੨. ਪਦੁਮਵਗ੍ਗੋ

੨੬੧. ਪਦੁਮਜਾਤਕਂ (੩-੨-੧)

੩੧. ਯਥਾ ਕੇਸਾ ਚ ਮਸ੍ਸੂ ਚ, ਛਿਨ੍ਨਂ ਛਿਨ੍ਨਂ ਵਿਰੂਹਤਿ;

ਏਵਂ ਰੂਹਤੁ ਤੇ ਨਾਸਾ, ਪਦੁਮਂ ਦੇਹਿ ਯਾਚਿਤੋ.

੩੨. ਯਥਾ ਸਾਰਦਿਕਂ ਬੀਜਂ, ਖੇਤ੍ਤੇ ਵੁਤ੍ਤਂ ਵਿਰੂਹਤਿ;

ਏਵਂ ਰੂਹਤੁ ਤੇ ਨਾਸਾ, ਪਦੁਮਂ ਦੇਹਿ ਯਾਚਿਤੋ.

੩੩. ਉਭੋਪਿ ਪਲਪਨ੍ਤੇਤੇ [ਵਿਲਪਨ੍ਤੇਤੇ (ਸ੍ਯਾ. ਕ.)], ਅਪਿ ਪਦ੍ਮਾਨਿ ਦਸ੍ਸਤਿ;

ਵਜ੍ਜੁਂ ਵਾ ਤੇ ਨ ਵਾ ਵਜ੍ਜੁਂ, ਨਤ੍ਥਿ ਨਾਸਾਯ ਰੂਹਨਾ;

ਦੇਹਿ ਸਮ੍ਮ ਪਦੁਮਾਨਿ, ਅਹਂ ਯਾਚਾਮਿ ਯਾਚਿਤੋਤਿ.

ਪਦੁਮਜਾਤਕਂ ਪਠਮਂ.

੨੬੨. ਮੁਦੁਪਾਣਿਜਾਤਕਂ (੩-੨-੨)

੩੪. ਪਾਣਿ ਚੇ ਮੁਦੁਕੋ ਚਸ੍ਸ, ਨਾਗੋ ਚਸ੍ਸ ਸੁਕਾਰਿਤੋ;

ਅਨ੍ਧਕਾਰੋ ਚ ਵਸ੍ਸੇਯ੍ਯ, ਅਥ ਨੂਨ ਤਦਾ ਸਿਯਾ.

੩੫. ਅਨਲਾ ਮੁਦੁਸਮ੍ਭਾਸਾ, ਦੁਪ੍ਪੂਰਾ ਤਾ [ਦੁਪ੍ਪੂਰਤ੍ਤਾ (ਕ.)] ਨਦੀਸਮਾ;

ਸੀਦਨ੍ਤਿ ਨਂ ਵਿਦਿਤ੍ਵਾਨ, ਆਰਕਾ ਪਰਿਵਜ੍ਜਯੇ.

੩੬. ਯਂ ਏਤਾ ਉਪਸੇਵਨ੍ਤਿ, ਛਨ੍ਦਸਾ ਵਾ ਧਨੇਨ ਵਾ;

ਜਾਤਵੇਦੋਵ ਸਂ ਠਾਨਂ, ਖਿਪ੍ਪਂ ਅਨੁਦਹਨ੍ਤਿ ਨਨ੍ਤਿ.

ਮੁਦੁਪਾਣਿਜਾਤਕਂ ਦੁਤਿਯਂ.

੨੬੩. ਚੂਲ਼ਪਲੋਭਨਜਾਤਕਂ (੩-੨-੩)

੩੭. ਅਭਿਜ੍ਜਮਾਨੇ ਵਾਰਿਸ੍ਮਿਂ, ਸਯਂ [ਅਯਂ (ਕ.)] ਆਗਮ੍ਮ ਇਦ੍ਧਿਯਾ;

ਮਿਸ੍ਸੀਭਾਵਿਤ੍ਥਿਯਾ ਗਨ੍ਤ੍ਵਾ, ਸਂਸੀਦਸਿ [ਸਂਸੀਦਤਿ (ਕ.)] ਮਹਣ੍ਣਵੇ.

੩੮. ਆਵਟ੍ਟਨੀ ਮਹਾਮਾਯਾ, ਬ੍ਰਹ੍ਮਚਰਿਯਵਿਕੋਪਨਾ;

ਸੀਦਨ੍ਤਿ ਨਂ ਵਿਦਿਤ੍ਵਾਨ, ਆਰਕਾ ਪਰਿਵਜ੍ਜਯੇ.

੩੯. ਯਂ ਏਤਾ ਉਪਸੇਵਨ੍ਤਿ, ਛਨ੍ਦਸਾ ਵਾ ਧਨੇਨ ਵਾ;

ਜਾਤਵੇਦੋਵ ਸਂ ਠਾਨਂ, ਖਿਪ੍ਪਂ ਅਨੁਦਹਨ੍ਤਿ ਨਨ੍ਤਿ.

