੪੦੪. ਕਪਿਜਾਤਕਂ (੭-੧-੯)

੬੧. ਯਤ੍ਥ ਵੇਰੀ ਨਿਵਸਤਿ, ਨ ਵਸੇ ਤਤ੍ਥ ਪਣ੍ਡਿਤੋ;

ਏਕਰਤ੍ਤਂ ਦਿਰਤ੍ਤਂ ਵਾ, ਦੁਕ੍ਖਂ ਵਸਤਿ ਵੇਰਿਸੁ.

੬੨. ਦਿਸੋ ਵੇ ਲਹੁਚਿਤ੍ਤਸ੍ਸ, ਪੋਸਸ੍ਸਾਨੁਵਿਧੀਯਤੋ;

ਏਕਸ੍ਸ ਕਪਿਨੋ ਹੇਤੁ, ਯੂਥਸ੍ਸ ਅਨਯੋ ਕਤੋ.

੬੩. ਬਾਲੋਵ [ਚ (ਸੀ. ਸ੍ਯਾ. ਪੀ.)] ਪਣ੍ਡਿਤਮਾਨੀ, ਯੂਥਸ੍ਸ ਪਰਿਹਾਰਕੋ;

ਸਚਿਤ੍ਤਸ੍ਸ ਵਸਂ ਗਨ੍ਤ੍ਵਾ, ਸਯੇਥਾਯਂ [ਪਸ੍ਸੇਥਾਯਂ (ਕ.)] ਯਥਾ ਕਪਿ.

੬੪. ਨ ਸਾਧੁ ਬਲਵਾ ਬਾਲੋ, ਯੂਥਸ੍ਸ ਪਰਿਹਾਰਕੋ;

ਅਹਿਤੋ ਭਵਤਿ ਞਾਤੀਨਂ, ਸਕੁਣਾਨਂਵ ਚੇਤਕੋ [ਚੇਟਕੋ (ਕ.)].

੬੫. ਧੀਰੋਵ ਬਲਵਾ ਸਾਧੁ, ਯੂਥਸ੍ਸ ਪਰਿਹਾਰਕੋ;

ਹਿਤੋ ਭਵਤਿ ਞਾਤੀਨਂ, ਤਿਦਸਾਨਂਵ ਵਾਸਵੋ.

੬੬. ਯੋ ਚ ਸੀਲਞ੍ਚ ਪਞ੍ਞਞ੍ਚ, ਸੁਤਞ੍ਚਤ੍ਤਨਿ ਪਸ੍ਸਤਿ;

ਉਭਿਨ੍ਨਮਤ੍ਥਂ ਚਰਤਿ, ਅਤ੍ਤਨੋ ਚ ਪਰਸ੍ਸ ਚ.

੬੭. ਤਸ੍ਮਾ ਤੁਲੇਯ੍ਯ ਮਤ੍ਤਾਨਂ, ਸੀਲਪਞ੍ਞਾਸੁਤਾਮਿਵ [ਸੀਲਂ ਪਞ੍ਞਂ ਸੁਤਂਪਿਵ (ਸ੍ਯਾ.)];

ਗਣਂ ਵਾ ਪਰਿਹਰੇ ਧੀਰੋ, ਏਕੋ ਵਾਪਿ ਪਰਿਬ੍ਬਜੇਤਿ.

ਕਪਿਜਾਤਕਂ ਨਵਮਂ.