੫੪੫. ਮਹਾਨਾਰਦਕਸ੍ਸਪਜਾਤਕਂ (੮)

੧੧੫੩. ‘‘ਅਹੁ ਰਾਜਾ ਵਿਦੇਹਾਨਂ, ਅਙ੍ਗਤਿ [ਅਙ੍ਗਾਤਿ (ਸੀ.) ਏਵਮੁਪਰਿਪਿ] ਨਾਮ ਖਤ੍ਤਿਯੋ;

ਪਹੂਤਯੋਗ੍ਗੋ ਧਨਿਮਾ, ਅਨਨ੍ਤਬਲਪੋਰਿਸੋ.

੧੧੫੪. ਸੋ ਚ ਪਨ੍ਨਰਸਿਂ [ਪਨ੍ਨਰਸੇ (ਸ੍ਯਾ. ਕ.)] ਰਤ੍ਤਿਂ, ਪੁਰਿਮਯਾਮੇ ਅਨਾਗਤੇ;

ਚਾਤੁਮਾਸਾ [ਚਾਤੁਮਸ੍ਸ (ਸੀ. ਪੀ.)] ਕੋਮੁਦਿਯਾ, ਅਮਚ੍ਚੇ ਸਨ੍ਨਿਪਾਤਯਿ.

੧੧੫੫. ‘‘ਪਣ੍ਡਿਤੇ ਸੁਤਸਮ੍ਪਨ੍ਨੇ, ਮਿਤਪੁਬ੍ਬੇ [ਮਿਹਿਤਪੁਬ੍ਬੇ (ਸੀ. ਪੀ.)] ਵਿਚਕ੍ਖਣੇ;

ਵਿਜਯਞ੍ਚ ਸੁਨਾਮਞ੍ਚ, ਸੇਨਾਪਤਿਂ ਅਲਾਤਕਂ.

੧੧੫੬. ‘‘ਤਮਨੁਪੁਚ੍ਛਿ ਵੇਦੇਹੋ, ‘‘ਪਚ੍ਚੇਕਂ ਬ੍ਰੂਥ ਸਂ ਰੁਚਿਂ;

ਚਾਤੁਮਾਸਾ ਕੋਮੁਦਜ੍ਜ, ਜੁਣ੍ਹਂ ਬ੍ਯਪਹਤਂ [ਬ੍ਯਪਗਤਂ (ਸੀ. ਪੀ.)] ਤਮਂ;

ਕਾਯਜ੍ਜ ਰਤਿਯਾ ਰਤ੍ਤਿਂ, ਵਿਹਰੇਮੁ ਇਮਂ ਉਤੁਂ’’.

੧੧੫੭. ‘‘ਤਤੋ ਸੇਨਾਪਤਿ ਰਞ੍ਞੋ, ਅਲਾਤੋ ਏਤਦਬ੍ਰਵਿ;

‘‘ਹਟ੍ਠਂ ਯੋਗ੍ਗਂ ਬਲਂ ਸਬ੍ਬਂ, ਸੇਨਂ ਸਨ੍ਨਾਹਯਾਮਸੇ.

੧੧੫੮. ‘‘ਨਿਯ੍ਯਾਮ ਦੇਵ ਯੁਦ੍ਧਾਯ, ਅਨਨ੍ਤਬਲਪੋਰਿਸਾ;

ਯੇ ਤੇ ਵਸਂ ਨ ਆਯਨ੍ਤਿ, ਵਸਂ ਉਪਨਯਾਮਸੇ [ਉਪਨਿਯ੍ਯਾਮਸੇ (ਕ.)];

ਏਸਾ ਮਯ੍ਹਂ ਸਕਾ ਦਿਟ੍ਠਿ, ਅਜਿਤਂ ਓਜਿਨਾਮਸੇ.

੧੧੫੯. ਅਲਾਤਸ੍ਸ ਵਚੋ ਸੁਤ੍ਵਾ, ਸੁਨਾਮੋ ਏਤਦਬ੍ਰਵਿ;

‘‘ਸਬ੍ਬੇ ਤੁਯ੍ਹਂ ਮਹਾਰਾਜ, ਅਮਿਤ੍ਤਾ ਵਸਮਾਗਤਾ.

੧੧੬੦. ‘‘ਨਿਕ੍ਖਿਤ੍ਤਸਤ੍ਥਾ ਪਚ੍ਚਤ੍ਥਾ, ਨਿਵਾਤਮਨੁਵਤ੍ਤਰੇ;

ਉਤ੍ਤਮੋ ਉਸ੍ਸਵੋ ਅਜ੍ਜ, ਨ ਯੁਦ੍ਧਂ ਮਮ ਰੁਚ੍ਚਤਿ.

