੫੪੭. ਵੇਸ੍ਸਨ੍ਤਰਜਾਤਕਂ (੧੦)

ਦਸਵਰਕਥਾ

੧੬੫੫. ‘‘ਫੁਸ੍ਸਤੀ [ਫੁਸਤਿ (ਸੀ. ਪੀ.)] ਵਰਵਣ੍ਣਾਭੇ, ਵਰਸ੍ਸੁ ਦਸਧਾ ਵਰੇ;

ਪਥਬ੍ਯਾ ਚਾਰੁਪੁਬ੍ਬਙ੍ਗਿ, ਯਂ ਤੁਯ੍ਹਂ ਮਨਸੋ ਪਿਯਂ’’.

੧੬੫੬. ‘‘ਦੇਵਰਾਜ ਨਮੋ ਤ੍ਯਤ੍ਥੁ, ਕਿਂ ਪਾਪਂ ਪਕਤਂ ਮਯਾ;

ਰਮ੍ਮਾ ਚਾਵੇਸਿ ਮਂ ਠਾਨਾ, ਵਾਤੋਵ ਧਰਣੀਰੁਹਂ’’.

੧੬੫੭. ‘‘ਨ ਚੇਵ ਤੇ ਕਤਂ ਪਾਪਂ, ਨ ਚ ਮੇ ਤ੍ਵਮਸਿ ਅਪ੍ਪਿਯਾ;

ਪੁਞ੍ਞਞ੍ਚ ਤੇ ਪਰਿਕ੍ਖੀਣਂ, ਯੇਨ ਤੇਵਂ ਵਦਾਮਹਂ.

੧੬੫੮. ‘‘ਸਨ੍ਤਿਕੇ ਮਰਣਂ ਤੁਯ੍ਹਂ, ਵਿਨਾਭਾਵੋ ਭਵਿਸ੍ਸਤਿ;

ਪਟਿਗਣ੍ਹਾਹਿ ਮੇ ਏਤੇ, ਵਰੇ ਦਸ ਪਵੇਚ੍ਛਤੋ’’.

੧੬੫੯. ‘‘ਵਰਂ ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਸਿਵਿਰਾਜਸ੍ਸ ਭਦ੍ਦਨ੍ਤੇ, ਤਤ੍ਥ ਅਸ੍ਸਂ ਨਿਵੇਸਨੇ.

੧੬੬੦. ‘‘ਨੀਲਨੇਤ੍ਤਾ ਨੀਲਭਮੁ, ਨਿਲਕ੍ਖੀ ਚ ਯਥਾ ਮਿਗੀ;

ਫੁਸ੍ਸਤੀ ਨਾਮ ਨਾਮੇਨ, ਤਤ੍ਥਪਸ੍ਸਂ ਪੁਰਿਨ੍ਦਦ.

੧੬੬੧. ‘‘ਪੁਤ੍ਤਂ ਲਭੇਥ ਵਰਦਂ, ਯਾਚਯੋਗਂ [ਯਾਚਯੋਗਿਂ (ਕ.)] ਅਮਚ੍ਛਰਿਂ;

ਪੂਜਿਤਂ ਪਟਿਰਾਜੂਹਿ, ਕਿਤ੍ਤਿਮਨ੍ਤਂ ਯਸਸ੍ਸਿਨਂ.

੧੬੬੨. ‘‘ਗਬ੍ਭਂ ਮੇ ਧਾਰਯਨ੍ਤਿਯਾ, ਮਜ੍ਝਿਮਙ੍ਗਂ ਅਨੁਨ੍ਨਤਂ;

ਕੁਚ੍ਛਿ ਅਨੁਨ੍ਨਤੋ ਅਸ੍ਸ, ਚਾਪਂਵ ਲਿਖਿਤਂ ਸਮਂ.

੧੬੬੩. ‘‘ਥਨਾ ਮੇ ਨਪ੍ਪਪਤੇਯ੍ਯੁਂ, ਪਲਿਤਾ ਨ ਸਨ੍ਤੁ ਵਾਸਵ;

ਕਾਯੇ ਰਜੋ ਨ ਲਿਮ੍ਪੇਥ, ਵਜ੍ਝਞ੍ਚਾਪਿ ਪਮੋਚਯੇ.

