੍ਪਭੋਤਿ, ਅਪਿ ਚ ਮਾਤੁਸਦਿਸੋ ਵਾ ਪੁਤ੍ਤੋ ਹੋਤਿ ਮਾਤੁਪਕ੍ਖੋ ਵਾ, ਪਿਤੁਸਦਿਸੋ ਵਾ ਪੁਤ੍ਤੋ ਹੋਤਿ ਪਿਤੁਪਕ੍ਖੋ ਵਾ’’ਤਿ. ਥੇਰੋ ਆਹ ‘‘ਅਤ੍ਥਿ ਪਨ, ਮਹਾਰਾਜ, ਕਿਞ੍ਚਿ ਪਦੁਮਂ ਸਤਪਤ੍ਤ’’ਨ੍ਤਿ? ‘‘ਆਮ, ਭਨ੍ਤੇ, ਅਤ੍ਥੀ’’ਤਿ. ‘‘ਤਸ੍ਸ ਪਨ ਕੁਹਿਂ ਸਮ੍ਭਵੋ’’ਤਿ? ‘‘ਕਦ੍ਦਮੇ ਜਾਯਤਿ ਉਦਕੇ ਆਸੀਯਤੀ’’ਤਿ. ‘‘ਕਿਂਨੁ ਖੋ, ਮਹਾਰਾਜ, ਪਦੁਮਂ ਕਦ੍ਦਮੇਨ ਸਦਿਸਂ ਵਣ੍ਣੇਨ ਵਾ ਗਨ੍ਧੇਨ ਵਾ ਰਸੇਨ ਵਾ’’ਤਿ? ‘‘ਨ ਹਿ, ਭਨ੍ਤੇ’’ਤਿ. ‘‘ਅਥ ਉਦਕੇਨ ਵਾ ਗਨ੍ਧੇਨ ਵਾ ਰਸੇਨ ਵਾ’’ਤਿ? ‘‘ਨ ਹਿ, ਭਨ੍ਤੇ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਭਗਵਾ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਸਮਨ੍ਨਾਗਤੋ ਅਸੀਤਿਯਾ ਚ ਅਨੁਬ੍ਯਞ੍ਜਨੇਹਿ ਪਰਿਰਞ੍ਜਿਤੋ ਸੁਵਣ੍ਣਵਣ੍ਣੋ ਕਞ੍ਚਨਸਨ੍ਨਿਭਤ੍ਤਚੋ ਬ੍ਯਾਮਪ੍ਪਭੋ, ਨੋ ਚਸ੍ਸ ਮਾਤਾਪਿਤਰੋ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਸਮਨ੍ਨਾਗਤਾ ਅਸੀਤਿਯਾ ਚ ਅਨੁਬ੍ਯਞ੍ਜਨੇਹਿ ਪਰਿਰਞ੍ਜਿਤਾ ਸੁਵਣ੍ਣਵਣ੍ਣਾ ਕਞ੍ਚਨਸਨ੍ਨਿਭਤ੍ਤਚਾ ਬ੍ਯਾਮਪ੍ਪਭਾ’’ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਮਹਾਪੁਰਿਸਲਕ੍ਖਣਪਞ੍ਹੋ ਤਤਿਯੋ.

