੨. ਗਨ੍ਧਾਰਵਗ੍ਗੋ

੪੦੬. ਗਨ੍ਧਾਰਜਾਤਕਂ (੭-੨-੧)

੭੬. ਹਿਤ੍ਵਾ ਗਾਮਸਹਸ੍ਸਾਨਿ, ਪਰਿਪੁਣ੍ਣਾਨਿ ਸੋਲ਼ਸ;

ਕੋਟ੍ਠਾਗਾਰਾਨਿ ਫੀਤਾਨਿ, ਸਨ੍ਨਿਧਿਂ ਦਾਨਿ ਕੁਬ੍ਬਸਿ.

੭੭. ਹਿਤ੍ਵਾ ਗਨ੍ਧਾਰਵਿਸਯਂ, ਪਹੂਤਧਨਧਾਰਿਯਂ [ਧਾਨਿਯਂ (ਸੀ. ਪੀ.), ਧਞ੍ਞਨ੍ਤਿ ਅਤ੍ਥੋ];

ਪਸਾਸਨਤੋ [ਪਸਾਸਨਿਤੋ (ਸੀ. ਸ੍ਯਾ.), ਪਸਾਸਨਾਤੋ (ਪੀ.)] ਨਿਕ੍ਖਨ੍ਤੋ, ਇਧ ਦਾਨਿ ਪਸਾਸਸਿ.

੭੮. ਧਮ੍ਮਂ ਭਣਾਮਿ ਵੇਦੇਹ, ਅਧਮ੍ਮੋ ਮੇ ਨ ਰੁਚ੍ਚਤਿ;

ਧਮ੍ਮਂ ਮੇ ਭਣਮਾਨਸ੍ਸ, ਨ ਪਾਪਮੁਪਲਿਮ੍ਪਤਿ.

੭੯. ਯੇਨ ਕੇਨਚਿ ਵਣ੍ਣੇਨ, ਪਰੋ ਲਭਤਿ ਰੁਪ੍ਪਨਂ;

ਮਹਤ੍ਥਿਯਮ੍ਪਿ ਚੇ ਵਾਚਂ, ਨ ਤਂ ਭਾਸੇਯ੍ਯ ਪਣ੍ਡਿਤੋ.

੮੦. ਕਾਮਂ ਰੁਪ੍ਪਤੁ ਵਾ ਮਾ ਵਾ, ਭੁਸਂਵ ਵਿਕਿਰੀਯਤੁ;

ਧਮ੍ਮਂ ਮੇ ਭਣਮਾਨਸ੍ਸ, ਨ ਪਾਪਮੁਪਲਿਮ੍ਪਤਿ.

੮੧. ਨੋ ਚੇ ਅਸ੍ਸ ਸਕਾ ਬੁਦ੍ਧਿ, ਵਿਨਯੋ ਵਾ ਸੁਸਿਕ੍ਖਿਤੋ;

ਵਨੇ ਅਨ੍ਧਮਹਿਂਸੋਵ [ਅਨ੍ਧਮਹਿਸੋਵ (ਸੀ. ਪੀ.)] ਚਰੇਯ੍ਯ ਬਹੁਕੋ ਜਨੋ.

੮੨. ਯਸ੍ਮਾ ਚ ਪਨਿਧੇਕਚ੍ਚੇ, ਆਚੇਰਮ੍ਹਿ [ਆਚਾਰਮ੍ਹਿ (ਸੀ. ਪੀ.)] ਸੁਸਿਕ੍ਖਿਤਾ;

ਤਸ੍ਮਾ ਵਿਨੀਤਵਿਨਯਾ, ਚਰਨ੍ਤਿ ਸੁਸਮਾਹਿਤਾਤਿ.

ਗਨ੍ਧਾਰਜਾਤਕਂ ਪਠਮਂ.

੪੦੭. ਮਹਾਕਪਿਜਾਤਕਂ (੭-੨-੨)

੮੩. ਅਤ੍ਤਾਨਂ ਸਙ੍ਕਮਂ ਕਤ੍ਵਾ, ਯੋ ਸੋਤ੍ਥਿਂ ਸਮਤਾਰਯਿ;

ਕਿਂ ਤ੍ਵਂ ਤੇਸਂ ਕਿਮੇ [ਕਿਮੋ (ਸੀ. ਪੀ.), ਕਿਂ ਮੇ (ਸ੍ਯਾ.)] ਤੁਯ੍ਹਂ, ਹੋਨ੍ਤਿ ਏਤੇ [ਹੇਤੇ (ਸ੍ਯਾ.), ਸੋ ਤੇ (ਕ.)] ਮਹਾਕਪਿ.