੧੧੬੧. ‘‘ਅਨ੍ਨਪਾਨਞ੍ਚ ਖਜ੍ਜਞ੍ਚ, ਖਿਪ੍ਪਂ ਅਭਿਹਰਨ੍ਤੁ ਤੇ;

ਰਮਸ੍ਸੁ ਦੇਵ ਕਾਮੇਹਿ, ਨਚ੍ਚਗੀਤੇ ਸੁਵਾਦਿਤੇ’’.

੧੧੬੨. ਸੁਨਾਮਸ੍ਸ ਵਚੋ ਸੁਤ੍ਵਾ, ਵਿਜਯੋ ਏਤਦਬ੍ਰਵਿ;

‘‘ਸਬ੍ਬੇ ਕਾਮਾ ਮਹਾਰਾਜ, ਨਿਚ੍ਚਂ ਤਵ ਮੁਪਟ੍ਠਿਤਾ.

੧੧੬੩. ‘‘ਨ ਹੇਤੇ ਦੁਲ੍ਲਭਾ ਦੇਵ, ਤਵ ਕਾਮੇਹਿ ਮੋਦਿਤੁਂ;

ਸਦਾਪਿ ਕਾਮਾ ਸੁਲਭਾ, ਨੇਤਂ ਚਿਤ੍ਤਮਤਂ [ਚਿਤ੍ਤਂ ਮਤੀ (ਕ.)] ਮਮ.

੧੧੬੪. ‘‘ਸਮਣਂ ਬ੍ਰਾਹ੍ਮਣਂ ਵਾਪਿ, ਉਪਾਸੇਮੁ ਬਹੁਸ੍ਸੁਤਂ;

ਯੋ ਨਜ੍ਜ ਵਿਨਯੇ ਕਙ੍ਖਂ, ਅਤ੍ਥਧਮ੍ਮਵਿਦੂ ਇਸੇ’’.

੧੧੬੫. ਵਿਜਯਸ੍ਸ ਵਚੋ ਸੁਤ੍ਵਾ, ਰਾਜਾ ਅਙ੍ਗਤਿ ਮਬ੍ਰਵਿ;

‘‘ਯਥਾ ਵਿਜਯੋ ਭਣਤਿ, ਮਯ੍ਹਮ੍ਪੇਤਂਵ ਰੁਚ੍ਚਤਿ.

੧੧੬੬. ‘‘ਸਮਣਂ ਬ੍ਰਾਹ੍ਮਣਂ ਵਾਪਿ, ਉਪਾਸੇਮੁ ਬਹੁਸ੍ਸੁਤਂ;

ਯੋ ਨਜ੍ਜ ਵਿਨਯੇ ਕਙ੍ਖਂ, ਅਤ੍ਥਧਮ੍ਮਵਿਦੂ ਇਸੇ.

੧੧੬੭. ‘‘ਸਬ੍ਬੇਵ ਸਨ੍ਤਾ ਕਰੋਥ ਮਤਿਂ, ਕਂ ਉਪਾਸੇਮੁ ਪਣ੍ਡਿਤਂ;

ਯੋ [ਕੋ (ਸੀ. ਪੀ.)] ਨਜ੍ਜ ਵਿਨਯੇ ਕਙ੍ਖਂ, ਅਤ੍ਥਧਮ੍ਮਵਿਦੂ ਇਸੇ’’.

੧੧੬੮. ‘‘ਵੇਦੇਹਸ੍ਸ ਵਚੋ ਸੁਤ੍ਵਾ, ਅਲਾਤੋ ਏਤਦਬ੍ਰਵਿ;

‘‘ਅਤ੍ਥਾਯਂ ਮਿਗਦਾਯਸ੍ਮਿਂ, ਅਚੇਲੋ ਧੀਰਸਮ੍ਮਤੋ.

੧੧੬੯. ‘‘ਗੁਣੋ ਕਸ੍ਸਪਗੋਤ੍ਤਾਯਂ, ਸੁਤੋ ਚਿਤ੍ਰਕਥੀ ਗਣੀ;

ਤਂ ਦੇਵ [ਤਦੇਵ (ਕ.)] ਪਯਿਰੁਪਾਸੇਮੁ [ਪਯਿਰੁਪਾਸਯ (ਸੀ. ਪੀ.)], ਸੋ ਨੋ ਕਙ੍ਖਂ ਵਿਨੇਸ੍ਸਤਿ’’.

