੪. ਅਬ੍ਭਨ੍ਤਰਵਗ੍ਗੋ

੨੮੧. ਅਬ੍ਭਨ੍ਤਰਜਾਤਕਂ (੩-੪-੧)

੯੧. ਅਬ੍ਭਨ੍ਤਰੋ ਨਾਮ ਦੁਮੋ, ਯਸ੍ਸ ਦਿਬ੍ਯਮਿਦਂ ਫਲਂ;

ਭੁਤ੍ਵਾ ਦੋਹਲ਼ਿਨੀ ਨਾਰੀ, ਚਕ੍ਕਵਤ੍ਤਿਂ ਵਿਜਾਯਤਿ.

੯੨. ਤ੍ਵਮ੍ਪਿ [ਤ੍ਵਞ੍ਚ (ਸੀ. ਪੀ.), ਤ੍ਵਂ ਹਿ (ਕ.)] ਭਦ੍ਦੇ ਮਹੇਸੀਸਿ, ਸਾ ਚਾਪਿ [ਚਾਸਿ (ਸੀ. ਪੀ.)] ਪਤਿਨੋ ਪਿਯਾ;

ਆਹਰਿਸ੍ਸਤਿ ਤੇ ਰਾਜਾ, ਇਦਂ ਅਬ੍ਭਨ੍ਤਰਂ ਫਲਂ.

੯੩. ਭਤ੍ਤੁਰਤ੍ਥੇ ਪਰਕ੍ਕਨ੍ਤੋ, ਯਂ ਠਾਨਮਧਿਗਚ੍ਛਤਿ;

ਸੂਰੋ ਅਤ੍ਤਪਰਿਚ੍ਚਾਗੀ, ਲਭਮਾਨੋ ਭਵਾਮਹਨ੍ਤਿ.

ਅਬ੍ਭਨ੍ਤਰਜਾਤਕਂ ਪਠਮਂ.

੨੮੨. ਸੇਯ੍ਯਜਾਤਕਂ (੩-੪-੨)

੯੪. ਸੇਯ੍ਯਂਸੋ ਸੇਯ੍ਯਸੋ ਹੋਤਿ, ਯੋ ਸੇਯ੍ਯਮੁਪਸੇਵਤਿ;

ਏਕੇਨ ਸਨ੍ਧਿਂ ਕਤ੍ਵਾਨ, ਸਤਂ ਵਜ੍ਝੇ [ਮਚ੍ਚੇ (ਕ.), ਬਜ੍ਝੇ (ਕ. ਅਟ੍ਠ.)] ਅਮੋਚਯਿਂ.

੯੫. [ਕਸ੍ਮਾ…ਪੇ… ਸਗ੍ਗਂ ਨ ਗਚ੍ਛੇਯ੍ਯ (ਕਤ੍ਥਚਿ)] ਤਸ੍ਮਾ ਸਬ੍ਬੇਨ ਲੋਕੇਨ, ਸਨ੍ਧਿਂ ਕਤ੍ਵਾਨ ਏਕਤੋ [ਏਕਕੋ (ਸੀ. ਸ੍ਯਾ. ਪੀ.)];

ਪੇਚ੍ਚ ਸਗ੍ਗਂ ਨਿਗਚ੍ਛੇਯ੍ਯ [ਕਸ੍ਮਾ…ਪੇ… ਸਗ੍ਗਂ ਨ ਗਚ੍ਛੇਯ੍ਯ (ਕਤ੍ਥਚਿ)], ਇਦਂ ਸੁਣਾਥ ਕਾਸਿਯਾ [ਕਾਸਯੋ (ਸੀ. ਪੀ.)].

੯੬. ਇਦਂ ਵਤ੍ਵਾ ਮਹਾਰਾਜਾ, ਕਂਸੋ ਬਾਰਾਣਸਿਗ੍ਗਹੋ;

ਧਨੁਂ ਕਣ੍ਡਞ੍ਚ [ਤੂਣਿਞ੍ਚ (ਸੀ. ਪੀ.)] ਨਿਕ੍ਖਿਪ੍ਪ, ਸਂਯਮਂ ਅਜ੍ਝੁਪਾਗਮੀਤਿ.

