੫੧੮. ਪਣ੍ਡਰਨਾਗਰਾਜਜਾਤਕਂ (੮)

੨੫੮. ਵਿਕਿਣ੍ਣਵਾਚਂ ਅਨਿਗੁਯ੍ਹ [ਅਨਿਗੂਲ਼੍ਹ (ਪੀ.)] ਮਨ੍ਤਂ, ਅਸਞ੍ਞਤਂ ਅਪਰਿਚਕ੍ਖਿਤਾਰਂ [ਅਪਰਿਰਕ੍ਖਿਤਾਰਂ (ਕ.)];

ਭਯਂ ਤਮਨ੍ਵੇਤਿ ਸਯਂ ਅਬੋਧਂ, ਨਾਗਂ ਯਥਾ ਪਣ੍ਡਰਕਂ ਸੁਪਣ੍ਣੋ [ਸੁਵਣ੍ਣੋ (ਕ.)].

੨੫੯. ਯੋ ਗੁਯ੍ਹਮਨ੍ਤਂ ਪਰਿਰਕ੍ਖਨੇਯ੍ਯਂ, ਮੋਹਾ ਨਰੋ ਸਂਸਤਿ ਹਾਸਮਾਨੋ [ਭਾਸਮਾਨੋ (ਪੀ.)];

ਤਂ ਭਿਨ੍ਨਮਨ੍ਤਂ ਭਯਮਨ੍ਵੇਤਿ ਖਿਪ੍ਪਂ, ਨਾਗਂ ਯਥਾ ਪਣ੍ਡਰਕਂ ਸੁਪਣ੍ਣੋ.

੨੬੦. ਨਾਨੁਮਿਤ੍ਤੋ ਗਰੁਂ ਅਤ੍ਥਂ, ਗੁਯ੍ਹਂ ਵੇਦਿਤੁਮਰਹਤਿ;

ਸੁਮਿਤ੍ਤੋ ਚ ਅਸਮ੍ਬੁਦ੍ਧਂ, ਸਮ੍ਬੁਦ੍ਧਂ ਵਾ ਅਨਤ੍ਥ ਵਾ.

੨੬੧. ਵਿਸ੍ਸਾਸਮਾਪਜ੍ਜਿਮਹਂ ਅਚੇਲਂ [ਅਚੇਲੋ (ਸੀ. ਪੀ.)], ਸਮਣੋ ਅਯਂ ਸਮ੍ਮਤੋ ਭਾਵਿਤਤ੍ਤੋ;

ਤਸ੍ਸਾਹਮਕ੍ਖਿਂ ਵਿਵਰਿਂ [ਵਿਵਰਂ (ਸੀ.)] ਗੁਯ੍ਹਮਤ੍ਥਂ, ਅਤੀਤਮਤ੍ਥੋ ਕਪਣਂ [ਕਪਣੋ (ਪੀ.)] ਰੁਦਾਮਿ.

੨੬੨. ਤਸ੍ਸਾਹਂ ਪਰਮਂ [ਪੁਰਿਮਂ (ਸੀ.)] ਬ੍ਰਹ੍ਮੇ ਗੁਯ੍ਹਂ, ਵਾਚਞ੍ਹਿ ਮਂ ਨਾਸਕ੍ਖਿਂ [ਨਾਸਕ੍ਖਿ (ਪੀ.)] ਸਂਯਮੇਤੁਂ;

ਤਪ੍ਪਕ੍ਖਤੋ ਹਿ ਭਯਮਾਗਤਂ ਮਮਂ, ਅਤੀਤਮਤ੍ਥੋ ਕਪਣਂ ਰੁਦਾਮਿ.

੨੬੩. ਯੋ ਵੇ ਨਰੋ ਸੁਹਦਂ ਮਞ੍ਞਮਾਨੋ, ਗੁਯ੍ਹਮਤ੍ਥਂ ਸਂਸਤਿ ਦੁਕ੍ਕੁਲੀਨੇ;

ਦੋਸਾ ਭਯਾ ਅਥਵਾ ਰਾਗਰਤ੍ਤਾ [ਰਾਗਰਤ੍ਤੋ (ਸੀ. ਸ੍ਯਾ. ਪੀ.)], ਪਲ੍ਲਤ੍ਥਿਤੋ [ਪਲ੍ਲਿਤ੍ਥੋ (ਪੀ.), ਪਲ੍ਲਤ੍ਤਿਤੋ (ਕ.)] ਬਾਲੋ ਅਸਂਸਯਂ ਸੋ.

