੫੧੭. ਦਕਰਕ੍ਖਸਜਾਤਕਂ (੭)

੨੨੪. ਸਚੇ ਵੋ ਵੁਯ੍ਹਮਾਨਾਨਂ, ਸਤ੍ਤਨ੍ਨਂ ਉਦਕਣ੍ਣਵੇ;

ਮਨੁਸ੍ਸਬਲਿਮੇਸਾਨੋ, ਨਾਵਂ ਗਣ੍ਹੇਯ੍ਯ ਰਕ੍ਖਸੋ;

ਅਨੁਪੁਬ੍ਬਂ ਕਥਂ ਦਤ੍ਵਾ, ਮੁਞ੍ਚੇਸਿ ਦਕਰਕ੍ਖਸਾ [ਦਕਰਕ੍ਖਤੋ (ਪੀ.)].

੨੨੫. ਮਾਤਰਂ ਪਠਮਂ ਦਜ੍ਜਂ, ਭਰਿਯਂ ਦਤ੍ਵਾਨ ਭਾਤਰਂ;

ਤਤੋ ਸਹਾਯਂ ਦਤ੍ਵਾਨ, ਪਞ੍ਚਮਂ ਦਜ੍ਜਂ [ਦਜ੍ਜ (ਸ੍ਯਾ.)] ਬ੍ਰਾਹ੍ਮਣਂ;

ਛਟ੍ਠਾਹਂ ਦਜ੍ਜਮਤ੍ਤਾਨਂ, ਨੇਵ ਦਜ੍ਜਂ ਮਹੋਸਧਂ.

੨੨੬. ਪੋਸੇਤਾ ਤੇ ਜਨੇਤ੍ਤੀ ਚ, ਦੀਘਰਤ੍ਤਾਨੁਕਮ੍ਪਿਕਾ;

ਛਬ੍ਭੀ ਤਯਿ ਪਦੁਸ੍ਸਤਿ [ਪਦੁਟ੍ਠਸ੍ਮਿਂ (ਸੀ. ਸ੍ਯਾ.)], ਪਣ੍ਡਿਤਾ ਅਤ੍ਥਦਸ੍ਸਿਨੀ;

ਅਞ੍ਞਂ ਉਪਨਿਸਂ ਕਤ੍ਵਾ, ਵਧਾ ਤਂ ਪਰਿਮੋਚਯਿ.

੨੨੭. ਤਂ ਤਾਦਿਸਿਂ [ਤਾਦਿਸਂ (ਕ.)] ਪਾਣਦਦਿਂ, ਓਰਸਂ ਗਬ੍ਭਧਾਰਿਨਿਂ [ਗਬ੍ਭਧਾਰਿਣਿਂ (ਸੀ. ਸ੍ਯਾ.)];

ਮਾਤਰਂ ਕੇਨ ਦੋਸੇਨ, ਦਜ੍ਜਾਸਿ ਦਕਰਕ੍ਖਿਨੋ [ਦਕਰਕ੍ਖਤੋ (ਪੀ.)].

੨੨੮. ਦਹਰਾ ਵਿਯਲਙ੍ਕਾਰਂ, ਧਾਰੇਤਿ ਅਪਿਲ਼ਨ੍ਧਨਂ;

ਦੋਵਾਰਿਕੇ ਅਨੀਕਟ੍ਠੇ, ਅਤਿਵੇਲਂ ਪਜਗ੍ਘਤਿ [ਸਞ੍ਜਗ੍ਘਤਿ (ਕ.)].

੨੨੯. ਅਥੋਪਿ ਪਟਿਰਾਜੂਨਂ, ਸਯਂ ਦੂਤਾਨਿ ਸਾਸਤਿ;

ਮਾਤਰਂ ਤੇਨ ਦੋਸੇਨ, ਦਜ੍ਜਾਹਂ ਦਕਰਕ੍ਖਿਨੋ.

੨੩੦. ਇਤ੍ਥਿਗੁਮ੍ਬਸ੍ਸ ਪਵਰਾ, ਅਚ੍ਚਨ੍ਤਂ ਪਿਯਭਾਣਿਨੀ [ਅਚ੍ਚਨ੍ਤਪਿਯਵਾਦਿਨੀ (ਸੀ. ਪੀ.)];

ਅਨੁਗ੍ਗਤਾ [ਅਨੁਬ੍ਬਤਾ (ਸ੍ਯਾ.), ਅਨੁਪੁਬ੍ਬਤਾ (ਕ.)] ਸੀਲਵਤੀ, ਛਾਯਾਵ ਅਨਪਾਯਿਨੀ.

