੮. ਅਟ੍ਠਕਨਿਪਾਤੋ

੪੧੭. ਕਚ੍ਚਾਨਿਜਾਤਕਂ (੧)

੧. ਓਦਾਤਵਤ੍ਥਾ ਸੁਚਿ ਅਲ੍ਲਕੇਸਾ, ਕਚ੍ਚਾਨਿ ਕਿਂ ਕੁਮ੍ਭਿਮਧਿਸ੍ਸਯਿਤ੍ਵਾ [ਕੁਮ੍ਭਿਮਪਸ੍ਸਯਿਤ੍ਵਾ (ਪੀ.)];

ਪਿਟ੍ਠਾ ਤਿਲਾ ਧੋਵਸਿ ਤਣ੍ਡੁਲਾਨਿ, ਤਿਲੋਦਨੋ ਹੇਹਿਤਿ ਕਿਸ੍ਸ ਹੇਤੁ.

੨. ਨ ਖੋ ਅਯਂ ਬ੍ਰਾਹ੍ਮਣ ਭੋਜਨਤ੍ਥਾ [ਭੋਜਨਤ੍ਥਂ (ਸ੍ਯਾ.)], ਤਿਲੋਦਨੋ ਹੇਹਿਤਿ ਸਾਧੁਪਕ੍ਕੋ;

ਧਮ੍ਮੋ ਮਤੋ ਤਸ੍ਸ ਪਹੁਤ੍ਤਮਜ੍ਜ [ਪਹੂਨਮਜ੍ਜ (ਸ੍ਯਾ.), ਪਹੂਤਮਜ੍ਜ (ਸੀ.), ਬਹੂਤਮਜ੍ਜਾ (ਪੀ.)], ਅਹਂ ਕਰਿਸ੍ਸਾਮਿ ਸੁਸਾਨਮਜ੍ਝੇ.

੩. ਅਨੁਵਿਚ੍ਚ ਕਚ੍ਚਾਨਿ ਕਰੋਹਿ ਕਿਚ੍ਚਂ, ਧਮ੍ਮੋ ਮਤੋ ਕੋ ਨੁ ਤਵੇਵ [ਤਵੇਤ (ਸੀ. ਸ੍ਯਾ. ਪੀ.)] ਸਂਸਿ;

ਸਹਸ੍ਸਨੇਤ੍ਤੋ ਅਤੁਲਾਨੁਭਾਵੋ, ਨ ਮਿਯ੍ਯਤੀ ਧਮ੍ਮਵਰੋ ਕਦਾਚਿ.

੪. ਦਲ਼੍ਹਪ੍ਪਮਾਣਂ ਮਮ ਏਤ੍ਥ ਬ੍ਰਹ੍ਮੇ, ਧਮ੍ਮੋ ਮਤੋ ਨਤ੍ਥਿ ਮਮੇਤ੍ਥ ਕਙ੍ਖਾ;

ਯੇ ਯੇਵ ਦਾਨਿ ਪਾਪਾ ਭਵਨ੍ਤਿ, ਤੇ ਤੇਵ ਦਾਨਿ ਸੁਖਿਤਾ ਭਵਨ੍ਤਿ.

੫. ਸੁਣਿਸਾ ਹਿ ਮਯ੍ਹਂ ਵਞ੍ਝਾ ਅਹੋਸਿ, ਸਾ ਮਂ ਵਧਿਤ੍ਵਾਨ ਵਿਜਾਯਿ ਪੁਤ੍ਤਂ;

ਸਾ ਦਾਨਿ ਸਬ੍ਬਸ੍ਸ ਕੁਲਸ੍ਸ ਇਸ੍ਸਰਾ, ਅਹਂ ਪਨਮ੍ਹਿ [ਵਸਾਮਿ (ਸ੍ਯਾ.)] ਅਪਵਿਦ੍ਧਾ ਏਕਿਕਾ.

