੧. ਅਵਾਰਿਯਵਗ੍ਗੋ

੩੭੬. ਅਵਾਰਿਯਜਾਤਕਂ (੬-੧-੧)

੧. ਮਾਸੁ ਕੁਜ੍ਝ ਭੂਮਿਪਤਿ, ਮਾਸੁ ਕੁਜ੍ਝ ਰਥੇਸਭ;

ਕੁਦ੍ਧਂ ਅਪ੍ਪਟਿਕੁਜ੍ਝਨ੍ਤੋ, ਰਾਜਾ ਰਟ੍ਠਸ੍ਸ ਪੂਜਿਤੋ.

੨. ਗਾਮੇ ਵਾ ਯਦਿ ਵਾਰਞ੍ਞੇ, ਨਿਨ੍ਨੇ ਵਾ ਯਦਿ ਵਾ ਥਲੇ;

ਸਬ੍ਬਤ੍ਥ ਅਨੁਸਾਸਾਮਿ, ਮਾਸੁ ਕੁਜ੍ਝ [ਮਾਸ੍ਸੁ ਕੁਜ੍ਝਿ (ਸੀ. ਪੀ.)] ਰਥੇਸਭ.

੩. ਅਵਾਰਿਯਪਿਤਾ ਨਾਮ, ਅਹੁ ਗਙ੍ਗਾਯ ਨਾਵਿਕੋ;

ਪੁਬ੍ਬੇ ਜਨਂ ਤਾਰੇਤ੍ਵਾਨ, ਪਚ੍ਛਾ ਯਾਚਤਿ ਵੇਤਨਂ;

ਤੇਨਸ੍ਸ ਭਣ੍ਡਨਂ ਹੋਤਿ, ਨ ਚ ਭੋਗੇਹਿ ਵਡ੍ਢਤਿ.

੪. ਅਤਿਣ੍ਣਂਯੇਵ ਯਾਚਸ੍ਸੁ, ਅਪਾਰਂ ਤਾਤ ਨਾਵਿਕ;

ਅਞ੍ਞੋ ਹਿ ਤਿਣ੍ਣਸ੍ਸ ਮਨੋ, ਅਞ੍ਞੋ ਹੋਤਿ ਪਾਰੇਸਿਨੋ [ਤਰੇਸਿਨੋ (ਸੀ. ਪੀ.), ਤਿਰੇਸਿਨੋ (ਸ੍ਯਾ.)].

੫. ਗਾਮੇ ਵਾ ਯਦਿ ਵਾਰਞ੍ਞੇ, ਨਿਨ੍ਨੇ ਵਾ ਯਦਿ ਵਾ ਥਲੇ;

ਸਬ੍ਬਤ੍ਥ ਅਨੁਸਾਸਾਮਿ, ਮਾਸੁ ਕੁਜ੍ਝਿਤ੍ਥ ਨਾਵਿਕ.

੬. ਯਾਯੇਵਾਨੁਸਾਸਨਿਯਾ, ਰਾਜਾ ਗਾਮਵਰਂ ਅਦਾ;

ਤਾਯੇਵਾਨੁਸਾਸਨਿਯਾ, ਨਾਵਿਕੋ ਪਹਰੀ ਮੁਖਂ.

੭. ਭਤ੍ਤਂ ਭਿਨ੍ਨਂ ਹਤਾ ਭਰਿਯਾ, ਗਬ੍ਭੋ ਚ ਪਤਿਤੋ ਛਮਾ;

ਮਿਗੋਵ ਜਾਤਰੂਪੇਨ, ਨ ਤੇਨਤ੍ਥਂ ਅਬਨ੍ਧਿ ਸੂਤਿ [ਅਵਡ੍ਢਿਤੁਨ੍ਤਿ (ਸੀ. ਸ੍ਯਾ.), ਅਵਡ੍ਢਿ ਸੂਤਿ (?)].

ਅਵਾਰਿਯਜਾਤਕਂ ਪਠਮਂ.

੩੭੭. ਸੇਤਕੇਤੁਜਾਤਕਂ (੬-੧-੨)

੮. ਮਾ ਤਾਤ ਕੁਜ੍ਝਿ ਨ ਹਿ ਸਾਧੁ ਕੋਧੋ, ਬਹੁਮ੍ਪਿ ਤੇ ਅਦਿਟ੍ਠਮਸ੍ਸੁਤਞ੍ਚ;

ਮਾਤਾ ਪਿਤਾ ਦਿਸਤਾ [ਦਿਸਾ ਤਾਤ (ਸ੍ਯਾ.), ਦਿਸਾ ਤਾ (ਪੀ.)] ਸੇਤਕੇਤੁ, ਆਚਰਿਯਮਾਹੁ ਦਿਸਤਂ ਪਸਤ੍ਥਾ.