੨੬੪. ਤਿਰੋਕ੍ਖਵਾਚੋ ਅਸਤਂ ਪਵਿਟ੍ਠੋ, ਯੋ ਸਙ੍ਗਤੀਸੁ ਮੁਦੀਰੇਤਿ ਵਾਕ੍ਯਂ;

ਆਸੀਵਿਸੋ ਦੁਮ੍ਮੁਖੋਤ੍ਯਾਹੁ ਤਂ ਨਰਂ, ਆਰਾ ਆਰਾ [ਆਰਾ ਅਰਾ (ਪੀ.)] ਸਂਯਮੇ ਤਾਦਿਸਮ੍ਹਾ.

੨੬੫. ਅਨ੍ਨਂ ਪਾਨਂ ਕਾਸਿਕ [ਕਾਸਿਕਂ (ਪੀ.)] ਚਨ੍ਦਨਞ੍ਚ, ਮਨਾਪਿਤ੍ਥਿਯੋ ਮਾਲਮੁਚ੍ਛਾਦਨਞ੍ਚ;

ਓਹਾਯ ਗਚ੍ਛਾਮਸੇ ਸਬ੍ਬਕਾਮੇ, ਸੁਪਣ੍ਣ ਪਾਣੂਪਗਤਾਵ ਤ੍ਯਮ੍ਹਾ.

੨੬੬. ਕੋ ਨੀਧ ਤਿਣ੍ਣਂ ਗਰਹਂ ਉਪੇਤਿ, ਅਸ੍ਮਿਂਧ ਲੋਕੇ ਪਾਣਭੂ ਨਾਗਰਾਜ;

ਸਮਣੋ ਸੁਪਣ੍ਣੋ ਅਥ ਵਾ ਤ੍ਵਮੇਵ, ਕਿਂ ਕਾਰਣਾ ਪਣ੍ਡਰਕਗ੍ਗਹੀਤੋ.

੨੬੭. ਸਮਣੋਤਿ ਮੇ ਸਮ੍ਮਤਤ੍ਤੋ ਅਹੋਸਿ, ਪਿਯੋ ਚ ਮੇ ਮਨਸਾ ਭਾਵਿਤਤ੍ਤੋ;

ਤਸ੍ਸਾਹਮਕ੍ਖਿਂ ਵਿਵਰਿਂ ਗੁਯ੍ਹਮਤ੍ਥਂ, ਅਤੀਤਮਤ੍ਥੋ ਕਪਣਂ ਰੁਦਾਮਿ.

੨੬੮. ਨ ਚਤ੍ਥਿ ਸਤ੍ਤੋ ਅਮਰੋ ਪਥਬ੍ਯਾ, ਪਞ੍ਞਾਵਿਧਾ ਨਤ੍ਥਿ ਨ ਨਿਨ੍ਦਿਤਬ੍ਬਾ;

ਸਚ੍ਚੇਨ ਧਮ੍ਮੇਨ ਧਿਤਿਯਾ [ਧਿਯਾ (ਸੀ. ਪੀ.)] ਦਮੇਨ, ਅਲਬ੍ਭਮਬ੍ਯਾਹਰਤੀ ਨਰੋ ਇਧ.

੨੬੯. ਮਾਤਾਪਿਤਾ ਪਰਮਾ ਬਨ੍ਧਵਾਨਂ, ਨਾਸ੍ਸ ਤਤਿਯੋ ਅਨੁਕਮ੍ਪਕਤ੍ਥਿ;

ਤੇਸਮ੍ਪਿ ਗੁਯ੍ਹਂ ਪਰਮਂ ਨ ਸਂਸੇ, ਮਨ੍ਤਸ੍ਸ ਭੇਦਂ ਪਰਿਸਙ੍ਕਮਾਨੋ.

੨੭੦. ਮਾਤਾਪਿਤਾ ਭਗਿਨੀ ਭਾਤਰੋ ਚ, ਸਹਾਯਾ ਵਾ ਯਸ੍ਸ ਹੋਨ੍ਤਿ ਸਪਕ੍ਖਾ;

ਤੇਸਮ੍ਪਿ ਗੁਯ੍ਹਂ ਪਰਮਂ ਨ ਸਂਸੇ, ਮਨ੍ਤਸ੍ਸ ਭੇਦਂ ਪਰਿਸਙ੍ਕਮਾਨੋ.

