੨. ਵਣ੍ਣਾਰੋਹਵਗ੍ਗੋ

੩੬੧. ਵਣ੍ਣਾਰੋਹਜਾਤਕਂ (੫-੨-੧)

੬੦. ਵਣ੍ਣਾਰੋਹੇਨ ਜਾਤਿਯਾ, ਬਲਨਿਕ੍ਕਮਨੇਨ ਚ;

ਸੁਬਾਹੁ ਨ ਮਯਾ ਸੇਯ੍ਯੋ, ਸੁਦਾਠ ਇਤਿ ਭਾਸਸਿ.

੬੧. ਵਣ੍ਣਾਰੋਹੇਨ ਜਾਤਿਯਾ, ਬਲਨਿਕ੍ਕਮਨੇਨ ਚ;

ਸੁਦਾਠੋ ਨ ਮਯਾ ਸੇਯ੍ਯੋ, ਸੁਬਾਹੁ ਇਤਿ ਭਾਸਸਿ.

੬੨. ਏਵਂ ਚੇ ਮਂ ਵਿਹਰਨ੍ਤਂ, ਸੁਬਾਹੁ ਸਮ੍ਮ ਦੁਬ੍ਭਸਿ;

ਨ ਦਾਨਾਹਂ ਤਯਾ ਸਦ੍ਧਿਂ, ਸਂਵਾਸਮਭਿਰੋਚਯੇ.

੬੩. ਯੋ ਪਰੇਸਂ ਵਚਨਾਨਿ, ਸਦ੍ਦਹੇਯ੍ਯ [ਸਦ੍ਦਹੇਥ (ਸੀ. ਸ੍ਯਾ. ਪੀ.)] ਯਥਾਤਥਂ;

ਖਿਪ੍ਪਂ ਭਿਜ੍ਜੇਥ ਮਿਤ੍ਤਸ੍ਮਿਂ, ਵੇਰਞ੍ਚ ਪਸਵੇ ਬਹੁਂ.

੬੪. ਨ ਸੋ ਮਿਤ੍ਤੋ ਯੋ ਸਦਾ ਅਪ੍ਪਮਤ੍ਤੋ, ਭੇਦਾਸਙ੍ਕੀ ਰਨ੍ਧਮੇਵਾਨੁਪਸ੍ਸੀ;

ਯਸ੍ਮਿਞ੍ਚ ਸੇਤੀ ਉਰਸੀਵ ਪੁਤ੍ਤੋ, ਸ ਵੇ ਮਿਤ੍ਤੋ ਯੋ ਅਭੇਜ੍ਜੋ ਪਰੇਹੀਤਿ.

ਵਣ੍ਣਾਰੋਹਜਾਤਕਂ ਪਠਮਂ.

੩੬੨. ਸੀਲਵੀਮਂਸਜਾਤਕਂ (੫-੨-੨)

੬੫. ਸੀਲਂ ਸੇਯ੍ਯੋ ਸੁਤਂ ਸੇਯ੍ਯੋ, ਇਤਿ ਮੇ ਸਂਸਯੋ ਅਹੁ;

ਸੀਲਮੇਵ ਸੁਤਾ ਸੇਯ੍ਯੋ, ਇਤਿ ਮੇ ਨਤ੍ਥਿ ਸਂਸਯੋ.

੬੬. ਮੋਘਾ ਜਾਤਿ ਚ ਵਣ੍ਣੋ ਚ, ਸੀਲਮੇਵ ਕਿਰੁਤ੍ਤਮਂ;

ਸੀਲੇਨ ਅਨੁਪੇਤਸ੍ਸ, ਸੁਤੇਨਤ੍ਥੋ ਨ ਵਿਜ੍ਜਤਿ.

੬੭. ਖਤ੍ਤਿਯੋ ਚ ਅਧਮ੍ਮਟ੍ਠੋ, ਵੇਸ੍ਸੋ ਚਾਧਮ੍ਮਨਿਸ੍ਸਿਤੋ;

ਤੇ ਪਰਿਚ੍ਚਜ੍ਜੁਭੋ ਲੋਕੇ, ਉਪਪਜ੍ਜਨ੍ਤਿ ਦੁਗ੍ਗਤਿਂ.