੧੧੭੦. ‘‘ਅਲਾਤਸ੍ਸ ਵਚੋ ਸੁਤ੍ਵਾ, ਰਾਜਾ ਚੋਦੇਸਿ ਸਾਰਥਿਂ;

‘‘ਮਿਗਦਾਯਂ ਗਮਿਸ੍ਸਾਮ, ਯੁਤ੍ਤਂ ਯਾਨਂ ਇਧਾਨਯ’’.

੧੧੭੧. ਤਸ੍ਸ ਯਾਨਂ ਅਯੋਜੇਸੁਂ, ਦਨ੍ਤਂ ਰੂਪਿਯਪਕ੍ਖਰਂ [ਰੂਪਿਯੁਪਕ੍ਖਰਂ (ਕ.)];

ਸੁਕ੍ਕਮਟ੍ਠਪਰਿਵਾਰਂ, ਪਣ੍ਡਰਂ ਦੋਸਿਨਾਮੁਖਂ.

੧੧੭੨. ‘‘ਤਤ੍ਰਾਸੁਂ ਕੁਮੁਦਾਯੁਤ੍ਤਾ, ਚਤ੍ਤਾਰੋ ਸਿਨ੍ਧਵਾ ਹਯਾ;

ਅਨਿਲੂਪਮਸਮੁਪ੍ਪਾਤਾ [ਅਨਿਲੂਪਮਸਮੁਪ੍ਪਾਦਾ (ਕ.)], ਸੁਦਨ੍ਤਾ ਸੋਣ੍ਣਮਾਲਿਨੋ.

੧੧੭੩. ‘‘ਸੇਤਚ੍ਛਤ੍ਤਂ ਸੇਤਰਥੋ, ਸੇਤਸ੍ਸਾ ਸੇਤਬੀਜਨੀ;

ਵੇਦੇਹੋ ਸਹਮਚ੍ਚੇਹਿ, ਨਿਯ੍ਯਂ ਚਨ੍ਦੋਵ ਸੋਭਤਿ.

੧੧੭੪. ‘‘ਤਮਨੁਯਾਯਿਂਸੁ ਬਹਵੋ, ਇਨ੍ਦਿਖਗ੍ਗਧਰਾ [ਇਨ੍ਦਖਗ੍ਗਧਰਾ (ਸੀ.), ਇਟ੍ਠਿਖਗ੍ਗਧਰਾ (ਪੀ.)] ਬਲੀ;

ਅਸ੍ਸਪਿਟ੍ਠਿਗਤਾ ਵੀਰਾ, ਨਰਾ ਨਰਵਰਾਧਿਪਂ.

੧੧੭੫. ਸੋ ਮੁਹੁਤ੍ਤਂਵ ਯਾਯਿਤ੍ਵਾ, ਯਾਨਾ ਓਰੁਯ੍ਹ ਖਤ੍ਤਿਯੋ;

ਵੇਦੇਹੋ ਸਹਮਚ੍ਚੇਹਿ, ਪਤ੍ਤੀ ਗੁਣਮੁਪਾਗਮਿ.

੧੧੭੬. ਯੇਪਿ ਤਤ੍ਥ ਤਦਾ ਆਸੁਂ, ਬ੍ਰਾਹ੍ਮਣਿਬ੍ਭਾ ਸਮਾਗਤਾ;

ਨ ਤੇ ਅਪਨਯੀ ਰਾਜਾ, ਅਕਤਂ ਭੂਮਿਮਾਗਤੇ.

੧੧੭੭. ‘‘ਤਤੋ ਸੋ ਮੁਦੁਕਾ ਭਿਸਿਯਾ, ਮੁਦੁਚਿਤ੍ਤਕਸਨ੍ਥਤੇ [ਮੁਦੁਚਿਤ੍ਤਕਲ਼ਨ੍ਦਕੇ (ਸੀ. ਪੀ.)];

ਮੁਦੁਪਚ੍ਚਤ੍ਥਤੇ ਰਾਜਾ, ਏਕਮਨ੍ਤਂ ਉਪਾਵਿਸਿ.

੧੧੭੮. ‘‘ਨਿਸਜ੍ਜ ਰਾਜਾ ਸਮ੍ਮੋਦਿ, ਕਥਂ ਸਾਰਣਿਯਂ ਤਤੋ;

‘‘ਕਚ੍ਚਿ ਯਾਪਨਿਯਂ ਭਨ੍ਤੇ, ਵਾਤਾਨਮਵਿਯਗ੍ਗਤਾ [ਵਾਤਾਨਮਵਿਸਗ੍ਗਤਾ (ਸੀ. ਪੀ.), ਵਾਤਾਨਮਵਿਯਤ੍ਤਤਾ (ਸ੍ਯਾ.)].