ਚੂਲ਼ਪਲੋਭਨ [ਚੁਲ੍ਲਪਲੋਭਨ (ਸੀ. ਸ੍ਯਾ. ਪੀ.)] ਜਾਤਕਂ ਤਤਿਯਂ.

੨੬੪. ਮਹਾਪਨਾਦਜਾਤਕਂ (੩-੨-੪)

੪੦. ਪਨਾਦੋ ਨਾਮ ਸੋ ਰਾਜਾ, ਯਸ੍ਸ ਯੂਪੋ ਸੁਵਣ੍ਣਯੋ;

ਤਿਰਿਯਂ ਸੋਲ਼ਸੁਬ੍ਬੇਧੋ [ਸੋਲ਼ਸਪਬ੍ਬੇਧੋ (ਸੀ. ਪੀ.)], ਉਦ੍ਧਮਾਹੁ [ਉਚ੍ਚਮਾਹੁ (ਸੀ. ਸ੍ਯਾ. ਪੀ.)] ਸਹਸ੍ਸਧਾ.

੪੧. ਸਹਸ੍ਸਕਣ੍ਡੋ ਸਤਗੇਣ੍ਡੁ [ਸਤਭੇਦੋ (ਸੀ. ਪੀ.), ਸਤਭੇਣ੍ਡੁ (ਸੀ. ਨਿਸ੍ਸਯ)], ਧਜਾਸੁ ਹਰਿਤਾਮਯੋ;

ਅਨਚ੍ਚੁਂ ਤਤ੍ਥ ਗਨ੍ਧਬ੍ਬਾ, ਛ ਸਹਸ੍ਸਾਨਿ ਸਤ੍ਤਧਾ.

੪੨. ਏਵਮੇਤਂ [ਏਵਮੇਵ (ਕ.)] ਤਦਾ ਆਸਿ, ਯਥਾ ਭਾਸਸਿ ਭਦ੍ਦਜਿ;

ਸਕ੍ਕੋ ਅਹਂ ਤਦਾ ਆਸਿਂ, ਵੇਯ੍ਯਾਵਚ੍ਚਕਰੋ ਤਵਾਤਿ.

ਮਹਾਪਨਾਦਜਾਤਕਂ ਚਤੁਤ੍ਥਂ.

੨੬੫. ਖੁਰਪ੍ਪਜਾਤਕਂ (੩-੨-੫)

੪੩. ਦਿਸ੍ਵਾ ਖੁਰਪ੍ਪੇ ਧਨੁਵੇਗਨੁਨ੍ਨੇ, ਖਗ੍ਗੇ ਗਹੀਤੇ ਤਿਖਿਣੇ ਤੇਲਧੋਤੇ;

ਤਸ੍ਮਿਂ ਭਯਸ੍ਮਿਂ ਮਰਣੇ ਵਿਯੂਲ਼੍ਹੇ, ਕਸ੍ਮਾ ਨੁ ਤੇ ਨਾਹੁ ਛਮ੍ਭਿਤਤ੍ਤਂ.

੪੪. ਦਿਸ੍ਵਾ ਖੁਰਪ੍ਪੇ ਧਨੁਵੇਗਨੁਨ੍ਨੇ, ਖਗ੍ਗੇ ਗਹੀਤੇ ਤਿਖਿਣੇ ਤੇਲਧੋਤੇ;

ਤਸ੍ਮਿਂ ਭਯਸ੍ਮਿਂ ਮਰਣੇ ਵਿਯੂਲ਼੍ਹੇ, ਵੇਦਂ ਅਲਤ੍ਥਂ ਵਿਪੁਲਂ ਉਲ਼ਾਰਂ.

੪੫. ਸੋ ਵੇਦਜਾਤੋ ਅਜ੍ਝਭਵਿਂ ਅਮਿਤ੍ਤੇ, ਪੁਬ੍ਬੇਵ ਮੇ ਜੀਵਿਤਮਾਸਿ ਚਤ੍ਤਂ;

ਨ ਹਿ ਜੀਵਿਤੇ ਆਲਯਂ ਕੁਬ੍ਬਮਾਨੋ, ਸੂਰੋ ਕਯਿਰਾ ਸੂਰਕਿਚ੍ਚਂ ਕਦਾਚੀਤਿ.

ਖੁਰਪ੍ਪਜਾਤਕਂ ਪਞ੍ਚਮਂ.

