੨੬੭. ਕਕ੍ਕਟਕਜਾਤਕਂ (੩-੨-੭)

੪੯. ਸਿਙ੍ਗੀਮਿਗੋ ਆਯਤਚਕ੍ਖੁਨੇਤ੍ਤੋ, ਅਟ੍ਠਿਤ੍ਤਚੋ ਵਾਰਿਸਯੋ ਅਲੋਮੋ;

ਤੇਨਾਭਿਭੂਤੋ ਕਪਣਂ ਰੁਦਾਮਿ, ਮਾ ਹੇਵ ਮਂ ਪਾਣਸਮਂ ਜਹੇਯ੍ਯ [ਜਹੇਯ੍ਯਾ (ਪੀ.) ਜਹਾ’ਯ੍ਯੇ (?)].

੫੦. ਅਯ੍ਯ ਨ ਤਂ ਜਹਿਸ੍ਸਾਮਿ, ਕੁਞ੍ਜਰਂ ਸਟ੍ਠਿਹਾਯਨਂ [ਕੁਞ੍ਜਰ ਸਟ੍ਠਿਹਾਯਨ (ਸੀ. ਪੀ.)];

ਪਥਬ੍ਯਾ ਚਾਤੁਰਨ੍ਤਾਯ, ਸੁਪ੍ਪਿਯੋ ਹੋਸਿ ਮੇ ਤੁਵਂ.

੫੧. ਯੇ ਕੁਲ਼ੀਰਾ ਸਮੁਦ੍ਦਸ੍ਮਿਂ, ਗਙ੍ਗਾਯ ਯਮੁਨਾਯ [ਨਮ੍ਮਦਾਯ (ਸੀ. ਪੀ.)] ਚ;

ਤੇਸਂ ਤ੍ਵਂ ਵਾਰਿਜੋ ਸੇਟ੍ਠੋ, ਮੁਞ੍ਚ ਰੋਦਨ੍ਤਿਯਾ ਪਤਿਨ੍ਤਿ.

ਕਕ੍ਕਟਕ [ਕੁਲ਼ੀਰ (ਕ.)] ਜਾਤਕਂ ਸਤ੍ਤਮਂ.