੪੧੯. ਸੁਲਸਾਜਾਤਕਂ (੩)

੧੮. ਇਦਂ ਸੁਵਣ੍ਣਕਾਯੂਰਂ, ਮੁਤ੍ਤਾ ਵੇਲ਼ੁਰਿਯਾ ਬਹੂ;

ਸਬ੍ਬਂ ਹਰਸ੍ਸੁ ਭਦ੍ਦਨ੍ਤੇ, ਮਞ੍ਚ ਦਾਸੀਤਿ ਸਾਵਯ.

੧੯. ਓਰੋਪਯਸ੍ਸੁ ਕਲ੍ਯਾਣਿ, ਮਾ ਬਾਲ਼੍ਹਂ [ਬਹੁਂ (ਸੀ. ਸ੍ਯਾ. ਪੀ.)] ਪਰਿਦੇਵਸਿ;

ਨ ਚਾਹਂ ਅਭਿਜਾਨਾਮਿ, ਅਹਨ੍ਤ੍ਵਾ ਧਨਮਾਭਤਂ.

੨੦. ਯਤੋ ਸਰਾਮਿ ਅਤ੍ਤਾਨਂ, ਯਤੋ ਪਤ੍ਤਾਸ੍ਮਿ ਵਿਞ੍ਞੁਤਂ;

ਨ ਚਾਹਂ ਅਭਿਜਾਨਾਮਿ, ਅਞ੍ਞਂ ਪਿਯਤਰਂ ਤਯਾ.

੨੧. ਏਹਿ ਤਂ ਉਪਗੂਹਿਸ੍ਸਂ [ਉਪਗੁਯ੍ਹਿਸ੍ਸਂ (ਕ.)], ਕਰਿਸ੍ਸਞ੍ਚ ਪਦਕ੍ਖਿਣਂ;

ਨ ਹਿ ਦਾਨਿ ਪੁਨ ਅਤ੍ਥਿ, ਮਮ ਤੁਯ੍ਹਞ੍ਚ ਸਙ੍ਗਮੋ.

੨੨. ਨ ਹਿ ਸਬ੍ਬੇਸੁ ਠਾਨੇਸੁ, ਪੁਰਿਸੋ ਹੋਤਿ ਪਣ੍ਡਿਤੋ;

ਇਤ੍ਥੀਪਿ ਪਣ੍ਡਿਤਾ ਹੋਤਿ, ਤਤ੍ਥ ਤਤ੍ਥ ਵਿਚਕ੍ਖਣਾ.

੨੩. ਨ ਹਿ ਸਬ੍ਬੇਸੁ ਠਾਨੇਸੁ, ਪੁਰਿਸੋ ਹੋਤਿ ਪਣ੍ਡਿਤੋ;

ਇਤ੍ਥੀਪਿ ਪਣ੍ਡਿਤਾ ਹੋਤਿ, ਲਹੁਂ ਅਤ੍ਥਂ ਵਿਚਿਨ੍ਤਿਕਾ [ਲਹੁਮਤ੍ਥਵਿਚਿਨ੍ਤਿਕਾ (ਸੀ. ਪੀ.)].

੨੪. ਲਹੁਞ੍ਚ ਵਤ ਖਿਪ੍ਪਞ੍ਚ, ਨਿਕਟ੍ਠੇ ਸਮਚੇਤਯਿ;

ਮਿਗਂ ਪੁਣ੍ਣਾਯਤੇਨੇਵ [ਪੁਣ੍ਣਾਯਤਨੇਵ (ਸ੍ਯਾ.)], ਸੁਲਸਾ ਸਤ੍ਤੁਕਂ ਵਧਿ.

੨੫. ਯੋਧ ਉਪ੍ਪਤਿਤਂ ਅਤ੍ਥਂ, ਨ ਖਿਪ੍ਪਮਨੁਬੁਜ੍ਝਤਿ;

ਸੋ ਹਞ੍ਞਤਿ ਮਨ੍ਦਮਤਿ, ਚੋਰੋਵ ਗਿਰਿਗਬ੍ਭਰੇ.

੨੬. ਯੋ ਚ ਉਪ੍ਪਤਿਤਂ ਅਤ੍ਥਂ, ਖਿਪ੍ਪਮੇਵ ਨਿਬੋਧਤਿ;

ਮੁਚ੍ਚਤੇ ਸਤ੍ਤੁਸਮ੍ਬਾਧਾ, ਸੁਲਸਾ ਸਤ੍ਤੁਕਾਮਿਵਾਤਿ.

ਸੁਲਸਾਜਾਤਕਂ ਤਤਿਯਂ.