੧. ਕੁਕ੍ਕੁਵਗ੍ਗੋ
੩੯੬. ਕੁਕ੍ਕੁਜਾਤਕਂ (੭-੧-੧)
੧. ਦਿਯਡ੍ਢਕੁਕ੍ਕੂ ਉਦਯੇਨ ਕਣ੍ਣਿਕਾ, ਵਿਦਤ੍ਥਿਯੋ ਅਟ੍ਠ ਪਰਿਕ੍ਖਿਪਨ੍ਤਿ ਨਂ;
ਸਾ ਸਿਂਸਪਾ [ਸਸਿਂਸਪਾ (ਸੀ. ਪੀ.), ਸਾ ਸੀਸਪਾ (ਸ੍ਯਾ.), ਯਾ ਸਿਂਸਪਾ (ਕ. ਸੀ. ਨਿਯ੍ਯ)] ਸਾਰਮਯਾ ਅਫੇਗ੍ਗੁਕਾ, ਕੁਹਿਂ ਠਿਤਾ ਉਪ੍ਪਰਿਤੋ [ਉਪਰਿਤੋ (ਸੀ. ਸ੍ਯਾ. ਪੀ.)] ਨ ਧਂਸਤਿ.
੨. ਯਾ ਤਿਂਸਤਿ ਸਾਰਮਯਾ ਅਨੁਜ੍ਜੁਕਾ, ਪਰਿਕਿਰਿਯ [ਪਕਿਰਿਯਾ (ਕ.)] ਗੋਪਾਣਸਿਯੋ ਸਮਂ ਠਿਤਾ [ਸਮਟ੍ਠਿਤਾ (ਸੀ. ਸ੍ਯਾ.)];
ਤਾਹਿ ਸੁਸਙ੍ਗਹਿਤਾ ਬਲਸਾ ਪੀਲ਼ਿਤਾ [ਤਾ ਸਙ੍ਗਹਿਤਾ ਬਲਸਾ ਚ ਪੀਲ਼ਿਤਾ (ਸੀ.), ਤਾਹਿ ਸੁਸਙ੍ਗਹਿਤਾ ਬਲਸਾ ਚ ਪੀਲ਼ਿਤਾ (ਸ੍ਯਾ.), ਤਾਹਿ ਸਙ੍ਗਹੀਤਾ ਬਲਸਾ ਚ ਪੀਲ਼ਿਤਾ (ਪੀ.)], ਸਮਂ ਠਿਤਾ ਉਪ੍ਪਰਿਤੋ ਨ ਧਂਸਤਿ.
੩. ਏਵਮ੍ਪਿ ਮਿਤ੍ਤੇਹਿ ਦਲ਼੍ਹੇਹਿ ਪਣ੍ਡਿਤੋ, ਅਭੇਜ੍ਜਰੂਪੇਹਿ ਸੁਚੀਹਿ ਮਨ੍ਤਿਭਿ;
ਸੁਸਙ੍ਗਹੀਤੋ ਸਿਰਿਯਾ ਨ ਧਂਸਤਿ, ਗੋਪਾਣਸੀ ਭਾਰਵਹਾਵ ਕਣ੍ਣਿਕਾ.
੪. ਖਰਤ੍ਤਚਂ ਬੇਲ੍ਲਂ ਯਥਾਪਿ ਸਤ੍ਥਵਾ, ਅਨਾਮਸਨ੍ਤੋਪਿ ਕਰੋਤਿ ਤਿਤ੍ਤਕਂ;
ਸਮਾਹਰਂ ਸਾਦੁਂ ਕਰੋਤਿ ਪਤ੍ਥਿਵ, ਅਸਾਦੁਂ ਕਯਿਰਾ ਤਨੁਬਨ੍ਧਮੁਦ੍ਧਰਂ [ਤਨੁਵਟ੍ਟਮੁਦ੍ਧਰਂ (ਸੀ. ਪੀ.)].
੫. ਏਵਮ੍ਪਿ ਗਾਮਨਿਗਮੇਸੁ ਪਣ੍ਡਿਤੋ, ਅਸਾਹਸਂ ਰਾਜਧਨਾਨਿ ਸਙ੍ਘਰਂ;
ਧਮ੍ਮਾਨੁਵਤ੍ਤੀ ਪਟਿਪਜ੍ਜਮਾਨੋ, ਸ ਫਾਤਿ ਕਯਿਰਾ ਅਵਿਹੇਠਯਂ ਪਰਂ.
੬. ਓਦਾਤਮੂਲਂ ਸੁਚਿਵਾਰਿਸਮ੍ਭਵਂ, ਜਾਤਂ ਯਥਾ ਪੋਕ੍ਖਰਣੀਸੁ ਅਮ੍ਬੁਜਂ;
ਪਦੁਮਂ ਯਥਾ ਅਗ੍ਗਿਨਿਕਾਸਿਫਾਲਿਮਂ, ਨ ਕਦ੍ਦਮੋ ਨ ਰਜੋ ਨ ਵਾਰਿ ਲਿਮ੍ਪਤਿ.