ਸੇਯ੍ਯਜਾਤਕਂ ਦੁਤਿਯਂ.

੨੮੩. ਵਡ੍ਢਕੀਸੂਕਰਜਾਤਕਂ (੩-੪-੩)

੯੭. ਵਰਂ ਵਰਂ ਤ੍ਵਂ ਨਿਹਨਂ ਪੁਰੇ ਚਰਿ, ਅਸ੍ਮਿਂ ਪਦੇਸੇ ਅਭਿਭੁਯ੍ਯ ਸੂਕਰੇ;

ਸੋ ਦਾਨਿ ਏਕੋ ਬ੍ਯਪਗਮ੍ਮ ਝਾਯਸਿ, ਬਲਂ ਨੁ ਤੇ ਬ੍ਯਗ੍ਘ ਨ ਚਜ੍ਜ ਵਿਜ੍ਜਤਿ.

੯੮. ਇਮੇ ਸੁਦਂ [ਇਮਸ੍ਸੁ ਤਾ (ਸ੍ਯਾ. ਕ.)] ਯਨ੍ਤਿ ਦਿਸੋਦਿਸਂ ਪੁਰੇ, ਭਯਟ੍ਟਿਤਾ ਲੇਣਗਵੇਸਿਨੋ ਪੁਥੁ;

ਤੇ ਦਾਨਿ ਸਙ੍ਗਮ੍ਮ ਵਸਨ੍ਤਿ ਏਕਤੋ, ਯਤ੍ਥਟ੍ਠਿਤਾ ਦੁਪ੍ਪਸਹਜ੍ਜਮੇ [ਦੁਪ੍ਪਸਹਜ੍ਜਿਮੇ (ਸ੍ਯਾ.)] ਮਯਾ.

੯੯. ਨਮਤ੍ਥੁ ਸਙ੍ਘਾਨ ਸਮਾਗਤਾਨਂ, ਦਿਸ੍ਵਾ ਸਯਂ ਸਖ੍ਯ ਵਦਾਮਿ ਅਬ੍ਭੁਤਂ;

ਬ੍ਯਗ੍ਘਂ ਮਿਗਾ ਯਤ੍ਥ ਜਿਨਿਂਸੁ ਦਾਠਿਨੋ, ਸਾਮਗ੍ਗਿਯਾ ਦਾਠਬਲੇਸੁ ਮੁਚ੍ਚਰੇਤਿ.

ਵਡ੍ਢਕੀਸੂਕਰਜਾਤਕਂ ਤਤਿਯਂ.

੨੮੪. ਸਿਰਿਜਾਤਕਂ (੩-੪-੪)

੧੦੦. ਯਂ ਉਸ੍ਸੁਕਾ ਸਙ੍ਘਰਨ੍ਤਿ, ਅਲਕ੍ਖਿਕਾ ਬਹੁਂ ਧਨਂ;

ਸਿਪ੍ਪਵਨ੍ਤੋ ਅਸਿਪ੍ਪਾ ਚ, ਲਕ੍ਖਿਵਾ ਤਾਨਿ ਭੁਞ੍ਜਤਿ.

੧੦੧. ਸਬ੍ਬਤ੍ਥ ਕਤਪੁਞ੍ਞਸ੍ਸ, ਅਤਿਚ੍ਚਞ੍ਞੇਵ ਪਾਣਿਨੋ;

ਉਪ੍ਪਜ੍ਜਨ੍ਤਿ ਬਹੂ ਭੋਗਾ, ਅਪ੍ਪਨਾਯਤਨੇਸੁਪਿ.

