੯. ਨਵਕਨਿਪਾਤੋ
੪੨੭. ਗਿਜ੍ਝਜਾਤਕਂ (੧)
੧. ਪਰਿਸਙ੍ਕੁਪਥੋ ਨਾਮ, ਗਿਜ੍ਝਪਨ੍ਥੋ ਸਨਨ੍ਤਨੋ;
ਤਤ੍ਰਾਸਿ ਮਾਤਾਪਿਤਰੋ, ਗਿਜ੍ਝੋ ਪੋਸੇਸਿ ਜਿਣ੍ਣਕੇ;
ਤੇਸਂ ਅਜਗਰਮੇਦਂ, ਅਚ੍ਚਹਾਸਿ ਬਹੁਤ੍ਤਸੋ [ਪਹੁਤ੍ਤਤੋ (ਕ. ਸੀ.), ਪਹੂਤਸੋ (ਸ੍ਯਾ. ਪੀ.), ਬਹੁਧਸੋ (ਕ.)].
੨. ਪਿਤਾ ਚ ਪੁਤ੍ਤਂ ਅਵਚ, ਜਾਨਂ ਉਚ੍ਚਂ ਪਪਾਤਿਨਂ;
ਸੁਪਤ੍ਤਂ ਥਾਮਸਮ੍ਪਨ੍ਨਂ [ਪਕ੍ਖਸਮ੍ਪਨ੍ਨਂ (ਸੀ. ਸ੍ਯਾ. ਪੀ.)], ਤੇਜਸ੍ਸਿਂ ਦੂਰਗਾਮਿਨਂ.
੩. ਪਰਿਪ੍ਲਵਨ੍ਤਂ ਪਥਵਿਂ, ਯਦਾ ਤਾਤ ਵਿਜਾਨਹਿ;
ਸਾਗਰੇਨ ਪਰਿਕ੍ਖਿਤ੍ਤਂ, ਚਕ੍ਕਂਵ ਪਰਿਮਣ੍ਡਲਂ;
ਤਤੋ ਤਾਤ ਨਿਵਤ੍ਤਸ੍ਸੁ, ਮਾਸ੍ਸੁ ਏਤ੍ਤੋ ਪਰਂ ਗਮਿ.
੪. ਉਦਪਤ੍ਤੋਸਿ [ਉਦ੍ਧਂ ਪਤ੍ਤੋਸਿ (ਕ. ਸੀ.)] ਵੇਗੇਨ, ਬਲੀ ਪਕ੍ਖੀ ਦਿਜੁਤ੍ਤਮੋ;
ਓਲੋਕਯਨ੍ਤੋ ਵਕ੍ਕਙ੍ਗੋ, ਪਬ੍ਬਤਾਨਿ ਵਨਾਨਿ ਚ.
੫. ਅਦ੍ਦਸ੍ਸ ਪਥਵਿਂ ਗਿਜ੍ਝੋ, ਯਥਾਸਾਸਿ [ਯਥਾਸ੍ਸਾਸਿ (ਸ੍ਯਾ. ਅਟ੍ਠ. ਪਾਠਨ੍ਤਰਂ)] ਪਿਤੁਸ੍ਸੁਤਂ;
ਸਾਗਰੇਨ ਪਰਿਕ੍ਖਿਤ੍ਤਂ, ਚਕ੍ਕਂਵ ਪਰਿਮਣ੍ਡਲਂ.
੬. ਤਞ੍ਚ ਸੋ ਸਮਤਿਕ੍ਕਮ੍ਮ, ਪਰਮੇਵਚ੍ਚਵਤ੍ਤਥ [ਪਰਮੇਵ ਪਵਤ੍ਤਥ (ਸੀ. ਸ੍ਯਾ.)];
ਤਞ੍ਚ ਵਾਤਸਿਖਾ ਤਿਕ੍ਖਾ, ਅਚ੍ਚਹਾਸਿ ਬਲਿਂ ਦਿਜਂ.
੭. ਨਾਸਕ੍ਖਾਤਿਗਤੋ ਪੋਸੋ, ਪੁਨਦੇਵ ਨਿਵਤ੍ਤਿਤੁਂ;
ਦਿਜੋ ਬ੍ਯਸਨਮਾਪਾਦਿ, ਵੇਰਮ੍ਭਾਨਂ [ਵੇਰਮ੍ਬਾਨਂ (ਸੀ. ਪੀ.)] ਵਸਂ ਗਤੋ.