੨੭੧. ਭਰਿਯਾ ਚੇ ਪੁਰਿਸਂ ਵਜ੍ਜਾ, ਕੋਮਾਰੀ ਪਿਯਭਾਣਿਨੀ;

ਪੁਤ੍ਤਰੂਪਯਸੂਪੇਤਾ, ਞਾਤਿਸਙ੍ਘਪੁਰਕ੍ਖਤਾ, ਤਸ੍ਸਾਪਿ ਗੁਯ੍ਹਂ ਪਰਮਂ ਨ ਸਂਸੇ;

ਮਨ੍ਤਸ੍ਸ ਭੇਦਂ ਪਰਿਸਙ੍ਕਮਾਨੋ.

੨੭੨. ਨ ਗੁਯ੍ਹਮਤ੍ਥਂ [ਗੁਯ੍ਹਤ੍ਥਂ (ਕ.)] ਵਿਵਰੇਯ੍ਯ, ਰਕ੍ਖੇਯ੍ਯ ਨਂ ਯਥਾ ਨਿਧਿਂ;

ਨ ਹਿ ਪਾਤੁਕਤੋ ਸਾਧੁ, ਗੁਯ੍ਹੋ ਅਤ੍ਥੋ ਪਜਾਨਤਾ.

੨੭੩. ਥਿਯਾ ਗੁਯ੍ਹਂ ਨ ਸਂਸੇਯ੍ਯ, ਅਮਿਤ੍ਤਸ੍ਸ ਚ ਪਣ੍ਡਿਤੋ;

ਯੋ ਚਾਮਿਸੇਨ ਸਂਹੀਰੋ, ਹਦਯਤ੍ਥੇਨੋ ਚ ਯੋ ਨਰੋ.

੨੭੪. ਗੁਯ੍ਹਮਤ੍ਥਂ ਅਸਮ੍ਬੁਦ੍ਧਂ, ਸਮ੍ਬੋਧਯਤਿ ਯੋ ਨਰੋ;

ਮਨ੍ਤਭੇਦਭਯਾ ਤਸ੍ਸ, ਦਾਸਭੂਤੋ ਤਿਤਿਕ੍ਖਤਿ.

੨੭੫. ਯਾਵਨ੍ਤੋ ਪੁਰਿਸਸ੍ਸਤ੍ਥਂ, ਗੁਯ੍ਹਂ ਜਾਨਨ੍ਤਿ ਮਨ੍ਤਿਨਂ;

ਤਾਵਨ੍ਤੋ ਤਸ੍ਸ ਉਬ੍ਬੇਗਾ, ਤਸ੍ਮਾ ਗੁਯ੍ਹਂ ਨ ਵਿਸ੍ਸਜੇ.

੨੭੬. ਵਿਵਿਚ੍ਚ ਭਾਸੇਯ੍ਯ ਦਿਵਾ ਰਹਸ੍ਸਂ, ਰਤ੍ਤਿਂ ਗਿਰਂ ਨਾਤਿਵੇਲਂ ਪਮੁਞ੍ਚੇ;

ਉਪਸ੍ਸੁਤਿਕਾ ਹਿ ਸੁਣਨ੍ਤਿ ਮਨ੍ਤਂ, ਤਸ੍ਮਾ ਮਨ੍ਤੋ ਖਿਪ੍ਪਮੁਪੇਤਿ ਭੇਦਂ.

੨੭੭. ਯਥਾਪਿ ਅਸ੍ਸ [ਅਯੋ (ਸ੍ਯਾ.), ਅਯ (ਕ.)] ਨਗਰਂ ਮਹਨ੍ਤਂ, ਅਦ੍ਵਾਰਕਂ [ਆਲ਼ਾਰਕਂ (ਪੀ.)] ਆਯਸਂ ਭਦ੍ਦਸਾਲਂ;

ਸਮਨ੍ਤਖਾਤਾਪਰਿਖਾਉਪੇਤਂ, ਏਵਮ੍ਪਿ ਮੇ ਤੇ ਇਧ ਗੁਯ੍ਹਮਨ੍ਤਾ.