੯. ਅਗਾਰਿਨੋ ਅਨ੍ਨਦਪਾਨਵਤ੍ਥਦਾ [ਅਨ੍ਨਪਾਨਵਤ੍ਥਦਾ (ਸ੍ਯਾ. ਕ.)], ਅਵ੍ਹਾਯਿਕਾ ਤਮ੍ਪਿ ਦਿਸਂ ਵਦਨ੍ਤਿ;

ਏਸਾ ਦਿਸਾ ਪਰਮਾ ਸੇਤਕੇਤੁ, ਯਂ ਪਤ੍ਵਾ ਦੁਕ੍ਖੀ ਸੁਖਿਨੋ ਭਵਨ੍ਤਿ.

੧੦. ਖਰਾਜਿਨਾ ਜਟਿਲਾ ਪਙ੍ਕਦਨ੍ਤਾ, ਦੁਮ੍ਮਕ੍ਖਰੂਪਾ [ਦੁਮੁਕ੍ਖਰੂਪਾ (ਸੀ. ਸ੍ਯਾ.), ਦੁਮ੍ਮੁਕ੍ਖਰੂਪਾ (ਪੀ. ਕ.)] ਯੇਮੇ ਜਪ੍ਪਨ੍ਤਿ ਮਨ੍ਤੇ;

ਕਚ੍ਚਿ ਨੁ ਤੇ ਮਾਨੁਸਕੇ ਪਯੋਗੇ, ਇਦਂ ਵਿਦੂ ਪਰਿਮੁਤ੍ਤਾ ਅਪਾਯਾ.

੧੧. ਪਾਪਾਨਿ ਕਮ੍ਮਾਨਿ ਕਤ੍ਵਾਨ ਰਾਜ, ਬਹੁਸ੍ਸੁਤੋ ਚੇ ਨ [ਬਹੁਸ੍ਸੁਤੋ ਨੇਵ (ਸੀ. ਸ੍ਯਾ.)] ਚਰੇਯ੍ਯ ਧਮ੍ਮਂ;

ਸਹਸ੍ਸਵੇਦੋਪਿ ਨ ਤਂ ਪਟਿਚ੍ਚ, ਦੁਕ੍ਖਾ ਪਮੁਞ੍ਚੇ ਚਰਣਂ ਅਪਤ੍ਵਾ.

੧੨. ਸਹਸ੍ਸਵੇਦੋਪਿ ਨ ਤਂ ਪਟਿਚ੍ਚ, ਦੁਕ੍ਖਾ ਪਮੁਞ੍ਚੇ ਚਰਣਂ ਅਪਤ੍ਵਾ;

ਮਞ੍ਞਾਮਿ ਵੇਦਾ ਅਫਲਾ ਭਵਨ੍ਤਿ, ਸਸਂਯਮਂ ਚਰਣਮੇਵ [ਚਰਣਞ੍ਞੇਵ (ਸੀ. ਸ੍ਯਾ. ਪੀ.)] ਸਚ੍ਚਂ.

੧੩. ਨ ਹੇਵ ਵੇਦਾ ਅਫਲਾ ਭਵਨ੍ਤਿ, ਸਸਂਯਮਂ ਚਰਣਮੇਵ ਸਚ੍ਚਂ;

ਕਿਤ੍ਤਿਞ੍ਹਿ ਪਪ੍ਪੋਤਿ ਅਧਿਚ੍ਚ ਵੇਦੇ, ਸਨ੍ਤਿਂ ਪੁਣੇਤਿ [ਸਨ੍ਤਂ ਪੁਨੇ’ਤਿ (ਸੀ. ਪੀ.)] ਚਰਣੇਨ ਦਨ੍ਤੋਤਿ.

ਸੇਤਕੇਤੁਜਾਤਕਂ ਦੁਤਿਯਂ.

੩੭੮. ਦਰੀਮੁਖਜਾਤਕਂ (੬-੧-੩)

੧੪. ਪਙ੍ਕੋ ਚ ਕਾਮਾ ਪਲਿਪੋ ਚ ਕਾਮਾ, ਭਯਞ੍ਚ ਮੇਤਂ ਤਿਮੂਲਂ ਪਵੁਤ੍ਤਂ;

ਰਜੋ ਚ ਧੂਮੋ ਚ ਮਯਾ ਪਕਾਸਿਤਾ, ਹਿਤ੍ਵਾ ਤੁਵਂ ਪਬ੍ਬਜ ਬ੍ਰਹ੍ਮਦਤ੍ਤ.

