੧੬. ਤਿਂਸਨਿਪਾਤੋ

੫੧੧. ਕਿਂਛਨ੍ਦਜਾਤਕਂ (੧)

੧. ਕਿਂਛਨ੍ਦੋ ਕਿਮਧਿਪ੍ਪਾਯੋ, ਏਕੋ ਸਮ੍ਮਸਿ ਘਮ੍ਮਨਿ;

ਕਿਂ ਪਤ੍ਥਯਾਨੋ ਕਿਂ ਏਸਂ, ਕੇਨ ਅਤ੍ਥੇਨ ਬ੍ਰਾਹ੍ਮਣ.

੨. ਯਥਾ ਮਹਾ ਵਾਰਿਧਰੋ, ਕੁਮ੍ਭੋ ਸੁਪਰਿਣਾਹਵਾ [ਸੁਪਰਿਣਾਮਵਾ (ਕ.)];

ਤਥੂਪਮਂ ਅਮ੍ਬਪਕ੍ਕਂ, ਵਣ੍ਣਗਨ੍ਧਰਸੁਤ੍ਤਮਂ.

੩. ਤਂ ਵੁਯ੍ਹਮਾਨਂ ਸੋਤੇਨ, ਦਿਸ੍ਵਾਨਾਮਲਮਜ੍ਝਿਮੇ;

ਪਾਣੀਹਿ ਨਂ ਗਹੇਤ੍ਵਾਨ, ਅਗ੍ਯਾਯਤਨਮਾਹਰਿਂ.

੪. ਤਤੋ ਕਦਲਿਪਤ੍ਤੇਸੁ, ਨਿਕ੍ਖਿਪਿਤ੍ਵਾ ਸਯਂ ਅਹਂ;

ਸਤ੍ਥੇਨ ਨਂ ਵਿਕਪ੍ਪੇਤ੍ਵਾ, ਖੁਪ੍ਪਿਪਾਸਂ ਅਹਾਸਿ ਮੇ.

੫. ਸੋਹਂ ਅਪੇਤਦਰਥੋ, ਬ੍ਯਨ੍ਤੀਭੂਤੋ [ਬ੍ਯਨ੍ਤਿਭੂਤੋ (ਸੀ. ਪੀ. ਕ.)] ਦੁਖਕ੍ਖਮੋ;

ਅਸ੍ਸਾਦਂ ਨਾਧਿਗਚ੍ਛਾਮਿ, ਫਲੇਸ੍ਵਞ੍ਞੇਸੁ ਕੇਸੁਚਿ [ਕੇਸੁਪਿ (ਕ. ਸੀ.)].

੬. ਸੋਸੇਤ੍ਵਾ ਨੂਨ ਮਰਣਂ, ਤਂ ਮਮਂ ਆਵਹਿਸ੍ਸਤਿ;

ਅਮ੍ਬਂ ਯਸ੍ਸ ਫਲਂ ਸਾਦੁ, ਮਧੁਰਗ੍ਗਂ ਮਨੋਰਮਂ;

ਯਮੁਦ੍ਧਰਿਂ ਵੁਯ੍ਹਮਾਨਂ, ਉਦਧਿਸ੍ਮਾ ਮਹਣ੍ਣਵੇ.

੭. ਅਕ੍ਖਾਤਂ ਤੇ ਮਯਾ ਸਬ੍ਬਂ, ਯਸ੍ਮਾ ਉਪਵਸਾਮਹਂ;

ਰਮ੍ਮਂ ਪਤਿ ਨਿਸਿਨ੍ਨੋਸ੍ਮਿ, ਪੁਥੁਲੋਮਾਯੁਤਾ ਪੁਥੁ.

੮. ਤ੍ਵਞ੍ਚ ਖੋ ਮੇਵ [ਮੇ (ਸੀ.), ਮਮ (?)] ਅਕ੍ਖਾਹਿ, ਅਤ੍ਤਾਨਮਪਲਾਯਿਨਿ;

ਕਾ ਵਾ ਤ੍ਵਮਸਿ ਕਲ੍ਯਾਣਿ, ਕਿਸ੍ਸ ਵਾ ਤ੍ਵਂ ਸੁਮਜ੍ਝਿਮੇ.

੯. ਰੁਪ੍ਪਪਟ੍ਟਪਲਿਮਟ੍ਠੀਵ [ਰੁਪ੍ਪਪਟ੍ਟਪ੍ਲਮਟ੍ਠੀਵ (ਸ੍ਯਾ.), ਰੂਪਪਟ੍ਟਪਮਟ੍ਠੀਵ (ਕ.)], ਬ੍ਯਗ੍ਘੀਵ ਗਿਰਿਸਾਨੁਜਾ;

ਯਾ ਸਨ੍ਤਿ ਨਾਰਿਯੋ ਦੇਵੇਸੁ, ਦੇਵਾਨਂ ਪਰਿਚਾਰਿਕਾ.

