੧. ਫਸ੍ਸਾਦਿਵਿਨਿਬ੍ਭੁਜਨਪਞ੍ਹੋ

੧. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਸਕ੍ਕਾ ਇਮੇਸਂ ਧਮ੍ਮਾਨਂ ਏਕਤੋਭਾਵਗਤਾਨਂ ਵਿਨਿਬ੍ਭੁਜਿਤ੍ਵਾ ਵਿਨਿਬ੍ਭੁਜਿਤ੍ਵਾ ਨਾਨਾਕਰਣਂ ਪਞ੍ਞਾਪੇਤੁਂ ‘ਅਯਂ ਫਸ੍ਸੋ, ਅਯਂ ਵੇਦਨਾ, ਅਯਂ ਸਞ੍ਞਾ, ਅਯਂ ਚੇਤਨਾ, ਇਦਂ ਵਿਞ੍ਞਾਣਂ, ਅਯਂ ਵਿਤਕ੍ਕੋ, ਅਯਂ ਵਿਚਾਰੋ’ਤਿ’’? ‘‘ਨ ਸਕ੍ਕਾ, ਮਹਾਰਾਜ, ਇਮੇਸਂ ਧਮ੍ਮਾਨਂ ਏਕਤੋਭਾਵਗਤਾਨਂ ਵਿਨਿਬ੍ਭੁਜਿਤ੍ਵਾ ਵਿਨਿਬ੍ਭੁਜਿਤ੍ਵਾ ਨਾਨਾਕਰਣਂ ਪਞ੍ਞਾਪੇਤੁਂ ‘ਅਯਂ ਫਸ੍ਸੋ, ਅਯਂ ਵੇਦਨਾ, ਅਯਂ ਸਞ੍ਞਾ, ਅਯਂ ਚੇਤਨਾ, ਇਦਂ ਵਿਞ੍ਞਾਣਂ, ਅਯਂ ਵਿਤਕ੍ਕੋ, ਅਯਂ ਵਿਚਾਰੋ’’’ਤਿ.

‘‘ਓਪਮ੍ਮਂ ਕਰੋਹੀ’’ਤਿ. ‘‘ਯਥਾ, ਮਹਾਰਾਜ, ਰਞ੍ਞੋ ਸੂਦੋ ਅਰਸਂ ਵਾ ਰਸਂ ਵਾ [ਯੂਸਂ ਵਾ ਰਸਂ ਵਾ (ਸੀ. ਸ੍ਯਾ. ਪੀ.)] ਕਰੇਯ੍ਯ, ਸੋ ਤਤ੍ਥ ਦਧਿਮ੍ਪਿ ਪਕ੍ਖਿਪੇਯ੍ਯ, ਲੋਣਮ੍ਪਿ ਪਕ੍ਖਿਪੇਯ੍ਯ, ਸਿਙ੍ਗਿਵੇਰਮ੍ਪਿ ਪਕ੍ਖਿਪੇਯ੍ਯ, ਜੀਰਕਮ੍ਪਿ ਪਕ੍ਖਿਪੇਯ੍ਯ, ਮਰਿਚਮ੍ਪਿ ਪਕ੍ਖਿਪੇਯ੍ਯ, ਅਞ੍ਞਾਨਿਪਿ ਪਕਾਰਾਨਿ ਪਕ੍ਖਿਪੇਯ੍ਯ, ਤਮੇਨਂ ਰਾਜਾ ਏਵਂ ਵਦੇਯ੍ਯ, ‘ਦਧਿਸ੍ਸ ਮੇ ਰਸਂ ਆਹਰ, ਲੋਣਸ੍ਸ ਮੇ ਰਸਂ ਆਹਰ, ਸਿਙ੍ਗਿਵੇਰਸ੍ਸ ਮੇ ਰਸਂ ਆਹਰ, ਜੀਰਕਸ੍ਸ ਮੇ ਰਸਂ ਆਹਰ, ਮਰਿਚਸ੍ਸ ਮੇ ਰਸਂ ਆਹਰ, ਸਬ੍ਬੇਸਂ ਮੇ ਪਕ੍ਖਿਤ੍ਤਾਨਂ ਰਸਂ ਆਹਰਾ’ਤਿ. ਸਕ੍ਕਾ ਨੁ ਖੋ, ਮਹਾਰਾਜ, ਤੇਸਂ ਰਸਾਨਂ ਏਕਤੋਭਾਵਗਤਾਨਂ ਵਿਨਿਬ੍ਭੁਜਿਤ੍ਵਾ ਵਿਨਿਬ੍ਭੁਜਿਤ੍ਵਾ ਰਸਂ ਆਹਰਿਤੁਂ ਅਮ੍ਬਿਲਤ੍ਤਂ ਵਾ ਲਵਣਤ੍ਤਂ ਵਾ ਤਿਤ੍ਤਕਤ੍ਤਂ ਵਾ ਕਟੁਕਤ੍ਤਂ ਵਾ ਕਸਾਯਤ੍ਤਂ ਵਾ ਮਧੁਰਤ੍ਤਂ ਵਾ’’ਤਿ? ‘‘ਨ ਹਿ, ਭਨ੍ਤੇ, ਸਕ੍ਕਾ ਤੇਸਂ ਰਸਾਨਂ ਏਕਤੋਭਾਵਗਤਾਨਂ ਵਿਨਿਬ੍ਭੁਜਿਤ੍ਵਾ ਵਿਨਿਬ੍ਭੁਜਿਤ੍ਵਾ ਰਸਂ ਆਹਰਿਤੁਂ ਅਮ੍ਬਿਲਤ੍ਤਂ ਵਾ ਲਵਣਤ੍ਤਂ ਵਾ ਤਿਤ੍ਤਕਤ੍ਤਂ ਵਾ ਕਟੁਕਤ੍ਤਂ ਵਾ ਕਸਾਯਤ੍ਤਂ ਵਾ ਮਧੁਰਤ੍ਤਂ ਵਾ, ਅਪਿ ਚ ਖੋ ਪਨ ਸਕੇਨ ਸਕੇਨ ਲਕ੍ਖਣੇਨ ਉਪਟ੍ਠਹਨ੍ਤੀ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਨ ਸਕ੍ਕਾ ਇਮੇਸਂ ਧਮ੍ਮਾਨਂ ਏਕਤੋਭਾਵਗਤਾਨਂ ਵਿਨਿਬ੍ਭੁਜਿਤ੍ਵਾ ਵਿਨਿਬ੍ਭੁਜਿਤ੍ਵਾ ਨਾਨਾਕਰਣਂ ਪਞ੍ਞਾਪੇਤੁਂ ‘ਅਯਂ ਫਸ੍ਸੋ, ਅਯਂ ਵੇਦਨਾ, ਅਯਂ ਸਞ੍ਞਾ, ਅਯਂ ਚੇਤਨਾ, ਇਦਂ ਵਿਞ੍ਞਾਣਂ, ਅਯਂ ਵਿਤਕ੍ਕੋ, ਅਯਂ ਵਿਚਾਰੋ’ਤਿ, ਅਪਿ ਚ ਖੋ ਪਨ ਸਕੇਨ ਸਕੇਨ ਲਕ੍ਖਣੇਨ ਉਪਟ੍ਠਹਨ੍ਤੀ’’ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਫਸ੍ਸਾਦਿਵਿਨਿਬ੍ਭੁਜਨਪਞ੍ਹੋ ਪਠਮੋ.