੫੨੦. ਗਨ੍ਧਤਿਨ੍ਦੁਕਜਾਤਕਂ (੧੦)

੩੩੨. ਅਪ੍ਪਮਾਦੋ ਅਮਤਂ ਪਦਂ [ਅਮਤਪਦਂ (ਸੀ. ਪੀ.)], ਪਮਾਦੋ ਮਚ੍ਚੁਨੋ ਪਦਂ;

ਅਪ੍ਪਮਤ੍ਤਾ ਨ ਮੀਯਨ੍ਤਿ, ਯੇ ਪਮਤ੍ਤਾ ਯਥਾ ਮਤਾ.

੩੩੩. ਮਦਾ ਪਮਾਦੋ ਜਾਯੇਥ, ਪਮਾਦਾ ਜਾਯਤੇ ਖਯੋ;

ਖਯਾ ਪਦੋਸਾ [ਖਯਾ ਚ ਦੋਸਾ (ਸੀ.)] ਜਾਯਨ੍ਤਿ, ਮਾ ਪਮਾਦੋ [ਮਾ ਮਦੋ (ਸੀ. ਸ੍ਯਾ. ਪੀ.)] ਭਰਤੂਸਭ [ਭਾਰਧੂਸਭ (ਕ.)].

੩੩੪. ਬਹੂ ਹਿ ਖਤ੍ਤਿਯਾ ਜੀਨਾ, ਅਤ੍ਥਂ ਰਟ੍ਠਂ ਪਮਾਦਿਨੋ;

ਅਥੋਪਿ ਗਾਮਿਨੋ ਗਾਮਾ, ਅਨਗਾਰਾ ਅਗਾਰਿਨੋ.

੩੩੫. ਖਤ੍ਤਿਯਸ੍ਸ ਪਮਤ੍ਤਸ੍ਸ, ਰਟ੍ਠਸ੍ਮਿਂ ਰਟ੍ਠਵਡ੍ਢਨ;

ਸਬ੍ਬੇ ਭੋਗਾ ਵਿਨਸ੍ਸਨ੍ਤਿ, ਰਞ੍ਞੋ ਤਂ ਵੁਚ੍ਚਤੇ ਅਘਂ.

੩੩੬. ਨੇਸ ਧਮ੍ਮੋ ਮਹਾਰਾਜ, ਅਤਿਵੇਲਂ ਪਮਜ੍ਜਸਿ;

ਇਦ੍ਧਂ ਫੀਤਂ ਜਨਪਦਂ, ਚੋਰਾ ਵਿਦ੍ਧਂਸਯਨ੍ਤਿ ਨਂ.

੩੩੭. ਨ ਤੇ ਪੁਤ੍ਤਾ ਭਵਿਸ੍ਸਨ੍ਤਿ, ਨ ਹਿਰਞ੍ਞਂ ਨ ਧਾਨਿਯਂ [ਨ ਹਿਰਞ੍ਞਨਿਧਾਨਿਯਾ (ਕ.)];

ਰਟ੍ਠੇ ਵਿਲੁਪ੍ਪਮਾਨਮ੍ਹਿ, ਸਬ੍ਬਭੋਗੇਹਿ ਜਿਯ੍ਯਸਿ.

੩੩੮. ਸਬ੍ਬਭੋਗਾ ਪਰਿਜਿਣ੍ਣਂ, ਰਾਜਾਨਂ ਵਾਪਿ ਖਤ੍ਤਿਯਂ [ਖਤ੍ਤਿਯ (ਕ.)];

ਞਾਤਿਮਿਤ੍ਤਾ ਸੁਹਜ੍ਜਾ ਚ, ਨ ਤਂ ਮਞ੍ਞਨ੍ਤਿ ਮਾਨਿਯਂ [ਮਨ੍ਤਿਯਂ (ਸ੍ਯਾ.)].

੩੩੯. ਹਤ੍ਥਾਰੋਹਾ ਅਨੀਕਟ੍ਠਾ, ਰਥਿਕਾ ਪਤ੍ਤਿਕਾਰਕਾ;

ਤਮੇਵਮੁਪਜੀਵਨ੍ਤਾ, ਨ ਤਂ ਮਞ੍ਞਨ੍ਤਿ ਮਾਨਿਯਂ.