੧੬੬੪. ‘‘ਮਯੂਰਕੋਞ੍ਚਾਭਿਰੁਦੇ, ਨਾਰਿਵਰਗਣਾਯੁਤੇ;

ਖੁਜ੍ਜਚੇਲਾਪਕਾਕਿਣ੍ਣੇ, ਸੂਦਮਾਗਧਵਣ੍ਣਿਤੇ.

੧੬੬੫. ‘‘ਚਿਤ੍ਰਗ੍ਗਲ਼ੇਰੁਘੁਸਿਤੇ, ਸੁਰਾਮਂਸਪਬੋਧਨੇ;

ਸਿਵਿਰਾਜਸ੍ਸ ਭਦ੍ਦਨ੍ਤੇ, ਤਤ੍ਥਸ੍ਸਂ ਮਹੇਸੀ ਪਿਯਾ’’.

੧੬੬੬. ‘‘ਯੇ ਤੇ ਦਸ ਵਰਾ ਦਿਨ੍ਨਾ, ਮਯਾ ਸਬ੍ਬਙ੍ਗਸੋਭਨੇ;

ਸਿਵਿਰਾਜਸ੍ਸ ਵਿਜਿਤੇ, ਸਬ੍ਬੇ ਤੇ ਲਚ੍ਛਸੀ ਵਰੇ.

੧੬੬੭. ‘‘ਇਦਂ ਵਤ੍ਵਾਨ ਮਘਵਾ, ਦੇਵਰਾਜਾ ਸੁਜਮ੍ਪਤਿ;

ਫੁਸ੍ਸਤਿਯਾ ਵਰਂ ਦਤ੍ਵਾ, ਅਨੁਮੋਦਿਤ੍ਥ ਵਾਸਵੋ.

ਦਸਵਰਕਥਾ ਨਾਮ.

ਹੇਮਵਨ੍ਤਂ

੧੬੬੮. ‘‘ਪਰੂਲ਼੍ਹਕਚ੍ਛਨਖਲੋਮਾ, ਪਙ੍ਕਦਨ੍ਤਾ ਰਜਸ੍ਸਿਰਾ;

ਪਗ੍ਗਯ੍ਹ ਦਕ੍ਖਿਣਂ ਬਾਹੁਂ, ਕਿਂ ਮਂ ਯਾਚਨ੍ਤਿ ਬ੍ਰਾਹ੍ਮਣਾ’’.

੧੬੬੯. ‘‘ਰਤਨਂ ਦੇਵ ਯਾਚਾਮ, ਸਿਵੀਨਂ ਰਟ੍ਠਵਡ੍ਢਨਂ;

ਦਦਾਹਿ ਪਵਰਂ ਨਾਗਂ, ਈਸਾਦਨ੍ਤਂ ਉਰੂਲ਼੍ਹਵਂ’’.

੧੬੭੦. ‘‘ਦਦਾਮਿ ਨ ਵਿਕਮ੍ਪਾਮਿ, ਯਂ ਮਂ ਯਾਚਨ੍ਤਿ ਬ੍ਰਾਹ੍ਮਣਾ;

ਪਭਿਨ੍ਨਂ ਕੁਞ੍ਜਰਂ ਦਨ੍ਤਿਂ, ਓਪਵਯ੍ਹਂ ਗਜੁਤ੍ਤਮਂ’’.

੧੬੭੧. ‘‘ਹਤ੍ਥਿਕ੍ਖਨ੍ਧਤੋ ਓਰੁਯ੍ਹ, ਰਾਜਾ ਚਾਗਾਧਿਮਾਨਸੋ;

ਬ੍ਰਾਹ੍ਮਣਾਨਂ ਅਦਾ ਦਾਨਂ, ਸਿਵੀਨਂ ਰਟ੍ਠਵਡ੍ਢਨੋ’’.

੧੬੭੨. ‘‘ਤਦਾਸਿ ਯਂ ਭਿਂਸਨਕਂ, ਤਦਾਸਿ ਲੋਮਹਂਸਨਂ;

ਹਤ੍ਥਿਨਾਗੇ ਪਦਿਨ੍ਨਮ੍ਹਿ, ਮੇਦਨੀ ਸਮ੍ਪਕਮ੍ਪਥ.

੧੬੭੩. ‘‘ਤਦਾਸਿ ਯਂ ਭਿਂਸਨਕਂ, ਤਦਾਸਿ ਲੋਮਹਂਸਨਂ;

ਹਤ੍ਥਿਨਾਗੇ ਪਦਿਨ੍ਨਮ੍ਹਿ, ਖੁਬ੍ਭਿਤ੍ਥ ਨਗਰਂ ਤਦਾ.

