੩. ਉਦਪਾਨਵਗ੍ਗੋ
੨੭੧. ਉਦਪਾਨਦੂਸਕਜਾਤਕਂ (੩-੩-੧)
੬੧. ਆਰਞ੍ਞਿਕਸ੍ਸ ਇਸਿਨੋ, ਚਿਰਰਤ੍ਤਂ ਤਪਸ੍ਸਿਨੋ;
ਕਿਚ੍ਛਾਕਤਂ ਉਦਪਾਨਂ, ਕਥਂ ਸਮ੍ਮ ਅਵਾਹਸਿ [ਅਵਾਹਯਿ (ਸੀ. ਪੀ.), ਅਪਾਹਸਿ (ਸ੍ਯਾ.)].
੬੨. ਏਸ ਧਮ੍ਮੋ ਸਿਙ੍ਗਾਲਾਨਂ, ਯਂ ਪਿਤ੍ਵਾ ਓਹਦਾਮਸੇ;
ਪਿਤੁਪਿਤਾਮਹਂ ਧਮ੍ਮੋ, ਨ ਤਂ [ਨ ਨਂ (ਸੀ. ਪੀ.)] ਉਜ੍ਝਾਤੁਮਰਹਸਿ.
੬੩. ਯੇਸਂ ਵੋ ਏਦਿਸੋ ਧਮ੍ਮੋ, ਅਧਮ੍ਮੋ ਪਨ ਕੀਦਿਸੋ;
ਮਾ ਵੋ ਧਮ੍ਮਂ ਅਧਮ੍ਮਂ ਵਾ, ਅਦ੍ਦਸਾਮ ਕੁਦਾਚਨਨ੍ਤਿ.
ਉਦਪਾਨਦੂਸਕਜਾਤਕਂ ਪਠਮਂ.
੨੭੨. ਬ੍ਯਗ੍ਘਜਾਤਕਂ (੩-੩-੨)
੬੪. ਯੇਨ ਮਿਤ੍ਤੇਨ ਸਂਸਗ੍ਗਾ, ਯੋਗਕ੍ਖੇਮੋ ਵਿਹਿਯ੍ਯਤਿ;
ਪੁਬ੍ਬੇਵਜ੍ਝਾਭਵਂ ਤਸ੍ਸ, ਰੁਕ੍ਖੇ ਅਕ੍ਖੀਵ ਪਣ੍ਡਿਤੋ.
੬੫. ਯੇਨ ਮਿਤ੍ਤੇਨ ਸਂਸਗ੍ਗਾ, ਯੋਗਕ੍ਖੇਮੋ ਪਵਡ੍ਢਤਿ;
ਕਰੇਯ੍ਯਤ੍ਤਸਮਂ ਵੁਤ੍ਤਿਂ, ਸਬ੍ਬਕਿਚ੍ਚੇਸੁ ਪਣ੍ਡਿਤੋ.
੬੬. ਏਥ ਬ੍ਯਗ੍ਘਾ ਨਿਵਤ੍ਤਵ੍ਹੋ, ਪਚ੍ਚੁਪੇਥ [ਪਚ੍ਚਮੇਥ (ਸੀ. ਪੀ.)] ਮਹਾਵਨਂ;
ਮਾ ਵਨਂ ਛਿਨ੍ਦਿ ਨਿਬ੍ਯਗ੍ਘਂ, ਬ੍ਯਗ੍ਘਾ ਮਾਹੇਸੁ ਨਿਬ੍ਬਨਾਤਿ.
ਬ੍ਯਗ੍ਘਜਾਤਕਂ ਦੁਤਿਯਂ.
