੩. ਅਡ੍ਢਵਗ੍ਗੋ

੩੭੧. ਦੀਘੀਤਿਕੋਸਲਜਾਤਕਂ (੫-੩-੧)

੧੧੦. ਏਵਂਭੂਤਸ੍ਸ ਤੇ ਰਾਜ, ਆਗਤਸ੍ਸ ਵਸੇ [ਵਸੋ (ਪੀ. ਕ.)] ਮਮ;

ਅਤ੍ਥਿ ਨੁ ਕੋਚਿ ਪਰਿਯਾਯੋ, ਯੋ ਤਂ ਦੁਕ੍ਖਾ ਪਮੋਚਯੇ.

੧੧੧. ਏਵਂਭੂਤਸ੍ਸ ਮੇ ਤਾਤ, ਆਗਤਸ੍ਸ ਵਸੇ ਤਵ;

ਨਤ੍ਥਿ ਨੋ ਕੋਚਿ ਪਰਿਯਾਯੋ, ਯੋ ਮਂ ਦੁਕ੍ਖਾ ਪਮੋਚਯੇ.

੧੧੨. ਨਾਞ੍ਞਂ ਸੁਚਰਿਤਂ ਰਾਜ, ਨਾਞ੍ਞਂ ਰਾਜ ਸੁਭਾਸਿਤਂ;

ਤਾਯਤੇ ਮਰਣਕਾਲੇ, ਏਵਮੇਵਿਤਰਂ ਧਨਂ.

੧੧੩. ਅਕ੍ਕੋਚ੍ਛਿ ਮਂ ਅਵਧਿ ਮਂ, ਅਜਿਨਿ ਮਂ ਅਹਾਸਿ ਮੇ;

ਯੇ ਚ ਤਂ ਉਪਨਯ੍ਹਨ੍ਤਿ, ਵੇਰਂ ਤੇਸਂ ਨ ਸਮ੍ਮਤਿ.

੧੧੪. ਅਕ੍ਕੋਚ੍ਛਿ ਮਂ ਅਵਧਿ ਮਂ, ਅਜਿਨਿ ਮਂ ਅਹਾਸਿ ਮੇ;

ਯੇ ਚ ਤਂ ਨੁਪਨਯ੍ਹਨ੍ਤਿ, ਵੇਰਂ ਤੇਸੂਪਸਮ੍ਮਤਿ.

੧੧੫. ਨ ਹਿ ਵੇਰੇਨ ਵੇਰਾਨਿ, ਸਮ੍ਮਨ੍ਤੀਧ ਕੁਦਾਚਨਂ;

ਅਵੇਰੇਨ ਚ ਸਮ੍ਮਨ੍ਤਿ, ਏਸ ਧਮ੍ਮੋ ਸਨਨ੍ਤਨੋਤਿ.

ਦੀਘੀਤਿਕੋਸਲਜਾਤਕਂ ਪਠਮਂ.

੩੭੨. ਮਿਗਪੋਤਕਜਾਤਕਂ (੫-੩-੨)

੧੧੬. ਅਗਾਰਾ ਪਚ੍ਚੁਪੇਤਸ੍ਸ, ਅਨਗਾਰਸ੍ਸ ਤੇ ਸਤੋ;

ਸਮਣਸ੍ਸ ਨ ਤਂ ਸਾਧੁ, ਯਂ ਪੇਤਮਨੁਸੋਚਸਿ.

੧੧੭. ਸਂਵਾਸੇਨ ਹਵੇ ਸਕ੍ਕ, ਮਨੁਸ੍ਸਸ੍ਸ ਮਿਗਸ੍ਸ ਵਾ;

ਹਦਯੇ ਜਾਯਤੇ ਪੇਮਂ, ਨ ਤਂ ਸਕ੍ਕਾ ਅਸੋਚਿਤੁਂ.

੧੧੮. ਮਤਂ ਮਰਿਸ੍ਸਂ ਰੋਦਨ੍ਤਿ, ਯੇ ਰੁਦਨ੍ਤਿ ਲਪਨ੍ਤਿ ਚ;

ਤਸ੍ਮਾ ਤ੍ਵਂ ਇਸਿ ਮਾ ਰੋਦਿ, ਰੋਦਿਤਂ ਮੋਘਮਾਹੁ ਸਨ੍ਤੋ.

੧੧੯. ਰੋਦਿਤੇਨ ਹਵੇ ਬ੍ਰਹ੍ਮੇ, ਮਤੋ ਪੇਤੋ ਸਮੁਟ੍ਠਹੇ;

ਸਬ੍ਬੇ ਸਙ੍ਗਮ੍ਮ ਰੋਦਾਮ, ਅਞ੍ਞਮਞ੍ਞਸ੍ਸ ਞਾਤਕੇ.

