੩. ਕੁਟਿਦੂਸਕਵਗ੍ਗੋ

੩੨੧. ਕੁਟਿਦੂਸਕਜਾਤਕਂ (੪-੩-੧)

੮੧. ਮਨੁਸ੍ਸਸ੍ਸੇਵ ਤੇ ਸੀਸਂ, ਹਤ੍ਥਪਾਦਾ ਚ ਵਾਨਰ;

ਅਥ ਕੇਨ ਨੁ ਵਣ੍ਣੇਨ, ਅਗਾਰਂ ਤੇ ਨ ਵਿਜ੍ਜਤਿ.

੮੨. ਮਨੁਸ੍ਸਸ੍ਸੇਵ ਮੇ ਸੀਸਂ, ਹਤ੍ਥਪਾਦਾ ਚ ਸਿਙ੍ਗਿਲ [ਸਿਙ੍ਗਾਲ (ਕ.), ਪਿਙ੍ਗਲ (ਟੀਕਾ)];

ਯਾਹੁ ਸੇਟ੍ਠਾ ਮਨੁਸ੍ਸੇਸੁ, ਸਾ ਮੇ ਪਞ੍ਞਾ ਨ ਵਿਜ੍ਜਤਿ.

੮੩. ਅਨਵਟ੍ਠਿਤਚਿਤ੍ਤਸ੍ਸ, ਲਹੁਚਿਤ੍ਤਸ੍ਸ ਦੁਬ੍ਭਿਨੋ [ਦੂਭਿਨੋ (ਪੀ.)];

ਨਿਚ੍ਚਂ ਅਦ੍ਧੁਵਸੀਲਸ੍ਸ, ਸੁਖਭਾਵੋ [ਸੁਚਿਭਾਵੋ (ਸੀ.), ਸੁਖਭਾਗੋ (?)] ਨ ਵਿਜ੍ਜਤਿ.

੮੪. ਸੋ ਕਰਸ੍ਸੁ ਆਨੁਭਾਵਂ, ਵੀਤਿਵਤ੍ਤਸ੍ਸੁ ਸੀਲਿਯਂ;

ਸੀਤਵਾਤਪਰਿਤ੍ਤਾਣਂ, ਕਰਸ੍ਸੁ ਕੁਟਵਂ [ਕੁਟਿਕਂ (ਸੀ. ਸ੍ਯਾ.)] ਕਪੀਤਿ.

ਕੁਟਿਦੂਸਕ [ਸਿਙ੍ਗਾਲਸਕੁਣ (ਕ.)] ਜਾਤਕਂ ਪਠਮਂ.

੩੨੨. ਦੁਦ੍ਦੁਭਜਾਤਕਂ (੪-੩-੨)

੮੫. ਦੁਦ੍ਦੁਭਾਯਤਿ [ਦਦ੍ਦਭਾਯਤਿ (ਸੀ. ਪੀ.)] ਭਦ੍ਦਨ੍ਤੇ, ਯਸ੍ਮਿਂ ਦੇਸੇ ਵਸਾਮਹਂ;

ਅਹਮ੍ਪੇਤਂ ਨ ਜਾਨਾਮਿ, ਕਿਮੇਤਂ ਦੁਦ੍ਦੁਭਾਯਤਿ.

੮੬. ਬੇਲੁਵਂ ਪਤਿਤਂ ਸੁਤ੍ਵਾ, ਦੁਦ੍ਦੁਭਨ੍ਤਿ [ਦਦ੍ਦਭਨ੍ਤਿ (ਸੀ.)] ਸਸੋ ਜਵਿ;

ਸਸਸ੍ਸ ਵਚਨਂ ਸੁਤ੍ਵਾ, ਸਨ੍ਤਤ੍ਤਾ ਮਿਗਵਾਹਿਨੀ.

੮੭. ਅਪ੍ਪਤ੍ਵਾ ਪਦਵਿਞ੍ਞਾਣਂ, ਪਰਘੋਸਾਨੁਸਾਰਿਨੋ;

ਪਨਾਦਪਰਮਾ ਬਾਲਾ, ਤੇ ਹੋਨ੍ਤਿ ਪਰਪਤ੍ਤਿਯਾ.

