੪੩੪. ਚਕ੍ਕਵਾਕਜਾਤਕਂ (੮)

੬੯. ਕਾਸਾਯਵਤ੍ਥੇ ਸਕੁਣੇ ਵਦਾਮਿ, ਦੁਵੇ ਦੁਵੇ ਨਨ੍ਦਮਨੇ [ਨਨ੍ਦਿਮਨੇ (ਸੀ. ਪੀ.)] ਚਰਨ੍ਤੇ;

ਕਂ ਅਣ੍ਡਜਂ ਅਣ੍ਡਜਾ ਮਾਨੁਸੇਸੁ, ਜਾਤਿਂ ਪਸਂਸਨ੍ਤਿ ਤਦਿਙ੍ਘ ਬ੍ਰੂਥ.

੭੦. ਅਮ੍ਹੇ ਮਨੁਸ੍ਸੇਸੁ ਮਨੁਸ੍ਸਹਿਂਸ, ਅਨੁਬ੍ਬਤੇ [ਅਨੁਪੁਬ੍ਬਕੇ (ਕ.)] ਚਕ੍ਕਵਾਕੇ ਵਦਨ੍ਤਿ;

ਕਲ੍ਯਾਣਭਾਵਮ੍ਹੇ [ਭਾਵ’ਮ੍ਹ (ਸੀ. ਪੀ.)] ਦਿਜੇਸੁ ਸਮ੍ਮਤਾ, ਅਭਿਰੂਪਾ [ਅਭੀਤਰੂਪਾ (ਸੀ. ਸ੍ਯਾ. ਪੀ.)] ਵਿਚਰਾਮ ਅਣ੍ਣਵੇ. ( ) [(ਨ ਘਾਸਹੇਤੂਪਿ ਕਰੋਮ ਪਾਪਂ) (ਕ.)]

੭੧. ਕਿਂ ਅਣ੍ਣਵੇ ਕਾਨਿ ਫਲਾਨਿ ਭੁਞ੍ਜੇ, ਮਂਸਂ ਕੁਤੋ ਖਾਦਥ ਚਕ੍ਕਵਾਕਾ;

ਕਿਂ ਭੋਜਨਂ ਭੁਞ੍ਜਥ ਵੋ ਅਨੋਮਾ [ਅਭਿਣ੍ਹਂ (ਕ.)], ਬਲਞ੍ਚ ਵਣ੍ਣੋ ਚ ਅਨਪ੍ਪਰੂਪਾ [ਅਨਪ੍ਪਰੂਪੋ (ਸੀ. ਸ੍ਯਾ. ਪੀ.)].

੭੨. ਨ ਅਣ੍ਣਵੇ ਸਨ੍ਤਿ ਫਲਾਨਿ ਧਙ੍ਕ, ਮਂਸਂ ਕੁਤੋ ਖਾਦਿਤੁਂ ਚਕ੍ਕਵਾਕੇ;

ਸੇਵਾਲਭਕ੍ਖਮ੍ਹ [ਭਕ੍ਖਿਮ੍ਹ (ਕ.)] ਅਪਾਣਭੋਜਨਾ [ਅਵਾਕਭੋਜਨਾ (ਸੀ. ਪੀ.)], ਨ ਘਾਸਹੇਤੂਪਿ ਕਰੋਮ ਪਾਪਂ.

੭੩. ਨ ਮੇ ਇਦਂ ਰੁਚ੍ਚਤਿ ਚਕ੍ਕਵਾਕ, ਅਸ੍ਮਿਂ ਭਵੇ ਭੋਜਨਸਨ੍ਨਿਕਾਸੋ;

ਅਹੋਸਿ ਪੁਬ੍ਬੇ ਤਤੋ ਮੇ ਅਞ੍ਞਥਾ, ਇਚ੍ਚੇਵ ਮੇ ਵਿਮਤਿ ਏਤ੍ਥ ਜਾਤਾ.

੭੪. ਅਹਮ੍ਪਿ ਮਂਸਾਨਿ ਫਲਾਨਿ ਭੁਞ੍ਜੇ, ਅਨ੍ਨਾਨਿ ਚ ਲੋਣਿਯਤੇਲਿਯਾਨਿ;

ਰਸਂ ਮਨੁਸ੍ਸੇਸੁ ਲਭਾਮਿ ਭੋਤ੍ਤੁਂ, ਸੂਰੋਵ ਸਙ੍ਗਾਮਮੁਖਂ ਵਿਜੇਤ੍ਵਾ;

ਨ ਚ ਮੇ ਤਾਦਿਸੋ ਵਣ੍ਣੋ, ਚਕ੍ਕਵਾਕ ਯਥਾ ਤਵ.

੭੫. ਅਸੁਦ੍ਧਭਕ੍ਖੋਸਿ ਖਣਾਨੁਪਾਤੀ, ਕਿਚ੍ਛੇਨ ਤੇ ਲਬ੍ਭਤਿ ਅਨ੍ਨਪਾਨਂ;

ਨ ਤੁਸ੍ਸਸੀ ਰੁਕ੍ਖਫਲੇਹਿ ਧਙ੍ਕ, ਮਂਸਾਨਿ ਵਾ ਯਾਨਿ ਸੁਸਾਨਮਜ੍ਝੇ.

੭੬. ਯੋ ਸਾਹਸੇਨ ਅਧਿਗਮ੍ਮ ਭੋਗੇ, ਪਰਿਭੁਞ੍ਜਤਿ ਧਙ੍ਕ ਖਣਾਨੁਪਾਤੀ;

ਤਤੋ ਉਪਕ੍ਕੋਸਤਿ ਨਂ ਸਭਾਵੋ, ਉਪਕ੍ਕੁਟ੍ਠੋ ਵਣ੍ਣਬਲਂ ਜਹਾਤਿ.

੭੭. ਅਪ੍ਪਮ੍ਪਿ ਚੇ ਨਿਬ੍ਬੁਤਿਂ ਭੁਞ੍ਜਤੀ ਯਦਿ, ਅਸਾਹਸੇਨ ਅਪਰੂਪਘਾਤੀ [ਅਸਾਹਸੇਨਾਨੁਪਘਾਤਿਨੋ (ਕ.)];

ਬਲਞ੍ਚ ਵਣ੍ਣੋ ਚ ਤਦਸ੍ਸ ਹੋਤਿ, ਨ ਹਿ ਸਬ੍ਬੋ ਆਹਾਰਮਯੇਨ ਵਣ੍ਣੋਤਿ.

ਚਕ੍ਕਵਾਕਜਾਤਕਂ ਅਟ੍ਠਮਂ.