੧੦. ਯਾ ਚ ਮਨੁਸ੍ਸਲੋਕਸ੍ਮਿਂ, ਰੂਪੇਨਾਨ੍ਵਾਗਤਿਤ੍ਥਿਯੋ;

ਰੂਪੇਨ ਤੇ ਸਦਿਸੀ ਨਤ੍ਥਿ, ਦੇਵੇਸੁ ਗਨ੍ਧਬ੍ਬਮਨੁਸ੍ਸਲੋਕੇ [ਦੇਵਗਨ੍ਧਬ੍ਬਮਾਨੁਸੇ (ਸ੍ਯਾ.)];

ਪੁਟ੍ਠਾਸਿ ਮੇ ਚਾਰੁਪੁਬ੍ਬਙ੍ਗਿ, ਬ੍ਰੂਹਿ ਨਾਮਞ੍ਚ ਬਨ੍ਧਵੇ.

੧੧. ਯਂ ਤ੍ਵਂ ਪਤਿ ਨਿਸਿਨ੍ਨੋਸਿ, ਰਮ੍ਮਂ ਬ੍ਰਾਹ੍ਮਣ ਕੋਸਿਕਿਂ;

ਸਾਹਂ ਭੁਸਾਲਯਾ ਵੁਤ੍ਥਾ, ਵਰਵਾਰਿਵਹੋਘਸਾ.

੧੨. ਨਾਨਾਦੁਮਗਣਾਕਿਣ੍ਣਾ, ਬਹੁਕਾ ਗਿਰਿਕਨ੍ਦਰਾ;

ਮਮੇਵ ਪਮੁਖਾ ਹੋਨ੍ਤਿ, ਅਭਿਸਨ੍ਦਨ੍ਤਿ ਪਾਵੁਸੇ.

੧੩. ਅਥੋ ਬਹੂ ਵਨਤੋਦਾ, ਨੀਲਵਾਰਿਵਹਿਨ੍ਧਰਾ;

ਬਹੁਕਾ ਨਾਗਵਿਤ੍ਤੋਦਾ, ਅਭਿਸਨ੍ਦਨ੍ਤਿ ਵਾਰਿਨਾ.

੧੪. ਤਾ ਅਮ੍ਬਜਮ੍ਬੁਲਬੁਜਾ, ਨੀਪਾ ਤਾਲਾ ਚੁਦੁਮ੍ਬਰਾ [ਤਾਲਮੁਦੁਮ੍ਬਰਾ (ਸ੍ਯਾ. ਕ.)];

ਬਹੂਨਿ ਫਲਜਾਤਾਨਿ, ਆਵਹਨ੍ਤਿ ਅਭਿਣ੍ਹਸੋ.

੧੫. ਯਂ ਕਿਞ੍ਚਿ ਉਭਤੋ ਤੀਰੇ, ਫਲਂ ਪਤਤਿ ਅਮ੍ਬੁਨਿ;

ਅਸਂਸਯਂ ਤਂ ਸੋਤਸ੍ਸ, ਫਲਂ ਹੋਤਿ ਵਸਾਨੁਗਂ.

੧੬. ਏਤਦਞ੍ਞਾਯ ਮੇਧਾਵਿ, ਪੁਥੁਪਞ੍ਞ ਸੁਣੋਹਿ ਮੇ;

ਮਾ ਰੋਚਯ ਮਭਿਸਙ੍ਗਂ, ਪਟਿਸੇਧ ਜਨਾਧਿਪ.

੧੭. ਨ ਵਾਹਂ ਵਡ੍ਢਵਂ [ਵਦ੍ਧਵਂ (ਸੀ. ਪੀ.)] ਮਞ੍ਞੇ, ਯਂ ਤ੍ਵਂ ਰਟ੍ਠਾਭਿਵਡ੍ਢਨ;

ਆਚੇਯ੍ਯਮਾਨੋ ਰਾਜਿਸਿ, ਮਰਣਂ ਅਭਿਕਙ੍ਖਸਿ.

੧੮. ਤਸ੍ਸ ਜਾਨਨ੍ਤਿ ਪਿਤਰੋ, ਗਨ੍ਧਬ੍ਬਾ ਚ ਸਦੇਵਕਾ;

ਯੇ ਚਾਪਿ ਇਸਯੋ ਲੋਕੇ, ਸਞ੍ਞਤਤ੍ਤਾ ਤਪਸ੍ਸਿਨੋ;

ਅਸਂਸਯਂ ਤੇਪਿ [ਤੇ (ਸੀ. ਪੀ.)] ਜਾਨਨ੍ਤਿ, ਪਟ੍ਠਭੂਤਾ [ਵਦ੍ਧਭੂਤਾ (ਸੀ. ਪੀ.)] ਯਸਸ੍ਸਿਨੋ.

੧੯. ਏਵਂ ਵਿਦਿਤ੍ਵਾ ਵਿਦੂ ਸਬ੍ਬਧਮ੍ਮਂ, ਵਿਦ੍ਧਂਸਨਂ ਚਵਨਂ ਜੀਵਿਤਸ੍ਸ;

ਨ ਚੀਯਤੀ ਤਸ੍ਸ ਨਰਸ੍ਸ ਪਾਪਂ, ਸਚੇ ਨ ਚੇਤੇਤਿ ਵਧਾਯ ਤਸ੍ਸ.