੧੫. ਗਧਿਤੋ [ਗਥਿਤੋ (ਸੀ.)] ਚ ਰਤ੍ਤੋ ਚ ਅਧਿਮੁਚ੍ਛਿਤੋ ਚ, ਕਾਮੇਸ੍ਵਹਂ ਬ੍ਰਾਹ੍ਮਣ ਭਿਂਸਰੂਪਂ;

ਤਂ ਨੁਸ੍ਸਹੇ ਜੀਵਿਕਤ੍ਥੋ ਪਹਾਤੁਂ, ਕਾਹਾਮਿ ਪੁਞ੍ਞਾਨਿ ਅਨਪ੍ਪਕਾਨਿ.

੧੬. ਯੋ ਅਤ੍ਥਕਾਮਸ੍ਸ ਹਿਤਾਨੁਕਮ੍ਪਿਨੋ, ਓਵਜ੍ਜਮਾਨੋ ਨ ਕਰੋਤਿ ਸਾਸਨਂ;

ਇਦਮੇਵ ਸੇਯ੍ਯੋ ਇਤਿ ਮਞ੍ਞਮਾਨੋ, ਪੁਨਪ੍ਪੁਨਂ ਗਬ੍ਭਮੁਪੇਤਿ ਮਨ੍ਦੋ.

੧੭. ਸੋ ਘੋਰਰੂਪਂ ਨਿਰਯਂ ਉਪੇਤਿ, ਸੁਭਾਸੁਭਂ ਮੁਤ੍ਤਕਰੀਸਪੂਰਂ;

ਸਤ੍ਤਾ ਸਕਾਯੇ ਨ ਜਹਨ੍ਤਿ ਗਿਦ੍ਧਾ, ਯੇ ਹੋਨ੍ਤਿ ਕਾਮੇਸੁ ਅਵੀਤਰਾਗਾ.

੧੮. ਮੀਲ਼੍ਹੇਨ ਲਿਤ੍ਤਾ ਰੁਹਿਰੇਨ ਮਕ੍ਖਿਤਾ, ਸੇਮ੍ਹੇਨ ਲਿਤ੍ਤਾ ਉਪਨਿਕ੍ਖਮਨ੍ਤਿ;

ਯਂ ਯਞ੍ਹਿ ਕਾਯੇਨ ਫੁਸਨ੍ਤਿ ਤਾਵਦੇ, ਸਬ੍ਬਂ ਅਸਾਤਂ ਦੁਖਮੇਵ ਕੇਵਲਂ.

੧੯. ਦਿਸ੍ਵਾ ਵਦਾਮਿ ਨ ਹਿ ਅਞ੍ਞਤੋ ਸਵਂ, ਪੁਬ੍ਬੇਨਿਵਾਸਂ ਬਹੁਕਂ ਸਰਾਮਿ;

ਚਿਤ੍ਰਾਹਿ ਗਾਥਾਹਿ ਸੁਭਾਸਿਤਾਹਿ, ਦਰੀਮੁਖੋ ਨਿਜ੍ਝਾਪਯਿ ਸੁਮੇਧਨ੍ਤਿ.

ਦਰੀਮੁਖਜਾਤਕਂ ਤਤਿਯਂ.

੩੭੯. ਨੇਰੁਜਾਤਕਂ (੬-੧-੪)

੨੦. ਕਾਕੋਲਾ ਕਾਕਸਙ੍ਘਾ ਚ, ਮਯਞ੍ਚ ਪਤਤਂ ਵਰਾ [ਵਰ (ਕ.) ਮਯਨ੍ਤਿਪਦਸ੍ਸ ਹਿ ਵਿਸੇਸਨਂ];

ਸਬ੍ਬੇਵ ਸਦਿਸਾ ਹੋਮ, ਇਮਂ ਆਗਮ੍ਮ ਪਬ੍ਬਤਂ.

੨੧. ਇਧ ਸੀਹਾ ਚ ਬ੍ਯਗ੍ਘਾ ਚ, ਸਿਙ੍ਗਾਲਾ ਚ ਮਿਗਾਧਮਾ;

ਸਬ੍ਬੇਵ ਸਦਿਸਾ ਹੋਨ੍ਤਿ, ਅਯਂ ਕੋ ਨਾਮ ਪਬ੍ਬਤੋ.

੨੨. ਇਮਂ ਨੇਰੂਤਿ [ਨੇਰੁਨ੍ਤਿ (ਸੀ. ਸ੍ਯਾ.)] ਜਾਨਨ੍ਤਿ, ਮਨੁਸ੍ਸਾ ਪਬ੍ਬਤੁਤ੍ਤਮਂ;

ਇਧ ਵਣ੍ਣੇਨ ਸਮ੍ਪਨ੍ਨਾ, ਵਸਨ੍ਤਿ ਸਬ੍ਬਪਾਣਿਨੋ.

