੫੪੪. ਚਨ੍ਦਕੁਮਾਰਜਾਤਕਂ (੭)

੯੮੨. ‘‘ਰਾਜਾਸਿ ਲੁਦ੍ਦਕਮ੍ਮੋ, ਏਕਰਾਜਾ ਪੁਪ੍ਫਵਤੀਯਾ;

ਸੋ ਪੁਚ੍ਛਿ ਬ੍ਰਹ੍ਮਬਨ੍ਧੁਂ, ਖਣ੍ਡਹਾਲਂ ਪੁਰੋਹਿਤਂ ਮੂਲ਼੍ਹਂ.

੯੮੩. ‘ਸਗ੍ਗਾਨ ਮਗ੍ਗਮਾਚਿਕ੍ਖ [ਸਗ੍ਗਮਗ੍ਗਮਾਚਿਕ੍ਖ (ਸੀ. ਪੀ.)], ਤ੍ਵਂਸਿ ਬ੍ਰਾਹ੍ਮਣ ਧਮ੍ਮਵਿਨਯਕੁਸਲੋ;

ਯਥਾ ਇਤੋ ਵਜਨ੍ਤਿ ਸੁਗਤਿਂ, ਨਰਾ ਪੁਞ੍ਞਾਨਿ ਕਤ੍ਵਾਨ’.

੯੮੪. ‘ਅਤਿਦਾਨਂ ਦਦਿਤ੍ਵਾਨ, ਅਵਜ੍ਝੇ ਦੇਵ ਘਾਤੇਤ੍ਵਾ;

ਏਵਂ ਵਜਨ੍ਤਿ ਸੁਗਤਿਂ, ਨਰਾ ਪੁਞ੍ਞਾਨਿ ਕਤ੍ਵਾਨ’.

੯੮੫. ‘ਕਿਂ ਪਨ ਤਂ ਅਤਿਦਾਨਂ, ਕੇ ਚ ਅਵਜ੍ਝਾ ਇਮਸ੍ਮਿ ਲੋਕਸ੍ਮਿਂ;

ਏਤਞ੍ਚ ਖੋ ਨੋ ਅਕ੍ਖਾਹਿ, ਯਜਿਸ੍ਸਾਮਿ ਦਦਾਮਿ [ਯਜਿਸ੍ਸਾਮ ਦਦਾਮ (ਸੀ. ਪੀ.)] ਦਾਨਾਨਿ’.

੯੮੬. ‘ਪੁਤ੍ਤੇਹਿ ਦੇਵ ਯਜਿਤਬ੍ਬਂ, ਮਹੇਸੀਹਿ ਨੇਗਮੇਹਿ ਚ;

ਉਸਭੇਹਿ ਆਜਾਨਿਯੇਹਿ ਚਤੂਹਿ, ਸਬ੍ਬਚਤੁਕ੍ਕੇਨ ਦੇਵ ਯਜਿਤਬ੍ਬਂ’’’.

੯੮੭. ‘‘ਤਂ ਸੁਤ੍ਵਾ ਅਨ੍ਤੇਪੁਰੇ, ਕੁਮਾਰਾ ਮਹੇਸਿਯੋ ਚ ਹਞ੍ਞਨ੍ਤੁ;

ਏਕੋ ਅਹੋਸਿ ਨਿਗ੍ਘੋਸੋ, ਭਿਸ੍ਮਾ ਅਚ੍ਚੁਗ੍ਗਤੋ ਸਦ੍ਦੋ’’.

੯੮੮. ‘‘ਗਚ੍ਛਥ ਵਦੇਥ ਕੁਮਾਰੇ, ਚਨ੍ਦਂ ਸੂਰਿਯਞ੍ਚ ਭਦ੍ਦਸੇਨਞ੍ਚ;

ਸੂਰਞ੍ਚ ਵਾਮਗੋਤ੍ਤਞ੍ਚ, ਪਚੁਰਾ [ਪਸੁਰਾ (ਸੀ. ਪੀ. ਕ.)] ਕਿਰ ਹੋਥ ਯਞ੍ਞਤ੍ਥਾਯ.

੯੮੯. ‘‘ਕੁਮਾਰਿਯੋਪਿ ਵਦੇਥ, ਉਪਸੇਨਂ [ਉਪਸੇਨਿਂ (ਸੀ.), ਉਪਸੇਣਿਂ (ਪੀ.)] ਕੋਕਿਲਞ੍ਚ ਮੁਦਿਤਞ੍ਚ;

ਨਨ੍ਦਞ੍ਚਾਪਿ ਕੁਮਾਰਿਂ, ਪਚੁਰਾ [ਪਸੁਰਾ (ਸੀ. ਪੀ. ਕ.)] ਕਿਰ ਹੋਥ ਯਞ੍ਞਤ੍ਥਾਯ.

੯੯੦. ‘‘ਵਿਜਯਮ੍ਪਿ ਮਯ੍ਹਂ ਮਹੇਸਿਂ, ਏਰਾਵਤਿਂ [ਏਕਪਤਿਂ (ਪੀ.), ਏਰਾਪਤਿਂ (ਕ.)] ਕੇਸਿਨਿਂ ਸੁਨਨ੍ਦਞ੍ਚ;

ਲਕ੍ਖਣਵਰੂਪਪਨ੍ਨਾ, ਪਚੁਰਾ ਕਿਰ ਹੋਥ ਯਞ੍ਞਤ੍ਥਾਯ.

