੨. ਪੁਚਿਮਨ੍ਦਵਗ੍ਗੋ
੩੧੧. ਪੁਚਿਮਨ੍ਦਜਾਤਕਂ (੪-੨-੧)
੪੧. ਉਟ੍ਠੇਹਿ ਚੋਰ ਕਿਂ ਸੇਸਿ, ਕੋ ਅਤ੍ਥੋ ਸੁਪਨੇਨ [ਸੁਪਿਤੇਨ (ਸੀ.), ਸੁਪਿਨੇਨ (ਪੀ. ਕ.)] ਤੇ;
ਮਾ ਤਂ ਗਹੇਸੁਂ [ਗਣ੍ਹੇਯ੍ਯੁਂ (ਕ.)] ਰਾਜਾਨੋ, ਗਾਮੇ ਕਿਬ੍ਬਿਸਕਾਰਕਂ.
੪੨. ਯਂ ਨੁ [ਨੂਨ (ਸ੍ਯਾ.)] ਚੋਰਂ ਗਹੇਸ੍ਸਨ੍ਤਿ, ਗਾਮੇ ਕਿਬ੍ਬਿਸਕਾਰਕਂ;
ਕਿਂ ਤਤ੍ਥ ਪੁਚਿਮਨ੍ਦਸ੍ਸ, ਵਨੇ ਜਾਤਸ੍ਸ ਤਿਟ੍ਠਤੋ.
੪੩. ਨ ਤ੍ਵਂ ਅਸ੍ਸਤ੍ਥ ਜਾਨਾਸਿ, ਮਮ ਚੋਰਸ੍ਸ ਚਨ੍ਤਰਂ;
ਚੋਰਂ ਗਹੇਤ੍ਵਾ ਰਾਜਾਨੋ, ਗਾਮੇ ਕਿਬ੍ਬਿਸਕਾਰਕਂ;
ਅਪ੍ਪੇਨ੍ਤਿ [ਅਚ੍ਚੇਨ੍ਤਿ (ਸ੍ਯਾ.)] ਨਿਮ੍ਬਸੂਲਸ੍ਮਿਂ, ਤਸ੍ਮਿਂ ਮੇ ਸਙ੍ਕਤੇ ਮਨੋ.
੪੪. ਸਙ੍ਕੇਯ੍ਯ ਸਙ੍ਕਿਤਬ੍ਬਾਨਿ, ਰਕ੍ਖੇਯ੍ਯਾਨਾਗਤਂ ਭਯਂ;
ਅਨਾਗਤਭਯਾ ਧੀਰੋ, ਉਭੋ ਲੋਕੇ ਅਵੇਕ੍ਖਤੀਤਿ.
ਪੁਚਿਮਨ੍ਦਜਾਤਕਂ ਪਠਮਂ.
੩੧੨. ਕਸ੍ਸਪਮਨ੍ਦਿਯਜਾਤਕਂ (੪-੨-੨)
੪੫. ਅਪਿ ਕਸ੍ਸਪ ਮਨ੍ਦਿਯਾ, ਯੁਵਾ ਸਪਤਿ ਹਨ੍ਤਿ [ਸਮ੍ਪਟਿਹਨ੍ਤਿ (ਕ.)] ਵਾ;
ਸਬ੍ਬਂ ਤਂ ਖਮਤੇ ਧੀਰੋ, ਪਣ੍ਡਿਤੋ ਤਂ ਤਿਤਿਕ੍ਖਤਿ.
੪੬. ਸਚੇਪਿ ਸਨ੍ਤੋ ਵਿਵਦਨ੍ਤਿ, ਖਿਪ੍ਪਂ ਸਨ੍ਧੀਯਰੇ ਪੁਨ;
ਬਾਲਾ ਪਤ੍ਤਾਵ ਭਿਜ੍ਜਨ੍ਤਿ, ਨ ਤੇ ਸਮਥਮਜ੍ਝਗੂ.
੪੭. ਏਤੇ ਭਿਯ੍ਯੋ ਸਮਾਯਨ੍ਤਿ, ਸਨ੍ਧਿ ਤੇਸਂ ਨ ਜੀਰਤਿ;
ਯੋ ਚਾਧਿਪਨ੍ਨਂ ਜਾਨਾਤਿ, ਯੋ ਚ ਜਾਨਾਤਿ ਦੇਸਨਂ.