੮. ਤਸ੍ਸ ਪੁਤ੍ਤਾ ਚ ਦਾਰਾ ਚ, ਯੇ ਚਞ੍ਞੇ ਅਨੁਜੀਵਿਨੋ;
ਸਬ੍ਬੇ ਬ੍ਯਸਨਮਾਪਾਦੁਂ, ਅਨੋਵਾਦਕਰੇ ਦਿਜੇ.
੯. ਏਵਮ੍ਪਿ ਇਧ ਵੁਡ੍ਢਾਨਂ, ਯੋ ਵਾਕ੍ਯਂ ਨਾਵਬੁਜ੍ਝਤਿ;
ਅਤਿਸੀਮਚਰੋ ਦਿਤ੍ਤੋ, ਗਿਜ੍ਝੋਵਾਤੀਤਸਾਸਨੋ;
ਸ ਵੇ ਬ੍ਯਸਨਂ ਪਪ੍ਪੋਤਿ, ਅਕਤ੍ਵਾ ਵੁਡ੍ਢਸਾਸਨਨ੍ਤਿ.
ਗਿਜ੍ਝਜਾਤਕਂ ਪਠਮਂ.
੪੨੮. ਕੋਸਮ੍ਬਿਯਜਾਤਕਂ (੨)
੧੦. ਪੁਥੁਸਦ੍ਦੋ ਸਮਜਨੋ, ਨ ਬਾਲੋ ਕੋਚਿ ਮਞ੍ਞਥ;
ਸਙ੍ਘਸ੍ਮਿਂ ਭਿਜ੍ਜਮਾਨਸ੍ਮਿਂ, ਨਾਞ੍ਞਂ ਭਿਯ੍ਯੋ ਅਮਞ੍ਞਰੁਂ.
੧੧. ਪਰਿਮੁਟ੍ਠਾ ਪਣ੍ਡਿਤਾਭਾਸਾ, ਵਾਚਾਗੋਚਰਭਾਣਿਨੋ;
ਯਾਵਿਚ੍ਛਨ੍ਤਿ ਮੁਖਾਯਾਮਂ, ਯੇਨ ਨੀਤਾ ਨ ਤਂ ਵਿਦੂ.
੧੨. ਅਕ੍ਕੋਚ੍ਛਿ ਮਂ ਅਵਧਿ ਮਂ, ਅਜਿਨਿ ਮਂ ਅਹਾਸਿ ਮੇ;
ਯੇ ਚ ਤਂ ਉਪਨਯ੍ਹਨ੍ਤਿ, ਵੇਰਂ ਤੇਸਂ ਨ ਸਮ੍ਮਤਿ.
੧੩. ਅਕ੍ਕੋਚ੍ਛਿ ਮਂ ਅਵਧਿ ਮਂ, ਅਜਿਨਿ ਮਂ ਅਹਾਸਿ ਮੇ;
ਯੇ ਚ ਤਂ ਨੁਪਨਯ੍ਹਨ੍ਤਿ, ਵੇਰਂ ਤੇਸੂਪਸਮ੍ਮਤਿ.
੧੪. ਨ ਹਿ ਵੇਰੇਨ ਵੇਰਾਨਿ, ਸਮ੍ਮਨ੍ਤੀਧ ਕੁਦਾਚਨਂ;
ਅਵੇਰੇਨ ਚ ਸਮ੍ਮਨ੍ਤਿ, ਏਸ ਧਮ੍ਮੋ ਸਨਨ੍ਤਨੋ.
੧੫. ਪਰੇ ਚ ਨ ਵਿਜਾਨਨ੍ਤਿ, ਮਯਮੇਤ੍ਥ ਯਮਾਮਸੇ;
ਯੇ ਚ ਤਤ੍ਥ ਵਿਜਾਨਨ੍ਤਿ, ਤਤੋ ਸਮ੍ਮਨ੍ਤਿ ਮੇਧਗਾ.
੧੬. ਅਟ੍ਠਿਚ੍ਛਿਨ੍ਨਾ ਪਾਣਹਰਾ, ਗਵਸ੍ਸ [ਗਵਾਸ੍ਸ (ਸੀ. ਸ੍ਯਾ. ਪੀ.)] ਧਨਹਾਰਿਨੋ;
ਰਟ੍ਠਂ ਵਿਲੁਮ੍ਪਮਾਨਾਨਂ, ਤੇਸਮ੍ਪਿ ਹੋਤਿ ਸਙ੍ਗਤਿ;
ਕਸ੍ਮਾ ਤੁਮ੍ਹਾਕ ਨੋ ਸਿਯਾ.