੯੯੧. ‘‘ਗਹਪਤਯੋ ਚ ਵਦੇਥ, ਪੁਣ੍ਣਮੁਖਂ ਭਦ੍ਦਿਯਂ ਸਿਙ੍ਗਾਲਞ੍ਚ;

ਵਡ੍ਢਞ੍ਚਾਪਿ ਗਹਪਤਿਂ, ਪਚੁਰਾ ਕਿਰ ਹੋਥ ਯਞ੍ਞਤ੍ਥਾਯ’’.

੯੯੨. ‘‘ਤੇ ਤਤ੍ਥ ਗਹਪਤਯੋ, ਅਵੋਚਿਸੁਂ ਸਮਾਗਤਾ ਪੁਤ੍ਤਦਾਰਪਰਿਕਿਣ੍ਣਾ;

ਸਬ੍ਬੇਵ ਸਿਖਿਨੋ ਦੇਵ ਕਰੋਹਿ, ਅਥ ਵਾ ਨੋ ਦਾਸੇ ਸਾਵੇਹਿ’’.

੯੯੩. ‘‘ਅਭਯਂਕਰਮ੍ਪਿ ਮੇ ਹਤ੍ਥਿਂ, ਨਾਲ਼ਾਗਿਰਿਂ ਅਚ੍ਚੁਗ੍ਗਤਂ ਵਰੁਣਦਨ੍ਤਂ [ਨਾਲ਼ਾਗਿਰਿਂ ਅਚ੍ਚੁਤਂ ਵਰੁਣਦਨ੍ਤਂ (ਸੀ.), ਰਾਜਗਿਰਿਂ ਅਚ੍ਚੁਤਵਰੁਣਦਨ੍ਤਂ (ਪੀ.)];

ਆਨੇਥ ਖੋ ਨੇ ਖਿਪ੍ਪਂ, ਯਞ੍ਞਤ੍ਥਾਯ ਭਵਿਸ੍ਸਨ੍ਤਿ.

੯੯੪. ‘‘ਅਸ੍ਸਰਤਨਮ੍ਪਿ [ਅਸ੍ਸਤਰਮ੍ਪਿ (ਸੀ. ਪੀ.), ਅਸ੍ਸਰਤਨਮ੍ਪਿ ਮੇ (ਸ੍ਯਾ.)] ਕੇਸਿਂ, ਸੁਰਾਮੁਖਂ ਪੁਣ੍ਣਕਂ ਵਿਨਤਕਞ੍ਚ;

ਆਨੇਥ ਖੋ ਨੇ ਖਿਪ੍ਪਂ, ਯਞ੍ਞਤ੍ਥਾਯ ਭਵਿਸ੍ਸਨ੍ਤਿ.

੯੯੫. ‘‘ਉਸਭਮ੍ਪਿ [ਉਸਭਮ੍ਪਿ ਮੇ (ਸ੍ਯਾ.)] ਯੂਥਪਤਿਂ ਅਨੋਜਂ, ਨਿਸਭਂ ਗਵਮ੍ਪਤਿਂ ਤੇਪਿ ਮਯ੍ਹਂ ਆਨੇਥ;

ਸਮੂਹ [ਸਮੁਪਾ (ਸੀ. ਪੀ.), ਸਮ੍ਮੁਖਾ (ਸ੍ਯਾ.)] ਕਰੋਨ੍ਤੁ ਸਬ੍ਬਂ, ਯਜਿਸ੍ਸਾਮਿ ਦਦਾਮਿ ਦਾਨਾਨਿ.

੯੯੬. ‘‘ਸਬ੍ਬਂ [ਸਬ੍ਬਮ੍ਪਿ (ਸ੍ਯਾ.)] ਪਟਿਯਾਦੇਥ, ਯਞ੍ਞਂ ਪਨ ਉਗ੍ਗਤਮ੍ਹਿ ਸੂਰਿਯਮ੍ਹਿ;

ਆਣਾਪੇਥ ਚ ਕੁਮਾਰੇ [ਆਣਾਪੇਥ ਚਨ੍ਦਕੁਮਾਰੇ (ਸ੍ਯਾ. ਕ.)], ਅਭਿਰਮਨ੍ਤੁ ਇਮਂ ਰਤ੍ਤਿਂ.

੯੯੭. ‘‘ਸਬ੍ਬਂ [ਸਬ੍ਬਮ੍ਪਿ (ਸ੍ਯਾ.)] ਉਪਟ੍ਠਪੇਥ, ਯਞ੍ਞਂ ਪਨ ਉਗ੍ਗਤਮ੍ਹਿ ਸੂਰਿਯਮ੍ਹਿ;

ਵਦੇਥ ਦਾਨਿ ਕੁਮਾਰੇ, ਅਜ੍ਜ ਖੋ [ਵੋ (ਪੀ.)] ਪਚ੍ਛਿਮਾ ਰਤ੍ਤਿ’’.

੯੯੮. ‘‘ਤਂਤਂ ਮਾਤਾ ਅਵਚ, ਰੋਦਨ੍ਤੀ ਆਗਨ੍ਤ੍ਵਾ ਵਿਮਾਨਤੋ;

ਯਞ੍ਞੋ ਕਿਰ ਤੇ ਪੁਤ੍ਤ, ਭਵਿਸ੍ਸਤਿ ਚਤੂਹਿ ਪੁਤ੍ਤੇਹਿ’’.