੬. ਜੀਵਾਮਿ ਵੋਹਂ ਨ ਮਤੋਹਮਸ੍ਮਿ [ਨਾਹਂ ਮਤੋਸ੍ਮਿ (ਸੀ. ਪੀ.)], ਤਵੇਵ ਅਤ੍ਥਾਯ ਇਧਾਗਤੋਸ੍ਮਿ;

ਯਾ ਤਂ ਵਧਿਤ੍ਵਾਨ ਵਿਜਾਯਿ ਪੁਤ੍ਤਂ, ਸਹਾਵ ਪੁਤ੍ਤੇਨ ਕਰੋਮਿ ਭਸ੍ਮਂ.

੭. ਏਵਞ੍ਚ [ਏਤਞ੍ਚ (ਸੀ. ਪੀ.)] ਤੇ ਰੁਚ੍ਚਤਿ ਦੇਵਰਾਜ, ਮਮੇਵ ਅਤ੍ਥਾਯ ਇਧਾਗਤੋਸਿ;

ਅਹਞ੍ਚ ਪੁਤ੍ਤੋ ਸੁਣਿਸਾ ਚ ਨਤ੍ਤਾ, ਸਮ੍ਮੋਦਮਾਨਾ ਘਰਮਾਵਸੇਮ.

੮. ਏਵਞ੍ਚ ਤੇ ਰੁਚ੍ਚਤਿ ਕਾਤਿਯਾਨਿ, ਹਤਾਪਿ ਸਨ੍ਤਾ ਨ ਜਹਾਸਿ ਧਮ੍ਮਂ;

ਤੁਵਞ੍ਚ [ਤ੍ਵਞ੍ਚ (ਪੀ. ਕ.)] ਪੁਤ੍ਤੋ ਸੁਣਿਸਾ ਚ ਨਤ੍ਤਾ, ਸਮ੍ਮੋਦਮਾਨਾ ਘਰਮਾਵਸੇਥ.

੯. ਸਾ ਕਾਤਿਯਾਨੀ ਸੁਣਿਸਾਯ ਸਦ੍ਧਿਂ, ਸਮ੍ਮੋਦਮਾਨਾ ਘਰਮਾਵਸਿਤ੍ਥ;

ਪੁਤ੍ਤੋ ਚ ਨਤ੍ਤਾ ਚ ਉਪਟ੍ਠਹਿਂਸੁ, ਦੇਵਾਨਮਿਨ੍ਦੇਨ ਅਧਿਗ੍ਗਹੀਤਾਤਿ.

ਕਚ੍ਚਾਨਿਜਾਤਕਂ ਪਠਮਂ.

੪੧੮. ਅਟ੍ਠਸਦ੍ਦਜਾਤਕਂ (੨)

੧੦. ਇਦਂ ਪੁਰੇ ਨਿਨ੍ਨਮਾਹੁ, ਬਹੁਮਚ੍ਛਂ ਮਹੋਦਕਂ;

ਆਵਾਸੋ ਬਕਰਾਜਸ੍ਸ, ਪੇਤ੍ਤਿਕਂ ਭਵਨਂ ਮਮ;

ਤ੍ਯਜ੍ਜ ਭੇਕੇਨ [ਭਿਙ੍ਗੇਨ (ਕ.)] ਯਾਪੇਮ, ਓਕਂ ਨ ਵਜਹਾਮਸੇ [ਓਕਨ੍ਤਂ ਨ ਜਹਾਮਸੇ (ਕ.)].

੧੧. ਕੋ ਦੁਤਿਯਂ ਅਸੀਲਿਸ੍ਸ, ਬਨ੍ਧਰਸ੍ਸਕ੍ਖਿ ਭੇਚ੍ਛਤਿ [ਭੇਜ੍ਜਤਿ (ਸੀ. ਸ੍ਯਾ. ਪੀ.), ਭਿਨ੍ਦਤਿ (ਕ.)];

ਕੋ ਮੇ ਪੁਤ੍ਤੇ ਕੁਲਾਵਕਂ, ਮਞ੍ਚ ਸੋਤ੍ਥਿਂ ਕਰਿਸ੍ਸਤਿ.