੨੭੮. ਯੇ ਗੁਯ੍ਹਮਨ੍ਤਾ ਅਵਿਕਿਣ੍ਣਵਾਚਾ, ਦਲ਼੍ਹਾ ਸਦਤ੍ਥੇਸੁ ਨਰਾ ਦੁਜਿਵ੍ਹ [ਦੁਜਿਵ੍ਹਾ (ਸ੍ਯਾ. ਪੀ.)];

ਆਰਾ ਅਮਿਤ੍ਤਾ ਬ੍ਯਵਜਨ੍ਤਿ ਤੇਹਿ, ਆਸੀਵਿਸਾ ਵਾ ਰਿਵ ਸਤ੍ਤੁਸਙ੍ਘਾ [ਸਤ੍ਤਸਙ੍ਘਾ (ਸੀ. ਸ੍ਯਾ.)].

੨੭੯. ਹਿਤ੍ਵਾ ਘਰਂ ਪਬ੍ਬਜਿਤੋ ਅਚੇਲੋ, ਨਗ੍ਗੋ ਮੁਣ੍ਡੋ ਚਰਤਿ ਘਾਸਹੇਤੁ;

ਤਮ੍ਹਿ [ਤਮ੍ਹੀ (ਪੀ.)] ਨੁ ਖੋ ਵਿਵਰਿਂ ਗੁਯ੍ਹਮਤ੍ਥਂ, ਅਤ੍ਥਾ ਚ ਧਮ੍ਮਾ ਚ ਅਪਗ੍ਗਤਮ੍ਹਾ [ਅਪਾਗਤਮ੍ਹਾ (ਸੀ.), ਅਪਗਤਮ੍ਹਾ (ਸ੍ਯਾ.), ਅਵਾਗਤਮ੍ਹਾ (ਪੀ.)].

੨੮੦. ਕਥਂਕਰੋ ਹੋਤਿ ਸੁਪਣ੍ਣਰਾਜ, ਕਿਂਸੀਲੋ ਕੇਨ ਵਤੇਨ ਵਤ੍ਤਂ;

ਸਮਣੋ ਚਰਂ ਹਿਤ੍ਵਾ ਮਮਾਯਿਤਾਨਿ, ਕਥਂਕਰੋ ਸਗ੍ਗਮੁਪੇਤਿ ਠਾਨਂ.

੨੮੧. ਹਿਰਿਯਾ ਤਿਤਿਕ੍ਖਾਯ ਦਮੇਨੁਪੇਤੋ [ਦਮੇਨ ਖਨ੍ਤਿਯਾ (ਸੀ. ਸ੍ਯਾ. ਪੀ.)], ਅਕ੍ਕੋਧਨੋ ਪੇਸੁਣਿਯਂ ਪਹਾਯ;

ਸਮਣੋ ਚਰਂ ਹਿਤ੍ਵਾ ਮਮਾਯਿਤਾਨਿ, ਏਵਂਕਰੋ ਸਗ੍ਗਮੁਪੇਤਿ ਠਾਨਂ.

੨੮੨. ਮਾਤਾਵ ਪੁਤ੍ਤਂ ਤਰੁਣਂ ਤਨੁਜ੍ਜਂ [ਤਨੂਜਂ (ਸੀ.)], ਸਮ੍ਫਸ੍ਸਤਾ [ਸਮ੍ਪਸ੍ਸ ਤਂ (ਸੀ. ਪੀ.)] ਸਬ੍ਬਗਤ੍ਤਂ ਫਰੇਤਿ;

ਏਵਮ੍ਪਿ ਮੇ ਤ੍ਵਂ ਪਾਤੁਰਹੁ ਦਿਜਿਨ੍ਦ, ਮਾਤਾਵ ਪੁਤ੍ਤਂ ਅਨੁਕਮ੍ਪਮਾਨੋ.

੨੮੩. ਹਨ੍ਦਜ੍ਜ ਤ੍ਵਂ ਮੁਞ੍ਚ [ਮੁਚ੍ਚ (ਸੀ.)] ਵਧਾ ਦੁਜਿਵ੍ਹ, ਤਯੋ ਹਿ ਪੁਤ੍ਤਾ ਨ ਹਿ ਅਞ੍ਞੋ ਅਤ੍ਥਿ;

ਅਨ੍ਤੇਵਾਸੀ ਦਿਨ੍ਨਕੋ ਅਤ੍ਰਜੋ ਚ, ਰਜ੍ਜਸ੍ਸੁ [ਰਜਸ੍ਸੁ (ਸੀ. ਸ੍ਯਾ. ਪੀ.)] ਪੁਤ੍ਤਞ੍ਞਤਰੋ ਮੇ ਅਹੋਸਿ.