੮੮. ਯੇ ਚ ਸੀਲੇਨ ਸਮ੍ਪਨ੍ਨਾ, ਪਞ੍ਞਾਯੂਪਸਮੇ ਰਤਾ;

ਆਰਕਾ ਵਿਰਤਾ ਧੀਰਾ, ਨ ਹੋਨ੍ਤਿ ਪਰਪਤ੍ਤਿਯਾਤਿ.

ਦੁਦ੍ਦੁਭਜਾਤਕਂ [ਦਦ੍ਦਭਜਾਤਕਂ (ਸੀ. ਪੀ.)] ਦੁਤਿਯਂ.

੩੨੩. ਬ੍ਰਹ੍ਮਦਤ੍ਤਜਾਤਕਂ (੪-੩-੩)

੮੯. ਦ੍ਵਯਂ ਯਾਚਨਕੋ ਰਾਜ, ਬ੍ਰਹ੍ਮਦਤ੍ਤ ਨਿਗਚ੍ਛਤਿ;

ਅਲਾਭਂ ਧਨਲਾਭਂ ਵਾ, ਏਵਂ ਧਮ੍ਮਾ ਹਿ ਯਾਚਨਾ.

੯੦. ਯਾਚਨਂ ਰੋਦਨਂ ਆਹੁ, ਪਞ੍ਚਾਲਾਨਂ ਰਥੇਸਭ;

ਯੋ ਯਾਚਨਂ ਪਚ੍ਚਕ੍ਖਾਤਿ, ਤਮਾਹੁ ਪਟਿਰੋਦਨਂ.

੯੧. ਮਾ ਮਦ੍ਦਸਂਸੁ ਰੋਦਨ੍ਤਂ, ਪਞ੍ਚਾਲਾ ਸੁਸਮਾਗਤਾ;

ਤੁਵਂ ਵਾ ਪਟਿਰੋਦਨ੍ਤਂ, ਤਸ੍ਮਾ ਇਚ੍ਛਾਮਹਂ ਰਹੋ.

੯੨. ਦਦਾਮਿ ਤੇ ਬ੍ਰਾਹ੍ਮਣ ਰੋਹਿਣੀਨਂ, ਗਵਂ ਸਹਸ੍ਸਂ ਸਹ ਪੁਙ੍ਗਵੇਨ;

ਅਰਿਯੋ ਹਿ ਅਰਿਯਸ੍ਸ ਕਥਂ ਨ ਦਜ੍ਜਾ [ਦਜ੍ਜੇ (ਸੀ.), ਦਜ੍ਜਂ (?)], ਸੁਤ੍ਵਾਨ ਗਾਥਾ ਤਵ ਧਮ੍ਮਯੁਤ੍ਤਾਤਿ.

ਬ੍ਰਹ੍ਮਦਤ੍ਤਜਾਤਕਂ ਤਤਿਯਂ.

੩੨੪. ਚਮ੍ਮਸਾਟਕਜਾਤਕਂ (੪-੩-੪)

੯੩. ਕਲ੍ਯਾਣਰੂਪੋ ਵਤਯਂ ਚਤੁਪ੍ਪਦੋ, ਸੁਭਦ੍ਦਕੋ ਚੇਵ ਸੁਪੇਸਲੋ ਚ;

ਯੋ ਬ੍ਰਾਹ੍ਮਣਂ ਜਾਤਿਮਨ੍ਤੂਪਪਨ੍ਨਂ, ਅਪਚਾਯਤਿ ਮੇਣ੍ਡਵਰੋ ਯਸਸ੍ਸੀ.

੯੪. ਮਾ ਬ੍ਰਾਹ੍ਮਣ ਇਤ੍ਤਰਦਸ੍ਸਨੇਨ, ਵਿਸ੍ਸਾਸਮਾਪਜ੍ਜਿ ਚਤੁਪ੍ਪਦਸ੍ਸ;

ਦਲ਼੍ਹਪ੍ਪਹਾਰਂ ਅਭਿਕਙ੍ਖਮਾਨੋ [ਅਭਿਕਤ੍ਤੁਕਾਮੋ (ਸ੍ਯਾ.)], ਅਵਸਕ੍ਕਤੀ ਦਸ੍ਸਤਿ ਸੁਪ੍ਪਹਾਰਂ.