੧੨੦. ਆਦਿਤ੍ਤਂ ਵਤ ਮਂ ਸਨ੍ਤਂ, ਘਤਸਿਤ੍ਤਂਵ ਪਾਵਕਂ;

ਵਾਰਿਨਾ ਵਿਯ ਓਸਿਞ੍ਚਂ, ਸਬ੍ਬਂ ਨਿਬ੍ਬਾਪਯੇ ਦਰਂ.

੧੨੧. ਅਬ੍ਬਹਿ ਵਤ ਮੇ ਸਲ੍ਲਂ, ਯਮਾਸਿ ਹਦਯਸ੍ਸਿਤਂ;

ਯੋ ਮੇ ਸੋਕਪਰੇਤਸ੍ਸ, ਪੁਤ੍ਤਸੋਕਂ ਅਪਾਨੁਦਿ.

੧੨੨. ਸੋਹਂ ਅਬ੍ਬੂਲ਼੍ਹਸਲ੍ਲੋਸ੍ਮਿ, ਵੀਤਸੋਕੋ ਅਨਾਵਿਲੋ;

ਨ ਸੋਚਾਮਿ ਨ ਰੋਦਾਮਿ, ਤਵ ਸੁਤ੍ਵਾਨ ਵਾਸਵਾਤਿ.

ਮਿਗਪੋਤਕਜਾਤਕਂ ਦੁਤਿਯਂ.

੩੭੩. ਮੂਸਿਕਜਾਤਕਂ (੫-੩-੩)

੧੨੩. ਕੁਹਿਂ ਗਤਾ ਕਤ੍ਥ ਗਤਾ, ਇਤਿ ਲਾਲਪ੍ਪਤੀ ਜਨੋ;

ਅਹਮੇਵੇਕੋ ਜਾਨਾਮਿ, ਉਦਪਾਨੇ ਮੂਸਿਕਾ ਹਤਾ.

੧੨੪. ਯਞ੍ਚੇਤਂ [ਯਥੇਤਂ (ਪੀ.), ਯਵੇਤਂ (ਕ.), ਯਮੇਤਂ (ਕਤ੍ਥਚਿ)] ਇਤਿ ਚੀਤਿ ਚ, ਗਦ੍ਰਭੋਵ ਨਿਵਤ੍ਤਸਿ;

ਉਦਪਾਨੇ ਮੂਸਿਕਂ ਹਨ੍ਤ੍ਵਾ, ਯਵਂ ਭਕ੍ਖੇਤੁਮਿਚ੍ਛਸਿ.

੧੨੫. ਦਹਰੋ ਚਾਸਿ ਦੁਮ੍ਮੇਧ, ਪਠਮੁਪ੍ਪਤ੍ਤਿਕੋ [ਪਠਮੁਪ੍ਪਤ੍ਤਿਤੋ (ਸੀ. ਪੀ.)] ਸੁਸੁ;

ਦੀਘਞ੍ਚੇਤਂ [ਦੀਘਮੇਤਂ (ਪੀ.)] ਸਮਾਸਜ੍ਜ [ਸਮਾਪਜ੍ਜ (ਸ੍ਯਾ. ਕ.)], ਨ ਤੇ ਦਸ੍ਸਾਮਿ ਜੀਵਿਤਂ.

੧੨੬. ਨਾਨ੍ਤਲਿਕ੍ਖਭਵਨੇਨ, ਨਾਙ੍ਗਪੁਤ੍ਤਪਿਨੇਨ [ਨਾਙ੍ਗਪੁਤ੍ਤਸਿਰੇਨ (ਸੀ. ਸ੍ਯਾ. ਪੀ.)] ਵਾ;

ਪੁਤ੍ਤੇਨ ਹਿ ਪਤ੍ਥਯਿਤੋ, ਸਿਲੋਕੇਹਿ ਪਮੋਚਿਤੋ.

੧੨੭. ਸਬ੍ਬਂ ਸੁਤਮਧੀਯੇਥ, ਹੀਨਮੁਕ੍ਕਟ੍ਠਮਜ੍ਝਿਮਂ;

ਸਬ੍ਬਸ੍ਸ ਅਤ੍ਥਂ ਜਾਨੇਯ੍ਯ, ਨ ਚ ਸਬ੍ਬਂ ਪਯੋਜਯੇ;

ਹੋਤਿ ਤਾਦਿਸਕੋ ਕਾਲੋ, ਯਤ੍ਥ ਅਤ੍ਥਾਵਹਂ ਸੁਤਨ੍ਤਿ.

ਮੂਸਿਕਜਾਤਕਂ ਤਤਿਯਂ.