੧੭. ਸਚੇ ਲਭੇਥ ਨਿਪਕਂ ਸਹਾਯਂ, ਸਦ੍ਧਿਂਚਰਂ ਸਾਧੁਵਿਹਾਰਿਧੀਰਂ;
ਅਭਿਭੁਯ੍ਯ ਸਬ੍ਬਾਨਿ ਪਰਿਸ੍ਸਯਾਨਿ, ਚਰੇਯ੍ਯ ਤੇਨਤ੍ਤਮਨੋ ਸਤੀਮਾ.
੧੮. ਨੋ ਚੇ ਲਭੇਥ ਨਿਪਕਂ ਸਹਾਯਂ, ਸਦ੍ਧਿਂਚਰਂ ਸਾਧੁਵਿਹਾਰਿਧੀਰਂ;
ਰਾਜਾਵ ਰਟ੍ਠਂ ਵਿਜਿਤਂ ਪਹਾਯ, ਏਕੋ ਚਰੇ ਮਾਤਙ੍ਗਰਞ੍ਞੇਵ ਨਾਗੋ.
੧੯. ਏਕਸ੍ਸ ਚਰਿਤਂ ਸੇਯ੍ਯੋ, ਨਤ੍ਥਿ ਬਾਲੇ ਸਹਾਯਤਾ;
ਏਕੋ ਚਰੇ ਨ ਪਾਪਾਨਿ ਕਯਿਰਾ, ਅਪ੍ਪੋਸ੍ਸੁਕ੍ਕੋ ਮਾਤਙ੍ਗਰਞ੍ਞੇਵ ਨਾਗੋਤਿ.
ਕੋਸਮ੍ਬਿਯਜਾਤਕਂ ਦੁਤਿਯਂ.
੪੨੯. ਮਹਾਸੁਵਜਾਤਕਂ (੩)
੨੦. ਦੁਮੋ ਯਦਾ ਹੋਤਿ ਫਲੂਪਪਨ੍ਨੋ, ਭੁਞ੍ਜਨ੍ਤਿ ਨਂ ਵਿਹਙ੍ਗਮਾ [ਵਿਹਗਾ (ਸੀ. ਪੀ.)] ਸਮ੍ਪਤਨ੍ਤਾ;
ਖੀਣਨ੍ਤਿ ਞਤ੍ਵਾਨ ਦੁਮਂ ਫਲਚ੍ਚਯੇ [ਞਤ੍ਵਾ ਦੁਮਪ੍ਫਲਚ੍ਚਯੇਨ (ਕ.)], ਦਿਸੋਦਿਸਂ ਯਨ੍ਤਿ ਤਤੋ ਵਿਹਙ੍ਗਮਾ.
੨੧. ਚਰ ਚਾਰਿਕਂ ਲੋਹਿਤਤੁਣ੍ਡ ਮਾਮਰਿ, ਕਿਂ ਤ੍ਵਂ ਸੁਵ ਸੁਕ੍ਖਦੁਮਮ੍ਹਿ ਝਾਯਸਿ;
ਤਦਿਙ੍ਘ ਮਂ ਬ੍ਰੂਹਿ ਵਸਨ੍ਤਸਨ੍ਨਿਭ, ਕਸ੍ਮਾ ਸੁਵ ਸੁਕ੍ਖਦੁਮਂ ਨ ਰਿਞ੍ਚਸਿ.
੨੨. ਯੇ ਵੇ ਸਖੀਨਂ ਸਖਾਰੋ ਭਵਨ੍ਤਿ, ਪਾਣਚ੍ਚਯੇ [ਪਾਣਂ ਚਜੇ (ਕ.), ਪਾਣਚ੍ਚਯੇ ਮਰਣਕਾਲੇ ਚ ਸੁਖਦੁਕ੍ਖੇਸੁ ਚ ਨ ਜਹਨ੍ਤੀਤਿ ਸਮ੍ਬਨ੍ਧੋ] ਦੁਕ੍ਖਸੁਖੇਸੁ ਹਂਸ;
ਖੀਣਂ ਅਖੀਣਨ੍ਤਿ ਨ ਤਂ ਜਹਨ੍ਤਿ, ਸਨ੍ਤੋ ਸਤਂ ਧਮ੍ਮਮਨੁਸ੍ਸਰਨ੍ਤਾ.