੨੦. ਇਸਿਪੂਗਸਮਞ੍ਞਾਤੇ, ਏਵਂ ਲੋਕ੍ਯਾ ਵਿਦਿਤਾ ਸਤਿ [ਪਤਿ (ਕ. ਸ੍ਯਾ. ਕ.)];

ਅਨਰਿਯਪਰਿਸਮ੍ਭਾਸੇ, ਪਾਪਕਮ੍ਮਂ ਜਿਗੀਸਸਿ [ਜਿਗਿਂਸਸਿ (ਸੀ. ਸ੍ਯਾ. ਪੀ.)].

੨੧. ਸਚੇ ਅਹਂ ਮਰਿਸ੍ਸਾਮਿ, ਤੀਰੇ ਤੇ ਪੁਥੁਸੁਸ੍ਸੋਣਿ;

ਅਸਂਸਯਂ ਤਂ ਅਸਿਲੋਕੋ, ਮਯਿ ਪੇਤੇ ਆਗਮਿਸ੍ਸਤਿ.

੨੨. ਤਸ੍ਮਾ ਹਿ ਪਾਪਕਂ ਕਮ੍ਮਂ, ਰਕ੍ਖਸ੍ਸੇਵ [ਰਕ੍ਖਸ੍ਸੁ ਚ (ਸ੍ਯਾ.)] ਸੁਮਜ੍ਝਿਮੇ;

ਮਾ ਤਂ ਸਬ੍ਬੋ ਜਨੋ ਪਚ੍ਛਾ, ਪਕੁਟ੍ਠਾਯਿ [ਪਕਤ੍ਥਾਸਿ (ਸੀ. ਪੀ.), ਪਤ੍ਵਕ੍ਖਾਸਿ (ਸ੍ਯਾ.)] ਮਯਿ ਮਤੇ.

੨੩. ਅਞ੍ਞਾਤਮੇਤਂ ਅਵਿਸਯ੍ਹਸਾਹਿ, ਅਤ੍ਤਾਨਮਮ੍ਬਞ੍ਚ ਦਦਾਮਿ ਤੇ ਤਂ;

ਸੋ ਦੁਚ੍ਚਜੇ ਕਾਮਗੁਣੇ ਪਹਾਯ, ਸਨ੍ਤਿਞ੍ਚ ਧਮ੍ਮਞ੍ਚ ਅਧਿਟ੍ਠਿਤੋਸਿ.

੨੪. ਯੋ ਹਿਤ੍ਵਾ ਪੁਬ੍ਬਸਞ੍ਞੋਗਂ, ਪਚ੍ਛਾ ਸਂਯੋਜਨੇ ਠਿਤੋ;

ਅਧਮ੍ਮਞ੍ਚੇਵ ਚਰਤਿ, ਪਾਪਞ੍ਚਸ੍ਸ ਪਵਡ੍ਢਤਿ.

੨੫. ਏਹਿ ਤਂ ਪਾਪਯਿਸ੍ਸਾਮਿ, ਕਾਮਂ ਅਪ੍ਪੋਸ੍ਸੁਕੋ ਭਵ;

ਉਪਾਨਯਾਮਿ ਸੀਤਸ੍ਮਿਂ, ਵਿਹਰਾਹਿ ਅਨੁਸ੍ਸੁਕੋ.

੨੬. ਤਂ ਪੁਪ੍ਫਰਸਮਤ੍ਤੇਭਿ, ਵਕ੍ਕਙ੍ਗੇਹਿ ਅਰਿਨ੍ਦਮ;

ਕੋਞ੍ਚਾ ਮਯੂਰਾ ਦਿਵਿਯਾ, ਕੋਲਟ੍ਠਿਮਧੁਸਾਲ਼ਿਕਾ;

ਕੂਜਿਤਾ ਹਂਸਪੂਗੇਹਿ, ਕੋਕਿਲੇਤ੍ਥ ਪਬੋਧਰੇ.

੨੭. ਅਮ੍ਬੇਤ੍ਥ ਵਿਪ੍ਪਸਾਖਗ੍ਗਾ [ਵਿਪ੍ਪਸੂਨਗ੍ਗਾ (ਸੀ. ਸ੍ਯਾ. ਪੀ.), ਵਿਪ੍ਪਓਨਗ੍ਗਾ (ਕ.)], ਪਲਾਲਖਲਸਨ੍ਨਿਭਾ;

ਕੋਸਮ੍ਬਸਲ਼ਲਾ [ਕੋਸੁਮ੍ਭਸਲਲਾ (ਸੀ. ਸ੍ਯਾ. ਪੀ.)] ਨੀਪਾ, ਪਕ੍ਕਤਾਲਵਿਲਮ੍ਬਿਨੋ.

੨੮. ਮਾਲੀ ਤਿਰਿਟੀ ਕਾਯੂਰੀ, ਅਙ੍ਗਦੀ ਚਨ੍ਦਨੁਸ੍ਸਦੋ [ਚਨ੍ਦਨਸ੍ਸਦੋ (ਸੀ.)];

ਰਤ੍ਤਿਂ ਤ੍ਵਂ ਪਰਿਚਾਰੇਸਿ, ਦਿਵਾ ਵੇਦੇਸਿ ਵੇਦਨਂ.