੯੫. ਊਰੁਟ੍ਠਿ [ਊਰਟ੍ਠਿ (ਸੀ.)] ਭਗ੍ਗਂ ਪਵਟ੍ਟਿਤੋ [ਪਤਿਤੋ (ਸੀ. ਸ੍ਯਾ.)] ਖਾਰਿਭਾਰੋ, ਸਬ੍ਬਞ੍ਚ ਭਣ੍ਡਂ ਬ੍ਰਾਹ੍ਮਣਸ੍ਸ [ਬ੍ਰਾਹ੍ਮਣਸ੍ਸੀਧ (ਕ. ਸੀ. ਪੀ.), ਬ੍ਰਾਹ੍ਮਣਸ੍ਸੇਵ (ਕ. ਸੀ. ਸ੍ਯਾ. ਕ.)] ਭਿਨ੍ਨਂ;

ਉਭੋਪਿ ਬਾਹਾ ਪਗ੍ਗਯ੍ਹ [ਪਗ੍ਗਯ੍ਯੇਵ (ਸ੍ਯਾ.), ਪਗ੍ਗਹੀਯ (?)] ਕਨ੍ਦਤਿ [ਬਾਹਾ ਪਗ੍ਗਯ੍ਯ ਕਨ੍ਦਤਿ (ਪੀ. ਕ.)], ਅਭਿਧਾਵਥ ਹਞ੍ਞਤੇ ਬ੍ਰਹ੍ਮਚਾਰੀ.

੯੬. ਏਵਂ ਸੋ ਨਿਹਤੋ ਸੇਤਿ, ਯੋ ਅਪੂਜਂ ਪਸਂਸਤਿ [ਨਮਸ੍ਸਤਿ (ਪੀ.)];

ਯਥਾਹਮਜ੍ਜ ਪਹਤੋ, ਹਤੋ ਮੇਣ੍ਡੇਨ ਦੁਮ੍ਮਤੀਤਿ.

ਚਮ੍ਮਸਾਟਕਜਾਤਕਂ ਚਤੁਤ੍ਥਂ.

੩੨੫. ਗੋਧਰਾਜਜਾਤਕਂ (੪-੩-੫)

੯੭. ਸਮਣਂ ਤਂ ਮਞ੍ਞਮਾਨੋ, ਉਪਗਚ੍ਛਿਮਸਞ੍ਞਤਂ;

ਸੋ ਮਂ ਦਣ੍ਡੇਨ ਪਾਹਾਸਿ, ਯਥਾ ਅਸ੍ਸਮਣੋ ਤਥਾ.

੯੮. ਕਿਂ ਤੇ ਜਟਾਹਿ ਦੁਮ੍ਮੇਧ, ਕਿਂ ਤੇ ਅਜਿਨਸਾਟਿਯਾ;

ਅਬ੍ਭਨ੍ਤਰਂ ਤੇ ਗਹਨਂ, ਬਾਹਿਰਂ ਪਰਿਮਜ੍ਜਸਿ.

੯੯. ਏਹਿ ਗੋਧ ਨਿਵਤ੍ਤਸ੍ਸੁ, ਭੁਞ੍ਜ ਸਾਲੀਨਮੋਦਨਂ;

ਤੇਲਂ ਲੋਣਞ੍ਚ ਮੇ ਅਤ੍ਥਿ, ਪਹੂਤਂ ਮਯ੍ਹ ਪਿਪ੍ਫਲਿ.

੧੦੦. ਏਸ ਭਿਯ੍ਯੋ ਪਵੇਕ੍ਖਾਮਿ, ਵਮ੍ਮਿਕਂ ਸਤਪੋਰਿਸਂ;

ਤੇਲਂ ਲੋਣਞ੍ਚ ਕਿਤ੍ਤੇਸਿ [ਕਿਨ੍ਤੇਸਿ (ਸ੍ਯਾ. ਪੀ.)], ਅਹਿਤਂ ਮਯ੍ਹ ਪਿਪ੍ਫਲੀਤਿ.

ਗੋਧਰਾਜਜਾਤਕਂ ਪਞ੍ਚਮਂ.