੭. ਏਵਮ੍ਪਿ ਵੋਹਾਰਸੁਚਿਂ ਅਸਾਹਸਂ, ਵਿਸੁਦ੍ਧਕਮ੍ਮਨ੍ਤਮਪੇਤਪਾਪਕਂ;
ਨ ਲਿਮ੍ਪਤਿ ਕਮ੍ਮਕਿਲੇਸ ਤਾਦਿਸੋ, ਜਾਤਂ ਯਥਾ ਪੋਕ੍ਖਰਣੀਸੁ ਅਮ੍ਬੁਜਨ੍ਤਿ.
ਕੁਕ੍ਕੁਜਾਤਕਂ ਪਠਮਂ.
੩੯੭. ਮਨੋਜਜਾਤਕਂ (੭-੧-੨)
੮. ਯਥਾ ਚਾਪੋ ਨਿਨ੍ਨਮਤਿ, ਜਿਯਾ ਚਾਪਿ ਨਿਕੂਜਤਿ;
ਹਞ੍ਞਤੇ ਨੂਨ ਮਨੋਜੋ, ਮਿਗਰਾਜਾ ਸਖਾ ਮਮ.
੯. ਹਨ੍ਦ ਦਾਨਿ ਵਨਨ੍ਤਾਨਿ, ਪਕ੍ਕਮਾਮਿ ਯਥਾਸੁਖਂ;
ਨੇਤਾਦਿਸਾ ਸਖਾ ਹੋਨ੍ਤਿ, ਲਬ੍ਭਾ ਮੇ ਜੀਵਤੋ ਸਖਾ.
੧੦. ਨ ਪਾਪਜਨਸਂਸੇਵੀ, ਅਚ੍ਚਨ੍ਤਂ ਸੁਖਮੇਧਤਿ;
ਮਨੋਜਂ ਪਸ੍ਸ ਸੇਮਾਨਂ, ਗਿਰਿਯਸ੍ਸਾਨੁਸਾਸਨੀ [ਅਰਿਯਸ੍ਸਾਨੁਸਾਸਨੀ (ਸੀ. ਸ੍ਯਾ. ਪੀ.)].
੧੧. ਨ ਪਾਪਸਮ੍ਪਵਙ੍ਕੇਨ, ਮਾਤਾ ਪੁਤ੍ਤੇਨ ਨਨ੍ਦਤਿ;
ਮਨੋਜਂ ਪਸ੍ਸ ਸੇਮਾਨਂ, ਅਚ੍ਛਨ੍ਨਂ [ਸਚ੍ਛਨ੍ਨਂ (ਕ.)] ਸਮ੍ਹਿ ਲੋਹਿਤੇ.
੧੨. ਏਵਮਾਪਜ੍ਜਤੇ ਪੋਸੋ, ਪਾਪਿਯੋ ਚ ਨਿਗਚ੍ਛਤਿ;
ਯੋ ਵੇ ਹਿਤਾਨਂ ਵਚਨਂ, ਨ ਕਰੋਤਿ ਅਤ੍ਥਦਸ੍ਸਿਨਂ.
੧੩. ਏਵਞ੍ਚ ਸੋ ਹੋਤਿ ਤਤੋ ਚ ਪਾਪਿਯੋ, ਯੋ ਉਤ੍ਤਮੋ ਅਧਮਜਨੂਪਸੇਵੀ;
ਪਸ੍ਸੁਤ੍ਤਮਂ ਅਧਮਜਨੂਪਸੇਵਿਤਂ [ਸੇਵਿਂ (ਸ੍ਯਾ.)], ਮਿਗਾਧਿਪਂ ਸਰਵਰਵੇਗਨਿਦ੍ਧੁਤਂ.
੧੪. ਨਿਹੀਯਤਿ ਪੁਰਿਸੋ ਨਿਹੀਨਸੇਵੀ, ਨ ਚ ਹਾਯੇਥ ਕਦਾਚਿ ਤੁਲ੍ਯਸੇਵੀ;
ਸੇਟ੍ਠਮੁਪਗਮਂ [ਮੁਪਨਮਂ (ਸੀ. ਪੀ. ਅ. ਨਿ. ੩.੨੬)] ਉਦੇਤਿ ਖਿਪ੍ਪਂ, ਤਸ੍ਮਾਤ੍ਤਨਾ ਉਤ੍ਤਰਿਤਰਂ [ਤਸ੍ਮਾ ਅਤ੍ਤਨੋ ਉਤ੍ਤਰਿਂ (ਸੀ. ਪੀ.), ਤਸ੍ਮਾ ਅਤ੍ਤਨੋ ਉਤ੍ਤਰਂ (ਸ੍ਯਾ.)] ਭਜੇਥਾਤਿ.
ਮਨੋਜਜਾਤਕਂ ਦੁਤਿਯਂ.
