੫੪੩. ਭੂਰਿਦਤ੍ਤਜਾਤਕਂ (੬)

੭੮੪. ‘‘ਯਂ ਕਿਞ੍ਚਿ ਰਤਨਂ ਅਤ੍ਥਿ, ਧਤਰਟ੍ਠਨਿਵੇਸਨੇ;

ਸਬ੍ਬਾਨਿ ਤੇ ਉਪਯਨ੍ਤੁ, ਧੀਤਰਂ ਦੇਹਿ ਰਾਜਿਨੋ’’.

੭੮੫. ‘‘ਨ ਨੋ ਵਿਵਾਹੋ ਨਾਗੇਹਿ, ਕਤਪੁਬ੍ਬੋ ਕੁਦਾਚਨਂ;

ਤਂ ਵਿਵਾਹਂ ਅਸਂਯੁਤ੍ਤਂ, ਕਥਂ ਅਮ੍ਹੇ ਕਰੋਮਸੇ’’.

੭੮੬. ‘‘ਜੀਵਿਤਂ ਨੂਨ ਤੇ ਚਤ੍ਤਂ, ਰਟ੍ਠਂ ਵਾ ਮਨੁਜਾਧਿਪ;

ਨ ਹਿ ਨਾਗੇ ਕੁਪਿਤਮ੍ਹਿ, ਚਿਰਂ ਜੀਵਨ੍ਤਿ ਤਾਦਿਸਾ.

੭੮੭. ‘‘ਯੋ ਤ੍ਵਂ ਦੇਵ ਮਨੁਸ੍ਸੋਸਿ, ਇਦ੍ਧਿਮਨ੍ਤਂ ਅਨਿਦ੍ਧਿਮਾ;

ਵਰੁਣਸ੍ਸ ਨਿਯਂ ਪੁਤ੍ਤਂ, ਯਾਮੁਨਂ ਅਤਿਮਞ੍ਞਸਿ’’.

੭੮੮. ‘‘ਨਾਤਿਮਞ੍ਞਾਮਿ ਰਾਜਾਨਂ, ਧਤਰਟ੍ਠਂ ਯਸਸ੍ਸਿਨਂ;

ਧਤਰਟ੍ਠੋ ਹਿ ਨਾਗਾਨਂ, ਬਹੂਨਮਪਿ ਇਸ੍ਸਰੋ.

੭੮੯. ‘‘ਅਹਿ ਮਹਾਨੁਭਾਵੋਪਿ, ਨ ਮੇ ਧੀਤਰਮਾਰਹੋ;

ਖਤ੍ਤਿਯੋ ਚ ਵਿਦੇਹਾਨਂ, ਅਭਿਜਾਤਾ ਸਮੁਦ੍ਦਜਾ’’.

੭੯੦. ‘‘ਕਮ੍ਬਲਸ੍ਸਤਰਾ ਉਟ੍ਠੇਨ੍ਤੁ, ਸਬ੍ਬੇ ਨਾਗੇ ਨਿਵੇਦਯ;

ਬਾਰਾਣਸਿਂ ਪਵਜ੍ਜਨ੍ਤੁ, ਮਾ ਚ ਕਞ੍ਚਿ [ਕਿਞ੍ਚਿ (ਸੀ. ਪੀ. ਕ.)] ਵਿਹੇਠਯੁਂ’’.

੭੯੧. ‘‘ਨਿਵੇਸਨੇਸੁ ਸੋਬ੍ਭੇਸੁ, ਰਥਿਯਾ ਚਚ੍ਚਰੇਸੁ ਚ;

ਰੁਕ੍ਖਗ੍ਗੇਸੁ ਚ ਲਮ੍ਬਨ੍ਤੁ, ਵਿਤਤਾ ਤੋਰਣੇਸੁ ਚ.

੭੯੨. ‘‘ਅਹਮ੍ਪਿ ਸਬ੍ਬਸੇਤੇਨ, ਮਹਤਾ ਸੁਮਹਂ ਪੁਰਂ;

ਪਰਿਕ੍ਖਿਪਿਸ੍ਸਂ ਭੋਗੇਹਿ, ਕਾਸੀਨਂ ਜਨਯਂ ਭਯਂ’’.

੭੯੩. ਤਸ੍ਸ ਤਂ ਵਚਨਂ ਸੁਤ੍ਵਾ, ਉਰਗਾਨੇਕਵਣ੍ਣਿਨੋ;

ਬਾਰਾਣਸਿਂ ਪਵਜ੍ਜਿਂਸੁ, ਨ ਚ ਕਞ੍ਚਿ ਵਿਹੇਠਯੁਂ.

