੫੪੬. ਵਿਧੁਰਜਾਤਕਂ (੯)

ਦੋਹਲ਼ਕਣ੍ਡਂ

੧੩੪੬. ‘‘ਪਣ੍ਡੁ ਕਿਸਿਯਾਸਿ ਦੁਬ੍ਬਲਾ, ਵਣ੍ਣਰੂਪਂ [ਵਣ੍ਣਰੂਪੇ (ਕ.)] ਨਤਵੇਦਿਸਂ ਪੁਰੇ;

ਵਿਮਲੇ ਅਕ੍ਖਾਹਿ ਪੁਚ੍ਛਿਤਾ, ਕੀਦਿਸੀ ਤੁਯ੍ਹਂ ਸਰੀਰਵੇਦਨਾ’’.

੧੩੪੭. ‘‘ਧਮ੍ਮੋ ਮਨੁਜੇਸੁ ਮਾਤੀਨਂ [ਮਾਤਿਨਂ (ਸੀ. ਪੀ.)], ਦੋਹਲ਼ੋ ਨਾਮ ਜਨਿਨ੍ਦ ਵੁਚ੍ਚਤਿ;

ਧਮ੍ਮਾਹਤਂ ਨਾਗਕੁਞ੍ਜਰ, ਵਿਧੁਰਸ੍ਸ ਹਦਯਾਭਿਪਤ੍ਥਯੇ’’.

੧੩੪੮. ‘‘ਚਨ੍ਦਂ ਖੋ ਤ੍ਵਂ ਦੋਹਲ਼ਾਯਸਿ, ਸੂਰਿਯਂ ਵਾ ਅਥ ਵਾਪਿ ਮਾਲੁਤਂ;

ਦੁਲ੍ਲਭਞ੍ਹਿ [ਦੁਲ੍ਲਭੇ (ਸੀ. ਪੀ.)] ਵਿਧੁਰਸ੍ਸ ਦਸ੍ਸਨਂ [ਦਸ੍ਸਨੇ (ਸੀ. ਪੀ.)], ਕੋ ਵਿਧੁਰਮਿਧ ਮਾਨਯਿਸ੍ਸਤਿ’’.

੧੩੪੯. ‘‘ਕਿਨ੍ਨੁ ਤਾਤ ਤੁਵਂ ਪਜ੍ਝਾਯਸਿ, ਪਦੁਮਂ ਹਤ੍ਥਗਤਂਵ ਤੇ ਮੁਖਂ;

ਕਿਨ੍ਨੁ ਦੁਮ੍ਮਨਰੂਪੋਸਿ ਇਸ੍ਸਰ, ਮਾ ਤ੍ਵਂ ਸੋਚਿ ਅਮਿਤ੍ਤਤਾਪਨ’’.

੧੩੫੦. ‘‘ਮਾਤਾ ਹਿ ਤਵ ਇਰਨ੍ਧਤਿ [ਇਰਨ੍ਦਤਿ (ਸੀ. ਸ੍ਯਾ. ਪੀ.)], ਵਿਧੁਰਸ੍ਸ ਹਦਯਂ ਧਨਿਯਤਿ;

ਦੁਲ੍ਲਭਞ੍ਹਿ ਵਿਧੁਰਸ੍ਸ ਦਸ੍ਸਨਂ, ਕੋ ਵਿਧੁਰਮਿਧ ਮਾਨਯਿਸ੍ਸਤਿ’’.

੧੩੫੧. ‘‘ਤਸ੍ਸ ਭਤ੍ਤੁਪਰਿਯੇਸਨਂ [ਭਤ੍ਤੁਪਰਿਯੇਸਨਂ (ਸੀ. ਪੀ.)] ਚਰ, ਯੋ ਵਿਧੁਰਮਿਧ ਮਾਨਯਿਸ੍ਸਤਿ’’;

‘‘ਪਿਤੁਨੋ ਚ ਸਾ ਸੁਤ੍ਵਾਨ ਵਾਕ੍ਯਂ, ਰਤ੍ਤਿਂ ਨਿਕ੍ਖਮ੍ਮ ਅਵਸ੍ਸੁਤਿਂ ਚਰਿ’’.

੧੩੫੨. ‘‘ਕੇ ਗਨ੍ਧਬ੍ਬੇ ਰਕ੍ਖਸੇ ਚ ਨਾਗੇ, ਕੇ ਕਿਮ੍ਪੁਰਿਸੇ ਚਾਪਿ ਮਾਨੁਸੇ;

ਕੇ ਪਣ੍ਡਿਤੇ ਸਬ੍ਬਕਾਮਦਦੇ [ਸਬ੍ਬਕਾਮਦੇ (ਸੀ. ਪੀ.)], ਦੀਘਰਤ੍ਤਂ ਭਤ੍ਤਾ ਮੇ ਭਵਿਸ੍ਸਤਿ’’.