੪. ਭਗਵਤੋ ਬ੍ਰਹ੍ਮਚਾਰਿਪਞ੍ਹੋ

੪. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਬੁਦ੍ਧੋ ਬ੍ਰਹ੍ਮਚਾਰੀ’’ਤਿ? ‘‘ਆਮ, ਮਹਾਰਾਜ, ਭਗਵਾ ਬ੍ਰਹ੍ਮਚਾਰੀ’’ਤਿ. ‘‘ਤੇਨ ਹਿ, ਭਨ੍ਤੇ ਨਾਗਸੇਨ, ਬੁਦ੍ਧੋ ਬ੍ਰਹ੍ਮੁਨੋ ਸਿਸ੍ਸੋ’’ਤਿ? ‘‘ਅਤ੍ਥਿ ਪਨ ਤੇ, ਮਹਾਰਾਜ, ਹਤ੍ਥਿਪਾਮੋਕ੍ਖੋ’’ਤਿ? ‘‘ਅਤ੍ਥਿ, ਭਨ੍ਤੇ’’ਤਿ. ‘‘ਕਿਂਨੁ ਖੋ, ਮਹਾਰਾਜ, ਸੋ ਹਤ੍ਥੀ ਕਦਾਚਿ ਕਰਹਚਿ ਕੋਞ੍ਚਨਾਦਂ ਨਦਤੀਤਿ? ‘‘ਆਮ, ਭਨ੍ਤੇ, ਨਦਤੀ’’ਤਿ ‘‘ਤੇਨ ਹਿ, ਮਹਾਰਾਜ, ਸੋ ਹਤ੍ਥੀ ਕੋਞ੍ਚਸਕੁਣਸ੍ਸ ਸਿਸ੍ਸੋ’’ਤਿ? ‘‘ਨ ਹਿ, ਭਨ੍ਤੇ’’ਤਿ. ‘‘ਕਿਂ ਪਨ, ਮਹਾਰਾਜ, ਬ੍ਰਹ੍ਮਾ ਸਬੁਦ੍ਧਿਕੋ ਅਬੁਦ੍ਧਿਕੋ’’ਤਿ? ‘‘ਸਬੁਦ੍ਧਿਕੋ, ਭਨ੍ਤੇ’’ਤਿ. ‘‘ਤੇਨ ਹਿ, ਮਹਾਰਾਜ, ਬ੍ਰਹ੍ਮਾ ਭਗਵਤੋ ਸਿਸ੍ਸੋ’’ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਭਗਵਤੋ ਬ੍ਰਹ੍ਮਚਾਰਿਪਞ੍ਹੋ ਚਤੁਤ੍ਥੋ.

੫. ਭਗਵਤੋ ਉਪਸਮ੍ਪਦਾਪਞ੍ਹੋ

੫. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਉਪਸਮ੍ਪਦਾ ਸੁਨ੍ਦਰਾ’’ਤਿ? ‘‘ਆਮ, ਮਹਾਰਾਜ, ਉਪਸਮ੍ਪਦਾ ਸੁਨ੍ਦਰਾ’’ਤਿ. ‘‘ਅਤ੍ਥਿ ਪਨ, ਭਨ੍ਤੇ, ਬੁਦ੍ਧਸ੍ਸ ਉਪਸਮ੍ਪਦਾ, ਉਦਾਹੁ ਨਤ੍ਥੀ’’ਤਿ? ‘‘ਉਪਸਮ੍ਪਨ੍ਨੋ ਖੋ, ਮਹਾਰਾਜ, ਭਗਵਾ ਬੋਧਿਰੁਕ੍ਖਮੂਲੇ ਸਹ ਸਬ੍ਬਞ੍ਞੁਤਞਾਣੇਨ, ਨਤ੍ਥਿ ਭਗਵਤੋ ਉਪਸਮ੍ਪਦਾ ਅਞ੍ਞੇਹਿ ਦਿਨ੍ਨਾ, ਯਥਾ ਸਾਵਕਾਨਂ, ਮਹਾਰਾਜ, ਭਗਵਾ ਸਿਕ੍ਖਾਪਦਂ ਪਞ੍ਞਪੇਤਿ ਯਾਵਜੀਵਂ ਅਨਤਿਕ੍ਕਮਨੀਯ’’ਨ੍ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਭਗਵਤੋ ਉਪਸਮ੍ਪਦਾਪਞ੍ਹੋ ਪਞ੍ਚਮੋ.