੨੩. ਸੋਹਂ ਸਤਂ ਅਞ੍ਞਤਰੋਸ੍ਮਿ ਹਂਸ, ਞਾਤੀ ਚ ਮੇ ਹੋਤਿ ਸਖਾ ਚ ਰੁਕ੍ਖੋ;
ਤਂ ਨੁਸ੍ਸਹੇ ਜੀਵਿਕਤ੍ਥੋ ਪਹਾਤੁਂ, ਖੀਣਨ੍ਤਿ ਞਤ੍ਵਾਨ ਨ ਹੇਸ ਧਮ੍ਮੋ [ਨ ਸੋਸ (ਕ.), ਨ ਏਸ (ਸ੍ਯਾ.)].
੨੪. ਸਾਧੁ ਸਕ੍ਖਿ ਕਤਂ ਹੋਤਿ, ਮੇਤ੍ਤਿ ਸਂਸਤਿ ਸਨ੍ਥਵੋ [ਮਿਤ੍ਤਂ ਸਙ੍ਗਤਿ ਸਨ੍ਧਵੋ (ਕ.)];
ਸਚੇਤਂ ਧਮ੍ਮਂ ਰੋਚੇਸਿ, ਪਾਸਂਸੋਸਿ ਵਿਜਾਨਤਂ.
੨੫. ਸੋ ਤੇ ਸੁਵ ਵਰਂ ਦਮ੍ਮਿ, ਪਤ੍ਤਯਾਨ ਵਿਹਙ੍ਗਮ;
ਵਰਂ ਵਰਸ੍ਸੁ ਵਕ੍ਕਙ੍ਗ, ਯਂ ਕਿਞ੍ਚਿ ਮਨਸਿਚ੍ਛਸਿ.
੨੬. ਵਰਞ੍ਚ ਮੇ ਹਂਸ ਭਵਂ ਦਦੇਯ੍ਯ, ਅਯਞ੍ਚ ਰੁਕ੍ਖੋ ਪੁਨਰਾਯੁਂ ਲਭੇਥ;
ਸੋ ਸਾਖਵਾ ਫਲਿਮਾ ਸਂਵਿਰੂਲ਼੍ਹੋ, ਮਧੁਤ੍ਥਿਕੋ ਤਿਟ੍ਠਤੁ ਸੋਭਮਾਨੋ.
੨੭. ਤਂ ਪਸ੍ਸ ਸਮ੍ਮ ਫਲਿਮਂ ਉਲ਼ਾਰਂ, ਸਹਾਵ ਤੇ ਹੋਤੁ ਉਦੁਮ੍ਬਰੇਨ;
ਸੋ ਸਾਖਵਾ ਫਲਿਮਾ ਸਂਵਿਰੂਲ਼੍ਹੋ, ਮਧੁਤ੍ਥਿਕੋ ਤਿਟ੍ਠਤੁ ਸੋਭਮਾਨੋ.
੨੮. ਏਵਂ ਸਕ੍ਕ ਸੁਖੀ ਹੋਹਿ, ਸਹ ਸਬ੍ਬੇਹਿ ਞਾਤਿਭਿ;
ਯਥਾਹਮਜ੍ਜ ਸੁਖਿਤੋ, ਦਿਸ੍ਵਾਨ ਸਫਲਂ ਦੁਮਂ.
੨੯. ਸੁਵਸ੍ਸ ਚ ਵਰਂ ਦਤ੍ਵਾ, ਕਤ੍ਵਾਨ ਸਫਲਂ ਦੁਮਂ;
ਪਕ੍ਕਾਮਿ ਸਹ ਭਰਿਯਾਯ, ਦੇਵਾਨਂ ਨਨ੍ਦਨਂ ਵਨਨ੍ਤਿ.
ਮਹਾਸੁਵਜਾਤਕਂ ਤਤਿਯਂ.
੪੩੦. ਚੂਲ਼ਸੁਵਜਾਤਕਂ (੪)
੩੦. ਸਨ੍ਤਿ ਰੁਕ੍ਖਾ ਹਰਿਪਤ੍ਤਾ [ਹਰਿਤਪਤ੍ਤਾ (ਸੀ. ਸ੍ਯਾ. ਪੀ.)], ਦੁਮਾ ਨੇਕਫਲਾ ਬਹੂ;
ਕਸ੍ਮਾ ਨੁ ਸੁਕ੍ਖੇ [ਸੁਕ੍ਖ (ਕ.)] ਕੋਲ਼ਾਪੇ, ਸੁਵਸ੍ਸ ਨਿਰਤੋ ਮਨੋ.