੧੩੫੩. ‘‘ਅਸ੍ਸਾਸ ਹੇਸ੍ਸਾਮਿ ਤੇ ਪਤਿ, ਭਤ੍ਤਾ ਤੇ ਹੇਸ੍ਸਾਮਿ ਅਨਿਨ੍ਦਲੋਚਨੇ;

ਪਞ੍ਞਾ ਹਿ ਮਮਂ ਤਥਾਵਿਧਾ, ਅਸ੍ਸਾਸ ਹੇਸ੍ਸਸਿ ਭਰਿਯਾ ਮਮ.

੧੩੫੪. ‘‘ਅਵਚਾਸਿ ਪੁਣ੍ਣਕਂ ਇਰਨ੍ਧਤੀ [ਇਰਨ੍ਦਤੀ (ਸੀ. ਪੀ.)], ਪੁਬ੍ਬਪਥਾਨੁਗਤੇਨ ਚੇਤਸਾ;

ਏਹਿ ਗਚ੍ਛਾਮ ਪਿਤੁ ਮਮਨ੍ਤਿਕੇ [ਪਿਤੁ ਮਮ ਸਨ੍ਤਿਕਂ (ਕ.)], ਏਸੋਵ ਤੇ ਏਤਮਤ੍ਥਂ ਪਵਕ੍ਖਤਿ.

੧੩੫੫. ‘‘ਅਲਙ੍ਕਤਾ ਸੁਵਸਨਾ, ਮਾਲਿਨੀ ਚਨ੍ਦਨੁਸ੍ਸਦਾ;

ਯਕ੍ਖਂ ਹਤ੍ਥੇ ਗਹੇਤ੍ਵਾਨ, ਪਿਤੁਸਨ੍ਤਿਕੁਪਾਗਮਿ’’.

੧੩੫੬. ‘‘ਨਾਗਵਰ ਵਚੋ ਸੁਣੋਹਿ ਮੇ, ਪਤਿਰੂਪਂ ਪਟਿਪਜ੍ਜ ਸੁਙ੍ਕਿਯਂ;

ਪਤ੍ਥੇਮਿ ਅਹਂ ਇਰਨ੍ਧਤਿਂ, ਤਾਯ ਸਮਙ੍ਗਿਂ ਕਰੋਹਿ ਮਂ ਤੁਵਂ.

੧੩੫੭. ‘‘ਸਤਂ ਹਤ੍ਥੀ ਸਤਂ ਅਸ੍ਸਾ, ਸਤਂ ਅਸ੍ਸਤਰੀਰਥਾ;

ਸਤਂ ਵਲਭਿਯੋ ਪੁਣ੍ਣਾ, ਨਾਨਾਰਤ੍ਨਸ੍ਸ ਕੇਵਲਾ;

ਤੇ ਨਾਗ ਪਟਿਪਜ੍ਜਸ੍ਸੁ, ਧੀਤਰਂ ਦੇਹਿਰਨ੍ਧਤਿਂ’’.

੧੩੫੮. ‘‘ਯਾਵ ਆਮਨ੍ਤਯੇ ਞਾਤੀ, ਮਿਤ੍ਤੇ ਚ ਸੁਹਦਜ੍ਜਨੇ [ਸੁਹਦਂਜਨਂ (ਸੀ. ਪੀ.)];

ਅਨਾਮਨ੍ਤ ਕਤਂ ਕਮ੍ਮਂ, ਤਂ ਪਚ੍ਛਾ ਅਨੁਤਪ੍ਪਤਿ’’.

੧੩੫੯. ਤਤੋ ਸੋ ਵਰੁਣੋ ਨਾਗੋ, ਪਵਿਸਿਤ੍ਵਾ ਨਿਵੇਸਨਂ;

ਭਰਿਯਂ ਆਮਨ੍ਤਯਿਤ੍ਵਾਨ, ਇਦਂ ਵਚਨਮਬ੍ਰਵਿ.

੧੩੬੦. ‘‘ਅਯਂ ਸੋ ਪੁਣ੍ਣਕੋ ਯਕ੍ਖੋ, ਯਾਚਤੀ ਮਂ ਇਰਨ੍ਧਤਿਂ;

ਬਹੁਨਾ ਵਿਤ੍ਤਲਾਭੇਨ, ਤਸ੍ਸ ਦੇਮ ਪਿਯਂ ਮਮਂ’’.

੧੩੬੧. ‘‘ਨ ਧਨੇਨ ਨ ਵਿਤ੍ਤੇਨ, ਲਬ੍ਭਾ ਅਮ੍ਹਂ ਇਰਨ੍ਧਤੀ;

ਸਚੇ ਚ ਖੋ ਹਦਯਂ ਪਣ੍ਡਿਤਸ੍ਸ, ਧਮ੍ਮੇਨ ਲਦ੍ਧਾ ਇਧ ਮਾਹਰੇਯ੍ਯ;

ਏਤੇਨ ਵਿਤ੍ਤੇਨ ਕੁਮਾਰਿ ਲਬ੍ਭਾ, ਨਾਞ੍ਞਂ ਧਨਂ ਉਤ੍ਤਰਿ ਪਤ੍ਥਯਾਮ’’.