੭੯੪. ਨਿਵੇਸਨੇਸੁ ਸੋਬ੍ਭੇਸੁ, ਰਥਿਯਾ ਚਚ੍ਚਰੇਸੁ ਚ;

ਰੁਕ੍ਖਗ੍ਗੇਸੁ ਚ ਲਮ੍ਬਿਂਸੁ, ਵਿਤਤਾ ਤੋਰਣੇਸੁ ਚ.

੭੯੫. ਤੇਸੁ ਦਿਸ੍ਵਾਨ ਲਮ੍ਬਨ੍ਤੇ, ਪੁਥੂ ਕਨ੍ਦਿਂਸੁ ਨਾਰਿਯੋ;

ਨਾਗੇ ਸੋਣ੍ਡਿਕਤੇ ਦਿਸ੍ਵਾ, ਪਸ੍ਸਸਨ੍ਤੇ ਮੁਹੁਂ ਮੁਹੁਂ.

੭੯੬. ਬਾਰਾਣਸੀ ਪਬ੍ਯਧਿਤਾ, ਆਤੁਰਾ ਸਮਪਜ੍ਜਥ;

ਬਾਹਾ ਪਗ੍ਗਯ੍ਹ ਪਕ੍ਕਨ੍ਦੁਂ, ‘‘ਧੀਤਰਂ ਦੇਹਿ ਰਾਜਿਨੋ’’.

੭੯੭. ‘‘ਪੁਪ੍ਫਾਭਿਹਾਰਸ੍ਸ ਵਨਸ੍ਸ ਮਜ੍ਝੇ, ਕੋ ਲੋਹਿਤਕ੍ਖੋ ਵਿਤਤਨ੍ਤਰਂਸੋ;

ਕਾ ਕਮ੍ਬੁਕਾਯੂਰਧਰਾ ਸੁਵਤ੍ਥਾ, ਤਿਟ੍ਠਨ੍ਤਿ ਨਾਰਿਯੋ ਦਸ ਵਨ੍ਦਮਾਨਾ.

੭੯੮. ‘‘ਕੋ ਤ੍ਵਂ ਬ੍ਰਹਾਬਾਹੁ ਵਨਸ੍ਸ ਮਜ੍ਝੇ, ਵਿਰੋਚਸਿ ਘਤਸਿਤ੍ਤੋਵ ਅਗ੍ਗਿ;

ਮਹੇਸਕ੍ਖੋ ਅਞ੍ਞਤਰੋਸਿ ਯਕ੍ਖੋ, ਉਦਾਹੁ ਨਾਗੋਸਿ ਮਹਾਨੁਭਾਵੋ’’.

੭੯੯. ‘‘ਨਾਗੋਹਮਸ੍ਮਿ ਇਦ੍ਧਿਮਾ, ਤੇਜਸ੍ਸੀ [ਤੇਜਸੀ (ਸੀ. ਸ੍ਯਾ. ਪੀ. ਕ.)] ਦੁਰਤਿਕ੍ਕਮੋ;

ਡਂਸੇਯ੍ਯਂ ਤੇਜਸਾ ਕੁਦ੍ਧੋ, ਫੀਤਂ ਜਨਪਦਂ ਅਪਿ.

੮੦੦. ‘‘ਸਮੁਦ੍ਦਜਾ ਹਿ ਮੇ ਮਾਤਾ, ਧਤਰਟ੍ਠੋ ਚ ਮੇ ਪਿਤਾ;

ਸੁਦਸ੍ਸਨਕਨਿਟ੍ਠੋਸ੍ਮਿ, ਭੂਰਿਦਤ੍ਤੋਤਿ ਮਂ ਵਿਦੂ’’.

੮੦੧. ‘‘ਯਂ ਗਮ੍ਭੀਰਂ ਸਦਾਵਟ੍ਟਂ, ਰਹਦਂ ਭਿਸ੍ਮਂ ਪੇਕ੍ਖਸਿ;

ਏਸ ਦਿਬ੍ਯੋ ਮਮਾਵਾਸੋ, ਅਨੇਕਸਤਪੋਰਿਸੋ.

੮੦੨. ‘‘ਮਯੂਰਕੋਞ੍ਚਾਭਿਰੁਦਂ, ਨੀਲੋਦਂ ਵਨਮਜ੍ਝਤੋ;

ਯਮੁਨਂ ਪਵਿਸ ਮਾ ਭੀਤੋ, ਖੇਮਂ ਵਤ੍ਤਵਤਂ [ਵਤ੍ਤਵਤਿਂ (ਸ੍ਯਾ. ਕ.)] ਸਿਵਂ’’.

