੪੦੭. ਮਹਾਕਪਿਜਾਤਕਂ (੭-੨-੨)
੮੩. ਅਤ੍ਤਾਨਂ ਸਙ੍ਕਮਂ ਕਤ੍ਵਾ, ਯੋ ਸੋਤ੍ਥਿਂ ਸਮਤਾਰਯਿ;
ਕਿਂ ਤ੍ਵਂ ਤੇਸਂ ਕਿਮੇ [ਕਿਮੋ (ਸੀ. ਪੀ.), ਕਿਂ ਮੇ (ਸ੍ਯਾ.)] ਤੁਯ੍ਹਂ, ਹੋਨ੍ਤਿ ਏਤੇ [ਹੇਤੇ (ਸ੍ਯਾ.), ਸੋ ਤੇ (ਕ.)] ਮਹਾਕਪਿ.
੮੪. ਰਾਜਾਹਂ ਇਸ੍ਸਰੋ ਤੇਸਂ, ਯੂਥਸ੍ਸ ਪਰਿਹਾਰਕੋ;
ਤੇਸਂ ਸੋਕਪਰੇਤਾਨਂ, ਭੀਤਾਨਂ ਤੇ ਅਰਿਨ੍ਦਮ.
੮੫. ਉਲ੍ਲਙ੍ਘਯਿਤ੍ਵਾ [ਸ ਲਙ੍ਘਯਿਤ੍ਵਾ (ਪੀ.), ਸੁਲਙ੍ਘਯਿਤ੍ਵਾ (ਕ.)] ਅਤ੍ਤਾਨਂ, ਵਿਸ੍ਸਟ੍ਠਧਨੁਨੋ ਸਤਂ;
ਤਤੋ ਅਪਰਪਾਦੇਸੁ, ਦਲ਼੍ਹਂ ਬਨ੍ਧਂ ਲਤਾਗੁਣਂ.
੮੬. ਛਿਨ੍ਨਬ੍ਭਮਿਵ ਵਾਤੇਨ, ਨੁਣ੍ਣੋ [ਨੁਨ੍ਨੋ (ਸੀ.)] ਰੁਕ੍ਖਂ ਉਪਾਗਮਿਂ;
ਸੋਹਂ ਅਪ੍ਪਭਵਂ ਤਤ੍ਥ, ਸਾਖਂ ਹਤ੍ਥੇਹਿ ਅਗ੍ਗਹਿਂ.
੮੭. ਤਂ ਮਂ ਵਿਯਾਯਤਂ ਸਨ੍ਤਂ, ਸਾਖਾਯ ਚ ਲਤਾਯ ਚ;
ਸਮਨੁਕ੍ਕਮਨ੍ਤਾ ਪਾਦੇਹਿ, ਸੋਤ੍ਥਿਂ ਸਾਖਾਮਿਗਾ ਗਤਾ.
੮੮. ਤਂ ਮਂ ਨ ਤਪਤੇ ਬਨ੍ਧੋ, ਮਤੋ [ਵਧੋ (ਸੀ. ਸ੍ਯਾ. ਪੀ.)] ਮੇ ਨ ਤਪੇਸ੍ਸਤਿ;
ਸੁਖਮਾਹਰਿਤਂ ਤੇਸਂ, ਯੇਸਂ ਰਜ੍ਜਮਕਾਰਯਿਂ.
੮੯. ਏਸਾ ਤੇ ਉਪਮਾ ਰਾਜ, ਤਂ ਸੁਣੋਹਿ ਅਰਿਨ੍ਦਮ [ਅਤ੍ਥਸਨ੍ਦਸ੍ਸਨੀ ਕਤਾ (ਪੀ.)];
ਰਞ੍ਞਾ ਰਟ੍ਠਸ੍ਸ ਯੋਗ੍ਗਸ੍ਸ, ਬਲਸ੍ਸ ਨਿਗਮਸ੍ਸ ਚ;
ਸਬ੍ਬੇਸਂ ਸੁਖਮੇਟ੍ਠਬ੍ਬਂ, ਖਤ੍ਤਿਯੇਨ ਪਜਾਨਤਾਤਿ.
ਮਹਾਕਪਿਜਾਤਕਂ ਦੁਤਿਯਂ.