੨੯. ਸੋਲ਼ਸਿਤ੍ਥਿਸਹਸ੍ਸਾਨਿ, ਯਾ ਤੇਮਾ ਪਰਿਚਾਰਿਕਾ;

ਏਵਂ ਮਹਾਨੁਭਾਵੋਸਿ, ਅਬ੍ਭੁਤੋ ਲੋਮਹਂਸਨੋ.

੩੦. ਕਿਂ ਕਮ੍ਮਮਕਰੀ ਪੁਬ੍ਬੇ, ਪਾਪਂ ਅਤ੍ਤਦੁਖਾਵਹਂ;

ਯਂ ਕਰਿਤ੍ਵਾ ਮਨੁਸ੍ਸੇਸੁ, ਪਿਟ੍ਠਿਮਂਸਾਨਿ ਖਾਦਸਿ.

੩੧. ਅਜ੍ਝੇਨਾਨਿ ਪਟਿਗ੍ਗਯ੍ਹ, ਕਾਮੇਸੁ ਗਧਿਤੋ [ਗਥਿਤੋ (ਸੀ. ਪੀ.), ਗਿਦ੍ਧਿਤੋ (ਸ੍ਯਾ. ਕ.), ਗਿਦ੍ਧਿਕੋ (ਕ. ਅਟ੍ਠ.)] ਅਹਂ;

ਅਚਰਿਂ ਦੀਘਮਦ੍ਧਾਨਂ, ਪਰੇਸਂ ਅਹਿਤਾਯਹਂ.

੩੨. ਯੋ ਪਿਟ੍ਠਿਮਂਸਿਕੋ ਹੋਤਿ, ਏਵਂ ਉਕ੍ਕਚ੍ਚ ਖਾਦਤਿ;

ਯਥਾਹਂ ਅਜ੍ਜ ਖਾਦਾਮਿ, ਪਿਟ੍ਠਿਮਂਸਾਨਿ ਅਤ੍ਤਨੋਤਿ.

ਕਿਂਛਨ੍ਦਜਾਤਕਂ ਪਠਮਂ.

੫੧੨. ਕੁਮ੍ਭਜਾਤਕਂ (੨)

੩੩. ਕੋ ਪਾਤੁਰਾਸੀ ਤਿਦਿਵਾ ਨਭਮ੍ਹਿ, ਓਭਾਸਯਂ ਸਂਵਰਿਂ ਚਨ੍ਦਿਮਾਵ;

ਗਤ੍ਤੇਹਿ ਤੇ ਰਸ੍ਮਿਯੋ ਨਿਚ੍ਛਰਨ੍ਤਿ, ਸਤੇਰਤਾ [ਸਤੇਰਿਤਾ (ਸੀ. ਸ੍ਯਾ. ਕ.)] ਵਿਜ੍ਜੁਰਿਵਨ੍ਤਲਿਕ੍ਖੇ.

੩੪. ਸੋ ਛਿਨ੍ਨਵਾਤਂ ਕਮਸੀ ਅਘਮ੍ਹਿ, ਵੇਹਾਯਸਂ ਗਚ੍ਛਸਿ ਤਿਟ੍ਠਸੀ ਚ;

ਇਦ੍ਧੀ ਨੁ ਤੇ ਵਤ੍ਥੁਕਤਾ ਸੁਭਾਵਿਤਾ, ਅਨਦ੍ਧਗੂਨਂ ਅਪਿ ਦੇਵਤਾਨਂ.

੩੫. ਵੇਹਾਯਸਂ ਗਮ੍ਮਮਾਗਮ੍ਮ [ਕਮਮਾਗਮ੍ਮ (ਸੀ. ਸ੍ਯਾ.)] ਤਿਟ੍ਠਸਿ, ਕੁਮ੍ਭਂ ਕਿਣਾਥਾਤਿ ਯਮੇਤਮਤ੍ਥਂ;

ਕੋ ਵਾ ਤੁਵਂ ਕਿਸ੍ਸ ਵਾ ਤਾਯ ਕੁਮ੍ਭੋ, ਅਕ੍ਖਾਹਿ ਮੇ ਬ੍ਰਾਹ੍ਮਣ ਏਤਮਤ੍ਥਂ.

੩੬. ਨ ਸਪ੍ਪਿਕੁਮ੍ਭੋ ਨਪਿ ਤੇਲਕੁਮ੍ਭੋ, ਨ ਫਾਣਿਤਸ੍ਸ ਨ ਮਧੁਸ੍ਸ ਕੁਮ੍ਭੋ;

ਕੁਮ੍ਭਸ੍ਸ ਵਜ੍ਜਾਨਿ ਅਨਪ੍ਪਕਾਨਿ, ਦੋਸੇ ਬਹੂ ਕੁਮ੍ਭਗਤੇ ਸੁਣਾਥ.