੧੧੭੯. ‘‘ਕਚ੍ਚਿ ਅਕਸਿਰਾ ਵੁਤ੍ਤਿ, ਲਭਸਿ [ਲਬ੍ਭਤਿ (ਸੀ. ਪੀ.)] ਪਿਣ੍ਡਯਾਪਨਂ [ਪਿਣ੍ਡਿਯਾਪਨਂ (ਸ੍ਯਾ. ਕ.)];

ਅਪਾਬਾਧੋ ਚਸਿ ਕਚ੍ਚਿ, ਚਕ੍ਖੁਂ ਨ ਪਰਿਹਾਯਤਿ’’.

੧੧੮੦. ਤਂ ਗੁਣੋ ਪਟਿਸਮ੍ਮੋਦਿ, ਵੇਦੇਹਂ ਵਿਨਯੇ ਰਤਂ;

‘‘ਯਾਪਨੀਯਂ ਮਹਾਰਾਜ, ਸਬ੍ਬਮੇਤਂ ਤਦੂਭਯਂ.

੧੧੮੧. ‘‘ਕਚ੍ਚਿ ਤੁਯ੍ਹਮ੍ਪਿ ਵੇਦੇਹ, ਪਚ੍ਚਨ੍ਤਾ ਨ ਬਲੀਯਰੇ;

ਕਚ੍ਚਿ ਅਰੋਗਂ ਯੋਗ੍ਗਂ ਤੇ, ਕਚ੍ਚਿ ਵਹਤਿ ਵਾਹਨਂ;

ਕਚ੍ਚਿ ਤੇ ਬ੍ਯਾਧਯੋ ਨਤ੍ਥਿ, ਸਰੀਰਸ੍ਸੁਪਤਾਪਿਯਾ’’ [ਸਰੀਰਸ੍ਸੁਪਤਾਪਿਕਾ (ਸੀ. ਪੀ.), ਸਰੀਰਸ੍ਸੁਪਤਾਪਨਾ (?)].

੧੧੮੨. ਪਟਿਸਮ੍ਮੋਦਿਤੋ ਰਾਜਾ, ਤਤੋ ਪੁਚ੍ਛਿ ਅਨਨ੍ਤਰਾ;

ਅਤ੍ਥਂ ਧਮ੍ਮਞ੍ਚ ਞਾਯਞ੍ਚ, ਧਮ੍ਮਕਾਮੋ ਰਥੇਸਭੋ.

੧੧੮੩. ‘‘ਕਥਂ ਧਮ੍ਮਂ ਚਰੇ ਮਚ੍ਚੋ, ਮਾਤਾਪਿਤੂਸੁ ਕਸ੍ਸਪ;

ਕਥਂ ਚਰੇ ਆਚਰਿਯੇ, ਪੁਤ੍ਤਦਾਰੇ ਕਥਂ ਚਰੇ.

੧੧੮੪. ‘‘ਕਥਂ ਚਰੇਯ੍ਯ ਵੁਡ੍ਢੇਸੁ, ਕਥਂ ਸਮਣਬ੍ਰਾਹ੍ਮਣੇ;

ਕਥਞ੍ਚ ਬਲਕਾਯਸ੍ਮਿਂ, ਕਥਂ ਜਨਪਦੇ ਚਰੇ.

੧੧੮੫. ‘‘ਕਥਂ ਧਮ੍ਮਂ ਚਰਿਤ੍ਵਾਨ, ਮਚ੍ਚਾ ਗਚ੍ਛਨ੍ਤਿ [ਪੇਚ੍ਚ ਗਚ੍ਛਤਿ (ਸੀ. ਸ੍ਯਾ. ਪੀ.)] ਸੁਗ੍ਗਤਿਂ;

ਕਥਞ੍ਚੇਕੇ ਅਧਮ੍ਮਟ੍ਠਾ, ਪਤਨ੍ਤਿ ਨਿਰਯਂ ਅਥੋ’’.

੧੧੮੬. ‘‘ਵੇਦੇਹਸ੍ਸ ਵਚੋ ਸੁਤ੍ਵਾ, ਕਸ੍ਸਪੋ ਏਤਦਬ੍ਰਵਿ;

‘‘‘ਸੁਣੋਹਿ ਮੇ ਮਹਾਰਾਜ, ਸਚ੍ਚਂ ਅਵਿਤਥਂ ਪਦਂ.

੧੧੮੭. ‘‘‘ਨਤ੍ਥਿ ਧਮ੍ਮਚਰਿਤਸ੍ਸ [ਧਮ੍ਮਸ੍ਸ ਚਿਣ੍ਣਸ੍ਸ (ਸੀ.)], ਫਲਂ ਕਲ੍ਯਾਣਪਾਪਕਂ;

ਨਤ੍ਥਿ ਦੇਵ ਪਰੋ ਲੋਕੋ, ਕੋ ਤਤੋ ਹਿ ਇਧਾਗਤੋ.