੨੩੧. ਅਕ੍ਕੋਧਨਾ ਪੁਞ੍ਞਵਤੀ [ਪਞ੍ਞਵਤੀ (ਸੀ. ਪੀ.)], ਪਣ੍ਡਿਤਾ ਅਤ੍ਥਦਸ੍ਸਿਨੀ;

ਉਬ੍ਬਰਿਂ [ਉਪ੍ਪਰਿਂ (ਸੀ.)] ਕੇਨ ਦੋਸੇਨ, ਦਜ੍ਜਾਸਿ ਦਕਰਕ੍ਖਿਨੋ.

੨੩੨. ਖਿਡ੍ਡਾਰਤਿਸਮਾਪਨ੍ਨਂ, ਅਨਤ੍ਥਵਸਮਾਗਤਂ;

ਸਾ ਮਂ ਸਕਾਨ ਪੁਤ੍ਤਾਨਂ, ਅਯਾਚਂ ਯਾਚਤੇ ਧਨਂ.

੨੩੩. ਸੋਹਂ ਦਦਾਮਿ ਸਾਰਤ੍ਤੋ [ਸਾਰਤੋ (ਸ੍ਯਾ.)], ਬਹੁਂ ਉਚ੍ਚਾਵਚਂ ਧਨਂ;

ਸੁਦੁਚ੍ਚਜਂ ਚਜਿਤ੍ਵਾਨ, ਪਚ੍ਛਾ ਸੋਚਾਮਿ ਦੁਮ੍ਮਨੋ;

ਉਬ੍ਬਰਿਂ ਤੇਨ ਦੋਸੇਨ, ਦਜ੍ਜਾਹਂ ਦਕਰਕ੍ਖਿਨੋ.

੨੩੪. ਯੇਨੋਚਿਤਾ ਜਨਪਦਾ [ਜਾਨਪਦਾ (ਸੀ. ਸ੍ਯਾ. ਪੀ.)], ਆਨੀਤਾ ਚ ਪਟਿਗ੍ਗਹਂ;

ਆਭਤਂ ਪਰਰਜ੍ਜੇਭਿ, ਅਭਿਟ੍ਠਾਯ ਬਹੁਂ ਧਨਂ.

੨੩੫. ਧਨੁਗ੍ਗਹਾਨਂ ਪਵਰਂ, ਸੂਰਂ ਤਿਖਿਣਮਨ੍ਤਿਨਂ;

ਭਾਤਰਂ ਕੇਨ ਦੋਸੇਨ, ਦਜ੍ਜਾਸਿ ਦਕਰਕ੍ਖਿਨੋ.

੨੩੬. ਯੇਨੋਚਿਤਾ [ਮਯੋਚਿਤਾ (ਸੀ.), ਮਯਾਚਿਤਾ (ਪੀ.)] ਜਨਪਦਾ, ਆਨੀਤਾ ਚ ਪਟਿਗ੍ਗਹਂ;

ਆਭਤਂ ਪਰਰਜ੍ਜੇਭਿ, ਅਭਿਟ੍ਠਾਯ ਬਹੁਂ ਧਨਂ.

੨੩੭. ਧਨੁਗ੍ਗਹਾਨਂ ਪਵਰੋ, ਸੂਰੋ ਤਿਖਿਣਮਨ੍ਤਿ ਚ [ਤਿਖਿਣਮਨ੍ਤਿਨੋ (ਕ.)];

ਮਯਾਯਂ [ਮਯਾ ਸੋ (ਸੀ. ਪੀ.)] ਸੁਖਿਤੋ ਰਾਜਾ, ਅਤਿਮਞ੍ਞਤਿ ਦਾਰਕੋ.

੨੩੮. ਉਪਟ੍ਠਾਨਮ੍ਪਿ ਮੇ ਅਯ੍ਯੇ, ਨ ਸੋ ਏਤਿ ਯਥਾ ਪੁਰੇ;

ਭਾਤਰਂ ਤੇਨ ਦੋਸੇਨ, ਦਜ੍ਜਾਹਂ ਦਕਰਕ੍ਖਿਨੋ.

੨੩੯. ਏਕਰਤ੍ਤੇਨ ਉਭਯੋ, ਤ੍ਵਞ੍ਚੇਵ ਧਨੁਸੇਖ ਚ [ਧਨੁਸੇਖਵਾ (ਸੀ. ਸ੍ਯਾ. ਪੀ.)];

ਉਭੋ ਜਾਤੇਤ੍ਥ ਪਞ੍ਚਾਲਾ, ਸਹਾਯਾ ਸੁਸਮਾਵਯਾ.