੨੭੩. ਕਚ੍ਛਪਜਾਤਕਂ (੩-੩-੩)
੬੭. ਕੋ ਨੁ ਉਦ੍ਧਿਤਭਤ੍ਤੋਵ [ਉਦ੍ਦਿਤਭਤ੍ਤੋਵ (ਸੀ.), ਵਡ੍ਢਿਤਭਤ੍ਤੋਵ (ਸ੍ਯਾ.)], ਪੂਰਹਤ੍ਥੋਵ ਬ੍ਰਾਹ੍ਮਣੋ;
ਕਹਂ ਨੁ ਭਿਕ੍ਖਂ ਅਚਰਿ, ਕਂ ਸਦ੍ਧਂ ਉਪਸਙ੍ਕਮਿ.
੬੮. ਅਹਂ ਕਪਿਸ੍ਮਿ ਦੁਮ੍ਮੇਧੋ, ਅਨਾਮਾਸਾਨਿ ਆਮਸਿਂ;
ਤ੍ਵਂ ਮਂ ਮੋਚਯ ਭਦ੍ਦਨ੍ਤੇ, ਮੁਤ੍ਤੋ ਗਚ੍ਛੇਯ੍ਯ ਪਬ੍ਬਤਂ.
੬੯. ਕਚ੍ਛਪਾ ਕਸ੍ਸਪਾ ਹੋਨ੍ਤਿ, ਕੋਣ੍ਡਞ੍ਞਾ ਹੋਨ੍ਤਿ ਮਕ੍ਕਟਾ;
ਮੁਞ੍ਚ ਕਸ੍ਸਪ ਕੋਣ੍ਡਞ੍ਞਂ, ਕਤਂ ਮੇਥੁਨਕਂ ਤਯਾਤਿ.
ਕਚ੍ਛਪਜਾਤਕਂ ਤਤਿਯਂ.
੨੭੪. ਲੋਲਜਾਤਕਂ (੩-੩-੪)
੭੦. ਕਾਯਂ ਬਲਾਕਾ ਸਿਖਿਨੀ, ਚੋਰੀ ਲਙ੍ਘਿਪਿਤਾਮਹਾ;
ਓਰਂ ਬਲਾਕੇ ਆਗਚ੍ਛ, ਚਣ੍ਡੋ ਮੇ ਵਾਯਸੋ ਸਖਾ.
੭੧. ਨਾਹਂ ਬਲਾਕਾ ਸਿਖਿਨੀ, ਅਹਂ ਲੋਲੋਸ੍ਮਿ ਵਾਯਸੋ;
ਅਕਤ੍ਵਾ ਵਚਨਂ ਤੁਯ੍ਹਂ, ਪਸ੍ਸ ਲੂਨੋਸ੍ਮਿ ਆਗਤੋ.
੭੨. ਪੁਨਪਾਪਜ੍ਜਸੀ ਸਮ੍ਮ, ਸੀਲਞ੍ਹਿ ਤਵ ਤਾਦਿਸਂ;
ਨ ਹਿ ਮਾਨੁਸਕਾ ਭੋਗਾ, ਸੁਭੁਞ੍ਜਾ ਹੋਨ੍ਤਿ ਪਕ੍ਖਿਨਾਤਿ.
ਲੋਲਜਾਤਕਂ ਚਤੁਤ੍ਥਂ.
੨੭੫. ਰੁਚਿਰਜਾਤਕਂ (੩-੩-੫)
੭੩. ਕਾਯਂ ਬਲਾਕਾ ਰੁਚਿਰਾ, ਕਾਕਨੀਲ਼ਸ੍ਮਿਮਚ੍ਛਤਿ;
ਚਣ੍ਡੋ ਕਾਕੋ ਸਖਾ ਮਯ੍ਹਂ, ਯਸ੍ਸ [ਤਸ੍ਸ (ਸੀ. ਪੀ.)] ਚੇਤਂ ਕੁਲਾਵਕਂ.
੭੪. ਨਨੁ ਮਂ ਸਮ੍ਮ ਜਾਨਾਸਿ, ਦਿਜ ਸਾਮਾਕਭੋਜਨ;
ਅਕਤ੍ਵਾ ਵਚਨਂ ਤੁਯ੍ਹਂ, ਪਸ੍ਸ ਲੂਨੋਸ੍ਮਿ ਆਗਤੋ.
