੫. ਕੁਮ੍ਭਵਗ੍ਗੋ

੨੯੧. ਸੁਰਾਘਟਜਾਤਕਂ (੨-੫-੧)

੧੨੧. ਸਬ੍ਬਕਾਮਦਦਂ ਕੁਮ੍ਭਂ, ਕੁਟਂ ਲਦ੍ਧਾਨ ਧੁਤ੍ਤਕੋ;

ਯਾਵ ਨਂ ਅਨੁਪਾਲੇਤਿ, ਤਾਵ ਸੋ ਸੁਖਮੇਧਤਿ.

੧੨੨. ਯਦਾ ਮਤ੍ਤੋ ਚ ਦਿਤ੍ਤੋ ਚ, ਪਮਾਦਾ ਕੁਮ੍ਭਮਬ੍ਭਿਦਾ;

ਤਦਾ ਨਗ੍ਗੋ ਚ ਪੋਤ੍ਥੋ ਚ, ਪਚ੍ਛਾ ਬਾਲੋ ਵਿਹਞ੍ਞਤਿ.

੧੨੩. ਏਵਮੇਵ ਯੋ ਧਨਂ ਲਦ੍ਧਾ, ਪਮਤ੍ਤੋ [ਅਮਤ੍ਤਾ (ਸੀ.), ਅਮਤ੍ਤੋ (ਪੀ.)] ਪਰਿਭੁਞ੍ਜਤਿ;

ਪਚ੍ਛਾ ਤਪ੍ਪਤਿ ਦੁਮ੍ਮੇਧੋ, ਕੁਟਂ ਭਿਤ੍ਵਾਵ [ਕੁਟਂ ਭਿਨ੍ਨੋਵ (ਸੀ. ਪੀ.), ਕੁਟਭਿਨ੍ਨੋਵ (?)] ਧੁਤ੍ਤਕੋਤਿ.

ਸੁਰਾਘਟ [ਭਦ੍ਰਘਟ (ਸੀ. ਪੀ.), ਭਦ੍ਰਘਟਭੇਦਕ (ਸ੍ਯਾ.)] ਜਾਤਕਂ ਪਠਮਂ.

੨੯੨. ਸੁਪਤ੍ਤਜਾਤਕਂ (੩-੫-੨)

੧੨੪. ਬਾਰਾਣਸ੍ਯਂ [ਬਾਰਾਣਸ੍ਸਂ (ਸੀ. ਪੀ.)] ਮਹਾਰਾਜ, ਕਾਕਰਾਜਾ ਨਿਵਾਸਕੋ [ਨਿਵਾਸਿਕੋ (ਸੀ. ਪੀ.)];

ਅਸੀਤਿਯਾ ਸਹਸ੍ਸੇਹਿ, ਸੁਪਤ੍ਤੋ ਪਰਿਵਾਰਿਤੋ.

੧੨੫. ਤਸ੍ਸ ਦੋਹਲ਼ਿਨੀ ਭਰਿਯਾ, ਸੁਫਸ੍ਸਾ ਭਕ੍ਖਿਤੁਮਿਚ੍ਛਤਿ [ਮਚ੍ਛਮਿਚ੍ਛਤਿ (ਸੀ. ਪੀ.)];

ਰਞ੍ਞੋ ਮਹਾਨਸੇ ਪਕ੍ਕਂ, ਪਚ੍ਚਗ੍ਘਂ ਰਾਜਭੋਜਨਂ.

੧੨੬. ਤੇਸਾਹਂ ਪਹਿਤੋ ਦੂਤੋ, ਰਞ੍ਞੋ ਚਮ੍ਹਿ ਇਧਾਗਤੋ;

ਭਤ੍ਤੁ ਅਪਚਿਤਿਂ ਕੁਮ੍ਮਿ, ਨਾਸਾਯਮਕਰਂ [ਮਕਰਿਂ (ਸੀ. ਨਿਸ੍ਸਯ)] ਵਣਨ੍ਤਿ.

ਸੁਪਤ੍ਤਜਾਤਕਂ ਦੁਤਿਯਂ.