੨੪੦. ਚਰਿਯਾ ਤਂ ਅਨੁਬਨ੍ਧਿਤ੍ਥੋ [ਅਨੁਬਨ੍ਧੋ (ਕ.)], ਏਕਦੁਕ੍ਖਸੁਖੋ ਤਵ;

ਉਸ੍ਸੁਕ੍ਕੋ ਤੇ ਦਿਵਾਰਤ੍ਤਿਂ, ਸਬ੍ਬਕਿਚ੍ਚੇਸੁ ਬ੍ਯਾਵਟੋ;

ਸਹਾਯਂ ਕੇਨ ਦੋਸੇਨ, ਦਜ੍ਜਾਸਿ ਦਕਰਕ੍ਖਿਨੋ.

੨੪੧. ਚਰਿਯਾ ਮਂ ਅਯਂ [ਚਰਿਯਾਯ ਅਯਂ (ਸੀ. ਪੀ.)] ਅਯ੍ਯੇ, ਪਜਗ੍ਘਿਤ੍ਥੋ [ਸਞ੍ਜਗ੍ਘਿਤ੍ਥੋ (ਸ੍ਯਾ.)] ਮਯਾ ਸਹ;

ਅਜ੍ਜਾਪਿ ਤੇਨ ਵਣ੍ਣੇਨ, ਅਤਿਵੇਲਂ ਪਜਗ੍ਘਤਿ.

੨੪੨. ਉਬ੍ਬਰਿਯਾਪਿਹਂ ਅਯ੍ਯੇ, ਮਨ੍ਤਯਾਮਿ ਰਹੋਗਤੋ;

ਅਨਾਮਨ੍ਤੋ [ਅਨਾਮਨ੍ਤਾ (ਸੀ.)] ਪਵਿਸਤਿ, ਪੁਬ੍ਬੇ ਅਪ੍ਪਟਿਵੇਦਿਤੋ.

੨੪੩. ਲਦ੍ਧਦ੍ਵਾਰੋ [ਲਦ੍ਧਵਾਰੋ (ਸੀ. ਪੀ.)] ਕਤੋਕਾਸੋ, ਅਹਿਰਿਕਂ ਅਨਾਦਰਂ;

ਸਹਾਯਂ ਤੇਨ ਦੋਸੇਨ, ਦਜ੍ਜਾਹਂ ਦਕਰਕ੍ਖਿਨੋ.

੨੪੪. ਕੁਸਲੋ ਸਬ੍ਬਨਿਮਿਤ੍ਤਾਨਂ, ਰੁਤਞ੍ਞੂ [ਰੁਦਞ੍ਞੂ (ਸੀ. ਸ੍ਯਾ. ਪੀ.)] ਆਗਤਾਗਮੋ;

ਉਪ੍ਪਾਤੇ ਸੁਪਿਨੇ ਯੁਤ੍ਤੋ, ਨਿਯ੍ਯਾਨੇ ਚ ਪਵੇਸਨੇ.

੨੪੫. ਪਟ੍ਠੋ [ਪਦ੍ਧੋ (ਸੀ. ਪੀ.)] ਭੂਮਨ੍ਤਲਿਕ੍ਖਸ੍ਮਿਂ, ਨਕ੍ਖਤ੍ਤਪਦਕੋਵਿਦੋ;

ਬ੍ਰਾਹ੍ਮਣਂ ਕੇਨ ਦੋਸੇਨ, ਦਜ੍ਜਾਸਿ ਦਕਰਕ੍ਖਿਨੋ.

੨੪੬. ਪਰਿਸਾਯਮ੍ਪਿ ਮੇ ਅਯ੍ਯੇ, ਉਮ੍ਮੀਲਿਤ੍ਵਾ ਉਦਿਕ੍ਖਤਿ;

ਤਸ੍ਮਾ ਅਚ੍ਚਭਮੁਂ ਲੁਦ੍ਦਂ, ਦਜ੍ਜਾਹਂ ਦਕਰਕ੍ਖਿਨੋ.

੨੪੭. ਸਸਮੁਦ੍ਦਪਰਿਯਾਯਂ, ਮਹਿਂ ਸਾਗਰਕੁਣ੍ਡਲਂ;

ਵਸੁਨ੍ਧਰਂ ਆਵਸਸਿ, ਅਮਚ੍ਚਪਰਿਵਾਰਿਤੋ.

੨੪੮. ਚਾਤੁਰਨ੍ਤੋ ਮਹਾਰਟ੍ਠੋ, ਵਿਜਿਤਾਵੀ ਮਹਬ੍ਬਲੋ;

ਪਥਬ੍ਯਾ ਏਕਰਾਜਾਸਿ, ਯਸੋ ਤੇ ਵਿਪੁਲਂ ਗਤੋ.