੪੮. ਏਸੋ ਹਿ ਉਤ੍ਤਰਿਤਰੋ, ਭਾਰਵਹੋ ਧੁਰਦ੍ਧਰੋ;
ਯੋ ਪਰੇਸਾਧਿਪਨ੍ਨਾਨਂ, ਸਯਂ ਸਨ੍ਧਾਤੁਮਰਹਤੀਤਿ.
ਕਸ੍ਸਪਮਨ੍ਦਿਯਜਾਤਕਂ ਦੁਤਿਯਂ.
੩੧੩. ਖਨ੍ਤੀਵਾਦੀਜਾਤਕਂ (੪-੨-੩)
੪੯. ਯੋ ਤੇ ਹਤ੍ਥੇ ਚ ਪਾਦੇ ਚ, ਕਣ੍ਣਨਾਸਞ੍ਚ ਛੇਦਯਿ;
ਤਸ੍ਸ ਕੁਜ੍ਝ ਮਹਾਵੀਰ, ਮਾ ਰਟ੍ਠਂ ਵਿਨਸਾ [ਵਿਨਸ੍ਸ (ਕ. ਸੀ. ਸ੍ਯਾ. ਕ.)] ਇਦਂ.
੫੦. ਯੋ ਮੇ ਹਤ੍ਥੇ ਚ ਪਾਦੇ ਚ, ਕਣ੍ਣਨਾਸਞ੍ਚ ਛੇਦਯਿ;
ਚਿਰਂ ਜੀਵਤੁ ਸੋ ਰਾਜਾ, ਨ ਹਿ ਕੁਜ੍ਝਨ੍ਤਿ ਮਾਦਿਸਾ.
੫੧. ਅਹੂ ਅਤੀਤਮਦ੍ਧਾਨਂ [ਅਹੁ ਅਤੀਤਮਦ੍ਧਾਨੇ (ਸ੍ਯਾ. ਪੀ. ਕ.)], ਸਮਣੋ ਖਨ੍ਤਿਦੀਪਨੋ;
ਤਂ ਖਨ੍ਤਿਯਾਯੇਵ ਠਿਤਂ, ਕਾਸਿਰਾਜਾ ਅਛੇਦਯਿ.
੫੨. ਤਸ੍ਸ ਕਮ੍ਮ [ਕਮ੍ਮਸ੍ਸ (ਸੀ. ਪੀ.)] ਫਰੁਸਸ੍ਸ, ਵਿਪਾਕੋ ਕਟੁਕੋ ਅਹੁ;
ਯਂ ਕਾਸਿਰਾਜਾ ਵੇਦੇਸਿ, ਨਿਰਯਮ੍ਹਿ ਸਮਪ੍ਪਿਤੋਤਿ.
ਖਨ੍ਤੀਵਾਦੀਜਾਤਕਂ ਤਤਿਯਂ.
੩੧੪. ਲੋਹਕੁਮ੍ਭਿਜਾਤਕਂ (੪-੨-੪)
੫੩. ਦੁਜ੍ਜੀਵਿਤਮਜੀਵਿਮ੍ਹ, ਯੇ ਸਨ੍ਤੇ [ਯੇਸਂ ਨੋ (ਸ੍ਯਾ. ਕ.)] ਨ ਦਦਮ੍ਹਸੇ;
ਵਿਜ੍ਜਮਾਨੇਸੁ ਭੋਗੇਸੁ, ਦੀਪਂ ਨਾਕਮ੍ਹ ਅਤ੍ਤਨੋ.
੫੪. ਸਟ੍ਠਿ [ਸਟ੍ਠਿਂ (ਸ੍ਯਾ.)] ਵਸ੍ਸਸਹਸ੍ਸਾਨਿ, ਪਰਿਪੁਣ੍ਣਾਨਿ ਸਬ੍ਬਸੋ;
ਨਿਰਯੇ ਪਚ੍ਚਮਾਨਾਨਂ, ਕਦਾ ਅਨ੍ਤੋ ਭਵਿਸ੍ਸਤਿ.