੨੩. ਅਮਾਨਨਾ ਯਤ੍ਥ ਸਿਯਾ, ਸਨ੍ਤਾਨਂ ਵਾ ਵਿਮਾਨਨਾ;

ਹੀਨਸਮ੍ਮਾਨਨਾ ਵਾਪਿ, ਨ ਤਤ੍ਥ ਵਸਤਿਂ ਵਸੇ [ਵਸਤੀ ਵਸੇ (ਸ੍ਯਾ.), ਵਸ ਦਿਵਸੇ (ਪੀ.)].

੨੪. ਯਤ੍ਥਾਲਸੋ ਚ ਦਕ੍ਖੋ ਚ, ਸੂਰੋ ਭੀਰੁ ਚ ਪੂਜਿਯਾ;

ਨ ਤਤ੍ਥ ਸਨ੍ਤੋ ਵਸਨ੍ਤਿ, ਅਵਿਸੇਸਕਰੇ ਨਰੇ [ਨਗੇ (ਸੀ. ਸ੍ਯਾ. ਪੀ.)].

੨੫. ਨਾਯਂ ਨੇਰੁ ਵਿਭਜਤਿ, ਹੀਨਉਕ੍ਕਟ੍ਠਮਜ੍ਝਿਮੇ;

ਅਵਿਸੇਸਕਰੋ ਨੇਰੁ, ਹਨ੍ਦ ਨੇਰੁਂ ਜਹਾਮਸੇਤਿ.

ਨੇਰੁਜਾਤਕਂ ਚਤੁਤ੍ਥਂ.

੩੮੦. ਆਸਙ੍ਕਜਾਤਕਂ (੬-੧-੫)

੨੬. ਆਸਾਵਤੀ ਨਾਮ ਲਤਾ, ਜਾਤਾ ਚਿਤ੍ਤਲਤਾਵਨੇ;

ਤਸ੍ਸਾ ਵਸ੍ਸਸਹਸ੍ਸੇਨ, ਏਕਂ ਨਿਬ੍ਬਤ੍ਤਤੇ ਫਲਂ.

੨੭. ਤਂ ਦੇਵਾ ਪਯਿਰੁਪਾਸਨ੍ਤਿ, ਤਾਵ ਦੂਰਫਲਂ ਸਤਿਂ;

ਆਸੀਸੇਵ [ਆਸਿਂਸੇਵ (ਸੀ. ਸ੍ਯਾ. ਪੀ.)] ਤੁਵਂ ਰਾਜ, ਆਸਾ ਫਲਵਤੀ ਸੁਖਾ.

੨੮. ਆਸੀਸਤੇਵ [ਆਸਿਂਸੇਥੇਵ (ਸੀ. ਸ੍ਯਾ. ਪੀ.)] ਸੋ ਪਕ੍ਖੀ, ਆਸੀਸਤੇਵ [ਆਸਿਂਸੇਥੇਵ (ਸੀ. ਸ੍ਯਾ. ਪੀ.)] ਸੋ ਦਿਜੋ;

ਤਸ੍ਸ ਚਾਸਾ [ਤਸ੍ਸੇਵਾਸਾ (ਸ੍ਯਾ.)] ਸਮਿਜ੍ਝਤਿ, ਤਾਵ ਦੂਰਗਤਾ ਸਤੀ;

ਆਸੀਸੇਵ ਤੁਵਂ ਰਾਜ, ਆਸਾ ਫਲਵਤੀ ਸੁਖਾ.

੨੯. ਸਮ੍ਪੇਸਿ ਖੋ ਮਂ ਵਾਚਾਯ, ਨ ਚ ਸਮ੍ਪੇਸਿ [ਸਂਸੇਸਿ (ਕ.)] ਕਮ੍ਮੁਨਾ;

ਮਾਲਾ ਸੇਰੇਯ੍ਯਕਸ੍ਸੇਵ, ਵਣ੍ਣਵਨ੍ਤਾ ਅਗਨ੍ਧਿਕਾ.

੩੦. ਅਫਲਂ ਮਧੁਰਂ ਵਾਚਂ, ਯੋ ਮਿਤ੍ਤੇਸੁ ਪਕੁਬ੍ਬਤਿ;

ਅਦਦਂ ਅਵਿਸ੍ਸਜਂ ਭੋਗਂ, ਸਨ੍ਧਿ ਤੇਨਸ੍ਸ ਜੀਰਤਿ.

੩੧. ਯਞ੍ਹਿ ਕਯਿਰਾ ਤਞ੍ਹਿ ਵਦੇ, ਯਂ ਨ ਕਯਿਰਾ ਨ ਤਂ ਵਦੇ;

ਅਕਰੋਨ੍ਤਂ ਭਾਸਮਾਨਂ, ਪਰਿਜਾਨਨ੍ਤਿ ਪਣ੍ਡਿਤਾ.