੨੯੩. ਕਾਯਨਿਬ੍ਬਿਨ੍ਦਜਾਤਕਂ (੩-੫-੩)

੧੨੭. ਫੁਟ੍ਠਸ੍ਸ ਮੇ ਅਞ੍ਞਤਰੇਨ ਬ੍ਯਾਧਿਨਾ, ਰੋਗੇਨ ਬਾਲ਼੍ਹਂ ਦੁਖਿਤਸ੍ਸ ਰੁਪ੍ਪਤੋ;

ਪਰਿਸੁਸ੍ਸਤਿ ਖਿਪ੍ਪਮਿਦਂ ਕਲ਼ੇਵਰਂ, ਪੁਪ੍ਫਂ ਯਥਾ ਪਂਸੁਨਿ ਆਤਪੇ ਕਤਂ.

੧੨੮. ਅਜਞ੍ਞਂ ਜਞ੍ਞਸਙ੍ਖਾਤਂ, ਅਸੁਚਿਂ ਸੁਚਿਸਮ੍ਮਤਂ;

ਨਾਨਾਕੁਣਪਪਰਿਪੂਰਂ, ਜਞ੍ਞਰੂਪਂ ਅਪਸ੍ਸਤੋ.

੧੨੯. ਧਿਰਤ੍ਥੁਮਂ ਆਤੁਰਂ ਪੂਤਿਕਾਯਂ, ਜੇਗੁਚ੍ਛਿਯਂ ਅਸ੍ਸੁਚਿਂ ਬ੍ਯਾਧਿਧਮ੍ਮਂ;

ਯਤ੍ਥਪ੍ਪਮਤ੍ਤਾ ਅਧਿਮੁਚ੍ਛਿਤਾ ਪਜਾ, ਹਾਪੇਨ੍ਤਿ ਮਗ੍ਗਂ ਸੁਗਤੂਪਪਤ੍ਤਿਯਾਤਿ.

ਕਾਯਨਿਬ੍ਬਿਨ੍ਦ [ਕਾਯਵਿਚ੍ਛਨ੍ਦ (ਸੀ.), ਕਾਯਵਿਚ੍ਛਿਨ੍ਦ (ਪੀ.)] ਜਾਤਕਂ ਤਤਿਯਂ.

੨੯੪. ਜਮ੍ਬੁਖਾਦਕਜਾਤਕਂ (੩-੫-੪)

੧੩੦. ਕੋਯਂ ਬਿਨ੍ਦੁਸ੍ਸਰੋ ਵਗ੍ਗੁ, ਸਰਵਨ੍ਤਾਨ [ਪਵਦਨ੍ਤਾਨ (ਸੀ. ਪੀ.)] ਮੁਤ੍ਤਮੋ;

ਅਚ੍ਚੁਤੋ ਜਮ੍ਬੁਸਾਖਾਯ, ਮੋਰਚ੍ਛਾਪੋਵ ਕੂਜਤਿ.

੧੩੧. ਕੁਲਪੁਤ੍ਤੋਵ ਜਾਨਾਤਿ [ਕੁਲਪੁਤ੍ਤੋ ਪਜਾਨਾਤਿ (ਸ੍ਯਾ. ਕ.)], ਕੁਲਪੁਤ੍ਤਂ [ਕੁਲਪੁਤ੍ਤੇ (ਸੀ. ਪੀ.)] ਪਸਂਸਿਤੁਂ;

ਬ੍ਯਗ੍ਘਚ੍ਛਾਪਸਰੀਵਣ੍ਣ, ਭੁਞ੍ਜ ਸਮ੍ਮ ਦਦਾਮਿ ਤੇ.

੧੩੨. ਚਿਰਸ੍ਸਂ ਵਤ ਪਸ੍ਸਾਮਿ, ਮੁਸਾਵਾਦੀ ਸਮਾਗਤੇ;

ਵਨ੍ਤਾਦਂ ਕੁਣਪਾਦਞ੍ਚ, ਅਞ੍ਞਮਞ੍ਞਂ ਪਸਂਸਕੇਤਿ.

ਜਮ੍ਬੁਖਾਦਕਜਾਤਕਂ ਚਤੁਤ੍ਥਂ.