੧੨. ਸਬ੍ਬਾ ਪਰਿਕ੍ਖਯਾ ਫੇਗ੍ਗੁ, ਯਾਵ ਤਸ੍ਸਾ ਗਤੀ ਅਹੁ;

ਖੀਣਭਕ੍ਖੋ ਮਹਾਰਾਜ, ਸਾਰੇ ਨ ਰਮਤੀ ਘੁਣੋ.

੧੩. ਸਾ ਨੂਨਾਹਂ ਇਤੋ ਗਨ੍ਤ੍ਵਾ, ਰਞ੍ਞੋ ਮੁਤ੍ਤਾ ਨਿਵੇਸਨਾ;

ਅਤ੍ਤਾਨਂ ਰਮਯਿਸ੍ਸਾਮਿ, ਦੁਮਸਾਖਨਿਕੇਤਿਨੀ.

੧੪. ਸੋ ਨੂਨਾਹਂ ਇਤੋ ਗਨ੍ਤ੍ਵਾ, ਰਞ੍ਞੋ ਮੁਤ੍ਤੋ ਨਿਵੇਸਨਾ;

ਅਗ੍ਗੋਦਕਾਨਿ ਪਿਸ੍ਸਾਮਿ, ਯੂਥਸ੍ਸ ਪੁਰਤੋ ਵਜਂ.

੧੫. ਤਂ ਮਂ ਕਾਮੇਹਿ ਸਮ੍ਮਤ੍ਤਂ, ਰਤ੍ਤਂ ਕਾਮੇਸੁ ਮੁਚ੍ਛਿਤਂ;

ਆਨਯੀ ਭਰਤੋ [ਵਨਤੋ (ਕ.)] ਲੁਦ੍ਦੋ, ਬਾਹਿਕੋ ਭਦ੍ਦਮਤ੍ਥੁ ਤੇ.

੧੬. ਅਨ੍ਧਕਾਰਤਿਮਿਸਾਯਂ, ਤੁਙ੍ਗੇ ਉਪਰਿਪਬ੍ਬਤੇ;

ਸਾ ਮਂ ਸਣ੍ਹੇਨ ਮੁਦੁਨਾ, ਮਾ ਪਾਦਂ ਖਲਿ [ਖਣਿ (ਸੀ. ਸ੍ਯਾ. ਪੀ.)] ਯਸ੍ਮਨਿ.

੧੭. ਅਸਂਸਯਂ ਜਾਤਿਖਯਨ੍ਤਦਸ੍ਸੀ, ਨ ਗਬ੍ਭਸੇਯ੍ਯਂ ਪੁਨਰਾਵਜਿਸ੍ਸਂ;

ਅਯਮਨ੍ਤਿਮਾ ਪਚ੍ਛਿਮਾ ਗਬ੍ਭਸੇਯ੍ਯਾ [ਅਯਂ ਹਿ ਮੇ ਅਨ੍ਤਿਮਾ ਗਬ੍ਭਸੇਯ੍ਯਾ (ਸੀ. ਪੀ.)], ਖੀਣੋ ਮੇ ਸਂਸਾਰੋ ਪੁਨਬ੍ਭਵਾਯਾਤਿ.

ਅਟ੍ਠਸਦ੍ਦਜਾਤਕਂ ਦੁਤਿਯਂ.

੪੧੯. ਸੁਲਸਾਜਾਤਕਂ (੩)

੧੮. ਇਦਂ ਸੁਵਣ੍ਣਕਾਯੂਰਂ, ਮੁਤ੍ਤਾ ਵੇਲ਼ੁਰਿਯਾ ਬਹੂ;

ਸਬ੍ਬਂ ਹਰਸ੍ਸੁ ਭਦ੍ਦਨ੍ਤੇ, ਮਞ੍ਚ ਦਾਸੀਤਿ ਸਾਵਯ.

੧੯. ਓਰੋਪਯਸ੍ਸੁ ਕਲ੍ਯਾਣਿ, ਮਾ ਬਾਲ਼੍ਹਂ [ਬਹੁਂ (ਸੀ. ਸ੍ਯਾ. ਪੀ.)] ਪਰਿਦੇਵਸਿ;

ਨ ਚਾਹਂ ਅਭਿਜਾਨਾਮਿ, ਅਹਨ੍ਤ੍ਵਾ ਧਨਮਾਭਤਂ.