੨੮੪. ਇਚ੍ਚੇਵ ਵਾਕ੍ਯਂ ਵਿਸਜ੍ਜੀ ਸੁਪਣ੍ਣੋ, ਭੁਮ੍ਯਂ ਪਤਿਟ੍ਠਾਯ ਦਿਜੋ ਦੁਜਿਵ੍ਹਂ;

ਮੁਤ੍ਤਜ੍ਜ ਤ੍ਵਂ ਸਬ੍ਬਭਯਾਤਿਵਤ੍ਤੋ, ਥਲੂਦਕੇ ਹੋਹਿ ਮਯਾਭਿਗੁਤ੍ਤੋ.

੨੮੫. ਆਤਙ੍ਕਿਨਂ ਯਥਾ ਕੁਸਲੋ ਭਿਸਕ੍ਕੋ, ਪਿਪਾਸਿਤਾਨਂ ਰਹਦੋਵ ਸੀਤੋ;

ਵੇਸ੍ਮਂ ਯਥਾ ਹਿਮਸੀਤਟ੍ਟਿਤਾਨਂ [ਹਿਮਸਿਸਿਰਟ੍ਟਿਤਾਨਂ (ਪੀ.)], ਏਵਮ੍ਪਿ ਤੇ ਸਰਣਮਹਂ ਭਵਾਮਿ.

੨੮੬. ਸਨ੍ਧਿਂ ਕਤ੍ਵਾ ਅਮਿਤ੍ਤੇਨ, ਅਣ੍ਡਜੇਨ ਜਲਾਬੁਜ;

ਵਿਵਰਿਯ ਦਾਠਂ ਸੇਸਿ, ਕੁਤੋ ਤਂ ਭਯਮਾਗਤਂ.

੨੮੭. ਸਙ੍ਕੇਥੇਵ ਅਮਿਤ੍ਤਸ੍ਮਿਂ, ਮਿਤ੍ਤਸ੍ਮਿਮ੍ਪਿ ਨ ਵਿਸ੍ਸਸੇ;

ਅਭਯਾ ਭਯਮੁਪ੍ਪਨ੍ਨਂ, ਅਪਿ ਮੂਲਾਨਿ ਕਨ੍ਤਤਿ.

੨੮੮. ਕਥਂ ਨੁ ਵਿਸ੍ਸਸੇ ਤ੍ਯਮ੍ਹਿ, ਯੇਨਾਸਿ ਕਲਹੋ ਕਤੋ;

ਨਿਚ੍ਚਯਤ੍ਤੇਨ ਠਾਤਬ੍ਬਂ, ਸੋ ਦਿਸਬ੍ਭਿ [ਸੋ ਦਿਸਮ੍ਹਿ (ਪੀ.)] ਨ ਰਜ੍ਜਤਿ.

੨੮੯. ਵਿਸ੍ਸਾਸਯੇ ਨ ਚ ਤਂ [ਨਂ (ਸੀ. ਸ੍ਯਾ. ਪੀ.)] ਵਿਸ੍ਸਯੇਯ੍ਯ, ਅਸਙ੍ਕਿਤੋ ਸਙ੍ਕਿਤੋ ਚ [ਅਸਙ੍ਕਿਤੋ ਚ ਸਙ੍ਕਿਤੋ (ਸੀ. ਪੀ.)] ਭਵੇਯ੍ਯ;

ਤਥਾ ਤਥਾ ਵਿਞ੍ਞੂ ਪਰਕ੍ਕਮੇਯ੍ਯ, ਯਥਾ ਯਥਾ ਭਾਵਂ ਪਰੋ ਨ ਜਞ੍ਞਾ.

੨੯੦. ਤੇ ਦੇਵਵਣ੍ਣਾ [ਦੇਵਵਣ੍ਣੀ (ਪੀ.)] ਸੁਖੁਮਾਲਰੂਪਾ, ਉਭੋ ਸਮਾ ਸੁਜਯਾ [ਸੁਜਯੋ (ਸੀ. ਸ੍ਯਾ. ਪੀ.)] ਪੁਞ੍ਞਖਨ੍ਧਾ [ਪੁਞ੍ਞਗਨ੍ਧਾ (ਪੀ.)];

ਉਪਾਗਮੁਂ ਕਰਮ੍ਪਿਯਂ [ਕਾਦਮ੍ਬਿਯਂ (ਸੀ.), ਕਾਰਮ੍ਬਿਯਂ (ਪੀ.)] ਅਚੇਲਂ, ਮਿਸ੍ਸੀਭੂਤਾ ਅਸ੍ਸਵਾਹਾਵ ਨਾਗਾ.