੯੯੯. ‘‘ਸਬ੍ਬੇਪਿ ਮਯ੍ਹਂ ਪੁਤ੍ਤਾ ਚਤ੍ਤਾ, ਚਨ੍ਦਸ੍ਮਿਂ ਹਞ੍ਞਮਾਨਸ੍ਮਿਂ;

ਪੁਤ੍ਤੇਹਿ ਯਞ੍ਞਂ ਯਜਿਤ੍ਵਾਨ, ਸੁਗਤਿਂ ਸਗ੍ਗਂ ਗਮਿਸ੍ਸਾਮਿ’’.

੧੦੦੦. ‘‘ਮਾ ਤਂ [ਮਾ (ਸੀ. ਪੀ.)] ਪੁਤ੍ਤ ਸਦ੍ਦਹੇਸਿ, ਸੁਗਤਿ ਕਿਰ ਹੋਤਿ ਪੁਤ੍ਤਯਞ੍ਞੇਨ;

ਨਿਰਯਾਨੇਸੋ ਮਗ੍ਗੋ, ਨੇਸੋ ਮਗ੍ਗੋ ਹਿ ਸਗ੍ਗਾਨਂ.

੧੦੦੧. ‘‘ਦਾਨਾਨਿ ਦੇਹਿ ਕੋਣ੍ਡਞ੍ਞ, ਅਹਿਂਸਾ ਸਬ੍ਬਭੂਤਭਬ੍ਯਾਨਂ’’;

ਏਸ ਮਗ੍ਗੋ ਸੁਗਤਿਯਾ, ਨ ਚ ਮਗ੍ਗੋ ਪੁਤ੍ਤਯਞ੍ਞੇਨ’’.

੧੦੦੨. ‘‘ਆਚਰਿਯਾਨਂ ਵਚਨਾ, ਘਾਤੇਸ੍ਸਂ ਚਨ੍ਦਞ੍ਚ ਸੂਰਿਯਞ੍ਚ;

ਪੁਤ੍ਤੇਹਿ ਯਞ੍ਞਂ [ਪੁਤ੍ਤੇਹਿ (ਸੀ. ਸ੍ਯਾ. ਪੀ.)] ਯਜਿਤ੍ਵਾਨ ਦੁਚ੍ਚਜੇਹਿ, ਸੁਗਤਿਂ ਸਗ੍ਗਂ ਗਮਿਸ੍ਸਾਮਿ’’.

੧੦੦੩. ‘‘ਤਂਤਂ ਪਿਤਾਪਿ ਅਵਚ, ਵਸਵਤ੍ਤੀ ਓਰਸਂ ਸਕਂ ਪੁਤ੍ਤਂ;

ਯਞ੍ਞੋ ਕਿਰ ਤੇ ਪੁਤ੍ਤ, ਭਵਿਸ੍ਸਤਿ ਚਤੂਹਿ ਪੁਤ੍ਤੇਹਿ’’.

੧੦੦੪. ‘‘ਸਬ੍ਬੇਪਿ ਮਯ੍ਹਂ ਪੁਤ੍ਤਾ ਚਤ੍ਤਾ, ਚਨ੍ਦਸ੍ਮਿਂ ਹਞ੍ਞਮਾਨਸ੍ਮਿਂ;

ਪੁਤ੍ਤੇਹਿ ਯਞ੍ਞਂ ਯਜਿਤ੍ਵਾਨ, ਸੁਗਤਿਂ ਸਗ੍ਗਂ ਗਮਿਸ੍ਸਾਮਿ’’.

੧੦੦੫. ‘‘ਮਾ ਤਂ ਪੁਤ੍ਤ ਸਦ੍ਦਹੇਸਿ, ਸੁਗਤਿ ਕਿਰ ਹੋਤਿ ਪੁਤ੍ਤਯਞ੍ਞੇਨ;

ਨਿਰਯਾਨੇਸੋ ਮਗ੍ਗੋ, ਨੇਸੋ ਮਗ੍ਗੋ ਹਿ ਸਗ੍ਗਾਨਂ.

੧੦੦੬. ‘‘ਦਾਨਾਨਿ ਦੇਹਿ ਕੋਣ੍ਡਞ੍ਞ, ਅਹਿਂਸਾ ਸਬ੍ਬਭੂਤਭਬ੍ਯਾਨਂ;

ਏਸ ਮਗ੍ਗੋ ਸੁਗਤਿਯਾ, ਨ ਚ ਮਗ੍ਗੋ ਪੁਤ੍ਤਯਞ੍ਞੇਨ’’.

੧੦੦੭. ‘‘ਆਚਰਿਯਾਨਂ ਵਚਨਾ, ਘਾਤੇਸ੍ਸਂ ਚਨ੍ਦਞ੍ਚ ਸੂਰਿਯਞ੍ਚ;

ਪੁਤ੍ਤੇਹਿ ਯਞ੍ਞਂ ਯਜਿਤ੍ਵਾਨ ਦੁਚ੍ਚਜੇਹਿ, ਸੁਗਤਿਂ ਸਗ੍ਗਂ ਗਮਿਸ੍ਸਾਮਿ’’.