੮੦੩. ‘‘ਤਤ੍ਥ ਪਤ੍ਤੋ ਸਾਨੁਚਰੋ, ਸਹ ਪੁਤ੍ਤੇਨ ਬ੍ਰਾਹ੍ਮਣ;

ਪੂਜਿਤੋ ਮਯ੍ਹਂ ਕਾਮੇਹਿ, ਸੁਖਂ ਬ੍ਰਾਹ੍ਮਣ ਵਚ੍ਛਸਿ’’.

੮੦੪. ‘‘ਸਮਾ ਸਮਨ੍ਤਪਰਿਤੋ, ਪਹੂਤਤਗਰਾ [ਬਹੁਕਾ ਤਗ੍ਗਰਾ (ਸੀ. ਸ੍ਯਾ. ਪੀ.)] ਮਹੀ;

ਇਨ੍ਦਗੋਪਕਸਞ੍ਛਨ੍ਨਾ, ਸੋਭਤਿ ਹਰਿਤੁਤ੍ਤਮਾ.

੮੦੫. ‘‘ਰਮ੍ਮਾਨਿ ਵਨਚੇਤ੍ਯਾਨਿ, ਰਮ੍ਮਾ ਹਂਸੂਪਕੂਜਿਤਾ;

ਓਪੁਪ੍ਫਾਪਦ੍ਮਾ ਤਿਟ੍ਠਨ੍ਤਿ, ਪੋਕ੍ਖਰਞ੍ਞੋ [ਪੋਕ੍ਖਰਞ੍ਞਾ (ਸ੍ਯਾ. ਪੀ.)] ਸੁਨਿਮ੍ਮਿਤਾ.

੮੦੬. ‘‘ਅਟ੍ਠਂਸਾ ਸੁਕਤਾ ਥਮ੍ਭਾ, ਸਬ੍ਬੇ ਵੇਲ਼ੁਰਿਯਾਮਯਾ;

ਸਹਸ੍ਸਥਮ੍ਭਾ ਪਾਸਾਦਾ, ਪੂਰਾ ਕਞ੍ਞਾਹਿ ਜੋਤਰੇ.

੮੦੭. ‘‘ਵਿਮਾਨਂ ਉਪਪਨ੍ਨੋਸਿ, ਦਿਬ੍ਯਂ ਪੁਞ੍ਞੇਹਿ ਅਤ੍ਤਨੋ;

ਅਸਮ੍ਬਾਧਂ ਸਿਵਂ ਰਮ੍ਮਂ, ਅਚ੍ਚਨ੍ਤਸੁਖਸਂਹਿਤਂ.

੮੦੮. ‘‘ਮਞ੍ਞੇ ਸਹਸ੍ਸਨੇਤ੍ਤਸ੍ਸ, ਵਿਮਾਨਂ ਨਾਭਿਕਙ੍ਖਸਿ;

ਇਦ੍ਧੀ ਹਿ ਤ੍ਯਾਯਂ ਵਿਪੁਲਾ, ਸਕ੍ਕਸ੍ਸੇਵ ਜੁਤੀਮਤੋ’’.

੮੦੯. ‘‘ਮਨਸਾਪਿ ਨ ਪਤ੍ਤਬ੍ਬੋ, ਆਨੁਭਾਵੋ ਜੁਤੀਮਤੋ;

ਪਰਿਚਾਰਯਮਾਨਾਨਂ, ਸਇਨ੍ਦਾਨਂ [ਇਨ੍ਦਾਨਂ (ਸ੍ਯਾ. ਕ.)] ਵਸਵਤ੍ਤਿਨਂ’’.

੮੧੦. ‘‘ਤਂ ਵਿਮਾਨਂ ਅਭਿਜ੍ਝਾਯ, ਅਮਰਾਨਂ ਸੁਖੇਸਿਨਂ;

ਉਪੋਸਥਂ ਉਪਵਸਨ੍ਤੋ, ਸੇਮਿ ਵਮ੍ਮਿਕਮੁਦ੍ਧਨਿ’’.

੮੧੧. ‘‘ਅਹਞ੍ਚ ਮਿਗਮੇਸਾਨੋ, ਸਪੁਤ੍ਤੋ ਪਾਵਿਸਿਂ ਵਨਂ;

ਤਂ ਮਂ ਮਤਂ ਵਾ ਜੀਵਂ ਵਾ, ਨਾਭਿਵੇਦੇਨ੍ਤਿ ਞਾਤਕਾ.

੮੧੨. ‘‘ਆਮਨ੍ਤਯੇ ਭੂਰਿਦਤ੍ਤਂ, ਕਾਸਿਪੁਤ੍ਤਂ ਯਸਸ੍ਸਿਨਂ;

ਤਯਾ ਨੋ ਸਮਨੁਞ੍ਞਾਤਾ, ਅਪਿ ਪਸ੍ਸੇਮੁ ਞਾਤਕੇ’’.