੧੦੨. ਕੁਕ੍ਕੁਟੋ [ਕੁਕ੍ਕੁਟ (ਸੀ. ਪੀ.), ਕੁਕ੍ਕੁਟਾ (ਸੀ. ਨਿਸ੍ਸਯ, ਸਦ੍ਦਨੀਤਿ)] ਮਣਯੋ ਦਣ੍ਡੋ, ਥਿਯੋ ਚ ਪੁਞ੍ਞਲਕ੍ਖਣਾ;

ਉਪ੍ਪਜ੍ਜਨ੍ਤਿ ਅਪਾਪਸ੍ਸ, ਕਤਪੁਞ੍ਞਸ੍ਸ ਜਨ੍ਤੁਨੋਤਿ.

ਸਿਰਿਜਾਤਕਂ ਚਤੁਤ੍ਥਂ.

੨੮੫. ਮਣਿਸੂਕਰਜਾਤਕਂ (੩-੪-੫)

੧੦੩. ਦਰਿਯਾ ਸਤ੍ਤ ਵਸ੍ਸਾਨਿ, ਤਿਂਸਮਤ੍ਤਾ ਵਸਾਮਸੇ;

ਹਞ੍ਞਾਮ [ਹਞ੍ਛੇਮ (ਸੀ. ਪੀ.), ਹਞ੍ਛਾਮ (?)] ਮਣਿਨੋ ਆਭਂ, ਇਤਿ ਨੋ ਮਨ੍ਤਨਂ ਅਹੁ.

੧੦੪. ਯਾਵਤਾ ਮਣਿਂ ਘਂਸਾਮ [ਯਾਵ ਯਾਵ ਨਿਘਂਸਾਮ (ਸੀ. ਪੀ.)], ਭਿਯ੍ਯੋ ਵੋਦਾਯਤੇ ਮਣਿ;

ਇਦਞ੍ਚ ਦਾਨਿ ਪੁਚ੍ਛਾਮ, ਕਿਂ ਕਿਚ੍ਚਂ ਇਧ ਮਞ੍ਞਸਿ.

੧੦੫. ਅਯਂ ਮਣਿ ਵੇਲ਼ੂਰਿਯੋ, ਅਕਾਚੋ ਵਿਮਲੋ [ਵਿਪੁਲੋ (ਕ.)] ਸੁਭੋ;

ਨਾਸ੍ਸ ਸਕ੍ਕਾ ਸਿਰਿਂ ਹਨ੍ਤੁਂ, ਅਪਕ੍ਕਮਥ ਸੂਕਰਾਤਿ.

ਮਣਿਸੂਕਰ [ਮਣਿਘਂਸ (ਕ.)] ਜਾਤਕਂ ਪਞ੍ਚਮਂ.

੨੮੬. ਸਾਲੂਕਜਾਤਕਂ (੩-੪-੬)

੧੦੬. ਮਾ ਸਾਲੂਕਸ੍ਸ ਪਿਹਯਿ, ਆਤੁਰਨ੍ਨਾਨਿ ਭੁਞ੍ਜਤਿ;

ਅਪ੍ਪੋਸ੍ਸੁਕ੍ਕੋ ਭੁਸਂ ਖਾਦ, ਏਤਂ ਦੀਘਾਯੁਲਕ੍ਖਣਂ.

੧੦੭. ਇਦਾਨਿ ਸੋ ਇਧਾਗਨ੍ਤ੍ਵਾ, ਅਤਿਥੀ ਯੁਤ੍ਤਸੇਵਕੋ;

ਅਥ ਦਕ੍ਖਸਿ ਸਾਲੂਕਂ, ਸਯਨ੍ਤਂ ਮੁਸਲੁਤ੍ਤਰਂ.

੧੦੮. ਵਿਕਨ੍ਤਂ [ਵਿਕਤ੍ਤਂ (ਸੀ.), ਵਿਕਨ੍ਤਿਯਮਾਨਂ ਛਿਨ੍ਦਿਯਮਾਨਂਤਿ ਅਤ੍ਥੋ] ਸੂਕਰਂ ਦਿਸ੍ਵਾ, ਸਯਨ੍ਤਂ ਮੁਸਲੁਤ੍ਤਰਂ;

ਜਰਗ੍ਗਵਾ ਵਿਚਿਨ੍ਤੇਸੁਂ, ਵਰਮ੍ਹਾਕਂ ਭੁਸਾਮਿਵਾਤਿ.