੧੦੦੮. ‘‘ਦਾਨਾਨਿ ਦੇਹਿ ਕੋਣ੍ਡਞ੍ਞ, ਅਹਿਂਸਾ ਸਬ੍ਬਭੂਤਭਬ੍ਯਾਨਂ;

ਪੁਤ੍ਤਪਰਿਵੁਤੋ ਤੁਵਂ, ਰਟ੍ਠਂ ਜਨਪਦਞ੍ਚ ਪਾਲੇਹਿ’’.

੧੦੦੯. ‘‘ਮਾ ਨੋ ਦੇਵ ਅਵਧਿ, ਦਾਸੇ ਨੋ ਦੇਹਿ ਖਣ੍ਡਹਾਲਸ੍ਸ;

ਅਪਿ ਨਿਗਲ਼ਬਨ੍ਧਕਾਪਿ, ਹਤ੍ਥੀ ਅਸ੍ਸੇ ਚ ਪਾਲੇਮ.

੧੦੧੦. ‘‘ਮਾ ਨੋ ਦੇਵ ਅਵਧਿ, ਦਾਸੇ ਨੋ ਦੇਹਿ ਖਣ੍ਡਹਾਲਸ੍ਸ;

ਅਪਿ ਨਿਗਲ਼ਬਨ੍ਧਕਾਪਿ, ਹਤ੍ਥਿਛਕਣਾਨਿ ਉਜ੍ਝੇਮ.

੧੦੧੧. ‘‘ਮਾ ਨੋ ਦੇਵ ਅਵਧਿ, ਦਾਸੇ ਨੋ ਦੇਹਿ ਖਣ੍ਡਹਾਲਸ੍ਸ;

ਅਪਿ ਨਿਗਲ਼ਬਨ੍ਧਕਾਪਿ, ਅਸ੍ਸਛਕਣਾਨਿ ਉਜ੍ਝੇਮ.

੧੦੧੨. ‘‘ਮਾ ਨੋ ਦੇਵ ਅਵਧਿ, ਦਾਸੇ ਨੋ ਦੇਹਿ ਖਣ੍ਡਹਾਲਸ੍ਸ [ਇਦਂ ਪਦਂ ਸੀ. ਪੀ. ਪੋਤ੍ਥਕੇਸੁ ਨਤ੍ਥਿ];

ਯਸ੍ਸ ਹੋਨ੍ਤਿ ਤਵ ਕਾਮਾ, ਅਪਿ ਰਟ੍ਠਾ ਪਬ੍ਬਾਜਿਤਾ;

ਭਿਕ੍ਖਾਚਰਿਯਂ ਚਰਿਸ੍ਸਾਮ’’.

੧੦੧੩. ‘‘ਦੁਕ੍ਖਂ ਖੋ ਮੇ ਜਨਯਥ, ਵਿਲਪਨ੍ਤਾ ਜੀਵਿਤਸ੍ਸ ਕਾਮਾ ਹਿ;

ਮੁਞ੍ਚੇਥ [ਮੁਞ੍ਚਥ (ਸੀ. ਪੀ.)] ਦਾਨਿ ਕੁਮਾਰੇ, ਅਲਮ੍ਪਿ ਮੇ ਹੋਤੁ ਪੁਤ੍ਤਯਞ੍ਞੇਨ’’.

੧੦੧੪. ‘‘ਪੁਬ੍ਬੇਵ ਖੋਸਿ ਮੇ ਵੁਤ੍ਤੋ, ਦੁਕ੍ਕਰਂ ਦੁਰਭਿਸਮ੍ਭਵਞ੍ਚੇਤਂ;

ਅਥ ਨੋ ਉਪਕ੍ਖਟਸ੍ਸ ਯਞ੍ਞਸ੍ਸ, ਕਸ੍ਮਾ ਕਰੋਸਿ ਵਿਕ੍ਖੇਪਂ.

੧੦੧੫. ‘‘ਸਬ੍ਬੇ ਵਜਨ੍ਤਿ ਸੁਗਤਿਂ, ਯੇ ਯਜਨ੍ਤਿ ਯੇਪਿ ਯਾਜੇਨ੍ਤਿ;

ਯੇ ਚਾਪਿ ਅਨੁਮੋਦਨ੍ਤਿ, ਯਜਨ੍ਤਾਨਂ ਏਦਿਸਂ ਮਹਾਯਞ੍ਞਂ’’.

੧੦੧੬. ‘‘ਅਥ ਕਿਸ੍ਸ ਜਨੋ [ਚ ਨੋ (ਸੀ. ਸ੍ਯਾ. ਪੀ.)] ਪੁਬ੍ਬੇ, ਸੋਤ੍ਥਾਨਂ ਬ੍ਰਾਹ੍ਮਣੇ ਅਵਾਚੇਸਿ;

ਅਥ ਨੋ ਅਕਾਰਣਸ੍ਮਾ, ਯਞ੍ਞਤ੍ਥਾਯ ਦੇਵ ਘਾਤੇਸਿ.