੮੧੩. ‘‘ਏਸੋ ਹਿ ਵਤ ਮੇ ਛਨ੍ਦੋ, ਯਂ ਵਸੇਸਿ ਮਮਨ੍ਤਿਕੇ;

ਨ ਹਿ ਏਤਾਦਿਸਾ ਕਾਮਾ, ਸੁਲਭਾ ਹੋਨ੍ਤਿ ਮਾਨੁਸੇ.

੮੧੪. ‘‘ਸਚੇ ਤ੍ਵਂ ਨਿਚ੍ਛਸੇ ਵਤ੍ਥੁਂ, ਮਮ ਕਾਮੇਹਿ ਪੂਜਿਤੋ;

ਮਯਾ ਤ੍ਵਂ ਸਮਨੁਞ੍ਞਾਤੋ, ਸੋਤ੍ਥਿਂ ਪਸ੍ਸਾਹਿ ਞਾਤਕੇ’’.

੮੧੫. ‘‘ਧਾਰਯਿਮਂ ਮਣਿਂ ਦਿਬ੍ਯਂ, ਪਸੁਂ ਪੁਤ੍ਤੇ ਚ ਵਿਨ੍ਦਤਿ;

ਅਰੋਗੋ ਸੁਖਿਤੋ ਹੋਤਿ [ਹੋਹਿ (ਸ੍ਯਾ.)], ਗਚ੍ਛੇਵਾਦਾਯ ਬ੍ਰਾਹ੍ਮਣ’’.

੮੧੬. ‘‘ਕੁਸਲਂ ਪਟਿਨਨ੍ਦਾਮਿ, ਭੂਰਿਦਤ੍ਤ ਵਚੋ ਤਵ;

ਪਬ੍ਬਜਿਸ੍ਸਾਮਿ ਜਿਣ੍ਣੋਸ੍ਮਿ, ਨ ਕਾਮੇ ਅਭਿਪਤ੍ਥਯੇ’’.

੮੧੭. ‘‘ਬ੍ਰਹ੍ਮਚਰਿਯਸ੍ਸ ਚੇ ਭਙ੍ਗੋ, ਹੋਤਿ ਭੋਗੇਹਿ ਕਾਰਿਯਂ;

ਅਵਿਕਮ੍ਪਮਾਨੋ ਏਯ੍ਯਾਸਿ, ਬਹੁਂ ਦਸ੍ਸਾਮਿ ਤੇ ਧਨਂ’’.

੮੧੮. ‘‘ਕੁਸਲਂ ਪਟਿਨਨ੍ਦਾਮਿ, ਭੂਰਿਦਤ੍ਤ ਵਚੋ ਤਵ;

ਪੁਨਪਿ ਆਗਮਿਸ੍ਸਾਮਿ, ਸਚੇ ਅਤ੍ਥੋ ਭਵਿਸ੍ਸਤਿ’’.

੮੧੯. ‘‘ਇਦਂ ਵਤ੍ਵਾ ਭੂਰਿਦਤ੍ਤੋ, ਪੇਸੇਸਿ ਚਤੁਰੋ ਜਨੇ;

ਏਥ ਗਚ੍ਛਥ ਉਟ੍ਠੇਥ, ਖਿਪ੍ਪਂ ਪਾਪੇਥ ਬ੍ਰਾਹ੍ਮਣਂ.

੮੨੦. ਤਸ੍ਸ ਤਂ ਵਚਨਂ ਸੁਤ੍ਵਾ, ਉਟ੍ਠਾਯ ਚਤੁਰੋ ਜਨਾ;

ਪੇਸਿਤਾ ਭੂਰਿਦਤ੍ਤੇਨ, ਖਿਪ੍ਪਂ ਪਾਪੇਸੁ ਬ੍ਰਾਹ੍ਮਣਂ.

੮੨੧. ‘‘ਮਣਿਂ ਪਗ੍ਗਯ੍ਹ ਮਙ੍ਗਲ੍ਯਂ, ਸਾਧੁਵਿਤ੍ਤਂ [ਸਾਧੁਚਿਤ੍ਤਂ (ਪੀ.)] ਮਨੋਰਮਂ;

ਸੇਲਂ ਬ੍ਯਞ੍ਜਨਸਮ੍ਪਨ੍ਨਂ, ਕੋ ਇਮਂ ਮਣਿਮਜ੍ਝਗਾ’’.

੮੨੨. ‘‘ਲੋਹਿਤਕ੍ਖਸਹਸ੍ਸਾਹਿ, ਸਮਨ੍ਤਾ ਪਰਿਵਾਰਿਤਂ;

ਅਜ੍ਜ ਕਾਲਂ ਪਥਂ [ਪਦਂ (ਸੀ. ਪੀ.)] ਗਚ੍ਛਂ, ਅਜ੍ਝਗਾਹਂ ਮਣਿਂ ਇਮਂ’’.

