੪. ਨਿਬ੍ਬਾਨਵਗ੍ਗੋ
੧. ਫਸ੍ਸਾਦਿਵਿਨਿਬ੍ਭੁਜਨਪਞ੍ਹੋ
੧. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਸਕ੍ਕਾ ਇਮੇਸਂ ਧਮ੍ਮਾਨਂ ਏਕਤੋਭਾਵਗਤਾਨਂ ਵਿਨਿਬ੍ਭੁਜਿਤ੍ਵਾ ਵਿਨਿਬ੍ਭੁਜਿਤ੍ਵਾ ਨਾਨਾਕਰਣਂ ਪਞ੍ਞਾਪੇਤੁਂ ‘ਅਯਂ ਫਸ੍ਸੋ, ਅਯਂ ਵੇਦਨਾ, ਅਯਂ ਸਞ੍ਞਾ, ਅਯਂ ਚੇਤਨਾ, ਇਦਂ ਵਿਞ੍ਞਾਣਂ, ਅਯਂ ਵਿਤਕ੍ਕੋ, ਅਯਂ ਵਿਚਾਰੋ’ਤਿ’’? ‘‘ਨ ਸਕ੍ਕਾ, ਮਹਾਰਾਜ, ਇਮੇਸਂ ਧਮ੍ਮਾਨਂ ਏਕਤੋਭਾਵਗਤਾਨਂ ਵਿਨਿਬ੍ਭੁਜਿਤ੍ਵਾ ਵਿਨਿਬ੍ਭੁਜਿਤ੍ਵਾ ਨਾਨਾਕਰਣਂ ਪਞ੍ਞਾਪੇਤੁਂ ‘ਅਯਂ ਫਸ੍ਸੋ, ਅਯਂ ਵੇਦਨਾ, ਅਯਂ ਸਞ੍ਞਾ, ਅਯਂ ਚੇਤਨਾ, ਇਦਂ ਵਿਞ੍ਞਾਣਂ, ਅਯਂ ਵਿਤਕ੍ਕੋ, ਅਯਂ ਵਿਚਾਰੋ’’’ਤਿ.
‘‘ਓਪਮ੍ਮਂ ਕਰੋਹੀ’’ਤਿ. ‘‘ਯਥਾ, ਮਹਾਰਾਜ, ਰਞ੍ਞੋ ਸੂਦੋ ਅਰਸਂ ਵਾ ਰਸਂ ਵਾ [ਯੂਸਂ ਵਾ ਰਸਂ ਵਾ (ਸੀ. ਸ੍ਯਾ. ਪੀ.)] ਕਰੇਯ੍ਯ, ਸੋ ਤਤ੍ਥ ਦਧਿਮ੍ਪਿ ਪਕ੍ਖਿਪੇਯ੍ਯ, ਲੋਣਮ੍ਪਿ ਪਕ੍ਖਿਪੇਯ੍ਯ, ਸਿਙ੍ਗਿਵੇਰਮ੍ਪਿ ਪਕ੍ਖਿਪੇਯ੍ਯ, ਜੀਰਕਮ੍ਪਿ ਪਕ੍ਖਿਪੇਯ੍ਯ, ਮਰਿਚਮ੍ਪਿ ਪਕ੍ਖਿਪੇਯ੍ਯ, ਅਞ੍ਞਾਨਿਪਿ ਪਕਾਰਾਨਿ ਪਕ੍ਖਿਪੇਯ੍ਯ, ਤਮੇਨਂ ਰਾਜਾ ਏਵਂ ਵਦੇਯ੍ਯ, ‘ਦਧਿਸ੍ਸ ਮੇ ਰਸਂ ਆਹਰ, ਲੋਣਸ੍ਸ ਮੇ ਰਸਂ ਆਹਰ, ਸਿਙ੍ਗਿਵੇਰਸ੍ਸ ਮੇ ਰਸਂ ਆਹਰ, ਜੀਰਕਸ੍ਸ ਮੇ ਰਸਂ ਆਹਰ, ਮਰਿਚਸ੍ਸ ਮੇ ਰਸਂ ਆਹਰ, ਸਬ੍ਬੇਸਂ ਮੇ ਪਕ੍ਖਿਤ੍ਤਾਨਂ ਰਸਂ ਆਹਰਾ’ਤਿ. ਸਕ੍ਕਾ ਨੁ ਖੋ, ਮਹਾਰਾਜ, ਤੇਸਂ ਰਸਾਨਂ ਏਕਤੋਭਾਵਗਤਾਨਂ ਵਿਨਿਬ੍ਭੁਜਿਤ੍ਵਾ ਵਿਨਿਬ੍ਭੁਜਿਤ੍ਵਾ ਰਸਂ ਆਹਰਿਤੁਂ ਅਮ੍ਬਿਲਤ੍ਤਂ ਵਾ ਲਵਣਤ੍ਤਂ ਵਾ ਤਿਤ੍ਤਕਤ੍ਤਂ ਵਾ ਕਟੁਕਤ੍ਤਂ ਵਾ ਕਸਾਯਤ੍ਤਂ ਵਾ ਮਧੁਰਤ੍ਤਂ ਵਾ’’ਤਿ? ‘‘ਨ ਹਿ, ਭਨ੍ਤੇ, ਸਕ੍ਕਾ ਤੇਸਂ ਰਸਾਨਂ ਏਕਤੋਭਾਵਗਤਾਨਂ ਵਿਨਿਬ੍ਭੁਜਿਤ੍ਵਾ ਵਿਨਿਬ੍ਭੁਜਿਤ੍ਵਾ ਰਸਂ ਆਹਰਿਤੁਂ ਅਮ੍ਬਿਲਤ੍ਤਂ ਵਾ ਲਵਣਤ੍ਤਂ ਵਾ ਤਿਤ੍ਤਕਤ੍ਤਂ ਵਾ ਕਟੁਕਤ੍ਤਂ ਵਾ ਕਸਾਯਤ੍ਤਂ ਵਾ ਮਧੁਰਤ੍ਤਂ ਵਾ, ਅਪਿ ਚ ਖੋ ਪਨ ਸਕੇਨ ਸਕੇਨ ਲਕ੍ਖਣੇਨ ਉਪਟ੍ਠਹਨ੍ਤੀ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਨ ਸਕ੍ਕਾ ਇਮੇਸਂ ਧਮ੍ਮਾਨਂ ਏਕਤੋਭਾਵਗਤਾਨਂ ਵਿਨਿਬ੍ਭੁਜਿਤ੍ਵਾ ਵਿਨਿਬ੍ਭੁਜਿਤ੍ਵਾ ਨਾਨਾਕਰਣਂ ਪਞ੍ਞਾਪੇਤੁਂ ‘ਅਯਂ ਫਸ੍ਸੋ, ਅਯਂ ਵੇਦਨਾ, ਅਯਂ ਸਞ੍ਞਾ, ਅਯਂ ਚੇਤਨਾ, ਇਦਂ ਵਿਞ੍ਞਾਣਂ, ਅਯਂ ਵਿਤਕ੍ਕੋ, ਅਯਂ ਵਿਚਾਰੋ’ਤਿ, ਅਪਿ ਚ ਖੋ ਪਨ ਸਕੇਨ ਸਕੇਨ ਲਕ੍ਖਣੇਨ ਉਪਟ੍ਠਹਨ੍ਤੀ’’ਤਿ.
‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.
ਫਸ੍ਸਾਦਿਵਿਨਿਬ੍ਭੁਜਨਪਞ੍ਹੋ ਪਠਮੋ.
੨. ਨਾਗਸੇਨਪਞ੍ਹੋ
੨. ਥੇਰੋ ਆਹ ‘‘ਲੋਣਂ, ਮਹਾਰਾਜ, ਚਕ੍ਖੁਵਿਞ੍ਞੇਯ੍ਯ’’ਨ੍ਤਿ. ‘‘ਆਮ, ਭਨ੍ਤੇ, ਚਕ੍ਖੁਵਿਞ੍ਞੇਯ੍ਯ’’ਨ੍ਤਿ. ‘‘ਸੁਟ੍ਠੁ ਖੋ, ਮਹਾਰਾਜ, ਜਾਨਾਹੀ’’ਤਿ. ‘‘ਕਿਂ ਪਨ, ਭਨ੍ਤੇ, ਜਿਵ੍ਹਾਵਿਞ੍ਞੇਯ੍ਯ’’ਨ੍ਤਿ? ‘‘ਆਮ, ਮਹਾਰਾਜ, ਜਿਵ੍ਹਾਵਿਞ੍ਞੇਯ੍ਯ’’ਨ੍ਤਿ. ‘‘ਕਿਂ ਪਨ, ਭਨ੍ਤੇ, ਸਬ੍ਬਂ ਲੋਣਂ ਜਿਵ੍ਹਾਯ ਵਿਜਾਨਾਤੀ’’ਤਿ? ‘‘ਆਮ, ਮਹਾਰਾਜ, ਸਬ੍ਬਂ ਲੋਣਂ ਜਿਵ੍ਹਾਯ ਵਿਜਾਨਾਤਿ’’.
‘‘ਯਦਿ, ਭਨ੍ਤੇ, ਸਬ੍ਬਂ ਲੋਣਂ ਜਿਵ੍ਹਾਯ ਵਿਜਾਨਾਤਿ, ਕਿਸ੍ਸ ਪਨ ਤਂ ਸਕਟੇਹਿ ਬਲੀਬਦ੍ਦਾ [ਬਲਿਬਦ੍ਦਾ (ਸੀ. ਪੀ.)] ਆਹਰਨ੍ਤਿ, ਨਨੁ ਲੋਣਮੇਵ ਆਹਰਿਤਬ੍ਬ’’ਨ੍ਤਿ? ‘‘ਨ ਸਕ੍ਕਾ, ਮਹਾਰਾਜ, ਲੋਣਮੇਵ ਆਹਰਿਤੁਂ ਏਕਤੋਭਾਵਗਤਾ ਏਤੇ ਧਮ੍ਮਾ ਗੋਚਰਨਾਨਤ੍ਤਗਤਾ ਲੋਣਂ ਗਰੁਭਾਵੋ ਚਾਤਿ. ਸਕ੍ਕਾ ਪਨ, ਮਹਾਰਾਜ, ਲੋਣਂ ਤੁਲਾਯ ਤੁਲਯਿਤੁ’’ਨ੍ਤਿ? ‘‘ਆਮ, ਭਨ੍ਤੇ, ਸਕ੍ਕਾ’’ਤਿ. ‘‘ਨ ਸਕ੍ਕਾ, ਮਹਾਰਾਜ, ਲੋਣਂ ਤੁਲਾਯ ਤੁਲਯਿਤੁਂ, ਗਰੁਭਾਵੋ ਤੁਲਾਯ ਤੁਲਿਯਤੀ’’ਤਿ.
‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.
ਨਾਗਸੇਨਪਞ੍ਹੋ ਦੁਤਿਯੋ.
੩. ਪਞ੍ਚਾਯਤਨਕਮ੍ਮਨਿਬ੍ਬਤ੍ਤਪਞ੍ਹੋ
੩. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਯਾਨਿਮਾਨਿ ਪਞ੍ਚਾਯਤਨਾਨਿ, ਕਿਂ ਨੁ ਤਾਨਿ ਨਾਨਾਕਮ੍ਮੇਹਿ ਨਿਬ੍ਬਤ੍ਤਾਨਿ, ਉਦਾਹੁ ਏਕੇਨ ਕਮ੍ਮੇਨਾ’’ਤਿ? ‘‘ਨਾਨਾਕਮ੍ਮੇਹਿ, ਮਹਾਰਾਜ, ਨਿਬ੍ਬਤ੍ਤਾਨਿ, ਨ ਏਕੇਨ ਕਮ੍ਮੇਨਾ’’ਤਿ.