੭੫. ਪੁਨਪਾਪਜ੍ਜਸੀ ਸਮ੍ਮ, ਸੀਲਞ੍ਹਿ ਤਵ ਤਾਦਿਸਂ;
ਨ ਹਿ ਮਾਨੁਸਕਾ ਭੋਗਾ, ਸੁਭੁਞ੍ਜਾ ਹੋਨ੍ਤਿ ਪਕ੍ਖਿਨਾਤਿ.
ਰੁਚਿਰਜਾਤਕਂ ਪਞ੍ਚਮਂ.
੨੭੬. ਕੁਰੁਧਮ੍ਮਜਾਤਕਂ (੩-੩-੬)
੭੬. ਤਵ ਸਦ੍ਧਞ੍ਚ ਸੀਲਞ੍ਚ, ਵਿਦਿਤ੍ਵਾਨ ਜਨਾਧਿਪ;
ਵਣ੍ਣਂ ਅਞ੍ਜਨਵਣ੍ਣੇਨ, ਕਾਲਿਙ੍ਗਸ੍ਮਿਂ ਨਿਮਿਮ੍ਹਸੇ [ਵਿਨਿਮ੍ਹਸੇ (ਸ੍ਯਾ.), ਵਨਿਮ੍ਹਸੇ (ਕ.)].
੭੭. ਅਨ੍ਨਭਚ੍ਚਾ ਚਭਚ੍ਚਾ ਚ, ਯੋਧ ਉਦ੍ਦਿਸ੍ਸ ਗਚ੍ਛਤਿ;
ਸਬ੍ਬੇ ਤੇ ਅਪ੍ਪਟਿਕ੍ਖਿਪ੍ਪਾ, ਪੁਬ੍ਬਾਚਰਿਯਵਚੋ ਇਦਂ.
੭੮. ਦਦਾਮਿ ਵੋ ਬ੍ਰਾਹ੍ਮਣਾ ਨਾਗਮੇਤਂ, ਰਾਜਾਰਹਂ ਰਾਜਭੋਗ੍ਗਂ ਯਸਸ੍ਸਿਨਂ;
ਅਲਙ੍ਕਤਂ ਹੇਮਜਾਲਾਭਿਛਨ੍ਨਂ, ਸਸਾਰਥਿਂ ਗਚ੍ਛਥ ਯੇਨ ਕਾਮਨ੍ਤਿ.
ਕੁਰੁਧਮ੍ਮਜਾਤਕਂ [ਕੁਰੁਧਮ੍ਮਜਾਤਕਂ (ਸੀ. ਸ੍ਯਾ. ਪੀ.)] ਛਟ੍ਠਂ.
੨੭੭. ਰੋਮਕਜਾਤਕਂ (੩-੩-੭)
੭੯. ਵਸ੍ਸਾਨਿ ਪਞ੍ਞਾਸ ਸਮਾਧਿਕਾਨਿ, ਵਸਿਮ੍ਹ ਸੇਲਸ੍ਸ ਗੁਹਾਯ ਰੋਮਕ;
ਅਸਙ੍ਕਮਾਨਾ ਅਭਿਨਿਬ੍ਬੁਤਤ੍ਤਾ [ਅਭਿਨਿਬ੍ਬੁਤਚਿਤ੍ਤਾ (ਸ੍ਯਾ. ਕ.)], ਹਤ੍ਥਤ੍ਤ [ਹਤ੍ਥਤ੍ਥ (ਸ੍ਯਾ.)] ਮਾਯਨ੍ਤਿ ਮਮਣ੍ਡਜਾ ਪੁਰੇ.