੮੨੩. ‘‘ਸੁਪਚਿਣ੍ਣੋ ਅਯਂ ਸੇਲੋ, ਅਚ੍ਚਿਤੋ ਮਹਿਤੋ [ਮਾਨਿਤੋ (ਕ.)] ਸਦਾ;

ਸੁਧਾਰਿਤੋ ਸੁਨਿਕ੍ਖਿਤ੍ਤੋ, ਸਬ੍ਬਤ੍ਥਮਭਿਸਾਧਯੇ.

੮੨੪. ‘‘ਉਪਚਾਰਵਿਪਨ੍ਨਸ੍ਸ, ਨਿਕ੍ਖੇਪੇ ਧਾਰਣਾਯ ਵਾ;

ਅਯਂ ਸੇਲੋ ਵਿਨਾਸਾਯ, ਪਰਿਚਿਣ੍ਣੋ ਅਯੋਨਿਸੋ.

੮੨੫. ‘‘ਨ ਇਮਂ ਅਕੁਸਲੋ [ਕੁਸਲਂ (ਕ.)] ਦਿਬ੍ਯਂ, ਮਣਿਂ ਧਾਰੇਤੁਮਾਰਹੋ;

ਪਟਿਪਜ੍ਜ ਸਤਂ ਨਿਕ੍ਖਂ, ਦੇਹਿਮਂ ਰਤਨਂ ਮਮ’’.

੮੨੬. ‘‘ਨ ਚ ਮ੍ਯਾਯਂ ਮਣੀ ਕੇਯ੍ਯੋ, ਗੋਹਿ [ਕੇਹਿ (ਕ.)] ਵਾ ਰਤਨੇਹਿ ਵਾ;

ਸੇਲੋ ਬ੍ਯਞ੍ਜਨਸਮ੍ਪਨ੍ਨੋ, ਨੇਵ ਕੇਯ੍ਯੋ ਮਣੀ ਮਮ’’.

੮੨੭. ‘‘ਨੋ ਚੇ ਤਯਾ ਮਣੀ ਕੇਯ੍ਯੋ, ਗੋਹਿ [ਕੇਹਿ (ਕ.)] ਵਾ ਰਤਨੇਹਿ ਵਾ;

ਅਥ ਕੇਨ ਮਣੀ ਕੇਯ੍ਯੋ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’.

੮੨੮. ‘‘ਯੋ ਮੇ ਸਂਸੇ ਮਹਾਨਾਗਂ, ਤੇਜਸ੍ਸਿਂ ਦੁਰਤਿਕ੍ਕਮਂ;

ਤਸ੍ਸ ਦਜ੍ਜਂ ਇਮਂ ਸੇਲਂ, ਜਲਨ੍ਤਮਿਵ ਤੇਜਸਾ’’.

੮੨੯. ‘‘ਕੋ ਨੁ ਬ੍ਰਾਹ੍ਮਣਵਣ੍ਣੇਨ, ਸੁਪਣ੍ਣੋ ਪਤਤਂ ਵਰੋ;

ਨਾਗਂ ਜਿਗੀਸਮਨ੍ਵੇਸਿ, ਅਨ੍ਵੇਸਂ ਭਕ੍ਖਮਤ੍ਤਨੋ.

੮੩੦. ‘‘ਨਾਹਂ ਦਿਜਾਧਿਪੋ ਹੋਮਿ, ਨ ਦਿਟ੍ਠੋ ਗਰੁਲ਼ੋ ਮਯਾ;

ਆਸੀਵਿਸੇਨ ਵਿਤ੍ਤੋਤਿ [ਵਿਤ੍ਤੋਸ੍ਮਿ (ਸ੍ਯਾ. ਕ.)], ਵਜ੍ਜੋ ਬ੍ਰਾਹ੍ਮਣ ਮਂ ਵਿਦੂ’’.

੮੩੧. ‘‘ਕਿਂ ਨੁ ਤੁਯ੍ਹਂ ਬਲਂ ਅਤ੍ਥਿ, ਕਿਂ ਸਿਪ੍ਪਂ ਵਿਜ੍ਜਤੇ ਤਵ;

ਕਿਸ੍ਮਿਂ ਵਾ ਤ੍ਵਂ ਪਰਤ੍ਥਦ੍ਧੋ, ਉਰਗਂ ਨਾਪਚਾਯਸਿ’’.