ਸਾਲੂਕਜਾਤਕਂ ਛਟ੍ਠਂ.

੨੮੭. ਲਾਭਗਰਹਜਾਤਕਂ (੩-੪-੭)

੧੦੯. ਨਾਨੁਮ੍ਮਤ੍ਤੋ ਨਾਪਿਸੁਣੋ, ਨਾਨਟੋ ਨਾਕੁਤੂਹਲੋ;

ਮੂਲ਼੍ਹੇਸੁ ਲਭਤੇ ਲਾਭਂ, ਏਸਾ ਤੇ ਅਨੁਸਾਸਨੀ.

੧੧੦. ਧਿਰਤ੍ਥੁ ਤਂ ਯਸਲਾਭਂ, ਧਨਲਾਭਞ੍ਚ ਬ੍ਰਾਹ੍ਮਣ;

ਯਾ ਵੁਤ੍ਤਿ ਵਿਨਿਪਾਤੇਨ, ਅਧਮ੍ਮਚਰਣੇਨ [ਅਧਮ੍ਮਚਰਿਯਾਯ (ਸੀ. ਸ੍ਯਾ.)] ਵਾ.

੧੧੧. ਅਪਿ ਚੇ ਪਤ੍ਤਮਾਦਾਯ, ਅਨਗਾਰੋ ਪਰਿਬ੍ਬਜੇ;

ਏਸਾਵ ਜੀਵਿਕਾ ਸੇਯ੍ਯੋ [ਸੇਯ੍ਯਾ (ਸੀ. ਸ੍ਯਾ. ਪੀ.)], ਯਾ ਚਾਧਮ੍ਮੇਨ ਏਸਨਾਤਿ.

ਲਾਭਗਰਹਜਾਤਕਂ ਸਤ੍ਤਮਂ.

੨੮੮. ਮਚ੍ਛੁਦ੍ਦਾਨਜਾਤਕਂ (੩-੪-੮)

੧੧੨. ਅਗ੍ਘਨ੍ਤਿ ਮਚ੍ਛਾ ਅਧਿਕਂ ਸਹਸ੍ਸਂ, ਨ ਸੋ ਅਤ੍ਥਿ ਯੋ ਇਮਂ ਸਦ੍ਦਹੇਯ੍ਯ;

ਮਯ੍ਹਞ੍ਚ ਅਸ੍ਸੁ ਇਧ ਸਤ੍ਤ ਮਾਸਾ, ਅਹਮ੍ਪਿ ਤਂ ਮਚ੍ਛੁਦ੍ਦਾਨਂ ਕਿਣੇਯ੍ਯਂ.

੧੧੩. ਮਚ੍ਛਾਨਂ ਭੋਜਨਂ ਦਤ੍ਵਾ, ਮਮ ਦਕ੍ਖਿਣਮਾਦਿਸਿ;

ਤਂ ਦਕ੍ਖਿਣਂ ਸਰਨ੍ਤਿਯਾ, ਕਤਂ ਅਪਚਿਤਿਂ ਤਯਾ.

੧੧੪. ਪਦੁਟ੍ਠਚਿਤ੍ਤਸ੍ਸ ਨ ਫਾਤਿ ਹੋਤਿ, ਨ ਚਾਪਿ ਤਂ [ਨਂ (ਸੀ. ਸ੍ਯਾ.)] ਦੇਵਤਾ ਪੂਜਯਨ੍ਤਿ;

ਯੋ ਭਾਤਰਂ ਪੇਤ੍ਤਿਕਂ ਸਾਪਤੇਯ੍ਯਂ, ਅਵਞ੍ਚਯੀ ਦੁਕ੍ਕਟਕਮ੍ਮਕਾਰੀਤਿ.

ਮਚ੍ਛੁਦ੍ਦਾਨਜਾਤਕਂ ਅਟ੍ਠਮਂ.

