੩. ਤਿਕਨਿਪਾਤੋ

੧. ਸਙ੍ਕਪ੍ਪਵਗ੍ਗੋ

੨੫੧. ਸਙ੍ਕਪ੍ਪਰਾਗਜਾਤਕਂ (੩-੧-੧)

੧. ਸਙ੍ਕਪ੍ਪਰਾਗਧੋਤੇਨ, ਵਿਤਕ੍ਕਨਿਸਿਤੇਨ ਚ;

ਨਾਲਙ੍ਕਤੇਨ ਭਦ੍ਰੇਨ [ਨੇਵਾਲਙ੍ਕਤਭਦ੍ਰੇਨ (ਸ੍ਯਾ.)], ਉਸੁਕਾਰਾਕਤੇਨ ਚ [ਨ ਉਸੁਕਾਰਕਤੇਨ ਚ (ਸੀ. ਸ੍ਯਾ. ਪੀ.)].

੨. ਨ ਕਣ੍ਣਾਯਤਮੁਤ੍ਤੇਨ, ਨਾਪਿ ਮੋਰੂਪਸੇਵਿਨਾ;

ਤੇਨਮ੍ਹਿ ਹਦਯੇ ਵਿਦ੍ਧੋ, ਸਬ੍ਬਙ੍ਗਪਰਿਦਾਹਿਨਾ.

੩. ਆਵੇਧਞ੍ਚ ਨ ਪਸ੍ਸਾਮਿ, ਯਤੋ ਰੁਹਿਰਮਸ੍ਸਵੇ;

ਯਾਵ ਅਯੋਨਿਸੋ ਚਿਤ੍ਤਂ, ਸਯਂ ਮੇ ਦੁਕ੍ਖਮਾਭਤਨ੍ਤਿ.

ਸਙ੍ਕਪ੍ਪਰਾਗਜਾਤਕਂ ਪਠਮਂ.

੨੫੨. ਤਿਲਮੁਟ੍ਠਿਜਾਤਕਂ (੩-੧-੨)

੪. ਅਜ੍ਜਾਪਿ ਮੇ ਤਂ ਮਨਸਿ [ਸਰਸਿ (ਕ.)], ਯਂ ਮਂ ਤ੍ਵਂ ਤਿਲਮੁਟ੍ਠਿਯਾ;

ਬਾਹਾਯ ਮਂ ਗਹੇਤ੍ਵਾਨ, ਲਟ੍ਠਿਯਾ ਅਨੁਤਾਲ਼ਯਿ.

੫. ਨਨੁ ਜੀਵਿਤੇ ਨ ਰਮਸਿ, ਯੇਨਾਸਿ ਬ੍ਰਾਹ੍ਮਣਾਗਤੋ;

ਯਂ ਮਂ ਬਾਹਾ ਗਹੇਤ੍ਵਾਨ, ਤਿਕ੍ਖਤ੍ਤੁਂ ਅਨੁਤਾਲ਼ਯਿ.

੬. ਅਰਿਯੋ ਅਨਰਿਯਂ ਕੁਬ੍ਬਨ੍ਤਂ [ਕੁਬ੍ਬਾਨਂ (ਸੀ. ਪੀ.), ਕੁਬ੍ਬਂ (ਸ੍ਯਾ.)], ਯੋ ਦਣ੍ਡੇਨ ਨਿਸੇਧਤਿ;

ਸਾਸਨਂ ਤਂ ਨ ਤਂ ਵੇਰਂ, ਇਤਿ ਨਂ ਪਣ੍ਡਿਤਾ ਵਿਦੂਤਿ.

ਤਿਲਮੁਟ੍ਠਿਜਾਤਕਂ ਦੁਤਿਯਂ.

੨੫੩. ਮਣਿਕਣ੍ਠਜਾਤਕਂ (੩-੧-੩)

੭. ਮਮਨ੍ਨਪਾਨਂ ਵਿਪੁਲਂ ਉਲ਼ਾਰਂ, ਉਪ੍ਪਜ੍ਜਤੀਮਸ੍ਸ ਮਣਿਸ੍ਸ ਹੇਤੁ;

ਤਂ ਤੇ ਨ ਦਸ੍ਸਂ ਅਤਿਯਾਚਕੋਸਿ, ਨ ਚਾਪਿ ਤੇ ਅਸ੍ਸਮਮਾਗਮਿਸ੍ਸਂ.