੨੯੫. ਅਨ੍ਤਜਾਤਕਂ (੩-੫-੫)

੧੩੩. ਉਸਭਸ੍ਸੇਵ ਤੇ ਖਨ੍ਧੋ, ਸੀਹਸ੍ਸੇਵ ਵਿਜਮ੍ਭਿਤਂ;

ਮਿਗਰਾਜ ਨਮੋ ਤ੍ਯਤ੍ਥੁ, ਅਪਿ ਕਿਞ੍ਚਿ ਲਭਾਮਸੇ.

੧੩੪. ਕੁਲਪੁਤ੍ਤੋਵ ਜਾਨਾਤਿ, ਕੁਲਪੁਤ੍ਤਂ ਪਸਂਸਿਤੁਂ;

ਮਯੂਰਗੀਵਸਙ੍ਕਾਸ, ਇਤੋ ਪਰਿਯਾਹਿ ਵਾਯਸ.

੧੩੫. ਮਿਗਾਨਂ ਸਿਙ੍ਗਾਲੋ [ਕੋਤ੍ਥੁਕੋ (ਸੀ. ਪੀ.), ਕੋਟ੍ਠੁਕੋ (ਸ੍ਯਾ.)] ਅਨ੍ਤੋ, ਪਕ੍ਖੀਨਂ ਪਨ ਵਾਯਸੋ;

ਏਰਣ੍ਡੋ ਅਨ੍ਤੋ ਰੁਕ੍ਖਾਨਂ, ਤਯੋ ਅਨ੍ਤਾ ਸਮਾਗਤਾਤਿ.

ਅਨ੍ਤਜਾਤਕਂ ਪਞ੍ਚਮਂ.

੨੯੬. ਸਮੁਦ੍ਦਜਾਤਕਂ (੩-੫-੬)

੧੩੬. ਕੋ ਨਾਯਂ [ਕੋ ਨ੍ਵਾਯਂ (ਸ੍ਯਾ.)] ਲੋਣਤੋਯਸ੍ਮਿਂ, ਸਮਨ੍ਤਾ ਪਰਿਧਾਵਤਿ;

ਮਚ੍ਛੇ ਮਕਰੇ ਚ ਵਾਰੇਤਿ, ਊਮੀਸੁ ਚ ਵਿਹਞ੍ਞਤਿ.

੧੩੭. ਅਨਨ੍ਤਪਾਯੀ ਸਕੁਣੋ, ਅਤਿਤ੍ਤੋਤਿ ਦਿਸਾਸੁਤੋ;

ਸਮੁਦ੍ਦਂ ਪਾਤੁਮਿਚ੍ਛਾਮਿ, ਸਾਗਰਂ ਸਰਿਤਂ ਪਤਿਂ.

੧੩੮. ਸੋ ਅਯਂ ਹਾਯਤਿ ਚੇਵ, ਪੂਰਤੇ ਚ ਮਹੋਦਧਿ;

ਨਾਸ੍ਸ ਨਾਯਤਿ ਪੀਤਨ੍ਤੋ, ਅਪੇਯ੍ਯੋ ਕਿਰ ਸਾਗਰੋਤਿ.

ਸਮੁਦ੍ਦਜਾਤਕਂ ਛਟ੍ਠਂ.

੨੯੭. ਕਾਮਵਿਲਾਪਜਾਤਕਂ (੩-੫-੭)

੧੩੯. ਉਚ੍ਚੇ ਸਕੁਣ ਡੇਮਾਨ, ਪਤ੍ਤਯਾਨ ਵਿਹਙ੍ਗਮ;

ਵਜ੍ਜਾਸਿ ਖੋ ਤ੍ਵਂ ਵਾਮੂਰੁਂ, ਚਿਰਂ ਖੋ ਸਾ ਕਰਿਸ੍ਸਤਿ [ਸਰਿਸ੍ਸਤਿ (ਕ.)].

੧੪੦. ਇਦਂ ਖੋ ਸਾ ਨ ਜਾਨਾਤਿ, ਅਸਿਂ ਸਤ੍ਤਿਞ੍ਚ ਓਡ੍ਡਿਤਂ;

ਸਾ ਚਣ੍ਡੀ ਕਾਹਤਿ ਕੋਧਂ, ਤਂ ਮੇ ਤਪਤਿ ਨੋ ਇਦਂ [ਨੋ ਇਧ (ਸੀ. ਸ੍ਯਾ. ਪੀ.)].