੩੧. ਫਲਸ੍ਸ ਉਪਭੁਞ੍ਜਿਮ੍ਹਾ, ਨੇਕਵਸ੍ਸਗਣੇ ਬਹੂ;
ਅਫਲਮ੍ਪਿ ਵਿਦਿਤ੍ਵਾਨ, ਸਾਵ ਮੇਤ੍ਤਿ ਯਥਾ ਪੁਰੇ.
੩੨. ਸੁਖਞ੍ਚ ਰੁਕ੍ਖਂ ਕੋਲ਼ਾਪਂ, ਓਪਤ੍ਤਮਫਲਂ ਦੁਮਂ;
ਓਹਾਯ ਸਕੁਣਾ ਯਨ੍ਤਿ, ਕਿਂ ਦੋਸਂ ਪਸ੍ਸਸੇ ਦਿਜ.
੩੩. ਯੇ ਫਲਤ੍ਥਾ ਸਮ੍ਭਜਨ੍ਤਿ, ਅਫਲੋਤਿ ਜਹਨ੍ਤਿ ਨਂ;
ਅਤ੍ਤਤ੍ਥਪਞ੍ਞਾ ਦੁਮ੍ਮੇਧਾ, ਤੇ ਹੋਨ੍ਤਿ ਪਕ੍ਖਪਾਤਿਨੋ.
੩੪. ਸਾਧੁ ਸਕ੍ਖਿ ਕਤਂ ਹੋਤਿ, ਮੇਤ੍ਤਿ ਸਂਸਤਿ ਸਨ੍ਥਵੋ;
ਸਚੇਤਂ ਧਮ੍ਮਂ ਰੋਚੇਸਿ, ਪਾਸਂਸੋਸਿ ਵਿਜਾਨਤਂ.
੩੫. ਸੋ ਤੇ ਸੁਵ ਵਰਂ ਦਮ੍ਮਿ, ਪਤ੍ਤਯਾਨ ਵਿਹਙ੍ਗਮ;
ਵਰਂ ਵਰਸ੍ਸੁ ਵਕ੍ਕਙ੍ਗ, ਯਂ ਕਿਞ੍ਚਿ ਮਨਸਿਚ੍ਛਸਿ.
੩੬. ਅਪਿ ਨਾਮ ਨਂ ਪਸ੍ਸੇਯ੍ਯਂ [ਅਪਿ ਨਾਮ ਨਂ ਪੁਨ ਪਸ੍ਸੇ (ਸੀ. ਸ੍ਯਾ.)], ਸਪਤ੍ਤਂ ਸਫਲਂ ਦੁਮਂ;
ਦਲਿਦ੍ਦੋਵ ਨਿਧਿ ਲਦ੍ਧਾ, ਨਨ੍ਦੇਯ੍ਯਾਹਂ ਪੁਨਪ੍ਪੁਨਂ.
੩੭. ਤਤੋ ਅਮਤਮਾਦਾਯ, ਅਭਿਸਿਞ੍ਚਿ ਮਹੀਰੁਹਂ;
ਤਸ੍ਸ ਸਾਖਾ ਵਿਰੂਹਿਂਸੁ [ਵਿਰੂਲ਼੍ਹਸ੍ਸ (ਕ.)], ਸੀਤਚ੍ਛਾਯਾ ਮਨੋਰਮਾ.
੩੮. ਏਵਂ ਸਕ੍ਕ ਸੁਖੀ ਹੋਹਿ, ਸਹ ਸਬ੍ਬੇਹਿ ਞਾਤਿਭਿ;
ਯਥਾਹਮਜ੍ਜ ਸੁਖਿਤੋ, ਦਿਸ੍ਵਾਨ ਸਫਲਂ ਦੁਮਂ.
੩੯. ਸੁਵਸ੍ਸ ਚ ਵਰਂ ਦਤ੍ਵਾ, ਕਤ੍ਵਾਨ ਸਫਲਂ ਦੁਮਂ;
ਪਕ੍ਕਾਮਿ ਸਹ ਭਰਿਯਾਯ, ਦੇਵਾਨਂ ਨਨ੍ਦਨਂ ਵਨਨ੍ਤਿ.
ਚੂਲ਼ਸੁਵਜਾਤਕਂ ਚਤੁਤ੍ਥਂ.