੮੩੨. ‘‘ਆਰਞ੍ਞਿਕਸ੍ਸ ਇਸਿਨੋ, ਚਿਰਰਤ੍ਤਂ ਤਪਸ੍ਸਿਨੋ;

ਸੁਪਣ੍ਣੋ ਕੋਸਿਯਸ੍ਸਕ੍ਖਾ, ਵਿਸਵਿਜ੍ਜਂ ਅਨੁਤ੍ਤਰਂ.

੮੩੩. ‘‘ਤਂ ਭਾਵਿਤਤ੍ਤਞ੍ਞਤਰਂ, ਸਮ੍ਮਨ੍ਤਂ ਪਬ੍ਬਤਨ੍ਤਰੇ;

ਸਕ੍ਕਚ੍ਚਂ ਤਂ ਉਪਟ੍ਠਾਸਿਂ, ਰਤ੍ਤਿਨ੍ਦਿਵਮਤਨ੍ਦਿਤੋ.

੮੩੪. ‘‘ਸੋ ਤਦਾ ਪਰਿਚਿਣ੍ਣੋ ਮੇ, ਵਤ੍ਤਵਾ ਬ੍ਰਹ੍ਮਚਰਿਯਵਾ;

ਦਿਬ੍ਬਂ ਪਾਤੁਕਰੀ ਮਨ੍ਤਂ, ਕਾਮਸਾ ਭਗਵਾ ਮਮ.

੮੩੫. ‘‘ਤ੍ਯਾਹਂ ਮਨ੍ਤੇ ਪਰਤ੍ਥਦ੍ਧੋ, ਨਾਹਂ ਭਾਯਾਮਿ ਭੋਗਿਨਂ;

ਆਚਰਿਯੋ ਵਿਸਘਾਤਾਨਂ, ਅਲਮ੍ਪਾਨੋਤਿ [ਆਲਮ੍ਬਾਨੋਤਿ (ਸੀ. ਪੀ.), ਆਲਮ੍ਬਾਯਨੋਤਿ (ਸ੍ਯਾ.)] ਮਂ ਵਿਦੂ’’.

੮੩੬. ‘‘ਗਣ੍ਹਾਮਸੇ ਮਣਿਂ ਤਾਤ, ਸੋਮਦਤ੍ਤ ਵਿਜਾਨਹਿ;

ਮਾ ਦਣ੍ਡੇਨ ਸਿਰਿਂ ਪਤ੍ਤਂ, ਕਾਮਸਾ ਪਜਹਿਮ੍ਹਸੇ’’.

੮੩੭. ‘‘ਸਕਂ ਨਿਵੇਸਨਂ ਪਤ੍ਤਂ, ਯੋ ਤਂ ਬ੍ਰਾਹ੍ਮਣ ਪੂਜਯਿ;

ਏਵਂ ਕਲ੍ਯਾਣਕਾਰਿਸ੍ਸ, ਕਿਂ ਮੋਹਾ ਦੁਬ੍ਭਿਮਿਚ੍ਛਸਿ’’.

੮੩੮. ‘‘ਸਚੇ ਤ੍ਵਂ [ਸਚੇ ਹਿ (ਸੀ. ਪੀ. ਕ.)] ਧਨਕਾਮੋਸਿ, ਭੂਰਿਦਤ੍ਤੋ ਪਦਸ੍ਸਤਿ [ਭੂਰਿਦਤ੍ਤਂ ਪਦਿਸ੍ਸਸਿ (ਕ.)];

ਤਮੇਵ ਗਨ੍ਤ੍ਵਾ ਯਾਚਸ੍ਸੁ, ਬਹੁਂ ਦਸ੍ਸਤਿ ਤੇ ਧਨਂ’’.

੮੩੯. ‘‘ਹਤ੍ਥਗਤਂ ਪਤ੍ਤਗਤਂ, ਨਿਕਿਣ੍ਣਂ ਖਾਦਿਤੁਂ ਵਰਂ;

ਮਾ ਨੋ ਸਨ੍ਦਿਟ੍ਠਿਕੋ ਅਤ੍ਥੋ, ਸੋਮਦਤ੍ਤ ਉਪਚ੍ਚਗਾ’’.

੮੪੦. ‘‘ਪਚ੍ਚਤਿ ਨਿਰਯੇ ਘੋਰੇ, ਮਹਿਸ੍ਸਮਪਿ ਵਿਵਰਤਿ [ਮਹਿਸ੍ਸਮਵ ਦੀਯਤਿ (ਸੀ. ਪੀ.), ਮਹਿਮਸ੍ਸ ਵਿਨ੍ਦ੍ਰੀਯਤਿ (ਸ੍ਯਾ.)];

ਮਿਤ੍ਤਦੁਬ੍ਭੀ ਹਿਤਚ੍ਚਾਗੀ, ਜੀਵਰੇਵਾਪਿ ਸੁਸ੍ਸਤਿ [ਜੀਵਰੇ ਚਾਪਿ ਸੁਸ੍ਸਰੇ (ਸੀ. ਪੀ.)].