੮. ਸੁਸੂ ਯਥਾ ਸਕ੍ਖਰਧੋਤਪਾਣੀ, ਤਾਸੇਸਿ ਮਂ ਸੇਲਂ ਯਾਚਮਾਨੋ;

ਤਂ ਤੇ ਨ ਦਸ੍ਸਂ ਅਤਿਯਾਚਕੋਸਿ, ਨ ਚਾਪਿ ਤੇ ਅਸ੍ਸਮਮਾਗਮਿਸ੍ਸਂ.

੯. ਨ ਤਂ ਯਾਚੇ ਯਸ੍ਸ ਪਿਯਂ ਜਿਗੀਸੇ [ਜਿਗਿਂਸੇ (ਸੀ. ਸ੍ਯਾ. ਪੀ.)], ਦੇਸ੍ਸੋ ਹੋਤਿ ਅਤਿਯਾਚਨਾਯ;

ਨਾਗੋ ਮਣਿਂ ਯਾਚਿਤੋ ਬ੍ਰਾਹ੍ਮਣੇਨ, ਅਦਸ੍ਸਨਂਯੇਵ ਤਦਜ੍ਝਗਮਾਤਿ.

ਮਣਿਕਣ੍ਠਜਾਤਕਂ ਤਤਿਯਂ.

੨੫੪. ਕੁਣ੍ਡਕਕੁਚ੍ਛਿਸਿਨ੍ਧਵਜਾਤਕਂ (੩-੧-੪)

੧੦. ਭੁਤ੍ਵਾ ਤਿਣਪਰਿਘਾਸਂ, ਭੁਤ੍ਵਾ ਆਚਾਮਕੁਣ੍ਡਕਂ;

ਏਤਂ ਤੇ ਭੋਜਨਂ ਆਸਿ, ਕਸ੍ਮਾ ਦਾਨਿ ਨ ਭੁਞ੍ਜਸਿ.

੧੧. ਯਤ੍ਥ ਪੋਸਂ ਨ ਜਾਨਨ੍ਤਿ, ਜਾਤਿਯਾ ਵਿਨਯੇਨ ਵਾ;

ਬਹੁਂ [ਪਹੂ (ਸੀ. ਪੀ.), ਪਹੁਂ (ਸ੍ਯਾ. ਕ.)] ਤਤ੍ਥ ਮਹਾਬ੍ਰਮ੍ਹੇ, ਅਪਿ ਆਚਾਮਕੁਣ੍ਡਕਂ.

੧੨. ਤ੍ਵਞ੍ਚ ਖੋ ਮਂ ਪਜਾਨਾਸਿ, ਯਾਦਿਸਾਯਂ ਹਯੁਤ੍ਤਮੋ;

ਜਾਨਨ੍ਤੋ ਜਾਨਮਾਗਮ੍ਮ, ਨ ਤੇ ਭਕ੍ਖਾਮਿ ਕੁਣ੍ਡਕਨ੍ਤਿ.

ਕੁਣ੍ਡਕਕੁਚ੍ਛਿਸਿਨ੍ਧਵਜਾਤਕਂ ਚਤੁਤ੍ਥਂ.

੨੫੫. ਸੁਕਜਾਤਕਂ (੩-੧-੫)

੧੩. ਯਾਵ ਸੋ ਮਤ੍ਤਮਞ੍ਞਾਸਿ, ਭੋਜਨਸ੍ਮਿਂ ਵਿਹਙ੍ਗਮੋ;

ਤਾਵ ਅਦ੍ਧਾਨਮਾਪਾਦਿ, ਮਾਤਰਞ੍ਚ ਅਪੋਸਯਿ.

੧੪. ਯਤੋ ਚ ਖੋ ਬਹੁਤਰਂ, ਭੋਜਨਂ ਅਜ੍ਝਵਾਹਰਿ [ਅਜ੍ਝੁਪਾਹਰਿ (ਸੀ. ਪੀ.)];

ਤਤੋ ਤਤ੍ਥੇਵ ਸਂਸੀਦਿ, ਅਮਤ੍ਤਞ੍ਞੂ ਹਿ ਸੋ ਅਹੁ.