੩੭. ਗਲ਼ੇਯ੍ਯ ਯਂ ਪਿਤ੍ਵਾ [ਪੀਤ੍ਵਾ (ਸੀ. ਪੀ.)] ਪਤੇ ਪਪਾਤਂ, ਸੋਬ੍ਭਂ ਗੁਹਂ ਚਨ੍ਦਨਿਯੋਲ਼ਿਗਲ੍ਲਂ;

ਬਹੁਮ੍ਪਿ ਭੁਞ੍ਜੇਯ੍ਯ ਅਭੋਜਨੇਯ੍ਯਂ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੩੮. ਯਂ ਪਿਤ੍ਵਾ [ਯਂ ਵੇ ਪੀਤ੍ਵਾ (ਸੀ.)] ਚਿਤ੍ਤਸ੍ਮਿਮਨੇਸਮਾਨੋ, ਆਹਿਣ੍ਡਤੀ ਗੋਰਿਵ ਭਕ੍ਖਸਾਰੀ [ਭਕ੍ਖਸਾਦੀ (ਸੀ. ਸ੍ਯਾ. ਅਟ੍ਠ.)];

ਅਨਾਥਮਾਨੋ ਉਪਗਾਯਤਿ ਨਚ੍ਚਤਿ ਚ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੩੯. ਯਂ ਵੇ ਪਿਵਿਤ੍ਵਾ ਅਚੇਲੋਵ ਨਗ੍ਗੋ, ਚਰੇਯ੍ਯ ਗਾਮੇ ਵਿਸਿਖਨ੍ਤਰਾਨਿ;

ਸਮ੍ਮੂਲ਼੍ਹਚਿਤ੍ਤੋ ਅਤਿਵੇਲਸਾਯੀ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੪੦. ਯਂ ਪਿਤ੍ਵਾ ਉਟ੍ਠਾਯ ਪਵੇਧਮਾਨੋ, ਸੀਸਞ੍ਚ ਬਾਹੁਞ੍ਚ [ਬਾਹਞ੍ਚ (ਪੀ.)] ਪਚਾਲਯਨ੍ਤੋ;

ਸੋ ਨਚ੍ਚਤੀ ਦਾਰੁਕਟਲ੍ਲਕੋਵ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੪੧. ਯਂ ਵੇ ਪਿਵਿਤ੍ਵਾ ਅਗ੍ਗਿਦਡ੍ਢਾ ਸਯਨ੍ਤਿ, ਅਥੋ ਸਿਗਾਲੇਹਿਪਿ ਖਾਦਿਤਾਸੇ;

ਬਨ੍ਧਂ ਵਧਂ ਭੋਗਜਾਨਿਞ੍ਚੁਪੇਨ੍ਤਿ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੪੨. ਯਂ ਪਿਤ੍ਵਾ ਭਾਸੇਯ੍ਯ ਆਭਾਸਨੇਯ੍ਯਂ, ਸਭਾਯਮਾਸੀਨੋ ਅਪੇਤਵਤ੍ਥੋ;

ਸਮ੍ਮਕ੍ਖਿਤੋ [ਸਮਕ੍ਖਿਤੋ (ਸੀ.)] ਵਨ੍ਤਗਤੋ ਬ੍ਯਸਨ੍ਨੋ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੪੩. ਯਂ ਵੇ ਪਿਵਿਤ੍ਵਾ ਉਕ੍ਕਟ੍ਠੋ ਆਵਿਲਕ੍ਖੋ, ਮਮੇਵ ਸਬ੍ਬਾ ਪਥਵੀਤਿ ਮਞ੍ਞੇ [ਮਞ੍ਞਤਿ (ਸੀ.)];

ਨ ਮੇ ਸਮੋ ਚਾਤੁਰਨ੍ਤੋਪਿ ਰਾਜਾ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੪੪. ਮਾਨਾਤਿਮਾਨਾ ਕਲਹਾਨਿ ਪੇਸੁਣੀ, ਦੁਬ੍ਬਣ੍ਣਿਨੀ ਨਗ੍ਗਯਿਨੀ ਪਲਾਯਿਨੀ;

ਚੋਰਾਨ ਧੁਤ੍ਤਾਨ ਗਤੀ ਨਿਕੇਤੋ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੪੫. ਇਦ੍ਧਾਨਿ ਫੀਤਾਨਿ ਕੁਲਾਨਿ ਅਸ੍ਸੁ, ਅਨੇਕਸਾਹਸ੍ਸਧਨਾਨਿ ਲੋਕੇ;

ਉਚ੍ਛਿਨ੍ਨਦਾਯਜ੍ਜਕਤਾਨਿਮਾਯ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੪੬. ਧਞ੍ਞਂ ਧਨਂ ਰਜਤਂ ਜਾਤਰੂਪਂ, ਖੇਤ੍ਤਂ ਗਵਂ ਯਤ੍ਥ ਵਿਨਾਸਯਨ੍ਤਿ;