੮੪. ਰਾਜਾਹਂ ਇਸ੍ਸਰੋ ਤੇਸਂ, ਯੂਥਸ੍ਸ ਪਰਿਹਾਰਕੋ;

ਤੇਸਂ ਸੋਕਪਰੇਤਾਨਂ, ਭੀਤਾਨਂ ਤੇ ਅਰਿਨ੍ਦਮ.

੮੫. ਉਲ੍ਲਙ੍ਘਯਿਤ੍ਵਾ [ਸ ਲਙ੍ਘਯਿਤ੍ਵਾ (ਪੀ.), ਸੁਲਙ੍ਘਯਿਤ੍ਵਾ (ਕ.)] ਅਤ੍ਤਾਨਂ, ਵਿਸ੍ਸਟ੍ਠਧਨੁਨੋ ਸਤਂ;

ਤਤੋ ਅਪਰਪਾਦੇਸੁ, ਦਲ਼੍ਹਂ ਬਨ੍ਧਂ ਲਤਾਗੁਣਂ.

੮੬. ਛਿਨ੍ਨਬ੍ਭਮਿਵ ਵਾਤੇਨ, ਨੁਣ੍ਣੋ [ਨੁਨ੍ਨੋ (ਸੀ.)] ਰੁਕ੍ਖਂ ਉਪਾਗਮਿਂ;

ਸੋਹਂ ਅਪ੍ਪਭਵਂ ਤਤ੍ਥ, ਸਾਖਂ ਹਤ੍ਥੇਹਿ ਅਗ੍ਗਹਿਂ.

੮੭. ਤਂ ਮਂ ਵਿਯਾਯਤਂ ਸਨ੍ਤਂ, ਸਾਖਾਯ ਚ ਲਤਾਯ ਚ;

ਸਮਨੁਕ੍ਕਮਨ੍ਤਾ ਪਾਦੇਹਿ, ਸੋਤ੍ਥਿਂ ਸਾਖਾਮਿਗਾ ਗਤਾ.

੮੮. ਤਂ ਮਂ ਨ ਤਪਤੇ ਬਨ੍ਧੋ, ਮਤੋ [ਵਧੋ (ਸੀ. ਸ੍ਯਾ. ਪੀ.)] ਮੇ ਨ ਤਪੇਸ੍ਸਤਿ;

ਸੁਖਮਾਹਰਿਤਂ ਤੇਸਂ, ਯੇਸਂ ਰਜ੍ਜਮਕਾਰਯਿਂ.

੮੯. ਏਸਾ ਤੇ ਉਪਮਾ ਰਾਜ, ਤਂ ਸੁਣੋਹਿ ਅਰਿਨ੍ਦਮ [ਅਤ੍ਥਸਨ੍ਦਸ੍ਸਨੀ ਕਤਾ (ਪੀ.)];

ਰਞ੍ਞਾ ਰਟ੍ਠਸ੍ਸ ਯੋਗ੍ਗਸ੍ਸ, ਬਲਸ੍ਸ ਨਿਗਮਸ੍ਸ ਚ;

ਸਬ੍ਬੇਸਂ ਸੁਖਮੇਟ੍ਠਬ੍ਬਂ, ਖਤ੍ਤਿਯੇਨ ਪਜਾਨਤਾਤਿ.

ਮਹਾਕਪਿਜਾਤਕਂ ਦੁਤਿਯਂ.

੪੦੮. ਕੁਮ੍ਭਕਾਰਜਾਤਕਂ (੭-੨-੩)

੯੦. ਅਮ੍ਬਾਹਮਦ੍ਦਂ ਵਨਮਨ੍ਤਰਸ੍ਮਿਂ, ਨੀਲੋਭਾਸਂ ਫਲਿਤਂ [ਫਲਿਨਂ (ਪੀ.)] ਸਂਵਿਰੂਲ਼੍ਹਂ;

ਤਮਦ੍ਦਸਂ ਫਲਹੇਤੁ ਵਿਭਗ੍ਗਂ, ਤਂ ਦਿਸ੍ਵਾ ਭਿਕ੍ਖਾਚਰਿਯਂ ਚਰਾਮਿ.

੯੧. ਸੇਲਂ ਸੁਮਟ੍ਠਂ ਨਰਵੀਰਨਿਟ੍ਠਿਤਂ [ਨਰਵਿਦ੍ਦੁਨਿਟ੍ਠਿਤਂ (ਕ.)], ਨਾਰੀ ਯੁਗਂ ਧਾਰਯਿ ਅਪ੍ਪਸਦ੍ਦਂ;

ਦੁਤਿਯਞ੍ਚ ਆਗਮ੍ਮ ਅਹੋਸਿ ਸਦ੍ਦੋ, ਤਂ ਦਿਸ੍ਵਾ ਭਿਕ੍ਖਾਚਰਿਯਂ ਚਰਾਮਿ.