੧੫. ਤਸ੍ਮਾ ਮਤ੍ਤਞ੍ਞੁਤਾ ਸਾਧੁ, ਭੋਜਨਸ੍ਮਿਂ ਅਗਿਦ੍ਧਤਾ [ਅਗਿਦ੍ਧਿਤਾ (ਸ੍ਯਾ. ਕ.)];

ਅਮਤ੍ਤਞ੍ਞੂ ਹਿ ਸੀਦਨ੍ਤਿ, ਮਤ੍ਤਞ੍ਞੂ ਚ ਨ ਸੀਦਰੇਤਿ.

ਸੁਕਜਾਤਕਂ ਪਞ੍ਚਮਂ.

੨੫੬. ਜਰੂਦਪਾਨਜਾਤਕਂ (੩-੧-੬)

੧੬. ਜਰੂਦਪਾਨਂ ਖਣਮਾਨਾ, ਵਾਣਿਜਾ ਉਦਕਤ੍ਥਿਕਾ;

ਅਜ੍ਝਗਮੁਂ ਅਯਸਂ ਲੋਹਂ [ਅਜ੍ਝਗਂਸੁ ਅਯੋਲੋਹਂ (ਸੀ. ਸ੍ਯਾ. ਪੀ.)], ਤਿਪੁਸੀਸਞ੍ਚ ਵਾਣਿਜਾ;

ਰਜਤਂ ਜਾਤਰੂਪਞ੍ਚ, ਮੁਤ੍ਤਾ ਵੇਲ਼ੂਰਿਯਾ ਬਹੂ.

੧੭. ਤੇ ਚ ਤੇਨ ਅਸਨ੍ਤੁਟ੍ਠਾ, ਭਿਯ੍ਯੋ ਭਿਯ੍ਯੋ ਅਖਾਣਿਸੁਂ;

ਤੇ ਤਤ੍ਥਾਸੀਵਿਸੋ [ਤਤ੍ਥ ਆਸੀਵਿਸੋ (ਕ.), ਤਤ੍ਥਪਾਸੀਵਿਸੋ (ਸ੍ਯਾ.)] ਘੋਰੋ, ਤੇਜਸ੍ਸੀ ਤੇਜਸਾ ਹਨਿ.

੧੮. ਤਸ੍ਮਾ ਖਣੇ ਨਾਤਿਖਣੇ, ਅਤਿਖਾਤਂ [ਅਤਿਖਣਂ (ਕ.)] ਹਿ ਪਾਪਕਂ;

ਖਾਤੇਨ ਚ [ਖਣੇਨ ਚ (ਕ.), ਖਣਨੇਨ (ਸ੍ਯਾ.)] ਧਨਂ ਲਦ੍ਧਂ, ਅਤਿਖਾਤੇਨ [ਅਤਿਖਣੇਨ (ਕ.)] ਨਾਸਿਤਨ੍ਤਿ.

ਜਰੂਦਪਾਨਜਾਤਕਂ ਛਟ੍ਠਂ.

੨੫੭. ਗਾਮਣਿਚਨ੍ਦਜਾਤਕਂ (੩-੧-੭)

੧੯. ਨਾਯਂ ਘਰਾਨਂ ਕੁਸਲੋ, ਲੋਲੋ ਅਯਂ ਵਲੀਮੁਖੋ;

ਕਤਂ ਕਤਂ ਖੋ ਦੂਸੇਯ੍ਯ, ਏਵਂਧਮ੍ਮਮਿਦਂ ਕੁਲਂ.

੨੦. ਨਯਿਦਂ ਚਿਤ੍ਤਵਤੋ ਲੋਮਂ, ਨਾਯਂ ਅਸ੍ਸਾਸਿਕੋ ਮਿਗੋ;

ਸਿਟ੍ਠਂ [ਸਤ੍ਥਂ (ਸੀ. ਸ੍ਯਾ. ਪੀ.)] ਮੇ ਜਨਸਨ੍ਧੇਨ, ਨਾਯਂ ਕਿਞ੍ਚਿ ਵਿਜਾਨਤਿ.

੨੧. ਨ ਮਾਤਰਂ ਪਿਤਰਂ ਵਾ, ਭਾਤਰਂ ਭਗਿਨਿਂ ਸਕਂ;

ਭਰੇਯ੍ਯ ਤਾਦਿਸੋ ਪੋਸੋ, ਸਿਟ੍ਠਂ ਦਸਰਥੇਨ ਮੇਤਿ.