੫੫. ਨਤ੍ਥਿ ਅਨ੍ਤੋ ਕੁਤੋ ਅਨ੍ਤੋ, ਨ ਅਨ੍ਤੋ ਪਟਿਦਿਸ੍ਸਤਿ;
ਤਦਾ ਹਿ ਪਕਤਂ ਪਾਪਂ, ਮਮ ਤੁਯ੍ਹਞ੍ਚ ਮਾਰਿਸਾ [ਮਾਰਿਸ (ਸੀ. ਸ੍ਯਾ. ਪੀ.)].
੫੬. ਸੋਹਂ ਨੂਨ ਇਤੋ ਗਨ੍ਤ੍ਵਾ, ਯੋਨਿਂ ਲਦ੍ਧਾਨ ਮਾਨੁਸਿਂ;
ਵਦਞ੍ਞੂ ਸੀਲਸਮ੍ਪਨ੍ਨੋ, ਕਾਹਾਮਿ ਕੁਸਲਂ ਬਹੁਨ੍ਤਿ.
ਲੋਹਕੁਮ੍ਭਿਜਾਤਕਂ ਚਤੁਤ੍ਥਂ.
੩੧੫. ਸਬ੍ਬਮਂਸਲਾਭਜਾਤਕਂ (੪-੨-੫)
੫੭. ਫਰੁਸਾ ਵਤ ਤੇ ਵਾਚਾ, ਮਂਸਂ [ਸਮ੍ਮ (ਪੀ. ਕ.)] ਯਾਚਨਕੋ ਅਸਿ [ਚਸਿ (ਪੀ.)];
ਕਿਲੋਮਸਦਿਸੀ [ਕਿਲੋਮਸ੍ਸ ਸਦਿਸਾ (ਪੀ.)] ਵਾਚਾ, ਕਿਲੋਮਂ ਸਮ੍ਮ ਦਮ੍ਮਿ ਤੇ.
੫੮. ਅਙ੍ਗਮੇਤਂ ਮਨੁਸ੍ਸਾਨਂ, ਭਾਤਾ ਲੋਕੇ ਪਵੁਚ੍ਚਤਿ;
ਅਙ੍ਗਸ੍ਸ ਸਦਿਸੀ ਵਾਚਾ [ਅਙ੍ਗਸ੍ਸਦਿਸੀ ਤੇ ਵਾਚਾ (ਕ.)], ਅਙ੍ਗਂ ਸਮ੍ਮ ਦਦਾਮਿ ਤੇ.
੫੯. ਤਾਤਾਤਿ ਪੁਤ੍ਤੋ ਵਦਮਾਨੋ, ਕਮ੍ਪੇਤਿ [ਸਮ੍ਮੇਤਿ (ਕ.)] ਹਦਯਂ ਪਿਤੁ;
ਹਦਯਸ੍ਸ ਸਦਿਸੀ [ਹਦਯਸ੍ਸਦਿਸੀ (ਕ.)] ਵਾਚਾ, ਹਦਯਂ ਸਮ੍ਮ ਦਮ੍ਮਿ ਤੇ.
੬੦. ਯਸ੍ਸ ਗਾਮੇ ਸਖਾ ਨਤ੍ਥਿ, ਯਥਾਰਞ੍ਞਂ ਤਥੇਵ ਤਂ;
ਸਬ੍ਬਸ੍ਸ ਸਦਿਸੀ ਵਾਚਾ, ਸਬ੍ਬਂ ਸਮ੍ਮ ਦਦਾਮਿ ਤੇਤਿ.
ਸਬ੍ਬਮਂਸਲਾਭਜਾਤਕਂ [ਮਂਸਜਾਤਕਂ (ਸੀ. ਸ੍ਯਾ. ਪੀ.)] ਪਞ੍ਚਮਂ.
੩੧੬. ਸਸਪਣ੍ਡਿਤਜਾਤਕਂ (੪-੨-੬)
੬੧. ਸਤ੍ਤ ਮੇ ਰੋਹਿਤਾ ਮਚ੍ਛਾ, ਉਦਕਾ ਥਲਮੁਬ੍ਭਤਾ;
ਇਦਂ ਬ੍ਰਾਹ੍ਮਣ ਮੇ ਅਤ੍ਥਿ, ਏਤਂ ਭੁਤ੍ਵਾ ਵਨੇ ਵਸ.