‘‘ਓਪਮ੍ਮਂ ਕਰੋਹੀ’’ਤਿ. ‘‘ਤਂ ਕਿਂ ਮਞ੍ਞਸਿ, ਮਹਾਰਾਜ, ਏਕਸ੍ਮਿਂ ਖੇਤ੍ਤੇ ਨਾਨਾਬੀਜਾਨਿ ਵਪ੍ਪੇਯ੍ਯੁਂ, ਤੇਸਂ ਨਾਨਾਬੀਜਾਨਂ ਨਾਨਾਫਲਾਨਿ ਨਿਬ੍ਬਤ੍ਤੇਯ੍ਯੁ’’ਨ੍ਤਿ? ‘‘ਆਮ, ਭਨ੍ਤੇ, ਨਿਬ੍ਬਤ੍ਤੇਯ੍ਯੁ’’ਨ੍ਤਿ. ‘‘ਏਵਮੇਵ ਖੋ, ਮਹਾਰਾਜ, ਯਾਨਿ ਯਾਨਿ ਪਞ੍ਚਾਯਤਨਾਨਿ, ਤਾਨਿ ਤਾਨਿ ਨਾਨਾਕਮ੍ਮੇਹਿ ਨਿਬ੍ਬਤ੍ਤਾਨਿ, ਨ ਏਕੇਨ ਕਮ੍ਮੇਨਾ’’ਤਿ.
‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.
ਪਞ੍ਚਾਯਤਨਕਮ੍ਮਨਿਬ੍ਬਤ੍ਤਪਞ੍ਹੋ ਤਤਿਯੋ.
੪. ਕਮ੍ਮਨਾਨਾਕਰਣਪਞ੍ਹੋ
੪. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਕੇਨ ਕਾਰਣੇਨ ਮਨੁਸ੍ਸਾ ਨ ਸਬ੍ਬੇ ਸਮਕਾ, ਅਞ੍ਞੇ ਅਪ੍ਪਾਯੁਕਾ, ਅਞ੍ਞੇ ਦੀਘਾਯੁਕਾ, ਅਞ੍ਞੇ ਬਹ੍ਵਾਬਾਧਾ ਅਞ੍ਞੇ ਅਪ੍ਪਾਬਾਧਾ, ਅਞ੍ਞੇ ਦੁਬ੍ਬਣ੍ਣਾ, ਅਞ੍ਞੇ ਵਣ੍ਣਵਨ੍ਤੋ, ਅਞ੍ਞੇ ਅਪ੍ਪੇਸਕ੍ਖਾ, ਅਞ੍ਞੇ ਮਹੇਸਕ੍ਖਾ, ਅਞ੍ਞੇ ਅਪ੍ਪਭੋਗਾ, ਅਞ੍ਞੇ ਮਹਾਭੋਗਾ, ਅਞ੍ਞੇ ਨੀਚਕੁਲੀਨਾ, ਅਞ੍ਞੇ ਮਹਾਕੁਲੀਨਾ, ਅਞ੍ਞੇ ਦੁਪ੍ਪਞ੍ਞਾ, ਅਞ੍ਞੇ ਪਞ੍ਞਵਨ੍ਤੋ’’ਤਿ?
ਥੇਰੋ ਆਹ ‘‘ਕਿਸ੍ਸ ਪਨ, ਮਹਾਰਾਜ, ਰੁਕ੍ਖਾ ਨ ਸਬ੍ਬੇ ਸਮਕਾ, ਅਞ੍ਞੇ ਅਮ੍ਬਿਲਾ, ਅਞ੍ਞੇ ਲਵਣਾ, ਅਞ੍ਞੇ ਤਿਤ੍ਤਕਾ, ਅਞ੍ਞੇ ਕਟੁਕਾ, ਅਞ੍ਞੇ ਕਸਾਵਾ, ਅਞ੍ਞੇ ਮਧੁਰਾ’’ਤਿ? ‘‘ਮਞ੍ਞਾਮਿ, ਭਨ੍ਤੇ, ਬੀਜਾਨਂ ਨਾਨਾਕਰਣੇਨਾ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਕਮ੍ਮਾਨਂ ਨਾਨਾਕਰਣੇਨ ਮਨੁਸ੍ਸਾ ਨ ਸਬ੍ਬੇ ਸਮਕਾ, ਅਞ੍ਞੇ ਅਪ੍ਪਾਯੁਕਾ, ਅਞ੍ਞੇ ਦੀਘਾਯੁਕਾ, ਅਞ੍ਞੇ ਬਹ੍ਵਾਬਾਧਾ, ਅਞ੍ਞੇ ਅਪ੍ਪਾਬਾਧਾ, ਅਞ੍ਞੇ ਦੁਬ੍ਬਣ੍ਣਾ, ਅਞ੍ਞੇ ਵਣ੍ਣਵਨ੍ਤੋ, ਅਞ੍ਞੇ ਅਪ੍ਪੇਸਕ੍ਖਾ, ਅਞ੍ਞੇ ਮਹੇਸਕ੍ਖਾ, ਅਞ੍ਞੇ ਅਪ੍ਪਭੋਗਾ, ਅਞ੍ਞੇ ਮਹਾਭੋਗਾ, ਅਞ੍ਞੇ ਨੀਚਕੁਲੀਨਾ, ਅਞ੍ਞੇ ਮਹਾਕੁਲੀਨਾ, ਅਞ੍ਞੇ ਦੁਪ੍ਪਞ੍ਞਾ, ਅਞ੍ਞੇ ਪਞ੍ਞਵਨ੍ਤੋ. ਭਾਸਿਤਮ੍ਪੇਤਂ ਮਹਾਰਾਜ ਭਗਵਤਾ – ‘ਕਮ੍ਮਸ੍ਸਕਾ, ਮਾਣਵ, ਸਤ੍ਤਾ ਕਮ੍ਮਦਾਯਾਦਾ ਕਮ੍ਮਯੋਨੀ ਕਮ੍ਮਬਨ੍ਧੂ ਕਮ੍ਮਪ੍ਪਟਿਸਰਣਾ, ਕਮ੍ਮਂ ਸਤ੍ਤੇ ਵਿਭਜਤਿ ਯਦਿਦਂ ਹੀਨਪ੍ਪਣੀਤਤਾਯਾ’’’ਤਿ.
‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.
ਕਮ੍ਮਨਾਨਾਕਰਣਪਞ੍ਹੋ ਚਤੁਤ੍ਥੋ.
੫. ਵਾਯਾਮਕਰਣਪਞ੍ਹੋ
੫. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਤੁਮ੍ਹੇ ਭਣਥ ‘ਕਿਨ੍ਤਿ ਇਮਂ ਦੁਕ੍ਖਂ ਨਿਰੁਜ੍ਝੇਯ੍ਯ, ਅਞ੍ਞਞ੍ਚ ਦੁਕ੍ਖਂ ਨੁਪ੍ਪਜ੍ਜੇਯ੍ਯਾ’ਤਿ. ਏਤਦਤ੍ਥਾ, ਮਹਾਰਾਜ, ਅਮ੍ਹਾਕਂ ਪਬ੍ਬਜ੍ਜਾ’’ਤਿ. ‘‘ਕਿਂ ਪਟਿਕਚ੍ਚੇਵ ਵਾਯਮਿਤੇਨ, ਨਨੁ ਸਮ੍ਪਤ੍ਤੇ ਕਾਲੇ ਵਾਯਮਿਤਬ੍ਬ’’ਨ੍ਤਿ? ਥੇਰੋ ਆਹ ‘‘ਸਮ੍ਪਤ੍ਤੇ ਕਾਲੇ, ਮਹਾਰਾਜ, ਵਾਯਾਮੋ ਅਕਿਚ੍ਚਕਰੋ ਭਵਤਿ, ਪਟਿਕਚ੍ਚੇਵ ਵਾਯਾਮੋ ਕਿਚ੍ਚਕਰੋ ਭਵਤੀ’’ਤਿ.
‘‘ਓਪਮ੍ਮਂ ਕਰੋਹੀ’’ਤਿ. ‘‘ਤਂ ਕਿਂ ਮਞ੍ਞਸਿ, ਮਹਾਰਾਜ, ਯਦਾ ਤ੍ਵਂ ਪਿਪਾਸਿਤੋ ਭਵੇਯ੍ਯਾਸਿ, ਤਦਾ ਤ੍ਵਂ ਉਦਪਾਨਂ ਖਣਾਪੇਯ੍ਯਾਸਿ, ਤਲ਼ਾਕਂ ਖਣਾਪੇਯ੍ਯਾਸਿ ‘ਪਾਨੀਯਂ ਪਿਵਿਸ੍ਸਾਮੀ’ਤਿ? ‘‘ਨ ਹਿ, ਭਨ੍ਤੇ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਸਮ੍ਪਤ੍ਤੇ ਕਾਲੇ ਵਾਯਾਮੋ ਅਕਿਚ੍ਚਕਰੋ ਭਵਤਿ, ਪਟਿਕਚ੍ਚੇਵ ਵਾਯਾਮੋ ਕਿਚ੍ਚਕਰੋ ਭਵਤੀ’’ਤਿ.
‘‘ਭਿਯ੍ਯੋ ਓਪਮ੍ਮਂ ਕਰੋਹੀ’’ਤਿ. ‘‘ਤਂ ਕਿਂ ਮਞ੍ਞਸਿ, ਮਹਾਰਾਜ, ਯਦਾ ਤ੍ਵਂ ਬੁਭੁਕ੍ਖਿਤੋ ਭਵੇਯ੍ਯਾਸਿ, ਤਦਾ ਤ੍ਵਂ ਖੇਤ੍ਤਂ ਕਸਾਪੇਯ੍ਯਾਸਿ, ਸਾਲਿਂ ਰੋਪਾਪੇਯ੍ਯਾਸਿ, ਧਞ੍ਞਂ ਅਤਿਹਰਾਪੇਯ੍ਯਾਸਿ ‘ਭਤ੍ਤਂ ਭੁਞ੍ਜਿਸ੍ਸਾਮੀ’ਤਿ? ‘‘ਨ ਹਿ, ਭਨ੍ਤੇ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਸਮ੍ਪਤ੍ਤੇ ਕਾਲੇ ਵਾਯਾਮੋ ਅਕਿਚ੍ਚਕਰੋ ਭਵਤਿ, ਪਟਿਕਚ੍ਚੇਵ ਵਾਯਾਮੋ ਕਿਚ੍ਚਕਰੋ ਭਵਤੀਤਿ.
‘‘ਭਿਯ੍ਯੋ ਓਪਮ੍ਮਂ ਕਰੋਹੀ’’ਤਿ. ‘‘ਤਂ ਕਿਂ ਮਞ੍ਞਸਿ, ਮਹਾਰਾਜ, ਯਦਾ ਤੇ ਸਙ੍ਗਾਮੋ ਪਚ੍ਚੁਪਟ੍ਠਿਤੋ ਭਵੇਯ੍ਯ, ਤਦਾ ਤ੍ਵਂ ਪਰਿਖਂ ਖਣਾਪੇਯ੍ਯਾਸਿ, ਪਾਕਾਰਂ ਕਾਰਾਪੇਯ੍ਯਾਸਿ, ਗੋਪੁਰਂ ਕਾਰਾਪੇਯ੍ਯਾਸਿ, ਅਟ੍ਟਾਲਕਂ ਕਾਰਾਪੇਯ੍ਯਾਸਿ, ਧਞ੍ਞਂ ਅਤਿਹਰਾਪੇਯ੍ਯਾਸਿ, ਤਦਾ ਤ੍ਵਂ ਹਤ੍ਥਿਸ੍ਮਿਂ ਸਿਕ੍ਖੇਯ੍ਯਾਸਿ, ਅਸ੍ਸਸ੍ਮਿਂ ਸਿਕ੍ਖੇਯ੍ਯਾਸਿ, ਰਥਸ੍ਮਿਂ ਸਿਕ੍ਖੇਯ੍ਯਾਸਿ, ਧਨੁਸ੍ਮਿਂ ਸਿਕ੍ਖੇਯ੍ਯਾਸਿ, ਥਰੁਸ੍ਮਿਂ ਸਿਕ੍ਖੇਯ੍ਯਾਸੀ’’ਤਿ? ‘‘ਨ ਹਿ, ਭਨ੍ਤੇ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਸਮ੍ਪਤ੍ਤੇ ਕਾਲੇ ਵਾਯਾਮੋ ਅਕਿਚ੍ਚਕਰੋ ਭਵਤਿ, ਪਟਿਕਚ੍ਚੇਵ ਵਾਯਾਮੋ ਕਿਚ੍ਚਕਰੋ ਭਵਤਿ. ਭਾਸਿਤਮ੍ਪੇਤਂ ਮਹਾਰਾਜ ਭਗਵਤਾ –
‘‘‘ਪਟਿਕਚ੍ਚੇਵ ਤਂ ਕਯਿਰਾ, ਯਂ ਜਞ੍ਞਾ ਹਿਤਮਤ੍ਤਨੋ;
ਨ ਸਾਕਟਿਕਚਿਨ੍ਤਾਯ, ਮਨ੍ਤਾ ਧੀਰੋ ਪਰਕ੍ਕਮੇ.