੩੨. ਬਲਞ੍ਚ ਵਤ ਮੇ ਖੀਣਂ, ਪਾਥੇਯ੍ਯਞ੍ਚ ਨ ਵਿਜ੍ਜਤਿ;

ਸਙ੍ਕੇ ਪਾਣੂਪਰੋਧਾਯ, ਹਨ੍ਦ ਦਾਨਿ ਵਜਾਮਹਂ.

੩੩. ਏਤਦੇਵ ਹਿ ਮੇ ਨਾਮਂ, ਯਂ ਨਾਮਸ੍ਮਿ ਰਥੇਸਭ;

ਆਗਮੇਹਿ ਮਹਾਰਾਜ, ਪਿਤਰਂ ਆਮਨ੍ਤਯਾਮਹਨ੍ਤਿ.

ਆਸਙ੍ਕਜਾਤਕਂ ਪਞ੍ਚਮਂ.

੩੮੧. ਮਿਗਾਲੋਪਜਾਤਕਂ (੬-੧-੬)

੩੪. ਨ ਮੇ ਰੁਚ੍ਚਿ ਮਿਗਾਲੋਪ, ਯਸ੍ਸ ਤੇ ਤਾਦਿਸੀ ਗਤੀ;

ਅਤੁਚ੍ਚਂ ਤਾਤ ਪਤਸਿ, ਅਭੂਮਿਂ ਤਾਤ ਸੇਵਸਿ.

੩੫. ਚਤੁਕ੍ਕਣ੍ਣਂਵ ਕੇਦਾਰਂ, ਯਦਾ ਤੇ ਪਥਵੀ ਸਿਯਾ;

ਤਤੋ ਤਾਤ ਨਿਵਤ੍ਤਸ੍ਸੁ, ਮਾਸ੍ਸੁ ਏਤ੍ਤੋ ਪਰਂ ਗਮਿ.

੩੬. ਸਨ੍ਤਿ ਅਞ੍ਞੇਪਿ ਸਕੁਣਾ, ਪਤ੍ਤਯਾਨਾ ਵਿਹਙ੍ਗਮਾ;

ਅਕ੍ਖਿਤ੍ਤਾ ਵਾਤਵੇਗੇਨ, ਨਟ੍ਠਾ ਤੇ ਸਸ੍ਸਤੀਸਮਾ.

੩੭. ਅਕਤ੍ਵਾ ਅਪਨਨ੍ਦਸ੍ਸ [ਅਪਰਣ੍ਣਸ੍ਸ (ਸੀ. ਸ੍ਯਾ. ਪੀ.)], ਪਿਤੁ ਵੁਦ੍ਧਸ੍ਸ ਸਾਸਨਂ;

ਕਾਲਵਾਤੇ ਅਤਿਕ੍ਕਮ੍ਮ, ਵੇਰਮ੍ਭਾਨਂ ਵਸਂ ਅਗਾ [ਗਤੋ (ਸੀ.)].

੩੮. ਤਸ੍ਸ ਪੁਤ੍ਤਾ ਚ ਦਾਰਾ ਚ, ਯੇ ਚਞ੍ਞੇ ਅਨੁਜੀਵਿਨੋ;

ਸਬ੍ਬੇ ਬ੍ਯਸਨਮਾਪਾਦੁਂ, ਅਨੋਵਾਦਕਰੇ ਦਿਜੇ.

੩੯. ਏਵਮ੍ਪਿ ਇਧ ਵੁਦ੍ਧਾਨਂ, ਯੋ ਵਾਕ੍ਯਂ ਨਾਵਬੁਜ੍ਝਤਿ;

ਅਤਿਸੀਮਚਰੋ [ਅਤਿਸੀਮਂ ਚਰੋ (ਸੀ. ਸ੍ਯਾ. ਕ.)] ਦਿਤ੍ਤੋ, ਗਿਜ੍ਝੋਵਾਤੀਤਸਾਸਨੋ;

ਸਬ੍ਬੇ ਬ੍ਯਸਨਂ ਪਪ੍ਪੋਨ੍ਤਿ, ਅਕਤ੍ਵਾ ਬੁਦ੍ਧਸਾਸਨਨ੍ਤਿ.

ਮਿਗਾਲੋਪਜਾਤਕਂ ਛਟ੍ਠਂ.

੩੮੨. ਸਿਰਿਕਾਲ਼ਕਣ੍ਣਿਜਾਤਕਂ (੬-੧-੭)

੪੦. ਕਾ ਨੁ ਕਾਲ਼ੇਨ ਵਣ੍ਣੇਨ, ਨ ਚਾਪਿ [ਨ ਚਾਸਿ (ਸੀ.)] ਪਿਯਦਸ੍ਸਨਾ;

ਕਾ ਵਾ ਤ੍ਵਂ ਕਸ੍ਸ ਵਾ ਧੀਤਾ, ਕਥਂ ਜਾਨੇਮੁ ਤਂ ਮਯਂ.