੩੪੦. ਅਸਂਵਿਹਿਤਕਮ੍ਮਨ੍ਤਂ, ਬਾਲਂ ਦੁਮ੍ਮਨ੍ਤਿਮਨ੍ਤਿਨਂ;

ਸਿਰੀ ਜਹਤਿ ਦੁਮ੍ਮੇਧਂ, ਜਿਣ੍ਣਂਵ ਉਰਗੋ ਤਚਂ.

੩੪੧. ਸੁਸਂਵਿਹਿਤਕਮ੍ਮਨ੍ਤਂ, ਕਾਲੁਟ੍ਠਾਯਿਂ ਅਤਨ੍ਦਿਤਂ;

ਸਬ੍ਬੇ ਭੋਗਾਭਿਵਡ੍ਢਨ੍ਤਿ, ਗਾਵੋ ਸਉਸਭਾਮਿਵ.

੩੪੨. ਉਪਸ੍ਸੁਤਿਂ ਮਹਾਰਾਜ, ਰਟ੍ਠੇ ਜਨਪਦੇ ਚਰ;

ਤਤ੍ਥ ਦਿਸ੍ਵਾ ਚ ਸੁਤ੍ਵਾ ਚ, ਤਤੋ ਤਂ [ਤ੍ਵਂ (ਕ.)] ਪਟਿਪਜ੍ਜਸਿ.

੩੪੩. ਏਵਂ ਵੇਦੇਤੁ ਪਞ੍ਚਾਲੋ, ਸਙ੍ਗਾਮੇ ਸਰਮਪ੍ਪਿਤੋ [ਸਮਪ੍ਪਿਤੋ (ਸੀ. ਪੀ.)];

ਯਥਾਹਮਜ੍ਜ ਵੇਦੇਮਿ, ਕਣ੍ਟਕੇਨ ਸਮਪ੍ਪਿਤੋ.

੩੪੪. ਜਿਣ੍ਣੋ ਦੁਬ੍ਬਲਚਕ੍ਖੂਸਿ, ਨ ਰੂਪਂ ਸਾਧੁ ਪਸ੍ਸਸਿ;

ਕਿਂ ਤਤ੍ਥ ਬ੍ਰਹ੍ਮਦਤ੍ਤਸ੍ਸ, ਯਂ ਤਂ ਮਗ੍ਗੇਯ੍ਯ [ਮਗ੍ਘੇਯ੍ਯ (ਪੀ.)] ਕਣ੍ਟਕੋ [ਕਣ੍ਡਕੋ (ਸੀ. ਸ੍ਯਾ. ਪੀ.)].

੩੪੫. ਬਹ੍ਵੇਤ੍ਥ ਬ੍ਰਹ੍ਮਦਤ੍ਤਸ੍ਸ, ਸੋਹਂ [ਯੋਹਂ (ਸੀ. ਸ੍ਯਾ. ਪੀ.)] ਮਗ੍ਗਸ੍ਮਿ [ਮਗ੍ਗੋਸ੍ਮਿ (ਪੀ.)] ਬ੍ਰਾਹ੍ਮਣ;

ਅਰਕ੍ਖਿਤਾ ਜਾਨਪਦਾ, ਅਧਮ੍ਮਬਲਿਨਾ ਹਤਾ.

੩੪੬. ਰਤ੍ਤਿਞ੍ਹਿ [ਰਤ੍ਤਿਞ੍ਚ (ਸੀ.)] ਚੋਰਾ ਖਾਦਨ੍ਤਿ, ਦਿਵਾ ਖਾਦਨ੍ਤਿ ਤੁਣ੍ਡਿਯਾ;

ਰਟ੍ਠਸ੍ਮਿਂ ਕੂਟਰਾਜਸ੍ਸ, ਬਹੁ ਅਧਮ੍ਮਿਕੋ ਜਨੋ.

੩੪੭. ਏਤਾਦਿਸੇ ਭਯੇ ਜਾਤੇ [ਤਾਤ (ਸੀ. ਪੀ.)], ਭਯਟ੍ਟਾ ਤਾਤ [ਤਾਵ (ਸੀ. ਪੀ.)] ਮਾਣਵਾ;

ਨਿਲ੍ਲੇਨਕਾਨਿ ਕੁਬ੍ਬਨ੍ਤਿ, ਵਨੇ ਆਹਤ੍ਵ ਕਣ੍ਟਕਂ.