‘‘‘ਯਥਾ ਸਾਕਟਿਕੋ ਮਟ੍ਠਂ [ਨਾਮ (ਸੀ. ਪੀ. ਕ.) ਸਂ. ਨਿ. ੧.੧੦੩], ਸਮਂ ਹਿਤ੍ਵਾ ਮਹਾਪਥਂ;
ਵਿਸਮਂ ਮਗ੍ਗਮਾਰੁਯ੍ਹ, ਅਕ੍ਖਚ੍ਛਿਨ੍ਨੋਵ ਝਾਯਤਿ.
‘‘‘ਏਵਂ ਧਮ੍ਮਾ ਅਪਕ੍ਕਮ੍ਮ, ਅਧਮ੍ਮਮਨੁਵਤ੍ਤਿਯ;
ਮਨ੍ਦੋ ਮਚ੍ਚੁ ਮੁਖਂ ਪਤ੍ਤੋ, ਅਕ੍ਖਚ੍ਛਿਨ੍ਨੋਵ ਝਾਯਤੀ’’’ਤਿ [ਸੋਚਤੀਤਿ (ਸਬ੍ਬਤ੍ਥ)].
‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.
ਵਾਯਾਮਕਰਣਪਞ੍ਹੋ ਪਞ੍ਚਮੋ.
੬. ਨੇਰਯਿਕਗ੍ਗਿਉਣ੍ਹਭਾਵਪਞ੍ਹੋ
੬. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਤੁਮ੍ਹੇ ਭਣਥ ‘ਪਾਕਤਿਕਅਗ੍ਗਿਤੋ ਨੇਰਯਿਕੋ ਅਗ੍ਗਿ ਮਹਾਭਿਤਾਪਤਰੋ ਹੋਤਿ, ਖੁਦ੍ਦਕੋਪਿ ਪਾਸਾਣੋ ਪਾਕਤਿਕੇ ਅਗ੍ਗਿਮ੍ਹਿ ਪਕ੍ਖਿਤ੍ਤੋ ਦਿਵਸਮ੍ਪਿ ਪਚ੍ਚਮਾਨੋ [ਧਮਮਾਨੋ (ਸੀ. ਪੀ.)] ਨ ਵਿਲਯਂ ਗਚ੍ਛਤਿ, ਕੂਟਾਗਾਰਮਤ੍ਤੋਪਿ ਪਾਸਾਣੋ ਨੇਰਯਿਕਗ੍ਗਿਮ੍ਹਿ ਪਕ੍ਖਿਤ੍ਤੋ ਖਣੇਨ ਵਿਲਯਂ ਗਚ੍ਛਤੀ’ਤਿ, ਏਤਂ ਵਚਨਂ ਨ ਸਦ੍ਦਹਾਮਿ, ਏਵਞ੍ਚ ਪਨ ਵਦੇਥ ‘ਯੇ ਚ ਤਤ੍ਥ ਉਪ੍ਪਨ੍ਨਾ ਸਤ੍ਤਾ, ਤੇ ਅਨੇਕਾਨਿਪਿ ਵਸ੍ਸਸਹਸ੍ਸਾਨਿ ਨਿਰਯੇ ਪਚ੍ਚਮਾਨਾ ਨ ਵਿਲਯਂ ਗਚ੍ਛਨ੍ਤੀ’ਤਿ, ਤਮ੍ਪਿ ਵਚਨਂ ਨ ਸਦ੍ਦਹਾਮੀ’’ਤਿ.