੨੯੧. ਤਤੋ ਹਵੇ ਪਣ੍ਡਰਕੋ ਅਚੇਲਂ, ਸਯਮੇਵੁਪਾਗਮ੍ਮ ਇਦਂ ਅਵੋਚ;

ਮੁਤ੍ਤਜ੍ਜਹਂ ਸਬ੍ਬਭਯਾਤਿਵਤ੍ਤੋ, ਨ ਹਿ [ਹ (ਪੀ.)] ਨੂਨ ਤੁਯ੍ਹਂ ਮਨਸੋ ਪਿਯਮ੍ਹਾ.

੨੯੨. ਪਿਯੋ ਹਿ ਮੇ ਆਸਿ ਸੁਪਣ੍ਣਰਾਜਾ, ਅਸਂਸਯਂ ਪਣ੍ਡਰਕੇਨ ਸਚ੍ਚਂ;

ਸੋ ਰਾਗਰਤ੍ਤੋਵ ਅਕਾਸਿਮੇਤਂ, ਪਾਪਕਮ੍ਮਂ [ਪਾਪਂ ਕਮ੍ਮਂ (ਸੀ. ਪੀ.)] ਸਮ੍ਪਜਾਨੋ ਨ ਮੋਹਾ.

੨੯੩. ਨ ਮੇ ਪਿਯਂ ਅਪ੍ਪਿਯਂ ਵਾਪਿ ਹੋਤਿ, ਸਮ੍ਪਸ੍ਸਤੋ ਲੋਕਮਿਮਂ ਪਰਞ੍ਚ;

ਸੁਸਞ੍ਞਤਾਨਞ੍ਹਿ ਵਿਯਞ੍ਜਨੇਨ, ਅਸਞ੍ਞਤੋ ਲੋਕਮਿਮਂ ਚਰਾਸਿ.

੨੯੪. ਅਰਿਯਾਵਕਾਸੋਸਿ ਅਨਰਿਯੋਵਾਸਿ [ਅਨਰਿਯੋ ਚਾਸਿ (ਸੀ. ਪੀ.)], ਅਸਞ੍ਞਤੋ ਸਞ੍ਞਤਸਨ੍ਨਿਕਾਸੋ;

ਕਣ੍ਹਾਭਿਜਾਤਿਕੋਸਿ ਅਨਰਿਯਰੂਪੋ, ਪਾਪਂ ਬਹੁਂ ਦੁਚ੍ਚਰਿਤਂ ਅਚਾਰਿ.

੨੯੫. ਅਦੁਟ੍ਠਸ੍ਸ ਤੁਵਂ ਦੁਬ੍ਭਿ, ਦੁਬ੍ਭੀ [ਦੂਭਿ, ਦੂਭੀ (ਪੀ.)] ਚ ਪਿਸੁਣੋ ਚਸਿ;

ਏਤੇਨ ਸਚ੍ਚਵਜ੍ਜੇਨ, ਮੁਦ੍ਧਾ ਤੇ ਫਲਤੁ ਸਤ੍ਤਧਾ.

੨੯੬. ਤਸ੍ਮਾ ਹਿ ਮਿਤ੍ਤਾਨਂ ਨ ਦੁਬ੍ਭਿਤਬ੍ਬਂ, ਮਿਤ੍ਤਦੁਬ੍ਭਾ [ਮਿਤ੍ਤਦੁਬ੍ਭਾ ਹਿ (ਸ੍ਯਾ.)] ਪਾਪਿਯੋ ਨਤ੍ਥਿ ਅਞ੍ਞੋ;

ਆਸਿਤ੍ਤਸਤ੍ਤੋ ਨਿਹਤੋ ਪਥਬ੍ਯਾ, ਇਨ੍ਦਸ੍ਸ ਵਾਕ੍ਯੇਨ ਹਿ ਸਂਵਰੋ ਹਤੋਤਿ.

ਪਣ੍ਡਰਨਾਗਰਾਜਜਾਤਕਂ [ਪਣ੍ਡਰਕਜਾਤਕਂ (ਸੀ. ਸ੍ਯਾ. ਪੀ.)] ਅਟ੍ਠਮਂ.