੩੧੭. ਮਤਰੋਦਨਜਾਤਕਂ (੪-੨-੭)

੬੫. ਮਤਂ ਮਤਂ ਏਵ [ਮਤਮਤਮੇਵ (ਸੀ. ਸ੍ਯਾ. ਪੀ.)] ਰੋਦਥ, ਨ ਹਿ ਤਂ ਰੋਦਥ ਯੋ ਮਰਿਸ੍ਸਤਿ;

ਸਬ੍ਬੇਪਿ [ਸਬ੍ਬੇਵ (ਸੀ. ਸ੍ਯਾ. ਪੀ.)] ਸਰੀਰਧਾਰਿਨੋ, ਅਨੁਪੁਬ੍ਬੇਨ ਜਹਨ੍ਤਿ ਜੀਵਿਤਂ.

੬੬. ਦੇਵਮਨੁਸ੍ਸਾ ਚਤੁਪ੍ਪਦਾ, ਪਕ੍ਖਿਗਣਾ ਉਰਗਾ ਚ ਭੋਗਿਨੋ;

ਸਮ੍ਹਿ [ਯਮ੍ਹਿ (ਸ੍ਯਾ.), ਅਸ੍ਮਿਂ (ਪੀ. ਕ.)] ਸਰੀਰੇ ਅਨਿਸ੍ਸਰਾ, ਰਮਮਾਨਾਵ ਜਹਨ੍ਤਿ ਜੀਵਿਤਂ.

੬੭. ਏਵਂ ਚਲਿਤਂ ਅਸਣ੍ਠਿਤਂ, ਸੁਖਦੁਕ੍ਖਂ ਮਨੁਜੇਸ੍ਵਪੇਕ੍ਖਿਯ;

ਕਨ੍ਦਿਤਰੁਦਿਤਂ ਨਿਰਤ੍ਥਕਂ, ਕਿਂ ਵੋ ਸੋਕਗਣਾਭਿਕੀਰਰੇ.

੬੮. ਧੁਤ੍ਤਾ ਚ ਸੋਣ੍ਡਾ [ਧੁਤ੍ਤਾ ਸੋਣ੍ਡਾ (ਸੀ.), ਧੁਤ੍ਤਾ ਸੋਣ੍ਡਾ ਚ (ਸ੍ਯਾ.)] ਅਕਤਾ, ਬਾਲਾ ਸੂਰਾ ਅਯੋਗਿਨੋ [ਬਾਲਾ ਸੂਰਾ ਵੀਰਾ ਅਯੋਗਿਨੋ (ਪੀ.)];

ਧੀਰਂ ਮਞ੍ਞਨ੍ਤਿ ਬਾਲੋਤਿ, ਯੇ ਧਮ੍ਮਸ੍ਸ ਅਕੋਵਿਦਾਤਿ.

ਮਤਰੋਦਨਜਾਤਕਂ ਸਤ੍ਤਮਂ.