੩੯੮. ਸੁਤਨੁਜਾਤਕਂ (੭-੧-੩)
੧੫. ਰਾਜਾ ਤੇ ਭਤ੍ਤਂ ਪਾਹੇਸਿ, ਸੁਚਿਂ ਮਂਸੂਪਸੇਚਨਂ;
ਮਘਦੇਵਸ੍ਮਿਂ [ਮਖਾਦੇਵਸ੍ਮਿਂ (ਸੀ. ਪੀ.), ਮਾਘਦੇਵਸ੍ਮਿਂ (ਕ.)] ਅਧਿਵਤ੍ਥੇ, ਏਹਿ ਨਿਕ੍ਖਮ੍ਮ ਭੁਞ੍ਜਸ੍ਸੁ.
੧੬. ਏਹਿ ਮਾਣਵ ਓਰੇਨ, ਭਿਕ੍ਖਮਾਦਾਯ ਸੂਪਿਤਂ;
ਤ੍ਵਞ੍ਚ ਮਾਣਵ ਭਿਕ੍ਖਾ ਚ [ਭਕ੍ਖੋਸਿ (ਸ੍ਯਾ.), ਭਕ੍ਖਾਵ (ਕ.)], ਉਭੋ ਭਕ੍ਖਾ ਭਵਿਸ੍ਸਥ.
੧੭. ਅਪ੍ਪਕੇਨ ਤੁਵਂ ਯਕ੍ਖ, ਥੁਲ੍ਲਮਤ੍ਥਂ ਜਹਿਸ੍ਸਸਿ;
ਭਿਕ੍ਖਂ ਤੇ ਨਾਹਰਿਸ੍ਸਨ੍ਤਿ, ਜਨਾ ਮਰਣਸਞ੍ਞਿਨੋ.
੧੮. ਲਦ੍ਧਾਯ ਯਕ੍ਖਾ [ਲਦ੍ਧਾਯਂ ਯਕ੍ਖ (ਸੀ. ਸ੍ਯਾ. ਪੀ.)] ਤਵ ਨਿਚ੍ਚਭਿਕ੍ਖਂ, ਸੁਚਿਂ ਪਣੀਤਂ ਰਸਸਾ ਉਪੇਤਂ;
ਭਿਕ੍ਖਞ੍ਚ ਤੇ ਆਹਰਿਯੋ ਨਰੋ ਇਧ, ਸੁਦੁਲ੍ਲਭੋ ਹੇਹਿਤਿ ਭਕ੍ਖਿਤੇ [ਖਾਦਿਤੇ (ਸੀ. ਸ੍ਯਾ. ਪੀ.)] ਮਯਿ.
੧੯. ਮਮੇਵ [ਮਮੇਸ (ਸੀ. ਪੀ.)] ਸੁਤਨੋ ਅਤ੍ਥੋ, ਯਥਾ ਭਾਸਸਿ ਮਾਣਵ;
ਮਯਾ ਤ੍ਵਂ ਸਮਨੁਞ੍ਞਾਤੋ, ਸੋਤ੍ਥਿਂ ਪਸ੍ਸਾਹਿ ਮਾਤਰਂ.
੨੦. ਖਗ੍ਗਂ ਛਤ੍ਤਞ੍ਚ ਪਾਤਿਞ੍ਚ, ਗਚ੍ਛਮਾਦਾਯ [ਗਚ੍ਛੇਵਾਦਾਯ (ਸੀ. ਸ੍ਯਾ. ਪੀ.)] ਮਾਣਵ;
ਸੋਤ੍ਥਿਂ ਪਸ੍ਸਤੁ ਤੇ ਮਾਤਾ, ਤ੍ਵਞ੍ਚ ਪਸ੍ਸਾਹਿ ਮਾਤਰਂ.
੨੧. ਏਵਂ ਯਕ੍ਖ ਸੁਖੀ ਹੋਹਿ, ਸਹ ਸਬ੍ਬੇਹਿ ਞਾਤਿਭਿ;
ਧਨਞ੍ਚ ਮੇ ਅਧਿਗਤਂ, ਰਞ੍ਞੋ ਚ ਵਚਨਂ ਕਤਨ੍ਤਿ.
ਸੁਤਨੁਜਾਤਕਂ ਤਤਿਯਂ.
੩੯੯. ਮਾਤੁਪੋਸਕਗਿਜ੍ਝਜਾਤਕਂ (੭-੧-੪)
੨੨. ਤੇ ਕਥਂ ਨੁ ਕਰਿਸ੍ਸਨ੍ਤਿ, ਵੁਦ੍ਧਾ ਗਿਰਿਦਰੀਸਯਾ;
ਅਹਂ ਬਦ੍ਧੋਸ੍ਮਿ ਪਾਸੇਨ, ਨਿਲੀਯਸ੍ਸ ਵਸਂ ਗਤੋ.
