੩੧੧. ਪੁਚਿਮਨ੍ਦਜਾਤਕਂ (੪-੨-੧)

੪੧. ਉਟ੍ਠੇਹਿ ਚੋਰ ਕਿਂ ਸੇਸਿ, ਕੋ ਅਤ੍ਥੋ ਸੁਪਨੇਨ [ਸੁਪਿਤੇਨ (ਸੀ.), ਸੁਪਿਨੇਨ (ਪੀ. ਕ.)] ਤੇ;

ਮਾ ਤਂ ਗਹੇਸੁਂ [ਗਣ੍ਹੇਯ੍ਯੁਂ (ਕ.)] ਰਾਜਾਨੋ, ਗਾਮੇ ਕਿਬ੍ਬਿਸਕਾਰਕਂ.

੪੨. ਯਂ ਨੁ [ਨੂਨ (ਸ੍ਯਾ.)] ਚੋਰਂ ਗਹੇਸ੍ਸਨ੍ਤਿ, ਗਾਮੇ ਕਿਬ੍ਬਿਸਕਾਰਕਂ;

ਕਿਂ ਤਤ੍ਥ ਪੁਚਿਮਨ੍ਦਸ੍ਸ, ਵਨੇ ਜਾਤਸ੍ਸ ਤਿਟ੍ਠਤੋ.

੪੩. ਨ ਤ੍ਵਂ ਅਸ੍ਸਤ੍ਥ ਜਾਨਾਸਿ, ਮਮ ਚੋਰਸ੍ਸ ਚਨ੍ਤਰਂ;

ਚੋਰਂ ਗਹੇਤ੍ਵਾ ਰਾਜਾਨੋ, ਗਾਮੇ ਕਿਬ੍ਬਿਸਕਾਰਕਂ;

ਅਪ੍ਪੇਨ੍ਤਿ [ਅਚ੍ਚੇਨ੍ਤਿ (ਸ੍ਯਾ.)] ਨਿਮ੍ਬਸੂਲਸ੍ਮਿਂ, ਤਸ੍ਮਿਂ ਮੇ ਸਙ੍ਕਤੇ ਮਨੋ.

੪੪. ਸਙ੍ਕੇਯ੍ਯ ਸਙ੍ਕਿਤਬ੍ਬਾਨਿ, ਰਕ੍ਖੇਯ੍ਯਾਨਾਗਤਂ ਭਯਂ;

ਅਨਾਗਤਭਯਾ ਧੀਰੋ, ਉਭੋ ਲੋਕੇ ਅਵੇਕ੍ਖਤੀਤਿ.

ਪੁਚਿਮਨ੍ਦਜਾਤਕਂ ਪਠਮਂ.