੧੧੮੮. ‘‘‘ਨਤ੍ਥਿ ਦੇਵ ਪਿਤਰੋ ਵਾ, ਕੁਤੋ ਮਾਤਾ ਕੁਤੋ ਪਿਤਾ;

ਨਤ੍ਥਿ ਆਚਰਿਯੋ ਨਾਮ, ਅਦਨ੍ਤਂ ਕੋ ਦਮੇਸ੍ਸਤਿ.

੧੧੮੯. ‘‘‘ਸਮਤੁਲ੍ਯਾਨਿ ਭੂਤਾਨਿ, ਨਤ੍ਥਿ ਜੇਟ੍ਠਾਪਚਾਯਿਕਾ;

ਨਤ੍ਥਿ ਬਲਂ ਵੀਰਿਯਂ ਵਾ, ਕੁਤੋ ਉਟ੍ਠਾਨਪੋਰਿਸਂ;

ਨਿਯਤਾਨਿ ਹਿ ਭੂਤਾਨਿ, ਯਥਾ ਗੋਟਵਿਸੋ ਤਥਾ.

੧੧੯੦. ‘‘‘ਲਦ੍ਧੇਯ੍ਯਂ ਲਭਤੇ ਮਚ੍ਚੋ, ਤਤ੍ਥ ਦਾਨਫਲਂ ਕੁਤੋ;

ਨਤ੍ਥਿ ਦਾਨਫਲਂ ਦੇਵ, ਅਵਸੋ ਦੇਵਵੀਰਿਯੋ.

੧੧੯੧. ‘‘‘ਬਾਲੇਹਿ ਦਾਨਂ ਪਞ੍ਞਤ੍ਤਂ, ਪਣ੍ਡਿਤੇਹਿ ਪਟਿਚ੍ਛਿਤਂ;

ਅਵਸਾ ਦੇਨ੍ਤਿ ਧੀਰਾਨਂ, ਬਾਲਾ ਪਣ੍ਡਿਤਮਾਨਿਨੋ.

੧੧੯੨. ‘‘‘ਸਤ੍ਤਿਮੇ ਸਸ੍ਸਤਾ ਕਾਯਾ, ਅਚ੍ਛੇਜ੍ਜਾ ਅਵਿਕੋਪਿਨੋ;

ਤੇਜੋ ਪਥਵੀ ਆਪੋ ਚ, ਵਾਯੋ ਸੁਖਂ ਦੁਖਞ੍ਚਿਮੇ;

ਜੀਵੇ ਚ ਸਤ੍ਤਿਮੇ ਕਾਯਾ, ਯੇਸਂ ਛੇਤ੍ਤਾ ਨ ਵਿਜ੍ਜਤਿ.

੧੧੯੩. ‘‘‘ਨਤ੍ਥਿ ਹਨ੍ਤਾ ਵ ਛੇਤ੍ਤਾ ਵਾ, ਹਞ੍ਞੇ ਯੇਵਾਪਿ [ਹਞ੍ਞਰੇ ਵਾਪਿ (ਸੀ. ਸ੍ਯਾ. ਪੀ.)] ਕੋਚਿ ਨਂ;

ਅਨ੍ਤਰੇਨੇਵ ਕਾਯਾਨਂ, ਸਤ੍ਥਾਨਿ ਵੀਤਿਵਤ੍ਤਰੇ.

੧੧੯੪. ‘‘‘ਯੋ ਚਾਪਿ [ਯੋਪਾਯਂ (ਸੀ. ਪੀ.), ਯੋ ਚਾਯਂ (ਸ੍ਯਾ. ਕ.)] ਸਿਰਮਾਦਾਯ, ਪਰੇਸਂ ਨਿਸਿਤਾਸਿਨਾ;

ਨ ਸੋ ਛਿਨ੍ਦਤਿ ਤੇ ਕਾਯੇ, ਤਤ੍ਥ ਪਾਪਫਲਂ ਕੁਤੋ.

੧੧੯੫. ‘‘‘ਚੁਲ੍ਲਾਸੀਤਿਮਹਾਕਪ੍ਪੇ, ਸਬ੍ਬੇ ਸੁਜ੍ਝਨ੍ਤਿ ਸਂਸਰਂ;

ਅਨਾਗਤੇ ਤਮ੍ਹਿ ਕਾਲੇ, ਸਞ੍ਞਤੋਪਿ ਨ ਸੁਜ੍ਝਤਿ.