੯੨. ਦਿਜਾ ਦਿਜਂ ਕੁਣਪਮਾਹਰਨ੍ਤਂ, ਏਕਂ ਸਮਾਨਂ ਬਹੁਕਾ ਸਮੇਚ੍ਚ;

ਆਹਾਰਹੇਤੂ ਪਰਿਪਾਤਯਿਂਸੁ, ਤਂ ਦਿਸ੍ਵਾ ਭਿਕ੍ਖਾਚਰਿਯਂ ਚਰਾਮਿ.

੯੩. ਉਸਭਾਹਮਦ੍ਦਂ ਯੂਥਸ੍ਸ ਮਜ੍ਝੇ, ਚਲਕ੍ਕਕੁਂ ਵਣ੍ਣਬਲੂਪਪਨ੍ਨਂ;

ਤਮਦ੍ਦਸਂ ਕਾਮਹੇਤੁ ਵਿਤੁਨ੍ਨਂ, ਤਂ ਦਿਸ੍ਵਾ ਭਿਕ੍ਖਾਚਰਿਯਂ ਚਰਾਮਿ.

੯੪. ਕਰਣ੍ਡਕੋ [ਕਰਣ੍ਡੁਨਾਮ (ਸੀ. ਪੀ.)] ਕਲਿਙ੍ਗਾਨਂ, ਗਨ੍ਧਾਰਾਨਞ੍ਚ ਨਗ੍ਗਜਿ;

ਨਿਮਿਰਾਜਾ ਵਿਦੇਹਾਨਂ, ਪਞ੍ਚਾਲਾਨਞ੍ਚ ਦੁਮ੍ਮੁਖੋ;

ਏਤੇ ਰਟ੍ਠਾਨਿ ਹਿਤ੍ਵਾਨ, ਪਬ੍ਬਜਿਂਸੁ ਅਕਿਞ੍ਚਨਾ.

੯੫. ਸਬ੍ਬੇਪਿਮੇ ਦੇਵਸਮਾ ਸਮਾਗਤਾ, ਅਗ੍ਗੀ ਯਥਾ ਪਜ੍ਜਲਿਤੋ ਤਥੇਵਿਮੇ;

ਅਹਮ੍ਪਿ ਏਕੋ ਚਰਿਸ੍ਸਾਮਿ ਭਗ੍ਗਵਿ, ਹਿਤ੍ਵਾਨ ਕਾਮਾਨਿ ਯਥੋਧਿਕਾਨਿ.

੯੬. ਅਯਮੇਵ ਕਾਲੋ ਨ ਹਿ ਅਞ੍ਞੋ ਅਤ੍ਥਿ, ਅਨੁਸਾਸਿਤਾ ਮੇ ਨ ਭਵੇਯ੍ਯ ਪਚ੍ਛਾ;

ਅਹਮ੍ਪਿ ਏਕਾ ਚਰਿਸ੍ਸਾਮਿ ਭਗ੍ਗਵ, ਸਕੁਣੀਵ ਮੁਤ੍ਤਾ ਪੁਰਿਸਸ੍ਸ ਹਤ੍ਥਾ.

੯੭. ਆਮਂ ਪਕ੍ਕਞ੍ਚ ਜਾਨਨ੍ਤਿ, ਅਥੋ ਲੋਣਂ ਅਲੋਣਕਂ;

ਤਮਹਂ ਦਿਸ੍ਵਾਨ ਪਬ੍ਬਜਿਂ, ਚਰੇਵ ਤ੍ਵਂ ਚਰਾਮਹਨ੍ਤਿ.

ਕੁਮ੍ਭਕਾਰਜਾਤਕਂ ਤਤਿਯਂ.

੪੦੯. ਦਲ਼੍ਹਧਮ੍ਮਜਾਤਕਂ (੭-੨-੪)

੯੮. ਅਹਂ ਚੇ ਦਲ਼੍ਹਧਮ੍ਮਸ੍ਸ [ਦਲ਼੍ਹਧਮ੍ਮਾਯ (ਪੀ.)], ਵਹਨ੍ਤਿ ਨਾਭਿਰਾਧਯਿਂ;

ਧਰਨ੍ਤੀ ਉਰਸਿ ਸਲ੍ਲਂ, ਯੁਦ੍ਧੇ ਵਿਕ੍ਕਨ੍ਤਚਾਰਿਨੀ.