ਗਾਮਣਿਚਨ੍ਦ [ਗਾਮਣਿਚਣ੍ਡ (ਸੀ. ਪੀ.)] ਜਾਤਕਂ ਸਤ੍ਤਮਂ.

੨੫੮. ਮਨ੍ਧਾਤੁਜਾਤਕਂ (੩-੧-੮)

੨੨. ਯਾਵਤਾ ਚਨ੍ਦਿਮਸੂਰਿਯਾ, ਪਰਿਹਰਨ੍ਤਿ ਦਿਸਾ ਭਨ੍ਤਿ ਵਿਰੋਚਨਾ [ਵਿਰੋਚਮਾਨਾ (ਕ.)];

ਸਬ੍ਬੇਵ ਦਾਸਾ ਮਨ੍ਧਾਤੁ, ਯੇ ਪਾਣਾ ਪਥਵਿਸ੍ਸਿਤਾ [ਪਠਵਿਨਿਸ੍ਸਿਤਾ (ਸੀ. ਪੀ.), ਪਠਵਿਸ੍ਸਿਤਾ (ਸ੍ਯਾ.)].

੨੩. ਨ ਕਹਾਪਣਵਸ੍ਸੇਨ, ਤਿਤ੍ਤਿ ਕਾਮੇਸੁ ਵਿਜ੍ਜਤਿ;

ਅਪ੍ਪਸ੍ਸਾਦਾ ਦੁਖਾ ਕਾਮਾ, ਇਤਿ ਵਿਞ੍ਞਾਯ ਪਣ੍ਡਿਤੋ.

੨੪. ਅਪਿ ਦਿਬ੍ਬੇਸੁ ਕਾਮੇਸੁ, ਰਤਿਂ ਸੋ ਨਾਧਿਗਚ੍ਛਤਿ;

ਤਣ੍ਹਕ੍ਖਯਰਤੋ ਹੋਤਿ, ਸਮ੍ਮਾਸਮ੍ਬੁਦ੍ਧਸਾਵਕੋਤਿ.

ਮਨ੍ਧਾਤੁਜਾਤਕਂ ਅਟ੍ਠਮਂ.

੨੫੯. ਤਿਰੀਟਵਚ੍ਛਜਾਤਕਂ (੩-੧-੯)

੨੫. ਨਯਿਮਸ੍ਸ ਵਿਜ੍ਜਾਮਯਮਤ੍ਥਿ ਕਿਞ੍ਚਿ, ਨ ਬਨ੍ਧਵੋ ਨੋ ਪਨ ਤੇ ਸਹਾਯੋ;

ਅਥ ਕੇਨ ਵਣ੍ਣੇਨ ਤਿਰੀਟਵਚ੍ਛੋ [ਤਿਰੀਟਿਵਚ੍ਛੋ (ਸ੍ਯਾ. ਕ.)], ਤੇਦਣ੍ਡਿਕੋ ਭੁਞ੍ਜਤਿ ਅਗ੍ਗਪਿਣ੍ਡਂ.

੨੬. ਆਪਾਸੁ [ਆਵਾਸੁ (ਕ.)] ਮੇ ਯੁਦ੍ਧਪਰਾਜਿਤਸ੍ਸ, ਏਕਸ੍ਸ ਕਤ੍ਵਾ ਵਿਵਨਸ੍ਮਿ ਘੋਰੇ;

ਪਸਾਰਯੀ ਕਿਚ੍ਛਗਤਸ੍ਸ ਪਾਣਿਂ, ਤੇਨੂਦਤਾਰਿਂ ਦੁਖਸਂਪਰੇਤੋ.

੨੭. ਏਤਸ੍ਸ ਕਿਚ੍ਚੇਨ ਇਧਾਨੁਪਤ੍ਤੋ, ਵੇਸਾਯਿਨੋ ਵਿਸਯਾ ਜੀਵਲੋਕੇ;

ਲਾਭਾਰਹੋ ਤਾਤ ਤਿਰੀਟਵਚ੍ਛੋ, ਦੇਥਸ੍ਸ ਭੋਗਂ ਯਜਥਞ੍ਚ [ਯਜਤਞ੍ਚ (ਸੀ. ਪੀ.), ਯਜਿਤਞ੍ਚ (ਸ੍ਯਾ.)] ਯਞ੍ਞਨ੍ਤਿ.