੧੧੯੬. ‘‘‘ਚਰਿਤ੍ਵਾਪਿ ਬਹੁਂ ਭਦ੍ਰਂ, ਨੇਵ ਸੁਜ੍ਝਨ੍ਤਿਨਾਗਤੇ;

ਪਾਪਞ੍ਚੇਪਿ ਬਹੁਂ ਕਤ੍ਵਾ, ਤਂ ਖਣਂ ਨਾਤਿਵਤ੍ਤਰੇ.

੧੧੯੭. ‘‘‘ਅਨੁਪੁਬ੍ਬੇਨ ਨੋ ਸੁਦ੍ਧਿ, ਕਪ੍ਪਾਨਂ ਚੁਲ੍ਲਸੀਤਿਯਾ;

ਨਿਯਤਿਂ ਨਾਤਿਵਤ੍ਤਾਮ, ਵੇਲਨ੍ਤਮਿਵ ਸਾਗਰੋ’’’.

੧੧੯੮. ਕਸ੍ਸਪਸ੍ਸ ਵਚੋ ਸੁਤ੍ਵਾ, ਅਲਾਤੋ ਏਤਦਬ੍ਰਵਿ;

‘‘ਯਥਾ ਭਦਨ੍ਤੋ ਭਣਤਿ, ਮਯ੍ਹਮ੍ਪੇਤਂਵ ਰੁਚ੍ਚਤਿ.

੧੧੯੯. ‘‘ਅਹਮ੍ਪਿ ਪੁਰਿਮਂ ਜਾਤਿਂ, ਸਰੇ ਸਂਸਰਿਤਤ੍ਤਨੋ;

ਪਿਙ੍ਗਲੋ ਨਾਮਹਂ ਆਸਿਂ, ਲੁਦ੍ਦੋ ਗੋਘਾਤਕੋ ਪੁਰੇ.

੧੨੦੦. ‘‘ਬਾਰਾਣਸਿਯਂ ਫੀਤਾਯਂ, ਬਹੁਂ ਪਾਪਂ ਕਤਂ ਮਯਾ;

ਬਹੂ ਮਯਾ ਹਤਾ ਪਾਣਾ, ਮਹਿਂਸਾ ਸੂਕਰਾ ਅਜਾ.

੧੨੦੧. ‘‘ਤਤੋ ਚੁਤੋ ਇਧ ਜਾਤੋ, ਇਦ੍ਧੇ ਸੇਨਾਪਤੀਕੁਲੇ;

ਨਤ੍ਥਿ ਨੂਨ ਫਲਂ ਪਾਪਂ, ਯੋਹਂ [ਪਾਪੇ ਸੋਹਂ (ਸੀ. ਪੀ.)] ਨ ਨਿਰਯਂ ਗਤੋ.

੧੨੦੨. ਅਥੇਤ੍ਥ ਬੀਜਕੋ ਨਾਮ, ਦਾਸੋ ਆਸਿ ਪਟਚ੍ਚਰੀ [ਪਲ਼ਚ੍ਚਰੀ (ਸੀ. ਪੀ.), ਪਟਜ੍ਜਰੀ (ਕ.)];

ਉਪੋਸਥਂ ਉਪਵਸਨ੍ਤੋ, ਗੁਣਸਨ੍ਤਿਕੁਪਾਗਮਿ.

੧੨੦੩. ਕਸ੍ਸਪਸ੍ਸ ਵਚੋ ਸੁਤ੍ਵਾ, ਅਲਾਤਸ੍ਸ ਚ ਭਾਸਿਤਂ;

ਪਸ੍ਸਸਨ੍ਤੋ ਮੁਹੁਂ ਉਣ੍ਹਂ, ਰੁਦਂ ਅਸ੍ਸੂਨਿ ਵਤ੍ਤਯਿ.

੧੨੦੪. ਤਮਨੁਪੁਚ੍ਛਿ ਵੇਦੇਹੋ, ‘‘ਕਿਮਤ੍ਥਂ ਸਮ੍ਮ ਰੋਦਸਿ;

ਕਿਂ ਤੇ ਸੁਤਂ ਵਾ ਦਿਟ੍ਠਂ ਵਾ, ਕਿਂ ਮਂ ਵੇਦੇਸਿ ਵੇਦਨਂ’’.

੧੨੦੫. ਵੇਦੇਹਸ੍ਸ ਵਚੋ ਸੁਤ੍ਵਾ, ਬੀਜਕੋ ਏਤਦਬ੍ਰਵਿ;

‘‘ਨਤ੍ਥਿ ਮੇ ਵੇਦਨਾ ਦੁਕ੍ਖਾ, ਮਹਾਰਾਜ ਸੁਣੋਹਿ ਮੇ.