੬੮. ਖਤ੍ਤਿਯਾ ਬ੍ਰਾਹ੍ਮਣਾ ਵੇਸ੍ਸਾ, ਸੁਦ੍ਦਾ ਚਣ੍ਡਾਲਪੁਕ੍ਕੁਸਾ;

ਇਧ ਧਮ੍ਮਂ ਚਰਿਤ੍ਵਾਨ, ਭਵਨ੍ਤਿ ਤਿਦਿਵੇ ਸਮਾ.

੬੯. ਨ ਵੇਦਾ ਸਮ੍ਪਰਾਯਾਯ, ਨ ਜਾਤਿ ਨਾਪਿ [ਨੋਪਿ (ਪੀ.)] ਬਨ੍ਧਵਾ;

ਸਕਞ੍ਚ ਸੀਲਂ ਸਂਸੁਦ੍ਧਂ, ਸਮ੍ਪਰਾਯਾਯ ਸੁਖਾਯ ਚਾਤਿ [ਸੁਖਾਵਹਨ੍ਤਿ (ਸੀ. ਸ੍ਯਾ.)].

ਸੀਲਵੀਮਂਸਜਾਤਕਂ ਦੁਤਿਯਂ.

੩੬੩. ਹਿਰਿਜਾਤਕਂ (੫-੨-੩)

੭੦. ਹਿਰਿਂ ਤਰਨ੍ਤਂ ਵਿਜਿਗੁਚ੍ਛਮਾਨਂ, ਤਵਾਹਮਸ੍ਮੀ ਇਤਿ ਭਾਸਮਾਨਂ;

ਸੇਯ੍ਯਾਨਿ ਕਮ੍ਮਾਨਿ ਅਨਾਦਿਯਨ੍ਤਂ, ਨੇਸੋ ਮਮਨ੍ਤਿ ਇਤਿ ਨਂ ਵਿਜਞ੍ਞਾ.

੭੧. ਯਞ੍ਹਿ ਕਯਿਰਾ ਤਞ੍ਹਿ ਵਦੇ, ਯਂ ਨ ਕਯਿਰਾ ਨ ਤਂ ਵਦੇ;

ਅਕਰੋਨ੍ਤਂ ਭਾਸਮਾਨਂ, ਪਰਿਜਾਨਨ੍ਤਿ ਪਣ੍ਡਿਤਾ.

੭੨. ਨ ਸੋ ਮਿਤ੍ਤੋ ਯੋ ਸਦਾ ਅਪ੍ਪਮਤ੍ਤੋ, ਭੇਦਾਸਙ੍ਕੀ ਰਨ੍ਧਮੇਵਾਨੁਪਸ੍ਸੀ;

ਯਸ੍ਮਿਞ੍ਚ ਸੇਤੀ ਉਰਸੀਵ ਪੁਤ੍ਤੋ, ਸ ਵੇ ਮਿਤ੍ਤੋ ਯੋ ਅਭੇਜ੍ਜੋ ਪਰੇਹਿ.

੭੩. ਪਾਮੋਜ੍ਜਕਰਣਂ ਠਾਨਂ, ਪਸਂਸਾਵਹਨਂ ਸੁਖਂ;

ਫਲਾਨਿਸਂਸੋ ਭਾਵੇਤਿ, ਵਹਨ੍ਤੋ ਪੋਰਿਸਂ ਧੁਰਂ.

੭੪. ਪਵਿਵੇਕਰਸਂ ਪਿਤ੍ਵਾ, ਰਸਂ ਉਪਸਮਸ੍ਸ ਚ;

ਨਿਦ੍ਦਰੋ ਹੋਤਿ ਨਿਪ੍ਪਾਪੋ, ਧਮ੍ਮਪ੍ਪੀਤਿਰਸਂ ਪਿਵਨ੍ਤਿ.

ਹਿਰਿਜਾਤਕਂ ਤਤਿਯਂ.