ਤਿਰੀਟਵਚ੍ਛਜਾਤਕਂ ਨਵਮਂ.

੨੬੦. ਦੂਤਜਾਤਕਂ (੩-੧-੧੦)

੨੮. ਯਸ੍ਸਤ੍ਥਾ ਦੂਰਮਾਯਨ੍ਤਿ, ਅਮਿਤ੍ਤਮਪਿ ਯਾਚਿਤੁਂ;

ਤਸ੍ਸੂਦਰਸ੍ਸਹਂ ਦੂਤੋ, ਮਾ ਮੇ ਕੁਜ੍ਝ [ਕੁਜ੍ਝਿ (ਸੀ. ਪੀ.)] ਰਥੇਸਭ.

੨੯. ਯਸ੍ਸ ਦਿਵਾ ਚ ਰਤ੍ਤੋ ਚ, ਵਸਮਾਯਨ੍ਤਿ ਮਾਣਵਾ;

ਤਸ੍ਸੂਦਰਸ੍ਸਹਂ ਦੂਤੋ, ਮਾ ਮੇ ਕੁਜ੍ਝ [ਕੁਜ੍ਝਿ (ਸੀ. ਪੀ.)] ਰਥੇਸਭ.

੩੦. ਦਦਾਮਿ ਤੇ ਬ੍ਰਾਹ੍ਮਣ ਰੋਹਿਣੀਨਂ, ਗਵਂ ਸਹਸ੍ਸਂ ਸਹ ਪੁਙ੍ਗਵੇਨ;

ਦੂਤੋ ਹਿ ਦੂਤਸ੍ਸ ਕਥਂ ਨ ਦਜ੍ਜਂ, ਮਯਮ੍ਪਿ ਤਸ੍ਸੇਵ ਭਵਾਮ ਦੂਤਾਤਿ.

ਦੂਤਜਾਤਕਂ ਦਸਮਂ.

ਸਙ੍ਕਪ੍ਪਵਗ੍ਗੋ ਪਠਮੋ.

ਤਸ੍ਸੁਦ੍ਦਾਨਂ –

ਉਸੁਕਾਰਵਰੋ ਤਿਲਮੁਟ੍ਠਿ ਮਣਿ, ਹਯਰਾਜ ਵਿਹਙ੍ਗਮ ਆਸਿਵਿਸੋ;

ਜਨਸਨ੍ਧ ਕਹਾਪਣਵਸ੍ਸ ਪੁਨ, ਤਿਰਿਟਂ ਪੁਨ ਦੂਤਵਰੇਨ ਦਸਾਤਿ.

੨. ਪਦੁਮਵਗ੍ਗੋ

੨੬੧. ਪਦੁਮਜਾਤਕਂ (੩-੨-੧)

੩੧. ਯਥਾ ਕੇਸਾ ਚ ਮਸ੍ਸੂ ਚ, ਛਿਨ੍ਨਂ ਛਿਨ੍ਨਂ ਵਿਰੂਹਤਿ;

ਏਵਂ ਰੂਹਤੁ ਤੇ ਨਾਸਾ, ਪਦੁਮਂ ਦੇਹਿ ਯਾਚਿਤੋ.

੩੨. ਯਥਾ ਸਾਰਦਿਕਂ ਬੀਜਂ, ਖੇਤ੍ਤੇ ਵੁਤ੍ਤਂ ਵਿਰੂਹਤਿ;

ਏਵਂ ਰੂਹਤੁ ਤੇ ਨਾਸਾ, ਪਦੁਮਂ ਦੇਹਿ ਯਾਚਿਤੋ.

੩੩. ਉਭੋਪਿ ਪਲਪਨ੍ਤੇਤੇ [ਵਿਲਪਨ੍ਤੇਤੇ (ਸ੍ਯਾ. ਕ.)], ਅਪਿ ਪਦ੍ਮਾਨਿ ਦਸ੍ਸਤਿ;

ਵਜ੍ਜੁਂ ਵਾ ਤੇ ਨ ਵਾ ਵਜ੍ਜੁਂ, ਨਤ੍ਥਿ ਨਾਸਾਯ ਰੂਹਨਾ;

ਦੇਹਿ ਸਮ੍ਮ ਪਦੁਮਾਨਿ, ਅਹਂ ਯਾਚਾਮਿ ਯਾਚਿਤੋਤਿ.