੧੩੬੨. ਤਤੋ ਸੋ ਵਰੁਣੋ ਨਾਗੋ, ਨਿਕ੍ਖਮਿਤ੍ਵਾ ਨਿਵੇਸਨਾ;

ਪੁਣ੍ਣਕਾਮਨ੍ਤਯਿਤ੍ਵਾਨ, ਇਦਂ ਵਚਨਮਬ੍ਰਵਿ.

੧੩੬੩. ‘‘ਨ ਧਨੇਨ ਨ ਵਿਤ੍ਤੇਨ, ਲਬ੍ਭਾ ਅਮ੍ਹਂ ਇਰਨ੍ਧਤੀ;

ਸਚੇ ਤੁਵਂ ਹਦਯਂ ਪਣ੍ਡਿਤਸ੍ਸ, ਧਮ੍ਮੇਨ ਲਦ੍ਧਾ ਇਧ ਮਾਹਰੇਸਿ;

ਏਤੇਨ ਵਿਤ੍ਤੇਨ ਕੁਮਾਰਿ ਲਬ੍ਭਾ, ਨਾਞ੍ਞਂ ਧਨਂ ਉਤ੍ਤਰਿ ਪਤ੍ਥਯਾਮ’’.

੧੩੬੪. ‘‘ਯਂ ਪਣ੍ਡਿਤੋਤ੍ਯੇਕੇ ਵਦਨ੍ਤਿ ਲੋਕੇ, ਤਮੇਵ ਬਾਲੋਤਿ ਪੁਨਾਹੁ ਅਞ੍ਞੇ;

ਅਕ੍ਖਾਹਿ ਮੇ ਵਿਪ੍ਪਵਦਨ੍ਤਿ ਏਤ੍ਥ, ਕਂ ਪਣ੍ਡਿਤਂ ਨਾਗ ਤੁਵਂ ਵਦੇਸਿ’’.

੧੩੬੫. ‘‘ਕੋਰਬ੍ਯਰਾਜਸ੍ਸ ਧਨਞ੍ਚਯਸ੍ਸ [ਧਨਞ੍ਜਯਸ੍ਸ (ਸੀ. ਸ੍ਯਾ. ਪੀ.)], ਯਦਿ ਤੇ ਸੁਤੋ ਵਿਧੁਰੋ ਨਾਮ ਕਤ੍ਤਾ;

ਆਨੇਹਿ ਤਂ ਪਣ੍ਡਿਤਂ ਧਮ੍ਮਲਦ੍ਧਾ, ਇਰਨ੍ਧਤੀ ਪਦਚਰਾ [ਪਦ੍ਧਚਰਾ (ਸੀ. ਪੀ.), ਪਟ੍ਠਚਰਾ (ਸ੍ਯਾ. ਕ.)] ਤੇ ਹੋਤੁ.

੧੩੬੬. ‘‘ਇਦਞ੍ਚ ਸੁਤ੍ਵਾ ਵਰੁਣਸ੍ਸ ਵਾਕ੍ਯਂ, ਉਟ੍ਠਾਯ ਯਕ੍ਖੋ ਪਰਮਪ੍ਪਤੀਤੋ;

ਤਤ੍ਥੇਵ ਸਨ੍ਤੋ ਪੁਰਿਸਂ ਅਸਂਸਿ, ਆਨੇਹਿ ਆਜਞ੍ਞਮਿਧੇਵ ਯੁਤ੍ਤਂ.

੧੩੬੭. ‘‘ਜਾਤਰੂਪਮਯਾ ਕਣ੍ਣਾ, ਕਾਚਮ੍ਹਿਚਮਯਾ [ਕਾਚਮ੍ਹਮਯਾ (ਸੀ.), ਕਾਚਮ੍ਭਮਯਾ (ਪੀ.)] ਖੁਰਾ;

ਜਮ੍ਬੋਨਦਸ੍ਸ ਪਾਕਸ੍ਸ, ਸੁਵਣ੍ਣਸ੍ਸ ਉਰਚ੍ਛਦੋ’’.

੧੩੬੮. ‘‘ਦੇਵਵਾਹਵਹਂ ਯਾਨਂ, ਅਸ੍ਸਮਾਰੁਯ੍ਹ ਪੁਣ੍ਣਕੋ;

ਅਲਙ੍ਕਤੋ ਕਪ੍ਪਿਤਕੇਸਮਸ੍ਸੁ, ਪਕ੍ਕਾਮਿ ਵੇਹਾਯਸਮਨ੍ਤਲਿਕ੍ਖੇ [ਅਨ੍ਤਲਿਕ੍ਖਂ (ਕ.)].

੧੩੬੯. ‘‘ਸੋ ਪੁਣ੍ਣਕੋ ਕਾਮਰਾਗੇਨ [ਕਾਮਵੇਗੇਨ (ਸੀ. ਪੀ.)] ਗਿਦ੍ਧੋ, ਇਰਨ੍ਧਤਿਂ ਨਾਗਕਞ੍ਞਂ ਜਿਗੀਸਂ [ਜਿਗਿਂਸਂ (ਸੀ. ਸ੍ਯਾ. ਪੀ.)];

ਗਨ੍ਤ੍ਵਾਨ ਤਂ ਭੂਤਪਤਿਂ ਯਸਸ੍ਸਿਂ, ਇਚ੍ਚਬ੍ਰਵੀ ਵੇਸ੍ਸਵਣਂ ਕੁਵੇਰਂ.