੩੨੬. ਕਕ੍ਕਾਰੁਜਾਤਕਂ (੪-੩-੬)

੧੦੧. ਕਾਯੇਨ ਯੋ ਨਾਵਹਰੇ, ਵਾਚਾਯ ਨ ਮੁਸਾ ਭਣੇ;

ਯਸੋ ਲਦ੍ਧਾ ਨ ਮਜ੍ਜੇਯ੍ਯ, ਸ ਵੇ ਕਕ੍ਕਾਰੁਮਰਹਤਿ.

੧੦੨. ਧਮ੍ਮੇਨ ਵਿਤ੍ਤਮੇਸੇਯ੍ਯ, ਨ ਨਿਕਤ੍ਯਾ ਧਨਂ ਹਰੇ;

ਭੋਗੇ ਲਦ੍ਧਾ ਨ ਮਜ੍ਜੇਯ੍ਯ, ਸ ਵੇ ਕਕ੍ਕਾਰੁਮਰਹਤਿ.

੧੦੩. ਯਸ੍ਸ ਚਿਤ੍ਤਂ ਅਹਾਲਿਦ੍ਦਂ, ਸਦ੍ਧਾ ਚ ਅਵਿਰਾਗਿਨੀ;

ਏਕੋ ਸਾਦੁਂ ਨ ਭੁਞ੍ਜੇਯ੍ਯ, ਸ ਵੇ ਕਕ੍ਕਾਰੁਮਰਹਤਿ.

੧੦੪. ਸਮ੍ਮੁਖਾ ਵਾ ਤਿਰੋਕ੍ਖਾ ਵਾ [ਪਰੋਕ੍ਖਾ ਵਾ (ਪੀ.), ਪਰਮ੍ਮੁਖਾ (ਕ.)], ਯੋ ਸਨ੍ਤੇ ਨ ਪਰਿਭਾਸਤਿ;

ਯਥਾਵਾਦੀ ਤਥਾਕਾਰੀ, ਸ ਵੇ ਕਕ੍ਕਾਰੁਮਰਹਤੀਤਿ.

ਕਕ੍ਕਾਰੁਜਾਤਕਂ ਛਟ੍ਠਂ.

੩੨੭. ਕਾਕਵਤੀਜਾਤਕਂ (੪-੩-੭)

੧੦੫. ਵਾਤਿ ਚਾਯਂ [ਵਾਯਂ (ਕ.)] ਤਤੋ ਗਨ੍ਧੋ, ਯਤ੍ਥ ਮੇ ਵਸਤੀ ਪਿਯਾ;

ਦੂਰੇ ਇਤੋ ਹਿ ਕਾਕਵਤੀ [ਕਾਕਾਤੀ (ਸੀ.), ਕਾਕਾਤਿ (ਸ੍ਯਾ. ਪੀ.)], ਯਤ੍ਥ ਮੇ ਨਿਰਤੋ ਮਨੋ.

੧੦੬. ਕਥਂ ਸਮੁਦ੍ਦਮਤਰੀ, ਕਥਂ ਅਤਰਿ ਕੇਪੁਕਂ [ਕੇਬੁਕਂ (ਸੀ. ਪੀ.)];

ਕਥਂ ਸਤ੍ਤ ਸਮੁਦ੍ਦਾਨਿ, ਕਥਂ ਸਿਮ੍ਬਲਿਮਾਰੁਹਿ.

੧੦੭. ਤਯਾ ਸਮੁਦ੍ਦਮਤਰਿਂ, ਤਯਾ ਅਤਰਿ ਕੇਪੁਕਂ [ਕੇਬੁਕਂ (ਸੀ. ਪੀ.)];

ਤਯਾ ਸਤ੍ਤ ਸਮੁਦ੍ਦਾਨਿ, ਤਯਾ ਸਿਮ੍ਬਲਿਮਾਰੁਹਿਂ.

੧੦੮. ਧਿਰਤ੍ਥੁਮਂ ਮਹਾਕਾਯਂ, ਧਿਰਤ੍ਥੁਮਂ ਅਚੇਤਨਂ;

ਯਤ੍ਥ ਜਾਯਾਯਹਂ ਜਾਰਂ, ਆਵਹਾਮਿ ਵਹਾਮਿ ਚਾਤਿ.

ਕਾਕਵਤੀਜਾਤਕਂ ਸਤ੍ਤਮਂ.