੧੬੭੪. ‘‘ਸਮਾਕੁਲਂ ਪੁਰਂ ਆਸਿ, ਘੋਸੋ ਚ ਵਿਪੁਲੋ ਮਹਾ;

ਹਤ੍ਥਿਨਾਗੇ ਪਦਿਨ੍ਨਮ੍ਹਿ, ਸਿਵੀਨਂ ਰਟ੍ਠਵਡ੍ਢਨੇ’’.

੧੬੭੫. ‘‘ਉਗ੍ਗਾ ਚ ਰਾਜਪੁਤ੍ਤਾ ਚ, ਵੇਸਿਯਾਨਾ ਚ ਬ੍ਰਾਹ੍ਮਣਾ;

ਹਤ੍ਥਾਰੋਹਾ ਅਨੀਕਟ੍ਠਾ, ਰਥਿਕਾ ਪਤ੍ਤਿਕਾਰਕਾ.

੧੬੭੬. ‘‘ਕੇਵਲੋ ਚਾਪਿ ਨਿਗਮੋ, ਸਿਵਯੋ ਚ ਸਮਾਗਤਾ;

ਦਿਸ੍ਵਾ ਨਾਗਂ ਨੀਯਮਾਨਂ, ਤੇ ਰਞ੍ਞੋ ਪਟਿਵੇਦਯੁਂ.

੧੬੭੭. ‘‘ਵਿਧਮਂ ਦੇਵ ਤੇ ਰਟ੍ਠਂ, ਪੁਤ੍ਤੋ ਵੇਸ੍ਸਨ੍ਤਰੋ ਤਵ;

ਕਥਂ ਨੋ ਹਤ੍ਥਿਨਂ ਦਜ੍ਜਾ, ਨਾਗਂ ਰਟ੍ਠਸ੍ਸ ਪੂਜਿਤਂ.

੧੬੭੮. ‘‘ਕਥਂ ਨੋ ਕੁਞ੍ਜਰਂ ਦਜ੍ਜਾ, ਈਸਾਦਨ੍ਤਂ ਉਰੂਲ਼੍ਹਵਂ;

ਖੇਤ੍ਤਞ੍ਞੁਂ ਸਬ੍ਬਯੁਦ੍ਧਾਨਂ, ਸਬ੍ਬਸੇਤਂ ਗਜੁਤ੍ਤਮਂ.

੧੬੭੯. ‘‘ਪਣ੍ਡੁਕਮ੍ਬਲਸਞ੍ਛਨ੍ਨਂ, ਪਭਿਨ੍ਨਂ ਸਤ੍ਤੁਮਦ੍ਦਨਂ;

ਦਨ੍ਤਿਂ ਸਵਾਲ਼ਬੀਜਨਿਂ, ਸੇਤਂ ਕੇਲਾਸਸਾਦਿਸਂ.

੧੬੮੦. ‘‘ਸਸੇਤਚ੍ਛਤ੍ਤਂ ਸਉਪਾਧੇਯ੍ਯਂ, ਸਾਥਬ੍ਬਨਂ ਸਹਤ੍ਥਿਪਂ;

ਅਗ੍ਗਯਾਨਂ ਰਾਜਵਾਹਿਂ, ਬ੍ਰਾਹ੍ਮਣਾਨਂ ਅਦਾ ਗਜਂ [ਧਨਂ (ਸੀ. ਪੀ.), ਦਾਨਂ (ਸ੍ਯਾ.)].

੧੬੮੧. ‘‘ਅਨ੍ਨਂ ਪਾਨਞ੍ਚ ਯੋ [ਸੋ (ਸੀ. ਸ੍ਯਾ. ਕ.)] ਦਜ੍ਜਾ, ਵਤ੍ਥਸੇਨਾਸਨਾਨਿ ਚ;

ਏਤਂ ਖੋ ਦਾਨਂ ਪਤਿਰੂਪਂ, ਏਤਂ ਖੋ ਬ੍ਰਾਹ੍ਮਣਾਰਹਂ.