ਉਚ੍ਛੇਦਨੀ ਵਿਤ੍ਤਵਤਂ [ਉਚ੍ਛੇਦਨੀ ਵਿਤ੍ਤਗਤਂ (ਸ੍ਯਾ.), ਉਚ੍ਛੇਦਨਿਵਿਤ੍ਤਗਤਂ (ਕ.)] ਕੁਲਾਨਂ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੪੭. ਯਂ ਵੇ ਪਿਤ੍ਵਾ ਦਿਤ੍ਤਰੂਪੋਵ [ਦੁਟ੍ਠਰੂਪੋਵ (ਸੀ.)] ਪੋਸੋ, ਅਕ੍ਕੋਸਤਿ ਮਾਤਰਂ ਪਿਤਰਞ੍ਚ;

ਸਸ੍ਸੁਮ੍ਪਿ ਗਣ੍ਹੇਯ੍ਯ ਅਥੋਪਿ ਸੁਣ੍ਹਂ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੪੮. ਯਂ ਵੇ ਪਿਤ੍ਵਾ ਦਿਤ੍ਤਰੂਪਾਵ ਨਾਰੀ, ਅਕ੍ਕੋਸਤਿ ਸਸੁਰਂ ਸਾਮਿਕਞ੍ਚ;

ਦਾਸਮ੍ਪਿ ਗਣ੍ਹੇ ਪਰਿਚਾਰਕਮ੍ਪਿ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੪੯. ਯਂ ਵੇ ਪਿਵਿਤ੍ਵਾਨ [ਯਞ੍ਚੇ ਪੀਤ੍ਵਾਨ (ਪੀ.)] ਹਨੇਯ੍ਯ ਪੋਸੋ, ਧਮ੍ਮੇ ਠਿਤਂ ਸਮਣਂ ਬ੍ਰਾਹ੍ਮਣਂ ਵਾ;

ਗਚ੍ਛੇ ਅਪਾਯਮ੍ਪਿ ਤਤੋਨਿਦਾਨਂ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੫੦. ਯਂ ਵੇ ਪਿਵਿਤ੍ਵਾ ਦੁਚ੍ਚਰਿਤਂ ਚਰਨ੍ਤਿ, ਕਾਯੇਨ ਵਾਚਾਯ ਚ ਚੇਤਸਾ ਚ;

ਨਿਰਯਂ ਵਜਨ੍ਤਿ ਦੁਚ੍ਚਰਿਤਂ ਚਰਿਤ੍ਵਾ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੫੧. ਯਂ ਯਾਚਮਾਨਾ ਨ ਲਭਨ੍ਤਿ ਪੁਬ੍ਬੇ, ਬਹੁਂ ਹਿਰਞ੍ਞਮ੍ਪਿ ਪਰਿਚ੍ਚਜਨ੍ਤਾ;

ਸੋ ਤਂ ਪਿਵਿਤ੍ਵਾ ਅਲਿਕਂ ਭਣਾਤਿ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੫੨. ਯਂ ਵੇ ਪਿਤ੍ਵਾ ਪੇਸਨੇ ਪੇਸਿਯਨ੍ਤੋ, ਅਚ੍ਚਾਯਿਕੇ ਕਰਣੀਯਮ੍ਹਿ ਜਾਤੇ;

ਅਤ੍ਥਮ੍ਪਿ ਸੋ ਨਪ੍ਪਜਾਨਾਤਿ ਵੁਤ੍ਤੋ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੫੩. ਹਿਰੀਮਨਾਪਿ ਅਹਿਰੀਕਭਾਵਂ, ਪਾਤੁਂ ਕਰੋਨ੍ਤਿ ਮਦਨਾਯ [ਮਦਿਰਾਯ (ਪੀ.)] ਮਤ੍ਤਾ;

ਧੀਰਾਪਿ ਸਨ੍ਤਾ ਬਹੁਕਂ ਭਣਨ੍ਤਿ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੫੪. ਯਂ ਵੇ ਪਿਤ੍ਵਾ ਏਕਥੂਪਾ ਸਯਨ੍ਤਿ, ਅਨਾਸਕਾ ਥਣ੍ਡਿਲਦੁਕ੍ਖਸੇਯ੍ਯਂ;

ਦੁਬ੍ਬਣ੍ਣਿਯਂ ਆਯਸਕ੍ਯਞ੍ਚੁਪੇਨ੍ਤਿ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੫੫. ਯਂ ਵੇ ਪਿਤ੍ਵਾ ਪਤ੍ਤਖਨ੍ਧਾ ਸਯਨ੍ਤਿ, ਗਾਵੋ ਕੁਟਹਤਾਵ ਨ ਹਿ ਵਾਰੁਣਿਯਾ;