੨੮੯. ਨਾਨਾਛਨ੍ਦਜਾਤਕਂ (੩-੪-੯)

੧੧੫. ਨਾਨਾਛਨ੍ਦਾ ਮਹਾਰਾਜ, ਏਕਾਗਾਰੇ ਵਸਾਮਸੇ;

ਅਹਂ ਗਾਮਵਰਂ ਇਚ੍ਛੇ, ਬ੍ਰਾਹ੍ਮਣੀ ਚ ਗਵਂ ਸਤਂ.

੧੧੬. ਪੁਤ੍ਤੋ ਚ ਆਜਞ੍ਞਰਥਂ, ਕਞ੍ਞਾ ਚ ਮਣਿਕੁਣ੍ਡਲਂ;

ਯਾ ਚੇਸਾ ਪੁਣ੍ਣਿਕਾ ਜਮ੍ਮੀ, ਉਦੁਕ੍ਖਲਂਭਿਕਙ੍ਖਤਿ.

੧੧੭. ਬ੍ਰਾਹ੍ਮਣਸ੍ਸ ਗਾਮਵਰਂ, ਬ੍ਰਾਹ੍ਮਣਿਯਾ ਗਵਂ ਸਤਂ;

ਪੁਤ੍ਤਸ੍ਸ ਆਜਞ੍ਞਰਥਂ, ਕਞ੍ਞਾਯ ਮਣਿਕੁਣ੍ਡਲਂ;

ਯਞ੍ਚੇਤਂ ਪੁਣ੍ਣਿਕਂ ਜਮ੍ਮਿਂ, ਪਟਿਪਾਦੇਥੁਦੁਕ੍ਖਲਨ੍ਤਿ.

ਨਾਨਾਛਨ੍ਦਜਾਤਕਂ ਨਵਮਂ.

੨੯੦. ਸੀਲਵੀਮਂਸਕਜਾਤਕਂ (੩-੪-੧੦)

੧੧੮. ਸੀਲਂ ਕਿਰੇਵ ਕਲ੍ਯਾਣਂ, ਸੀਲਂ ਲੋਕੇ ਅਨੁਤ੍ਤਰਂ;

ਪਸ੍ਸ ਘੋਰਵਿਸੋ ਨਾਗੋ, ਸੀਲਵਾਤਿ ਨ ਹਞ੍ਞਤਿ.

੧੧੯. ਸੋਹਂ ਸੀਲਂ ਸਮਾਦਿਸ੍ਸਂ, ਲੋਕੇ ਅਨੁਮਤਂ ਸਿਵਂ;

ਅਰਿਯਵੁਤ੍ਤਿਸਮਾਚਾਰੋ, ਯੇਨ ਵੁਚ੍ਚਤਿ ਸੀਲਵਾ.

੧੨੦. ਞਾਤੀਨਞ੍ਚ ਪਿਯੋ ਹੋਤਿ, ਮਿਤ੍ਤੇਸੁ ਚ ਵਿਰੋਚਤਿ;

ਕਾਯਸ੍ਸ ਭੇਦਾ ਸੁਗਤਿਂ, ਉਪਪਜ੍ਜਤਿ ਸੀਲਵਾਤਿ.

ਸੀਲਵੀਮਂਸਕਜਾਤਕਂ ਦਸਮਂ.

ਅਬ੍ਭਨ੍ਤਰਵਗ੍ਗੋ ਚਤੁਤ੍ਥੋ.

ਤਸ੍ਸੁਦ੍ਦਾਨਂ –

ਦੁਮ ਕਂਸਵਰੁਤ੍ਤਮਬ੍ਯਗ੍ਘਮਿਗਾ, ਮਣਯੋ ਮਣਿ ਸਾਲੁਕਮਵ੍ਹਯਨੋ;

ਅਨੁਸਾਸਨਿਯੋਪਿ ਚ ਮਚ੍ਛਵਰੋ, ਮਣਿਕੁਣ੍ਡਲਕੇਨ ਕਿਰੇਨ ਦਸਾਤਿ.