੬. ਅਸ੍ਸੁਭੇਸਜ੍ਜਾਭੇਸਜ੍ਜਪਞ੍ਹੋ

੬. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਯੋ ਚ ਮਾਤਰਿ ਮਤਾਯ ਰੋਦਤਿ, ਯੋ ਚ ਧਮ੍ਮਪੇਮੇਨ ਰੋਦਤਿ, ਉਭਿਨ੍ਨਂ ਤੇਸਂ ਰੋਦਨ੍ਤਾਨਂ ਕਸ੍ਸ ਅਸ੍ਸੁ ਭੇਸਜ੍ਜਂ, ਕਸ੍ਸ ਨ ਭੇਸਜ੍ਜ’’ਨ੍ਤਿ? ‘‘ਏਕਸ੍ਸ ਖੋ, ਮਹਾਰਾਜ, ਅਸ੍ਸੁ ਰਾਗਦੋਸਮੋਹੇਹਿ ਸਮਲਂ ਉਣ੍ਹਂ, ਏਕਸ੍ਸ ਪੀਤਿਸੋਮਨਸ੍ਸੇਨ ਵਿਮਲਂ ਸੀਤਲਂ. ਯਂ ਖੋ, ਮਹਾਰਾਜ, ਸੀਤਲਂ, ਤਂ ਭੇਸਜ੍ਜਂ, ਯਂ ਉਣ੍ਹਂ, ਤਂ ਨ ਭੇਸਜ੍ਜ’’ਨ੍ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਅਸ੍ਸੁਭੇਸਜ੍ਜਾਭੇਸਜ੍ਜਪਞ੍ਹੋ ਛਟ੍ਠੋ.

੭. ਸਰਾਗਵੀਤਰਾਗਨਾਨਾਕਰਣਪਞ੍ਹੋ

੭. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਕਿਂ ਨਾਨਾਕਰਣਂ ਸਰਾਗਸ੍ਸ ਚ ਵੀਤਰਾਗਸ੍ਸ ਚਾ’’ਤਿ? ‘‘ਏਕੋ ਖੋ, ਮਹਾਰਾਜ, ਅਜ੍ਝੋਸਿਤੋ, ਏਕੋ ਅਨਜ੍ਝੋਸਿਤੋ’’ਤਿ. ‘‘ਕਿਂ ਏਤਂ, ਭਨ੍ਤੇ, ਅਜ੍ਝੋਸਿਤੋ ਅਨਜ੍ਝੋਸਿਤੋ ਨਾਮਾ’’ਤਿ? ‘‘ਏਕੋ ਖੋ, ਮਹਾਰਾਜ, ਅਤ੍ਥਿਕੋ, ਏਕੋ ਅਨਤ੍ਥਿਕੋ’’ਤਿ. ‘‘ਪਸ੍ਸਾਮਹਂ, ਭਨ੍ਤੇ, ਏਵਰੂਪਂ ਯੋ ਚ ਸਰਾਗੋ, ਯੋ ਚ ਵੀਤਰਾਗੋ, ਸਬ੍ਬੋਪੇਸੋ ਸੋਭਨਂ ਯੇਵ ਇਚ੍ਛਤਿ ਖਾਦਨੀਯਂ ਵਾ ਭੋਜਨੀਯਂ ਵਾ, ਨ ਕੋਚਿ ਪਾਪਕਂ ਇਚ੍ਛਤੀ’’ਤਿ. ‘‘ਅਵੀਤਰਾਗੋ ਖੋ, ਮਹਾਰਾਜ, ਰਸਪਟਿਸਂਵੇਦੀ ਚ ਰਸਰਾਗਪਟਿਸਂਵੇਦੀ ਚ ਭੋਜਨਂ ਭੁਞ੍ਜਤਿ, ਵੀਤਰਾਗੋ ਪਨ ਰਸਪਟਿਸਂਵੇਦੀ ਭੋਜਨਂ ਭੁਞ੍ਜਤਿ, ਨੋ ਚ ਖੋ ਰਸਰਾਗਪਟਿਸਂਵੇਦੀ’’ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਸਰਾਗਵੀਤਰਾਗਨਾਨਾਕਰਣਪਞ੍ਹੋ ਸਤ੍ਤਮੋ.

੮. ਪਞ੍ਞਾਪਤਿਟ੍ਠਾਨਪਞ੍ਹੋ

੮. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਪਞ੍ਞਾ ਕੁਹਿਂ ਪਟਿਵਸਤੀ’’ਤਿ? ‘‘ਨ ਕਤ੍ਥਚਿ ਮਹਾਰਾਜਾ’’ਤਿ. ‘‘ਤੇਨ ਹਿ, ਭਨ੍ਤੇ ਨਾਗਸੇਨ, ਨਤ੍ਥਿ ਪਞ੍ਞਾ’’ਤਿ. ‘‘ਵਾਤੋ, ਮਹਾਰਾਜ, ਕੁਹਿਂ ਪਟਿਵਸਤੀ’’ਤਿ? ‘‘ਨ ਕਤ੍ਥਚਿ ਭਨ੍ਤੇ’’ਤਿ. ‘‘ਤੇਨ ਹਿ, ਮਹਾਰਾਜ, ਨਤ੍ਥਿ ਵਾਤੋ’’ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਪਞ੍ਞਾਪਤਿਟ੍ਠਾਨਪਞ੍ਹੋ ਅਟ੍ਠਮੋ.