੪੧. ਮਹਾਰਾਜਸ੍ਸਹਂ ਧੀਤਾ, ਵਿਰੂਪਕ੍ਖਸ੍ਸ ਚਣ੍ਡਿਯਾ;

ਅਹਂ ਕਾਲ਼ੀ ਅਲਕ੍ਖਿਕਾ, ਕਾਲ਼ਕਣ੍ਣੀਤਿ ਮਂ ਵਿਦੂ;

ਓਕਾਸਂ ਯਾਚਿਤੋ ਦੇਹਿ, ਵਸੇਮੁ ਤਵ ਸਨ੍ਤਿਕੇ.

੪੨. ਕਿਂਸੀਲੇ ਕਿਂਸਮਾਚਾਰੇ, ਪੁਰਿਸੇ ਨਿਵਿਸਸੇ ਤੁਵਂ;

ਪੁਟ੍ਠਾ ਮੇ ਕਾਲ਼ਿ ਅਕ੍ਖਾਹਿ, ਕਥਂ [ਯਥਾ (ਸੀ. ਪੀ.)] ਜਾਨੇਮੁ ਤਂ ਮਯਂ.

੪੩. ਮਕ੍ਖੀ ਪਲ਼ਾਸੀ ਸਾਰਮ੍ਭੀ, ਇਸ੍ਸੁਕੀ ਮਚ੍ਛਰੀ ਸਠੋ;

ਸੋ ਮਯ੍ਹਂ ਪੁਰਿਸੋ ਕਨ੍ਤੋ, ਲਦ੍ਧਂ ਯਸ੍ਸ ਵਿਨਸ੍ਸਤਿ.

੪੪. ਕੋਧਨੋ ਉਪਨਾਹੀ ਚ, ਪਿਸੁਣੋ ਚ ਵਿਭੇਦਕੋ;

ਕਣ੍ਡਕਵਾਚੋ [ਅਣ੍ਡਕਵਾਚੋ (ਕ. ਸੀ. ਪੀ.)] ਫਰੁਸੋ, ਸੋ ਮੇ ਕਨ੍ਤਤਰੋ ਤਤੋ.

੪੫. ਅਜ੍ਜ ਸੁਵੇਤਿ ਪੁਰਿਸੋ, ਸਦਤ੍ਥਂ ਨਾਵਬੁਜ੍ਝਤਿ;

ਓਵਜ੍ਜਮਾਨੋ ਕੁਪ੍ਪਤਿ, ਸੇਯ੍ਯਂ ਸੋ ਅਤਿਮਞ੍ਞਤਿ.

੪੬. ਦਵਪ੍ਪਲੁਦ੍ਧੋ [ਦੇਵਪ੍ਪਲੁਦ੍ਧੋ (ਕ.), ਦਵਪ੍ਪਲਦ੍ਧੋ (ਪੀ.)] ਪੁਰਿਸੋ, ਸਬ੍ਬਮਿਤ੍ਤੇਹਿ ਧਂਸਤਿ;

ਸੋ ਮਯ੍ਹਂ ਪੁਰਿਸੋ ਕਨ੍ਤੋ, ਤਸ੍ਮਿਂ ਹੋਮਿ ਅਨਾਮਯਾ.

੪੭. ਅਪੇਹਿ ਏਤ੍ਤੋ ਤ੍ਵਂ ਕਾਲ਼ਿ, ਨੇਤਂ ਅਮ੍ਹੇਸੁ ਵਿਜ੍ਜਤਿ;

ਅਞ੍ਞਂ ਜਨਪਦਂ ਗਚ੍ਛ, ਨਿਗਮੇ ਰਾਜਧਾਨਿਯੋ.

੪੮. ਅਹਮ੍ਪਿ ਖੋ ਤਂ [ਚੇਤਂ (ਸੀ.)] ਜਾਨਾਮਿ, ਨੇਤਂ ਤੁਮ੍ਹੇਸੁ ਵਿਜ੍ਜਤਿ;

ਸਨ੍ਤਿ ਲੋਕੇ ਅਲਕ੍ਖਿਕਾ, ਸਙ੍ਘਰਨ੍ਤਿ ਬਹੁਂ ਧਨਂ;

ਅਹਂ ਦੇਵੋ ਚ ਮੇ ਭਾਤਾ, ਉਭੋ ਨਂ ਵਿਧਮਾਮਸੇ.

