੪੩੩. ਲੋਮਸਕਸ੍ਸਪਜਾਤਕਂ (੭)

੬੦. ਅਸ੍ਸ ਇਨ੍ਦਸਮੋ ਰਾਜ, ਅਚ੍ਚਨ੍ਤਂ ਅਜਰਾਮਰੋ;

ਸਚੇ ਤ੍ਵਂ ਯਞ੍ਞਂ ਯਾਜੇਯ੍ਯ, ਇਸਿਂ ਲੋਮਸਕਸ੍ਸਪਂ.

੬੧. ਸਸਮੁਦ੍ਦਪਰਿਯਾਯਂ, ਮਹਿਂ ਸਾਗਰਕੁਣ੍ਡਲਂ;

ਨ ਇਚ੍ਛੇ ਸਹ ਨਿਨ੍ਦਾਯ, ਏਵਂ ਸੇਯ੍ਯ [ਸਯ੍ਹ (ਸੀ. ਸ੍ਯਾ. ਪੀ.)] ਵਿਜਾਨਹਿ.

੬੨. ਧਿਰਤ੍ਥੁ ਤਂ ਯਸਲਾਭਂ, ਧਨਲਾਭਞ੍ਚ ਬ੍ਰਾਹ੍ਮਣ;

ਯਾ ਵੁਤ੍ਤਿ ਵਿਨਿਪਾਤੇਨ, ਅਧਮ੍ਮਚਰਣੇਨ ਵਾ.

੬੩. ਅਪਿ ਚੇ ਪਤ੍ਤਮਾਦਾਯ, ਅਨਗਾਰੋ ਪਰਿਬ੍ਬਜੇ;

ਸਾਯੇਵ ਜੀਵਿਕਾ ਸੇਯ੍ਯੋ, ਯਾ ਚਾਧਮ੍ਮੇਨ ਏਸਨਾ.

੬੪. ਅਪਿ ਚੇ ਪਤ੍ਤਮਾਦਾਯ, ਅਨਗਾਰੋ ਪਰਿਬ੍ਬਜੇ;

ਅਞ੍ਞਂ ਅਹਿਂਸਯਂ ਲੋਕੇ, ਅਪਿ ਰਜ੍ਜੇਨ ਤਂ ਵਰਂ.

੬੫. ਬਲਂ ਚਨ੍ਦੋ ਬਲਂ ਸੁਰਿਯੋ, ਬਲਂ ਸਮਣਬ੍ਰਾਹ੍ਮਣਾ;

ਬਲਂ ਵੇਲਾ ਸਮੁਦ੍ਦਸ੍ਸ, ਬਲਾਤਿਬਲਮਿਤ੍ਥਿਯੋ.

੬੬. ਯਥਾ ਉਗ੍ਗਤਪਂ ਸਨ੍ਤਂ, ਇਸਿਂ ਲੋਮਸਕਸ੍ਸਪਂ;

ਪਿਤੁ ਅਤ੍ਥਾ ਚਨ੍ਦਵਤੀ, ਵਾਜਪੇਯ੍ਯਂ [ਵਾਚਪੇਯ੍ਯਂ (ਪੀ. ਕ.)] ਅਯਾਜਯਿ.

੬੭. ਤਂ ਲੋਭਪਕਤਂ ਕਮ੍ਮਂ, ਕਟੁਕਂ ਕਾਮਹੇਤੁਕਂ;

ਤਸ੍ਸ ਮੂਲਂ ਗਵੇਸਿਸ੍ਸਂ, ਛੇਚ੍ਛਂ ਰਾਗਂ ਸਬਨ੍ਧਨਂ.

੬੮. ਧਿਰਤ੍ਥੁ ਕਾਮੇ ਸੁਬਹੂਪਿ ਲੋਕੇ, ਤਪੋਵ ਸੇਯ੍ਯੋ ਕਾਮਗੁਣੇਹਿ ਰਾਜ;

ਤਪੋ ਕਰਿਸ੍ਸਾਮਿ ਪਹਾਯ ਕਾਮੇ, ਤਵੇਵ ਰਟ੍ਠਂ ਚਨ੍ਦਵਤੀ ਚ ਹੋਤੂਤਿ.

ਲੋਮਸਕਸ੍ਸਪਜਾਤਕਂ ਸਤ੍ਤਮਂ.