੧੩੭੦. ‘‘ਭੋਗਵਤੀ ਨਾਮ ਮਨ੍ਦਿਰੇ, ਵਾਸਾ ਹਿਰਞ੍ਞਵਤੀਤਿ ਵੁਚ੍ਚਤਿ;

ਨਗਰੇ ਨਿਮ੍ਮਿਤੇ ਕਞ੍ਚਨਮਯੇ, ਮਣ੍ਡਲਸ੍ਸ ਉਰਗਸ੍ਸ ਨਿਟ੍ਠਿਤਂ.

੧੩੭੧. ‘‘ਅਟ੍ਟਾਲਕਾ ਓਟ੍ਠਗੀਵਿਯੋ, ਲੋਹਿਤਙ੍ਕਸ੍ਸ ਮਸਾਰਗਲ੍ਲਿਨੋ;

ਪਾਸਾਦੇਤ੍ਥ ਸਿਲਾਮਯਾ, ਸੋਵਣ੍ਣਰਤਨੇਹਿ ਛਾਦਿਤਾ.

੧੩੭੨. ‘‘ਅਮ੍ਬਾ ਤਿਲਕਾ ਚ ਜਮ੍ਬੁਯੋ, ਸਤ੍ਤਪਣ੍ਣਾ ਮੁਚਲਿਨ੍ਦਕੇਤਕਾ;

ਪਿਯਙ੍ਗੁ [ਪਿਯਕਾ (ਸੀ. ਪੀ.), ਪਿਯਙ੍ਗੁਕਾ (ਸ੍ਯਾ.)] ਉਦ੍ਦਾਲਕਾ ਸਹਾ, ਉਪਰਿਭਦ੍ਦਕਾ ਸਿਨ੍ਦੁਵਾਰਕਾ [ਭਿਨ੍ਦੁਵਾਰਿਤਾ (ਸ੍ਯਾ. ਪੀ.), ਭਿਨ੍ਧਵਾਰਿਤਾ (ਕ.)].

੧੩੭੩. ‘‘ਚਮ੍ਪੇਯ੍ਯਕਾ ਨਾਗਮਲ੍ਲਿਕਾ, ਭਗਿਨੀਮਾਲਾ ਅਥ ਮੇਤ੍ਥ ਕੋਲਿਯਾ;

ਏਤੇ ਦੁਮਾ ਪਰਿਣਾਮਿਤਾ, ਸੋਭਯਨ੍ਤਿ ਉਰਗਸ੍ਸ ਮਨ੍ਦਿਰਂ [ਮਨ੍ਦਿਰੇ (ਸ੍ਯਾ. ਕ.)].

੧੩੭੪. ‘‘ਖਜ੍ਜੁਰੇਤ੍ਥ ਸਿਲਾਮਯਾ, ਸੋਵਣ੍ਣਧੁਵਪੁਪ੍ਫਿਤਾ ਬਹੂ;

ਯਤ੍ਥ ਵਸਤੋ ਪਪਾਤਿਕੋ, ਨਾਗਰਾਜਾ ਵਰੁਣੋ ਮਹਿਦ੍ਧਿਕੋ.

੧੩੭੫. ‘‘ਤਸ੍ਸ ਕੋਮਾਰਿਕਾ ਭਰਿਯਾ, ਵਿਮਲਾ ਕਞ੍ਚਨਵੇਲ੍ਲਿਵਿਗ੍ਗਹਾ;

ਕਾਲਾ ਤਰੁਣਾਵ ਉਗ੍ਗਤਾ, ਪੁਚਿਮਨ੍ਦਤ੍ਥਨੀ ਚਾਰੁਦਸ੍ਸਨਾ.

੧੩੭੬. ‘‘ਲਾਖਾਰਸਰਤ੍ਤਸੁਚ੍ਛਵੀ, ਕਣਿਕਾਰਾਵ ਨਿਵਾਤਪੁਪ੍ਫਿਤਾ [ਕਣਿਕਾਰੋਵ ਨਿਵਾਤਪੁਪ੍ਫਿਤੋ (ਸੀ. ਪੀ.)];

ਤਿਦਿਵੋਕਚਰਾਵ ਅਚ੍ਛਰਾ, ਵਿਜ੍ਜੁਵਬ੍ਭਘਨਾ ਵਿਨਿਸ੍ਸਟਾ.

੧੩੭੭. ‘‘ਸਾ ਦੋਹਲ਼ਿਨੀ ਸੁਵਿਮ੍ਹਿਤਾ, ਵਿਧੁਰਸ੍ਸ ਹਦਯਂ ਧਨਿਯਤਿ;

ਤਂ ਤੇਸਂ ਦੇਮਿ ਇਸ੍ਸਰ, ਤੇਨ ਤੇ ਦੇਨ੍ਤਿ ਇਰਨ੍ਧਤਿਂ ਮਮਂ’’.