ਥੇਰੋ ਆਹ ‘‘ਤਂ ਕਿਂ ਮਞ੍ਞਸਿ, ਮਹਾਰਾਜ, ਯਾ ਤਾ ਸਨ੍ਤਿ ਮਕਰਿਨਿਯੋਪਿ ਸੁਸੁਮਾਰਿਨਿਯੋਪਿ ਕਚ੍ਛਪਿਨਿਯੋਪਿ ਮੋਰਿਨਿਯੋਪਿ ਕਪੋਤਿਨਿਯੋਪਿ, ਕਿਂਨੁ ਤਾ ਕਕ੍ਖਲ਼ਾਨਿ ਪਾਸਾਣਾਨਿ ਸਕ੍ਖਰਾਯੋ ਚ ਖਾਦਨ੍ਤੀ’’ਤਿ? ‘‘ਆਮ, ਭਨ੍ਤੇ, ਖਾਦਨ੍ਤੀ’’ਤਿ. ‘‘ਕਿਂ ਪਨ ਤਾਨਿ ਤਾਸਂ ਕੁਚ੍ਛਿਯਂ ਕੋਟ੍ਠਬ੍ਭਨ੍ਤਰਗਤਾਨਿ ਵਿਲਯਂ ਗਚ੍ਛਨ੍ਤੀ’’ਤਿ? ‘‘ਆਮ, ਭਨ੍ਤੇ, ਵਿਲਯਂ ਗਚ੍ਛਨ੍ਤੀ’’ਤਿ. ‘‘ਯੋ ਪਨ ਤਾਸਂ ਕੁਚ੍ਛਿਯਂ ਗਬ੍ਭੋ, ਸੋਪਿ ਵਿਲਯਂ ਗਚ੍ਛਤੀ’’ਤਿ? ‘‘ਨ ਹਿ ਭਨ੍ਤੇ’’ਤਿ. ‘‘ਕੇਨ ਕਾਰਣੇਨਾ’’ਤਿ? ‘‘ਮਞ੍ਞਾਮਿ, ਭਨ੍ਤੇ, ਕਮ੍ਮਾਧਿਕਤੇਨ ਨ ਵਿਲਯਂ ਗਚ੍ਛਤੀ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਕਮ੍ਮਾਧਿਕਤੇਨ ਨੇਰਯਿਕਾ ਸਤ੍ਤਾ ਅਨੇਕਾਨਿਪਿ ਵਸ੍ਸਸਹਸ੍ਸਾਨਿ ਨਿਰਯੇ ਪਚ੍ਚਮਾਨਾ ਨ ਵਿਲਯਂ ਗਚ੍ਛਨ੍ਤਿ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ – ‘ਸੋ ਨ ਤਾਵ ਕਾਲਂ ਕਰੋਤਿ, ਯਾਵ ਨ ਤਂ ਪਾਪਕਮ੍ਮਂ ਬ੍ਯਨ੍ਤੀਹੋਤੀ’’’ਤਿ.
‘‘ਭਿਯ੍ਯੋ ਓਪਮ੍ਮਂ ਕਰੋਹੀ’’ਤਿ. ‘‘ਤਂ ਕਿਂ ਮਞ੍ਞਸਿ, ਮਹਾਰਾਜ, ਯਾ ਤਾ ਸਨ੍ਤਿ ਸੀਹਿਨਿਯੋਪਿ ਬ੍ਯਗ੍ਘਿਨਿਯੋਪਿ ਦੀਪਿਨਿਯੋਪਿ ਕੁਕ੍ਕੁਰਿਨਿਯੋਪਿ, ਕਿਂਨੁ ਤਾ ਕਕ੍ਖਲ਼ਾਨਿ ਅਟ੍ਠਿਕਾਨਿ ਮਂਸਾਨਿ ਖਾਦਨ੍ਤੀਤਿ? ‘‘ਆਮ, ਭਨ੍ਤੇ, ਖਾਦਨ੍ਤੀ’’ਤਿ. ‘‘ਕਿਂ ਪਨ ਤਾਨਿ ਤਾਸਂ ਕੁਚ੍ਛਿਯਂ ਕੋਟ੍ਠਬ੍ਭਨ੍ਤਰਗਤਾਨਿ ਵਿਲਯਂ ਗਚ੍ਛਨ੍ਤੀ’’ਤਿ? ‘‘ਆਮ, ਭਨ੍ਤੇ, ਵਿਲਯਂ ਗਚ੍ਛਨ੍ਤੀ’’ਤਿ. ‘‘ਯੋ ਪਨ ਤਾਸਂ ਕੁਚ੍ਛਿਯਂ ਗਬ੍ਭੋ, ਸੋਪਿ ਵਿਲਯਂ ਗਚ੍ਛਤੀ’’ਤਿ? ‘‘ਨ ਹਿ ਭਨ੍ਤੇ’’ਤਿ. ‘‘ਕੇਨ ਕਾਰਣੇਨਾ’’ਤਿ? ‘‘ਮਞ੍ਞਾਮਿ, ਭਨ੍ਤੇ, ਕਮ੍ਮਾਧਿਕਤੇਨ ਨ ਵਿਲਯਂ ਗਚ੍ਛਤੀ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਕਮ੍ਮਾਧਿਕਤੇਨ ਨੇਰਯਿਕਾ ਸਤ੍ਤਾ ਅਨੇਕਾਨਿਪਿ ਵਸ੍ਸਸਹਸ੍ਸਾਨਿ ਨਿਰਯੇ ਪਚ੍ਚਮਾਨਾ ਨ ਵਿਲਯਂ ਗਚ੍ਛਨ੍ਤੀ’’ਤਿ.
‘‘ਭਿਯ੍ਯੋ ਓਪਮ੍ਮਂ ਕਰੋਹੀ’’ਤਿ. ‘‘ਤਂ ਕਿਂ ਮਞ੍ਞਸਿ, ਮਹਾਰਾਜ, ਯਾ ਤਾ ਸਨ੍ਤਿ ਯੋਨਕਸੁਖੁਮਾਲਿਨਿਯੋਪਿ ਖਤ੍ਤਿਯਸੁਖੁਮਾਲਿਨਿਯੋਪਿ ਬ੍ਰਾਹ੍ਮਣਸੁਖੁਮਾਲਿਨਿਯੋਪਿ ਗਹਪਤਿਸੁਖੁਮਾਲਿਨਿਯੋਪਿ, ਕਿਂਨੁ ਤਾ ਕਕ੍ਖਲ਼ਾਨਿ ਖਜ੍ਜਕਾਨਿ ਮਂਸਾਨਿ ਖਾਦਨ੍ਤੀ’’ਤਿ? ‘‘ਆਮ, ਭਨ੍ਤੇ, ਖਾਦਨ੍ਤੀ’’ਤਿ. ‘‘ਕਿਂ ਪਨ ਤਾਨਿ ਤਾਸਂ ਕੁਚ੍ਛਿਯਂ ਕੋਟ੍ਠਬ੍ਭਨ੍ਤਰਗਤਾਨਿ ਵਿਲਯਂ ਗਚ੍ਛਨ੍ਤੀ’’ਤਿ? ‘‘ਆਮ, ਭਨ੍ਤੇ, ਵਿਲਯਂ ਗਚ੍ਛਨ੍ਤੀ’’ਤਿ. ‘‘ਯੋ ਪਨ ਤਾਸਂ ਕੁਚ੍ਛਿਯਂ ਗਬ੍ਭੋ ਸੋਪਿ ਵਿਲਯਂ ਗਚ੍ਛਤੀ’’ਤਿ? ‘‘ਨ ਹਿ ਭਨ੍ਤੇ’’ਤਿ. ‘‘ਕੇਨ ਕਾਰਣੇਨਾ’’ਤਿ. ‘‘ਮਞ੍ਞਾਮਿ, ਭਨ੍ਤੇ, ਕਮ੍ਮਾਧਿਕਤੇਨ ਨ ਵਿਲਯਂ ਗਚ੍ਛਤੀ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਕਮ੍ਮਾਧਿਕਤੇਨ ਨੇਰਯਿਕਾ ਸਤ੍ਤਾ ਅਨੇਕਾਨਿਪਿ ਵਸ੍ਸਸਹਸ੍ਸਾਨਿ ਨਿਰਯੇ ਪਚ੍ਚਮਾਨਾ ਨ ਵਿਲਯਂ ਗਚ੍ਛਨ੍ਤਿ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ – ‘‘ਸੋ ਨ ਤਾਵ ਕਾਲਂ ਕਰੋਤਿ, ਯਾਵ ਨ ਤਂ ਪਾਪਕਮ੍ਮਂ ਬ੍ਯਨ੍ਤੀਹੋਤੀ’’ਤਿ.
‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.
ਨੇਰਯਿਕਗ੍ਗਿਉਣ੍ਹਭਾਵਪਞ੍ਹੋ ਛਟ੍ਠੋ.
੭. ਪਥਵਿਸਨ੍ਧਾਰਕਪਞ੍ਹੋ
੭. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਤੁਮ੍ਹੇ ਭਣਥ ‘ਅਯਂ ਮਹਾ ਪਥਵੀ ਉਦਕੇ ਪਤਿਟ੍ਠਿਤਾ, ਉਦਕਂ ਵਾਤੇ ਪਤਿਟ੍ਠਿਤਂ, ਵਾਤੋ ਆਕਾਸੇ ਪਤਿਟ੍ਠਿਤੋ’ਤਿ, ਏਤਮ੍ਪਿ ਵਚਨਂ ਨ ਸਦ੍ਦਹਾਮੀ’’ਤਿ. ਥੇਰੋ ਧਮ੍ਮਕਰਕੇਨ [ਧਮ੍ਮਕਰਣੇਨ (ਕ.)] ਉਦਕਂ ਗਹੇਤ੍ਵਾ ਰਾਜਾਨਂ ਮਿਲਿਨ੍ਦਂ ਸਞ੍ਞਾਪੇਸਿ ‘‘ਯਥਾ, ਮਹਾਰਾਜ, ਇਮਂ ਉਦਕਂ ਵਾਤੇਨ ਆਧਾਰਿਤਂ, ਏਵਂ ਤਮ੍ਪਿ ਉਦਕਂ ਵਾਤੇਨ ਆਧਾਰਿਤ’’ਨ੍ਤਿ.
‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.
ਪਥਵਿਸਨ੍ਧਾਰਕਪਞ੍ਹੋ ਸਤ੍ਤਮੋ.
੮. ਨਿਰੋਧਨਿਬ੍ਬਾਨਪਞ੍ਹੋ
੮. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਨਿਰੋਧੋ ਨਿਬ੍ਬਾਨ’’ਨ੍ਤਿ? ‘‘ਆਮ, ਮਹਾਰਾਜ, ਨਿਰੋਧੋ ਨਿਬ੍ਬਾਨ’’ਨ੍ਤਿ. ‘‘ਕਥਂ, ਭਨ੍ਤੇ, ਨਾਗਸੇਨ, ਨਿਰੋਧੋ ਨਿਬ੍ਬਾਨ’’ਨ੍ਤਿ? ‘‘ਸਬ੍ਬੇ ਬਾਲਪੁਥੁਜ੍ਜਨਾ ਖੋ, ਮਹਾਰਾਜ, ਅਜ੍ਝਤ੍ਤਿਕਬਾਹਿਰੇ ਆਯਤਨੇ ਅਭਿਨਨ੍ਦਨ੍ਤਿ ਅਭਿਵਦਨ੍ਤਿ ਅਜ੍ਝੋਸਾਯ ਤਿਟ੍ਠਨ੍ਤਿ, ਤੇ ਤੇਨ ਸੋਤੇਨ ਵੁਯ੍ਹਨ੍ਤਿ, ਨ ਪਰਿਮੁਚ੍ਚਨ੍ਤਿ ਜਾਤਿਯਾ ਜਰਾਯ ਮਰਣੇਨ ਸੋਕੇਨ ਪਰਿਦੇਵੇਨ ਦੁਕ੍ਖੇਹਿ ਦੋਮਨਸ੍ਸੇਹਿ ਉਪਾਯਾਸੇਹਿ ਨ ਪਰਿਮੁਚ੍ਚਨ੍ਤਿ ਦੁਕ੍ਖਸ੍ਮਾਤਿ ਵਦਾਮਿ. ਸੁਤਵਾ ਚ ਖੋ, ਮਹਾਰਾਜ, ਅਰਿਯਸਾਵਕੋ ਅਜ੍ਝਤ੍ਤਿਕਬਾਹਿਰੇ ਆਯਤਨੇ ਨਾਭਿਨਨ੍ਦਤਿ ਨਾਭਿਵਦਤਿ ਨਾਜ੍ਝੋਸਾਯ ਤਿਟ੍ਠਤਿ, ਤਸ੍ਸ ਤਂ ਅਨਭਿਨਨ੍ਦਤੋ ਅਨਭਿਵਦਤੋ ਅਨਜ੍ਝੋਸਾਯ ਤਿਟ੍ਠਤੋ ਤਣ੍ਹਾ ਨਿਰੁਜ੍ਝਤਿ, ਤਣ੍ਹਾਨਿਰੋਧਾ ਉਪਾਦਾਨਨਿਰੋਧੋ, ਉਪਾਦਾਨਨਿਰੋਧਾ ਭਵਨਿਰੋਧੋ, ਭਵਨਿਰੋਧਾ ਜਾਤਿਨਿਰੋਧੋ, ਜਾਤਿਨਿਰੋਧਾ ਜਰਾਮਰਣਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ ਨਿਰੁਜ੍ਝਨ੍ਤਿ, ਏਵਮੇਤਸ੍ਸ ਕੇਵਲਸ੍ਸ ਦੁਕ੍ਖਕ੍ਖਨ੍ਧਸ੍ਸ ਨਿਰੋਧੋ ਹੋਤਿ, ਏਵਂ ਖੋ, ਮਹਾਰਾਜ, ਨਿਰੋਧੋ ਨਿਬ੍ਬਾਨ’’ਨ੍ਤਿ.
‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.
ਨਿਰੋਧਨਿਬ੍ਬਾਨਪਞ੍ਹੋ ਅਟ੍ਠਮੋ.
੯. ਨਿਬ੍ਬਾਨਲਭਨਪਞ੍ਹੋ
੯. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਸਬ੍ਬੇਵ ਲਭਨ੍ਤਿ ਨਿਬ੍ਬਾਨ’’ਨ੍ਤਿ? ‘‘ਨ ਖੋ, ਮਹਾਰਾਜ, ਸਬ੍ਬੇਵ ਲਭਨ੍ਤਿ ਨਿਬ੍ਬਾਨਂ, ਅਪਿ ਚ ਖੋ, ਮਹਾਰਾਜ, ਯੋ ਸਮ੍ਮਾ ਪਟਿਪਨ੍ਨੋ ਅਭਿਞ੍ਞੇਯ੍ਯੇ ਧਮ੍ਮੇ ਅਭਿਜਾਨਾਤਿ, ਪਰਿਞ੍ਞੇਯ੍ਯੇ ਧਮ੍ਮੇ ਪਰਿਜਾਨਾਤਿ, ਪਹਾਤਬ੍ਬੇ ਧਮ੍ਮੇ ਪਜਹਤਿ, ਭਾਵੇਤਬ੍ਬੇ ਧਮ੍ਮੇ ਭਾਵੇਤਿ, ਸਚ੍ਛਿਕਾਤਬ੍ਬੇ ਧਮ੍ਮੇ ਸਚ੍ਛਿਕਰੋਤਿ, ਸੋ ਲਭਤਿ ਨਿਬ੍ਬਾਨ’’ਨ੍ਤਿ.
‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.
ਨਿਬ੍ਬਾਨਲਭਨਪਞ੍ਹੋ ਨਵਮੋ.
੧੦. ਨਿਬ੍ਬਾਨਸੁਖਜਾਨਨਪਞ੍ਹੋ
੧੦. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਯੋ ਨ ਲਭਤਿ ਨਿਬ੍ਬਾਨਂ, ਜਾਨਾਤਿ ਸੋ ‘ਸੁਖਂ ਨਿਬ੍ਬਾਨ’’’ਨ੍ਤਿ? ‘‘ਆਮ, ਮਹਾਰਾਜ, ਯੋ ਨ ਲਭਤਿ ਨਿਬ੍ਬਾਨਂ, ਜਾਨਾਤਿ ਸੋ ‘ਸੁਖਂ ਨਿਬ੍ਬਾਨ’’’ਨ੍ਤਿ. ‘‘ਕਥਂ, ਭਨ੍ਤੇ ਨਾਗਸੇਨ, ਅਲਭਨ੍ਤੋ ਜਾਨਾਤਿ ‘ਸੁਖਂ ਨਿਬ੍ਬਾਨ’’’ਨ੍ਤਿ? ‘‘ਤਂ ਕਿਂ ਮਞ੍ਞਸਿ, ਮਹਾਰਾਜ, ਯੇਸਂ ਨਚ੍ਛਿਨ੍ਨਾ ਹਤ੍ਥਪਾਦਾ, ਜਾਨੇਯ੍ਯੁਂ ਤੇ, ਮਹਾਰਾਜ, ‘ਦੁਕ੍ਖਂ ਹਤ੍ਥਪਾਦਚ੍ਛੇਦਨ’’’ਨ੍ਤਿ? ‘‘ਆਮ, ਭਨ੍ਤੇ, ਜਾਨੇਯ੍ਯੁ’’ਨ੍ਤਿ. ‘‘ਕਥਂ ਜਾਨੇਯ੍ਯੁ’’ਨ੍ਤਿ? ‘‘ਅਞ੍ਞੇਸਂ, ਭਨ੍ਤੇ, ਛਿਨ੍ਨਹਤ੍ਥਪਾਦਾਨਂ ਪਰਿਦੇਵਿਤਸਦ੍ਦਂ ਸੁਤ੍ਵਾ ਜਾਨਨ੍ਤਿ ‘ਦੁਕ੍ਖਂ ਹਤ੍ਥਪਾਦਚ੍ਛੇਦਨ’’’ਨ੍ਤਿ. ‘‘ਏਵਮੇਵ ਖੋ, ਮਹਾਰਾਜ, ਯੇਸਂ ਦਿਟ੍ਠਂ ਨਿਬ੍ਬਾਨਂ, ਤੇਸਂ ਸਦ੍ਦਂ ਸੁਤ੍ਵਾ ਜਾਨਾਤਿ ‘ਸੁਖਂ ਨਿਬ੍ਬਾਨ’’’ਨ੍ਤਿ.
‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.
ਨਿਬ੍ਬਾਨਸੁਖਜਾਨਨਪਞ੍ਹੋ ਦਸਮੋ.
ਨਿਬ੍ਬਾਨਵਗ੍ਗੋ ਚਤੁਤ੍ਥੋ.
ਇਮਸ੍ਮਿਂ ਵਗ੍ਗੇ ਦਸ ਪਞ੍ਹਾ.