੩੪੮. ਕਦਾਸ੍ਸੁ ਨਾਮਯਂ ਰਾਜਾ, ਬ੍ਰਹ੍ਮਦਤ੍ਤੋ ਮਰਿਸ੍ਸਤਿ;

ਯਸ੍ਸ ਰਟ੍ਠਮ੍ਹਿ ਜਿਯ੍ਯਨ੍ਤਿ, ਅਪ੍ਪਤਿਕਾ ਕੁਮਾਰਿਕਾ.

੩੪੯. ਦੁਬ੍ਭਾਸਿਤਞ੍ਹਿ ਤੇ ਜਮ੍ਮਿ, ਅਨਤ੍ਥਪਦਕੋਵਿਦੇ;

ਕੁਹਿਂ ਰਾਜਾ ਕੁਮਾਰੀਨਂ, ਭਤ੍ਤਾਰਂ ਪਰਿਯੇਸਤਿ.

੩੫੦. ਨ ਮੇ ਦੁਬ੍ਭਾਸਿਤਂ ਬ੍ਰਹ੍ਮੇ, ਕੋਵਿਦਤ੍ਥਪਦਾ ਅਹਂ;

ਅਰਕ੍ਖਿਤਾ ਜਾਨਪਦਾ, ਅਧਮ੍ਮਬਲਿਨਾ ਹਤਾ.

੩੫੧. ਰਤ੍ਤਿਞ੍ਹਿ ਚੋਰਾ ਖਾਦਨ੍ਤਿ, ਦਿਵਾ ਖਾਦਨ੍ਤਿ ਤੁਣ੍ਡਿਯਾ;

ਰਟ੍ਠਸ੍ਮਿਂ ਕੂਟਰਾਜਸ੍ਸ, ਬਹੁ ਅਧਮ੍ਮਿਕੋ ਜਨੋ;

ਦੁਜ੍ਜੀਵੇ ਦੁਬ੍ਭਰੇ ਦਾਰੇ, ਕੁਤੋ ਭਤ੍ਤਾ ਕੁਮਾਰਿਯੋ.

੩੫੨. ਏਵਂ ਸਯਤੁ ਪਞ੍ਚਾਲੋ, ਸਙ੍ਗਾਮੇ ਸਤ੍ਤਿਯਾ ਹਤੋ;

ਯਥਾਯਂ ਕਪਣੋ ਸੇਤਿ, ਹਤੋ ਫਾਲੇਨ ਸਾਲਿਯੋ.

੩੫੩. ਅਧਮ੍ਮੇਨ ਤੁਵਂ ਜਮ੍ਮ, ਬ੍ਰਹ੍ਮਦਤ੍ਤਸ੍ਸ ਕੁਜ੍ਝਸਿ;

ਯੋ ਤ੍ਵਂ ਸਪਸਿ ਰਾਜਾਨਂ, ਅਪਰਜ੍ਝਿਤ੍ਵਾਨ ਅਤ੍ਤਨੋ [ਅਤ੍ਤਨਾ (ਪੀ.)].

੩੫੪. ਧਮ੍ਮੇਨ ਬ੍ਰਹ੍ਮਦਤ੍ਤਸ੍ਸ, ਅਹਂ ਕੁਜ੍ਝਾਮਿ ਬ੍ਰਾਹ੍ਮਣ;

ਅਰਕ੍ਖਿਤਾ ਜਾਨਪਦਾ, ਅਧਮ੍ਮਬਲਿਨਾ ਹਤਾ.

੩੫੫. ਰਤ੍ਤਿਞ੍ਹਿ ਚੋਰਾ ਖਾਦਨ੍ਤਿ, ਦਿਵਾ ਖਾਦਨ੍ਤਿ ਤੁਣ੍ਡਿਯਾ;

ਰਟ੍ਠਸ੍ਮਿਂ ਕੂਟਰਾਜਸ੍ਸ, ਬਹੁ ਅਧਮ੍ਮਿਕੋ ਜਨੋ.

੩੫੬. ਸਾ ਨੂਨ ਪੁਨ ਰੇ ਪਕ੍ਕਾ, ਵਿਕਾਲੇ ਭਤ੍ਤਮਾਹਰਿ;

ਭਤ੍ਤਹਾਰਿਂ ਅਪੇਕ੍ਖਨ੍ਤੋ, ਹਤੋ ਫਾਲੇਨ ਸਾਲਿਯੋ.