੨੩. ਕਿਂ ਗਿਜ੍ਝ ਪਰਿਦੇਵਸਿ, ਕਾ ਨੁ ਤੇ ਪਰਿਦੇਵਨਾ;
ਨ ਮੇ ਸੁਤੋ ਵਾ ਦਿਟ੍ਠੋ ਵਾ, ਭਾਸਨ੍ਤੋ ਮਾਨੁਸਿਂ ਦਿਜੋ.
੨੪. ਭਰਾਮਿ ਮਾਤਾਪਿਤਰੋ, ਵੁਦ੍ਧੇ ਗਿਰਿਦਰੀਸਯੇ;
ਤੇ ਕਥਂ ਨੁ ਕਰਿਸ੍ਸਨ੍ਤਿ, ਅਹਂ ਵਸਂ ਗਤੋ ਤਵ.
੨੫. ਯਂ ਨੁ ਗਿਜ੍ਝੋ ਯੋਜਨਸਤਂ, ਕੁਣਪਾਨਿ ਅਵੇਕ੍ਖਤਿ;
ਕਸ੍ਮਾ ਜਾਲਞ੍ਚ ਪਾਸਞ੍ਚ, ਆਸਜ੍ਜਾਪਿ ਨ ਬੁਜ੍ਝਸਿ.
੨੬. ਯਦਾ ਪਰਾਭਵੋ ਹੋਤਿ, ਪੋਸੋ ਜੀਵਿਤਸਙ੍ਖਯੇ;
ਅਥ ਜਾਲਞ੍ਚ ਪਾਸਞ੍ਚ, ਆਸਜ੍ਜਾਪਿ ਨ ਬੁਜ੍ਝਤਿ.
੨੭. ਭਰਸ੍ਸੁ ਮਾਤਾਪਿਤਰੋ, ਵੁਦ੍ਧੇ ਗਿਰਿਦਰੀਸਯੇ;
ਮਯਾ ਤ੍ਵਂ ਸਮਨੁਞ੍ਞਾਤੋ, ਸੋਤ੍ਥਿਂ ਪਸ੍ਸਾਹਿ ਞਾਤਕੇ.
੨੮. ਏਵਂ ਲੁਦ੍ਦਕ ਨਨ੍ਦਸ੍ਸੁ, ਸਹ ਸਬ੍ਬੇਹਿ ਞਾਤਿਭਿ;
ਭਰਿਸ੍ਸਂ ਮਾਤਾਪਿਤਰੋ, ਵੁਦ੍ਧੇ ਗਿਰਿਦਰੀਸਯੇਤਿ.
ਮਾਤੁਪੋਸਕਗਿਜ੍ਝਜਾਤਕਂ ਚਤੁਤ੍ਥਂ.
੪੦੦. ਦਬ੍ਭਪੁਪ੍ਫਜਾਤਕਂ (੭-੧-੫)
੨੯. ਅਨੁਤੀਰਚਾਰੀ ਭਦ੍ਦਨ੍ਤੇ, ਸਹਾਯਮਨੁਧਾਵ ਮਂ;
ਮਹਾ ਮੇ ਗਹਿਤੋ [ਰੋਹਿਤੋ (ਕ.)] ਮਚ੍ਛੋ, ਸੋ ਮਂ ਹਰਤਿ ਵੇਗਸਾ.
੩੦. ਗਮ੍ਭੀਰਚਾਰੀ ਭਦ੍ਦਨ੍ਤੇ, ਦਲ਼੍ਹਂ ਗਣ੍ਹਾਹਿ ਥਾਮਸਾ;
ਅਹਂ ਤਂ ਉਦ੍ਧਰਿਸ੍ਸਾਮਿ, ਸੁਪਣ੍ਣੋ ਉਰਗਾਮਿਵ [ਉਰਗਮ੍ਮਿਵ (ਸੀ. ਸ੍ਯਾ. ਪੀ.)].
੩੧. ਵਿਵਾਦੋ ਨੋ ਸਮੁਪ੍ਪਨ੍ਨੋ, ਦਬ੍ਭਪੁਪ੍ਫ ਸੁਣੋਹਿ ਮੇ;
ਸਮੇਹਿ ਮੇਧਗਂ [ਮੇਧਕਂ (ਪੀ.)] ਸਮ੍ਮ, ਵਿਵਾਦੋ ਵੂਪਸਮ੍ਮਤਂ.
੩੨. ਧਮ੍ਮਟ੍ਠੋਹਂ ਪੁਰੇ ਆਸਿਂ, ਬਹੂ ਅਡ੍ਡਾ ਮੇ ਤੀਰਿਤਾ [ਬਹੁਅਟ੍ਟਂ ਮੇ ਤੀਰਿਤਂ (ਸੀ.), ਬਹੁਅਟ੍ਟਂਵ ਤੀਰਿਤਂ (ਸ੍ਯਾ.), ਬਹੁ ਅਤ੍ਥਂ ਮੇ ਤੀਰਿਤਂ (ਪੀ.)];
ਸਮੇਮਿ ਮੇਧਗਂ ਸਮ੍ਮ, ਵਿਵਾਦੋ ਵੂਪਸਮ੍ਮਤਂ.