੧੨੦੬. ‘‘ਅਹਮ੍ਪਿ ਪੁਰਿਮਂ ਜਾਤਿਂ, ਸਰਾਮਿ ਸੁਖਮਤ੍ਤਨੋ;

ਸਾਕੇਤਾਹਂ ਪੁਰੇ ਆਸਿਂ, ਭਾਵਸੇਟ੍ਠਿ ਗੁਣੇ ਰਤੋ.

੧੨੦੭. ‘‘ਸਮ੍ਮਤੋ ਬ੍ਰਾਹ੍ਮਣਿਬ੍ਭਾਨਂ, ਸਂਵਿਭਾਗਰਤੋ ਸੁਚਿ;

ਨ ਚਾਪਿ ਪਾਪਕਂ ਕਮ੍ਮਂ, ਸਰਾਮਿ ਕਤਮਤ੍ਤਨੋ.

੧੨੦੮. ‘‘ਤਤੋ ਚੁਤਾਹਂ ਵੇਦੇਹ, ਇਧ ਜਾਤੋ ਦੁਰਿਤ੍ਥਿਯਾ;

ਗਬ੍ਭਮ੍ਹਿ ਕੁਮ੍ਭਦਾਸਿਯਾ, ਯਤੋ ਜਾਤੋ ਸੁਦੁਗ੍ਗਤੋ.

੧੨੦੯. ‘‘ਏਵਮ੍ਪਿ ਦੁਗ੍ਗਤੋ ਸਨ੍ਤੋ, ਸਮਚਰਿਯਂ ਅਧਿਟ੍ਠਿਤੋ;

ਉਪਡ੍ਢਭਾਗਂ ਭਤ੍ਤਸ੍ਸ, ਦਦਾਮਿ ਯੋ ਮੇ ਇਚ੍ਛਤਿ.

੧੨੧੦. ‘‘ਚਾਤੁਦ੍ਦਸਿਂ ਪਞ੍ਚਦਸਿਂ, ਸਦਾ ਉਪਵਸਾਮਹਂ;

ਨ ਚਾਪਿ [ਨ ਅਹਂ (ਕ.)] ਭੂਤੇ ਹਿਂਸਾਮਿ, ਥੇਯ੍ਯਞ੍ਚਾਪਿ ਵਿਵਜ੍ਜਯਿਂ.

੧੨੧੧. ‘‘ਸਬ੍ਬਮੇਵ ਹਿ ਨੂਨੇਤਂ, ਸੁਚਿਣ੍ਣਂ ਭਵਤਿ ਨਿਪ੍ਫਲਂ;

ਨਿਰਤ੍ਥਂ ਮਞ੍ਞਿਦਂ ਸੀਲਂ, ਅਲਾਤੋ ਭਾਸਤੀ ਯਥਾ.

੧੨੧੨. ‘‘ਕਲਿਮੇਵ ਨੂਨ ਗਣ੍ਹਾਮਿ, ਅਸਿਪ੍ਪੋ ਧੁਤ੍ਤਕੋ ਯਥਾ;

ਕਟਂ ਅਲਾਤੋ ਗਣ੍ਹਾਤਿ, ਕਿਤਵੋਸਿਕ੍ਖਿਤੋ ਯਥਾ.

੧੨੧੩. ‘‘ਦ੍ਵਾਰਂ ਨਪ੍ਪਟਿਪਸ੍ਸਾਮਿ, ਯੇਨ ਗਚ੍ਛਾਮਿ ਸੁਗ੍ਗਤਿਂ;

ਤਸ੍ਮਾ ਰਾਜ ਪਰੋਦਾਮਿ, ਸੁਤ੍ਵਾ ਕਸ੍ਸਪਭਾਸਿਤਂ’’.

੧੨੧੪. ਬੀਜਕਸ੍ਸ ਵਚੋ ਸੁਤ੍ਵਾ, ਰਾਜਾ ਅਙ੍ਗਤਿ ਮਬ੍ਰਵਿ;

‘‘ਨਤ੍ਥਿ ਦ੍ਵਾਰਂ ਸੁਗਤਿਯਾ, ਨਿਯਤਿਂ [ਨਿਯਤਂ (ਸ੍ਯਾ.)] ਕਙ੍ਖ ਬੀਜਕ.

੧੨੧੫. ‘‘ਸੁਖਂ ਵਾ ਯਦਿ ਵਾ ਦੁਕ੍ਖਂ, ਨਿਯਤਿਯਾ ਕਿਰ ਲਬ੍ਭਤਿ;

ਸਂਸਾਰਸੁਦ੍ਧਿ ਸਬ੍ਬੇਸਂ, ਮਾ ਤੁਰਿਤ੍ਥੋ [ਤੁਰਿਤੋ (ਸ੍ਯਾ.)] ਅਨਾਗਤੇ.