੩੨੮. ਅਨਨੁਸੋਚਿਯਜਾਤਕਂ (੪-੩-੮)

੧੦੯. ਬਹੂਨਂ ਵਿਜ੍ਜਤੀ ਭੋਤੀ, ਤੇਹਿ ਮੇ ਕਿਂ ਭਵਿਸ੍ਸਤਿ;

ਤਸ੍ਮਾ ਏਤਂ ਨ ਸੋਚਾਮਿ, ਪਿਯਂ ਸਮ੍ਮਿਲ੍ਲਹਾਸਿਨਿਂ.

੧੧੦. ਤਂ ਤਂ ਚੇ ਅਨੁਸੋਚੇਯ੍ਯ, ਯਂ ਯਂ ਤਸ੍ਸ ਨ ਵਿਜ੍ਜਤਿ;

ਅਤ੍ਤਾਨਮਨੁਸੋਚੇਯ੍ਯ, ਸਦਾ ਮਚ੍ਚੁਵਸਂ ਪਤਂ.

੧੧੧. ਨ ਹੇਵ ਠਿਤਂ ਨਾਸੀਨਂ, ਨ ਸਯਾਨਂ ਨ ਪਦ੍ਧਗੁਂ [ਪਤ੍ਥਗੁਂ (ਸ੍ਯਾ.)];

ਯਾਵ ਬ੍ਯਾਤਿ ਨਿਮਿਸਤਿ, ਤਤ੍ਰਾਪਿ ਰਸਤੀ [ਸਰਤੀ (ਸੀ. ਸ੍ਯਾ. ਪੀ.)] ਵਯੋ.

੧੧੨. ਤਤ੍ਥਤ੍ਤਨਿ ਵਤਪ੍ਪਦ੍ਧੇ [ਵਤ ਪਨ੍ਥੇ (ਸ੍ਯਾ.), ਵਤ ਬਨ੍ਧੇ (ਕ.) ਵਤ + ਪ-ਅਦ੍ਧੇ = ਵਤਪ੍ਪਦ੍ਧੇ], ਵਿਨਾਭਾਵੇ ਅਸਂਸਯੇ;

ਭੂਤਂ ਸੇਸਂ ਦਯਿਤਬ੍ਬਂ, ਵੀਤਂ ਅਨਨੁਸੋਚਿਯਨ੍ਤਿ [ਚਵਿਤਂ ਨਾਨੁਸੋਚਿਯਨ੍ਤਿ (ਸ੍ਯਾ.), ਮਤਨ੍ਤਂ ਨਾਨੁਸੋਚਿਯਂ (ਕ.)].

ਅਨਨੁਸੋਚਿਯਜਾਤਕਂ ਅਟ੍ਠਮਂ.

੩੨੯. ਕਾਲ਼ਬਾਹੁਜਾਤਕਂ (੪-੩-੯)

੧੧੩. ਯਂ ਅਨ੍ਨਪਾਨਸ੍ਸ ਪੁਰੇ ਲਭਾਮ, ਤਂ ਦਾਨਿ ਸਾਖਮਿਗਮੇਵ ਗਚ੍ਛਤਿ;

ਗਚ੍ਛਾਮ ਦਾਨਿ ਵਨਮੇਵ ਰਾਧ, ਅਸਕ੍ਕਤਾ ਚਸ੍ਮ ਧਨਞ੍ਜਯਾਯ [ਧਨਞ੍ਚਯਾਯ (ਕ.)].

੧੧੪. ਲਾਭੋ ਅਲਾਭੋ ਯਸੋ ਅਯਸੋ ਚ, ਨਿਨ੍ਦਾ ਪਸਂਸਾ ਚ ਸੁਖਞ੍ਚ ਦੁਕ੍ਖਂ;

ਏਤੇ ਅਨਿਚ੍ਚਾ ਮਨੁਜੇਸੁ ਧਮ੍ਮਾ, ਮਾ ਸੋਚਿ ਕਿਂ ਸੋਚਸਿ ਪੋਟ੍ਠਪਾਦ.