੧੩੭੮. ‘‘ਸੋ ਪੁਣ੍ਣਕੋ ਭੂਤਪਤਿਂ ਯਸਸ੍ਸਿਂ, ਆਮਨ੍ਤਯ ਵੇਸ੍ਸਵਣਂ ਕੁਵੇਰਂ;

ਤਤ੍ਥੇਵ ਸਨ੍ਤੋ [ਸਨ੍ਤਂ (ਪੀ.)] ਪੁਰਿਸਂ ਅਸਂਸਿ, ਆਨੇਹਿ ਆਜਞ੍ਞਮਿਧੇਵ ਯੁਤ੍ਤਂ.

੧੩੭੯. ‘‘ਜਾਤਰੂਪਮਯਾ ਕਣ੍ਣਾ, ਕਾਚਮ੍ਹਿਚਮਯਾ ਖੁਰਾ;

ਜਮ੍ਬੋਨਦਸ੍ਸ ਪਾਕਸ੍ਸ, ਸੁਵਣ੍ਣਸ੍ਸ ਉਰਚ੍ਛਦੋ.

੧੩੮੦. ‘‘ਦੇਵਵਾਹਵਹਂ ਯਾਨਂ, ਅਸ੍ਸਮਾਰੁਯ੍ਹ ਪੁਣ੍ਣਕੋ;

ਅਲਙ੍ਕਤੋ ਕਪ੍ਪਿਤਕੇਸਮਸ੍ਸੁ, ਪਕ੍ਕਾਮਿ ਵੇਹਾਯਸਮਨ੍ਤਲਿਕ੍ਖੇ’’.

੧੩੮੧. ‘‘ਸੋ ਅਗ੍ਗਮਾ ਰਾਜਗਹਂ ਸੁਰਮ੍ਮਂ, ਅਙ੍ਗਸ੍ਸ ਰਞ੍ਞੋ ਨਗਰਂ ਦੁਰਾਯੁਤਂ [ਦੁਰਾਸਦਂ (ਸ੍ਯਾ.)];

ਪਹੂਤਭਕ੍ਖਂ ਬਹੁਅਨ੍ਨਪਾਨਂ, ਮਸਕ੍ਕਸਾਰਂ ਵਿਯ ਵਾਸਵਸ੍ਸ.

੧੩੮੨. ‘‘ਮਯੂਰਕੋਞ੍ਚਾਗਣਸਮ੍ਪਘੁਟ੍ਠਂ, ਦਿਜਾਭਿਘੁਟ੍ਠਂ ਦਿਜਸਙ੍ਘਸੇਵਿਤਂ;

ਨਾਨਾਸਕੁਨ੍ਤਾਭਿਰੁਦਂ ਸੁਵਙ੍ਗਣਂ [ਸੁਭਙ੍ਗਣਂ (ਸੀ. ਪੀ.)], ਪੁਪ੍ਫਾਭਿਕਿਣ੍ਣਂ ਹਿਮਵਂਵ ਪਬ੍ਬਤਂ.

੧੩੮੩. ‘‘ਸੋ ਪੁਣ੍ਣਕੋ ਵੇਪੁਲਮਾਭਿਰੂਹਿ [ਵੇਪੁਲ੍ਲਮਾਭਿਰੁਚ੍ਛਿ (ਸੀ. ਪੀ.)], ਸਿਲੁਚ੍ਚਯਂ ਕਿਮ੍ਪੁਰਿਸਾਨੁਚਿਣ੍ਣਂ;

ਅਨ੍ਵੇਸਮਾਨੋ ਮਣਿਰਤਨਂ ਉਲ਼ਾਰਂ, ਤਮਦ੍ਦਸਾ ਪਬ੍ਬਤਕੂਟਮਜ੍ਝੇ.

੧੩੮੪. ‘‘ਦਿਸ੍ਵਾ ਮਣਿਂ ਪਭਸ੍ਸਰਂ ਜਾਤਿਮਨ੍ਤਂ [ਜਾਤਿਵਨ੍ਤਂ (ਸੀ. ਸ੍ਯਾ.)], ਮਨੋਹਰਂ [ਧਨਾਹਰਂ (ਸੀ. ਪੀ. ਕ.)] ਮਣਿਰਤਨਂ ਉਲ਼ਾਰਂ;

ਦਦ੍ਦਲ੍ਲਮਾਨਂ ਯਸਸਾ ਯਸਸ੍ਸਿਨਂ, ਓਭਾਸਤੀ ਵਿਜ੍ਜੁਰਿਵਨ੍ਤਲਿਕ੍ਖੇ.

੧੩੮੫. ‘‘ਤਮਗ੍ਗਹੀ ਵੇਲ਼ੁਰਿਯਂ ਮਹਗ੍ਘਂ, ਮਨੋਹਰਂ ਨਾਮ ਮਹਾਨੁਭਾਵਂ;

ਆਜਞ੍ਞਮਾਰੁਯ੍ਹ ਮਨੋਮਵਣ੍ਣੋ, ਪਕ੍ਕਾਮਿ ਵੇਹਾਯਸਮਨ੍ਤਲਿਕ੍ਖੇ.