੮੪੧. ‘‘ਸਚੇ ਤ੍ਵਂ [ਸਚੇ ਹਿ (ਸੀ. ਪੀ. ਕ.)] ਧਨਕਾਮੋਸਿ, ਭੂਰਿਦਤ੍ਤੋ ਪਦਸ੍ਸਤਿ;

ਮਞ੍ਞੇ ਅਤ੍ਤਕਤਂ ਵੇਰਂ, ਨਚਿਰਂ ਵੇਦਯਿਸ੍ਸਸਿ’’.

੮੪੨. ‘‘ਮਹਾਯਞ੍ਞਂ ਯਜਿਤ੍ਵਾਨ, ਏਵਂ ਸੁਜ੍ਝਨ੍ਤਿ ਬ੍ਰਾਹ੍ਮਣਾ;

ਮਹਾਯਞ੍ਞਂ ਯਜਿਸ੍ਸਾਮ, ਏਵਂ ਮੋਕ੍ਖਾਮ ਪਾਪਕਾ’’.

੮੪੩. ‘‘ਹਨ੍ਦ ਦਾਨਿ ਅਪਾਯਾਮਿ, ਨਾਹਂ ਅਜ੍ਜ ਤਯਾ ਸਹ;

ਪਦਮ੍ਪੇਕਂ [ਪਦਮੇਕਂ (ਸ੍ਯਾ. ਕ.)] ਨ ਗਚ੍ਛੇਯ੍ਯਂ, ਏਵਂ ਕਿਬ੍ਬਿਸਕਾਰਿਨਾ’’.

੮੪੪. ‘‘ਇਦਂ ਵਤ੍ਵਾਨ ਪਿਤਰਂ, ਸੋਮਦਤ੍ਤੋ ਬਹੁਸ੍ਸੁਤੋ;

ਉਜ੍ਝਾਪੇਤ੍ਵਾਨ ਭੂਤਾਨਿ, ਤਮ੍ਹਾ ਠਾਨਾ ਅਪਕ੍ਕਮਿ.

੮੪੫. ‘‘ਗਣ੍ਹਾਹੇਤਂ ਮਹਾਨਾਗਂ, ਆਹਰੇਤਂ ਮਣਿਂ ਮਮ;

ਇਨ੍ਦਗੋਪਕਵਣ੍ਣਾਭੋ, ਯਸ੍ਸ ਲੋਹਿਤਕੋ ਸਿਰੋ.

੮੪੬. ‘‘ਕਪ੍ਪਾਸਪਿਚੁਰਾਸੀਵ, ਏਸੋ ਕਾਯੋ ਪਦਿਸ੍ਸਤਿ [ਕਾਯ’ਸ੍ਸ ਦਿਸ੍ਸਤਿ (ਸੀ. ਪੀ.)];

ਵਮ੍ਮਿਕਗ੍ਗਗਤੋ ਸੇਤਿ, ਤਂ ਤ੍ਵਂ ਗਣ੍ਹਾਹਿ ਬ੍ਰਾਹ੍ਮਣ’’.

੮੪੭. ‘‘ਅਥੋਸਧੇਹਿ ਦਿਬ੍ਬੇਹਿ, ਜਪ੍ਪਂ ਮਨ੍ਤਪਦਾਨਿ ਚ;

ਏਵਂ ਤਂ ਅਸਕ੍ਖਿ ਸਤ੍ਥੁਂ [ਸਟ੍ਠੁਂ (ਸੀ. ਪੀ.), ਯੁਟ੍ਠੁਂ (ਸ੍ਯਾ.), ਸੁਤ੍ਤੁਂ (ਕ.)], ਕਤ੍ਵਾ ਪਰਿਤ੍ਤਮਤ੍ਤਨੋ’’.

੮੪੮. ‘‘ਮਮਂ ਦਿਸ੍ਵਾਨ ਆਯਨ੍ਤਂ, ਸਬ੍ਬਕਾਮਸਮਿਦ੍ਧਿਨਂ;

ਇਨ੍ਦ੍ਰਿਯਾਨਿ ਅਹਟ੍ਠਾਨਿ, ਸਾਵਂ [ਸਾਮਂ (ਸੀ. ਪੀ.)] ਜਾਤਂ ਮੁਖਂ ਤਵ.

