੪੧੭. ਕਚ੍ਚਾਨਿਜਾਤਕਂ (੧)

੧. ਓਦਾਤਵਤ੍ਥਾ ਸੁਚਿ ਅਲ੍ਲਕੇਸਾ, ਕਚ੍ਚਾਨਿ ਕਿਂ ਕੁਮ੍ਭਿਮਧਿਸ੍ਸਯਿਤ੍ਵਾ [ਕੁਮ੍ਭਿਮਪਸ੍ਸਯਿਤ੍ਵਾ (ਪੀ.)];

ਪਿਟ੍ਠਾ ਤਿਲਾ ਧੋਵਸਿ ਤਣ੍ਡੁਲਾਨਿ, ਤਿਲੋਦਨੋ ਹੇਹਿਤਿ ਕਿਸ੍ਸ ਹੇਤੁ.

੨. ਨ ਖੋ ਅਯਂ ਬ੍ਰਾਹ੍ਮਣ ਭੋਜਨਤ੍ਥਾ [ਭੋਜਨਤ੍ਥਂ (ਸ੍ਯਾ.)], ਤਿਲੋਦਨੋ ਹੇਹਿਤਿ ਸਾਧੁਪਕ੍ਕੋ;

ਧਮ੍ਮੋ ਮਤੋ ਤਸ੍ਸ ਪਹੁਤ੍ਤਮਜ੍ਜ [ਪਹੂਨਮਜ੍ਜ (ਸ੍ਯਾ.), ਪਹੂਤਮਜ੍ਜ (ਸੀ.), ਬਹੂਤਮਜ੍ਜਾ (ਪੀ.)], ਅਹਂ ਕਰਿਸ੍ਸਾਮਿ ਸੁਸਾਨਮਜ੍ਝੇ.

੩. ਅਨੁਵਿਚ੍ਚ ਕਚ੍ਚਾਨਿ ਕਰੋਹਿ ਕਿਚ੍ਚਂ, ਧਮ੍ਮੋ ਮਤੋ ਕੋ ਨੁ ਤਵੇਵ [ਤਵੇਤ (ਸੀ. ਸ੍ਯਾ. ਪੀ.)] ਸਂਸਿ;

ਸਹਸ੍ਸਨੇਤ੍ਤੋ ਅਤੁਲਾਨੁਭਾਵੋ, ਨ ਮਿਯ੍ਯਤੀ ਧਮ੍ਮਵਰੋ ਕਦਾਚਿ.

੪. ਦਲ਼੍ਹਪ੍ਪਮਾਣਂ ਮਮ ਏਤ੍ਥ ਬ੍ਰਹ੍ਮੇ, ਧਮ੍ਮੋ ਮਤੋ ਨਤ੍ਥਿ ਮਮੇਤ੍ਥ ਕਙ੍ਖਾ;

ਯੇ ਯੇਵ ਦਾਨਿ ਪਾਪਾ ਭਵਨ੍ਤਿ, ਤੇ ਤੇਵ ਦਾਨਿ ਸੁਖਿਤਾ ਭਵਨ੍ਤਿ.

੫. ਸੁਣਿਸਾ ਹਿ ਮਯ੍ਹਂ ਵਞ੍ਝਾ ਅਹੋਸਿ, ਸਾ ਮਂ ਵਧਿਤ੍ਵਾਨ ਵਿਜਾਯਿ ਪੁਤ੍ਤਂ;

ਸਾ ਦਾਨਿ ਸਬ੍ਬਸ੍ਸ ਕੁਲਸ੍ਸ ਇਸ੍ਸਰਾ, ਅਹਂ ਪਨਮ੍ਹਿ [ਵਸਾਮਿ (ਸ੍ਯਾ.)] ਅਪਵਿਦ੍ਧਾ ਏਕਿਕਾ.

੬. ਜੀਵਾਮਿ ਵੋਹਂ ਨ ਮਤੋਹਮਸ੍ਮਿ [ਨਾਹਂ ਮਤੋਸ੍ਮਿ (ਸੀ. ਪੀ.)], ਤਵੇਵ ਅਤ੍ਥਾਯ ਇਧਾਗਤੋਸ੍ਮਿ;

ਯਾ ਤਂ ਵਧਿਤ੍ਵਾਨ ਵਿਜਾਯਿ ਪੁਤ੍ਤਂ, ਸਹਾਵ ਪੁਤ੍ਤੇਨ ਕਰੋਮਿ ਭਸ੍ਮਂ.

੭. ਏਵਞ੍ਚ [ਏਤਞ੍ਚ (ਸੀ. ਪੀ.)] ਤੇ ਰੁਚ੍ਚਤਿ ਦੇਵਰਾਜ, ਮਮੇਵ ਅਤ੍ਥਾਯ ਇਧਾਗਤੋਸਿ;

ਅਹਞ੍ਚ ਪੁਤ੍ਤੋ ਸੁਣਿਸਾ ਚ ਨਤ੍ਤਾ, ਸਮ੍ਮੋਦਮਾਨਾ ਘਰਮਾਵਸੇਮ.

੮. ਏਵਞ੍ਚ ਤੇ ਰੁਚ੍ਚਤਿ ਕਾਤਿਯਾਨਿ, ਹਤਾਪਿ ਸਨ੍ਤਾ ਨ ਜਹਾਸਿ ਧਮ੍ਮਂ;

ਤੁਵਞ੍ਚ [ਤ੍ਵਞ੍ਚ (ਪੀ. ਕ.)] ਪੁਤ੍ਤੋ ਸੁਣਿਸਾ ਚ ਨਤ੍ਤਾ, ਸਮ੍ਮੋਦਮਾਨਾ ਘਰਮਾਵਸੇਥ.

੯. ਸਾ ਕਾਤਿਯਾਨੀ ਸੁਣਿਸਾਯ ਸਦ੍ਧਿਂ, ਸਮ੍ਮੋਦਮਾਨਾ ਘਰਮਾਵਸਿਤ੍ਥ;

ਪੁਤ੍ਤੋ ਚ ਨਤ੍ਤਾ ਚ ਉਪਟ੍ਠਹਿਂਸੁ, ਦੇਵਾਨਮਿਨ੍ਦੇਨ ਅਧਿਗ੍ਗਹੀਤਾਤਿ.

ਕਚ੍ਚਾਨਿਜਾਤਕਂ ਪਠਮਂ.