੪੧੮. ਅਟ੍ਠਸਦ੍ਦਜਾਤਕਂ (੨)

੧੦. ਇਦਂ ਪੁਰੇ ਨਿਨ੍ਨਮਾਹੁ, ਬਹੁਮਚ੍ਛਂ ਮਹੋਦਕਂ;

ਆਵਾਸੋ ਬਕਰਾਜਸ੍ਸ, ਪੇਤ੍ਤਿਕਂ ਭਵਨਂ ਮਮ;

ਤ੍ਯਜ੍ਜ ਭੇਕੇਨ [ਭਿਙ੍ਗੇਨ (ਕ.)] ਯਾਪੇਮ, ਓਕਂ ਨ ਵਜਹਾਮਸੇ [ਓਕਨ੍ਤਂ ਨ ਜਹਾਮਸੇ (ਕ.)].

੧੧. ਕੋ ਦੁਤਿਯਂ ਅਸੀਲਿਸ੍ਸ, ਬਨ੍ਧਰਸ੍ਸਕ੍ਖਿ ਭੇਚ੍ਛਤਿ [ਭੇਜ੍ਜਤਿ (ਸੀ. ਸ੍ਯਾ. ਪੀ.), ਭਿਨ੍ਦਤਿ (ਕ.)];

ਕੋ ਮੇ ਪੁਤ੍ਤੇ ਕੁਲਾਵਕਂ, ਮਞ੍ਚ ਸੋਤ੍ਥਿਂ ਕਰਿਸ੍ਸਤਿ.

੧੨. ਸਬ੍ਬਾ ਪਰਿਕ੍ਖਯਾ ਫੇਗ੍ਗੁ, ਯਾਵ ਤਸ੍ਸਾ ਗਤੀ ਅਹੁ;

ਖੀਣਭਕ੍ਖੋ ਮਹਾਰਾਜ, ਸਾਰੇ ਨ ਰਮਤੀ ਘੁਣੋ.

੧੩. ਸਾ ਨੂਨਾਹਂ ਇਤੋ ਗਨ੍ਤ੍ਵਾ, ਰਞ੍ਞੋ ਮੁਤ੍ਤਾ ਨਿਵੇਸਨਾ;

ਅਤ੍ਤਾਨਂ ਰਮਯਿਸ੍ਸਾਮਿ, ਦੁਮਸਾਖਨਿਕੇਤਿਨੀ.

੧੪. ਸੋ ਨੂਨਾਹਂ ਇਤੋ ਗਨ੍ਤ੍ਵਾ, ਰਞ੍ਞੋ ਮੁਤ੍ਤੋ ਨਿਵੇਸਨਾ;

ਅਗ੍ਗੋਦਕਾਨਿ ਪਿਸ੍ਸਾਮਿ, ਯੂਥਸ੍ਸ ਪੁਰਤੋ ਵਜਂ.

੧੫. ਤਂ ਮਂ ਕਾਮੇਹਿ ਸਮ੍ਮਤ੍ਤਂ, ਰਤ੍ਤਂ ਕਾਮੇਸੁ ਮੁਚ੍ਛਿਤਂ;

ਆਨਯੀ ਭਰਤੋ [ਵਨਤੋ (ਕ.)] ਲੁਦ੍ਦੋ, ਬਾਹਿਕੋ ਭਦ੍ਦਮਤ੍ਥੁ ਤੇ.

੧੬. ਅਨ੍ਧਕਾਰਤਿਮਿਸਾਯਂ, ਤੁਙ੍ਗੇ ਉਪਰਿਪਬ੍ਬਤੇ;

ਸਾ ਮਂ ਸਣ੍ਹੇਨ ਮੁਦੁਨਾ, ਮਾ ਪਾਦਂ ਖਲਿ [ਖਣਿ (ਸੀ. ਸ੍ਯਾ. ਪੀ.)] ਯਸ੍ਮਨਿ.

੧੭. ਅਸਂਸਯਂ ਜਾਤਿਖਯਨ੍ਤਦਸ੍ਸੀ, ਨ ਗਬ੍ਭਸੇਯ੍ਯਂ ਪੁਨਰਾਵਜਿਸ੍ਸਂ;

ਅਯਮਨ੍ਤਿਮਾ ਪਚ੍ਛਿਮਾ ਗਬ੍ਭਸੇਯ੍ਯਾ [ਅਯਂ ਹਿ ਮੇ ਅਨ੍ਤਿਮਾ ਗਬ੍ਭਸੇਯ੍ਯਾ (ਸੀ. ਪੀ.)], ਖੀਣੋ ਮੇ ਸਂਸਾਰੋ ਪੁਨਬ੍ਭਵਾਯਾਤਿ.

ਅਟ੍ਠਸਦ੍ਦਜਾਤਕਂ ਦੁਤਿਯਂ.