੯੯. ਨੂਨ ਰਾਜਾ ਨ ਜਾਨਾਤਿ [ਨ ਹ ਨੂਨ ਰਾਜਾ ਜਾਨਾਤਿ (ਸੀ. ਪੀ.)], ਮਮ ਵਿਕ੍ਕਮਪੋਰਿਸਂ;

ਸਙ੍ਗਾਮੇ ਸੁਕਤਨ੍ਤਾਨਿ, ਦੂਤਵਿਪ੍ਪਹਿਤਾਨਿ ਚ.

੧੦੦. ਸਾ ਨੂਨਾਹਂ ਮਰਿਸ੍ਸਾਮਿ, ਅਬਨ੍ਧੁ ਅਪਰਾਯਿਨੀ [ਅਪਰਾਯਿਣੀ (ਸੀ.), ਅਪਰਾਯਣੀ (?)];

ਤਦਾ ਹਿ [ਤਥਾ ਹਿ (ਪੀ.)] ਕੁਮ੍ਭਕਾਰਸ੍ਸ, ਦਿਨ੍ਨਾ ਛਕਣਹਾਰਿਕਾ.

੧੦੧. ਯਾਵਤਾਸੀਸਤੀ ਪੋਸੋ, ਤਾਵਦੇਵ ਪਵੀਣਤਿ;

ਅਤ੍ਥਾਪਾਯੇ ਜਹਨ੍ਤਿ ਨਂ, ਓਟ੍ਠਿਬ੍ਯਾਧਿਂਵ ਖਤ੍ਤਿਯੋ.

੧੦੨. ਯੋ ਪੁਬ੍ਬੇ ਕਤਕਲ੍ਯਾਣੋ, ਕਤਤ੍ਥੋ ਨਾਵਬੁਜ੍ਝਤਿ;

ਅਤ੍ਥਾ ਤਸ੍ਸ ਪਲੁਜ੍ਜਨ੍ਤਿ, ਯੇ ਹੋਨ੍ਤਿ ਅਭਿਪਤ੍ਥਿਤਾ.

੧੦੩. ਯੋ ਪੁਬ੍ਬੇ ਕਤਕਲ੍ਯਾਣੋ, ਕਤਤ੍ਥੋ ਮਨੁਬੁਜ੍ਝਤਿ;

ਅਤ੍ਥਾ ਤਸ੍ਸ ਪਵਡ੍ਢਨ੍ਤਿ, ਯੇ ਹੋਨ੍ਤਿ ਅਭਿਪਤ੍ਥਿਤਾ.

੧੦੪. ਤਂ ਵੋ ਵਦਾਮਿ ਭਦ੍ਦਨ੍ਤੇ [ਭਦ੍ਦਂ ਵੋ (ਸੀ. ਸ੍ਯਾ. ਪੀ.)], ਯਾਵਨ੍ਤੇਤ੍ਥ ਸਮਾਗਤਾ;

ਸਬ੍ਬੇ ਕਤਞ੍ਞੁਨੋ ਹੋਥ, ਚਿਰਂ ਸਗ੍ਗਮ੍ਹਿ ਠਸ੍ਸਥਾਤਿ.

ਦਲ਼੍ਹਧਮ੍ਮਜਾਤਕਂ ਚਤੁਤ੍ਥਂ.

੪੧੦. ਸੋਮਦਤ੍ਤਜਾਤਕਂ (੭-੨-੫)

੧੦੫. ਯੋ ਮਂ ਪੁਰੇ ਪਚ੍ਚੁਡ੍ਡੇਤਿ [ਪਚ੍ਚੁਦੇਤਿ (ਸੀ. ਸ੍ਯਾ. ਪੀ.), ਪਚ੍ਚੁਟ੍ਠੇਤਿ (ਕ.)], ਅਰਞ੍ਞੇ ਦੂਰਮਾਯਤੋ;

ਸੋ ਨ ਦਿਸ੍ਸਤਿ ਮਾਤਙ੍ਗੋ, ਸੋਮਦਤ੍ਤੋ ਕੁਹਿਂ ਗਤੋ.

੧੦੬. ਅਯਂ ਵਾ ਸੋ ਮਤੋ ਸੇਤਿ, ਅਲ੍ਲਸਿਙ੍ਗਂਵ ਵਚ੍ਛਿਤੋ [ਅਲ੍ਲਪਿਙ੍ਕਵ ਛਿਜ੍ਜਿਤੋ (ਸੀ. ਪੀ.), ਅਲ੍ਲਪੀਤਂਵ ਵਿਚ੍ਛਿਤੋ (ਸ੍ਯਾ.)];

ਭੁਮ੍ਯਾ ਨਿਪਤਿਤੋ ਸੇਤਿ, ਅਮਰਾ ਵਤ ਕੁਞ੍ਜਰੋ.