੧੦੧੭. ‘‘ਪੁਬ੍ਬੇਵ ਨੋ ਦਹਰਕਾਲੇ [ਦਹਰਕੇ ਸਮਾਨੇ (ਸੀ. ਪੀ.)], ਨ ਹਨੇਸਿ [ਨ ਮਾਰੇਸਿ (ਸੀ. ਪੀ.)] ਨ ਘਾਤੇਸਿ;

ਦਹਰਮ੍ਹਾ ਯੋਬ੍ਬਨਂ ਪਤ੍ਤਾ, ਅਦੂਸਕਾ ਤਾਤ ਹਞ੍ਞਾਮ.

੧੦੧੮. ‘‘ਹਤ੍ਥਿਗਤੇ ਅਸ੍ਸਗਤੇ, ਸਨ੍ਨਦ੍ਧੇ ਪਸ੍ਸ ਨੋ ਮਹਾਰਾਜ;

ਯੁਦ੍ਧੇ ਵਾ ਯੁਜ੍ਝਮਾਨੇ ਵਾ, ਨ ਹਿ ਮਾਦਿਸਾ ਸੂਰਾ ਹੋਨ੍ਤਿ ਯਞ੍ਞਤ੍ਥਾਯ.

੧੦੧੯. ‘‘ਪਚ੍ਚਨ੍ਤੇ ਵਾਪਿ ਕੁਪਿਤੇ, ਅਟਵੀਸੁ ਵਾ ਮਾਦਿਸੇ ਨਿਯੋਜੇਨ੍ਤਿ;

ਅਥ ਨੋ ਅਕਾਰਣਸ੍ਮਾ, ਅਭੂਮਿਯਂ ਤਾਤ ਹਞ੍ਞਾਮ.

੧੦੨੦. ‘‘ਯਾਪਿ ਹਿ ਤਾ ਸਕੁਣਿਯੋ, ਵਸਨ੍ਤਿ ਤਿਣਘਰਾਨਿ ਕਤ੍ਵਾਨ;

ਤਾਸਮ੍ਪਿ ਪਿਯਾ ਪੁਤ੍ਤਾ, ਅਥ ਨੋ ਤ੍ਵਂ ਦੇਵ ਘਾਤੇਸਿ.

੧੦੨੧. ‘‘ਮਾ ਤਸ੍ਸ ਸਦ੍ਦਹੇਸਿ, ਨ ਮਂ ਖਣ੍ਡਹਾਲੋ ਘਾਤੇਯ੍ਯ;

ਮਮਞ੍ਹਿ ਸੋ ਘਾਤੇਤ੍ਵਾਨ, ਅਨਨ੍ਤਰਾ ਤਮ੍ਪਿ ਦੇਵ ਘਾਤੇਯ੍ਯ.

੧੦੨੨. ‘‘ਗਾਮਵਰਂ ਨਿਗਮਵਰਂ ਦਦਨ੍ਤਿ, ਭੋਗਮ੍ਪਿਸ੍ਸ ਮਹਾਰਾਜ;

ਅਥਗ੍ਗਪਿਣ੍ਡਿਕਾਪਿ, ਕੁਲੇ ਕੁਲੇ ਹੇਤੇ ਭੁਞ੍ਜਨ੍ਤਿ.

੧੦੨੩. ‘‘ਤੇਸਮ੍ਪਿ ਤਾਦਿਸਾਨਂ, ਇਚ੍ਛਨ੍ਤਿ ਦੁਬ੍ਭਿਤੁਂ ਮਹਾਰਾਜ;

ਯੇਭੁਯ੍ਯੇਨ ਏਤੇ, ਅਕਤਞ੍ਞੁਨੋ ਬ੍ਰਾਹ੍ਮਣਾ ਦੇਵ.

੧੦੨੪. ‘‘ਮਾ ਨੋ ਦੇਵ ਅਵਧਿ, ਦਾਸੇ ਨੋ ਦੇਹਿ ਖਣ੍ਡਹਾਲਸ੍ਸ;

ਅਪਿ ਨਿਗਲ਼ਬਨ੍ਧਕਾਪਿ, ਹਤ੍ਥੀ ਅਸ੍ਸੇ ਚ ਪਾਲੇਮ.

੧੦੨੫. ‘‘ਮਾ ਨੋ ਦੇਵ ਅਵਧਿ, ਦਾਸੇ ਨੋ ਦੇਹਿ ਖਣ੍ਡਹਾਲਸ੍ਸ;

ਅਪਿ ਨਿਗਲ਼ਬਨ੍ਧਕਾਪਿ, ਹਤ੍ਥਿਛਕਣਾਨਿ ਉਜ੍ਝੇਮ.

੧੦੨੬. ‘‘ਮਾ ਨੋ ਦੇਵ ਅਵਧਿ, ਦਾਸੇ ਨੋ ਦੇਹਿ ਖਣ੍ਡਹਾਲਸ੍ਸ;

ਅਪਿ ਨਿਗਲ਼ਬਨ੍ਧਕਾਪਿ, ਅਸ੍ਸਛਕਣਾਨਿ ਉਜ੍ਝੇਮ.

੧੦੨੭. ‘‘ਮਾ ਨੋ ਦੇਵ ਅਵਧਿ, ਦਾਸੇ ਨੋ ਦੇਹਿ ਖਣ੍ਡਹਾਲਸ੍ਸ;

ਯਸ੍ਸ ਹੋਨ੍ਤਿ ਤਵ ਕਾਮਾ, ਅਪਿ ਰਟ੍ਠਾ ਪਬ੍ਬਾਜਿਤਾ;

ਭਿਕ੍ਖਾਚਰਿਯਂ ਚਰਿਸ੍ਸਾਮ’’.