੨੦. ਯਤੋ ਸਰਾਮਿ ਅਤ੍ਤਾਨਂ, ਯਤੋ ਪਤ੍ਤਾਸ੍ਮਿ ਵਿਞ੍ਞੁਤਂ;

ਨ ਚਾਹਂ ਅਭਿਜਾਨਾਮਿ, ਅਞ੍ਞਂ ਪਿਯਤਰਂ ਤਯਾ.

੨੧. ਏਹਿ ਤਂ ਉਪਗੂਹਿਸ੍ਸਂ [ਉਪਗੁਯ੍ਹਿਸ੍ਸਂ (ਕ.)], ਕਰਿਸ੍ਸਞ੍ਚ ਪਦਕ੍ਖਿਣਂ;

ਨ ਹਿ ਦਾਨਿ ਪੁਨ ਅਤ੍ਥਿ, ਮਮ ਤੁਯ੍ਹਞ੍ਚ ਸਙ੍ਗਮੋ.

੨੨. ਨ ਹਿ ਸਬ੍ਬੇਸੁ ਠਾਨੇਸੁ, ਪੁਰਿਸੋ ਹੋਤਿ ਪਣ੍ਡਿਤੋ;

ਇਤ੍ਥੀਪਿ ਪਣ੍ਡਿਤਾ ਹੋਤਿ, ਤਤ੍ਥ ਤਤ੍ਥ ਵਿਚਕ੍ਖਣਾ.

੨੩. ਨ ਹਿ ਸਬ੍ਬੇਸੁ ਠਾਨੇਸੁ, ਪੁਰਿਸੋ ਹੋਤਿ ਪਣ੍ਡਿਤੋ;

ਇਤ੍ਥੀਪਿ ਪਣ੍ਡਿਤਾ ਹੋਤਿ, ਲਹੁਂ ਅਤ੍ਥਂ ਵਿਚਿਨ੍ਤਿਕਾ [ਲਹੁਮਤ੍ਥਵਿਚਿਨ੍ਤਿਕਾ (ਸੀ. ਪੀ.)].

੨੪. ਲਹੁਞ੍ਚ ਵਤ ਖਿਪ੍ਪਞ੍ਚ, ਨਿਕਟ੍ਠੇ ਸਮਚੇਤਯਿ;

ਮਿਗਂ ਪੁਣ੍ਣਾਯਤੇਨੇਵ [ਪੁਣ੍ਣਾਯਤਨੇਵ (ਸ੍ਯਾ.)], ਸੁਲਸਾ ਸਤ੍ਤੁਕਂ ਵਧਿ.

੨੫. ਯੋਧ ਉਪ੍ਪਤਿਤਂ ਅਤ੍ਥਂ, ਨ ਖਿਪ੍ਪਮਨੁਬੁਜ੍ਝਤਿ;

ਸੋ ਹਞ੍ਞਤਿ ਮਨ੍ਦਮਤਿ, ਚੋਰੋਵ ਗਿਰਿਗਬ੍ਭਰੇ.

੨੬. ਯੋ ਚ ਉਪ੍ਪਤਿਤਂ ਅਤ੍ਥਂ, ਖਿਪ੍ਪਮੇਵ ਨਿਬੋਧਤਿ;

ਮੁਚ੍ਚਤੇ ਸਤ੍ਤੁਸਮ੍ਬਾਧਾ, ਸੁਲਸਾ ਸਤ੍ਤੁਕਾਮਿਵਾਤਿ.

ਸੁਲਸਾਜਾਤਕਂ ਤਤਿਯਂ.