ਪਦੁਮਜਾਤਕਂ ਪਠਮਂ.

੨੬੨. ਮੁਦੁਪਾਣਿਜਾਤਕਂ (੩-੨-੨)

੩੪. ਪਾਣਿ ਚੇ ਮੁਦੁਕੋ ਚਸ੍ਸ, ਨਾਗੋ ਚਸ੍ਸ ਸੁਕਾਰਿਤੋ;

ਅਨ੍ਧਕਾਰੋ ਚ ਵਸ੍ਸੇਯ੍ਯ, ਅਥ ਨੂਨ ਤਦਾ ਸਿਯਾ.

੩੫. ਅਨਲਾ ਮੁਦੁਸਮ੍ਭਾਸਾ, ਦੁਪ੍ਪੂਰਾ ਤਾ [ਦੁਪ੍ਪੂਰਤ੍ਤਾ (ਕ.)] ਨਦੀਸਮਾ;

ਸੀਦਨ੍ਤਿ ਨਂ ਵਿਦਿਤ੍ਵਾਨ, ਆਰਕਾ ਪਰਿਵਜ੍ਜਯੇ.

੩੬. ਯਂ ਏਤਾ ਉਪਸੇਵਨ੍ਤਿ, ਛਨ੍ਦਸਾ ਵਾ ਧਨੇਨ ਵਾ;

ਜਾਤਵੇਦੋਵ ਸਂ ਠਾਨਂ, ਖਿਪ੍ਪਂ ਅਨੁਦਹਨ੍ਤਿ ਨਨ੍ਤਿ.

ਮੁਦੁਪਾਣਿਜਾਤਕਂ ਦੁਤਿਯਂ.

੨੬੩. ਚੂਲ਼ਪਲੋਭਨਜਾਤਕਂ (੩-੨-੩)

੩੭. ਅਭਿਜ੍ਜਮਾਨੇ ਵਾਰਿਸ੍ਮਿਂ, ਸਯਂ [ਅਯਂ (ਕ.)] ਆਗਮ੍ਮ ਇਦ੍ਧਿਯਾ;

ਮਿਸ੍ਸੀਭਾਵਿਤ੍ਥਿਯਾ ਗਨ੍ਤ੍ਵਾ, ਸਂਸੀਦਸਿ [ਸਂਸੀਦਤਿ (ਕ.)] ਮਹਣ੍ਣਵੇ.

੩੮. ਆਵਟ੍ਟਨੀ ਮਹਾਮਾਯਾ, ਬ੍ਰਹ੍ਮਚਰਿਯਵਿਕੋਪਨਾ;

ਸੀਦਨ੍ਤਿ ਨਂ ਵਿਦਿਤ੍ਵਾਨ, ਆਰਕਾ ਪਰਿਵਜ੍ਜਯੇ.

੩੯. ਯਂ ਏਤਾ ਉਪਸੇਵਨ੍ਤਿ, ਛਨ੍ਦਸਾ ਵਾ ਧਨੇਨ ਵਾ;

ਜਾਤਵੇਦੋਵ ਸਂ ਠਾਨਂ, ਖਿਪ੍ਪਂ ਅਨੁਦਹਨ੍ਤਿ ਨਨ੍ਤਿ.

ਚੂਲ਼ਪਲੋਭਨ [ਚੁਲ੍ਲਪਲੋਭਨ (ਸੀ. ਸ੍ਯਾ. ਪੀ.)] ਜਾਤਕਂ ਤਤਿਯਂ.

੨੬੪. ਮਹਾਪਨਾਦਜਾਤਕਂ (੩-੨-੪)

੪੦. ਪਨਾਦੋ ਨਾਮ ਸੋ ਰਾਜਾ, ਯਸ੍ਸ ਯੂਪੋ ਸੁਵਣ੍ਣਯੋ;

ਤਿਰਿਯਂ ਸੋਲ਼ਸੁਬ੍ਬੇਧੋ [ਸੋਲ਼ਸਪਬ੍ਬੇਧੋ (ਸੀ. ਪੀ.)], ਉਦ੍ਧਮਾਹੁ [ਉਚ੍ਚਮਾਹੁ (ਸੀ. ਸ੍ਯਾ. ਪੀ.)] ਸਹਸ੍ਸਧਾ.