੧੦੨੮. ‘‘ਦੁਕ੍ਖਂ ਖੋ ਮੇ ਜਨਯਥ, ਵਿਲਪਨ੍ਤਾ ਜੀਵਿਤਸ੍ਸ ਕਾਮਾ ਹਿ;

ਮੁਞ੍ਚੇਥ ਦਾਨਿ ਕੁਮਾਰੇ, ਅਲਮ੍ਪਿ ਮੇ ਹੋਤੁ ਪੁਤ੍ਤਯਞ੍ਞੇਨ’’.

੧੦੨੯. ‘‘ਪੁਬ੍ਬੇਵ ਖੋਸਿ ਮੇ ਵੁਤ੍ਤੋ, ਦੁਕ੍ਕਰਂ ਦੁਰਭਿਸਮ੍ਭਵਞ੍ਚੇਤਂ;

ਅਥ ਨੋ ਉਪਕ੍ਖਟਸ੍ਸ ਯਞ੍ਞਸ੍ਸ, ਕਸ੍ਮਾ ਕਰੋਸਿ ਵਿਕ੍ਖੇਪਂ.

੧੦੩੦. ‘‘ਸਬ੍ਬੇ ਵਜਨ੍ਤਿ ਸੁਗਤਿਂ, ਯੇ ਯਜਨ੍ਤਿ ਯੇਪਿ ਯਾਜੇਨ੍ਤਿ;

ਯੇ ਚਾਪਿ ਅਨੁਮੋਦਨ੍ਤਿ, ਯਜਨ੍ਤਾਨਂ ਏਦਿਸਂ ਮਹਾਯਞ੍ਞਂ’’.

੧੦੩੧. ‘‘ਯਦਿ ਕਿਰ ਯਜਿਤ੍ਵਾ ਪੁਤ੍ਤੇਹਿ, ਦੇਵਲੋਕਂ ਇਤੋ ਚੁਤਾ ਯਨ੍ਤਿ;

ਬ੍ਰਾਹ੍ਮਣੋ ਤਾਵ ਯਜਤੁ, ਪਚ੍ਛਾਪਿ ਯਜਸਿ ਤੁਵਂ ਰਾਜਾ.

੧੦੩੨. ‘‘ਯਦਿ ਕਿਰ ਯਜਿਤ੍ਵਾ ਪੁਤ੍ਤੇਹਿ, ਦੇਵਲੋਕਂ ਇਤੋ ਚੁਤਾ ਯਨ੍ਤਿ;

ਏਸ੍ਵੇਵ ਖਣ੍ਡਹਾਲੋ, ਯਜਤਂ ਸਕੇਹਿ ਪੁਤ੍ਤੇਹਿ.

੧੦੩੩. ‘‘ਏਵਂ ਜਾਨਨ੍ਤੋ ਖਣ੍ਡਹਾਲੋ, ਕਿਂ ਪੁਤ੍ਤਕੇ ਨ ਘਾਤੇਸਿ;

ਸਬ੍ਬਞ੍ਚ ਞਾਤਿਜਨਂ, ਅਤ੍ਤਾਨਞ੍ਚ ਨ ਘਾਤੇਸਿ.

੧੦੩੪. ‘‘ਸਬ੍ਬੇ ਵਜਨ੍ਤਿ ਨਿਰਯਂ, ਯੇ ਯਜਨ੍ਤਿ ਯੇਪਿ ਯਾਜੇਨ੍ਤਿ;

ਯੇ ਚਾਪਿ ਅਨੁਮੋਦਨ੍ਤਿ, ਯਜਨ੍ਤਾਨਂ ਏਦਿਸਂ ਮਹਾਯਞ੍ਞਂ.

੧੦੩੫. [ਅਯਂ ਗਾਥਾ ਸੀ. ਸ੍ਯਾ. ਪੀ. ਪੋਤ੍ਥਕੇਸੁ ਨ ਦਿਸ੍ਸਤਿ] ‘‘ਸਚੇ ਹਿ ਸੋ ਸੁਜ੍ਝਤਿ ਯੋ ਹਨਾਤਿ, ਹਤੋਪਿ ਸੋ ਸਗ੍ਗਮੁਪੇਤਿ ਠਾਨਂ;

ਭੋਵਾਦਿ ਭੋਵਾਦਿਨ ਮਾਰਯੇਯ੍ਯੁਂ, ਯੇ ਚਾਪਿ ਤੇਸਂ ਅਭਿਸਦ੍ਦਹੇਯ੍ਯੁਂ’’ [ਅਯਂ ਗਾਥਾ ਸੀ. ਸ੍ਯਾ. ਪੀ. ਪੋਤ੍ਥਕੇਸੁ ਨ ਦਿਸ੍ਸਤਿ].

੧੦੩੬. ‘‘ਕਥਞ੍ਚ ਕਿਰ ਪੁਤ੍ਤਕਾਮਾਯੋ, ਗਹਪਤਯੋ ਘਰਣਿਯੋ ਚ;

ਨਗਰਮ੍ਹਿ ਨ ਉਪਰਵਨ੍ਤਿ ਰਾਜਾਨਂ, ਮਾ ਘਾਤਯਿ ਓਰਸਂ ਪੁਤ੍ਤਂ.