੩੩. ਅਨੁਤੀਰਚਾਰਿ ਨਙ੍ਗੁਟ੍ਠਂ, ਸੀਸਂ ਗਮ੍ਭੀਰਚਾਰਿਨੋ;
ਅਚ੍ਚਾਯਂ [ਅਥਾਯਂ (ਸੀ. ਪੀ.)] ਮਜ੍ਝਿਮੋ ਖਣ੍ਡੋ, ਧਮ੍ਮਟ੍ਠਸ੍ਸ ਭਵਿਸ੍ਸਤਿ.
੩੪. ਚਿਰਮ੍ਪਿ ਭਕ੍ਖੋ ਅਭਵਿਸ੍ਸ, ਸਚੇ ਨ ਵਿਵਦੇਮਸੇ;
ਅਸੀਸਕਂ ਅਨਙ੍ਗੁਟ੍ਠਂ, ਸਿਙ੍ਗਾਲੋ ਹਰਤਿ ਰੋਹਿਤਂ.
੩੫. ਯਥਾਪਿ ਰਾਜਾ ਨਨ੍ਦੇਯ੍ਯ, ਰਜ੍ਜਂ ਲਦ੍ਧਾਨ ਖਤ੍ਤਿਯੋ;
ਏਵਾਹਮਜ੍ਜ ਨਨ੍ਦਾਮਿ, ਦਿਸ੍ਵਾ ਪੁਣ੍ਣਮੁਖਂ ਪਤਿਂ.
੩੬. ਕਥਂ ਨੁ ਥਲਜੋ ਸਨ੍ਤੋ, ਉਦਕੇ ਮਚ੍ਛਂ ਪਰਾਮਸਿ;
ਪੁਟ੍ਠੋ ਮੇ ਸਮ੍ਮ ਅਕ੍ਖਾਹਿ, ਕਥਂ ਅਧਿਗਤਂ ਤਯਾ.
੩੭. ਵਿਵਾਦੇਨ ਕਿਸਾ ਹੋਨ੍ਤਿ, ਵਿਵਾਦੇਨ ਧਨਕ੍ਖਯਾ;
ਜੀਨਾ ਉਦ੍ਦਾ ਵਿਵਾਦੇਨ, ਭੁਞ੍ਜ ਮਾਯਾਵਿ ਰੋਹਿਤਂ.
੩੮. ਏਵਮੇਵ ਮਨੁਸ੍ਸੇਸੁ, ਵਿਵਾਦੋ ਯਤ੍ਥ ਜਾਯਤਿ;
ਧਮ੍ਮਟ੍ਠਂ ਪਟਿਧਾਵਨ੍ਤਿ, ਸੋ ਹਿ ਨੇਸਂ ਵਿਨਾਯਕੋ;
ਧਨਾਪਿ ਤਤ੍ਥ ਜੀਯਨ੍ਤਿ, ਰਾਜਕੋਸੋ ਪਵਡ੍ਢਤੀਤਿ [ਚ ਵਡ੍ਢਤਿ (ਪੀ.)].
ਦਬ੍ਭਪੁਪ੍ਫਜਾਤਕਂ ਪਞ੍ਚਮਂ.
੪੦੧. ਪਣ੍ਣਕਜਾਤਕਂ (੭-੧-੬)
੩੯. ਪਣ੍ਣਕਂ [ਦਸਣ੍ਣਕਂ (ਸੀ. ਸ੍ਯਾ. ਪੀ.)] ਤਿਖਿਣਧਾਰਂ, ਅਸਿਂ ਸਮ੍ਪਨ੍ਨਪਾਯਿਨਂ;
ਪਰਿਸਾਯਂ ਪੁਰਿਸੋ ਗਿਲਤਿ, ਕਿਂ ਦੁਕ੍ਕਰਤਰਂ ਤਤੋ;
ਯਦਞ੍ਞਂ ਦੁਕ੍ਕਰਂ ਠਾਨਂ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ.
੪੦. ਗਿਲੇਯ੍ਯ ਪੁਰਿਸੋ ਲੋਭਾ, ਅਸਿਂ ਸਮ੍ਪਨ੍ਨਪਾਯਿਨਂ;
ਯੋ ਚ ਵਜ੍ਜਾ ਦਦਾਮੀਤਿ, ਤਂ ਦੁਕ੍ਕਰਤਰਂ ਤਤੋ;
ਸਬ੍ਬਞ੍ਞਂ ਸੁਕਰਂ ਠਾਨਂ, ਏਵਂ ਜਾਨਾਹਿ ਮਦ੍ਦਵ [ਮਾਗਧ (ਸੀ. ਸ੍ਯਾ. ਪੀ.)].