੧੪੧. ਏਸ ਉਪ੍ਪਲਸਨ੍ਨਾਹੋ, ਨਿਕ੍ਖਞ੍ਚੁਸ੍ਸੀਸਕੋਹਿਤਂ [ਨਿਕ੍ਖਮੁਸ੍ਸੀਸਕੇ ਕਤਂ (ਸੀ. ਪੀ.), ਨਿਕ੍ਖਞ੍ਚੁਸ੍ਸੀਸਕੇ ਕਤਂ (ਸ੍ਯਾ.)];

ਕਾਸਿਕਞ੍ਚ ਮੁਦੁਂ ਵਤ੍ਥਂ, ਤਪ੍ਪੇਤੁ ਧਨਿਕਾ ਪਿਯਾਤਿ [ਧਨਕਾਮਿਯਾਤਿ (ਸ੍ਯਾ. ਪੀ.), ਧਨਕਾਮਿਕਾਤਿ (ਸੀ.)].

ਕਾਮਵਿਲਾਪਜਾਤਕਂ ਸਤ੍ਤਮਂ.

੨੯੮. ਉਦੁਮ੍ਬਰਜਾਤਕਂ (੩-੫-੮)

੧੪੨. ਉਦੁਮ੍ਬਰਾ ਚਿਮੇ ਪਕ੍ਕਾ, ਨਿਗ੍ਰੋਧਾ ਚ ਕਪਿਤ੍ਥਨਾ;

ਏਹਿ ਨਿਕ੍ਖਮ ਭੁਞ੍ਜਸ੍ਸੁ, ਕਿਂ ਜਿਘਚ੍ਛਾਯ ਮਿਯ੍ਯਸਿ.

੧੪੩. ਏਵਂ ਸੋ ਸੁਹਿਤੋ ਹੋਤਿ, ਯੋ ਵੁਡ੍ਢਮਪਚਾਯਤਿ;

ਯਥਾਹਮਜ੍ਜ ਸੁਹਿਤੋ, ਦੁਮਪਕ੍ਕਾਨਿ ਮਾਸਿਤੋ.

੧੪੪. ਯਂ ਵਨੇਜੋ ਵਨੇਜਸ੍ਸ, ਵਞ੍ਚੇਯ੍ਯ ਕਪਿਨੋ ਕਪਿ;

ਦਹਰੋ ਕਪਿ [ਦਹਰੋਪਿ ਤਂ ਨ (ਸੀ. ਪੀ.), ਦਹਰੋਪਿ ਨ (ਸ੍ਯਾ.)] ਸਦ੍ਧੇਯ੍ਯ, ਨ ਹਿ ਜਿਣ੍ਣੋ ਜਰਾਕਪੀਤਿ.

ਉਦੁਮ੍ਬਰਜਾਤਕਂ ਅਟ੍ਠਮਂ.

੨੯੯. ਕੋਮਾਰਪੁਤ੍ਤਜਾਤਕਂ (੩-੫-੯)

੧੪੫. ਪੁਰੇ ਤੁਵਂ ਸੀਲਵਤਂ ਸਕਾਸੇ, ਓਕ੍ਕਨ੍ਤਿਕਂ [ਓਕ੍ਕਨ੍ਦਿਕਂ (ਸੀ. ਸ੍ਯਾ. ਪੀ.)] ਕੀਲ਼ਸਿ ਅਸ੍ਸਮਮ੍ਹਿ;

ਕਰੋਹਰੇ [ਕਰੋਹਿ ਰੇ (ਕ.)] ਮਕ੍ਕਟਿਯਾਨਿ ਮਕ੍ਕਟ, ਨ ਤਂ ਮਯਂ ਸੀਲਵਤਂ ਰਮਾਮ.