੨੬੬. ਵਾਤਗ੍ਗਸਿਨ੍ਧਵਜਾਤਕਂ (੩-੨-੬)

੪੬. ਯੇਨਾਸਿ ਕਿਸਿਯਾ ਪਣ੍ਡੁ, ਯੇਨ ਭਤ੍ਤਂ ਨ ਰੁਚ੍ਚਤਿ;

ਅਯਂ ਸੋ ਆਗਤੋ ਭਤ੍ਤਾ [ਤਾਤੋ (ਸੀ. ਸ੍ਯਾ. ਪੀ.)], ਕਸ੍ਮਾ ਦਾਨਿ ਪਲਾਯਸਿ.

੪੭. ਸਚੇ [ਨ ਖੋ (ਸ੍ਯਾ. ਕ.)] ਪਨਾਦਿਕੇਨੇਵ, ਸਨ੍ਥਵੋ ਨਾਮ ਜਾਯਤਿ;

ਯਸੋ ਹਾਯਤਿ ਇਤ੍ਥੀਨਂ, ਤਸ੍ਮਾ ਤਾਤ ਪਲਾਯਹਂ [ਪਲਾਯਿਹਂ (ਸ੍ਯਾ.), ਪਲਾਯਿਤਂ (ਕ.)].

੪੮. ਯਸ੍ਸਸ੍ਸਿਨਂ ਕੁਲੇ ਜਾਤਂ, ਆਗਤਂ ਯਾ ਨ ਇਚ੍ਛਤਿ;

ਸੋਚਤਿ ਚਿਰਰਤ੍ਤਾਯ, ਵਾਤਗ੍ਗਮਿਵ ਭਦ੍ਦਲੀਤਿ [ਕੁਨ੍ਦਲੀਤਿ (ਸੀ. ਪੀ.), ਗਦ੍ਰਭੀਤਿ (ਸ੍ਯਾ.)].

ਵਾਤਗ੍ਗਸਿਨ੍ਧਵਜਾਤਕਂ ਛਟ੍ਠਂ.

੨੬੭. ਕਕ੍ਕਟਕਜਾਤਕਂ (੩-੨-੭)

੪੯. ਸਿਙ੍ਗੀਮਿਗੋ ਆਯਤਚਕ੍ਖੁਨੇਤ੍ਤੋ, ਅਟ੍ਠਿਤ੍ਤਚੋ ਵਾਰਿਸਯੋ ਅਲੋਮੋ;

ਤੇਨਾਭਿਭੂਤੋ ਕਪਣਂ ਰੁਦਾਮਿ, ਮਾ ਹੇਵ ਮਂ ਪਾਣਸਮਂ ਜਹੇਯ੍ਯ [ਜਹੇਯ੍ਯਾ (ਪੀ.) ਜਹਾ’ਯ੍ਯੇ (?)].

੫੦. ਅਯ੍ਯ ਨ ਤਂ ਜਹਿਸ੍ਸਾਮਿ, ਕੁਞ੍ਜਰਂ ਸਟ੍ਠਿਹਾਯਨਂ [ਕੁਞ੍ਜਰ ਸਟ੍ਠਿਹਾਯਨ (ਸੀ. ਪੀ.)];

ਪਥਬ੍ਯਾ ਚਾਤੁਰਨ੍ਤਾਯ, ਸੁਪ੍ਪਿਯੋ ਹੋਸਿ ਮੇ ਤੁਵਂ.

੫੧. ਯੇ ਕੁਲ਼ੀਰਾ ਸਮੁਦ੍ਦਸ੍ਮਿਂ, ਗਙ੍ਗਾਯ ਯਮੁਨਾਯ [ਨਮ੍ਮਦਾਯ (ਸੀ. ਪੀ.)] ਚ;

ਤੇਸਂ ਤ੍ਵਂ ਵਾਰਿਜੋ ਸੇਟ੍ਠੋ, ਮੁਞ੍ਚ ਰੋਦਨ੍ਤਿਯਾ ਪਤਿਨ੍ਤਿ.

ਕਕ੍ਕਟਕ [ਕੁਲ਼ੀਰ (ਕ.)] ਜਾਤਕਂ ਸਤ੍ਤਮਂ.

੨੬੮. ਆਰਾਮਦੂਸਕਜਾਤਕਂ (੩-੨-੮)

੫੨. ਯੋ ਵੇ ਸਬ੍ਬਸਮੇਤਾਨਂ, ਅਹੁਵਾ ਸੇਟ੍ਠਸਮ੍ਮਤੋ;

ਤਸ੍ਸਾਯਂ ਏਦਿਸੀ ਪਞ੍ਞਾ, ਕਿਮੇਵ ਇਤਰਾ ਪਜਾ.

੫੩. ਏਵਮੇਵ ਤੁਵਂ ਬ੍ਰਹ੍ਮੇ, ਅਨਞ੍ਞਾਯ ਵਿਨਿਨ੍ਦਸਿ;

ਕਥਂ ਮੂਲਂ ਅਦਿਸ੍ਵਾਨ [ਕਥਂਹਿ ਮੂਲਂ ਅਦਿਤ੍ਵਾ (ਸ੍ਯਾ. ਪੀ.)], ਰੁਕ੍ਖਂ ਜਞ੍ਞਾ ਪਤਿਟ੍ਠਿਤਂ.