੧੩੮੬. ‘‘ਸੋ ਅਗ੍ਗਮਾ [ਅਗਮਾ (ਸ੍ਯਾ. ਪੀ. ਕ.)] ਨਗਰਮਿਨ੍ਦਪਤ੍ਥਂ, ਓਰੁਯ੍ਹੁਪਾਗਚ੍ਛਿ ਸਭਂ ਕੁਰੂਨਂ;

ਸਮਾਗਤੇ ਏਕਸਤਂ ਸਮਗ੍ਗੇ, ਅਵ੍ਹੇਤ੍ਥ ਯਕ੍ਖੋ ਅਵਿਕਮ੍ਪਮਾਨੋ.

੧੩੮੭. ‘‘ਕੋ ਨੀਧ ਰਞ੍ਞਂ ਵਰਮਾਭਿਜੇਤਿ, ਕਮਾਭਿਜੇਯ੍ਯਾਮ ਵਰਦ੍ਧਨੇਨ [ਵਰਂਧਨੇਨ (ਸੀ. ਪੀ.)];

ਕਮਨੁਤ੍ਤਰਂ ਰਤਨਵਰਂ ਜਿਨਾਮ, ਕੋ ਵਾਪਿ ਨੋ ਜੇਤਿ ਵਰਦ੍ਧਨੇਨ’’.

੧੩੮੮. ‘‘ਕੁਹਿਂ ਨੁ ਰਟ੍ਠੇ ਤਵ ਜਾਤਿਭੂਮਿ, ਨ ਕੋਰਬ੍ਯਸ੍ਸੇਵ ਵਚੋ ਤਵੇਦਂ;

ਅਭੀਤੋਸਿ [ਅਭਿਭੋਸਿ (ਸੀ. ਪੀ.)] ਨੋ ਵਣ੍ਣਨਿਭਾਯ ਸਬ੍ਬੇ, ਅਕ੍ਖਾਹਿ ਮੇ ਨਾਮਞ੍ਚ ਬਨ੍ਧਵੇ ਚ’’.

੧੩੮੯. ‘‘ਕਚ੍ਚਾਯਨੋ ਮਾਣਵਕੋਸ੍ਮਿ ਰਾਜ, ਅਨੂਨਨਾਮੋ ਇਤਿ ਮਵ੍ਹਯਨ੍ਤਿ;

ਅਙ੍ਗੇਸੁ ਮੇ ਞਾਤਯੋ ਬਨ੍ਧਵਾ ਚ, ਅਕ੍ਖੇਨ ਦੇਵਸ੍ਮਿ ਇਧਾਨੁਪਤ੍ਤੋ’’.

੧੩੯੦. ‘‘ਕਿਂ ਮਾਣਵਸ੍ਸ ਰਤਨਾਨਿ ਅਤ੍ਥਿ, ਯੇ ਤਂ ਜਿਨਨ੍ਤੋ ਹਰੇ ਅਕ੍ਖਧੁਤ੍ਤੋ;

ਬਹੂਨਿ ਰਞ੍ਞੋ ਰਤਨਾਨਿ ਅਤ੍ਥਿ, ਤੇ ਤ੍ਵਂ ਦਲਿਦ੍ਦੋ ਕਥਮਵ੍ਹਯੇਸਿ’’.

੧੩੯੧. ‘‘ਮਨੋਹਰੋ ਨਾਮ ਮਣੀ ਮਮਾਯਂ, ਮਨੋਹਰਂ ਮਣਿਰਤਨਂ ਉਲ਼ਾਰਂ;

ਇਮਞ੍ਚ ਆਜਞ੍ਞਮਮਿਤ੍ਤਤਾਪਨਂ, ਏਤਂ ਮੇ ਜਿਨਿਤ੍ਵਾ ਹਰੇ ਅਕ੍ਖਧੁਤ੍ਤੋ’’.

੧੩੯੨. ‘‘ਏਕੋ ਮਣੀ ਮਾਣਵ ਕਿਂ ਕਰਿਸ੍ਸਤਿ, ਆਜਾਨਿਯੇਕੋ ਪਨ ਕਿਂ ਕਰਿਸ੍ਸਤਿ;

ਬਹੂਨਿ ਰਞ੍ਞੋ ਮਣਿਰਤਨਾਨਿ ਅਤ੍ਥਿ, ਆਜਾਨਿਯਾ ਵਾਤਜਵਾ ਅਨਪ੍ਪਕਾ’’.

ਦੋਹਲ਼ਕਣ੍ਡਂ ਨਾਮ.

ਮਣਿਕਣ੍ਡਂ

੧੩੯੩. ‘‘ਇਦਞ੍ਚ ਮੇ ਮਣਿਰਤਨਂ, ਪਸ੍ਸ ਤ੍ਵਂ ਦ੍ਵਿਪਦੁਤ੍ਤਮ;

ਇਤ੍ਥੀਨਂ ਵਿਗ੍ਗਹਾ ਚੇਤ੍ਥ, ਪੁਰਿਸਾਨਞ੍ਚ ਵਿਗ੍ਗਹਾ.