੧੬੮੨. ‘‘ਅਯਂ ਤੇ ਵਂਸਰਾਜਾ ਨੋ, ਸਿਵੀਨਂ ਰਟ੍ਠਵਡ੍ਢਨੋ [ਰਟ੍ਠਵਡ੍ਢਨਂ (ਸੀ.), ਰਟ੍ਠਵਡ੍ਢਨ (ਪੀ.)];

ਕਥਂ ਵੇਸ੍ਸਨ੍ਤਰੋ ਪੁਤ੍ਤੋ, ਗਜਂ ਭਾਜੇਤਿ ਸਞ੍ਜਯ.

੧੬੮੩. ‘‘ਸਚੇ ਤ੍ਵਂ ਨ ਕਰਿਸ੍ਸਸਿ, ਸਿਵੀਨਂ ਵਚਨਂ ਇਦਂ;

ਮਞ੍ਞੇ ਤਂ ਸਹ ਪੁਤ੍ਤੇਨ, ਸਿਵੀ ਹਤ੍ਥੇ ਕਰਿਸ੍ਸਰੇ’’.

੧੬੮੪. ‘‘ਕਾਮਂ ਜਨਪਦੋ ਮਾਸਿ, ਰਟ੍ਠਞ੍ਚਾਪਿ ਵਿਨਸ੍ਸਤੁ;

ਨਾਹਂ ਸਿਵੀਨਂ ਵਚਨਾ, ਰਾਜਪੁਤ੍ਤਂ ਅਦੂਸਕਂ;

ਪਬ੍ਬਾਜੇਯ੍ਯਂ ਸਕਾ ਰਟ੍ਠਾ, ਪੁਤ੍ਤੋ ਹਿ ਮਮ ਓਰਸੋ.

੧੬੮੫. ‘‘ਕਾਮਂ ਜਨਪਦੋ ਮਾਸਿ, ਰਟ੍ਠਞ੍ਚਾਪਿ ਵਿਨਸ੍ਸਤੁ;

ਨਾਹਂ ਸਿਵੀਨਂ ਵਚਨਾ, ਰਾਜਪੁਤ੍ਤਂ ਅਦੂਸਕਂ;

ਪਬ੍ਬਾਜੇਯ੍ਯਂ ਸਕਾ ਰਟ੍ਠਾ, ਪੁਤ੍ਤੋ ਹਿ ਮਮ ਅਤ੍ਰਜੋ.

੧੬੮੬. ‘‘ਨ ਚਾਹਂ ਤਸ੍ਮਿਂ ਦੁਬ੍ਭੇਯ੍ਯਂ, ਅਰਿਯਸੀਲਵਤੋ ਹਿ ਸੋ;

ਅਸਿਲੋਕੋਪਿ ਮੇ ਅਸ੍ਸ, ਪਾਪਞ੍ਚ ਪਸਵੇ ਬਹੁਂ;

ਕਥਂ ਵੇਸ੍ਸਨ੍ਤਰਂ ਪੁਤ੍ਤਂ, ਸਤ੍ਥੇਨ ਘਾਤਯਾਮਸੇ’’.

੧੬੮੭. ‘‘ਮਾ ਨਂ ਦਣ੍ਡੇਨ ਸਤ੍ਥੇਨ, ਨ ਹਿ ਸੋ ਬਨ੍ਧਨਾਰਹੋ;

ਪਬ੍ਬਾਜੇਹਿ ਚ ਨਂ ਰਟ੍ਠਾ, ਵਙ੍ਕੇ ਵਸਤੁ ਪਬ੍ਬਤੇ’’.

੧੬੮੮. ‘‘ਏਸੋ ਚੇ ਸਿਵੀਨਂ ਛਨ੍ਦੋ, ਛਨ੍ਦਂ ਨ ਪਨੁਦਾਮਸੇ;

ਇਮਂ ਸੋ ਵਸਤੁ ਰਤ੍ਤਿਂ, ਕਾਮੇ ਚ ਪਰਿਭੁਞ੍ਜਤੁ.

੧੬੮੯. ‘‘ਤਤੋ ਰਤ੍ਯਾ ਵਿਵਸਾਨੇ, ਸੂਰਿਯਸ੍ਸੁਗ੍ਗਮਨਂ ਪਤਿ [ਸੂਰਿਯੁਗ੍ਗਮਨੇ ਸਤਿ (ਕ.)];

ਸਮਗ੍ਗਾ ਸਿਵਯੋ ਹੁਤ੍ਵਾ, ਰਟ੍ਠਾ ਪਬ੍ਬਾਜਯਨ੍ਤੁ ਨਂ’’.