੪੯. ਕਾ ਨੁ ਦਿਬ੍ਬੇਨ ਵਣ੍ਣੇਨ, ਪਥਬ੍ਯਾ ਸੁਪਤਿਟ੍ਠਿਤਾ;

ਕਾ ਵਾ ਤ੍ਵਂ ਕਸ੍ਸ ਵਾ ਧੀਤਾ, ਕਥਂ ਜਾਨੇਮੁ ਤਂ ਮਯਂ.

੫੦. ਮਹਾਰਾਜਸ੍ਸਹਂ ਧੀਤਾ, ਧਤਰਟ੍ਠਸ੍ਸ ਸਿਰੀਮਤੋ [ਧਤਰਟ੍ਠਸਿਰੀਮਤੋ (ਸ੍ਯਾ. ਕ.)];

ਅਹਂ ਸਿਰੀ ਚ ਲਕ੍ਖੀ ਚ, ਭੂਰਿਪਞ੍ਞਾਤਿ ਮਂ ਵਿਦੂ;

ਓਕਾਸਂ ਯਾਚਿਤੋ ਦੇਹਿ, ਵਸੇਮੁ ਤਵ ਸਨ੍ਤਿਕੇ.

੫੧. ਕਿਂਸੀਲੇ ਕਿਂਸਮਾਚਾਰੇ, ਪੁਰਿਸੇ ਨਿਵਿਸਸੇ ਤੁਵਂ;

ਪੁਟ੍ਠਾ ਮੇ ਲਕ੍ਖਿ ਅਕ੍ਖਾਹਿ, ਕਥਂ [ਯਥਾ (ਸੀ. ਪੀ.)] ਜਾਨੇਮੁ ਤਂ ਮਯਂ.

੫੨. ਯੋ ਚਾਪਿ ਸੀਤੇ ਅਥਵਾਪਿ ਉਣ੍ਹੇ, ਵਾਤਾਤਪੇ ਡਂਸਸਰੀਸਪੇ ਚ;

ਖੁਧਂ [ਖੁਦ੍ਦਂ (ਸ੍ਯਾ. ਕ.), ਖੁਦਂ (ਪੀ.)] ਪਿਪਾਸਂ ਅਭਿਭੁਯ੍ਯ ਸਬ੍ਬਂ, ਰਤ੍ਤਿਨ੍ਤਿਵਂ ਯੋ ਸਤਤਂ ਨਿਯੁਤ੍ਤੋ;

ਕਾਲਾਗਤਞ੍ਚ ਨ ਹਾਪੇਤਿ ਅਤ੍ਥਂ, ਸੋ ਮੇ ਮਨਾਪੋ ਨਿਵਿਸੇ ਚ ਤਮ੍ਹਿ.

੫੩. ਅਕ੍ਕੋਧਨੋ ਮਿਤ੍ਤਵਾ ਚਾਗਵਾ ਚ, ਸੀਲੂਪਪਨ੍ਨੋ ਅਸਠੋਜੁਭੂਤੋ [ਅਸਠੋ ਉਜ੍ਜੁਭੂਤੋ (ਪੀ.)];

ਸਙ੍ਗਾਹਕੋ ਸਖਿਲੋ ਸਣ੍ਹਵਾਚੋ, ਮਹਤ੍ਤਪਤ੍ਤੋਪਿ ਨਿਵਾਤਵੁਤ੍ਤਿ;

ਤਸ੍ਮਿਂਹਂ [ਤਸ੍ਮਾਹਂ (ਸੀ. ਪੀ.)] ਪੋਸੇ ਵਿਪੁਲਾ ਭਵਾਮਿ, ਊਮਿ ਸਮੁਦ੍ਦਸ੍ਸ ਯਥਾਪਿ ਵਣ੍ਣਂ.

੫੪. ਯੋ ਚਾਪਿ ਮਿਤ੍ਤੇ ਅਥਵਾ ਅਮਿਤ੍ਤੇ, ਸੇਟ੍ਠੇ ਸਰਿਕ੍ਖੇ ਅਥ ਵਾਪਿ ਹੀਨੇ;

ਅਤ੍ਥਂ ਚਰਨ੍ਤਂ ਅਥਵਾ ਅਨਤ੍ਥਂ, ਆਵੀ ਰਹੋ ਸਙ੍ਗਹਮੇਵ ਵਤ੍ਤੇ [ਵਤ੍ਤੋ (ਸ੍ਯਾ. ਕ.)].

ਵਾਚਂ ਨ ਵਜ੍ਜਾ ਫਰੁਸਂ ਕਦਾਚਿ, ਮਤਸ੍ਸ ਜੀਵਸ੍ਸ ਚ ਤਸ੍ਸ ਹੋਮਿ.