੪੩੧. ਹਰਿਤਚਜਾਤਕਂ (੫)
੪੦. ਸੁਤਂ ਮੇਤਂ ਮਹਾਬ੍ਰਹ੍ਮੇ, ਕਾਮੇ ਭੁਞ੍ਜਤਿ ਹਾਰਿਤੋ;
ਕਚ੍ਚੇਤਂ ਵਚਨਂ ਤੁਚ੍ਛਂ, ਕਚ੍ਚਿ ਸੁਦ੍ਧੋ ਇਰਿਯ੍ਯਸਿ.
੪੧. ਏਵਮੇਤਂ ਮਹਾਰਾਜ, ਯਥਾ ਤੇ ਵਚਨਂ ਸੁਤਂ;
ਕੁਮ੍ਮਗ੍ਗਂ ਪਟਿਪਨ੍ਨੋਸ੍ਮਿ, ਮੋਹਨੇਯ੍ਯੇਸੁ ਮੁਚ੍ਛਿਤੋ.
੪੨. ਅਦੁ [ਆਦੁ (ਸੀ. ਪੀ.)] ਪਞ੍ਞਾ ਕਿਮਤ੍ਥਿਯਾ, ਨਿਪੁਣਾ ਸਾਧੁਚਿਨ੍ਤਿਨੀ [ਚਿਨ੍ਤਨੀ (ਸੀ. ਪੀ.)];
ਯਾਯ ਉਪ੍ਪਤਿਤਂ ਰਾਗਂ, ਕਿਂ ਮਨੋ ਨ ਵਿਨੋਦਯੇ.
੪੩. ਚਤ੍ਤਾਰੋਮੇ ਮਹਾਰਾਜ, ਲੋਕੇ ਅਤਿਬਲਾ ਭੁਸਾ;
ਰਾਗੋ ਦੋਸੋ ਮਦੋ ਮੋਹੋ, ਯਤ੍ਥ ਪਞ੍ਞਾ ਨ ਗਾਧਤਿ.
੪੪. ਅਰਹਾ ਸੀਲਸਮ੍ਪਨ੍ਨੋ, ਸੁਦ੍ਧੋ ਚਰਤਿ ਹਾਰਿਤੋ;
ਮੇਧਾਵੀ ਪਣ੍ਡਿਤੋ ਚੇਵ, ਇਤਿ ਨੋ ਸਮ੍ਮਤੋ ਭਵਂ.
੪੫. ਮੇਧਾਵੀਨਮ੍ਪਿ ਹਿਂਸਨ੍ਤਿ, ਇਸਿਂ ਧਮ੍ਮਗੁਣੇ ਰਤਂ;
ਵਿਤਕ੍ਕਾ ਪਾਪਕਾ ਰਾਜ, ਸੁਭਾ ਰਾਗੂਪਸਂਹਿਤਾ.
੪੬. ਉਪ੍ਪਨ੍ਨਾਯਂ ਸਰੀਰਜੋ, ਰਾਗੋ ਵਣ੍ਣਵਿਦੂਸਨੋ ਤਵ;
ਤਂ ਪਜਹ ਭਦ੍ਦਮਤ੍ਥੁ ਤੇ, ਬਹੁਨ੍ਨਾਸਿ ਮੇਧਾਵਿਸਮ੍ਮਤੋ.
੪੭. ਤੇ ਅਨ੍ਧਕਾਰਕੇ [ਕਰਣੇ (ਸੀ. ਸ੍ਯਾ. ਪੀ.)] ਕਾਮੇ, ਬਹੁਦੁਕ੍ਖੇ ਮਹਾਵਿਸੇ;
ਤੇਸਂ ਮੂਲਂ ਗਵੇਸਿਸ੍ਸਂ, ਛੇਚ੍ਛਂ ਰਾਗਂ ਸਬਨ੍ਧਨਂ.
੪੮. ਇਦਂ ਵਤ੍ਵਾਨ ਹਾਰਿਤੋ, ਇਸਿ ਸਚ੍ਚਪਰਕ੍ਕਮੋ;
ਕਾਮਰਾਗਂ ਵਿਰਾਜੇਤ੍ਵਾ, ਬ੍ਰਹ੍ਮਲੋਕੂਪਗੋ ਅਹੂਤਿ.
ਹਰਿਤਚਜਾਤਕਂ [ਹਾਰਿਤਜਾਤਕਂ (ਸੀ. ਪੀ.)] ਪਞ੍ਚਮਂ.