੧੬੯੦. ‘‘ਉਟ੍ਠੇਹਿ ਕਤ੍ਤੇ ਤਰਮਾਨੋ, ਗਨ੍ਤ੍ਵਾ ਵੇਸ੍ਸਨ੍ਤਰਂ ਵਦ;

ਸਿਵਯੋ ਦੇਵ ਤੇ ਕੁਦ੍ਧਾ, ਨੇਗਮਾ ਚ ਸਮਾਗਤਾ.

੧੬੯੧. ‘‘ਉਗ੍ਗਾ ਚ ਰਾਜਪੁਤ੍ਤਾ ਚ, ਵੇਸਿਯਾਨਾ ਚ ਬ੍ਰਾਹ੍ਮਣਾ;

ਹਤ੍ਥਾਰੋਹਾ ਅਨੀਕਟ੍ਠਾ, ਰਥਿਕਾ ਪਤ੍ਤਿਕਾਰਕਾ;

ਕੇਵਲੋ ਚਾਪਿ ਨਿਗਮੋ, ਸਿਵਯੋ ਚ ਸਮਾਗਤਾ.

੧੬੯੨. ‘‘ਅਸ੍ਮਾ ਰਤ੍ਯਾ ਵਿਵਸਾਨੇ, ਸੂਰਿਯਸ੍ਸੁਗ੍ਗਮਨਂ ਪਤਿ;

ਸਮਗ੍ਗਾ ਸਿਵਯੋ ਹੁਤ੍ਵਾ, ਰਟ੍ਠਾ ਪਬ੍ਬਾਜਯਨ੍ਤਿ ਤਂ.

੧੬੯੩. ‘‘ਸ ਕਤ੍ਤਾ ਤਰਮਾਨੋਵ, ਸਿਵਿਰਾਜੇਨ ਪੇਸਿਤੋ;

ਆਮੁਤ੍ਤਹਤ੍ਥਾਭਰਣਾ, ਸੁਵਤ੍ਥੋ ਚਨ੍ਦਨਭੂਸਿਤੋ.

੧੬੯੪. ‘‘ਸੀਸਂ ਨ੍ਹਾਤੋ ਉਦਕੇ ਸੋ, ਆਮੁਤ੍ਤਮਣਿਕੁਣ੍ਡਲੋ;

ਉਪਾਗਮਿ ਪੁਰਂ ਰਮ੍ਮਂ, ਵੇਸ੍ਸਨ੍ਤਰਨਿਵੇਸਨਂ.

੧੬੯੫. ‘‘ਤਤ੍ਥਦ੍ਦਸ ਕੁਮਾਰਂ ਸੋ, ਰਮਮਾਨਂ ਸਕੇ ਪੁਰੇ;

ਪਰਿਕਿਣ੍ਣਂ ਅਮਚ੍ਚੇਹਿ, ਤਿਦਸਾਨਂਵ ਵਾਸਵਂ.

੧੬੯੬. ‘‘ਸੋ ਤਤ੍ਥ ਗਨ੍ਤ੍ਵਾ ਤਰਮਾਨੋ, ਕਤ੍ਤਾ ਵੇਸ੍ਸਨ੍ਤਰਂਬ੍ਰਵਿ;

ਦੁਕ੍ਖਂ ਤੇ ਵੇਦਯਿਸ੍ਸਾਮਿ, ਮਾ ਮੇ ਕੁਜ੍ਝਿ ਰਥੇਸਭ.

੧੬੯੭. ‘‘ਵਨ੍ਦਿਤ੍ਵਾ ਰੋਦਮਾਨੋ ਸੋ, ਕਤ੍ਤਾ ਰਾਜਾਨਮਬ੍ਰਵਿ;

ਭਤ੍ਤਾ ਮੇਸਿ ਮਹਾਰਾਜ, ਸਬ੍ਬਕਾਮਰਸਾਹਰੋ.

੧੬੯੮. ‘‘ਦੁਕ੍ਖਂ ਤੇ ਵੇਦਯਿਸ੍ਸਾਮਿ, ਤਤ੍ਥ ਅਸ੍ਸਾਸਯਨ੍ਤੁ ਮਂ;

ਸਿਵਯੋ ਦੇਵ ਤੇ ਕੁਦ੍ਧਾ, ਨੇਗਮਾ ਚ ਸਮਾਗਤਾ.