੧੨੧੬. ‘‘ਅਹਮ੍ਪਿ ਪੁਬ੍ਬੇ ਕਲ੍ਯਾਣੋ, ਬ੍ਰਾਹ੍ਮਣਿਬ੍ਭੇਸੁ ਬ੍ਯਾਵਟੋ [ਵਾਵਟੋ (ਕ.)];

ਵੋਹਾਰਮਨੁਸਾਸਨ੍ਤੋ, ਰਤਿਹੀਨੋ ਤਦਨ੍ਤਰਾ’’.

੧੨੧੭. ‘‘ਪੁਨਪਿ ਭਨ੍ਤੇ ਦਕ੍ਖੇਮੁ, ਸਙ੍ਗਤਿ ਚੇ ਭਵਿਸ੍ਸਤਿ’’;

ਇਦਂ ਵਤ੍ਵਾਨ ਵੇਦੇਹੋ, ਪਚ੍ਚਗਾ ਸਨਿਵੇਸਨਂ.

੧੨੧੮. ਤਤੋ ਰਤ੍ਯਾ ਵਿਵਸਾਨੇ, ਉਪਟ੍ਠਾਨਮ੍ਹਿ ਅਙ੍ਗਤਿ;

ਅਮਚ੍ਚੇ ਸਨ੍ਨਿਪਾਤੇਤ੍ਵਾ, ਇਦਂ ਵਚਨਮਬ੍ਰਵਿ.

੧੨੧੯. ‘‘ਚਨ੍ਦਕੇ ਮੇ ਵਿਮਾਨਸ੍ਮਿਂ, ਸਦਾ ਕਾਮੇ ਵਿਧੇਨ੍ਤੁ ਮੇ;

ਮਾ ਉਪਗਚ੍ਛੁਂ ਅਤ੍ਥੇਸੁ, ਗੁਯ੍ਹਪ੍ਪਕਾਸਿਯੇਸੁ ਚ.

੧੨੨੦. ‘‘ਵਿਜਯੋ ਚ ਸੁਨਾਮੋ ਚ, ਸੇਨਾਪਤਿ ਅਲਾਤਕੋ;

ਏਤੇ ਅਤ੍ਥੇ ਨਿਸੀਦਨ੍ਤੁ, ਵੋਹਾਰਕੁਸਲਾ ਤਯੋ’’.

੧੨੨੧. ਇਦਂ ਵਤ੍ਵਾਨ ਵੇਦੇਹੋ, ਕਾਮੇਵ ਬਹੁਮਞ੍ਞਥ;

ਨ ਚਾਪਿ ਬ੍ਰਾਹ੍ਮਣਿਬ੍ਭੇਸੁ, ਅਤ੍ਥੇ ਕਿਸ੍ਮਿਞ੍ਚਿ ਬ੍ਯਾਵਟੋ.

੧੨੨੨. ਤਤੋ ਦ੍ਵੇਸਤ੍ਤਰਤ੍ਤਸ੍ਸ, ਵੇਦੇਹਸ੍ਸਤ੍ਰਜਾ ਪਿਯਾ;

ਰਾਜਕਞ੍ਞਾ ਰੁਚਾ [ਰੁਜਾ (ਸੀ. ਪੀ.) ਏਵਮੁਪਰਿਪਿ] ਨਾਮ, ਧਾਤਿਮਾਤਰਮਬ੍ਰਵਿ.

੧੨੨੩. ‘ਅਲਙ੍ਕਰੋਥ ਮਂ ਖਿਪ੍ਪਂ, ਸਖਿਯੋ ਚਾਲਙ੍ਕਰੋਨ੍ਤੁ [ਚ ਕਰੋਨ੍ਤੁ (ਸੀ. ਪੀ.)] ਮੇ;

ਸੁਵੇ ਪਨ੍ਨਰਸੋ ਦਿਬ੍ਯੋ, ਗਚ੍ਛਂ ਇਸ੍ਸਰਸਨ੍ਤਿਕੇ’ [ਪਿਤੁਸ੍ਸ ਸਨ੍ਤਿਕੇ (ਸ੍ਯਾ.)].

੧੨੨੪. ਤਸ੍ਸਾ ਮਾਲ੍ਯਂ ਅਭਿਹਰਿਂਸੁ, ਚਨ੍ਦਨਞ੍ਚ ਮਹਾਰਹਂ;

ਮਣਿਸਙ੍ਖਮੁਤ੍ਤਾਰਤਨਂ, ਨਾਨਾਰਤ੍ਤੇ ਚ ਅਮ੍ਬਰੇ.