੪੧. ਸਹਸ੍ਸਕਣ੍ਡੋ ਸਤਗੇਣ੍ਡੁ [ਸਤਭੇਦੋ (ਸੀ. ਪੀ.), ਸਤਭੇਣ੍ਡੁ (ਸੀ. ਨਿਸ੍ਸਯ)], ਧਜਾਸੁ ਹਰਿਤਾਮਯੋ;

ਅਨਚ੍ਚੁਂ ਤਤ੍ਥ ਗਨ੍ਧਬ੍ਬਾ, ਛ ਸਹਸ੍ਸਾਨਿ ਸਤ੍ਤਧਾ.

੪੨. ਏਵਮੇਤਂ [ਏਵਮੇਵ (ਕ.)] ਤਦਾ ਆਸਿ, ਯਥਾ ਭਾਸਸਿ ਭਦ੍ਦਜਿ;

ਸਕ੍ਕੋ ਅਹਂ ਤਦਾ ਆਸਿਂ, ਵੇਯ੍ਯਾਵਚ੍ਚਕਰੋ ਤਵਾਤਿ.

ਮਹਾਪਨਾਦਜਾਤਕਂ ਚਤੁਤ੍ਥਂ.

੨੬੫. ਖੁਰਪ੍ਪਜਾਤਕਂ (੩-੨-੫)

੪੩. ਦਿਸ੍ਵਾ ਖੁਰਪ੍ਪੇ ਧਨੁਵੇਗਨੁਨ੍ਨੇ, ਖਗ੍ਗੇ ਗਹੀਤੇ ਤਿਖਿਣੇ ਤੇਲਧੋਤੇ;

ਤਸ੍ਮਿਂ ਭਯਸ੍ਮਿਂ ਮਰਣੇ ਵਿਯੂਲ਼੍ਹੇ, ਕਸ੍ਮਾ ਨੁ ਤੇ ਨਾਹੁ ਛਮ੍ਭਿਤਤ੍ਤਂ.

੪੪. ਦਿਸ੍ਵਾ ਖੁਰਪ੍ਪੇ ਧਨੁਵੇਗਨੁਨ੍ਨੇ, ਖਗ੍ਗੇ ਗਹੀਤੇ ਤਿਖਿਣੇ ਤੇਲਧੋਤੇ;

ਤਸ੍ਮਿਂ ਭਯਸ੍ਮਿਂ ਮਰਣੇ ਵਿਯੂਲ਼੍ਹੇ, ਵੇਦਂ ਅਲਤ੍ਥਂ ਵਿਪੁਲਂ ਉਲ਼ਾਰਂ.

੪੫. ਸੋ ਵੇਦਜਾਤੋ ਅਜ੍ਝਭਵਿਂ ਅਮਿਤ੍ਤੇ, ਪੁਬ੍ਬੇਵ ਮੇ ਜੀਵਿਤਮਾਸਿ ਚਤ੍ਤਂ;

ਨ ਹਿ ਜੀਵਿਤੇ ਆਲਯਂ ਕੁਬ੍ਬਮਾਨੋ, ਸੂਰੋ ਕਯਿਰਾ ਸੂਰਕਿਚ੍ਚਂ ਕਦਾਚੀਤਿ.

ਖੁਰਪ੍ਪਜਾਤਕਂ ਪਞ੍ਚਮਂ.

੨੬੬. ਵਾਤਗ੍ਗਸਿਨ੍ਧਵਜਾਤਕਂ (੩-੨-੬)

੪੬. ਯੇਨਾਸਿ ਕਿਸਿਯਾ ਪਣ੍ਡੁ, ਯੇਨ ਭਤ੍ਤਂ ਨ ਰੁਚ੍ਚਤਿ;

ਅਯਂ ਸੋ ਆਗਤੋ ਭਤ੍ਤਾ [ਤਾਤੋ (ਸੀ. ਸ੍ਯਾ. ਪੀ.)], ਕਸ੍ਮਾ ਦਾਨਿ ਪਲਾਯਸਿ.

੪੭. ਸਚੇ [ਨ ਖੋ (ਸ੍ਯਾ. ਕ.)] ਪਨਾਦਿਕੇਨੇਵ, ਸਨ੍ਥਵੋ ਨਾਮ ਜਾਯਤਿ;

ਯਸੋ ਹਾਯਤਿ ਇਤ੍ਥੀਨਂ, ਤਸ੍ਮਾ ਤਾਤ ਪਲਾਯਹਂ [ਪਲਾਯਿਹਂ (ਸ੍ਯਾ.), ਪਲਾਯਿਤਂ (ਕ.)].