੧੬੯੯. ‘‘ਉਗ੍ਗਾ ਚ ਰਾਜਪੁਤ੍ਤਾ ਚ, ਵੇਸਿਯਾਨਾ ਚ ਬ੍ਰਾਹ੍ਮਣਾ;

ਹਤ੍ਥਾਰੋਹਾ ਅਨੀਕਟ੍ਠਾ, ਰਥਿਕਾ ਪਤ੍ਤਿਕਾਰਕਾ;

ਕੇਵਲੋ ਚਾਪਿ ਨਿਗਮੋ, ਸਿਵਯੋ ਚ ਸਮਾਗਤਾ.

੧੭੦੦. ‘‘ਅਸ੍ਮਾ ਰਤ੍ਯਾ ਵਿਵਸਾਨੇ, ਸੂਰਿਯਸ੍ਸੁਗ੍ਗਮਨਂ ਪਤਿ;

ਸਮਗ੍ਗਾ ਸਿਵਯੋ ਹੁਤ੍ਵਾ, ਰਟ੍ਠਾ ਪਬ੍ਬਾਜਯਨ੍ਤਿ ਤਂ’’.

੧੭੦੧. ‘‘ਕਿਸ੍ਮਿਂ ਮੇ ਸਿਵਯੋ ਕੁਦ੍ਧਾ, ਨਾਹਂ ਪਸ੍ਸਾਮਿ ਦੁਕ੍ਕਟਂ;

ਤਂ ਮੇ ਕਤ੍ਤੇ ਵਿਯਾਚਿਕ੍ਖ, ਕਸ੍ਮਾ ਪਬ੍ਬਾਜਯਨ੍ਤਿ ਮਂ’’.

੧੭੦੨. ‘‘ਉਗ੍ਗਾ ਚ ਰਾਜਪੁਤ੍ਤਾ ਚ, ਵੇਸਿਯਾਨਾ ਚ ਬ੍ਰਾਹ੍ਮਣਾ;

ਹਤ੍ਥਾਰੋਹਾ ਅਨੀਕਟ੍ਠਾ, ਰਥਿਕਾ ਪਤ੍ਤਿਕਾਰਕਾ;

ਨਾਗਦਾਨੇਨ ਖਿਯ੍ਯਨ੍ਤਿ, ਤਸ੍ਮਾ ਪਬ੍ਬਾਜਯਨ੍ਤਿ ਤਂ’’.

੧੭੦੩. ‘‘ਹਦਯਂ ਚਕ੍ਖੁਮ੍ਪਹਂ ਦਜ੍ਜਂ, ਕਿਂ ਮੇ ਬਾਹਿਰਕਂ ਧਨਂ;

ਹਿਰਞ੍ਞਂ ਵਾ ਸੁਵਣ੍ਣਂ ਵਾ, ਮੁਤ੍ਤਾ ਵੇਲ਼ੁਰਿਯਾ ਮਣਿ.

੧੭੦੪. ‘‘ਦਕ੍ਖਿਣਂ ਵਾਪਹਂ ਬਾਹੁਂ, ਦਿਸ੍ਵਾ ਯਾਚਕਮਾਗਤੇ;

ਦਦੇਯ੍ਯਂ ਨ ਵਿਕਮ੍ਪੇਯ੍ਯਂ, ਦਾਨੇ ਮੇ ਰਮਤੇ ਮਨੋ.

੧੭੦੫. ‘‘ਕਾਮਂ ਮਂ ਸਿਵਯੋ ਸਬ੍ਬੇ, ਪਬ੍ਬਾਜੇਨ੍ਤੁ ਹਨਨ੍ਤੁ ਵਾ;

ਨੇਵ ਦਾਨਾ ਵਿਰਮਿਸ੍ਸਂ, ਕਾਮਂ ਛਿਨ੍ਦਨ੍ਤੁ ਸਤ੍ਤਧਾ’’.

੧੭੦੬. ‘‘ਏਵਂ ਤਂ ਸਿਵਯੋ ਆਹੁ, ਨੇਗਮਾ ਚ ਸਮਾਗਤਾ;

ਕੋਨ੍ਤਿਮਾਰਾਯ ਤੀਰੇਨ, ਗਿਰਿਮਾਰਞ੍ਜਰਂ ਪਤਿ;

ਯੇਨ ਪਬ੍ਬਾਜਿਤਾ ਯਨ੍ਤਿ, ਤੇਨ ਗਚ੍ਛਤੁ ਸੁਬ੍ਬਤੋ’’.

