੪੦੬. ਗਨ੍ਧਾਰਜਾਤਕਂ (੭-੨-੧)
੭੬. ਹਿਤ੍ਵਾ ਗਾਮਸਹਸ੍ਸਾਨਿ, ਪਰਿਪੁਣ੍ਣਾਨਿ ਸੋਲ਼ਸ;
ਕੋਟ੍ਠਾਗਾਰਾਨਿ ਫੀਤਾਨਿ, ਸਨ੍ਨਿਧਿਂ ਦਾਨਿ ਕੁਬ੍ਬਸਿ.
੭੭. ਹਿਤ੍ਵਾ ਗਨ੍ਧਾਰਵਿਸਯਂ, ਪਹੂਤਧਨਧਾਰਿਯਂ [ਧਾਨਿਯਂ (ਸੀ. ਪੀ.), ਧਞ੍ਞਨ੍ਤਿ ਅਤ੍ਥੋ];
ਪਸਾਸਨਤੋ [ਪਸਾਸਨਿਤੋ (ਸੀ. ਸ੍ਯਾ.), ਪਸਾਸਨਾਤੋ (ਪੀ.)] ਨਿਕ੍ਖਨ੍ਤੋ, ਇਧ ਦਾਨਿ ਪਸਾਸਸਿ.
੭੮. ਧਮ੍ਮਂ ਭਣਾਮਿ ਵੇਦੇਹ, ਅਧਮ੍ਮੋ ਮੇ ਨ ਰੁਚ੍ਚਤਿ;
ਧਮ੍ਮਂ ਮੇ ਭਣਮਾਨਸ੍ਸ, ਨ ਪਾਪਮੁਪਲਿਮ੍ਪਤਿ.
੭੯. ਯੇਨ ਕੇਨਚਿ ਵਣ੍ਣੇਨ, ਪਰੋ ਲਭਤਿ ਰੁਪ੍ਪਨਂ;
ਮਹਤ੍ਥਿਯਮ੍ਪਿ ਚੇ ਵਾਚਂ, ਨ ਤਂ ਭਾਸੇਯ੍ਯ ਪਣ੍ਡਿਤੋ.
੮੦. ਕਾਮਂ ਰੁਪ੍ਪਤੁ ਵਾ ਮਾ ਵਾ, ਭੁਸਂਵ ਵਿਕਿਰੀਯਤੁ;
ਧਮ੍ਮਂ ਮੇ ਭਣਮਾਨਸ੍ਸ, ਨ ਪਾਪਮੁਪਲਿਮ੍ਪਤਿ.
੮੧. ਨੋ ਚੇ ਅਸ੍ਸ ਸਕਾ ਬੁਦ੍ਧਿ, ਵਿਨਯੋ ਵਾ ਸੁਸਿਕ੍ਖਿਤੋ;
ਵਨੇ ਅਨ੍ਧਮਹਿਂਸੋਵ [ਅਨ੍ਧਮਹਿਸੋਵ (ਸੀ. ਪੀ.)] ਚਰੇਯ੍ਯ ਬਹੁਕੋ ਜਨੋ.
੮੨. ਯਸ੍ਮਾ ਚ ਪਨਿਧੇਕਚ੍ਚੇ, ਆਚੇਰਮ੍ਹਿ [ਆਚਾਰਮ੍ਹਿ (ਸੀ. ਪੀ.)] ਸੁਸਿਕ੍ਖਿਤਾ;
ਤਸ੍ਮਾ ਵਿਨੀਤਵਿਨਯਾ, ਚਰਨ੍ਤਿ ਸੁਸਮਾਹਿਤਾਤਿ.
ਗਨ੍ਧਾਰਜਾਤਕਂ ਪਠਮਂ.