੫੧੯. ਸਮ੍ਬੁਲਾਜਾਤਕਂ (੯)

੨੯੭. ਕਾ ਵੇਧਮਾਨਾ ਗਿਰਿਕਨ੍ਦਰਾਯਂ, ਏਕਾ ਤੁਵਂ ਤਿਟ੍ਠਸਿ ਸਂਹਿਤੂਰੁ [ਸਞ੍ਞਤੂਰ (ਸੀ. ਪੀ.), ਸਞ੍ਚਿਤੂਰੁ (ਸ੍ਯਾ.)];

ਪੁਟ੍ਠਾਸਿ ਮੇ ਪਾਣਿਪਮੇਯ੍ਯਮਜ੍ਝੇ, ਅਕ੍ਖਾਹਿ ਮੇ ਨਾਮਞ੍ਚ ਬਨ੍ਧਵੇ ਚ.

੨੯੮. ਓਭਾਸਯਂ ਵਨਂ ਰਮ੍ਮਂ, ਸੀਹਬ੍ਯਗ੍ਘਨਿਸੇਵਿਤਂ;

ਕਾ ਵਾ ਤ੍ਵਮਸਿ ਕਲ੍ਯਾਣਿ, ਕਸ੍ਸ ਵਾ ਤ੍ਵਂ ਸੁਮਜ੍ਝਿਮੇ;

ਅਭਿਵਾਦੇਮਿ ਤਂ ਭਦ੍ਦੇ, ਦਾਨਵਾਹਂ ਨਮਤ੍ਥੁ ਤੇ.

੨੯੯. ਯੋ ਪੁਤ੍ਤੋ ਕਾਸਿਰਾਜਸ੍ਸ, ਸੋਤ੍ਥਿਸੇਨੋਤਿ ਤਂ ਵਿਦੂ;

ਤਸ੍ਸਾਹਂ ਸਮ੍ਬੁਲਾ ਭਰਿਯਾ, ਏਵਂ ਜਾਨਾਹਿ ਦਾਨਵ;

ਅਭਿਵਾਦੇਮਿ ਤਂ ਭਨ੍ਤੇ [ਭਦ੍ਦਨ੍ਤੇ (ਸੀ. ਸ੍ਯਾ.)], ਸਮ੍ਬੁਲਾਹਂ ਨਮਤ੍ਥੁ ਤੇ.

੩੦੦. ਵੇਦੇਹਪੁਤ੍ਤੋ ਭਦ੍ਦਨ੍ਤੇ, ਵਨੇ ਵਸਤਿ ਆਤੁਰੋ;

ਤਮਹਂ ਰੋਗਸਮ੍ਮਤ੍ਤਂ, ਏਕਾ ਏਕਂ ਉਪਟ੍ਠਹਂ [ਉਪਟ੍ਠਹਿਂ (ਸੀ.)].

੩੦੧. ਅਹਞ੍ਚ ਵਨਮੁਞ੍ਛਾਯ, ਮਧੁਮਂਸਂ ਮਿਗਾਬਿਲਂ [ਮਿਗਾਵਿਲਂ (ਸੀ.)];

ਯਦਾ ਹਰਾਮਿ ਤਂ ਭਕ੍ਖੋ, ਤਸ੍ਸ ਨੂਨਜ੍ਜ ਨਾਧਤਿ [ਨਾਥਤਿ (ਕ.)].

੩੦੨. ਕਿਂ ਵਨੇ ਰਾਜਪੁਤ੍ਤੇਨ, ਆਤੁਰੇਨ ਕਰਿਸ੍ਸਸਿ;

ਸਮ੍ਬੁਲੇ ਪਰਿਚਿਣ੍ਣੇਨ, ਅਹਂ ਭਤ੍ਤਾ ਭਵਾਮਿ ਤੇ.

੩੦੩. ਸੋਕਟ੍ਟਾਯ ਦੁਰਤ੍ਤਾਯ, ਕਿਂ ਰੂਪਂ ਵਿਜ੍ਜਤੇ ਮਮ;

ਅਞ੍ਞਂ ਪਰਿਯੇਸ ਭਦ੍ਦਨ੍ਤੇ, ਅਭਿਰੂਪਤਰਂ ਮਯਾ.

੩੦੪. ਏਹਿਮਂ ਗਿਰਿਮਾਰੁਯ੍ਹ, ਭਰਿਯਾ ਮੇ [ਮਯ੍ਹਂ (ਸੀ. ਸ੍ਯਾ. ਪੀ.)] ਚਤੁਸ੍ਸਤਾ;

ਤਾਸਂ ਤ੍ਵਂ ਪਵਰਾ ਹੋਹਿ, ਸਬ੍ਬਕਾਮਸਮਿਦ੍ਧਿਨੀ.

੩੦੫. ਨੂਨ [ਨਨੁ (ਸੀ. ਸ੍ਯਾ. ਪੀ. ਕ.)] ਤਾਰਕਵਣ੍ਣਾਭੇ [ਹਾਟਕਵਣ੍ਣਾਭੇ (ਪੀ.)], ਯਂ ਕਿਞ੍ਚਿ ਮਨਸਿਚ੍ਛਸਿ;

ਸਬ੍ਬਂ ਤਂ ਪਚੁਰਂ ਮਯ੍ਹਂ, ਰਮਸ੍ਸ੍ਵਜ੍ਜ [ਰਮਸੁਜ੍ਜ (ਸੀ. ਸ੍ਯਾ.)] ਮਯਾ ਸਹ.