੧੭੦੭. ‘‘ਸੋਹਂ ਤੇਨ ਗਮਿਸ੍ਸਾਮਿ, ਯੇਨ ਗਚ੍ਛਨ੍ਤਿ ਦੂਸਕਾ;

ਰਤ੍ਤਿਨ੍ਦਿਵਂ ਮੇ ਖਮਥ, ਯਾਵ ਦਾਨਂ ਦਦਾਮਹਂ’’.

੧੭੦੮. ‘‘ਆਮਨ੍ਤਯਿਤ੍ਥ ਰਾਜਾਨਂ, ਮਦ੍ਦਿਂ ਸਬ੍ਬਙ੍ਗਸੋਭਨਂ;

ਯਂ ਤੇ ਕਿਞ੍ਚਿ ਮਯਾ ਦਿਨ੍ਨਂ, ਧਨਂ ਧਞ੍ਞਞ੍ਚ ਵਿਜ੍ਜਤਿ.

੧੭੦੯. ‘‘ਹਿਰਞ੍ਞਂ ਵਾ ਸੁਵਣ੍ਣਂ ਵਾ, ਮੁਤ੍ਤਾ ਵੇਲ਼ੁਰਿਯਾ ਬਹੂ;

ਸਬ੍ਬਂ ਤਂ ਨਿਦਹੇਯ੍ਯਾਸਿ, ਯਞ੍ਚ ਤੇ ਪੇਤ੍ਤਿਕਂ ਧਨਂ.

੧੭੧੦. ‘‘ਤਮਬ੍ਰਵਿ ਰਾਜਪੁਤ੍ਤੀ, ਮਦ੍ਦੀ ਸਬ੍ਬਙ੍ਗਸੋਭਨਾ;

ਕੁਹਿਂ ਦੇਵ ਨਿਦਹਾਮਿ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’.

੧੭੧੧. ‘‘ਸੀਲਵਨ੍ਤੇਸੁ ਦਜ੍ਜਾਸਿ, ਦਾਨਂ ਮਦ੍ਦਿ ਯਥਾਰਹਂ;

ਨ ਹਿ ਦਾਨਾ ਪਰਂ ਅਤ੍ਥਿ, ਪਤਿਟ੍ਠਾ ਸਬ੍ਬਪਾਣਿਨਂ.

੧੭੧੨. ‘‘ਪੁਤ੍ਤੇਸੁ ਮਦ੍ਦਿ ਦਯੇਸਿ, ਸਸ੍ਸੁਯਾ ਸਸੁਰਮ੍ਹਿ ਚ;

ਯੋ ਚ ਤਂ ਭਤ੍ਤਾ ਮਞ੍ਞੇਯ੍ਯ, ਸਕ੍ਕਚ੍ਚਂ ਤਂ ਉਪਟ੍ਠਹੇ.

੧੭੧੩. ‘‘ਨੋ ਚੇ ਤਂ ਭਤ੍ਤਾ ਮਞ੍ਞੇਯ੍ਯ, ਮਯਾ ਵਿਪ੍ਪਵਸੇਨ ਤੇ;

ਅਞ੍ਞਂ ਭਤ੍ਤਾਰਂ ਪਰਿਯੇਸ, ਮਾ ਕਿਸਿਤ੍ਥੋ [ਮਾ ਕਿਲਿਤ੍ਥ (ਸੀ. ਪੀ.)] ਮਯਾ ਵਿਨਾ’’.

੧੭੧੪. ‘‘ਅਹਞ੍ਹਿ ਵਨਂ ਗਚ੍ਛਾਮਿ, ਘੋਰਂ ਵਾਲ਼ਮਿਗਾਯੁਤਂ;

ਸਂਸਯੋ ਜੀਵਿਤਂ ਮਯ੍ਹਂ, ਏਕਕਸ੍ਸ ਬ੍ਰਹਾਵਨੇ’’.

੧੭੧੫. ‘‘ਤਮਬ੍ਰਵਿ ਰਾਜਪੁਤ੍ਤੀ, ਮਦ੍ਦੀ ਸਬ੍ਬਙ੍ਗਸੋਭਨਾ;

‘‘ਅਭੁਮ੍ਮੇ ਕਥਂ ਨੁ ਭਣਸਿ, ਪਾਪਕਂ ਵਤ ਭਾਸਸਿ.