੩੭੪. ਚੂਲ਼ਧਨੁਗ੍ਗਹਜਾਤਕਂ (੫-੩-੪)

੧੨੮. ਸਬ੍ਬਂ ਭਣ੍ਡਂ ਸਮਾਦਾਯ, ਪਾਰਂ ਤਿਣ੍ਣੋਸਿ ਬ੍ਰਾਹ੍ਮਣ;

ਪਚ੍ਚਾਗਚ੍ਛ ਲਹੁਂ ਖਿਪ੍ਪਂ, ਮਮ੍ਪਿ ਤਾਰੇਹਿ ਦਾਨਿਤੋ [ਦਾਨਿਭੋ (ਸ੍ਯਾ.)].

੧੨੯. ਅਸਨ੍ਥੁਤਂ ਮਂ ਚਿਰਸਨ੍ਥੁਤੇਨ, ਨਿਮੀਨਿ ਭੋਤੀ ਅਦ੍ਧੁਵਂ ਧੁਵੇਨ;

ਮਯਾਪਿ ਭੋਤੀ ਨਿਮਿਨੇਯ੍ਯ ਅਞ੍ਞਂ, ਇਤੋ ਅਹਂ ਦੂਰਤਰਂ ਗਮਿਸ੍ਸਂ.

੧੩੦. ਕਾਯਂ ਏਲ਼ਗਲਾਗੁਮ੍ਬੇ [ਏਲ਼ਗਣਗੁਮ੍ਬੇ (ਕ.)], ਕਰੋਤਿ ਅਹੁਹਾਸਿਯਂ;

ਨਯੀਧ ਨਚ੍ਚਗੀਤਂ ਵਾ [ਨਯਿਧ ਨਚ੍ਚਂ ਵਾ ਗੀਤਂ ਵਾ (ਸੀ. ਸ੍ਯਾ. ਪੀ.)], ਤਾਲ਼ਂ ਵਾ ਸੁਸਮਾਹਿਤਂ;

ਅਨਮ੍ਹਿਕਾਲੇ [ਅਨਮ੍ਹਕਾਲੇ (ਪੀ.)] ਸੁਸੋਣਿ [ਸੁਸ੍ਸੋਣਿ (ਸੀ. ਸ੍ਯਾ. ਪੀ.)], ਕਿਂ ਨੁ ਜਗ੍ਘਸਿ ਸੋਭਨੇ [ਸੋਭਣੇ (ਪੀ. ਕ.)].

੧੩੧. ਸਿਙ੍ਗਾਲ ਬਾਲ ਦੁਮ੍ਮੇਧ, ਅਪ੍ਪਪਞ੍ਞੋਸਿ ਜਮ੍ਬੁਕ;

ਜੀਨੋ ਮਚ੍ਛਞ੍ਚ ਪੇਸਿਞ੍ਚ, ਕਪਣੋ ਵਿਯ ਝਾਯਸਿ.

੧੩੨. ਸੁਦਸ੍ਸਂ ਵਜ੍ਜਮਞ੍ਞੇਸਂ, ਅਤ੍ਤਨੋ ਪਨ ਦੁਦ੍ਦਸਂ;

ਜੀਨਾ ਪਤਿਞ੍ਚ ਜਾਰਞ੍ਚ, ਮਞ੍ਞੇ ਤ੍ਵਞ੍ਞੇਵ [ਮਮ੍ਪਿ ਤ੍ਵਞ੍ਞੇਵ (ਸੀ. ਸ੍ਯਾ.), ਤ੍ਵਮ੍ਪਿ ਮਞ੍ਞੇਵ (ਪੀ.)] ਝਾਯਸਿ.

੧੩੩. ਏਵਮੇਤਂ ਮਿਗਰਾਜ, ਯਥਾ ਭਾਸਸਿ ਜਮ੍ਬੁਕ;

ਸਾ ਨੂਨਾਹਂ ਇਤੋ ਗਨ੍ਤ੍ਵਾ, ਭਤ੍ਤੁ ਹੇਸ੍ਸਂ ਵਸਾਨੁਗਾ.

੧੩੪. ਯੋ ਹਰੇ ਮਤ੍ਤਿਕਂ ਥਾਲਂ, ਕਂਸਥਾਲਮ੍ਪਿ ਸੋ ਹਰੇ;

ਕਤਞ੍ਚੇਵ [ਕਤਂਯੇਵ (ਸੀ. ਸ੍ਯਾ. ਪੀ.)] ਤਯਾ ਪਾਪਂ, ਪੁਨਪੇਵਂ ਕਰਿਸ੍ਸਸੀਤਿ.

ਚੂਲ਼ਧਨੁਗ੍ਗਹਜਾਤਕਂ ਚਤੁਤ੍ਥਂ.