੪੩੨. ਪਦਕੁਸਲਮਾਣਵਜਾਤਕਂ (੬)
੪੯. ਬਹੁਸ੍ਸੁਤਂ ਚਿਤ੍ਤਕਥਿਂ [ਚਿਤ੍ਤਕਥਂ (ਸ੍ਯਾ. ਕ.)], ਗਙ੍ਗਾ ਵਹਤਿ ਪਾਟਲਿਂ [ਪਾਟਲਂ (ਸੀ. ਪੀ.)];
ਵੁਯ੍ਹਮਾਨਕ ਭਦ੍ਦਨ੍ਤੇ, ਏਕਂ ਮੇ ਦੇਹਿ ਗਾਥਕਂ [ਗੀਤਕਂ (ਕ. ਅਟ੍ਠ.)].
੫੦. ਯੇਨ ਸਿਞ੍ਚਨ੍ਤਿ ਦੁਕ੍ਖਿਤਂ, ਯੇਨ ਸਿਞ੍ਚਨ੍ਤਿ ਆਤੁਰਂ;
ਤਸ੍ਸ ਮਜ੍ਝੇ ਮਰਿਸ੍ਸਾਮਿ, ਜਾਤਂ ਸਰਣਤੋ ਭਯਂ.
੫੧. ਯਤ੍ਥ ਬੀਜਾਨਿ ਰੂਹਨ੍ਤਿ, ਸਤ੍ਤਾ ਯਤ੍ਥ ਪਤਿਟ੍ਠਿਤਾ;
ਸਾ ਮੇ ਸੀਸਂ ਨਿਪੀਲ਼ੇਤਿ, ਜਾਤਂ ਸਰਣਤੋ ਭਯਂ.
੫੨. ਯੇਨ ਭਤ੍ਤਾਨਿ ਪਚ੍ਚਨ੍ਤਿ, ਸੀਤਂ ਯੇਨ ਵਿਹਞ੍ਞਤਿ;
ਸੋ ਮਂ ਡਹਤਿ [ਦਯ੍ਹਤਿ (ਕ.)] ਗਤ੍ਤਾਨਿ, ਜਾਤਂ ਸਰਣਤੋ ਭਯਂ.
੫੩. ਯੇਨ ਭੁਤ੍ਤੇਨ [ਭਤ੍ਤੇਨ (ਸ੍ਯਾ. ਕ.)] ਯਾਪੇਨ੍ਤਿ, ਪੁਥੂ ਬ੍ਰਾਹ੍ਮਣਖਤ੍ਤਿਯਾ;
ਸੋ ਮਂ ਭੁਤ੍ਤੋ ਬ੍ਯਾਪਾਦੇਤਿ, ਜਾਤਂ ਸਰਣਤੋ ਭਯਂ.
੫੪. ਗਿਮ੍ਹਾਨਂ ਪਚ੍ਛਿਮੇ ਮਾਸੇ, ਵਾਤਮਿਚ੍ਛਨ੍ਤਿ ਪਣ੍ਡਿਤਾ;
ਸੋ ਮਂ [ਸੋ ਮੇ (ਸੀ. ਪੀ.)] ਭਞ੍ਜਤਿ ਗਤ੍ਤਾਨਿ, ਜਾਤਂ ਸਰਣਤੋ ਭਯਂ.
੫੫. ਯਂ ਨਿਸ੍ਸਿਤਾ ਜਗਤਿਰੁਹਂ, ਸ੍ਵਾਯਂ ਅਗ੍ਗਿਂ ਪਮੁਞ੍ਚਤਿ;
ਦਿਸਾ ਭਜਥ ਵਕ੍ਕਙ੍ਗਾ, ਜਾਤਂ ਸਰਣਤੋ ਭਯਂ.
੫੬. ਯਮਾਨਯਿਂ ਸੋਮਨਸ੍ਸਂ, ਮਾਲਿਨਿਂ ਚਨ੍ਦਨੁਸ੍ਸਦਂ;
ਸਾ ਮਂ ਘਰਾ ਨਿਚ੍ਛੁਭਤਿ [ਨੀਹਰਤਿ (ਸੀ. ਸ੍ਯਾ.)], ਜਾਤਂ ਸਰਣਤੋ ਭਯਂ.