੪੮. ਯਸ੍ਸਸ੍ਸਿਨਂ ਕੁਲੇ ਜਾਤਂ, ਆਗਤਂ ਯਾ ਨ ਇਚ੍ਛਤਿ;

ਸੋਚਤਿ ਚਿਰਰਤ੍ਤਾਯ, ਵਾਤਗ੍ਗਮਿਵ ਭਦ੍ਦਲੀਤਿ [ਕੁਨ੍ਦਲੀਤਿ (ਸੀ. ਪੀ.), ਗਦ੍ਰਭੀਤਿ (ਸ੍ਯਾ.)].

ਵਾਤਗ੍ਗਸਿਨ੍ਧਵਜਾਤਕਂ ਛਟ੍ਠਂ.

੨੬੭. ਕਕ੍ਕਟਕਜਾਤਕਂ (੩-੨-੭)

੪੯. ਸਿਙ੍ਗੀਮਿਗੋ ਆਯਤਚਕ੍ਖੁਨੇਤ੍ਤੋ, ਅਟ੍ਠਿਤ੍ਤਚੋ ਵਾਰਿਸਯੋ ਅਲੋਮੋ;

ਤੇਨਾਭਿਭੂਤੋ ਕਪਣਂ ਰੁਦਾਮਿ, ਮਾ ਹੇਵ ਮਂ ਪਾਣਸਮਂ ਜਹੇਯ੍ਯ [ਜਹੇਯ੍ਯਾ (ਪੀ.) ਜਹਾ’ਯ੍ਯੇ (?)].

੫੦. ਅਯ੍ਯ ਨ ਤਂ ਜਹਿਸ੍ਸਾਮਿ, ਕੁਞ੍ਜਰਂ ਸਟ੍ਠਿਹਾਯਨਂ [ਕੁਞ੍ਜਰ ਸਟ੍ਠਿਹਾਯਨ (ਸੀ. ਪੀ.)];

ਪਥਬ੍ਯਾ ਚਾਤੁਰਨ੍ਤਾਯ, ਸੁਪ੍ਪਿਯੋ ਹੋਸਿ ਮੇ ਤੁਵਂ.

੫੧. ਯੇ ਕੁਲ਼ੀਰਾ ਸਮੁਦ੍ਦਸ੍ਮਿਂ, ਗਙ੍ਗਾਯ ਯਮੁਨਾਯ [ਨਮ੍ਮਦਾਯ (ਸੀ. ਪੀ.)] ਚ;

ਤੇਸਂ ਤ੍ਵਂ ਵਾਰਿਜੋ ਸੇਟ੍ਠੋ, ਮੁਞ੍ਚ ਰੋਦਨ੍ਤਿਯਾ ਪਤਿਨ੍ਤਿ.

ਕਕ੍ਕਟਕ [ਕੁਲ਼ੀਰ (ਕ.)] ਜਾਤਕਂ ਸਤ੍ਤਮਂ.

੨੬੮. ਆਰਾਮਦੂਸਕਜਾਤਕਂ (੩-੨-੮)

੫੨. ਯੋ ਵੇ ਸਬ੍ਬਸਮੇਤਾਨਂ, ਅਹੁਵਾ ਸੇਟ੍ਠਸਮ੍ਮਤੋ;

ਤਸ੍ਸਾਯਂ ਏਦਿਸੀ ਪਞ੍ਞਾ, ਕਿਮੇਵ ਇਤਰਾ ਪਜਾ.

੫੩. ਏਵਮੇਵ ਤੁਵਂ ਬ੍ਰਹ੍ਮੇ, ਅਨਞ੍ਞਾਯ ਵਿਨਿਨ੍ਦਸਿ;

ਕਥਂ ਮੂਲਂ ਅਦਿਸ੍ਵਾਨ [ਕਥਂਹਿ ਮੂਲਂ ਅਦਿਤ੍ਵਾ (ਸ੍ਯਾ. ਪੀ.)], ਰੁਕ੍ਖਂ ਜਞ੍ਞਾ ਪਤਿਟ੍ਠਿਤਂ.