੧੭੧੬. ‘‘ਨੇਸ ਧਮ੍ਮੋ ਮਹਾਰਾਜ, ਯਂ ਤ੍ਵਂ ਗਚ੍ਛੇਯ੍ਯ ਏਕਕੋ;

ਅਹਮ੍ਪਿ ਤੇਨ ਗਚ੍ਛਾਮਿ, ਯੇਨ ਗਚ੍ਛਸਿ ਖਤ੍ਤਿਯ.

੧੭੧੭. ‘‘ਮਰਣਂ ਵਾ ਤਯਾ ਸਦ੍ਧਿਂ, ਜੀਵਿਤਂ ਵਾ ਤਯਾ ਵਿਨਾ;

ਤਦੇਵ ਮਰਣਂ ਸੇਯ੍ਯੋ, ਯਂ ਚੇ ਜੀਵੇ ਤਯਾ ਵਿਨਾ.

੧੭੧੮. ‘‘ਅਗ੍ਗਿਂ ਉਜ੍ਜਾਲਯਿਤ੍ਵਾਨ [ਨਿਜ੍ਜਾਲਯਿਤ੍ਵਾਨ (ਸੀ. ਪੀ.)], ਏਕਜਾਲਸਮਾਹਿਤਂ;

ਤਤ੍ਥ ਮੇ [ਤਤ੍ਥੇਵ (ਸ੍ਯਾ. ਕ.)] ਮਰਣਂ ਸੇਯ੍ਯੋ, ਯਂ ਚੇ ਜੀਵੇ ਤਯਾ ਵਿਨਾ.

੧੭੧੯. ‘‘ਯਥਾ ਆਰਞ੍ਞਕਂ ਨਾਗਂ, ਦਨ੍ਤਿਂ ਅਨ੍ਵੇਤਿ ਹਤ੍ਥਿਨੀ;

ਜੇਸ੍ਸਨ੍ਤਂ ਗਿਰਿਦੁਗ੍ਗੇਸੁ, ਸਮੇਸੁ ਵਿਸਮੇਸੁ ਚ.

੧੭੨੦. ‘‘ਏਵਂ ਤਂ ਅਨੁਗਚ੍ਛਾਮਿ, ਪੁਤ੍ਤੇ ਆਦਾਯ ਪਚ੍ਛਤੋ;

ਸੁਭਰਾ ਤੇ ਭਵਿਸ੍ਸਾਮਿ, ਨ ਤੇ ਹੇਸ੍ਸਾਮਿ ਦੁਬ੍ਭਰਾ.

੧੭੨੧. ‘‘ਇਮੇ ਕੁਮਾਰੇ ਪਸ੍ਸਨ੍ਤੋ, ਮਞ੍ਜੁਕੇ ਪਿਯਭਾਣਿਨੇ;

ਆਸੀਨੇ [ਆਸਨੇ (ਕ.)] ਵਨਗੁਮ੍ਬਸ੍ਮਿਂ, ਨ ਰਜ੍ਜਸ੍ਸ ਸਰਿਸ੍ਸਸਿ.

੧੭੨੨. ‘‘ਇਮੇ ਕੁਮਾਰੇ ਪਸ੍ਸਨ੍ਤੋ, ਮਞ੍ਜੁਕੇ ਪਿਯਭਾਣਿਨੇ;

ਕੀਲ਼ਨ੍ਤੇ ਵਨਗੁਮ੍ਬਸ੍ਮਿਂ, ਨ ਰਜ੍ਜਸ੍ਸ ਸਰਿਸ੍ਸਸਿ.

੧੭੨੩. ‘‘ਇਮੇ ਕੁਮਾਰੇ ਪਸ੍ਸਨ੍ਤੋ, ਮਞ੍ਜੁਕੇ ਪਿਯਭਾਣਿਨੇ;

ਅਸ੍ਸਮੇ ਰਮਣੀਯਮ੍ਹਿ, ਨ ਰਜ੍ਜਸ੍ਸ ਸਰਿਸ੍ਸਸਿ.

੧੭੨੪. ‘‘ਇਮੇ ਕੁਮਾਰੇ ਪਸ੍ਸਨ੍ਤੋ, ਮਞ੍ਜੁਕੇ ਪਿਯਭਾਣਿਨੇ;