੩੬੪. ਖਜ੍ਜੋਪਨਕਜਾਤਕਂ (੫-੨-੪)

੭੫. ਕੋ ਨੁ ਸਨ੍ਤਮ੍ਹਿ ਪਜ੍ਜੋਤੇ, ਅਗ੍ਗਿਪਰਿਯੇਸਨਂ ਚਰਂ;

ਅਦ੍ਦਕ੍ਖਿ ਰਤ੍ਤਿ [ਰਤ੍ਤਿਂ (ਸ੍ਯਾ.)] ਖਜ੍ਜੋਤਂ, ਜਾਤਵੇਦਂ ਅਮਞ੍ਞਥ.

੭੬. ਸ੍ਵਸ੍ਸ ਗੋਮਯਚੁਣ੍ਣਾਨਿ, ਅਭਿਮਤ੍ਥਂ ਤਿਣਾਨਿ ਚ;

ਵਿਪਰੀਤਾਯ ਸਞ੍ਞਾਯ, ਨਾਸਕ੍ਖਿ ਪਜ੍ਜਲੇਤਵੇ.

੭੭. ਏਵਮ੍ਪਿ ਅਨੁਪਾਯੇਨ, ਅਤ੍ਥਂ ਨ ਲਭਤੇ ਮਿਗੋ [ਮੂਗੋ (ਸ੍ਯਾ.)];

ਵਿਸਾਣਤੋ ਗਵਂ ਦੋਹਂ, ਯਤ੍ਥ ਖੀਰਂ ਨ ਵਿਨ੍ਦਤਿ.

੭੮. ਵਿਵਿਧੇਹਿ ਉਪਾਯੇਹਿ, ਅਤ੍ਥਂ ਪਪ੍ਪੋਨ੍ਤਿ ਮਾਣਵਾ;

ਨਿਗ੍ਗਹੇਨ ਅਮਿਤ੍ਤਾਨਂ, ਮਿਤ੍ਤਾਨਂ ਪਗ੍ਗਹੇਨ ਚ.

੭੯. ਸੇਨਾਮੋਕ੍ਖਪਲਾਭੇਨ [ਸੇਨੀ ਮੋਕ੍ਖੂਪਲਾਭੇਨ (ਸ੍ਯਾ.)], ਵਲ੍ਲਭਾਨਂ ਨਯੇਨ ਚ;

ਜਗਤਿਂ ਜਗਤਿਪਾਲਾ, ਆਵਸਨ੍ਤਿ ਵਸੁਨ੍ਧਰਨ੍ਤਿ.

ਖਜ੍ਜੋਪਨਕਜਾਤਕਂ ਚਤੁਤ੍ਥਂ.

੩੬੫. ਅਹਿਤੁਣ੍ਡਿਕਜਾਤਕਂ (੫-੨-੫)

੮੦. ਧੁਤ੍ਤੋਮ੍ਹਿ ਸਮ੍ਮ ਸੁਮੁਖ, ਜੂਤੇ ਅਕ੍ਖਪਰਾਜਿਤੋ;

ਹਰੇਹਿ [ਸੇਵੇਹਿ (ਪੀ.)] ਅਮ੍ਬਪਕ੍ਕਾਨਿ, ਵੀਰਿਯਂ ਤੇ ਭਕ੍ਖਯਾਮਸੇ.

੮੧. ਅਲਿਕਂ ਵਤ ਮਂ ਸਮ੍ਮ, ਅਭੂਤੇਨ ਪਸਂਸਸਿ;

ਕੋ ਤੇ ਸੁਤੋ ਵਾ ਦਿਟ੍ਠੋ ਵਾ, ਸੁਮੁਖੋ ਨਾਮ ਮਕ੍ਕਟੋ.

੮੨. ਅਜ੍ਜਾਪਿ ਮੇ ਤਂ ਮਨਸਿ [ਤੇ ਮਂ ਸਰਸਿ (ਕ.)], ਯਂ ਮਂ ਤ੍ਵਂ ਅਹਿਤੁਣ੍ਡਿਕ;

ਧਞ੍ਞਾਪਣਂ ਪਵਿਸਿਤ੍ਵਾ, ਮਤ੍ਤੋ [ਮੁਤ੍ਤੋ (ਕ.)] ਛਾਤਂ ਹਨਾਸਿ ਮਂ.