੪੧. ਬ੍ਯਾਕਾਸਿ ਆਯੁਰੋ ਪਞ੍ਹਂ, ਅਤ੍ਥਂ [ਅਤ੍ਥ (ਪੀ. ਸੀ. ਨਿਯ੍ਯ)] ਧਮ੍ਮਸ੍ਸ ਕੋਵਿਦੋ;
ਪੁਕ੍ਕੁਸਂ ਦਾਨਿ ਪੁਚ੍ਛਾਮਿ, ਕਿਂ ਦੁਕ੍ਕਰਤਰਂ ਤਤੋ;
ਯਦਞ੍ਞਂ ਦੁਕ੍ਕਰਂ ਠਾਨਂ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ.
੪੨. ਨ ਵਾਚਮੁਪਜੀਵਨ੍ਤਿ, ਅਫਲਂ ਗਿਰਮੁਦੀਰਿਤਂ;
ਯੋ ਚ ਦਤ੍ਵਾ ਅਵਾਕਯਿਰਾ, ਤਂ ਦੁਕ੍ਕਰਤਰਂ ਤਤੋ;
ਸਬ੍ਬਞ੍ਞਂ ਸੁਕਰਂ ਠਾਨਂ, ਏਵਂ ਜਾਨਾਹਿ ਮਦ੍ਦਵ.
੪੩. ਬ੍ਯਾਕਾਸਿ ਪੁਕ੍ਕੁਸੋ ਪਞ੍ਹਂ, ਅਤ੍ਥਂ ਧਮ੍ਮਸ੍ਸ ਕੋਵਿਦੋ;
ਸੇਨਕਂ ਦਾਨਿ ਪੁਚ੍ਛਾਮਿ, ਕਿਂ ਦੁਕ੍ਕਰਤਰਂ ਤਤੋ;
ਯਦਞ੍ਞਂ ਦੁਕ੍ਕਰਂ ਠਾਨਂ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ.
੪੪. ਦਦੇਯ੍ਯ ਪੁਰਿਸੋ ਦਾਨਂ, ਅਪ੍ਪਂ ਵਾ ਯਦਿ ਵਾ ਬਹੁਂ;
ਯੋ ਚ ਦਤ੍ਵਾ ਨਾਨੁਤਪ੍ਪੇ [ਤਪੇ (ਸੀ. ਪੀ.)], ਤਂ ਦੁਕ੍ਕਰਤਰਂ ਤਤੋ;
ਸਬ੍ਬਞ੍ਞਂ ਸੁਕਰਂ ਠਾਨਂ, ਏਵਂ ਜਾਨਾਹਿ ਮਦ੍ਦਵ.
੪੫. ਬ੍ਯਾਕਾਸਿ ਆਯੁਰੋ ਪਞ੍ਹਂ, ਅਥੋ ਪੁਕ੍ਕੁਸਪੋਰਿਸੋ;
ਸਬ੍ਬੇ ਪਞ੍ਹੇ ਅਤਿਭੋਤਿ, ਯਥਾ ਭਾਸਤਿ ਸੇਨਕੋਤਿ.
ਪਣ੍ਣਕ [ਦਸਣ੍ਣਕ (ਸੀ. ਸ੍ਯਾ. ਪੀ.)] ਜਾਤਕਂ ਛਟ੍ਠਂ.
੪੦੨. ਸਤ੍ਤੁਭਸ੍ਤਜਾਤਕਂ (੭-੧-੭)
੪੬. ਵਿਬ੍ਭਨ੍ਤਚਿਤ੍ਤੋ ਕੁਪਿਤਿਨ੍ਦ੍ਰਿਯੋਸਿ, ਨੇਤ੍ਤੇਹਿ ਤੇ ਵਾਰਿਗਣਾ ਸਵਨ੍ਤਿ;
ਕਿਂ ਤੇ ਨਟ੍ਠਂ ਕਿਂ ਪਨ ਪਤ੍ਥਯਾਨੋ, ਇਧਾਗਮਾ ਬ੍ਰਹ੍ਮੇ ਤਦਿਙ੍ਘ [ਬ੍ਰਾਹ੍ਮਣ ਇਙ੍ਘ (ਸੀ. ਸ੍ਯਾ.)] ਬ੍ਰੂਹਿ.
੪੭. ਮਿਯ੍ਯੇਥ ਭਰਿਯਾ ਵਜਤੋ ਮਮਜ੍ਜ, ਅਗਚ੍ਛਤੋ ਮਰਣਮਾਹ ਯਕ੍ਖੋ;
ਏਤੇਨ ਦੁਕ੍ਖੇਨ ਪਵੇਧਿਤੋਸ੍ਮਿ, ਅਕ੍ਖਾਹਿ ਮੇ ਸੇਨਕ ਏਤਮਤ੍ਥਂ.
੪੮. ਬਹੂਨਿ ਠਾਨਾਨਿ ਵਿਚਿਨ੍ਤਯਿਤ੍ਵਾ, ਯਮੇਤ੍ਥ ਵਕ੍ਖਾਮਿ ਤਦੇਵ ਸਚ੍ਚਂ;
ਮਞ੍ਞਾਮਿ ਤੇ ਬ੍ਰਾਹ੍ਮਣ ਸਤ੍ਤੁਭਸ੍ਤਂ, ਅਜਾਨਤੋ ਕਣ੍ਹਸਪ੍ਪੋ ਪਵਿਟ੍ਠੋ.