੩੫੭. ਏਵਂ ਹਞ੍ਞਤੁ ਪਞ੍ਚਾਲੋ, ਸਙ੍ਗਾਮੇ ਅਸਿਨਾ ਹਤੋ [ਦਲ਼੍ਹਂ (ਪੀ.)];

ਯਥਾਹਮਜ੍ਜ ਪਹਤੋ, ਖੀਰਞ੍ਚ ਮੇ ਪਵਟ੍ਟਿਤਂ.

੩੫੮. ਯਂ ਪਸੁ ਖੀਰਂ ਛਡ੍ਡੇਤਿ, ਪਸੁਪਾਲਂ ਵਿਹਿਂਸਤਿ [ਪਸੁਪਾਲਞ੍ਚ ਹਿਂਸਤਿ (ਸੀ.), ਪਸੁ ਫਾਲਞ੍ਚ ਹਿਂਸਤਿ (ਪੀ.)];

ਕਿਂ ਤਤ੍ਥ ਬ੍ਰਹ੍ਮਦਤ੍ਤਸ੍ਸ, ਯਂ ਨੋ ਗਰਹਤੇ [ਗਰਹਤੋ (ਪੀ.)] ਭਵਂ.

੩੫੯. ਗਾਰਯ੍ਹੋ ਬ੍ਰਹ੍ਮੇ ਪਞ੍ਚਾਲੋ, ਬ੍ਰਹ੍ਮਦਤ੍ਤਸ੍ਸ ਰਾਜਿਨੋ;

ਅਰਕ੍ਖਿਤਾ ਜਾਨਪਦਾ, ਅਧਮ੍ਮਬਲਿਨਾ ਹਤਾ.

੩੬੦. ਰਤ੍ਤਿਞ੍ਹਿ ਚੋਰਾ ਖਾਦਨ੍ਤਿ, ਦਿਵਾ ਖਾਦਨ੍ਤਿ ਤੁਣ੍ਡਿਯਾ;

ਰਟ੍ਠਸ੍ਮਿਂ ਕੂਟਰਾਜਸ੍ਸ, ਬਹੁ ਅਧਮ੍ਮਿਕੋ ਜਨੋ.

੩੬੧. ਚਣ੍ਡਾ ਅਟਨਕਾ [ਅਟਨਕ (ਪੀ.), ਅਕਟਨਾ (ਕ.)] ਗਾਵੀ, ਯਂ ਪੁਰੇ ਨ ਦੁਹਾਮਸੇ;

ਤਂ ਦਾਨਿ ਅਜ੍ਜ ਦੋਹਾਮ, ਖੀਰਕਾਮੇਹੁਪਦ੍ਦੁਤਾ.

੩੬੨. ਏਵਂ ਕਨ੍ਦਤੁ ਪਞ੍ਚਾਲੋ, ਵਿਪੁਤ੍ਤੋ ਵਿਪ੍ਪਸੁਕ੍ਖਤੁ;

ਯਥਾਯਂ ਕਪਣਾ ਗਾਵੀ, ਵਿਪੁਤ੍ਤਾ ਪਰਿਧਾਵਤਿ.

੩੬੩. ਯਂ ਪਸੁ ਪਸੁਪਾਲਸ੍ਸ, ਸਮ੍ਭਮੇਯ੍ਯ [ਪਬ੍ਭਮੇਯ੍ਯ (ਸੀ. ਪੀ.)] ਰਵੇਯ੍ਯ ਵਾ;

ਕੋ ਨੀਧ ਅਪਰਾਧਤ੍ਥਿ, ਬ੍ਰਹ੍ਮਦਤ੍ਤਸ੍ਸ ਰਾਜਿਨੋ.

੩੬੪. ਅਪਰਾਧੋ ਮਹਾਬ੍ਰਹ੍ਮੇ, ਬ੍ਰਹ੍ਮਦਤ੍ਤਸ੍ਸ ਰਾਜਿਨੋ;

ਅਰਕ੍ਖਿਤਾ ਜਾਨਪਦਾ, ਅਧਮ੍ਮਬਲਿਨਾ ਹਤਾ.