੧੩੯੪. ‘‘ਮਿਗਾਨਂ ਵਿਗ੍ਗਹਾ ਚੇਤ੍ਥ, ਸਕੁਣਾਨਞ੍ਚ ਵਿਗ੍ਗਹਾ;

ਨਾਗਰਾਜਾ ਸੁਪਣ੍ਣਾ ਚ [ਨਾਗਰਾਜੇ ਸੁਪਣ੍ਣੇ ਚ (ਸੀ. ਸ੍ਯਾ. ਪੀ.)], ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੩੯੫. ‘‘ਹਤ੍ਥਾਨੀਕਂ ਰਥਾਨੀਕਂ, ਅਸ੍ਸੇ ਪਤ੍ਤੀ ਚ ਵਮ੍ਮਿਨੇ [ਧਜਾਨਿ ਚ (ਪੀ.)];

ਚਤੁਰਙ੍ਗਿਨਿਮਂ ਸੇਨਂ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੩੯੬. ‘‘ਹਤ੍ਥਾਰੋਹੇ ਅਨੀਕਟ੍ਠੇ, ਰਥਿਕੇ ਪਤ੍ਤਿਕਾਰਕੇ;

ਬਲਗ੍ਗਾਨਿ ਵਿਯੂਲ਼੍ਹਾਨਿ [ਵਿਯੂਹਾਨਿ (ਸ੍ਯਾ. ਕ.)], ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੩੯੭. ‘‘ਪੁਰਂ ਉਦ੍ਧਾਪਸਮ੍ਪਨ੍ਨਂ [ਉਦ੍ਦਾਪਸਮ੍ਪਨ੍ਨਂ (ਸੀ. ਪੀ.), ਅਟ੍ਟਾਲਸਮ੍ਪਨ੍ਨਂ (ਸ੍ਯਾ.)], ਬਹੁਪਾਕਾਰਤੋਰਣਂ;

ਸਿਙ੍ਘਾਟਕੇਸੁ ਭੂਮਿਯੋ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੩੯੮. ‘‘ਏਸਿਕਾ ਪਰਿਖਾਯੋ ਚ, ਪਲਿਖਂ ਅਗ੍ਗਲ਼ਾਨਿ ਚ;

ਅਟ੍ਟਾਲਕੇ ਚ ਦ੍ਵਾਰੇ ਚ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੩੯੯. ‘‘ਪਸ੍ਸ ਤੋਰਣਮਗ੍ਗੇਸੁ, ਨਾਨਾਦਿਜਾ ਗਣਾ ਬਹੂ;

ਹਂਸਾ ਕੋਞ੍ਚਾ ਮਯੂਰਾ ਚ, ਚਕ੍ਕਵਾਕਾ ਚ ਕੁਕ੍ਕੁਹਾ.

੧੪੦੦. ‘‘ਕੁਣਾਲਕਾ ਬਹੂ ਚਿਤ੍ਰਾ, ਸਿਖਣ੍ਡੀ ਜੀਵਜੀਵਕਾ;

ਨਾਨਾਦਿਜਗਣਾਕਿਣ੍ਣਂ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੦੧. ‘‘ਪਸ੍ਸ ਨਗਰਂ ਸੁਪਾਕਾਰਂ, ਅਬ੍ਭੁਤਂ ਲੋਮਹਂਸਨਂ;

ਸਮੁਸ੍ਸਿਤਧਜਂ ਰਮ੍ਮਂ, ਸੋਣ੍ਣਵਾਲੁਕਸਨ੍ਥਤਂ.

੧੪੦੨. ‘‘ਪਸ੍ਸੇਤ੍ਥ [ਪਸ੍ਸ ਤ੍ਵਂ (ਸੀ. ਪੀ.)] ਪਣ੍ਣਸਾਲਾਯੋ, ਵਿਭਤ੍ਤਾ ਭਾਗਸੋ ਮਿਤਾ;

ਨਿਵੇਸਨੇ ਨਿਵੇਸੇ ਚ, ਸਨ੍ਧਿਬ੍ਯੂਹੇ ਪਥਦ੍ਧਿਯੋ.

੧੪੦੩. ‘‘ਪਾਨਾਗਾਰੇ ਚ ਸੋਣ੍ਡੇ ਚ, ਸੂਨਾ [ਸੂਣਾ (ਸੀ. ਪੀ.), ਸੁਦ੍ਦਾ (ਸ੍ਯਾ. ਕ.)] ਓਦਨਿਯਾ ਘਰਾ;

ਵੇਸੀ ਚ ਗਣਿਕਾਯੋ ਚ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੦੪. ‘‘ਮਾਲਾਕਾਰੇ ਚ ਰਜਕੇ, ਗਨ੍ਧਿਕੇ ਅਥ ਦੁਸ੍ਸਿਕੇ;

ਸੁਵਣ੍ਣਕਾਰੇ ਮਣਿਕਾਰੇ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੦੫. ‘‘ਆਲ਼ਾਰਿਕੇ ਚ ਸੂਦੇ ਚ, ਨਟਨਾਟਕਗਾਯਿਨੋ;