੩੭੫. ਕਪੋਤਜਾਤਕਂ (੫-੩-੫)

੧੩੫. ਇਦਾਨਿ ਖੋਮ੍ਹਿ ਸੁਖਿਤੋ ਅਰੋਗੋ, ਨਿਕ੍ਕਣ੍ਟਕੋ ਨਿਪ੍ਪਤਿਤੋ ਕਪੋਤੋ;

ਕਾਹਾਮਿ ਦਾਨੀ ਹਦਯਸ੍ਸ ਤੁਟ੍ਠਿਂ, ਤਥਾਹਿਮਂ ਮਂਸਸਾਕਂ ਬਲੇਤਿ.

੧੩੬. ਕਾਯਂ ਬਲਾਕਾ ਸਿਖਿਨੋ, ਚੋਰੀ ਲਙ੍ਘਿਪਿਤਾਮਹਾ;

ਓਰਂ ਬਲਾਕੇ ਆਗਚ੍ਛ, ਚਣ੍ਡੋ ਮੇ ਵਾਯਸੋ ਸਖਾ.

੧੩੭. ਅਲਞ੍ਹਿ ਤੇ ਜਗ੍ਘਿਤਾਯੇ, ਮਮਂ ਦਿਸ੍ਵਾਨ ਏਦਿਸਂ;

ਵਿਲੂਨਂ ਸੂਦਪੁਤ੍ਤੇਨ, ਪਿਟ੍ਠਮਣ੍ਡੇਨ [ਪਿਟ੍ਠਮਦ੍ਦੇਨ (ਸੀ. ਸ੍ਯਾ. ਪੀ.)] ਮਕ੍ਖਿਤਂ.

੧੩੮. ਸੁਨ੍ਹਾਤੋ ਸੁਵਿਲਿਤ੍ਤੋਸਿ, ਅਨ੍ਨਪਾਨੇਨ ਤਪ੍ਪਿਤੋ;

ਕਣ੍ਠੇ ਚ ਤੇ ਵੇਲ਼ੁਰਿਯੋ, ਅਗਮਾ ਨੁ ਕਜਙ੍ਗਲਂ.

੧੩੯. ਮਾ ਤੇ ਮਿਤ੍ਤੋ ਅਮਿਤ੍ਤੋ ਵਾ, ਅਗਮਾਸਿ ਕਜਙ੍ਗਲਂ;

ਪਿਞ੍ਛਾਨਿ ਤਤ੍ਥ ਲਾਯਿਤ੍ਵਾ, ਕਣ੍ਠੇ ਬਨ੍ਧਨ੍ਤਿ ਵਟ੍ਟਨਂ.

੧੪੦. ਪੁਨਪਾਪਜ੍ਜਸੀ ਸਮ੍ਮ, ਸੀਲਞ੍ਹਿ ਤਵ ਤਾਦਿਸਂ;

ਨ ਹਿ ਮਾਨੁਸਕਾ ਭੋਗਾ, ਸੁਭੁਞ੍ਜਾ ਹੋਨ੍ਤਿ ਪਕ੍ਖਿਨਾਤਿ.

ਕਪੋਤਜਾਤਕਂ ਪਞ੍ਚਮਂ.

ਅਡ੍ਢਵਗ੍ਗੋ ਤਤਿਯੋ.

ਤਸ੍ਸੁਦ੍ਦਾਨਂ –

ਅਥ ਵਣ੍ਣ ਸਸੀਲ ਹਿਰਿ ਲਭਤੇ, ਸੁਮੁਖਾ ਵਿਸ ਸਾਲ਼ਿਯਮਿਤ੍ਤਵਰੋ;

ਅਥ ਚਕ੍ਕ ਪਲਾਸ ਸਰਾਜ ਸਤੋ, ਯਵ ਬਾਲ ਕਪੋਤਕ ਪਨ੍ਨਰਸਾਤਿ.

ਅਥ ਵਗ੍ਗੁਦ੍ਦਾਨਂ –

ਜੀਨਞ੍ਚ ਵਣ੍ਣਂ ਅਸਮਂਵਗੁਪ੍ਪਰਿ, ਸੁਦੇਸਿਤਾ ਜਾਤਕਨ੍ਤਿ ਸਨ੍ਤਿ ਵੀਸਤਿ [ਜਾਤਕ ਪਞ੍ਚਵੀਸਤਿ (?)];

ਮਹੇਸਿਨੋ ਬ੍ਰਹ੍ਮਚਰਿਤ੍ਤਮੁਤ੍ਤ-ਮਵੋਚ ਗਾਥਾ ਅਤ੍ਥਵਤੀ ਸੁਬ੍ਯਞ੍ਜਨਾਤਿ.

ਪਞ੍ਚਕਨਿਪਾਤਂ ਨਿਟ੍ਠਿਤਂ.