੮੩. ਤਾਹਂ ਸਰਂ ਦੁਕ੍ਖਸੇਯ੍ਯਂ, ਅਪਿ ਰਜ੍ਜਮ੍ਪਿ ਕਾਰਯੇ;

ਨੇਵਾਹਂ ਯਾਚਿਤੋ ਦਜ੍ਜਂ, ਤਥਾ ਹਿ ਭਯਤਜ੍ਜਿਤੋ.

੮੪. ਯਞ੍ਚ ਜਞ੍ਞਾ ਕੁਲੇ ਜਾਤਂ, ਗਬ੍ਭੇ ਤਿਤ੍ਤਂ ਅਮਚ੍ਛਰਿਂ;

ਤੇਨ ਸਖਿਞ੍ਚ ਮਿਤ੍ਤਞ੍ਚ, ਧੀਰੋ ਸਨ੍ਧਾਤੁਮਰਹਤੀਤਿ.

ਅਹਿਤੁਣ੍ਡਿਕਜਾਤਕਂ ਪਞ੍ਚਮਂ.

੩੬੬. ਗੁਮ੍ਬਿਯਜਾਤਕਂ (੫-੨-੬)

੮੫. ਮਧੁਵਣ੍ਣਂ ਮਧੁਰਸਂ, ਮਧੁਗਨ੍ਧਂ ਵਿਸਂ ਅਹੁ;

ਗੁਮ੍ਬਿਯੋ ਘਾਸਮੇਸਾਨੋ, ਅਰਞ੍ਞੇ ਓਦਹੀ ਵਿਸਂ.

੮੬. ਮਧੁ ਇਤਿ ਮਞ੍ਞਮਾਨਾ [ਮਧੂਤਿ ਮਞ੍ਞਮਾਨਾਯ (ਕ.)], ਯੇ ਤਂ ਵਿਸਮਖਾਦਿਸੁਂ [ਵਿਸਮਸਾਯਿਸੁਂ (ਸੀ. ਸ੍ਯਾ.)];

ਤੇਸਂ ਤਂ ਕਟੁਕਂ ਆਸਿ, ਮਰਣਂ ਤੇਨੁਪਾਗਮੁਂ.

੮੭. ਯੇ ਚ ਖੋ ਪਟਿਸਙ੍ਖਾਯ, ਵਿਸਂ ਤਂ ਪਰਿਵਜ੍ਜਯੁਂ;

ਤੇ ਆਤੁਰੇਸੁ ਸੁਖਿਤਾ, ਡਯ੍ਹਮਾਨੇਸੁ ਨਿਬ੍ਬੁਤਾ.

੮੮. ਏਵਮੇਵ ਮਨੁਸ੍ਸੇਸੁ, ਵਿਸਂ ਕਾਮਾ ਸਮੋਹਿਤਾ;

ਆਮਿਸਂ ਬਨ੍ਧਨਞ੍ਚੇਤਂ, ਮਚ੍ਚੁਵੇਸੋ [ਪਚ੍ਚੁਵਸੋ (ਸੀ. ਸ੍ਯਾ.)] ਗੁਹਾਸਯੋ.

੮੯. ਏਵਮੇਵ ਇਮੇ ਕਾਮੇ, ਆਤੁਰਾ ਪਰਿਚਾਰਿਕੇ [ਪਰਿਚਾਰਕੇ (ਕ.)];

ਯੇ ਸਦਾ ਪਰਿਵਜ੍ਜੇਨ੍ਤਿ, ਸਙ੍ਗਂ ਲੋਕੇ ਉਪਚ੍ਚਗੁਨ੍ਤਿ.

ਗੁਮ੍ਬਿਯਜਾਤਕਂ ਛਟ੍ਠਂ.

੩੬੭. ਸਾਲ਼ਿਯਜਾਤਕਂ (੫-੨-੭)

੯੦. ਯ੍ਵਾਯਂ ਸਾਲ਼ਿਯ [ਸਾਲਿਯ (ਸੀ. ਸ੍ਯਾ. ਪੀ.), ਸਾਲ਼ਿਕ (?)] ਛਾਪੋਤਿ, ਕਣ੍ਹਸਪ੍ਪਂ ਅਗਾਹਯਿ;

ਤੇਨ ਸਪ੍ਪੇਨਯਂ ਦਟ੍ਠੋ, ਹਤੋ ਪਾਪਾਨੁਸਾਸਕੋ.