੧੦੭. ਅਨਗਾਰਿਯੁਪੇਤਸ੍ਸ, ਵਿਪ੍ਪਮੁਤ੍ਤਸ੍ਸ ਤੇ ਸਤੋ;

ਸਮਣਸ੍ਸ ਨ ਤਂ ਸਾਧੁ, ਯਂ ਪੇਤਮਨੁਸੋਚਸਿ.

੧੦੮. ਸਂਵਾਸੇਨ ਹਵੇ ਸਕ੍ਕ, ਮਨੁਸ੍ਸਸ੍ਸ ਮਿਗਸ੍ਸ ਵਾ;

ਹਦਯੇ ਜਾਯਤੇ ਪੇਮਂ, ਤਂ ਨ ਸਕ੍ਕਾ ਅਸੋਚਿਤੁਂ.

੧੦੯. ਮਤਂ ਮਰਿਸ੍ਸਂ ਰੋਦਨ੍ਤਿ, ਯੇ ਰੁਦਨ੍ਤਿ ਲਪਨ੍ਤਿ ਚ;

ਤਸ੍ਮਾ ਤ੍ਵਂ ਇਸਿ ਮਾ ਰੋਦਿ, ਰੋਦਿਤਂ ਮੋਘਮਾਹੁ ਸਨ੍ਤੋ.

੧੧੦. ਕਨ੍ਦਿਤੇਨ ਹਵੇ ਬ੍ਰਹ੍ਮੇ, ਮਤੋ ਪੇਤੋ ਸਮੁਟ੍ਠਹੇ;

ਸਬ੍ਬੇ ਸਙ੍ਗਮ੍ਮ ਰੋਦਾਮ, ਅਞ੍ਞਮਞ੍ਞਸ੍ਸ ਞਾਤਕੇ.

੧੧੧. ਆਦਿਤ੍ਤਂ ਵਤ ਮਂ ਸਨ੍ਤਂ, ਘਤਸਿਤ੍ਤਂਵ ਪਾਵਕਂ;

ਵਾਰਿਨਾ ਵਿਯ ਓਸਿਞ੍ਚਂ, ਸਬ੍ਬਂ ਨਿਬ੍ਬਾਪਯੇ ਦਰਂ.

੧੧੨. ਅਬ੍ਬਹੀ ਵਤ ਮੇ ਸਲ੍ਲਂ, ਯਮਾਸਿ ਹਦਯਸ੍ਸਿਤਂ;

ਯੋ ਮੇ ਸੋਕਪਰੇਤਸ੍ਸ, ਪੁਤ੍ਤਸੋਕਂ ਅਪਾਨੁਦਿ.

੧੧੩. ਸੋਹਂ ਅਬ੍ਬੂਲ਼੍ਹਸਲ੍ਲੋਸ੍ਮਿ, ਵੀਤਸੋਕੋ ਅਨਾਵਿਲੋ;

ਨ ਸੋਚਾਮਿ ਨ ਰੋਦਾਮਿ, ਤਵ ਸੁਤ੍ਵਾਨ ਵਾਸਵਾਤਿ.

ਸੋਮਦਤ੍ਤਜਾਤਕਂ ਪਞ੍ਚਮਂ.

੪੧੧. ਸੁਸੀਮਜਾਤਕਂ (੭-੨-੬)

੧੧੪. ਕਾਲ਼ਾਨਿ ਕੇਸਾਨਿ ਪੁਰੇ ਅਹੇਸੁਂ, ਜਾਤਾਨਿ ਸੀਸਮ੍ਹਿ ਯਥਾਪਦੇਸੇ;

ਤਾਨਜ੍ਜ ਸੇਤਾਨਿ ਸੁਸੀਮ [ਸੁਸਿਮ (ਕ.)] ਦਿਸ੍ਵਾ, ਧਮ੍ਮਂ ਚਰ ਬ੍ਰਹ੍ਮਚਰਿਯਸ੍ਸ ਕਾਲੋ.

੧੧੫. ਮਮੇਵ ਦੇਵ ਪਲਿਤਂ ਨ ਤੁਯ੍ਹਂ, ਮਮੇਵ ਸੀਸਂ ਮਮ ਉਤ੍ਤਮਙ੍ਗਂ;

‘‘ਅਤ੍ਥਂ ਕਰਿਸ੍ਸ’’ਨ੍ਤਿ ਮੁਸਾ ਅਭਾਣਿਂ [ਅਭਾਸਿਂ (ਕ.)], ਏਕਾਪਰਾਧਂ ਖਮ ਰਾਜਸੇਟ੍ਠ.