੫੭. ਯੇਨ ਜਾਤੇਨ ਨਨ੍ਦਿਸ੍ਸਂ, ਯਸ੍ਸ ਚ ਭਵਮਿਚ੍ਛਿਸਂ;
ਸੋ ਮਂ ਘਰਾ ਨਿਚ੍ਛੁਭਤਿ [ਨੀਹਰਤਿ (ਸੀ. ਸ੍ਯਾ.)], ਜਾਤਂ ਸਰਣਤੋ ਭਯਂ.
੫੮. ਸੁਣਨ੍ਤੁ ਮੇ ਜਾਨਪਦਾ, ਨੇਗਮਾ ਚ ਸਮਾਗਤਾ;
ਯਤੋਦਕਂ ਤਦਾਦਿਤ੍ਤਂ, ਯਤੋ ਖੇਮਂ ਤਤੋ ਭਯਂ.
੫੯. ਰਾਜਾ ਵਿਲੁਮ੍ਪਤੇ ਰਟ੍ਠਂ, ਬ੍ਰਾਹ੍ਮਣੋ ਚ ਪੁਰੋਹਿਤੋ;
ਅਤ੍ਤਗੁਤ੍ਤਾ ਵਿਹਰਥ, ਜਾਤਂ ਸਰਣਤੋ ਭਯਨ੍ਤਿ.
ਪਦਕੁਸਲਮਾਣਵਜਾਤਕਂ ਛਟ੍ਠਂ.
੪੩੩. ਲੋਮਸਕਸ੍ਸਪਜਾਤਕਂ (੭)
੬੦. ਅਸ੍ਸ ਇਨ੍ਦਸਮੋ ਰਾਜ, ਅਚ੍ਚਨ੍ਤਂ ਅਜਰਾਮਰੋ;
ਸਚੇ ਤ੍ਵਂ ਯਞ੍ਞਂ ਯਾਜੇਯ੍ਯ, ਇਸਿਂ ਲੋਮਸਕਸ੍ਸਪਂ.
੬੧. ਸਸਮੁਦ੍ਦਪਰਿਯਾਯਂ, ਮਹਿਂ ਸਾਗਰਕੁਣ੍ਡਲਂ;
ਨ ਇਚ੍ਛੇ ਸਹ ਨਿਨ੍ਦਾਯ, ਏਵਂ ਸੇਯ੍ਯ [ਸਯ੍ਹ (ਸੀ. ਸ੍ਯਾ. ਪੀ.)] ਵਿਜਾਨਹਿ.
੬੨. ਧਿਰਤ੍ਥੁ ਤਂ ਯਸਲਾਭਂ, ਧਨਲਾਭਞ੍ਚ ਬ੍ਰਾਹ੍ਮਣ;
ਯਾ ਵੁਤ੍ਤਿ ਵਿਨਿਪਾਤੇਨ, ਅਧਮ੍ਮਚਰਣੇਨ ਵਾ.
੬੩. ਅਪਿ ਚੇ ਪਤ੍ਤਮਾਦਾਯ, ਅਨਗਾਰੋ ਪਰਿਬ੍ਬਜੇ;
ਸਾਯੇਵ ਜੀਵਿਕਾ ਸੇਯ੍ਯੋ, ਯਾ ਚਾਧਮ੍ਮੇਨ ਏਸਨਾ.
੬੪. ਅਪਿ ਚੇ ਪਤ੍ਤਮਾਦਾਯ, ਅਨਗਾਰੋ ਪਰਿਬ੍ਬਜੇ;
ਅਞ੍ਞਂ ਅਹਿਂਸਯਂ ਲੋਕੇ, ਅਪਿ ਰਜ੍ਜੇਨ ਤਂ ਵਰਂ.
੬੫. ਬਲਂ ਚਨ੍ਦੋ ਬਲਂ ਸੁਰਿਯੋ, ਬਲਂ ਸਮਣਬ੍ਰਾਹ੍ਮਣਾ;
ਬਲਂ ਵੇਲਾ ਸਮੁਦ੍ਦਸ੍ਸ, ਬਲਾਤਿਬਲਮਿਤ੍ਥਿਯੋ.
੬੬. ਯਥਾ ਉਗ੍ਗਤਪਂ ਸਨ੍ਤਂ, ਇਸਿਂ ਲੋਮਸਕਸ੍ਸਪਂ;
ਪਿਤੁ ਅਤ੍ਥਾ ਚਨ੍ਦਵਤੀ, ਵਾਜਪੇਯ੍ਯਂ [ਵਾਚਪੇਯ੍ਯਂ (ਪੀ. ਕ.)] ਅਯਾਜਯਿ.