੮੦. ਤੇ ਦਾਨਿ ਵਕ੍ਕਙ੍ਗ ਕਿਮਤ੍ਥਮੁਸ੍ਸੁਕਾ, ਭਜਨ੍ਤਿ ਅਞ੍ਞਂ ਗਿਰਿਕਨ੍ਦਰਂ ਦਿਜਾ;
ਨ ਨੂਨ ਮਞ੍ਞਨ੍ਤਿ ਮਮਂ ਯਥਾ ਪੁਰੇ, ਚਿਰਪ੍ਪਵੁਤ੍ਥਾ ਅਥ ਵਾ ਨ ਤੇ ਇਮੇ.
੮੧. ਜਾਨਾਮ ਤਂ ਨ ਮਯਂ ਸਮ੍ਪਮੂਲ਼੍ਹਾ [ਨ ਮਯ’ਮਸ੍ਮ ਮੂਲ਼੍ਹਾ (ਸੀ. ਪੀ.)], ਸੋਯੇਵ ਤ੍ਵਂ ਤੇ ਮਯਮਸ੍ਮ ਨਾਞ੍ਞੇ;
ਚਿਤ੍ਤਞ੍ਚ ਤੇ ਅਸ੍ਮਿਂ ਜਨੇ ਪਦੁਟ੍ਠਂ, ਆਜੀਵਿਕਾ [ਆਜੀਵਕ (ਸੀ. ਸ੍ਯਾ.), ਆਜੀਵਿਕ (ਪੀ.)] ਤੇਨ ਤਮੁਤ੍ਤਸਾਮਾਤਿ.
ਰੋਮਕਜਾਤਕਂ ਸਤ੍ਤਮਂ.
੨੭੮. ਮਹਿਂਸਰਾਜਜਾਤਕਂ (੩-੩-੮)
੮੨. ਕਿਮਤ੍ਥ [ਕਮਤ੍ਥ (ਸੀ. ਪੀ.)] ਮਭਿਸਨ੍ਧਾਯ, ਲਹੁਚਿਤ੍ਤਸ੍ਸ ਦੁਬ੍ਭਿਨੋ [ਦੂਭਿਨੋ (ਸੀ. ਪੀ.)];
ਸਬ੍ਬਕਾਮਦਦਸ੍ਸੇਵ [ਦੁਹਸ੍ਸੇਵ (ਸੀ. ਸ੍ਯਾ. ਪੀ.), ਰਹਸ੍ਸੇਵ (ਕ.)], ਇਮਂ ਦੁਕ੍ਖਂ ਤਿਤਿਕ੍ਖਸਿ.
੮੩. ਸਿਙ੍ਗੇਨ ਨਿਹਨਾਹੇਤਂ, ਪਦਸਾ ਚ ਅਧਿਟ੍ਠਹ;
ਭਿਯ੍ਯੋ [ਭੀਯੋ (ਸੀ.)] ਬਾਲਾ ਪਕੁਜ੍ਝੇਯ੍ਯੁਂ, ਨੋ ਚਸ੍ਸ ਪਟਿਸੇਧਕੋ.
੮੪. ਮਮੇਵਾਯਂ ਮਞ੍ਞਮਾਨੋ, ਅਞ੍ਞੇਪੇਵਂ [ਅਞ੍ਞਮ੍ਪੇਵਂ (ਸੀ. ਸ੍ਯਾ. ਪੀ.)] ਕਰਿਸ੍ਸਤਿ;
ਤੇ ਨਂ ਤਤ੍ਥ ਵਧਿਸ੍ਸਨ੍ਤਿ, ਸਾ ਮੇ ਮੁਤ੍ਤਿ ਭਵਿਸ੍ਸਤੀਤਿ.
ਮਹਿਂਸਰਾਜਜਾਤਕਂ [ਮਹਿਸਜਾਤਕਂ (ਸੀ. ਸ੍ਯਾ. ਪੀ.)] ਅਟ੍ਠਮਂ.