੧੧੬. ਦਹਰੋ ਤੁਵਂ ਦਸ੍ਸਨਿਯੋਸਿ ਰਾਜ, ਪਠਮੁਗ੍ਗਤੋ ਹੋਸਿ [ਹੋਹਿ (ਸੀ.), ਹੋਤਿ (ਕ.)] ਯਥਾ ਕਲ਼ੀਰੋ;

ਰਜ੍ਜਞ੍ਚ ਕਾਰੇਹਿ ਮਮਞ੍ਚ ਪਸ੍ਸ, ਮਾ ਕਾਲਿਕਂ ਅਨੁਧਾਵੀ ਜਨਿਨ੍ਦ.

੧੧੭. ਪਸ੍ਸਾਮਿ ਵੋਹਂ ਦਹਰਿਂ ਕੁਮਾਰਿਂ, ਸਾਮਟ੍ਠਪਸ੍ਸਂ ਸੁਤਨੁਂ ਸੁਮਜ੍ਝਂ;

ਕਾਲ਼ਪ੍ਪਵਾਲ਼ਾਵ ਪਵੇਲ੍ਲਮਾਨਾ, ਪਲੋਭਯਨ੍ਤੀਵ [ਸਾ ਲੋਭਯਨ੍ਤੀਵ (ਪੀ.)] ਨਰੇਸੁ ਗਚ੍ਛਤਿ.

੧੧੮. ਤਮੇਨ ਪਸ੍ਸਾਮਿਪਰੇਨ ਨਾਰਿਂ, ਆਸੀਤਿਕਂ ਨਾਵੁਤਿਕਂ ਵ ਜਚ੍ਚਾ;

ਦਣ੍ਡਂ ਗਹੇਤ੍ਵਾਨ ਪਵੇਧਮਾਨਂ, ਗੋਪਾਨਸੀਭੋਗ੍ਗਸਮਂ ਚਰਨ੍ਤਿਂ.

੧੧੯. ਸੋਹਂ ਤਮੇਵਾਨੁਵਿਚਿਨ੍ਤਯਨ੍ਤੋ, ਏਕੋ ਸਯਾਮਿ [ਪਸ੍ਸਾਮਿ (ਕ.)] ਸਯਨਸ੍ਸ ਮਜ੍ਝੇ;

‘‘ਅਹਮ੍ਪਿ ਏਵਂ’’ ਇਤਿ ਪੇਕ੍ਖਮਾਨੋ, ਨ ਗਹੇ ਰਮੇ [ਨ ਗੇਹੇ ਰਮੇ (ਸੀ.), ਗੇਹੇ ਨ ਰਮੇ (ਸ੍ਯਾ. ਕ.)] ਬ੍ਰਹ੍ਮਚਰਿਯਸ੍ਸ ਕਾਲੋ.

੧੨੦. ਰਜ੍ਜੁਵਾਲਮ੍ਬਨੀ ਚੇਸਾ, ਯਾ ਗੇਹੇ ਵਸਤੋ ਰਤਿ;

ਏਵਮ੍ਪਿ ਛੇਤ੍ਵਾਨ ਵਜਨ੍ਤਿ ਧੀਰਾ, ਅਨਪੇਕ੍ਖਿਨੋ ਕਾਮਸੁਖਂ ਪਹਾਯਾਤਿ.

ਸੁਸੀਮਜਾਤਕਂ ਛਟ੍ਠਂ.

੪੧੨. ਕੋਟਸਿਮ੍ਬਲਿਜਾਤਕਂ (੭-੨-੭)

੧੨੧. ਅਹਂ ਦਸਸਤਂਬ੍ਯਾਮਂ, ਉਰਗਮਾਦਾਯ ਆਗਤੋ;

ਤਞ੍ਚ ਮਞ੍ਚ ਮਹਾਕਾਯਂ, ਧਾਰਯਂ ਨਪ੍ਪਵੇਧਸਿ [ਨ ਪਵੇਧਯਿ (ਕ.)].

੧੨੨. ਅਥਿਮਂ ਖੁਦ੍ਦਕਂ ਪਕ੍ਖਿਂ, ਅਪ੍ਪਮਂਸਤਰਂ ਮਯਾ;

ਧਾਰਯਂ ਬ੍ਯਥਸਿ [ਬ੍ਯਾਧਸੇ (ਸੀ.), ਬ੍ਯਧਸੇ (ਪੀ.), ਬ੍ਯਾਧਸਿ (ਕ.)] ਭੀਤਾ [ਭੀਤੋ (ਸੀ. ਸ੍ਯਾ. ਪੀ.)], ਕਮਤ੍ਥਂ ਕੋਟਸਿਮ੍ਬਲਿ [ਕੋਟਿਸਿਮ੍ਬਲਿ (ਸੀ. ਪੀ.)].