੯੧. ਅਹਨ੍ਤਾਰ [ਅਹਨਨ੍ਤ (ਪੀ.), ਅਹਰਨ੍ਤ (?)] ਮਹਨ੍ਤਾਰਂ, ਯੋ ਨਰੋ ਹਨ੍ਤੁਮਿਚ੍ਛਤਿ;

ਏਵਂ ਸੋ ਨਿਹਤੋ ਸੇਤਿ, ਯਥਾਯਂ ਪੁਰਿਸੋ ਹਤੋ.

੯੨. ਅਹਨ੍ਤਾਰ [ਅਹਨਨ੍ਤ (ਸੀ. ਸ੍ਯਾ. ਪੀ.), ਅਹਰਨ੍ਤ (?)] ਮਘਾਤੇਨ੍ਤਂ, ਯੋ ਨਰੋ ਹਨ੍ਤੁਮਿਚ੍ਛਤਿ;

ਏਵਂ ਸੋ ਨਿਹਤੋ ਸੇਤਿ, ਯਥਾਯਂ ਪੁਰਿਸੋ ਹਤੋ.

੯੩. ਯਥਾ ਪਂਸੁਮੁਟ੍ਠਿਂ ਪੁਰਿਸੋ, ਪਟਿਵਾਤਂ ਪਟਿਕ੍ਖਿਪੇ;

ਤਮੇਵ ਸੋ ਰਜੋ ਹਨ੍ਤਿ, ਤਥਾਯਂ ਪੁਰਿਸੋ ਹਤੋ.

੯੪. ਯੋ ਅਪ੍ਪਦੁਟ੍ਠਸ੍ਸ ਨਰਸ੍ਸ ਦੁਸ੍ਸਤਿ, ਸੁਦ੍ਧਸ੍ਸ ਪੋਸਸ੍ਸ ਅਨਙ੍ਗਣਸ੍ਸ;

ਤਮੇਵ ਬਾਲਂ ਪਚ੍ਚੇਤਿ ਪਾਪਂ, ਸੁਖੁਮੋ ਰਜੋ ਪਟਿਵਾਤਂਵ ਖਿਤ੍ਤੋਤਿ.

ਸਾਲ਼ਿਯਜਾਤਕਂ ਸਤ੍ਤਮਂ.

੩੬੮. ਤਚਸਾਰਜਾਤਕਂ (੫-੨-੮)

੯੫. ਅਮਿਤ੍ਤਹਤ੍ਥਤ੍ਥਗਤਾ [ਹਤ੍ਥਤ੍ਤਗਤਾ (ਕਤ੍ਥਚਿ, ਸੀ. ਨਿਯ੍ਯ)], ਤਚਸਾਰਸਮਪ੍ਪਿਤਾ;

ਪਸਨ੍ਨਮੁਖਵਣ੍ਣਾਤ੍ਥ, ਕਸ੍ਮਾ ਤੁਮ੍ਹੇ ਨ ਸੋਚਥ.

੯੬. ਨ ਸੋਚਨਾਯ ਪਰਿਦੇਵਨਾਯ, ਅਤ੍ਥੋਵ ਲਬ੍ਭੋ [ਅਤ੍ਥੋ ਚ ਲਬ੍ਭਾ (ਸੀ. ਸ੍ਯਾ.), ਅਤ੍ਥੋਧ ਲਬ੍ਭਾ (ਅ. ਨਿ. ੫.੪੮)] ਅਪਿ ਅਪ੍ਪਕੋਪਿ;

ਸੋਚਨ੍ਤਮੇਨਂ ਦੁਖਿਤਂ ਵਿਦਿਤ੍ਵਾ, ਪਚ੍ਚਤ੍ਥਿਕਾ ਅਤ੍ਤਮਨਾ ਭਵਨ੍ਤਿ.

