੪੧੪. ਜਾਗਰਜਾਤਕਂ (੭-੨-੯)

੧੩੫. ਕੋਧ ਜਾਗਰਤਂ ਸੁਤ੍ਤੋ, ਕੋਧ ਸੁਤ੍ਤੇਸੁ ਜਾਗਰੋ;

ਕੋ ਮਮੇਤਂ ਵਿਜਾਨਾਤਿ, ਕੋ ਤਂ ਪਟਿਭਣਾਤਿ ਮੇ.

੧੩੬. ਅਹਂ ਜਾਗਰਤਂ ਸੁਤ੍ਤੋ, ਅਹਂ ਸੁਤ੍ਤੇਸੁ ਜਾਗਰੋ;

ਅਹਮੇਤਂ ਵਿਜਾਨਾਮਿ, ਅਹਂ ਪਟਿਭਣਾਮਿ ਤੇ.

੧੩੭. ਕਥਂ ਜਾਗਰਤਂ ਸੁਤ੍ਤੋ, ਕਥਂ ਸੁਤ੍ਤੇਸੁ ਜਾਗਰੋ;

ਕਥਂ ਏਤਂ ਵਿਜਾਨਾਸਿ, ਕਥਂ ਪਟਿਭਣਾਸਿ ਮੇ.

੧੩੮. ਯੇ ਧਮ੍ਮਂ ਨਪ੍ਪਜਾਨਨ੍ਤਿ, ਸਂਯਮੋਤਿ ਦਮੋਤਿ ਚ;

ਤੇਸੁ ਸੁਪ੍ਪਮਾਨੇਸੁ, ਅਹਂ ਜਗ੍ਗਾਮਿ ਦੇਵਤੇ.

੧੩੯. ਯੇਸਂ ਰਾਗੋ ਚ ਦੋਸੋ ਚ, ਅਵਿਜ੍ਜਾ ਚ ਵਿਰਾਜਿਤਾ;

ਤੇਸੁ ਜਾਗਰਮਾਨੇਸੁ, ਅਹਂ ਸੁਤ੍ਤੋਸ੍ਮਿ ਦੇਵਤੇ.

੧੪੦. ਏਵਂ ਜਾਗਰਤਂ ਸੁਤ੍ਤੋ, ਏਵਂ ਸੁਤ੍ਤੇਸੁ ਜਾਗਰੋ;

ਏਵਮੇਤਂ ਵਿਜਾਨਾਮਿ, ਏਵਂ ਪਟਿਭਣਾਮਿ ਤੇ.

੧੪੧. ਸਾਧੁ ਜਾਗਰਤਂ ਸੁਤ੍ਤੋ, ਸਾਧੁ ਸੁਤ੍ਤੇਸੁ ਜਾਗਰੋ;

ਸਾਧੁਮੇਤਂ ਵਿਜਾਨਾਸਿ, ਸਾਧੁ ਪਟਿਭਣਾਸਿ ਮੇਤਿ.

ਜਾਗਰਜਾਤਕਂ ਨਵਮਂ.