੪੨੦. ਸੁਮਙ੍ਗਲਜਾਤਕਂ (੪)

੨੭. ਭੁਸਮ੍ਹਿ [ਭੁਸਮ੍ਪਿ (ਕ.), ਭੁਸਂ ਹਿ (ਸੀ. ਨਿਯ੍ਯ)] ਕੁਦ੍ਧੋਤਿ ਅਵੇਕ੍ਖਿਯਾਨ, ਨ ਤਾਵ ਦਣ੍ਡਂ ਪਣਯੇਯ੍ਯ ਇਸ੍ਸਰੋ;

ਅਟ੍ਠਾਨਸੋ ਅਪ੍ਪਤਿਰੂਪਮਤ੍ਤਨੋ, ਪਰਸ੍ਸ ਦੁਕ੍ਖਾਨਿ ਭੁਸਂ ਉਦੀਰਯੇ.

੨੮. ਯਤੋ ਚ ਜਾਨੇਯ੍ਯ ਪਸਾਦਮਤ੍ਤਨੋ, ਅਤ੍ਥਂ ਨਿਯੁਞ੍ਜੇਯ੍ਯ ਪਰਸ੍ਸ ਦੁਕ੍ਕਟਂ;

ਤਦਾਯਮਤ੍ਥੋਤਿ ਸਯਂ ਅਵੇਕ੍ਖਿਯ, ਅਥਸ੍ਸ ਦਣ੍ਡਂ ਸਦਿਸਂ ਨਿਵੇਸਯੇ.

੨੯. ਨ ਚਾਪਿ ਝਾਪੇਤਿ ਪਰਂ ਨ ਅਤ੍ਤਨਂ, ਅਮੁਚ੍ਛਿਤੋ ਯੋ ਨਯਤੇ ਨਯਾਨਯਂ;

ਯੋ ਦਣ੍ਡਧਾਰੋ ਭਵਤੀਧ ਇਸ੍ਸਰੋ, ਸ ਵਣ੍ਣਗੁਤ੍ਤੋ ਸਿਰਿਯਾ ਨ ਧਂਸਤਿ.

੩੦. ਯੇ ਖਤ੍ਤਿਯਾ ਸੇ ਅਨਿਸਮ੍ਮਕਾਰਿਨੋ, ਪਣੇਨ੍ਤਿ ਦਣ੍ਡਂ ਸਹਸਾ ਪਮੁਚ੍ਛਿਤਾ;

ਅਵਣ੍ਣਸਂਯੁਤਾ [ਯੁਤ੍ਤਾਵ (ਕ.)] ਜਹਨ੍ਤਿ ਜੀਵਿਤਂ, ਇਤੋ ਵਿਮੁਤ੍ਤਾਪਿ ਚ ਯਨ੍ਤਿ ਦੁਗ੍ਗਤਿਂ.

੩੧. ਧਮ੍ਮੇ ਚ ਯੇ ਅਰਿਯਪ੍ਪਵੇਦਿਤੇ ਰਤਾ, ਅਨੁਤ੍ਤਰਾ ਤੇ ਵਚਸਾ ਮਨਸਾ ਕਮ੍ਮੁਨਾ ਚ;

ਤੇ ਸਨ੍ਤਿਸੋਰਚ੍ਚਸਮਾਧਿਸਣ੍ਠਿਤਾ, ਵਜਨ੍ਤਿ ਲੋਕਂ ਦੁਭਯਂ ਤਥਾਵਿਧਾ.

੩੨. ਰਾਜਾਹਮਸ੍ਮਿ ਨਰਪਮਦਾਨਮਿਸ੍ਸਰੋ, ਸਚੇਪਿ ਕੁਜ੍ਝਾਮਿ ਠਪੇਮਿ ਅਤ੍ਤਨਂ;

ਨਿਸੇਧਯਨ੍ਤੋ ਜਨਤਂ ਤਥਾਵਿਧਂ, ਪਣੇਮਿ ਦਣ੍ਡਂ ਅਨੁਕਮ੍ਪ ਯੋਨਿਸੋ.

੩੩. ਸਿਰੀ ਚ ਲਕ੍ਖੀ ਚ ਤਵੇਵ ਖਤ੍ਤਿਯ, ਜਨਾਧਿਪ ਮਾ ਵਿਜਹਿ ਕੁਦਾਚਨਂ;

ਅਕ੍ਕੋਧਨੋ ਨਿਚ੍ਚਪਸਨ੍ਨਚਿਤ੍ਤੋ, ਅਨੀਘੋ ਤੁਵਂ ਵਸ੍ਸਸਤਾਨਿ ਪਾਲਯ.

