੩੮੩. ਕੁਕ੍ਕੁਟਜਾਤਕਂ (੬-੧-੮)

੫੭. ਸੁਚਿਤ੍ਤਪਤ੍ਤਛਦਨ, ਤਮ੍ਬਚੂਲ਼ ਵਿਹਙ੍ਗਮ;

ਓਰੋਹ ਦੁਮਸਾਖਾਯ, ਮੁਧਾ ਭਰਿਯਾ ਭਵਾਮਿ ਤੇ.

੫੮. ਚਤੁਪ੍ਪਦੀ ਤ੍ਵਂ ਕਲ੍ਯਾਣਿ, ਦ੍ਵਿਪਦਾਹਂ ਮਨੋਰਮੇ;

ਮਿਗੀ ਪਕ੍ਖੀ ਅਸਞ੍ਞੁਤ੍ਤਾ, ਅਞ੍ਞਂ ਪਰਿਯੇਸ ਸਾਮਿਕਂ.

੫੯. ਕੋਮਾਰਿਕਾ ਤੇ ਹੇਸ੍ਸਾਮਿ, ਮਞ੍ਜੁਕਾ ਪਿਯਭਾਣਿਨੀ;

ਵਿਨ੍ਦ ਮਂ ਅਰਿਯੇਨ ਵੇਦੇਨ, ਸਾਵਯ ਮਂ ਯਦਿਚ੍ਛਸਿ.

੬੦. ਕੁਣਪਾਦਿਨਿ ਲੋਹਿਤਪੇ, ਚੋਰਿ ਕੁਕ੍ਕੁਟਪੋਥਿਨਿ;

ਨ ਤ੍ਵਂ ਅਰਿਯੇਨ ਵੇਦੇਨ, ਮਮਂ ਭਤ੍ਤਾਰਮਿਚ੍ਛਸਿ.

੬੧. ਏਵਮ੍ਪਿ ਚਤੁਰਾ [ਚਾਤੁਰਾ (ਸ੍ਯਾ. ਕ.)] ਨਾਰੀ, ਦਿਸ੍ਵਾਨ ਸਧਨਂ [ਪਵਰਂ (ਸੀ. ਸ੍ਯਾ. ਪੀ.)] ਨਰਂ;

ਨੇਨ੍ਤਿ ਸਣ੍ਹਾਹਿ ਵਾਚਾਹਿ, ਬਿਲ਼ਾਰੀ ਵਿਯ ਕੁਕ੍ਕੁਟਂ.

੬੨. ਯੋ ਚ ਉਪ੍ਪਤਿਤਂ ਅਤ੍ਥਂ, ਨ ਖਿਪ੍ਪਮਨੁਬੁਜ੍ਝਤਿ;

ਅਮਿਤ੍ਤਵਸਮਨ੍ਵੇਤਿ, ਪਚ੍ਛਾ ਚ ਅਨੁਤਪ੍ਪਤਿ.

੬੩. ਯੋ ਚ ਉਪ੍ਪਤਿਤਂ ਅਤ੍ਥਂ, ਖਿਪ੍ਪਮੇਵ ਨਿਬੋਧਤਿ;

ਮੁਚ੍ਚਤੇ ਸਤ੍ਤੁਸਮ੍ਬਾਧਾ, ਕੁਕ੍ਕੁਟੋਵ ਬਿਲ਼ਾਰਿਯਾਤਿ.

ਕੁਕ੍ਕੁਟਜਾਤਕਂ ਅਟ੍ਠਮਂ.