੩੬੫. ਰਤ੍ਤਿਞ੍ਹਿ ਚੋਰਾ ਖਾਦਨ੍ਤਿ, ਦਿਵਾ ਖਾਦਨ੍ਤਿ ਤੁਣ੍ਡਿਯਾ;

ਰਟ੍ਠਸ੍ਮਿਂ ਕੂਟਰਾਜਸ੍ਸ, ਬਹੁ ਅਧਮ੍ਮਿਕੋ ਜਨੋ;

ਕਥਂ ਨੋ ਅਸਿਕੋਸਤ੍ਥਾ, ਖੀਰਪਾ ਹਞ੍ਞਤੇ ਪਜਾ.

੩੬੬. ਏਵਂ ਖਜ੍ਜਤੁ ਪਞ੍ਚਾਲੋ, ਹਤੋ ਯੁਦ੍ਧੇ ਸਪੁਤ੍ਤਕੋ;

ਯਥਾਹਮਜ੍ਜ ਖਜ੍ਜਾਮਿ, ਗਾਮਿਕੇਹਿ [ਗਾਮਕੇਹਿ (ਸੀ. ਪੀ.)] ਅਰਞ੍ਞਜੋ.

੩੬੭. ਨ ਸਬ੍ਬਭੂਤੇਸੁ ਵਿਧੇਨ੍ਤਿ [ਵਿਧਨ੍ਤਿ (ਕ.)] ਰਕ੍ਖਂ, ਰਾਜਾਨੋ ਮਣ੍ਡੂਕ ਮਨੁਸ੍ਸਲੋਕੇ;

ਨੇਤ੍ਤਾਵਤਾ ਰਾਜਾ ਅਧਮ੍ਮਚਾਰੀ, ਯਂ ਤਾਦਿਸਂ ਜੀਵਮਦੇਯ੍ਯੁ ਧਙ੍ਕਾ.

੩੬੮. ਅਧਮ੍ਮਰੂਪੋ ਵਤ ਬ੍ਰਹ੍ਮਚਾਰੀ, ਅਨੁਪ੍ਪਿਯਂ ਭਾਸਸਿ ਖਤ੍ਤਿਯਸ੍ਸ;

ਵਿਲੁਪ੍ਪਮਾਨਾਯ ਪੁਥੁਪ੍ਪਜਾਯ, ਪੂਜੇਸਿ ਰਾਜਂ ਪਰਮਪ੍ਪਮਾਦਂ [ਰਾਜਂ ਪਰਮਪ੍ਪਵਾਦਂ (ਸੀ.), ਰਾਜਾ ਪਰਮਪ੍ਪਵਾਦਿਂ (ਸ੍ਯਾ.)].

੩੬੯. ਸਚੇ ਇਮਂ ਬ੍ਰਹ੍ਮੇ ਸੁਰਜ੍ਜਕਂ ਸਿਯਾ, ਫੀਤਂ ਰਟ੍ਠਂ ਮੁਦਿਤਂ [ਪੂਰਿਤਂ (ਕ.)] ਵਿਪ੍ਪਸਨ੍ਨਂ;

ਭੁਤ੍ਵਾ ਬਲਿਂ ਅਗ੍ਗਪਿਣ੍ਡਞ੍ਚ ਕਾਕਾ, ਨ ਮਾਦਿਸਂ ਜੀਵਮਦੇਯ੍ਯੁ ਧਙ੍ਕਾਤਿ.

ਗਨ੍ਧਤਿਨ੍ਦੁਕਜਾਤਕਂ ਦਸਮਂ.

ਤਸ੍ਸੁਦ੍ਦਾਨਂ –

ਕਿਂਛਨ੍ਦ ਕੁਮ੍ਭ ਜਯਦ੍ਦਿਸ ਛਦ੍ਦਨ੍ਤ, ਅਥ ਪਣ੍ਡਿਤਸਮ੍ਭਵ ਸਿਰਕਪਿ;

ਦਕਰਕ੍ਖਸ ਪਣ੍ਡਰਨਾਗਵਰੋ, ਅਥ ਸਮ੍ਬੁਲ ਤਿਨ੍ਦੁਕਦੇਵਸੁਤੋਤਿ.

ਤਿਂਸਨਿਪਾਤਂ ਨਿਟ੍ਠਿਤਂ.