੪੧੩. ਧੂਮਕਾਰਿਜਾਤਕਂ (੭-੨-੮)

੧੨੮. ਰਾਜਾ ਅਪੁਚ੍ਛਿ ਵਿਧੁਰਂ, ਧਮ੍ਮਕਾਮੋ ਯੁਧਿਟ੍ਠਿਲੋ;

ਅਪਿ ਬ੍ਰਾਹ੍ਮਣ ਜਾਨਾਸਿ, ਕੋ ਏਕੋ ਬਹੁ ਸੋਚਤਿ.

੧੨੯. ਬ੍ਰਾਹ੍ਮਣੋ ਅਜਯੂਥੇਨ, ਪਹੂਤੇਧੋ [ਬਹੂਤੇਜੋ (ਪੀ. ਕ.), ਬਹੁਤੇਨ੍ਦੋ (ਸ੍ਯਾ.)] ਵਨੇ ਵਸਂ;

ਧੂਮਂ ਅਕਾਸਿ ਵਾਸੇਟ੍ਠੋ, ਰਤ੍ਤਿਨ੍ਦਿਵਮਤਨ੍ਦਿਤੋ.

੧੩੦. ਤਸ੍ਸ ਤਂ ਧੂਮਗਨ੍ਧੇਨ, ਸਰਭਾ ਮਕਸਡ੍ਡਿਤਾ [ਮਕਸਦ੍ਦਿਤਾ (ਸੀ. ਸ੍ਯਾ.), ਮਕਸਟ੍ਟਿਤਾ (ਪੀ. ਕ.)];

ਵਸ੍ਸਾਵਾਸਂ ਉਪਾਗਚ੍ਛੁਂ, ਧੂਮਕਾਰਿਸ੍ਸ ਸਨ੍ਤਿਕੇ.

੧੩੧. ਸਰਭੇਸੁ ਮਨਂ ਕਤ੍ਵਾ, ਅਜਾ ਸੋ ਨਾਵਬੁਜ੍ਝਥ;

ਆਗਚ੍ਛਨ੍ਤੀ ਵਜਨ੍ਤੀ ਵਾ [ਆਗਚ੍ਛਨ੍ਤਿ ਵਜਨ੍ਤਿ ਵਾ (ਸ੍ਯਾ. ਪੀ.), ਆਗਚ੍ਛਨ੍ਤਿਂ ਵਜਨ੍ਤਿਂ ਵਾ (ਕ.)], ਤਸ੍ਸ ਤਾ ਵਿਨਸੁਂ [ਵਿਨਸ੍ਸੁਂ (ਸੀ.)] ਅਜਾ.

੧੩੨. ਸਰਭਾ ਸਰਦੇ ਕਾਲੇ, ਪਹੀਨਮਕਸੇ ਵਨੇ;

ਪਾਵਿਸੁਂ ਗਿਰਿਦੁਗ੍ਗਾਨਿ, ਨਦੀਨਂ ਪਭਵਾਨਿ ਚ.

੧੩੩. ਸਰਭੇ ਚ ਗਤੇ ਦਿਸ੍ਵਾ, ਅਜਾ ਚ ਵਿਭਵਂ ਗਤਾ [ਅਜੇ ਚ ਵਿਭਵਂ ਗਤੇ (ਕ.)];

ਕਿਸੋ ਚ ਵਿਵਣ੍ਣੋ ਚਾਸਿ, ਪਣ੍ਡੁਰੋਗੀ ਚ ਬ੍ਰਾਹ੍ਮਣੋ.

੧੩੪. ਏਵਂ ਯੋ ਸਂ ਨਿਰਂਕਤ੍ਵਾ, ਆਗਨ੍ਤੁਂ ਕੁਰੁਤੇ ਪਿਯਂ;

ਸੋ ਏਕੋ ਬਹੁ ਸੋਚਤਿ, ਧੂਮਕਾਰੀਵ ਬ੍ਰਾਹ੍ਮਣੋਤਿ.

ਧੂਮਕਾਰਿਜਾਤਕਂ ਅਟ੍ਠਮਂ.