੧੨੩. ਮਂਸਭਕ੍ਖੋ ਤੁਵਂ ਰਾਜ, ਫਲਭਕ੍ਖੋ ਅਯਂ ਦਿਜੋ;

ਅਯਂ ਨਿਗ੍ਰੋਧਬੀਜਾਨਿ, ਪਿਲਕ੍ਖੁਦੁਮ੍ਬਰਾਨਿ ਚ;

ਅਸ੍ਸਤ੍ਥਾਨਿ ਚ ਭਕ੍ਖਿਤ੍ਵਾ, ਖਨ੍ਧੇ ਮੇ ਓਹਦਿਸ੍ਸਤਿ.

੧੨੪. ਤੇ ਰੁਕ੍ਖਾ ਸਂਵਿਰੂਹਨ੍ਤਿ, ਮਮ ਪਸ੍ਸੇ ਨਿਵਾਤਜਾ;

ਤੇ ਮਂ ਪਰਿਯੋਨਨ੍ਧਿਸ੍ਸਨ੍ਤਿ, ਅਰੁਕ੍ਖਂ ਮਂ ਕਰਿਸ੍ਸਰੇ.

੧੨੫. ਸਨ੍ਤਿ ਅਞ੍ਞੇਪਿ ਰੁਕ੍ਖਾ ਸੇ, ਮੂਲਿਨੋ ਖਨ੍ਧਿਨੋ ਦੁਮਾ;

ਇਮਿਨਾ ਸਕੁਣਜਾਤੇਨ, ਬੀਜਮਾਹਰਿਤਾ ਹਤਾ.

੧੨੬. ਅਜ੍ਝਾਰੂਹਾਭਿਵਡ੍ਢਨ੍ਤਿ [ਅਜ੍ਝਾਰੂਲ਼੍ਹਾਭਿਵਡ੍ਢਨ੍ਤਿ (ਸੀ. ਪੀ.)], ਬ੍ਰਹਨ੍ਤਮ੍ਪਿ ਵਨਪ੍ਪਤਿਂ;

ਤਸ੍ਮਾ ਰਾਜ ਪਵੇਧਾਮਿ, ਸਮ੍ਪਸ੍ਸਂਨਾਗਤਂ ਭਯਂ.

੧੨੭. ਸਙ੍ਕੇਯ੍ਯ ਸਙ੍ਕਿਤਬ੍ਬਾਨਿ, ਰਕ੍ਖੇਯ੍ਯਾਨਾਗਤਂ ਭਯਂ;

ਅਨਾਗਤਭਯਾ ਧੀਰੋ, ਉਭੋ ਲੋਕੇ ਅਵੇਕ੍ਖਤੀਤਿ.

ਕੋਟਸਿਮ੍ਬਲਿਜਾਤਕਂ ਸਤ੍ਤਮਂ.

੪੧੩. ਧੂਮਕਾਰਿਜਾਤਕਂ (੭-੨-੮)

੧੨੮. ਰਾਜਾ ਅਪੁਚ੍ਛਿ ਵਿਧੁਰਂ, ਧਮ੍ਮਕਾਮੋ ਯੁਧਿਟ੍ਠਿਲੋ;

ਅਪਿ ਬ੍ਰਾਹ੍ਮਣ ਜਾਨਾਸਿ, ਕੋ ਏਕੋ ਬਹੁ ਸੋਚਤਿ.

੧੨੯. ਬ੍ਰਾਹ੍ਮਣੋ ਅਜਯੂਥੇਨ, ਪਹੂਤੇਧੋ [ਬਹੂਤੇਜੋ (ਪੀ. ਕ.), ਬਹੁਤੇਨ੍ਦੋ (ਸ੍ਯਾ.)] ਵਨੇ ਵਸਂ;

ਧੂਮਂ ਅਕਾਸਿ ਵਾਸੇਟ੍ਠੋ, ਰਤ੍ਤਿਨ੍ਦਿਵਮਤਨ੍ਦਿਤੋ.

੧੩੦. ਤਸ੍ਸ ਤਂ ਧੂਮਗਨ੍ਧੇਨ, ਸਰਭਾ ਮਕਸਡ੍ਡਿਤਾ [ਮਕਸਦ੍ਦਿਤਾ (ਸੀ. ਸ੍ਯਾ.), ਮਕਸਟ੍ਟਿਤਾ (ਪੀ. ਕ.)];

ਵਸ੍ਸਾਵਾਸਂ ਉਪਾਗਚ੍ਛੁਂ, ਧੂਮਕਾਰਿਸ੍ਸ ਸਨ੍ਤਿਕੇ.