੬੨. ਦੁਸ੍ਸ ਮੇ ਖੇਤ੍ਤਪਾਲਸ੍ਸ, ਰਤ੍ਤਿਭਤ੍ਤਂ ਅਪਾਭਤਂ;
ਮਂਸਸੂਲਾ ਚ ਦ੍ਵੇ ਗੋਧਾ, ਏਕਞ੍ਚ ਦਧਿਵਾਰਕਂ;
ਇਦਂ ਬ੍ਰਾਹ੍ਮਣ ਮੇ ਅਤ੍ਥਿ, ਏਤਂ ਭੁਤ੍ਵਾ ਵਨੇ ਵਸ.
੬੩. ਅਮ੍ਬਪਕ੍ਕਂ ਦਕਂ [ਅਮ੍ਬਪਕ੍ਕੋਦਕਂ (ਸੀ. ਪੀ.)] ਸੀਤਂ, ਸੀਤਚ੍ਛਾਯਾ ਮਨੋਰਮਾ [ਸੀਤਚ੍ਛਾਯਂ ਮਨੋਰਮਂ (ਸੀ. ਸ੍ਯਾ. ਪੀ.)];
ਇਦਂ ਬ੍ਰਾਹ੍ਮਣ ਮੇ ਅਤ੍ਥਿ, ਏਤਂ ਭੁਤ੍ਵਾ ਵਨੇ ਵਸ.
੬੪. ਨ ਸਸਸ੍ਸ ਤਿਲਾ ਅਤ੍ਥਿ, ਨ ਮੁਗ੍ਗਾ ਨਪਿ ਤਣ੍ਡੁਲਾ;
ਇਮਿਨਾ ਅਗ੍ਗਿਨਾ ਪਕ੍ਕਂ, ਮਮਂ [ਮਂਸਂ (ਕ.)] ਭੁਤ੍ਵਾ ਵਨੇ ਵਸਾਤਿ.
ਸਸਪਣ੍ਡਿਤਜਾਤਕਂ ਛਟ੍ਠਂ.
੩੧੭. ਮਤਰੋਦਨਜਾਤਕਂ (੪-੨-੭)
੬੫. ਮਤਂ ਮਤਂ ਏਵ [ਮਤਮਤਮੇਵ (ਸੀ. ਸ੍ਯਾ. ਪੀ.)] ਰੋਦਥ, ਨ ਹਿ ਤਂ ਰੋਦਥ ਯੋ ਮਰਿਸ੍ਸਤਿ;
ਸਬ੍ਬੇਪਿ [ਸਬ੍ਬੇਵ (ਸੀ. ਸ੍ਯਾ. ਪੀ.)] ਸਰੀਰਧਾਰਿਨੋ, ਅਨੁਪੁਬ੍ਬੇਨ ਜਹਨ੍ਤਿ ਜੀਵਿਤਂ.
੬੬. ਦੇਵਮਨੁਸ੍ਸਾ ਚਤੁਪ੍ਪਦਾ, ਪਕ੍ਖਿਗਣਾ ਉਰਗਾ ਚ ਭੋਗਿਨੋ;
ਸਮ੍ਹਿ [ਯਮ੍ਹਿ (ਸ੍ਯਾ.), ਅਸ੍ਮਿਂ (ਪੀ. ਕ.)] ਸਰੀਰੇ ਅਨਿਸ੍ਸਰਾ, ਰਮਮਾਨਾਵ ਜਹਨ੍ਤਿ ਜੀਵਿਤਂ.
੬੭. ਏਵਂ ਚਲਿਤਂ ਅਸਣ੍ਠਿਤਂ, ਸੁਖਦੁਕ੍ਖਂ ਮਨੁਜੇਸ੍ਵਪੇਕ੍ਖਿਯ;
ਕਨ੍ਦਿਤਰੁਦਿਤਂ ਨਿਰਤ੍ਥਕਂ, ਕਿਂ ਵੋ ਸੋਕਗਣਾਭਿਕੀਰਰੇ.