੫੪. ਨਾਹਂ ਤੁਮ੍ਹੇ ਵਿਨਿਨ੍ਦਾਮਿ, ਯੇ ਚਞ੍ਞੇ ਵਾਨਰਾ ਵਨੇ;

ਵਿਸ੍ਸਸੇਨੋਵ ਗਾਰਯ੍ਹੋ, ਯਸ੍ਸਤ੍ਥਾ ਰੁਕ੍ਖਰੋਪਕਾਤਿ.

ਆਰਾਮਦੂਸਕਜਾਤਕਂ ਅਟ੍ਠਮਂ.

੨੬੯. ਸੁਜਾਤਜਾਤਕਂ (੩-੨-੯)

੫੫. ਨ ਹਿ ਵਣ੍ਣੇਨ ਸਮ੍ਪਨ੍ਨਾ, ਮਞ੍ਜੁਕਾ ਪਿਯਦਸ੍ਸਨਾ;

ਖਰਵਾਚਾ ਪਿਯਾ ਹੋਤਿ, ਅਸ੍ਮਿਂ ਲੋਕੇ ਪਰਮ੍ਹਿ ਚ.

੫੬. ਨਨੁ ਪਸ੍ਸਸਿਮਂ ਕਾਲ਼ਿਂ, ਦੁਬ੍ਬਣ੍ਣਂ ਤਿਲਕਾਹਤਂ;

ਕੋਕਿਲਂ ਸਣ੍ਹਵਾਚੇਨ, ਬਹੂਨਂ ਪਾਣਿਨਂ ਪਿਯਂ.

੫੭. ਤਸ੍ਮਾ ਸਖਿਲਵਾਚਸ੍ਸ, ਮਨ੍ਤਭਾਣੀ ਅਨੁਦ੍ਧਤੋ;

ਅਤ੍ਥਂ ਧਮ੍ਮਞ੍ਚ ਦੀਪੇਤਿ, ਮਧੁਰਂ ਤਸ੍ਸ ਭਾਸਿਤਨ੍ਤਿ.

ਸੁਜਾਤਜਾਤਕਂ ਨਵਮਂ.

੨੭੦. ਉਲੂਕਜਾਤਕਂ (੩-੨-੧੦)

੫੮. ਸਬ੍ਬੇਹਿ ਕਿਰ ਞਾਤੀਹਿ, ਕੋਸਿਯੋ ਇਸ੍ਸਰੋ ਕਤੋ;

ਸਚੇ ਞਾਤੀਹਿ ਅਨੁਞ੍ਞਾਤੋ [ਞਾਤੀਹਨੁਞ੍ਞਾਤੋ (ਸੀ. ਪੀ.)], ਭਣੇਯ੍ਯਾਹਂ ਏਕਵਾਚਿਕਂ.

੫੯. ਭਣ ਸਮ੍ਮ ਅਨੁਞ੍ਞਾਤੋ, ਅਤ੍ਥਂ ਧਮ੍ਮਞ੍ਚ ਕੇਵਲਂ;

ਸਨ੍ਤਿ ਹਿ ਦਹਰਾ ਪਕ੍ਖੀ, ਪਞ੍ਞਵਨ੍ਤੋ ਜੁਤਿਨ੍ਧਰਾ.

੬੦. ਨ ਮੇ ਰੁਚ੍ਚਤਿ ਭਦ੍ਦਂ ਵੋ [ਭਦਨ੍ਤੇ (ਕ.)], ਉਲੂਕਸ੍ਸਾਭਿਸੇਚਨਂ;

ਅਕ੍ਕੁਦ੍ਧਸ੍ਸ ਮੁਖਂ ਪਸ੍ਸ, ਕਥਂ ਕੁਦ੍ਧੋ ਕਰਿਸ੍ਸਤੀਤਿ.

ਉਲੂਕਜਾਤਕਂ ਦਸਮਂ.

ਪਦੁਮਵਗ੍ਗੋ ਦੁਤਿਯੋ.

ਤਸ੍ਸੁਦ੍ਦਾਨਂ –

ਪਦੁਮੁਤ੍ਤਮ ਨਾਗਸਿਰਿਵ੍ਹਯਨੋ, ਸ-ਮਹਣ੍ਣਵ ਯੂਪ ਖੁਰਪ੍ਪਵਰੋ;

ਅਥ ਭਦ੍ਦਲੀ ਕੁਞ੍ਜਰ ਰੁਕ੍ਖ ਪੁਨ, ਖਰਵਾਚ ਉਲੂਕਵਰੇਨ ਦਸਾਤਿ.