੩੪. ਗੁਣੇਹਿ ਏਤੇਹਿ ਉਪੇਤ ਖਤ੍ਤਿਯ, ਠਿਤਮਰਿਯਵਤ੍ਤੀ [ਵਤ੍ਤਿ (ਸੀ.), ਵੁਤ੍ਤਿ (ਕ.)] ਸੁਵਚੋ ਅਕੋਧਨੋ;

ਸੁਖੀ ਅਨੁਪ੍ਪੀਲ਼ ਪਸਾਸਮੇਦਿਨਿਂ [ਅਨੁਪ੍ਪੀਲ਼ਂ ਸਹਸਮੇਦਨਿਂ (ਕ.)], ਇਤੋ ਵਿਮੁਤ੍ਤੋਪਿ ਚ ਯਾਹਿ ਸੁਗ੍ਗਤਿਂ.

੩੫. ਏਵਂ ਸੁਨੀਤੇਨ [ਸੁਵਿਨੀਤੇਨ (ਪੀ.)] ਸੁਭਾਸਿਤੇਨ, ਧਮ੍ਮੇਨ ਞਾਯੇਨ ਉਪਾਯਸੋ ਨਯਂ;

ਨਿਬ੍ਬਾਪਯੇ ਸਙ੍ਖੁਭਿਤਂ ਮਹਾਜਨਂ, ਮਹਾਵ ਮੇਘੋ ਸਲਿਲੇਨ ਮੇਦਿਨਿਨ੍ਤਿ [ਮੇਦਨਿਨ੍ਤਿ (ਸ੍ਯਾ. ਕ.)].

ਸੁਮਙ੍ਗਲਜਾਤਕਂ ਚਤੁਤ੍ਥਂ.

੪੨੧. ਗਙ੍ਗਮਾਲਜਾਤਕਂ (੫)

੩੬. ਅਙ੍ਗਾਰਜਾਤਾ ਪਥਵੀ, ਕੁਕ੍ਕੁਲ਼ਾਨੁਗਤਾ ਮਹੀ;

ਅਥ ਗਾਯਸਿ ਵਤ੍ਤਾਨਿ [ਵਤ੍ਥਾਨਿ (ਕ.)], ਨ ਤਂ ਤਪਤਿ ਆਤਪੋ.

੩੭. ਉਦ੍ਧਂ ਤਪਤਿ ਆਦਿਚ੍ਚੋ, ਅਧੋ ਤਪਤਿ ਵਾਲੁਕਾ;

ਅਥ ਗਾਯਸਿ ਵਤ੍ਤਾਨਿ [ਵਤ੍ਥਾਨਿ (ਕ.)], ਨ ਤਂ ਤਪਤਿ ਆਤਪੋ.

੩੮. ਨ ਮਂ ਤਪਤਿ ਆਤਪੋ, ਆਤਪਾ [ਆਤਪ੍ਪਾ (ਸੀ. ਸ੍ਯਾ. ਪੀ.)] ਤਪਯਨ੍ਤਿ ਮਂ;

ਅਤ੍ਥਾ ਹਿ ਵਿਵਿਧਾ ਰਾਜ, ਤੇ ਤਪਨ੍ਤਿ ਨ ਆਤਪੋ.

੩੯. ਅਦ੍ਦਸਂ ਕਾਮ ਤੇ ਮੂਲਂ, ਸਙ੍ਕਪ੍ਪਾ ਕਾਮ ਜਾਯਸਿ;

ਨ ਤਂ ਸਙ੍ਕਪ੍ਪਯਿਸ੍ਸਾਮਿ, ਏਵਂ ਕਾਮ ਨ ਹੇਹਿਸਿ.