੬੮. ਧੁਤ੍ਤਾ ਚ ਸੋਣ੍ਡਾ [ਧੁਤ੍ਤਾ ਸੋਣ੍ਡਾ (ਸੀ.), ਧੁਤ੍ਤਾ ਸੋਣ੍ਡਾ ਚ (ਸ੍ਯਾ.)] ਅਕਤਾ, ਬਾਲਾ ਸੂਰਾ ਅਯੋਗਿਨੋ [ਬਾਲਾ ਸੂਰਾ ਵੀਰਾ ਅਯੋਗਿਨੋ (ਪੀ.)];
ਧੀਰਂ ਮਞ੍ਞਨ੍ਤਿ ਬਾਲੋਤਿ, ਯੇ ਧਮ੍ਮਸ੍ਸ ਅਕੋਵਿਦਾਤਿ.
ਮਤਰੋਦਨਜਾਤਕਂ ਸਤ੍ਤਮਂ.
੩੧੮. ਕਣਵੇਰਜਾਤਕਂ (੪-੨-੮)
੬੯. ਯਂ ਤਂ ਵਸਨ੍ਤਸਮਯੇ, ਕਣਵੇਰੇਸੁ ਭਾਣੁਸੁ;
ਸਾਮਂ ਬਾਹਾਯ ਪੀਲ਼ੇਸਿ, ਸਾ ਤਂ ਆਰੋਗ੍ਯਮਬ੍ਰਵਿ.
੭੦. ਅਮ੍ਭੋ ਨ ਕਿਰ ਸਦ੍ਧੇਯ੍ਯਂ, ਯਂ ਵਾਤੋ ਪਬ੍ਬਤਂ ਵਹੇ;
ਪਬ੍ਬਤਞ੍ਚੇ ਵਹੇ ਵਾਤੋ, ਸਬ੍ਬਮ੍ਪਿ ਪਥਵਿਂ ਵਹੇ;
ਯਤ੍ਥ ਸਾਮਾ ਕਾਲਕਤਾ [ਕਾਲਙ੍ਕਤਾ (ਕ.)], ਸਾ ਮਂ ਆਰੋਗ੍ਯਮਬ੍ਰਵਿ.
੭੧. ਨ ਚੇਵ ਸਾ ਕਾਲਕਤਾ, ਨ ਚ ਸਾ ਅਞ੍ਞਮਿਚ੍ਛਤਿ;
ਏਕਭਤ੍ਤਿਕਿਨੀ [ਏਕਭਤ੍ਤਾ ਕਿਰ (ਸੀ. ਸ੍ਯਾ.), ਏਕਭਤ੍ਤਕਿਨੀ (ਪੀ.)] ਸਾਮਾ, ਤਮੇਵ ਅਭਿਕਙ੍ਖਤਿ.
੭੨. ਅਸਨ੍ਥੁਤਂ ਮਂ ਚਿਰਸਨ੍ਥੁਤੇਨ [ਅਸਨ੍ਧਤਂ ਮਂ ਚਿਰਸਨ੍ਧਤੇਨ (ਕ.)], ਨਿਮੀਨਿ ਸਾਮਾ ਅਧੁਵਂ ਧੁਵੇਨ;
ਮਯਾਪਿ ਸਾਮਾ ਨਿਮਿਨੇਯ੍ਯ ਅਞ੍ਞਂ, ਇਤੋ ਅਹਂ ਦੂਰਤਰਂ ਗਮਿਸ੍ਸਨ੍ਤਿ.
ਕਣਵੇਰਜਾਤਕਂ ਅਟ੍ਠਮਂ.
੩੧੯. ਤਿਤ੍ਤਿਰਜਾਤਕਂ (੪-੨-੯)
੭੩. ਸੁਸੁਖਂ ਵਤ ਜੀਵਾਮਿ, ਲਭਾਮਿ ਚੇਵ ਭੁਞ੍ਜਿਤੁਂ;
ਪਰਿਪਨ੍ਥੇਵ ਤਿਟ੍ਠਾਮਿ, ਕਾ ਨੁ ਭਨ੍ਤੇ ਗਤੀ ਮਮ.