੩੦੬. ਨੋ ਚੇ ਤੁਵਂ ਮਹੇਸੇਯ੍ਯਂ, ਸਮ੍ਬੁਲੇ ਕਾਰਯਿਸ੍ਸਸਿ;

ਅਲਂ ਤ੍ਵਂ ਪਾਤਰਾਸਾਯ, ਪਣ੍ਹੇ [ਮਞ੍ਞੇ (ਸੀ. ਪੀ.)] ਭਕ੍ਖਾ ਭਵਿਸ੍ਸਸਿ.

੩੦੭. ਤਞ੍ਚ ਸਤ੍ਤਜਟੋ ਲੁਦ੍ਦੋ, ਕਲ਼ਾਰੋ ਪੁਰਿਸਾਦਕੋ;

ਵਨੇ ਨਾਥਂ ਅਪਸ੍ਸਨ੍ਤਿਂ, ਸਮ੍ਬੁਲਂ ਅਗ੍ਗਹੀ ਭੁਜੇ.

੩੦੮. ਅਧਿਪਨ੍ਨਾ ਪਿਸਾਚੇਨ, ਲੁਦ੍ਦੇਨਾਮਿਸਚਕ੍ਖੁਨਾ;

ਸਾ ਚ ਸਤ੍ਤੁਵਸਮ੍ਪਤ੍ਤਾ, ਪਤਿਮੇਵਾਨੁਸੋਚਤਿ.

੩੦੯. ਨ ਮੇ ਇਦਂ ਤਥਾ ਦੁਕ੍ਖਂ, ਯਂ ਮਂ ਖਾਦੇਯ੍ਯ ਰਕ੍ਖਸੋ;

ਯਞ੍ਚ ਮੇ ਅਯ੍ਯਪੁਤ੍ਤਸ੍ਸ, ਮਨੋ ਹੇਸ੍ਸਤਿ ਅਞ੍ਞਥਾ.

੩੧੦. ਨ ਸਨ੍ਤਿ ਦੇਵਾ ਪਵਸਨ੍ਤਿ ਨੂਨ, ਨ ਹਿ ਨੂਨ ਸਨ੍ਤਿ ਇਧ ਲੋਕਪਾਲਾ;

ਸਹਸਾ ਕਰੋਨ੍ਤਾਨਮਸਞ੍ਞਤਾਨਂ, ਨ ਹਿ ਨੂਨ ਸਨ੍ਤਿ ਪਟਿਸੇਧਿਤਾਰੋ.

੩੧੧. ਇਤ੍ਥੀਨਮੇਸਾ ਪਵਰਾ ਯਸਸ੍ਸਿਨੀ, ਸਨ੍ਤਾ ਸਮਾ ਅਗ੍ਗਿਰਿਵੁਗ੍ਗਤੇਜਾ;

ਤਞ੍ਚੇ ਤੁਵਂ ਰਕ੍ਖਸਾਦੇਸਿ ਕਞ੍ਞਂ, ਮੁਦ੍ਧਾ ਚ ਹਿ ਸਤ੍ਤਧਾ ਤੇ ਫਲੇਯ੍ਯ;

ਮਾ ਤ੍ਵਂ ਦਹੀ [ਜਹੀ (ਪੀ.)] ਮੁਞ੍ਚ ਪਤਿਬ੍ਬਤਾਯ [ਪਤਿਬ੍ਬਤਾ ਸਾ (ਸੀ.), ਪਤਿਬ੍ਬਤਾ ਯਾ (ਪੀ.)].

੩੧੨. ਸਾ ਚ ਅਸ੍ਸਮਮਾਗਚ੍ਛਿ, ਪਮੁਤ੍ਤਾ ਪੁਰਿਸਾਦਕਾ;

ਨੀਲ਼ਂ [ਨਿਡ੍ਡਂ (ਸ੍ਯਾ. ਕ.)] ਪਲ਼ਿਨਂ ਸਕੁਣੀਵ [ਫਲਿਨਸਕੁਣੀਵ (ਸੀ. ਸ੍ਯਾ. ਪੀ.)], ਗਤਸਿਙ੍ਗਂਵ ਆਲਯਂ.

੩੧੩. ਸਾ ਤਤ੍ਥ ਪਰਿਦੇਵੇਸਿ, ਰਾਜਪੁਤ੍ਤੀ ਯਸਸ੍ਸਿਨੀ;

ਸਮ੍ਬੁਲਾ ਉਤੁਮਤ੍ਤਕ੍ਖਾ, ਵਨੇ ਨਾਥਂ ਅਪਸ੍ਸਨ੍ਤੀ [ਅਪਸ੍ਸਤੀ (ਸੀ.)].

੩੧੪. ਸਮਣੇ ਬ੍ਰਾਹ੍ਮਣੇ ਵਨ੍ਦੇ, ਸਮ੍ਪਨ੍ਨਚਰਣੇ ਇਸੇ;

ਰਾਜਪੁਤ੍ਤਂ ਅਪਸ੍ਸਨ੍ਤੀ, ਤੁਮ੍ਹਂਮ੍ਹਿ [ਤੁਮ੍ਹਂ ਹਿ (ਪੀ.)] ਸਰਣਂ ਗਤਾ.

੩੧੫. ਵਨ੍ਦੇ ਸੀਹੇ ਚ ਬ੍ਯਗ੍ਘੇ ਚ, ਯੇ ਚ ਅਞ੍ਞੇ ਵਨੇ ਮਿਗਾ;