੪੦. ਅਪ੍ਪਾਪਿ ਕਾਮਾ ਨ ਅਲਂ, ਬਹੂਹਿਪਿ ਨ ਤਪ੍ਪਤਿ;

ਅਹਹਾ ਬਾਲਲਪਨਾ, ਪਰਿਵਜ੍ਜੇਥ [ਪਟਿਵਿਜ੍ਝੇਥ (ਪੀ. ਸੀ. ਅਟ੍ਠ.)] ਜਗ੍ਗਤੋ.

੪੧. ਅਪ੍ਪਸ੍ਸ ਕਮ੍ਮਸ੍ਸ ਫਲਂ ਮਮੇਦਂ, ਉਦਯੋ ਅਜ੍ਝਾਗਮਾ ਮਹਤ੍ਤਪਤ੍ਤਂ;

ਸੁਲਦ੍ਧਲਾਭੋ ਵਤ ਮਾਣਵਸ੍ਸ, ਯੋ ਪਬ੍ਬਜੀ ਕਾਮਰਾਗਂ ਪਹਾਯ.

੪੨. ਤਪਸਾ ਪਜਹਨ੍ਤਿ ਪਾਪਕਮ੍ਮਂ, ਤਪਸਾ ਨ੍ਹਾਪਿਤਕੁਮ੍ਭਕਾਰਭਾਵਂ;

ਤਪਸਾ ਅਭਿਭੁਯ੍ਯ ਗਙ੍ਗਮਾਲ, ਨਾਮੇਨਾਲਪਸਜ੍ਜ ਬ੍ਰਹ੍ਮਦਤ੍ਤਂ.

੪੩. ਸਨ੍ਦਿਟ੍ਠਿਕਮੇਵ ‘‘ਅਮ੍ਮ’’ ਪਸ੍ਸਥ, ਖਨ੍ਤੀਸੋਰਚ੍ਚਸ੍ਸ ਅਯਂ [ਯੋ (ਸ੍ਯਾ. ਪੀ. ਕ.)] ਵਿਪਾਕੋ;

ਯੋ [ਸੋ (ਸ੍ਯਾ. ਕ.)] ਸਬ੍ਬਜਨਸ੍ਸ ਵਨ੍ਦਿਤੋਹੁ, ਤਂ ਵਨ੍ਦਾਮ ਸਰਾਜਿਕਾ ਸਮਚ੍ਚਾ.

੪੪. ਮਾ ਕਿਞ੍ਚਿ ਅਵਚੁਤ੍ਥ ਗਙ੍ਗਮਾਲਂ, ਮੁਨਿਨਂ ਮੋਨਪਥੇਸੁ ਸਿਕ੍ਖਮਾਨਂ;

ਏਸੋ ਹਿ ਅਤਰਿ ਅਣ੍ਣਵਂ, ਯਂ ਤਰਿਤ੍ਵਾ ਚਰਨ੍ਤਿ ਵੀਤਸੋਕਾਤਿ.

ਗਙ੍ਗਮਾਲਜਾਤਕਂ ਪਞ੍ਚਮਂ.

੪੨੨. ਚੇਤਿਯਜਾਤਕਂ (੬)

੪੫. ਧਮ੍ਮੋ ਹਵੇ ਹਤੋ ਹਨ੍ਤਿ, ਨਾਹਤੋ ਹਨ੍ਤਿ ਕਿਞ੍ਚਨਂ [ਕਞ੍ਚਿਨਂ (ਪੀ.)];

ਤਸ੍ਮਾ ਹਿ ਧਮ੍ਮਂ ਨ ਹਨੇ, ਮਾ ਤ੍ਵਂ [ਤਂ (ਸ੍ਯਾ. ਪੀ.)] ਧਮ੍ਮੋ ਹਤੋ ਹਨਿ.

੪੬. ਅਲਿਕਂ ਭਾਸਮਾਨਸ੍ਸ, ਅਪਕ੍ਕਮਨ੍ਤਿ ਦੇਵਤਾ;

ਪੂਤਿਕਞ੍ਚ ਮੁਖਂ ਵਾਤਿ, ਸਕਟ੍ਠਾਨਾ ਚ ਧਂਸਤਿ;