੮੪੯. ‘‘ਪਦ੍ਮਂ ਯਥਾ ਹਤ੍ਥਗਤਂ, ਪਾਣਿਨਾ ਪਰਿਮਦ੍ਦਿਤਂ;

ਸਾਵਂ ਜਾਤਂ [ਯਨ੍ਤਂ (ਕ.)] ਮੁਖਂ ਤੁਯ੍ਹਂ, ਮਮਂ ਦਿਸ੍ਵਾਨ ਏਦਿਸਂ.

੮੫੦. ‘‘ਕਚ੍ਚਿ ਨੁ ਤੇ ਨਾਭਿਸਸਿ [ਤੇ ਨਾਭਿਸਯਿ (ਸੀ.), ਤੇ ਨਾਭਿਸ੍ਸਸਿ (ਸ੍ਯਾ.)], ਕਚ੍ਚਿ ਤੇ ਅਤ੍ਥਿ ਵੇਦਨਾ;

ਯੇਨ ਸਾਵਂ ਮੁਖਂ ਤੁਯ੍ਹਂ, ਮਮਂ ਦਿਸ੍ਵਾਨ ਆਗਤਂ’’.

੮੫੧. ‘‘ਸੁਪਿਨਂ ਤਾਤ ਅਦ੍ਦਕ੍ਖਿਂ, ਇਤੋ ਮਾਸਂ ਅਧੋਗਤਂ;

ਦਕ੍ਖਿਣਂ ਵਿਯ ਮੇ ਬਾਹੁਂ, ਛੇਤ੍ਵਾ ਰੁਹਿਰਮਕ੍ਖਿਤਂ;

ਪੁਰਿਸੋ ਆਦਾਯ ਪਕ੍ਕਾਮਿ, ਮਮ ਰੋਦਨ੍ਤਿਯਾ ਸਤਿ.

੮੫੨. ‘‘ਯਤੋਹਂ [ਯਤੋ ਤਂ (ਸੀ.)] ਸੁਪਿਨਮਦ੍ਦਕ੍ਖਿਂ, ਸੁਦਸ੍ਸਨ ਵਿਜਾਨਹਿ;

ਤਤੋ ਦਿਵਾ ਵਾ ਰਤ੍ਤਿਂ ਵਾ, ਸੁਖਂ ਮੇ ਨੋਪਲਬ੍ਭਤਿ’’.

੮੫੩. ‘‘ਯਂ ਪੁਬ੍ਬੇ ਪਰਿਵਾਰਿਂਸੁ [ਪਰਿਚਾਰਿਂਸੁ (ਸੀ. ਪੀ.)], ਕਞ੍ਞਾ ਰੁਚਿਰਵਿਗ੍ਗਹਾ;

ਹੇਮਜਾਲਪਟਿਚ੍ਛਨ੍ਨਾ, ਭੂਰਿਦਤ੍ਤੋ ਨ ਦਿਸ੍ਸਤਿ.

੮੫੪. ‘‘ਯਂ ਪੁਬ੍ਬੇ ਪਰਿਵਾਰਿਂਸੁ [ਪਰਿਚਾਰਿਂਸੁ (ਸੀ. ਪੀ.)], ਨੇਤ੍ਤਿਂਸਵਰਧਾਰਿਨੋ;

ਕਣਿਕਾਰਾਵ ਸਮ੍ਫੁਲ੍ਲਾ, ਭੂਰਿਦਤ੍ਤੋ ਨ ਦਿਸ੍ਸਤਿ.

੮੫੫. ‘‘ਹਨ੍ਦ ਦਾਨਿ ਗਮਿਸ੍ਸਾਮ, ਭੂਰਿਦਤ੍ਤਨਿਵੇਸਨਂ;

ਧਮ੍ਮਟ੍ਠਂ ਸੀਲਸਮ੍ਪਨ੍ਨਂ, ਪਸ੍ਸਾਮ ਤਵ ਭਾਤਰਂ’’.

੮੫੬. ‘‘ਤਞ੍ਚ ਦਿਸ੍ਵਾਨ ਆਯਨ੍ਤਿਂ, ਭੂਰਿਦਤ੍ਤਸ੍ਸ ਮਾਤਰਂ;

ਬਾਹਾ ਪਗ੍ਗਯ੍ਹ ਪਕ੍ਕਨ੍ਦੁਂ, ਭੂਰਿਦਤ੍ਤਸ੍ਸ ਨਾਰਿਯੋ.

੮੫੭. ‘‘ਪੁਤ੍ਤਂ ਤੇਯ੍ਯੇ ਨ ਜਾਨਾਮ, ਇਤੋ ਮਾਸਂ ਅਧੋਗਤਂ;

ਮਤਂ ਵਾ ਯਦਿ ਵਾ ਜੀਵਂ, ਭੂਰਿਦਤ੍ਤਂ ਯਸਸ੍ਸਿਨਂ’’.