੨੪੯. ਸੋਲ਼ਸਿਤ੍ਥਿਸਹਸ੍ਸਾਨਿ, ਆਮੁਤ੍ਤਮਣਿਕੁਣ੍ਡਲਾ;

ਨਾਨਾਜਨਪਦਾ ਨਾਰੀ, ਦੇਵਕਞ੍ਞੂਪਮਾ ਸੁਭਾ.

੨੫੦. ਏਵਂ ਸਬ੍ਬਙ੍ਗਸਮ੍ਪਨ੍ਨਂ, ਸਬ੍ਬਕਾਮਸਮਿਦ੍ਧਿਨਂ;

ਸੁਖਿਤਾਨਂ ਪਿਯਂ ਦੀਘਂ, ਜੀਵਿਤਂ ਆਹੁ ਖਤ੍ਤਿਯ.

੨੫੧. ਅਥ ਤ੍ਵਂ ਕੇਨ ਵਣ੍ਣੇਨ, ਕੇਨ ਵਾ ਪਨ ਹੇਤੁਨਾ;

ਪਣ੍ਡਿਤਂ ਅਨੁਰਕ੍ਖਨ੍ਤੋ, ਪਾਣਂ ਚਜਸਿ ਦੁਚ੍ਚਜਂ.

੨੫੨. ਯਤੋਪਿ ਆਗਤੋ ਅਯ੍ਯੇ, ਮਮ ਹਤ੍ਥਂ ਮਹੋਸਧੋ;

ਨਾਭਿਜਾਨਾਮਿ ਧੀਰਸ੍ਸ, ਅਨੁਮਤ੍ਤਮ੍ਪਿ ਦੁਕ੍ਕਟਂ.

੨੫੩. ਸਚੇ ਚ ਕਿਸ੍ਮਿਚਿ ਕਾਲੇ, ਮਰਣਂ ਮੇ ਪੁਰੇ ਸਿਯਾ;

ਸੋ ਮੇ ਪੁਤ੍ਤੇ [ਪੁਤ੍ਤੇ ਚ ਮੇ (ਸੀ. ਸ੍ਯਾ. ਪੀ.] ਪਪੁਤ੍ਤੇ ਚ, ਸੁਖਾਪੇਯ੍ਯ ਮਹੋਸਧੋ.

੨੫੪. ਅਨਾਗਤਂ ਪਚ੍ਚੁਪ੍ਪਨ੍ਨਂ, ਸਬ੍ਬਮਤ੍ਥਮ੍ਪਿ ਪਸ੍ਸਤਿ [ਸਬ੍ਬਮਤ੍ਥਂ ਵਿਪਸ੍ਸਤਿ (ਸੀ. ਸ੍ਯਾ. ਪੀ.)];

ਅਨਾਪਰਾਧਕਮ੍ਮਨ੍ਤਂ, ਨ ਦਜ੍ਜਂ ਦਕਰਕ੍ਖਿਨੋ.

੨੫੫. ਇਦਂ ਸੁਣਾਥ ਪਞ੍ਚਾਲਾ, ਚੂਲ਼ਨੇਯ੍ਯਸ੍ਸ [ਚੂਲ਼ਨੀਯਸ੍ਸ (ਸੀ.)] ਭਾਸਿਤਂ;

ਪਣ੍ਡਿਤਂ ਅਨੁਰਕ੍ਖਨ੍ਤੋ, ਪਾਣਂ ਚਜਤਿ ਦੁਚ੍ਚਜਂ.

੨੫੬. ਮਾਤੁ ਭਰਿਯਾਯ ਭਾਤੁਚ੍ਚ, ਸਖਿਨੋ ਬ੍ਰਾਹ੍ਮਣਸ੍ਸ ਚ;

ਅਤ੍ਤਨੋ ਚਾਪਿ ਪਞ੍ਚਾਲੋ, ਛਨ੍ਨਂ ਚਜਤਿ ਜੀਵਿਤਂ.

੨੫੭. ਏਵਂ ਮਹਤ੍ਥਿਕਾ [ਖਹਿਦ੍ਧਿਯਾ (ਸ੍ਯਾ.), ਮਹਿਦ੍ਧਿਕਾ (ਕ.)] ਪਞ੍ਞਾ, ਨਿਪੁਣਾ ਸਾਧੁਚਿਨ੍ਤਿਨੀ;

ਦਿਟ੍ਠਧਮ੍ਮਹਿਤਤ੍ਥਾਯ, ਸਮ੍ਪਰਾਯਸੁਖਾਯ ਚਾਤਿ.

ਦਕਰਕ੍ਖਸਜਾਤਕਂ ਸਤ੍ਤਮਂ.