੪੧੫. ਕੁਮ੍ਮਾਸਪਿਣ੍ਡਿਜਾਤਕਂ (੭-੨-੧੦)

੧੪੨. ਨ ਕਿਰਤ੍ਥਿ ਅਨੋਮਦਸ੍ਸਿਸੁ, ਪਾਰਿਚਰਿਯਾ ਬੁਦ੍ਧੇਸੁ ਅਪ੍ਪਿਕਾ [ਅਪ੍ਪਕਾ (ਕ.)];

ਸੁਕ੍ਖਾਯ ਅਲੋਣਿਕਾਯ ਚ, ਪਸ੍ਸਫਲਂ ਕੁਮ੍ਮਾਸਪਿਣ੍ਡਿਯਾ.

੧੪੩. ਹਤ੍ਥਿਗਵਸ੍ਸਾ ਚਿਮੇ ਬਹੂ [ਹਤ੍ਥਿਗਵਾਸ੍ਸਾ ਚ ਮੇ ਬਹੂ (ਸੀ.), ਹਤ੍ਥੀ ਗਵਾਸ੍ਸਾ ਚਿਮੇ ਬਹੂ (ਸ੍ਯਾ.), ਹਤ੍ਥੀ ਗਵਾਸ੍ਸਾ ਚ ਮੇ ਬਹੂ (ਪੀ.)], ਧਨਧਞ੍ਞਂ ਪਥਵੀ ਚ ਕੇਵਲਾ;

ਨਾਰਿਯੋ ਚਿਮਾ ਅਚ੍ਛਰੂਪਮਾ, ਪਸ੍ਸਫਲਂ ਕੁਮ੍ਮਾਸਪਿਣ੍ਡਿਯਾ.

੧੪੪. ਅਭਿਕ੍ਖਣਂ ਰਾਜਕੁਞ੍ਜਰ, ਗਾਥਾ ਭਾਸਸਿ ਕੋਸਲਾਧਿਪ;

ਪੁਚ੍ਛਾਮਿ ਤਂ ਰਟ੍ਠਵਡ੍ਢਨ, ਬਾਲ਼੍ਹਂ ਪੀਤਿਮਨੋ ਪਭਾਸਸਿ.

੧੪੫. ਇਮਸ੍ਮਿਞ੍ਞੇਵ ਨਗਰੇ, ਕੁਲੇ ਅਞ੍ਞਤਰੇ ਅਹੁਂ;

ਪਰਕਮ੍ਮਕਰੋ ਆਸਿਂ, ਭਤਕੋ ਸੀਲਸਂਵੁਤੋ.

੧੪੬. ਕਮ੍ਮਾਯ ਨਿਕ੍ਖਮਨ੍ਤੋਹਂ, ਚਤੁਰੋ ਸਮਣੇਦ੍ਦਸਂ;

ਆਚਾਰਸੀਲਸਮ੍ਪਨ੍ਨੇ, ਸੀਤਿਭੂਤੇ ਅਨਾਸਵੇ.

੧੪੭. ਤੇਸੁ ਚਿਤ੍ਤਂ ਪਸਾਦੇਤ੍ਵਾ, ਨਿਸੀਦੇਤ੍ਵਾ [ਨਿਸਾਦੇਤ੍ਵਾ (?)] ਪਣ੍ਣਸਨ੍ਥਤੇ;

ਅਦਂ ਬੁਦ੍ਧਾਨ ਕੁਮ੍ਮਾਸਂ, ਪਸਨ੍ਨੋ ਸੇਹਿ ਪਾਣਿਭਿ.

੧੪੮. ਤਸ੍ਸ ਕਮ੍ਮਸ੍ਸ ਕੁਸਲਸ੍ਸ, ਇਦਂ ਮੇ ਏਦਿਸਂ ਫਲਂ;

ਅਨੁਭੋਮਿ ਇਦਂ ਰਜ੍ਜਂ, ਫੀਤਂ ਧਰਣਿਮੁਤ੍ਤਮਂ.

੧੪੯. ਦਦਂ ਭੁਞ੍ਜ ਮਾ ਚ ਪਮਾਦੋ [ਦਦ ਭੁਞ੍ਜ ਚ ਮਾ ਚ ਪਮਾਦੋ (ਸੀ. ਪੀ.)], ਚਕ੍ਕਂ ਵਤ੍ਤਯ ਕੋਸਲਾਧਿਪ;

ਮਾ ਰਾਜ ਅਧਮ੍ਮਿਕੋ ਅਹੁ, ਧਮ੍ਮਂ ਪਾਲਯ ਕੋਸਲਾਧਿਪ.

੧੫੦. ਸੋਹਂ ਤਦੇਵ ਪੁਨਪ੍ਪੁਨਂ, ਵਟੁਮਂ ਆਚਰਿਸ੍ਸਾਮਿ ਸੋਭਨੇ;

ਅਰਿਯਾਚਰਿਤਂ ਸੁਕੋਸਲੇ, ਅਰਹਨ੍ਤੋ ਮੇ ਮਨਾਪਾਵ ਪਸ੍ਸਿਤੁਂ.

੧੫੧. ਦੇਵੀ ਵਿਯ ਅਚ੍ਛਰੂਪਮਾ, ਮਜ੍ਝੇ ਨਾਰਿਗਣਸ੍ਸ ਸੋਭਸਿ;

ਕਿਂ ਕਮ੍ਮਮਕਾਸਿ ਭਦ੍ਦਕਂ, ਕੇਨਾਸਿ ਵਣ੍ਣਵਤੀ ਸੁਕੋਸਲੇ.

੧੫੨. ਅਮ੍ਬਟ੍ਠਕੁਲਸ੍ਸ ਖਤ੍ਤਿਯ, ਦਾਸ੍ਯਾਹਂ ਪਰਪੇਸਿਯਾ ਅਹੁਂ;

ਸਞ੍ਞਤਾ ਚ [ਸਞ੍ਞਤਾ (ਸੀ. ਪੀ.)] ਧਮ੍ਮਜੀਵਿਨੀ, ਸੀਲਵਤੀ ਚ ਅਪਾਪਦਸ੍ਸਨਾ.

੧੫੩. ਉਦ੍ਧਟਭਤ੍ਤਂ ਅਹਂ ਤਦਾ, ਚਰਮਾਨਸ੍ਸ ਅਦਾਸਿ ਭਿਕ੍ਖੁਨੋ;

ਵਿਤ੍ਤਾ ਸੁਮਨਾ ਸਯਂ ਅਹਂ, ਤਸ੍ਸ ਕਮ੍ਮਸ੍ਸ ਫਲਂ ਮਮੇਦਿਸਨ੍ਤਿ.

ਕੁਮ੍ਮਾਸਪਿਣ੍ਡਿਜਾਤਕਂ ਦਸਮਂ.