੧੪੬. ਸੁਤਾ ਹਿ ਮਯ੍ਹਂ ਪਰਮਾ ਵਿਸੁਦ੍ਧਿ, ਕੋਮਾਰਪੁਤ੍ਤਸ੍ਸ ਬਹੁਸ੍ਸੁਤਸ੍ਸ;

ਮਾ ਦਾਨਿ ਮਂ ਮਞ੍ਞਿ ਤੁਵਂ ਯਥਾ ਪੁਰੇ, ਝਾਨਾਨੁਯੁਤ੍ਤੋ ਵਿਹਰਾਮਿ [ਝਾਨਾਨੁਯੁਤ੍ਤਾ ਵਿਹਰਾਮ (ਸੀ. ਪੀ.)] ਆਵੁਸੋ.

੧੪੭. ਸਚੇਪਿ ਸੇਲਸ੍ਮਿ ਵਪੇਯ੍ਯ ਬੀਜਂ, ਦੇਵੋ ਚ ਵਸ੍ਸੇ ਨ ਹਿ ਤਂ ਵਿਰੂਲ਼੍ਹੇ [ਨੇਵ ਹਿ ਤਂ ਰੁਹੇਯ੍ਯ (ਸੀ. ਪੀ.), ਨ ਹਿ ਤਂ ਵਿਰੂਹੇ (?)];

ਸੁਤਾ ਹਿ ਤੇ ਸਾ ਪਰਮਾ ਵਿਸੁਦ੍ਧਿ, ਆਰਾ ਤੁਵਂ ਮਕ੍ਕਟ ਝਾਨਭੂਮਿਯਾਤਿ.

ਕੋਮਾਰਪੁਤ੍ਤਜਾਤਕਂ ਨਵਮਂ.

੩੦੦. ਵਕਜਾਤਕਂ (੩-੫-੧੦)

੧੪੮. ਪਰਪਾਣਰੋਧਾ [ਪਰਪਾਣਘਾਤੇ (ਸ੍ਯਾ.), ਪਰਪਾਣਰੋਚਂ (ਕ.)] ਜੀਵਨ੍ਤੋ, ਮਂਸਲੋਹਿਤਭੋਜਨੋ;

ਵਕੋ ਵਤਂ ਸਮਾਦਾਯ, ਉਪਪਜ੍ਜਿ ਉਪੋਸਥਂ.

੧੪੯. ਤਸ੍ਸ ਸਕ੍ਕੋ ਵਤਞ੍ਞਾਯ, ਅਜਰੂਪੇਨੁਪਾਗਮਿ;

ਵੀਤਤਪੋ ਅਜ੍ਝਪ੍ਪਤ੍ਤੋ, ਭਞ੍ਜਿ ਲੋਹਿਤਪੋ ਤਪਂ.

੧੫੦. ਏਵਮੇਵ ਇਧੇਕਚ੍ਚੇ, ਸਮਾਦਾਨਮ੍ਹਿ ਦੁਬ੍ਬਲਾ;

ਲਹੁਂ ਕਰੋਨ੍ਤਿ ਅਤ੍ਤਾਨਂ, ਵਕੋਵ ਅਜਕਾਰਣਾਤਿ.

ਵਕਜਾਤਕਂ ਦਸਮਂ.

ਕੁਮ੍ਭਵਗ੍ਗੋ ਪਞ੍ਚਮੋ.

ਤਸ੍ਸੁਦ੍ਦਾਨਂ –

ਵਰਕੁਮ੍ਭ ਸੁਪਤ੍ਤਸਿਰਿਵ੍ਹਯਨੋ, ਸੁਚਿਸਮ੍ਮਤ ਬਿਨ੍ਦੁਸਰੋ ਚੁਸਭੋ;

ਸਰਿਤਂਪਤਿ ਚਣ੍ਡਿ ਜਰਾਕਪਿਨਾ, ਅਥ ਮਕ੍ਕਟਿਯਾ ਵਕਕੇਨ ਦਸਾਤਿ.

ਅਥ ਵਗ੍ਗੁਦ੍ਦਾਨਂ –

ਸਙ੍ਕਪ੍ਪੋ ਪਦੁਮੋ ਚੇਵ, ਉਦਪਾਨੇਨ ਤਤਿਯਂ;

ਅਬ੍ਭਨ੍ਤਰਂ ਘਟਭੇਦਂ, ਤਿਕਨਿਪਾਤਮ੍ਹਿਲਙ੍ਕਤਨ੍ਤਿ.

ਤਿਕਨਿਪਾਤਂ ਨਿਟ੍ਠਿਤਂ.