੧੦੩੭. ‘‘ਕਥਞ੍ਚ ਕਿਰ ਪੁਤ੍ਤਕਾਮਾਯੋ, ਗਹਪਤਯੋ ਘਰਣਿਯੋ ਚ;

ਨਗਰਮ੍ਹਿ ਨ ਉਪਰਵਨ੍ਤਿ ਰਾਜਾਨਂ, ਮਾ ਘਾਤਯਿ ਅਤ੍ਰਜਂ ਪੁਤ੍ਤਂ.

੧੦੩੮. ‘‘ਰਞ੍ਞੋ ਚਮ੍ਹਿ ਅਤ੍ਥਕਾਮੋ, ਹਿਤੋ ਚ ਸਬ੍ਬਜਨਪਦਸ੍ਸ [ਸਬ੍ਬਦਾ ਜਨਪਦਸ੍ਸ (ਸੀ. ਪੀ.)];

ਨ ਕੋਚਿ ਅਸ੍ਸ ਪਟਿਘਂ, ਮਯਾ ਜਾਨਪਦੋ ਨ ਪਵੇਦੇਤਿ’’.

੧੦੩੯. ‘‘ਗਚ੍ਛਥ ਵੋ ਘਰਣਿਯੋ, ਤਾਤਞ੍ਚ ਵਦੇਥ ਖਣ੍ਡਹਾਲਞ੍ਚ;

ਮਾ ਘਾਤੇਥ ਕੁਮਾਰੇ, ਅਦੂਸਕੇ ਸੀਹਸਙ੍ਕਾਸੇ.

੧੦੪੦. ‘‘ਗਚ੍ਛਥ ਵੋ ਘਰਣਿਯੋ, ਤਾਤਞ੍ਚ ਵਦੇਥ ਖਣ੍ਡਹਾਲਞ੍ਚ;

ਮਾ ਘਾਤੇਥ ਕੁਮਾਰੇ, ਅਪੇਕ੍ਖਿਤੇ ਸਬ੍ਬਲੋਕਸ੍ਸ’’.

੧੦੪੧. ‘‘ਯਂ ਨੂਨਾਹਂ ਜਾਯੇਯ੍ਯਂ, ਰਥਕਾਰਕੁਲੇਸੁ ਵਾ;

ਪੁਕ੍ਕੁਸਕੁਲੇਸੁ ਵਾ ਵੇਸ੍ਸੇਸੁ ਵਾ ਜਾਯੇਯ੍ਯਂ;

ਨ ਹਜ੍ਜ ਮਂ ਰਾਜ ਯਞ੍ਞੇ [ਯਞ੍ਞਤ੍ਥਾਯ (ਸੀ. ਪੀ.)] ਘਾਤੇਯ੍ਯ’’.

੧੦੪੨. ‘‘ਸਬ੍ਬਾ ਸੀਮਨ੍ਤਿਨਿਯੋ ਗਚ੍ਛਥ, ਅਯ੍ਯਸ੍ਸ ਖਣ੍ਡਹਾਲਸ੍ਸ;

ਪਾਦੇਸੁ ਨਿਪਤਥ, ਅਪਰਾਧਾਹਂ ਨ ਪਸ੍ਸਾਮਿ.

੧੦੪੩. ‘‘ਸਬ੍ਬਾ ਸੀਮਨ੍ਤਿਨਿਯੋ ਗਚ੍ਛਥ, ਅਯ੍ਯਸ੍ਸ ਖਣ੍ਡਹਾਲਸ੍ਸ;

ਪਾਦੇਸੁ ਨਿਪਤਥ, ਕਿਨ੍ਤੇ ਭਨ੍ਤੇ ਮਯਂ ਅਦੂਸੇਮ’’.

੧੦੪੪. ‘‘ਕਪਣਾ [ਕਪਣਂ (ਸੀ. ਪੀ.)] ਵਿਲਪਤਿ ਸੇਲਾ, ਦਿਸ੍ਵਾਨ ਭਾਤਰੇ [ਭਾਤਰੋ (ਸੀ. ਸ੍ਯਾ. ਪੀ. ਕ.)] ਉਪਨੀਤਤ੍ਤੇ;

ਯਞ੍ਞੋ ਕਿਰ ਮੇ ਉਕ੍ਖਿਪਿਤੋ, ਤਾਤੇਨ ਸਗ੍ਗਕਾਮੇਨ’’.

੧੦੪੫. ‘‘ਆਵਤ੍ਤਿ ਪਰਿਵਤ੍ਤਿ ਚ, ਵਸੁਲੋ ਸਮ੍ਮੁਖਾ ਰਞ੍ਞੋ;

ਮਾ ਨੋ ਪਿਤਰਂ ਅਵਧਿ, ਦਹਰਮ੍ਹਾ ਯੋਬ੍ਬਨਂ ਪਤ੍ਤਾ’’.