੯੭. ਯਤੋ ਚ ਖੋ ਪਣ੍ਡਿਤੋ ਆਪਦਾਸੁ, ਨ ਵੇਧਤੀ ਅਤ੍ਥਵਿਨਿਚ੍ਛਯਞ੍ਞੂ;

ਪਚ੍ਚਤ੍ਥਿਕਾਸ੍ਸ [ਪਚ੍ਚਤ੍ਥਿਕਾ ਤੇ (ਕ.)] ਦੁਖਿਤਾ ਭਵਨ੍ਤਿ, ਦਿਸ੍ਵਾ ਮੁਖਂ ਅਵਿਕਾਰਂ ਪੁਰਾਣਂ.

੯੮. ਜਪ੍ਪੇਨ ਮਨ੍ਤੇਨ ਸੁਭਾਸਿਤੇਨ, ਅਨੁਪ੍ਪਦਾਨੇਨ ਪਵੇਣਿਯਾ ਵਾ;

ਯਥਾ ਯਥਾ ਯਤ੍ਥ ਲਭੇਥ ਅਤ੍ਥਂ, ਤਥਾ ਤਥਾ ਤਤ੍ਥ ਪਰਕ੍ਕਮੇਯ੍ਯ.

੯੯. ਯਤੋ ਚ ਜਾਨੇਯ੍ਯ ਅਲਬ੍ਭਨੇਯ੍ਯੋ, ਮਯਾ ਵ [ਮਯਾ ਵਾ (ਸ੍ਯਾ. ਕ.)] ਅਞ੍ਞੇਨ ਵਾ ਏਸ ਅਤ੍ਥੋ;

ਅਸੋਚਮਾਨੋ ਅਧਿਵਾਸਯੇਯ੍ਯ, ਕਮ੍ਮਂ ਦਲ਼੍ਹਂ ਕਿਨ੍ਤਿ ਕਰੋਮਿ ਦਾਨੀਤਿ.

ਤਚਸਾਰਜਾਤਕਂ ਅਟ੍ਠਮਂ.

੩੬੯. ਮਿਤ੍ਤਵਿਨ੍ਦਕਜਾਤਕਂ (੫-੨-੯)

੧੦੦. ਕ੍ਯਾਹਂ ਦੇਵਾਨਮਕਰਂ, ਕਿਂ ਪਾਪਂ ਪਕਤਂ ਮਯਾ;

ਯਂ ਮੇ ਸਿਰਸ੍ਮਿਂ ਓਹਚ੍ਚ [ਉਹਚ੍ਚ (ਕ.), ਉਹਚ੍ਚ (ਪੀ.)], ਚਕ੍ਕਂ ਭਮਤਿ ਮਤ੍ਥਕੇ.

੧੦੧. ਅਤਿਕ੍ਕਮ੍ਮ ਰਮਣਕਂ, ਸਦਾਮਤ੍ਤਞ੍ਚ ਦੂਭਕਂ;

ਬ੍ਰਹ੍ਮਤ੍ਤਰਞ੍ਚ ਪਾਸਾਦਂ, ਕੇਨਤ੍ਥੇਨ ਇਧਾਗਤੋ.

੧੦੨. ਇਤੋ ਬਹੁਤਰਾ ਭੋਗਾ, ਅਤ੍ਰ ਮਞ੍ਞੇ ਭਵਿਸ੍ਸਰੇ;

ਇਤਿ ਏਤਾਯ ਸਞ੍ਞਾਯ, ਪਸ੍ਸ ਮਂ ਬ੍ਯਸਨਂ ਗਤਂ.

੧੦੩. ਚਤੁਬ੍ਭਿ ਅਟ੍ਠਜ੍ਝਗਮਾ, ਅਟ੍ਠਾਹਿਪਿ ਚ [ਅਟ੍ਠਾਹਿ ਚਾਪਿ (ਸੀ. ਸ੍ਯਾ.), ਅਟ੍ਠਾਭਿ ਚਾਪਿ (ਕ.)] ਸੋਲ਼ਸ;

ਸੋਲ਼ਸਾਹਿ ਚ ਬਾਤ੍ਤਿਂਸ, ਅਤ੍ਰਿਚ੍ਛਂ ਚਕ੍ਕਮਾਸਦੋ;

ਇਚ੍ਛਾਹਤਸ੍ਸ ਪੋਸਸ੍ਸ, ਚਕ੍ਕਂ ਭਮਤਿ ਮਤ੍ਥਕੇ.