੨੭੯. ਸਤਪਤ੍ਤਜਾਤਕਂ (੩-੩-੯)
੮੫. ਯਥਾ ਮਾਣਵਕੋ ਪਨ੍ਥੇ, ਸਿਙ੍ਗਾਲਿਂ ਵਨਗੋਚਰਿਂ;
ਅਤ੍ਥਕਾਮਂ ਪਵੇਦੇਨ੍ਤਿਂ [ਪਵਦਨ੍ਤਿਂ (ਪੀ.)], ਅਨਤ੍ਥਕਾਮਾਤਿ ਮਞ੍ਞਤਿ;
ਅਨਤ੍ਥਕਾਮਂ ਸਤਪਤ੍ਤਂ, ਅਤ੍ਥਕਾਮੋਤਿ ਮਞ੍ਞਤਿ.
੮੬. ਏਵਮੇਵ ਇਧੇਕਚ੍ਚੋ, ਪੁਗ੍ਗਲੋ ਹੋਤਿ ਤਾਦਿਸੋ;
ਹਿਤੇਹਿ ਵਚਨਂ ਵੁਤ੍ਤੋ, ਪਟਿਗਣ੍ਹਾਤਿ ਵਾਮਤੋ.
੮੭. ਯੇ ਚ ਖੋ ਨਂ ਪਸਂਸਨ੍ਤਿ, ਭਯਾ ਉਕ੍ਕਂਸਯਨ੍ਤਿ ਵਾ [ਚ (ਸੀ. ਪੀ.)];
ਤਞ੍ਹਿ ਸੋ ਮਞ੍ਞਤੇ ਮਿਤ੍ਤਂ, ਸਤਪਤ੍ਤਂਵ ਮਾਣਵੋਤਿ.
ਸਤਪਤ੍ਤਜਾਤਕਂ ਨਵਮਂ.
੨੮੦. ਪੁਟਦੂਸਕਜਾਤਕਂ (੩-੩-੧੦)
੮੮. ਅਦ੍ਧਾ ਹਿ ਨੂਨ ਮਿਗਰਾਜਾ, ਪੁਟਕਮ੍ਮਸ੍ਸ ਕੋਵਿਦੋ;
ਤਥਾ ਹਿ ਪੁਟਂ ਦੂਸੇਤਿ, ਅਞ੍ਞਂ ਨੂਨ ਕਰਿਸ੍ਸਤਿ.
੮੯. ਨ ਮੇ ਮਾਤਾ ਵਾ ਪਿਤਾ ਵਾ, ਪੁਟਕਮ੍ਮਸ੍ਸ ਕੋਵਿਦੋ;
ਕਤਂ ਕਤਂ ਖੋ ਦੂਸੇਮ, ਏਵਂ ਧਮ੍ਮਮਿਦਂ ਕੁਲਂ.
੯੦. ਯੇਸਂ ਵੋ ਏਦਿਸੋ ਧਮ੍ਮੋ, ਅਧਮ੍ਮੋ ਪਨ ਕੀਦਿਸੋ;
ਮਾ ਵੋ ਧਮ੍ਮਂ ਅਧਮ੍ਮਂ ਵਾ, ਅਦ੍ਦਸਾਮ ਕੁਦਾਚਨਨ੍ਤਿ.
ਪੁਟਦੂਸਕਜਾਤਕਂ ਦਸਮਂ.
ਉਦਪਾਨਵਗ੍ਗੋ [ਅਰਞ੍ਞਵਗ੍ਗੋ (ਸੀ. ਪੀ. ਕ.)] ਤਤਿਯੋ.
ਤਸ੍ਸੁਦ੍ਦਾਨਂ –
ਉਦਪਾਨਵਰਂ ਵਨਬ੍ਯਗ੍ਘ ਕਪਿ, ਸਿਖਿਨੀ ਚ ਬਲਾਕ ਰੁਚਿਰਵਰੋ;
ਸੁਜਨਾਧਿਪਰੋਮਕਦੂਸ ਪੁਨ, ਸਤਪਤ੍ਤਵਰੋ ਪੁਟਕਮ੍ਮ ਦਸਾਤਿ.