੯. ਸਂਸਾਰਪਞ੍ਹੋ

੯. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਯਂ ਪਨੇਤਂ ਬ੍ਰੂਸਿ ‘ਸਂਸਾਰੋ’ਤਿ, ਕਤਮੋ ਸੋ ਸਂਸਾਰੋ’’ਤਿ? ‘‘ਇਧ, ਮਹਾਰਾਜ, ਜਾਤੋ ਇਧੇਵ ਮਰਤਿ, ਇਧ ਮਤੋ ਅਞ੍ਞਤ੍ਰ ਉਪ੍ਪਜ੍ਜਤਿ, ਤਹਿਂ ਜਾਤੋ ਤਹਿਂ ਯੇਵ ਮਰਤਿ, ਤਹਿਂ ਮਤੋ ਅਞ੍ਞਤ੍ਰ ਉਪ੍ਪਜ੍ਜਤਿ, ਏਵਂ ਖੋ, ਮਹਾਰਾਜ, ਸਂਸਾਰੋ ਹੋਤੀ’’ਤਿ. ‘‘ਓਪਮ੍ਮਂ ਕਰੋਹੀ’’ਤਿ. ‘‘ਯਥਾ, ਮਹਾਰਾਜ, ਕੋਚਿਦੇਵ ਪੁਰਿਸੋ ਪਕ੍ਕਂ ਅਮ੍ਬਂ ਖਾਦਿਤ੍ਵਾ ਅਟ੍ਠਿਂ ਰੋਪੇਯ੍ਯ, ਤਤੋ ਮਹਨ੍ਤੋ ਅਮ੍ਬਰੁਕ੍ਖੋ ਨਿਬ੍ਬਤ੍ਤਿਤ੍ਵਾ ਫਲਾਨਿ ਦਦੇਯ੍ਯ, ਅਥ ਸੋ ਪੁਰਿਸੋ ਤਤੋਪਿ ਪਕ੍ਕਂ ਅਮ੍ਬਂ ਖਾਦਿਤ੍ਵਾ ਅਟ੍ਠਿਂ ਰੋਪੇਯ੍ਯ, ਤਤੋਪਿ ਮਹਨ੍ਤੋ ਅਮ੍ਬਰੁਕ੍ਖੋ ਨਿਬ੍ਬਤ੍ਤਿਤ੍ਵਾ ਫਲਾਨਿ ਦਦੇਯ੍ਯ, ਏਵਮੇਤੇਸਂ ਰੁਕ੍ਖਾਨਂ ਕੋਟਿ ਨ ਪਞ੍ਞਾਯਤਿ, ਏਵਮੇਵ ਖੋ, ਮਹਾਰਾਜ, ਇਧ ਜਾਤੋ ਇਧੇਵ ਮਰਤਿ, ਇਧ ਮਤੋ ਅਞ੍ਞਤ੍ਰ ਉਪ੍ਪਜ੍ਜਤਿ, ਤਹਿਂ ਜਾਤੋ ਤਹਿਂ ਯੇਵ ਮਰਤਿ, ਤਹਿਂ ਮਤੋ ਅਞ੍ਞਤ੍ਰ ਉਪ੍ਪਜ੍ਜਤਿ, ਏਵਂ ਖੋ, ਮਹਾਰਾਜ, ਸਂਸਾਰੋ ਹੋਤੀ’’ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਸਂਸਾਰਪਞ੍ਹੋ ਨਵਮੋ.