[ਯਂ ਵੇ ਪਿਤ੍ਵਾ ਪਤ੍ਤਕ੍ਖਨ੍ਧਾ, ਸਯਨ੍ਤਿ ਗਾਵੋ ਕੂਟਹਤਾਰਿਵ; ਨ ਹਿ ਵਾਰੁਣਿਯਾ ਵੇਗੋ, ਨਰੇਨ ਸੁਸ੍ਸਹੋਰਿਵ; (ਸੀ.)] ਵੇਗੋ ਨਰੇਨ ਸੁਸਹੋਰਿਵ [ਯਂ ਵੇ ਪਿਤ੍ਵਾ ਪਤ੍ਤਕ੍ਖਨ੍ਧਾ, ਸਯਨ੍ਤਿ ਗਾਵੋ ਕੂਟਹਤਾਰਿਵ; ਨ ਹਿ ਵਾਰੁਣਿਯਾ ਵੇਗੋ, ਨਰੇਨ ਸੁਸ੍ਸਹੋਰਿਵ; (ਸੀ.)], ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੫੬. ਯਂ ਮਨੁਸ੍ਸਾ ਵਿਵਜ੍ਜੇਨ੍ਤਿ, ਸਪ੍ਪਂ ਘੋਰਵਿਸਂ ਮਿਵ [ਵਿਸਮਿਵ (ਸ੍ਯਾ.), ਵਿਸਂ ਇਵ (ਕ.), ਵਿਸਾਮਿਵ (?)];

ਤਂ ਲੋਕੇ ਵਿਸਸਮਾਨਂ, ਕੋ ਨਰੋ ਪਾਤੁਮਰਹਤਿ.

੫੭. ਯਂ ਵੇ ਪਿਤ੍ਵਾ ਅਨ੍ਧਕਵੇਣ੍ਡਪੁਤ੍ਤਾ, ਸਮੁਦ੍ਦਤੀਰੇ ਪਰਿਚਾਰਯਨ੍ਤਾ [ਅਨ੍ਧਕਵੇਣ੍ਹੁਪੁਤ੍ਤਾ (ਸੀ. ਪੀ.), ਅਣ੍ਡਕਵੇਣ੍ਡਪੁਤ੍ਤਾ (ਕ.)];

ਉਪਕ੍ਕਮੁਂ ਮੁਸਲੇਹਞ੍ਞਮਞ੍ਞਂ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੫੮. ਯਂ ਵੇ ਪਿਤ੍ਵਾ ਪੁਬ੍ਬਦੇਵਾ ਪਮਤ੍ਤਾ, ਤਿਦਿਵਾ ਚੁਤਾ ਸਸ੍ਸਤਿਯਾ ਸਮਾਯ;

ਤਂ ਤਾਦਿਸਂ ਮਜ੍ਜਮਿਮਂ ਨਿਰਤ੍ਥਕਂ, ਜਾਨਂ ਮਹਾਰਾਜ ਕਥਂ ਪਿਵੇਯ੍ਯ.

੫੯. ਨਯਿਮਸ੍ਮਿਂ ਕੁਮ੍ਭਸ੍ਮਿਂ ਦਧਿ ਵਾ ਮਧੁ ਵਾ, ਏਵਂ ਅਭਿਞ੍ਞਾਯ ਕਿਣਾਹਿ ਰਾਜ;

ਏਵਞ੍ਹਿਮਂ ਕੁਮ੍ਭਗਤਾ ਮਯਾ ਤੇ, ਅਕ੍ਖਾਤਰੂਪਂ ਤਵ ਸਬ੍ਬਮਿਤ੍ਤ.

੬੦. ਨ ਮੇ ਪਿਤਾ ਵਾ ਅਥਵਾਪਿ ਮਾਤਾ, ਏਤਾਦਿਸਾ ਯਾਦਿਸਕੋ ਤੁਵਂਸਿ;

ਹਿਤਾਨੁਕਮ੍ਪੀ ਪਰਮਤ੍ਥਕਾਮੋ, ਸੋਹਂ ਕਰਿਸ੍ਸਂ ਵਚਨਂ ਤਵਜ੍ਜ.

੬੧. ਦਦਾਮਿ ਤੇ ਗਾਮਵਰਾਨਿ ਪਞ੍ਚ, ਦਾਸੀਸਤਂ ਸਤ੍ਤ ਗਵਂ ਸਤਾਨਿ;

ਆਜਞ੍ਞਯੁਤ੍ਤੇ ਚ ਰਥੇ ਦਸ ਇਮੇ, ਆਚਰਿਯੋ ਹੋਸਿ ਮਮਤ੍ਥਕਾਮੋ.

੬੨. ਤਵੇਵ ਦਾਸੀਸਤਮਤ੍ਥੁ ਰਾਜ, ਗਾਮਾ ਚ ਗਾਵੋ ਚ ਤਵੇਵ ਹੋਨ੍ਤੁ;

ਆਜਞ੍ਞਯੁਤ੍ਤਾ ਚ ਰਥਾ ਤਵੇਵ, ਸਕ੍ਕੋਹਮਸ੍ਮੀ ਤਿਦਸਾਨਮਿਨ੍ਦੋ.

੬੩. ਮਂਸੋਦਨਂ ਸਪ੍ਪਿਪਾਯਾਸਂ [ਸਪ੍ਪਿਪਾਯਞ੍ਚ (ਸੀ.)] ਭੁਞ੍ਜ, ਖਾਦਸ੍ਸੁ ਚ ਤ੍ਵਂ ਮਧੁਮਾਸਪੂਵੇ;

ਏਵਂ ਤੁਵਂ ਧਮ੍ਮਰਤੋ ਜਨਿਨ੍ਦ, ਅਨਿਨ੍ਦਿਤੋ ਸਗ੍ਗਮੁਪੇਹਿ ਠਾਨਨ੍ਤਿ.