੪੯. ਆਦਾਯ ਦਣ੍ਡਂ ਪਰਿਸੁਮ੍ਭ ਭਸ੍ਤਂ, ਪਸ੍ਸੇਲ਼ਮੂਗਂ ਉਰਗਂ ਦੁਜਿਵ੍ਹਂ [ਦਿਜਿਵ੍ਹਂ (ਸੀ. ਪੀ.)];
ਛਿਨ੍ਦਜ੍ਜ ਕਙ੍ਖਂ ਵਿਚਿਕਿਚ੍ਛਿਤਾਨਿ, ਭੁਜਙ੍ਗਮਂ ਪਸ੍ਸ ਪਮੁਞ੍ਚ ਭਸ੍ਤਂ.
੫੦. ਸਂਵਿਗ੍ਗਰੂਪੋ ਪਰਿਸਾਯ ਮਜ੍ਝੇ, ਸੋ ਬ੍ਰਾਹ੍ਮਣੋ ਸਤ੍ਤੁਭਸ੍ਤਂ ਪਮੁਞ੍ਚਿ;
ਅਥ ਨਿਕ੍ਖਮਿ ਉਰਗੋ ਉਗ੍ਗਤੇਜੋ, ਆਸੀਵਿਸੋ ਸਪ੍ਪੋ ਫਣਂ ਕਰਿਤ੍ਵਾ.
੫੧. ਸੁਲਦ੍ਧਲਾਭਾ ਜਨਕਸ੍ਸ ਰਞ੍ਞੋ, ਯੋ ਪਸ੍ਸਤੀ ਸੇਨਕਂ ਸਾਧੁਪਞ੍ਞਂ;
ਵਿਵਟ੍ਟਛਦ੍ਦੋ [ਵਿਵਤ੍ਤਚ੍ਛਦ੍ਦੋ (ਸੀ.), ਵਿਵਟ੍ਟਚ੍ਛਦੋ (ਸ੍ਯਾ.), ਵਿਵਟ੍ਟਚ੍ਛਦ੍ਦਾ (ਪੀ.)] ਨੁਸਿ ਸਬ੍ਬਦਸ੍ਸੀ, ਞਾਣਂ ਨੁ ਤੇ ਬ੍ਰਾਹ੍ਮਣ ਭਿਂਸਰੂਪਂ.
੫੨. ਇਮਾਨਿ ਮੇ ਸਤ੍ਤਸਤਾਨਿ ਅਤ੍ਥਿ, ਗਣ੍ਹਾਹਿ ਸਬ੍ਬਾਨਿ ਦਦਾਮਿ ਤੁਯ੍ਹਂ;
ਤਯਾ ਹਿ ਮੇ ਜੀਵਿਤਮਜ੍ਜ ਲਦ੍ਧਂ, ਅਥੋਪਿ ਭਰਿਯਾਯ ਮਕਾਸਿ ਸੋਤ੍ਥਿਂ.
੫੩. ਨ ਪਣ੍ਡਿਤਾ ਵੇਤਨਮਾਦਿਯਨ੍ਤਿ, ਚਿਤ੍ਰਾਹਿ ਗਾਥਾਹਿ ਸੁਭਾਸਿਤਾਹਿ;
ਇਤੋਪਿ ਤੇ ਬ੍ਰਹ੍ਮੇ ਦਦਨ੍ਤੁ ਵਿਤ੍ਤਂ, ਆਦਾਯ ਤ੍ਵਂ ਗਚ੍ਛ ਸਕਂ ਨਿਕੇਤਨ੍ਤਿ.
ਸਤ੍ਤੁਭਸ੍ਤਜਾਤਕਂ [ਸੇਨਕਜਾਤਕਂ (ਸ੍ਯਾ.)] ਸਤ੍ਤਮਂ.
੪੦੩. ਅਟ੍ਠਿਸੇਨਕਜਾਤਕਂ (੭-੧-੮)
੫੪. ਯੇਮੇ ਅਹਂ ਨ ਜਾਨਾਮਿ, ਅਟ੍ਠਿਸੇਨ ਵਨਿਬ੍ਬਕੇ;
ਤੇ ਮਂ ਸਙ੍ਗਮ੍ਮ ਯਾਚਨ੍ਤਿ, ਕਸ੍ਮਾ ਮਂ ਤ੍ਵਂ ਨ ਯਾਚਸਿ.
੫੫. ਯਾਚਕੋ ਅਪ੍ਪਿਯੋ ਹੋਤਿ, ਯਾਚਂ ਅਦਦਮਪ੍ਪਿਯੋ;
ਤਸ੍ਮਾਹਂ ਤਂ ਨ ਯਾਚਾਮਿ, ਮਾ ਮੇ ਵਿਦੇਸ੍ਸਨਾ [ਵਿਦ੍ਦੇਸਨਾ (ਸੀ. ਪੀ.)] ਅਹੁ.