ਪਾਣਿਸ੍ਸਰੇ ਕੁਮ੍ਭਥੂਨਿਕੇ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੦੬. ‘‘ਪਸ੍ਸ ਭੇਰੀ ਮੁਦਿਙ੍ਗਾ ਚ, ਸਙ੍ਖਾ ਪਣਵਦਿਨ੍ਦਿਮਾ;

ਸਬ੍ਬਞ੍ਚ ਤਾਲ਼ਾਵਚਰਂ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੦੭. ‘‘ਸਮ੍ਮਤਾਲਞ੍ਚ ਵੀਣਞ੍ਚ, ਨਚ੍ਚਗੀਤਂ ਸੁਵਾਦਿਤਂ;

ਤੂਰਿਯਤਾਲ਼ਿਤਸਙ੍ਘੁਟ੍ਠਂ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੦੮. ‘‘ਲਙ੍ਘਿਕਾ ਮੁਟ੍ਠਿਕਾ ਚੇਤ੍ਥ, ਮਾਯਾਕਾਰਾ ਚ ਸੋਭਿਯਾ;

ਵੇਤਾਲਿਕੇ [ਵੇਤ੍ਤਲਿਕੇ (ਕ.)] ਚ ਜਲ੍ਲੇ ਚ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੦੯. ‘‘ਸਮਜ੍ਜਾ ਚੇਤ੍ਥ ਵਤ੍ਤਨ੍ਤਿ, ਆਕਿਣ੍ਣਾ ਨਰਨਾਰਿਭਿ;

ਮਞ੍ਚਾਤਿਮਞ੍ਚੇ ਭੂਮਿਯੋ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੧੦. ‘‘ਪਸ੍ਸ ਮਲ੍ਲੇ ਸਮਜ੍ਜਸ੍ਮਿਂ, ਫੋਟੇਨ੍ਤੇ [ਪਾਠੇਨ੍ਤੇ (ਸੀ. ਸ੍ਯਾ. ਪੀ.)] ਦਿਗੁਣਂ ਭੁਜਂ;

ਨਿਹਤੇ ਨਿਹਤਮਾਨੇ ਚ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੧੧. ‘‘ਪਸ੍ਸ ਪਬ੍ਬਤਪਾਦੇਸੁ, ਨਾਨਾਮਿਗਗਣਾ ਬਹੂ;

ਸੀਹਾ ਬ੍ਯਗ੍ਘਾ ਵਰਾਹਾ ਚ, ਅਚ੍ਛਕੋਕਤਰਚ੍ਛਯੋ.

੧੪੧੨. ‘‘ਪਲਾਸਾਦਾ ਗਵਜਾ ਚ, ਮਹਿਂਸਾ ਰੋਹਿਤਾ ਰੁਰੂ;

ਏਣੇਯ੍ਯਾ ਚ ਵਰਾਹਾ [ਸਰਭਾ (ਸ੍ਯਾ.)] ਚ, ਗਣਿਨੋ ਨੀਕ [ਨਿਙ੍ਕ (ਸੀ. ਸ੍ਯਾ. ਪੀ.)] ਸੂਕਰਾ.

੧੪੧੩. ‘‘ਕਦਲਿਮਿਗਾ ਬਹੂ ਚਿਤ੍ਰਾ, ਬਿਲ਼ਾਰਾ ਸਸਕਣ੍ਟਕਾ;

ਨਾਨਾਮਿਗਗਣਾਕਿਣ੍ਣਂ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੧੪. ‘‘ਨਜ੍ਜਾਯੋ ਸੁਪਤਿਤ੍ਥਾਯੋ, ਸੋਣ੍ਣਵਾਲੁਕਸਨ੍ਥਤਾ;

ਅਚ੍ਛਾ ਸਵਨ੍ਤਿ ਅਮ੍ਬੂਨਿ, ਮਚ੍ਛਗੁਮ੍ਬਨਿਸੇਵਿਤਾ.

੧੪੧੫. ‘‘ਕੁਮ੍ਭੀਲਾ ਮਕਰਾ ਚੇਤ੍ਥ, ਸੁਸੁਮਾਰਾ ਚ ਕਚ੍ਛਪਾ;

ਪਾਠੀਨਾ ਪਾਵੁਸਾ ਮਚ੍ਛਾ, ਬਲਜਾ [ਵਲਜਾ (ਸੀ.), ਵਾਲਜਾ (ਪੀ.)] ਮੁਞ੍ਜਰੋਹਿਤਾ.

੧੪੧੬. ‘‘ਨਾਨਾਦਿਜਗਣਾਕਿਣ੍ਣਾ, ਨਾਨਾਦੁਮਗਣਾਯੁਤਾ;

ਵੇਲ਼ੁਰਿਯਕ-ਰੋਦਾਯੋ [ਵੇਲ਼ੁਰਿਯਫਲਕਰੋਦਾਯੋ (ਸੀ.)], ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੧੭. ‘‘ਪਸ੍ਸੇਤ੍ਥ ਪੋਕ੍ਖਰਣਿਯੋ, ਸੁਵਿਭਤ੍ਤਾ ਚਤੁਦ੍ਦਿਸਾ;