ਕੁਮ੍ਭਜਾਤਕਂ ਦੁਤਿਯਂ.

੫੧੩. ਜਯਦ੍ਦਿਸਜਾਤਕਂ (੩)

੬੪. ਚਿਰਸ੍ਸਂ ਵਤ ਮੇ ਉਦਪਾਦਿ ਅਜ੍ਜ, ਭਕ੍ਖੋ ਮਹਾ ਸਤ੍ਤਮਿਭਤ੍ਤਕਾਲੇ;

ਕੁਤੋਸਿ ਕੋ ਵਾਸਿ ਤਦਿਙ੍ਘ ਬ੍ਰੂਹਿ, ਆਚਿਕ੍ਖ ਜਾਤਿਂ ਵਿਦਿਤੋ ਯਥਾਸਿ.

੬੫. ਪਞ੍ਚਾਲਰਾਜਾ ਮਿਗਵਂ ਪਵਿਟ੍ਠੋ, ਜਯਦ੍ਦਿਸੋ ਨਾਮ ਯਦਿਸ੍ਸੁਤੋ ਤੇ;

ਚਰਾਮਿ ਕਚ੍ਛਾਨਿ ਵਨਾਨਿ ਚਾਹਂ, ਪਸਦਂ ਇਮਂ ਖਾਦ ਮਮਜ੍ਜ ਮੁਞ੍ਚ.

੬੬. ਸੇਨੇਵ ਤ੍ਵਂ ਪਣਸਿ ਸਸ੍ਸਮਾਨੋ [ਸਯ੍ਹਮਾਨੋ (ਸ੍ਯਾ. ਕ.)], ਮਮੇਸ ਭਕ੍ਖੋ ਪਸਦੋ ਯਂ ਵਦੇਸਿ;

ਤਂ ਖਾਦਿਯਾਨ ਪਸਦਂ ਜਿਘਞ੍ਞਂ [ਜਿਘਚ੍ਛਂ (?)], ਖਾਦਿਸ੍ਸਂ ਪਚ੍ਛਾ ਨ ਵਿਲਾਪਕਾਲੋ.

੬੭. ਨ ਚਤ੍ਥਿ ਮੋਕ੍ਖੋ ਮਮ ਨਿਕ੍ਕਯੇਨ [ਵਿਕ੍ਕਯੇਨ (ਸੀ.)], ਗਨ੍ਤ੍ਵਾਨ ਪਚ੍ਚਾਗਮਨਾਯ ਪਣ੍ਹੇ;

ਤਂ ਸਙ੍ਕਰਂ [ਸਙ੍ਗਰਂ (ਸੀ. ਸ੍ਯਾ. ਪੀ.)] ਬ੍ਰਾਹ੍ਮਣਸ੍ਸਪ੍ਪਦਾਯ, ਸਚ੍ਚਾਨੁਰਕ੍ਖੀ ਪੁਨਰਾਵਜਿਸ੍ਸਂ.

੬੮. ਕਿਂ ਕਮ੍ਮਜਾਤਂ ਅਨੁਤਪ੍ਪਤੇ ਤ੍ਵਂ [ਅਨੁਤਪ੍ਪਤੀ ਤਂ (ਸੀ. ਪੀ.)], ਪਤ੍ਤਂ ਸਮੀਪਂ ਮਰਣਸ੍ਸ ਰਾਜ;

ਆਚਿਕ੍ਖ ਮੇ ਤਂ ਅਪਿ ਸਕ੍ਕੁਣੇਮੁ, ਅਨੁਜਾਨਿਤੁਂ ਆਗਮਨਾਯ ਪਣ੍ਹੇ.

੬੯. ਕਤਾ ਮਯਾ ਬ੍ਰਾਹ੍ਮਣਸ੍ਸ ਧਨਾਸਾ, ਤਂ ਸਙ੍ਕਰਂ ਪਟਿਮੁਕ੍ਕਂ ਨ ਮੁਤ੍ਤਂ;

ਤਂ ਸਙ੍ਕਰਂ ਬ੍ਰਾਹ੍ਮਣਸ੍ਸਪ੍ਪਦਾਯ, ਸਚ੍ਚਾਨੁਰਕ੍ਖੀ ਪੁਨਰਾਵਜਿਸ੍ਸਂ.

੭੦. ਯਾ ਤੇ ਕਤਾ ਬ੍ਰਾਹ੍ਮਣਸ੍ਸ ਧਨਾਸਾ, ਤਂ ਸਙ੍ਕਰਂ ਪਟਿਮੁਕ੍ਕਂ ਨ ਮੁਤ੍ਤਂ;

ਤਂ ਸਙ੍ਕਰਂ ਬ੍ਰਾਹ੍ਮਣਸ੍ਸਪ੍ਪਦਾਯ, ਸਚ੍ਚਾਨੁਰਕ੍ਖੀ ਪੁਨਰਾਵਜਸ੍ਸੁ.