੫੬. ਯੋ ਵੇ ਯਾਚਨਜੀਵਾਨੋ, ਕਾਲੇ ਯਾਚਂ ਨ ਯਾਚਤਿ;
ਪਰਞ੍ਚ ਪੁਞ੍ਞਾ [ਪੁਞ੍ਞਂ (ਸ੍ਯਾ. ਕ.)] ਧਂਸੇਤਿ, ਅਤ੍ਤਨਾਪਿ ਨ ਜੀਵਤਿ.
੫੭. ਯੋ ਚ [ਯੋ ਵੇ (ਕ.)] ਯਾਚਨਜੀਵਾਨੋ, ਕਾਲੇ ਯਾਚਞ੍ਹਿ ਯਾਚਤਿ [ਯਾਚਂਪਿ ਯਾਚਤਿ (ਸ੍ਯਾ.), ਯਾਚਾਨਿ ਯਾਚਤਿ (ਪੀ.), ਯਾਚਤਿ ਯਾਚਨਂ (ਸੀ. ਨਿਯ੍ਯ), ਯਾਚਨਂ ਯਾਚਤਿ (ਕ.)];
ਪਰਞ੍ਚ ਪੁਞ੍ਞਂ ਲਬ੍ਭੇਤਿ, ਅਤ੍ਤਨਾਪਿ ਚ ਜੀਵਤਿ.
੫੮. ਨ ਵੇ ਦੇਸ੍ਸਨ੍ਤਿ [ਨ ਵੇ ਦੁਸ੍ਸਨ੍ਤਿ (ਸ੍ਯਾ.), ਨ ਵੇ ਦਿਸ੍ਸਨ੍ਤਿ (ਪੀ.), ਨ ਵਿਦੇਸ੍ਸਨ੍ਤਿ (ਕ. ਅਟ੍ਠ.)] ਸਪ੍ਪਞ੍ਞਾ, ਦਿਸ੍ਵਾ ਯਾਚਕਮਾਗਤੇ;
ਬ੍ਰਹ੍ਮਚਾਰਿ ਪਿਯੋ ਮੇਸਿ, ਵਦ ਤ੍ਵਂ [ਵਰ ਤਂ (ਸੀ.), ਵਰ ਤ੍ਵਂ (ਪੀ.)] ਭਞ੍ਞਮਿਚ੍ਛਸਿ [ਯਞ੍ਞਮਿਚ੍ਛਸਿ (?)].
੫੯. ਨ ਵੇ ਯਾਚਨ੍ਤਿ ਸਪ੍ਪਞ੍ਞਾ, ਧੀਰੋ ਚ ਵੇਦਿਤੁਮਰਹਤਿ;
ਉਦ੍ਦਿਸ੍ਸ ਅਰਿਯਾ ਤਿਟ੍ਠਨ੍ਤਿ, ਏਸਾ ਅਰਿਯਾਨ ਯਾਚਨਾ.
੬੦. ਦਦਾਮਿ ਤੇ ਬ੍ਰਾਹ੍ਮਣ ਰੋਹਿਣੀਨਂ, ਗਵਂ ਸਹਸ੍ਸਂ ਸਹ ਪੁਙ੍ਗਵੇਨ;
ਅਰਿਯੋ ਹਿ ਅਰਿਯਸ੍ਸ ਕਥਂ ਨ ਦਜ੍ਜਾ, ਸੁਤ੍ਵਾਨ ਗਾਥਾ ਤਵ ਧਮ੍ਮਯੁਤ੍ਤਾਤਿ.
ਅਟ੍ਠਿਸੇਨਕਜਾਤਕਂ ਅਟ੍ਠਮਂ.
੪੦੪. ਕਪਿਜਾਤਕਂ (੭-੧-੯)
੬੧. ਯਤ੍ਥ ਵੇਰੀ ਨਿਵਸਤਿ, ਨ ਵਸੇ ਤਤ੍ਥ ਪਣ੍ਡਿਤੋ;
ਏਕਰਤ੍ਤਂ ਦਿਰਤ੍ਤਂ ਵਾ, ਦੁਕ੍ਖਂ ਵਸਤਿ ਵੇਰਿਸੁ.
੬੨. ਦਿਸੋ ਵੇ ਲਹੁਚਿਤ੍ਤਸ੍ਸ, ਪੋਸਸ੍ਸਾਨੁਵਿਧੀਯਤੋ;
ਏਕਸ੍ਸ ਕਪਿਨੋ ਹੇਤੁ, ਯੂਥਸ੍ਸ ਅਨਯੋ ਕਤੋ.
੬੩. ਬਾਲੋਵ [ਚ (ਸੀ. ਸ੍ਯਾ. ਪੀ.)] ਪਣ੍ਡਿਤਮਾਨੀ, ਯੂਥਸ੍ਸ ਪਰਿਹਾਰਕੋ;