੫੫. ਏਤੇਸਂ ਯੋ ਅਞ੍ਞਤਰਂ ਲਭਿਤ੍ਵਾ, ਕਨ੍ਤਾ ਸਿਰੀ [ਕਨ੍ਤਸਿਰਿਂ (ਕਤ੍ਥਚਿ), ਕਨ੍ਤਂ ਸਿਰਿਂ (ਸ੍ਯਾ.) ਅਟ੍ਠਕਥਾਯਂ ਦੁਤਿਯਤਤਿਯਪਾਠਨ੍ਤਰਾਨਿ] ਮਜ੍ਜਤਿ ਅਪ੍ਪਪਞ੍ਞੋ;

ਤਂ ਦਿਤ੍ਤਰੂਪਂ ਵਿਸਮਂ ਚਰਨ੍ਤਂ, ਕਰੀਸਠਾਨਂਵ [ਕਰੀਸਜਾਤਂ ਵ (ਸੀ. ਸ੍ਯਾ.)] ਵਿਵਜ੍ਜਯਾਮਿ.

੫੬. ਅਤ੍ਤਨਾ ਕੁਰੁਤੇ ਲਕ੍ਖਿਂ, ਅਲਕ੍ਖਿਂ ਕੁਰੁਤਤ੍ਤਨਾ;

ਨ ਹਿ ਲਕ੍ਖਿਂ ਅਲਕ੍ਖਿਂ ਵਾ, ਅਞ੍ਞੋ ਅਞ੍ਞਸ੍ਸ ਕਾਰਕੋਤਿ.

ਸਿਰਿਕਾਲ਼ਕਣ੍ਣਿਜਾਤਕਂ ਸਤ੍ਤਮਂ.

੩੮੩. ਕੁਕ੍ਕੁਟਜਾਤਕਂ (੬-੧-੮)

੫੭. ਸੁਚਿਤ੍ਤਪਤ੍ਤਛਦਨ, ਤਮ੍ਬਚੂਲ਼ ਵਿਹਙ੍ਗਮ;

ਓਰੋਹ ਦੁਮਸਾਖਾਯ, ਮੁਧਾ ਭਰਿਯਾ ਭਵਾਮਿ ਤੇ.

੫੮. ਚਤੁਪ੍ਪਦੀ ਤ੍ਵਂ ਕਲ੍ਯਾਣਿ, ਦ੍ਵਿਪਦਾਹਂ ਮਨੋਰਮੇ;

ਮਿਗੀ ਪਕ੍ਖੀ ਅਸਞ੍ਞੁਤ੍ਤਾ, ਅਞ੍ਞਂ ਪਰਿਯੇਸ ਸਾਮਿਕਂ.

੫੯. ਕੋਮਾਰਿਕਾ ਤੇ ਹੇਸ੍ਸਾਮਿ, ਮਞ੍ਜੁਕਾ ਪਿਯਭਾਣਿਨੀ;

ਵਿਨ੍ਦ ਮਂ ਅਰਿਯੇਨ ਵੇਦੇਨ, ਸਾਵਯ ਮਂ ਯਦਿਚ੍ਛਸਿ.

੬੦. ਕੁਣਪਾਦਿਨਿ ਲੋਹਿਤਪੇ, ਚੋਰਿ ਕੁਕ੍ਕੁਟਪੋਥਿਨਿ;

ਨ ਤ੍ਵਂ ਅਰਿਯੇਨ ਵੇਦੇਨ, ਮਮਂ ਭਤ੍ਤਾਰਮਿਚ੍ਛਸਿ.

੬੧. ਏਵਮ੍ਪਿ ਚਤੁਰਾ [ਚਾਤੁਰਾ (ਸ੍ਯਾ. ਕ.)] ਨਾਰੀ, ਦਿਸ੍ਵਾਨ ਸਧਨਂ [ਪਵਰਂ (ਸੀ. ਸ੍ਯਾ. ਪੀ.)] ਨਰਂ;

ਨੇਨ੍ਤਿ ਸਣ੍ਹਾਹਿ ਵਾਚਾਹਿ, ਬਿਲ਼ਾਰੀ ਵਿਯ ਕੁਕ੍ਕੁਟਂ.

੬੨. ਯੋ ਚ ਉਪ੍ਪਤਿਤਂ ਅਤ੍ਥਂ, ਨ ਖਿਪ੍ਪਮਨੁਬੁਜ੍ਝਤਿ;

ਅਮਿਤ੍ਤਵਸਮਨ੍ਵੇਤਿ, ਪਚ੍ਛਾ ਚ ਅਨੁਤਪ੍ਪਤਿ.

੬੩. ਯੋ ਚ ਉਪ੍ਪਤਿਤਂ ਅਤ੍ਥਂ, ਖਿਪ੍ਪਮੇਵ ਨਿਬੋਧਤਿ;