੪੧੬. ਪਰਨ੍ਤਪਜਾਤਕਂ (੭-੨-੧੧)

੧੫੪. ਆਗਮਿਸ੍ਸਤਿ ਮੇ ਪਾਪਂ, ਆਗਮਿਸ੍ਸਤਿ ਮੇ ਭਯਂ;

ਤਦਾ ਹਿ ਚਲਿਤਾ ਸਾਖਾ, ਮਨੁਸ੍ਸੇਨ ਮਿਗੇਨ ਵਾ.

੧੫੫. ਭੀਰੁਯਾ ਨੂਨ ਮੇ ਕਾਮੋ, ਅਵਿਦੂਰੇ ਵਸਨ੍ਤਿਯਾ;

ਕਰਿਸ੍ਸਤਿ ਕਿਸਂ ਪਣ੍ਡੁਂ, ਸਾਵ ਸਾਖਾ ਪਰਨ੍ਤਪਂ.

੧੫੬. ਸੋਚਯਿਸ੍ਸਤਿ ਮਂ ਕਨ੍ਤਾ, ਗਾਮੇ ਵਸਮਨਿਨ੍ਦਿਤਾ;

ਕਰਿਸ੍ਸਤਿ ਕਿਸਂ ਪਣ੍ਡੁਂ, ਸਾਵ ਸਾਖਾ ਪਰਨ੍ਤਪਂ.

੧੫੭. ਤਯਾ ਮਂ ਅਸਿਤਾਪਙ੍ਗਿ [ਹਸਿਤਾਪਙ੍ਗਿ (ਸੀ. ਸ੍ਯਾ. ਪੀ.)], ਸਿਤਾਨਿ [ਮਿਹਿਤਾਨਿ (ਸੀ. ਸ੍ਯਾ. ਪੀ.)] ਭਣਿਤਾਨਿ ਚ;

ਕਿਸਂ ਪਣ੍ਡੁਂ ਕਰਿਸ੍ਸਨ੍ਤਿ, ਸਾਵ ਸਾਖਾ ਪਰਨ੍ਤਪਂ.

੧੫੮. ਅਗਮਾ ਨੂਨ ਸੋ ਸਦ੍ਦੋ, ਅਸਂਸਿ ਨੂਨ ਸੋ ਤਵ;

ਅਕ੍ਖਾਤਂ ਨੂਨ ਤਂ ਤੇਨ, ਯੋ ਤਂ ਸਾਖਮਕਮ੍ਪਯਿ.

੧੫੯. ਇਦਂ ਖੋ ਤਂ ਸਮਾਗਮ੍ਮ, ਮਮ ਬਾਲਸ੍ਸ ਚਿਨ੍ਤਿਤਂ;

ਤਦਾ ਹਿ ਚਲਿਤਾ ਸਾਖਾ, ਮਨੁਸ੍ਸੇਨ ਮਿਗੇਨ ਵਾ.

੧੬੦. ਤਥੇਵ ਤ੍ਵਂ ਅਵੇਦੇਸਿ, ਅਵਞ੍ਚਿ [ਅਵਜ੍ਝਿ (ਕ.)] ਪਿਤਰਂ ਮਮ;

ਹਨ੍ਤ੍ਵਾ ਸਾਖਾਹਿ ਛਾਦੇਨ੍ਤੋ, ਆਗਮਿਸ੍ਸਤਿ ਮੇ [ਤੇ (ਸ੍ਯਾ. ਕ.)] ਭਯਨ੍ਤਿ.

ਪਰਨ੍ਤਪਜਾਤਕਂ ਏਕਾਦਸਮਂ.

ਗਨ੍ਧਾਰਵਗ੍ਗੋ ਦੁਤਿਯੋ.

ਤਸ੍ਸੁਦ੍ਦਾਨਂ –

ਵਰਗਾਮ ਮਹਾਕਪਿ ਭਗ੍ਗਵ ਚ, ਦਲ਼੍ਹਧਮ੍ਮ ਸਕੁਞ੍ਜਰ ਕੇਸਵਰੋ;

ਉਰਗੋ ਵਿਧੁਰੋ ਪੁਨ ਜਾਗਰਤਂ, ਅਥ ਕੋਸਲਾਧਿਪ ਪਰਨ੍ਤਪ ਚਾਤਿ.

ਅਥ ਵਗ੍ਗੁਦ੍ਦਾਨਂ –

ਅਥ ਸਤ੍ਤਨਿਪਾਤਮ੍ਹਿ, ਵਗ੍ਗਂ ਮੇ ਭਣਤੋ ਸੁਣ;

ਕੁਕ੍ਕੁ ਚ ਪੁਨ ਗਨ੍ਧਾਰੋ, ਦ੍ਵੇਵ ਗੁਤ੍ਤਾ ਮਹੇਸਿਨਾਤਿ.

ਸਤ੍ਤਕਨਿਪਾਤਂ ਨਿਟ੍ਠਿਤਂ.