੨. ਪੁਰਿਮਕੋਟਿਪਞ੍ਹੋ

੨. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਯਂ ਪਨੇਤਂ ਬ੍ਰੂਸਿ ‘ਪੁਰਿਮਾ ਕੋਟਿ ਨ ਪਞ੍ਞਾਯਤੀ’ਤਿ, ਤਸ੍ਸ ਓਪਮ੍ਮਂ ਕਰੋਹੀ’’ਤਿ. ‘‘ਯਥਾ, ਮਹਾਰਾਜ, ਪੁਰਿਸੋ ਪਰਿਤ੍ਤਂ [ਪਰਿਪਕ੍ਕਂ (ਕ.)] ਬੀਜਂ ਪਥਵਿਯਂ ਨਿਕ੍ਖਿਪੇਯ੍ਯ, ਤਤੋ ਅਙ੍ਕੁਰੋ ਉਟ੍ਠਹਿਤ੍ਵਾ ਅਨੁਪੁਬ੍ਬੇਨ ਵੁਡ੍ਢਿਂ ਵਿਰੂਲ਼੍ਹਿਂ ਵੇਪੁਲ੍ਲਂ ਆਪਜ੍ਜਿਤ੍ਵਾ ਫਲਂ ਦਦੇਯ੍ਯ. ਤਤੋ ਬੀਜਂ ਗਹੇਤ੍ਵਾ ਪੁਨ ਰੋਪੇਯ੍ਯ, ਤਤੋਪਿ ਅਙ੍ਕੁਰੋ ਉਟ੍ਠਹਿਤ੍ਵਾ ਅਨੁਪੁਬ੍ਬੇਨ ਵੁਡ੍ਢਿਂ ਵਿਰੂਲ਼੍ਹਿਂ ਵੇਪੁਲ੍ਲਂ ਆਪਜ੍ਜਿਤ੍ਵਾ ਫਲਂ ਦਦੇਯ੍ਯ. ਏਵਮੇਤਿਸ੍ਸਾ ਸਨ੍ਤਤਿਯਾ ਅਤ੍ਥਿ ਅਨ੍ਤੋ’’ਤਿ? ‘‘ਨਤ੍ਥਿ ਭਨ੍ਤੇ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਅਦ੍ਧਾਨਸ੍ਸਾਪਿ ਪੁਰਿਮਾ ਕੋਟਿ ਨ ਪਞ੍ਞਾਯਤੀ’’ਤਿ.

‘‘ਭਿਯ੍ਯੋ ਓਪਮ੍ਮਂ ਕਰੋਹੀ’’ਤਿ. ‘‘ਯਥਾ, ਮਹਾਰਾਜ, ਕੁਕ੍ਕੁਟਿਯਾ ਅਣ੍ਡਂ ਭਵੇਯ੍ਯ, ਅਣ੍ਡਤੋ ਕੁਕ੍ਕੁਟੀ ਕੁਕ੍ਕੁਟਿਯਾ ਅਣ੍ਡਨ੍ਤਿ. ਏਵਮੇਤਿਸ੍ਸਾ ਸਨ੍ਤਤਿਯਾ ਅਤ੍ਥਿ ਅਨ੍ਤੋ’’ਤਿ? ‘‘ਨਤ੍ਥਿ ਭਨ੍ਤੇ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਅਦ੍ਧਾਨਸ੍ਸਾਪਿ ਪੁਰਿਮਾ ਕੋਟਿ ਨ ਪਞ੍ਞਾਯਤੀ’’ਤਿ.

‘‘ਭਿਯ੍ਯੋ ਓਪਮ੍ਮਂ ਕਰੋਹੀ’’ਤਿ. ਥੇਰੋ ਪਥਵਿਯਾ ਚਕ੍ਕਂ ਲਿਖਿਤ੍ਵਾ ਮਿਲਿਨ੍ਦਂ ਰਾਜਾਨਂ ਏਤਦਵੋਚ ‘‘ਅਤ੍ਥਿ, ਮਹਾਰਾਜ, ਇਮਸ੍ਸ ਚਕ੍ਕਸ੍ਸ ਅਨ੍ਤੋ’’ਤਿ? ‘‘ਨਤ੍ਥਿ ਭਨ੍ਤੇ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਇਮਾਨਿ ਚਕ੍ਕਾਨਿ ਵੁਤ੍ਤਾਨਿ ਭਗਵਤਾ ‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣਂ, ਤਿਣ੍ਣਂ ਸਙ੍ਗਤਿ ਫਸ੍ਸੋ, ਫਸ੍ਸਪਚ੍ਚਯਾ ਵੇਦਨਾ, ਵੇਦਨਾਪਚ੍ਚਯਾ ਤਣ੍ਹਾ, ਤਣ੍ਹਾਪਚ੍ਚਯਾ ਉਪਾਦਾਨਂ, ਉਪਾਦਾਨਪਚ੍ਚਯਾ ਕਮ੍ਮਂ, ਕਮ੍ਮਤੋ ਪੁਨ ਚਕ੍ਖੁਂ ਜਾਯਤੀ’ਤਿ. ਏਵਮੇਤਿਸ੍ਸਾ ਸਨ੍ਤਤਿਯਾ ਅਤ੍ਥਿ ਅਨ੍ਤੋ’’ਤਿ? ‘‘ਨਤ੍ਥਿ ਭਨ੍ਤੇ’’ਤਿ.

‘‘‘ਸੋਤਞ੍ਚ ਪਟਿਚ੍ਚ ਸਦ੍ਦੇ ਚ…ਪੇ… ਮਨਞ੍ਚ ਪਟਿਚ੍ਚ ਧਮ੍ਮੇ ਚ ਉਪ੍ਪਜ੍ਜਤਿ ਮਨੋਵਿਞ੍ਞਾਣਂ, ਤਿਣ੍ਣਂ ਸਙ੍ਗਤਿ ਫਸ੍ਸੋ, ਫਸ੍ਸਪਚ੍ਚਯਾ ਵੇਦਨਾ, ਵੇਦਨਾਪਚ੍ਚਯਾ ਤਣ੍ਹਾ, ਤਣ੍ਹਾਪਚ੍ਚਯਾ ਉਪਾਦਾਨਂ, ਉਪਾਦਾਨਪਚ੍ਚਯਾ ਕਮ੍ਮਂ, ਕਮ੍ਮਤੋ ਪੁਨ ਮਨੋ ਜਾਯਤੀ’ਤਿ. ਏਵਮੇਤਿਸ੍ਸਾ ਸਨ੍ਤਤਿਯਾ ਅਤ੍ਥਿ ਅਨ੍ਤੋ’’ਤਿ? ‘‘ਨਤ੍ਥਿ ਭਨ੍ਤੇ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਅਦ੍ਧਾਨਸ੍ਸਾਪਿ ਪੁਰਿਮਾ ਕੋਟਿ ਨ ਪਞ੍ਞਾਯਤੀ’’ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਪੁਰਿਮਕੋਟਿਪਞ੍ਹੋ ਦੁਤਿਯੋ.