੧੦੪੬. ‘‘ਏਸੋ ਤੇ ਵਸੁਲ ਪਿਤਾ, ਸਮੇਹਿ ਪਿਤਰਾ ਸਹ;

ਦੁਕ੍ਖਂ ਖੋ ਮੇ ਜਨਯਸਿ, ਵਿਲਪਨ੍ਤੋ ਅਨ੍ਤੇਪੁਰਸ੍ਮਿਂ;

ਮੁਞ੍ਚੇਥ ਦਾਨਿ ਕੁਮਾਰੇ, ਅਲਮ੍ਪਿ ਮੇ ਹੋਤੁ ਪੁਤ੍ਤਯਞ੍ਞੇਨ’’.

੧੦੪੭. ‘‘ਪੁਬ੍ਬੇਵ ਖੋਸਿ ਮੇ ਵੁਤ੍ਤੋ, ਦੁਕ੍ਕਰਂ ਦੁਰਭਿਸਮ੍ਭਵਞ੍ਚੇਤਂ;

ਅਥ ਨੋ ਉਪਕ੍ਖਟਸ੍ਸ ਯਞ੍ਞਸ੍ਸ, ਕਸ੍ਮਾ ਕਰੋਸਿ ਵਿਕ੍ਖੇਪਂ.

੧੦੪੮. ‘‘ਸਬ੍ਬੇ ਵਜਨ੍ਤਿ ਸੁਗਤਿਂ, ਯੇ ਯਜਨ੍ਤਿ ਯੇਪਿ ਯਾਜੇਨ੍ਤਿ;

ਯੇ ਚਾਪਿ ਅਨੁਮੋਦਨ੍ਤਿ, ਯਜਨ੍ਤਾਨਂ ਏਦਿਸਂ ਮਹਾਯਞ੍ਞਂ’’.

੧੦੪੯. ‘‘ਸਬ੍ਬਰਤਨਸ੍ਸ ਯਞ੍ਞੋ ਉਪਕ੍ਖਟੋ, ਏਕਰਾਜ ਤਵ ਪਟਿਯਤ੍ਤੋ;

ਅਭਿਨਿਕ੍ਖਮਸ੍ਸੁ ਦੇਵ, ਸਗ੍ਗਂ ਗਤੋ ਤ੍ਵਂ ਪਮੋਦਿਸ੍ਸਸਿ’’.

੧੦੫੦. ‘‘ਦਹਰਾ ਸਤ੍ਤਸਤਾ ਏਤਾ, ਚਨ੍ਦਕੁਮਾਰਸ੍ਸ ਭਰਿਯਾਯੋ;

ਕੇਸੇ ਪਕਿਰਿਤ੍ਵਾਨ [ਪਰਿਕਿਰਿਤ੍ਵਾਨ (ਸੀ. ਪੀ.), ਵਿਕਿਰਿਤ੍ਵਾਨ (ਸ੍ਯਾ. ਕ.)], ਰੋਦਨ੍ਤਿਯੋ ਮਗ੍ਗਮਨੁਯਾਯਿਂਸੁ [ਮਗ੍ਗਮਨੁਯਨ੍ਤਿ (ਸੀ. ਪੀ.), ਮਗ੍ਗਮਨੁਯਾਯਨ੍ਤਿ (ਸ੍ਯਾ.)].

੧੦੫੧. ‘‘ਅਪਰਾ ਪਨ ਸੋਕੇਨ, ਨਿਕ੍ਖਨ੍ਤਾ ਨਨ੍ਦਨੇ ਵਿਯ ਦੇਵਾ;

ਕੇਸੇ ਪਕਿਰਿਤ੍ਵਾਨ [ਪਰਿਕਿਰਿਤ੍ਵਾਨ (ਸੀ. ਪੀ.), ਵਿਕਿਰਿਤ੍ਵਾਨ (ਸ੍ਯਾ. ਕ.)], ਰੋਦਨ੍ਤਿਯੋ ਮਗ੍ਗਮਨੁਯਾਯਿਂਸੁ’’ [ਮਗ੍ਗਮਨੁਯਨ੍ਤਿ (ਸੀ. ਪੀ.), ਮਗ੍ਗਮਨੁਯਾਯਨ੍ਤਿ (ਸ੍ਯਾ.)].

੧੦੫੨. ‘‘ਕਾਸਿਕਸੁਚਿਵਤ੍ਥਧਰਾ, ਕੁਣ੍ਡਲਿਨੋ ਅਗਲੁਚਨ੍ਦਨਵਿਲਿਤ੍ਤਾ;

ਨਿਯ੍ਯਨ੍ਤਿ ਚਨ੍ਦਸੂਰਿਯਾ, ਯਞ੍ਞਤ੍ਥਾਯ ਏਕਰਾਜਸ੍ਸ.

੧੦੫੩. ‘‘ਕਾਸਿਕਸੁਚਿਵਤ੍ਥਧਰਾ, ਕੁਣ੍ਡਲਿਨੋ ਅਗਲੁਚਨ੍ਦਨਵਿਲਿਤ੍ਤਾ;

ਨਿਯ੍ਯਨ੍ਤਿ ਚਨ੍ਦਸੂਰਿਯਾ, ਮਾਤੁ ਕਤ੍ਵਾ ਹਦਯਸੋਕਂ.

੧੦੫੪. ‘‘ਕਾਸਿਕਸੁਚਿਵਤ੍ਥਧਰਾ, ਕੁਣ੍ਡਲਿਨੋ ਅਗਲੁਚਨ੍ਦਨਵਿਲਿਤ੍ਤਾ;