੩੮੪. ਧਮ੍ਮਧਜਜਾਤਕਂ (੬-੧-੯)

੬੪. ਧਮ੍ਮਂ ਚਰਥ ਞਾਤਯੋ, ਧਮ੍ਮਂ ਚਰਥ ਭਦ੍ਦਂ ਵੋ [ਭਦ੍ਦ ਵੋ (ਕ.)];

ਧਮ੍ਮਚਾਰੀ ਸੁਖਂ ਸੇਤਿ, ਅਸ੍ਮਿਂ ਲੋਕੇ ਪਰਮ੍ਹਿ ਚ.

੬੫. ਭਦ੍ਦਕੋ ਵਤਯਂ ਪਕ੍ਖੀ, ਦਿਜੋ ਪਰਮਧਮ੍ਮਿਕੋ;

ਏਕਪਾਦੇਨ ਤਿਟ੍ਠਨ੍ਤੋ, ਧਮ੍ਮਮੇਵਾਨੁਸਾਸਤਿ.

੬੬. ਨਾਸ੍ਸ ਸੀਲਂ ਵਿਜਾਨਾਥ, ਅਨਞ੍ਞਾਯ ਪਸਂਸਥ;

ਭੁਤ੍ਵਾ ਅਣ੍ਡਞ੍ਚ ਪੋਤਞ੍ਚ [ਛਾਪੇ ਚ (ਸੀ. ਪੀ.)], ਧਮ੍ਮੋ ਧਮ੍ਮੋਤਿ ਭਾਸਤਿ.

੬੭. ਅਞ੍ਞਂ ਭਣਤਿ ਵਾਚਾਯ, ਅਞ੍ਞਂ ਕਾਯੇਨ ਕੁਬ੍ਬਤਿ;

ਵਾਚਾਯ ਨੋ ਚ ਕਾਯੇਨ, ਨ ਤਂ ਧਮ੍ਮਂ ਅਧਿਟ੍ਠਿਤੋ.

੬੮. ਵਾਚਾਯ ਸਖਿਲੋ ਮਨੋਵਿਦੁਗ੍ਗੋ, ਛਨ੍ਨੋ ਕੂਪਸਯੋਵ ਕਣ੍ਹਸਪ੍ਪੋ;

ਧਮ੍ਮਧਜੋ ਗਾਮਨਿਗਮਾਸੁਸਾਧੁ [ਗਾਮਨਿਗਮਾਸੁ ਸਾਧੁਸਮ੍ਮਤੋ (ਸੀ.), ਗਾਮਨਿਗਮਸਾਧੁ (ਪੀ.)], ਦੁਜ੍ਜਾਨੋ ਪੁਰਿਸੇਨ ਬਾਲਿਸੇਨ.

੬੯. ਇਮਂ ਤੁਣ੍ਡੇਹਿ ਪਕ੍ਖੇਹਿ, ਪਾਦਾ ਚਿਮਂ ਵਿਹੇਠਥ [ਵਿਪੋਥਥ (ਪੀ.)];

ਛਵਞ੍ਹਿਮਂ ਵਿਨਾਸੇਥ, ਨਾਯਂ ਸਂਵਾਸਨਾਰਹੋਤਿ.

ਧਮ੍ਮਧਜਜਾਤਕਂ ਨਵਮਂ.