੧੦. ਚਿਰਕਤਸਰਣਪਞ੍ਹੋ

੧੦. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਕੇਨ ਅਤੀਤਂ ਚਿਰਕਤਂ ਸਰਤੀ’’ਤਿ? ‘‘ਸਤਿਯਾ, ਮਹਾਰਾਜਾ’’ਤਿ. ‘‘ਨਨੁ, ਭਨ੍ਤੇ ਨਾਗਸੇਨ, ਚਿਤ੍ਤੇਨ ਸਰਤਿ ਨੋ ਸਤਿਯਾ’’ਤਿ? ‘‘ਅਭਿਜਾਨਾਸਿ ਨੁ, ਤ੍ਵਂ ਮਹਾਰਾਜ, ਕਿਞ੍ਚਿਦੇਵ ਕਰਣੀਯਂ ਕਤ੍ਵਾ ਪਮੁਟ੍ਠ’’ਨ੍ਤਿ? ‘‘ਆਮ ਭਨ੍ਤੇ’’ਤਿ. ‘‘ਕਿਂ ਨੁ ਖੋ, ਤ੍ਵਂ ਮਹਾਰਾਜ, ਤਸ੍ਮਿਂ ਸਮਯੇ ਅਚਿਤ੍ਤਕੋ ਅਹੋਸੀ’’ਤਿ? ‘‘ਨ ਹਿ, ਭਨ੍ਤੇ, ਸਤਿ ਤਸ੍ਮਿਂ ਸਮਯੇ ਨਾਹੋਸੀ’’ਤਿ. ‘‘ਅਥ ਕਸ੍ਮਾ, ਤ੍ਵਂ ਮਹਾਰਾਜ, ਏਵਮਾਹ ‘ਚਿਤ੍ਤੇਨ ਸਰਤਿ, ਨੋ ਸਤਿਯਾ’’’ਤਿ?

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਚਿਰਕਤਸਰਣਪਞ੍ਹੋ ਦਸਮੋ.

੧੧. ਅਭਿਜਾਨਨ੍ਤਸਤਿਪਞ੍ਹੋ

੧੧. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਸਬ੍ਬਾ ਸਤਿ ਅਭਿਜਾਨਨ੍ਤੀ ਉਪ੍ਪਜ੍ਜਤਿ, ਉਦਾਹੁ ਕਟੁਮਿਕਾਵ ਸਤੀ’’ਤਿ? ‘‘ਅਭਿਜਾਨਨ੍ਤੀਪਿ, ਮਹਾਰਾਜ, ਕਟੁਮਿਕਾਪਿ ਸਤੀ’’ਤਿ. ‘‘ਏਵਞ੍ਹਿ ਖੋ, ਭਨ੍ਤੇ ਨਾਗਸੇਨ, ਸਬ੍ਬਾ ਸਤਿ ਅਭਿਜਾਨਨ੍ਤੀ, ਨਤ੍ਥਿ ਕਟੁਮਿਕਾ ਸਤੀ’’ਤਿ? ‘‘ਯਦਿ ਨਤ੍ਥਿ, ਮਹਾਰਾਜ, ਕਟੁਮਿਕਾ ਸਤਿ, ਨਤ੍ਥਿ ਕਿਞ੍ਚਿ ਸਿਪ੍ਪਿਕਾਨਂ ਕਮ੍ਮਾਯਤਨੇਹਿ ਵਾ ਸਿਪ੍ਪਾਯਤਨੇਹਿ ਵਾ ਵਿਜ੍ਜਾਟ੍ਠਾਨੇਹਿ ਵਾ ਕਰਣੀਯਂ, ਨਿਰਤ੍ਥਕਾ ਆਚਰਿਯਾ, ਯਸ੍ਮਾ ਚ ਖੋ, ਮਹਾਰਾਜ, ਅਤ੍ਥਿ ਕਟੁਮਿਕਾ ਸਤਿ, ਤਸ੍ਮਾ ਅਤ੍ਥਿ ਕਮ੍ਮਾਯਤਨੇਹਿ ਵਾ ਸਿਪ੍ਪਾਯਤਨੇਹਿ ਵਾ ਵਿਜ੍ਜਾਟ੍ਠਾਨੇਹਿ ਵਾ ਕਰਣੀਯਂ, ਅਤ੍ਥੋ ਚ ਆਚਰਿਯੇਹੀ’’ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਅਭਿਜਾਨਨ੍ਤਸਤਿਪਞ੍ਹੋ ਏਕਾਦਸਮੋ.

ਸਤਿਵਗ੍ਗੋ ਛਟ੍ਠੋ.

ਇਮਸ੍ਮਿਂ ਵਗ੍ਗੇ ਏਕਾਦਸ ਪਞ੍ਹਾ.