੭੪. ਮਨੋ ਚੇ ਤੇ ਨਪ੍ਪਣਮਤਿ, ਪਕ੍ਖਿ ਪਾਪਸ੍ਸ ਕਮ੍ਮੁਨੋ;
ਅਬ੍ਯਾਵਟਸ੍ਸ ਭਦ੍ਰਸ੍ਸ, ਨ ਪਾਪਮੁਪਲਿਮ੍ਪਤਿ.
੭੫. ਞਾਤਕੋ ਨੋ ਨਿਸਿਨ੍ਨੋਤਿ, ਬਹੁ ਆਗਚ੍ਛਤੇ ਜਨੋ;
ਪਟਿਚ੍ਚ ਕਮ੍ਮਂ ਫੁਸਤਿ, ਤਸ੍ਮਿਂ ਮੇ ਸਙ੍ਕਤੇ ਮਨੋ.
੭੬. ਨ ਪਟਿਚ੍ਚ ਕਮ੍ਮਂ ਫੁਸਤਿ, ਮਨੋ ਚੇ ਨਪ੍ਪਦੁਸ੍ਸਤਿ;
ਅਪ੍ਪੋਸ੍ਸੁਕ੍ਕਸ੍ਸ ਭਦ੍ਰਸ੍ਸ, ਨ ਪਾਪਮੁਪਲਿਮ੍ਪਤੀਤਿ.
ਤਿਤ੍ਤਿਰਜਾਤਕਂ ਨਵਮਂ.
੩੨੦. ਸੁਚ੍ਚਜਜਾਤਕਂ (੪-੨-੧੦)
੭੭. ਸੁਚ੍ਚਜਂ ਵਤ ਨਚ੍ਚਜਿ, ਵਾਚਾਯ ਅਦਦਂ ਗਿਰਿਂ;
ਕਿਂ ਹਿਤਸ੍ਸ ਚਜਨ੍ਤਸ੍ਸ, ਵਾਚਾਯ ਅਦਦ ਪਬ੍ਬਤਂ.
੭੮. ਯਞ੍ਹਿ ਕਯਿਰਾ ਤਞ੍ਹਿ ਵਦੇ, ਯਂ ਨ ਕਯਿਰਾ ਨ ਤਂ ਵਦੇ;
ਅਕਰੋਨ੍ਤਂ ਭਾਸਮਾਨਂ, ਪਰਿਜਾਨਨ੍ਤਿ ਪਣ੍ਡਿਤਾ.
੭੯. ਰਾਜਪੁਤ੍ਤ ਨਮੋ ਤ੍ਯਤ੍ਥੁ, ਸਚ੍ਚੇ ਧਮ੍ਮੇ ਠਿਤੋ ਚਸਿ;
ਯਸ੍ਸ ਤੇ ਬ੍ਯਸਨਂ ਪਤ੍ਤੋ, ਸਚ੍ਚਸ੍ਮਿਂ ਰਮਤੇ ਮਨੋ.
੮੦. ਯਾ ਦਲਿਦ੍ਦੀ ਦਲਿਦ੍ਦਸ੍ਸ, ਅਡ੍ਢਾ ਅਡ੍ਢਸ੍ਸ ਕਿਤ੍ਤਿਮ [ਕਿਤ੍ਤਿਮਾ (ਸੀ. ਸ੍ਯਾ. ਪੀ.)];
ਸਾ ਹਿਸ੍ਸ ਪਰਮਾ ਭਰਿਯਾ, ਸਹਿਰਞ੍ਞਸ੍ਸ ਇਤ੍ਥਿਯੋਤਿ.
ਸੁਚ੍ਚਜਜਾਤਕਂ ਦਸਮਂ.
ਪੁਚਿਮਨ੍ਦਵਗ੍ਗੋ ਦੁਤਿਯੋ.
ਤਸ੍ਸੁਦ੍ਦਾਨਂ –
ਅਥ ਚੋਰ ਸਕਸ੍ਸਪ ਖਨ੍ਤੀਵਰੋ, ਦੁਜ੍ਜੀਵਿਤਤਾ ਚ ਵਰਾ ਫਰੁਸਾ;
ਅਥ ਸਸ ਮਤਞ੍ਚ ਵਸਨ੍ਤ ਸੁਖਂ, ਸੁਚ੍ਚਜਂਵਤਨਚ੍ਚਜਿਨਾ ਚ ਦਸਾਤਿ.