੧੧੫. ਅਦ੍ਧਾ ਤੁਵਂ ਪਣ੍ਡਿਤਕੋਸਿ ਰਾਧ, ਜਾਨਾਸਿ ਅਤ੍ਥਾਨਿ ਅਨਾਗਤਾਨਿ;

ਕਥਂ ਨੁ ਸਾਖਾਮਿਗਂ ਦਕ੍ਖਿਸਾਮ [ਦਕ੍ਖਿਯਾਮ (ਕ.), ਦਕ੍ਖਾਮ (ਸ੍ਯਾ.)], ਨਿਦ੍ਧਾਵਿਤਂ [ਨਿਦ੍ਧਾਪਿਤਂ (ਸੀ. ਸ੍ਯਾ.), ਨਿਬ੍ਬਾਪਿਤਂ (ਪੀ.), ਨਿਚ੍ਛਦਂ (ਕ.)] ਰਾਜਕੁਲਤੋਵ ਜਮ੍ਮਂ.

੧੧੬. ਚਾਲੇਤਿ ਕਣ੍ਣਂ ਭਕੁਟਿਂ ਕਰੋਤਿ, ਮੁਹੁਂ ਮੁਹੁਂ ਭਾਯਯਤੇ [ਭਾਯਤੇ (ਸ੍ਯਾ.), ਭਾਯਾਪਤੇ (ਕ.)] ਕੁਮਾਰੇ;

ਸਯਮੇਵ ਤਂ ਕਾਹਤਿ ਕਾਲ਼ਬਾਹੁ, ਯੇਨਾਰਕਾ ਠਸ੍ਸਤਿ ਅਨ੍ਨਪਾਨਾਤਿ.

ਕਾਲ਼ਬਾਹੁਜਾਤਕਂ ਨਵਮਂ.

੩੩੦. ਸੀਲਵੀਮਂਸਜਾਤਕਂ (੪-੩-੧੦)

੧੧੭. ਸੀਲਂ ਕਿਰੇਵ ਕਲ੍ਯਾਣਂ, ਸੀਲਂ ਲੋਕੇ ਅਨੁਤ੍ਤਰਂ;

ਪਸ੍ਸ ਘੋਰਵਿਸੋ ਨਾਗੋ, ਸੀਲਵਾਤਿ ਨ ਹਞ੍ਞਤਿ.

੧੧੮. ਯਾਵਦੇਵਸ੍ਸਹੂ ਕਿਞ੍ਚਿ, ਤਾਵਦੇਵ ਅਖਾਦਿਸੁਂ;

ਸਙ੍ਗਮ੍ਮ ਕੁਲਲਾ ਲੋਕੇ, ਨ ਹਿਂਸਨ੍ਤਿ ਅਕਿਞ੍ਚਨਂ.

੧੧੯. ਸੁਖਂ ਨਿਰਾਸਾ ਸੁਪਤਿ, ਆਸਾ ਫਲਵਤੀ ਸੁਖਾ;

ਆਸਂ ਨਿਰਾਸਂ ਕਤ੍ਵਾਨ, ਸੁਖਂ ਸੁਪਤਿ ਪਿਙ੍ਗਲਾ.

੧੨੦. ਨ ਸਮਾਧਿਪਰੋ ਅਤ੍ਥਿ, ਅਸ੍ਮਿਂ ਲੋਕੇ ਪਰਮ੍ਹਿ ਚ;

ਨ ਪਰਂ ਨਾਪਿ ਅਤ੍ਤਾਨਂ, ਵਿਹਿਂਸਤਿ ਸਮਾਹਿਤੋਤਿ.

ਸੀਲਵੀਮਂਸਜਾਤਕਂ ਦਸਮਂ.

ਕੁਟਿਦੂਸਕਵਗ੍ਗੋ ਤਤਿਯੋ.

ਤਸ੍ਸੁਦ੍ਦਾਨਂ –

ਸਮਨੁਸ੍ਸ -ਸਦੁਦ੍ਦੁਭ-ਯਾਚਨਕੋ, ਅਥ ਮੇਣ੍ਡਵਰੁਤ੍ਤਮ-ਗੋਧਵਰੋ;

ਅਥ ਕਾਯਸਕੇਪੁਕ ਭੋਤੀਵਰੋ, ਅਥ ਰਾਧਸੁਸੀਲਵਰੇਨ ਦਸਾਤਿ.