੧੦੪. ਉਪਰਿਵਿਸਾਲਾ ਦੁਪ੍ਪੂਰਾ, ਇਚ੍ਛਾ ਵਿਸਟਗਾਮਿਨੀ [ਉਪਰਿ ਵਿਸਾਲਂ ਦੁਪ੍ਪੂਰਂ, ਇਚ੍ਛਾਵਿਸਦਗਾਮਿਨੀ (ਸੀ.)];

ਯੇ ਚ ਤਂ ਅਨੁਗਿਜ੍ਝਨ੍ਤਿ, ਤੇ ਹੋਨ੍ਤਿ ਚਕ੍ਕਧਾਰਿਨੋਤਿ.

ਮਿਤ੍ਤਵਿਨ੍ਦਕਜਾਤਕਂ ਨਵਮਂ.

੩੭੦. ਪਲਾਸਜਾਤਕਂ (੫-੨-੧੦)

੧੦੫. ਹਂਸੋ ਪਲਾਸਮਵਚ, ਨਿਗ੍ਰੋਧੋ ਸਮ੍ਮ ਜਾਯਤਿ;

ਅਙ੍ਕਸ੍ਮਿਂ [ਅਙ੍ਗਸ੍ਮਿਂ (ਕ.)] ਤੇ ਨਿਸਿਨ੍ਨੋਵ, ਸੋ ਤੇ ਮਮ੍ਮਾਨਿ ਛੇਚ੍ਛਤਿ [ਛਿਜ੍ਜਤਿ (ਕ.)].

੧੦੬. ਵਡ੍ਢਤਾਮੇਵ [ਵਦ੍ਧਿਤਮੇਵ (ਕ.)] ਨਿਗ੍ਰੋਧੋ, ਪਤਿਟ੍ਠਸ੍ਸ ਭਵਾਮਹਂ;

ਯਥਾ ਪਿਤਾ ਚ ਮਾਤਾ ਚ [ਪਿਤਾ ਵਾ ਮਾਤਾ ਵਾ (ਪੀ.), ਮਾਤਾ ਵਾ ਪਿਤਾ ਵਾ (ਕ.)], ਏਵਂ ਮੇ ਸੋ ਭਵਿਸ੍ਸਤਿ.

੧੦੭. ਯਂ ਤ੍ਵਂ ਅਙ੍ਕਸ੍ਮਿਂ ਵਡ੍ਢੇਸਿ, ਖੀਰਰੁਕ੍ਖਂ ਭਯਾਨਕਂ;

ਆਮਨ੍ਤ ਖੋ ਤਂ ਗਚ੍ਛਾਮ, ਵੁਡ੍ਢਿ ਮਸ੍ਸ ਨ ਰੁਚ੍ਚਤਿ.

੧੦੮. ਇਦਾਨਿ ਖੋ ਮਂ ਭਾਯੇਤਿ, ਮਹਾਨੇਰੁਨਿਦਸ੍ਸਨਂ;

ਹਂਸਸ੍ਸ ਅਨਭਿਞ੍ਞਾਯ, ਮਹਾ ਮੇ ਭਯਮਾਗਤਂ.

੧੦੯. ਨ ਤਸ੍ਸ ਵੁਡ੍ਢਿ ਕੁਸਲਪ੍ਪਸਤ੍ਥਾ, ਯੋ ਵਡ੍ਢਮਾਨੋ ਘਸਤੇ ਪਤਿਟ੍ਠਂ;

ਤਸ੍ਸੂਪਰੋਧਂ ਪਰਿਸਙ੍ਕਮਾਨੋ, ਪਤਾਰਯੀ ਮੂਲਵਧਾਯ ਧੀਰੋਤਿ.

ਪਲਾਸਜਾਤਕਂ ਦਸਮਂ.

ਵਣ੍ਣਾਰੋਹਵਗ੍ਗੋ ਦੁਤਿਯੋ [ਇਮਸ੍ਸੁਦ੍ਦਾਨਂ ਤਤਿਯਵਗ੍ਗਪਰਿਯੋਸਾਨੇ ਭਵਿਸ੍ਸਤਿ].