੧੩੧. ਸਰਭੇਸੁ ਮਨਂ ਕਤ੍ਵਾ, ਅਜਾ ਸੋ ਨਾਵਬੁਜ੍ਝਥ;

ਆਗਚ੍ਛਨ੍ਤੀ ਵਜਨ੍ਤੀ ਵਾ [ਆਗਚ੍ਛਨ੍ਤਿ ਵਜਨ੍ਤਿ ਵਾ (ਸ੍ਯਾ. ਪੀ.), ਆਗਚ੍ਛਨ੍ਤਿਂ ਵਜਨ੍ਤਿਂ ਵਾ (ਕ.)], ਤਸ੍ਸ ਤਾ ਵਿਨਸੁਂ [ਵਿਨਸ੍ਸੁਂ (ਸੀ.)] ਅਜਾ.

੧੩੨. ਸਰਭਾ ਸਰਦੇ ਕਾਲੇ, ਪਹੀਨਮਕਸੇ ਵਨੇ;

ਪਾਵਿਸੁਂ ਗਿਰਿਦੁਗ੍ਗਾਨਿ, ਨਦੀਨਂ ਪਭਵਾਨਿ ਚ.

੧੩੩. ਸਰਭੇ ਚ ਗਤੇ ਦਿਸ੍ਵਾ, ਅਜਾ ਚ ਵਿਭਵਂ ਗਤਾ [ਅਜੇ ਚ ਵਿਭਵਂ ਗਤੇ (ਕ.)];

ਕਿਸੋ ਚ ਵਿਵਣ੍ਣੋ ਚਾਸਿ, ਪਣ੍ਡੁਰੋਗੀ ਚ ਬ੍ਰਾਹ੍ਮਣੋ.

੧੩੪. ਏਵਂ ਯੋ ਸਂ ਨਿਰਂਕਤ੍ਵਾ, ਆਗਨ੍ਤੁਂ ਕੁਰੁਤੇ ਪਿਯਂ;

ਸੋ ਏਕੋ ਬਹੁ ਸੋਚਤਿ, ਧੂਮਕਾਰੀਵ ਬ੍ਰਾਹ੍ਮਣੋਤਿ.

ਧੂਮਕਾਰਿਜਾਤਕਂ ਅਟ੍ਠਮਂ.

੪੧੪. ਜਾਗਰਜਾਤਕਂ (੭-੨-੯)

੧੩੫. ਕੋਧ ਜਾਗਰਤਂ ਸੁਤ੍ਤੋ, ਕੋਧ ਸੁਤ੍ਤੇਸੁ ਜਾਗਰੋ;

ਕੋ ਮਮੇਤਂ ਵਿਜਾਨਾਤਿ, ਕੋ ਤਂ ਪਟਿਭਣਾਤਿ ਮੇ.

੧੩੬. ਅਹਂ ਜਾਗਰਤਂ ਸੁਤ੍ਤੋ, ਅਹਂ ਸੁਤ੍ਤੇਸੁ ਜਾਗਰੋ;

ਅਹਮੇਤਂ ਵਿਜਾਨਾਮਿ, ਅਹਂ ਪਟਿਭਣਾਮਿ ਤੇ.

੧੩੭. ਕਥਂ ਜਾਗਰਤਂ ਸੁਤ੍ਤੋ, ਕਥਂ ਸੁਤ੍ਤੇਸੁ ਜਾਗਰੋ;

ਕਥਂ ਏਤਂ ਵਿਜਾਨਾਸਿ, ਕਥਂ ਪਟਿਭਣਾਸਿ ਮੇ.

੧੩੮. ਯੇ ਧਮ੍ਮਂ ਨਪ੍ਪਜਾਨਨ੍ਤਿ, ਸਂਯਮੋਤਿ ਦਮੋਤਿ ਚ;

ਤੇਸੁ ਸੁਪ੍ਪਮਾਨੇਸੁ, ਅਹਂ ਜਗ੍ਗਾਮਿ ਦੇਵਤੇ.

੧੩੯. ਯੇਸਂ ਰਾਗੋ ਚ ਦੋਸੋ ਚ, ਅਵਿਜ੍ਜਾ ਚ ਵਿਰਾਜਿਤਾ;

ਤੇਸੁ ਜਾਗਰਮਾਨੇਸੁ, ਅਹਂ ਸੁਤ੍ਤੋਸ੍ਮਿ ਦੇਵਤੇ.

੧੪੦. ਏਵਂ ਜਾਗਰਤਂ ਸੁਤ੍ਤੋ, ਏਵਂ ਸੁਤ੍ਤੇਸੁ ਜਾਗਰੋ;