੪੦੫. ਬਕਜਾਤਕਂ (੭-੧-੧੦)

੬੮. ਦ੍ਵਾਸਤ੍ਤਤਿ ਗੋਤਮ [ਭੋ ਗੋਤਮ (ਕ.)] ਪੁਞ੍ਞਕਮ੍ਮਾ, ਵਸਵਤ੍ਤਿਨੋ ਜਾਤਿਜਰਂ ਅਤੀਤਾ;

ਅਯਮਨ੍ਤਿਮਾ ਵੇਦਗੂ ਬ੍ਰਹ੍ਮਪਤ੍ਤਿ [ਬ੍ਰਹ੍ਮੁਪਪਤ੍ਤਿ (ਸ੍ਯਾ. ਕ.)], ਅਸ੍ਮਾਭਿਜਪ੍ਪਨ੍ਤਿ ਜਨਾ [ਪਜਾ (ਕ.)] ਅਨੇਕਾ.

੬੯. ਅਪ੍ਪਞ੍ਹਿ ਏਤਂ [ਅਪ੍ਪਞ੍ਚ ਹੇਤਂ (ਸ੍ਯਾ.), ਅਪ੍ਪਂਸਿ ਏਤਂ (ਕ.)] ਨ ਹਿ ਦੀਘਮਾਯੁ, ਯਂ ਤ੍ਵਂ ਬਕ ਮਞ੍ਞਸਿ ਦੀਘਮਾਯੁਂ;

ਸਤਂ ਸਹਸ੍ਸਾਨਿ [ਸਹਸ੍ਸਾਨਂ (ਸੀ. ਪੀ. ਸਂ. ਨਿ. ੧.੧੭੫), ਸਹਸ੍ਸਾਨ (ਸ੍ਯਾ. ਕਂ.)] ਨਿਰਬ੍ਬੁਦਾਨਂ, ਆਯੁਂ ਪਜਾਨਾਮਿ ਤਵਾਹ ਬ੍ਰਹ੍ਮੇ.

੭੦. ਅਨਨ੍ਤਦਸ੍ਸੀ ਭਗਵਾਹਮਸ੍ਮਿ, ਜਾਤਿਜ੍ਜਰਂ ਸੋਕਮੁਪਾਤਿਵਤ੍ਤੋ;

ਕਿਂ ਮੇ ਪੁਰਾਣਂ ਵਤਸੀਲਵਤ੍ਤਂ [ਸੀਲਵਨ੍ਤਂ (ਪੀ. ਕ.)], ਆਚਿਕ੍ਖ ਮੇ ਤਂ ਯਮਹਂ ਵਿਜਞ੍ਞਂ.

੭੧. ਯਂ ਤ੍ਵਂ ਅਪਾਯੇਸਿ ਬਹੂ ਮਨੁਸ੍ਸੇ, ਪਿਪਾਸਿਤੇ ਘਮ੍ਮਨਿ ਸਮ੍ਪਰੇਤੇ;

ਤਂ ਤੇ ਪੁਰਾਣਂ ਵਤਸੀਲਵਤ੍ਤਂ, ਸੁਤ੍ਤਪ੍ਪਬੁਦ੍ਧੋਵ ਅਨੁਸ੍ਸਰਾਮਿ.

੭੨. ਯਂ ਏਣਿਕੂਲਸ੍ਮਿ ਜਨਂ ਗਹੀਤਂ, ਅਮੋਚਯੀ ਗਯ੍ਹਕ ਨਿਯ੍ਯਮਾਨਂ;

ਤਂ ਤੇ ਪੁਰਾਣਂ ਵਤਸੀਲਵਤ੍ਤਂ, ਸੁਤ੍ਤਪ੍ਪਬੁਦ੍ਧੋਵ ਅਨੁਸ੍ਸਰਾਮਿ.

੭੩. ਗਙ੍ਗਾਯ ਸੋਤਸ੍ਮਿਂ ਗਹੀਤਨਾਵਂ, ਲੁਦ੍ਦੇਨ ਨਾਗੇਨ ਮਨੁਸ੍ਸਕਪ੍ਪਾ;

ਅਮੋਚਯਿ ਤ੍ਵਂ ਬਲਸਾ ਪਸਯ੍ਹ, ਤਂ ਤੇ ਪੁਰਾਣਂ ਵਤਸੀਲਵਤ੍ਤਂ;

ਸੁਤ੍ਤਪ੍ਪਬੁਦ੍ਧੋਵ ਅਨੁਸ੍ਸਰਾਮਿ.

੭੪. ਕਪ੍ਪੋ ਚ ਤੇ ਬਦ੍ਧਚਰੋ [ਪਤ੍ਥਚਰੋ (ਸ੍ਯਾ.), ਪਟ੍ਠਚਰੋ (ਕ.)] ਅਹੋਸਿ, ਸਮ੍ਬੁਦ੍ਧਿਮਨ੍ਤਂ [ਸਮ੍ਬੁਦ੍ਧਿਵਨ੍ਤਂ (ਸ੍ਯਾ. ਪੀ.), ਸਮ੍ਬੁਦ੍ਧਵਨ੍ਤਂ (ਕ.)] ਵਤਿਨਂ [ਵਤਿਤਂ (ਸ੍ਯਾ.), ਵਤਿਦਂ (ਕ.)] ਅਮਞ੍ਞਂ;

ਤਂ ਤੇ ਪੁਰਾਣਂ ਵਤਸੀਲਵਤ੍ਤਂ, ਸੁਤ੍ਤਪ੍ਪਬੁਦ੍ਧੋਵ ਅਨੁਸ੍ਸਰਾਮਿ.

੭੫. ਅਦ੍ਧਾ ਪਜਾਨਾਸਿ ਮਮੇਤਮਾਯੁਂ, ਅਞ੍ਞਮ੍ਪਿ ਜਾਨਾਸਿ ਤਥਾ ਹਿ ਬੁਦ੍ਧੋ;

ਤਥਾ ਹਿ ਤਾਯਂ [ਤ੍ਯਾਯਂ (ਸਂ. ਨਿ. ੧.੧੭੫)] ਜਲਿਤਾਨੁਭਾਵੋ, ਓਭਾਸਯਂ ਤਿਟ੍ਠਤਿ ਬ੍ਰਹ੍ਮਲੋਕਨ੍ਤਿ.

ਬਕਜਾਤਕਂ ਦਸਮਂ.

ਕੁਕ੍ਕੁਵਗ੍ਗੋ ਪਠਮੋ.

ਤਸ੍ਸੁਦ੍ਦਾਨਂ –

ਵਰਕਣ੍ਣਿਕ ਚਾਪਵਰੋ ਸੁਤਨੋ, ਅਥ ਗਿਜ੍ਝ ਸਰੋਹਿਤਮਚ੍ਛਵਰੋ;

ਪੁਨ ਪਣ੍ਣਕ [ਦਸਣ੍ਣਕ (ਸੀ. ਸ੍ਯਾ. ਪੀ.)] ਸੇਨਕ ਯਾਚਨਕੋ, ਅਥ ਵੇਰਿ ਸਬ੍ਰਹ੍ਮਬਕੇਨ ਦਸਾਤਿ.